لقيتك انت ماسائل 
قلتا اجي وعليك اسأل
اتشابيت علي دنياك
ومافاكراك في يوم ترحل
لقيتك زي نسيتني زمان
وقلبك انت اتحول.....
رجيتك مرة تطراني
وفاكراك لسه زي اول
تمشي تغيب وتنساني
كيفن يعني ماازعل!!؟؟؟
ولو ماجابك احساسك
ممكن عادي جد ترحل
وقلبي الرادك انت زمان 
محال عن ريدو يتبدل
ولا بِقدر يجافيك يوم
حتي جفاك لو طول
لقيتك انت ماسائل 
قلت اجي وعليك اسأل 
#زوبه عثمان

عايزه احكي
عن معاناة شعب كامل
عن مأسي وعن قواسي
لا بكذب لا بجامل
كان عشمنا بانو نعبر
وقلنا نتحمل ونصبر 
لا عبرنا وبس صبرنا
وهسه زاتو كمل صبرنا
ربي بيكم اختبرنا
لا في تعيلم لا في صحه
شعب كم بي روحو ضحه
كنا عشمانين بانو
نلقى خير بس ضاع املنا
نحن جبناكم برانا
والحصل بس من جهلنا
دوله مليانه وبي خيرا
وناس كتار مجهول مصيرا
نحن عايزين.. لي بلدنا 
زول يحس بالنحن فيهو
ويوم نقع بيكون سندنا
ماضروري حزب سياسي
زول يخاف بس الله فينا 
ومابتغريهو الكراسي. 
قلبو ديمه يكون علينا ....
ياهو دا الشرط الاساسي
#زوبه عثمان

رتبتا تاني الامنيات
برضك بقيت في اولا
صدقني مابتشوف بلاك
عيوني عندك اسألا...
انت الجمال ألفي الوجود
بقولا ليك على الملا
أحلامي صبحت بين ايديك
وانا خوفي تنسى وتجهلا
قلبي البريدك روحو فيك
في لحظه ليك جد ما سًلا
انا راجيه منك كلمة بس
لو حتى ياخي مجاملا
بتفوتني كيف من غير سلام
ولا حتي بس قولة هلا....؟؟
وانا لسه شايلاك في العيون 
في مكانه ماف زول بوصلا

#زوبه عثمان

الليالي تعدي بينا
وقلنا باكر نحن ننسى
والأماني تفوت علينا
والحنين يبقالنا مرسى
راح زمن مااظن بجينا
وليه قلوب الناس بتقسى
كان زمان بيحس بينا
الا هسه صبح هو أقسى
وكان بشوف ريدو في عنينا
وكان دروبنا عليهو بترسى
لا نحن زي زمان بقينا
ولا هو فاكر لينا هسى
#زوبه عثمان

عيني تسهر وهو نايم
كلميهو يانسايم
قولي ليهو الشوق غلبني
وليه دوام في خاطري حايم؟؟

رميت همومي علي البحر
تاري البحر شايل هموم
شكيت هموم قلبي الصبر
واقول مصيري افرح في يوم
انا يابحر كايسه الفرح 
جاياك يمكن اوصلو 
واغسل جراحاتي البقن 
دايما معاي بترحلو 
انا يابحر قلبي اتظلم
ممكن تشوفو واسألو
قول ليهو مين البدلك 
وعذابو مين الكترو 
وانا يابحر بهواه كتير
وريدي السنين ماتبدلو 
#زوبه عثمان

نفسي مره اقدر امسح
دمعة من عين الغلابه
ويوم أحقق بس امالهم
وترحل الأحزان سحابه
نفسي اشيل هم كل الغلابه
كل زول جواهو اهه
وكم قلوب الهم شاااااابا
ناس بتتعب يوما كلو
ومافي زول حاسي بعذابا
وناس تحس الضحكه فيهم
جواهم الدمعات صبابه
من زمان دايما بفكر
كنت في حال الغلابه
شوفتا أطفال في الشوارع
تاهو في الزحمه وضبابه.
وناس تحت شمس الله قاعده
وهمهم لقمه وشرابا
وناس زمان خلو الدراسه
عشان رسومها عشان كتابه
نفسي مره اقدر امسح
دمعة من عين الغلابه
#زوبه عثمان

سرحانه مع طِيفك انا
ومُناي بس القاك هِنا
تاهت درُوبك عني ليه؟؟
مُحتاره فيك الاّمكنه
ومُحتار معاك قلبي الهواك
بِيحلم معاك يلقى الهنا
عشمان وما قطع العَشم
لكن غِيابك طال سنه 
مُحتاره في ريدك انا
مُحتاره في شُوقِي وبُكاي
حَيْرانه كيف القى الهنا
وياغالي عِينيك مامعاي؟؟
اليوم بِمُر زي السنه....
وكُل لحظه بِتزود اساي
ياغالي جد كُل العَنا ....
إنك تكون فَرحِي وشقَاي
إنك تكون كل المُنا
إنك تكون نارِي وأزاي
#زوبه عثمان

في ناس في الدنيا تِتْفارق
وما بِشُوفو ابدآ بعض
غرِيبه الدُنيا بِتْفرِق
تخلِي قُلوبنا تنْسى الوعد
زمان ماقُلنا مابِنبْعد
غريبه الليله بِعنا العَهْد
وكُل الباقِي من الفات
دمعة حزِينه ماليه الخَد
غرِيبه العُشره بنسُوها
يقابلو الريده ليه بالصد
وكل القُلنا بِنريدو...!!!!
بِنلقى جفاهو فات الحد 
فِي ناس مابَِتعرِف الإخلاص 
وناس في الريده مابِتَسعد
وناس محكومه بالأقدار 
تعِيش أياما كُلها نكد
في ناس في الدنيا تِتْفارق 
ومابِشوفو ابدآ بعض 
!!!
#زوبه عثمان

إتاخــــرتا 

إتاخرتا......
وبين خطوات
إحساسي مشيت
وليه مابِنتا...؟؟؟
وكُنت بفتش ليك جواي
ومابلقاك انا إتيقنتا
بين دقات القلب الرادك
إتاخرتا....
مرة جفاك ومرة ودادك
واستعجلتا...
انك تمشي تسوق خطواتك
واتنكرتا....
إتاخرتا وناسي ميعادك
وانا إحترتا
امشي واسيبو معاك سهادك
وتبقي خسرتا.....
ودايما ناكر انت جمايلي
وانا ماقصرتا ..
إتأخرتا
#زوبه عثمان