لو طال ظلام الليل
شمس الأمل حاتبين
والنصر جاي اكيد 
لو حتي بعد سنين
في جيشنا قوتنا
وان شاء الله منتصرين
الجيش خيارنا وبس
ومعاهو نحن نقيف
ومصيرها شمس الحق
تقتل ظلام الزيف..
يتعافى سودانا...
كل المدن والريف
الجاي احلي اكيد..
والفات سحابة صيف 
#زوبه عثمان

انا حبيت....
احساس الطيبه 
وناس تتوالف...
تبقى قريبه
وناس بتصون...
العشره تملي 
وناس في بعدها...
تحس بالغيبه
ناس تتمني..
الخير لي غيرها
وناس حاشاها ...
تسوي العيبه
ناس لو مهما ..
بتقسي عليهم
فيهم جد...
حنيه غريبه...
ناس بلقوك ..
بالبسمه الحلوه 
ناس مليانه...
سماحه وطيبه
ناس بي ....
شوفتهم زاتك تفرح 
تحس الدنيا دي....
زاتا عجيبه
انا حبيت...
احساس الطيبه 
ناس تتوالف ..
وتبقي قريبه 
#زوبه عثمان

المرأة نص المجتمع
اهديها أفراح السنين
ليه نصيبا يكون وجع؟
بي كلمه طيبه وبسمتين
من عينا تنزل دمعتين
فرح قليبا بكلمتين....
تلقي البريق في العين لمع
اديها انت الاحترام 
اديها حبه اهتمام 
لو تقسى لا بد تلين
محتاجه بس حبة دلع
المرأة نص المجتمع
اهديها أفراح السنين
ليه نصيبا يكون وجع؟؟
#زوبه عثمان 
#احترامك وحبك لي امك واختك وزوجتك مابكلفك شي بس بيعني ليهم كتير ..

كتر خير الشوق الجابك 
وخلاك لينا تحن وتواصل 
تسأل كيفم ووين احبابك
بعد الجفوه تحن وتراسل
بعد سنين عدت في غيابك
جاي بتسأل عن الحاصل
انا والشوق دايما علي بابك
ودايما نسأل كيفن عامل
كتر خيرك انو طريتنا
انت سحاب المطره الراحل
قلبي بريدك رغم جفاك
وجد احساسك دايما واصل
#زوبه عثمان

قلبي شلتو معاك
لمن نويت ترحل 
وانا عمري ضاع
في رجاك.......!!!!
قضيتو كلو زعل
انا قلبي من رادك 
كترتا اهاتو.....!!!!
بس جرحو ايه فادك
قللتا ضحكاتو
ياريت تواسيهو 
وتمسح دميعاتو
لو درتا جد تمشي
اذنك معاك ابعد 
قبلك كتار فاتو
لا تجيني في الاحلام
لا تمشي في دربي
بنساك عادي واعيش
بتطيب جراح قلبي
اصلو الغرام اقسام
مقسوم اريدك انا
ومكتوب عليك غلبي
#زوبه عثمان

لقيتك انت ماسائل 
قلتا اجي وعليك اسأل
اتشابيت علي دنياك
ومافاكراك في يوم ترحل
لقيتك زي نسيتني زمان
وقلبك انت اتحول.....
رجيتك مرة تطراني
وفاكراك لسه زي اول
تمشي تغيب وتنساني
كيفن يعني ماازعل!!؟؟؟
ولو ماجابك احساسك
ممكن عادي جد ترحل
وقلبي الرادك انت زمان 
محال عن ريدو يتبدل
ولا بِقدر يجافيك يوم
حتي جفاك لو طول
لقيتك انت ماسائل 
قلت اجي وعليك اسأل 
#زوبه عثمان

عايزه احكي
عن معاناة شعب كامل
عن مأسي وعن قواسي
لا بكذب لا بجامل
كان عشمنا بانو نعبر
وقلنا نتحمل ونصبر 
لا عبرنا وبس صبرنا
وهسه زاتو كمل صبرنا
ربي بيكم اختبرنا
لا في تعيلم لا في صحه
شعب كم بي روحو ضحه
كنا عشمانين بانو
نلقى خير بس ضاع املنا
نحن جبناكم برانا
والحصل بس من جهلنا
دوله مليانه وبي خيرا
وناس كتار مجهول مصيرا
نحن عايزين.. لي بلدنا 
زول يحس بالنحن فيهو
ويوم نقع بيكون سندنا
ماضروري حزب سياسي
زول يخاف بس الله فينا 
ومابتغريهو الكراسي. 
قلبو ديمه يكون علينا ....
ياهو دا الشرط الاساسي
#زوبه عثمان

رتبتا تاني الامنيات
برضك بقيت في اولا
صدقني مابتشوف بلاك
عيوني عندك اسألا...
انت الجمال ألفي الوجود
بقولا ليك على الملا
أحلامي صبحت بين ايديك
وانا خوفي تنسى وتجهلا
قلبي البريدك روحو فيك
في لحظه ليك جد ما سًلا
انا راجيه منك كلمة بس
لو حتى ياخي مجاملا
بتفوتني كيف من غير سلام
ولا حتي بس قولة هلا....؟؟
وانا لسه شايلاك في العيون 
في مكانه ماف زول بوصلا

#زوبه عثمان

الليالي تعدي بينا
وقلنا باكر نحن ننسى
والأماني تفوت علينا
والحنين يبقالنا مرسى
راح زمن مااظن بجينا
وليه قلوب الناس بتقسى
كان زمان بيحس بينا
الا هسه صبح هو أقسى
وكان بشوف ريدو في عنينا
وكان دروبنا عليهو بترسى
لا نحن زي زمان بقينا
ولا هو فاكر لينا هسى
#زوبه عثمان

عيني تسهر وهو نايم
كلميهو يانسايم
قولي ليهو الشوق غلبني
وليه دوام في خاطري حايم؟؟