ﻭﺣﺎﺓ ﺍﻟﺮﻳﺪﺓ
ﻭﺣﺎﺓ ﺍﻟﺮﻳﺪﺓ ﻣﺎ ﺑﻘﺪﺭ ﺍﻗﻮﻝ ﻟﻠﺮﻳﺪﺓ ﺗﺘﺨﻔﻰ ..
ﻭﺣﺎﺓ ﺍﻟﺸﻮﻕ ﻧﺰﻓﺖ ﺍﻟﺸﻮﻕ ﻭﺩﻡ ﺃﺷﻮﺍﻗﻲ ﺍﺗﺼﻔﺎ ..
ﻭﺣﺎﺓ ﺍﻟﺒﻴﻨﻨﺎ ﺍﺻﻠﻮ ﺍﻟﺒﻴﻨﻨﺎ ﻣﺎ ﺑﺲ ﻟﻘﻴﺎ ﺑﺎﻟﺼﺪﻓﺔ ..
ﻛﺘﺒﺖ ﻫﻮﺍﻙ ﺑﻲ ﺩﻣﻲ ﻭﻛﺘﺎﺏ ﺍﻟﺤﺐ ﻧﺸﻒ ﺟﻔﺎ ..
ﻻﻣﻦ ﺍﻧﺖ ﺗﺒﻘﻰ ﺑﻌﻴﺪ ﻭﺍﻟﻘﻰ ﺍﻟﺪﻣﻊ ﻣﺎ ﻭﻓﻰ ..
ﺑﺸﻴﻞ ﺍﻟﺼﺒﺮ ﻛﺎﺱ ﻇﻤﺄﻱ ﻭﺑﻲ ﻧﺎﺭ ﺷﻮﻗﻚ ﺇﺗﺪﻓﺎ ..
ﻭﺍﻗﻮﻝ ﺑﻜﺮﺓ ﺍﻟﻘﺮﻳﺐ ﺑﻠﻘﺎﻙ ﻭﺑﻜﺮﺓ ﻳﻔﻮﺕ ﻭﻣﺎ ﺗﺮﺟﻊ ﺍﺿﻮﻕ ﺍﻟﺼﺒﺮ ﻣﻦ ﺗﺎﻧﻲ ﻭﺍﻻﻗﻲ ﺍﻟﺪﻣﻊ ﻣﺎ
ﻛﻔﻰ ..
ﻭﺣﺎﺗﻚ ﻻ ﺑﻨﺎﻡ ﺍﻟﻠﻴﻞ ﻭﻻ ﻃﺮﻑ ﺍﻟﺠﻔﻦ ﺑﻐﻔﺎ ..
ﻭﺣﺎﺓ ﺩﻣﻌﻲ ﺍﻟﺬﺭﻓﺘﻮ ﻋﻠﻴﻚ ..
ﻭﺣﺎﺓ ﺟﻔﻨﻲ ﺍﻟﻄﺮﻑ ﺭﻓﺎ ..
ﺑﺮﻳﺪﻙ ﻭﺍﻧﺖ ﻋﺎﻟﻢ ﺑﻲ ﻭﺑﺪﻟﺖ ﺍﻟﻤﺤﻨﺔ ﺟﻔﺎ ..
ﻻﻣﻦ ﺍﻧﺖ ﺗﺮﺟﻊ ﻟﻲ ﺑﻴﻤﻮﺕ ﺣﺰﻧﻲ ﻭﺑﻴﺘﻮﻓﻰ ..
ﺍﺳﺎﻟﻢ ﻛﻔﻚ ﺍﻟﻨﺎﺩﻱ ﻭﺍﻻﻗﻲ ﻋﻴﻮﻧﻚ ﺍﻟﻤﺮﻓﺎ ..
ﻭﺍﺣﺲ ﺑﺎﻟﻔﺮﺣﺔ ﻏﺎﻣﺮﺍﻧﻲ ﻭﺑﻴﺘﻈﻬﺮ ﻓﻲ ﺍﻟﻌﻴﻮﻥ ﻟﻬﻔﺔ ..
ﻭﺍﺗﻤﺘﻢ ﻓﻲ ﺍﻟﻜﻼﻡ ﻭﺍﺧﺠﻞ ﺗﻤﻮﺕ ﺍﻃﺮﺍﻓﻲ ﺑﺎﻟﺮﺟﻔﺔ ..
ﻣﻼﻣﺢ ﺍﻟﺮﻳﺪﺓ ﺗﺮﺳﻤﻨﻲ ﻭﺃﺯﻳﺪ ﻓﻮﻕ ﺍﻟﺨﺠﻞ ﻋﻔﺔ ..
ﻭﺍﺧﺒﻲ ﺍﻟﺮﻳﺪﺓ ﻣــــــــــــــــــــــــﺎﺍﺍ ﺑﻘﺪﺭ ..
ﻭﺣﺎﺗﻚ ﺻﻌﺒﺔ ﻣﺎﺑﻘﺪﺭ ﺍﺧﻠﻲ ﺍﻟﺮﻳﺪﺓ ﺗﺘﺨﻔﻰ

ﺑﻄﺮﺍﻙ ﻓﻲ ﻛﻞ ﺍﻟﻌﺸﺘﻮ ﻣﻌﺎﻙ
ﻓﺮﻉ ﺍﻟﻠﺒﻼﺏ ﺍﻟﺒﻴﺘﺎﻭﻕ ﻣﻦ ﺳﻘﻔﺔ ﺑﻴﺘﻨﺎ ﺍﻟﻤﻌﺮﻭﺷﺔ ﻭ ﻳﺘﺼﻨﺖ ﻭﻧﺴﺎﺕ ﺍﻟﺸﺎﺭﻉ ﻣﻨﻘﻮﻻ ﺻﺤﻴﺤﺎ ﻭ ﻣﻐﺸﻮﺷﺎ
ﻓﻲ ﺍﻟﺼﺤﻦ ﺍﻟﻤﻤﺪﻭﺩ ﺑﺎﻟﺤﻴﻄﺔ ﻭ ﻓﻲ ﺍﻟﺠﺎﺭﺓ ﺍﻟﻤﻦ ﻳﻮﻣﺎ ﺑﺸﻮﺷﺔ
ﻓﻲ ﺍﻟﺸﺪﺭﺓ ﺍﻟﺮﺍﻣﻴﺔ ﻇﻼﻝ ﺍﻟﺤﻦ ﻭ ﺧﺮﻳﻄﺔ ﺍﻟﻤﺎﺿﻲ ﺍﻟﻤﻨﻘﻮﺷﺔ
ﻭ ﻓﻲ ﺍﻟﺼﻮﺕ ﺍﻟﺤﺎﻟﻒ ﻧﺒﻨﻴﻬﻮ ﻭ ﻓﻲ ﻗﺼﺔ ﻣﻴﺮﻱ ﻭ ﻋﻴﻮﺷﺔ
ﻭ ﻓﻲ ‏( ﺍﻟﻜﻮﺯ ‏) ﺍﻟﻜﺸﺢ ﻣﻮﻳﺔ ﺍﻟﺒﻴﻦ ﻭ ﺍﻟﺪﻕ ﻧﺤﺎﺱ ﺍﻟﻤﻨﺤﻮﺳﺔ
# ﻭﺋﺎﻡ _ ﻛﻤﺎﻝ _ ﺍﻟﺪﻳﻦ
ﻣﻦ ﻗﺼﻴﺪﺓ ﺷﺎﻓﻌﺔ ﺃﺣﻼﻣﻲ

ﺻﺒﺤﻮ ﺇﺫﺍ ﺗﻨﻔﺲ
ﻏﺎﺯﻱ ﺭﺋﺎﻱ ﻣﺤﺒﺔ
ﻭﻣﺘﺴﺎﻣﻲ ﺍﻟﻄﺒﻴﻌﺔ
ﺟﺎﻣﺪ ﻓﻲ ﺫﻫﻮﻟﻲ
ﻧﺎﺩﻯ ﺍﻟﺤﺲ ﻓﻠﺒّﻰ
ﻭ ﺍﻷﻋﺼﺎﺏ ﻣﻄﻴﻌﺔ
ﻣﺘﺄﺧﺮ ﺧﺮﻳﻔﻮ
ﻏﺎﺏ ﻣﻦ ﺛﻢ ﺻﺐَّ
ﺩﻣﻌﺎﺗﻮ ﺍﻟﺸﻔﻴﻌﺔ .....
ﺍﻟﺤﻲ ﻓﻲ ﻭﺟﻮﺩﻭ
ﺣﻴﻦ ﺍﻟﺤﻀﺮﺓ ﺃﻟﺤﺪ
ﺑﺎﻟﻄﻴﻒ ﻓﻲ ﺩﻗﻴﻘﺔ
ﺍﻟﺮﻭﺡ ﻓﻲ ﺍﻧﺠﺬﺍﺑﺎ
ﺩﺭﻭﻳﺶ ﻓﻲ ﺍﻟﺘﻌﺒﺪ
ﺻﻮﻓﻲ ﺍﻟﻄﺮﻳﻘﺔ
ﻗَﺎﻝ َﺗﻌﺎﻟﻰ ﺣﺘﻰ
ﻛﻞ ﺍﻟﻜﻮﻥ ﺗﻮﺣﺪ
ﻓﻲ ﺫﺍﺕ ﺍﻟﺤﻘﻴﻘﺔ ......
ﺳﺎﺑﺢ ﻓﻲ ﻣﺪﺍﺭﻭ
ﺃﺑﺤﺮ ﻟﻲ ﺳﻤﺎﺭﻭ
ﻓﻮﻕ ﺿﻔﺔ ﺳﻼﻡ
ﻓﻲ ﺷﺎﻃﻴﻬﻮ ﻃﺎﺑﻊ
ﺁﺛﺎﺭ ﺍﻟﺘﺮﺟﻞ
ﻛﻲ ﺗﺼﺒﺢ ﻣﻘﺎﻡ
ﻗﻠﻌﺔ ﻃﻴﻦ ﺑﺘﺤﻜﻲ
ﻣﺎﺻﻨﻌﺖ ﺣﺒﻴﺒﺔ
ﻭﻣﺎ ﻫﺪ َّﺍﻟﻐﺮﺍﻡ ......
ﻏﺮﺩﺕ ﺍﻟﺤﻤﺎﻣﺔ
ﻟﻠﺴﻤﺎ ﻓﻲ ﺍﻋﺘﺼﺎﻣﺎ
ﺃﻥَّ ﺍﻟﻠﻴﻞ ﻧﺰﻝ
ﻛﻬﺮﺑﺖ ﺍﻟﻐﻤﺎﻣﺔ
ﻭﺍﻟﻨﺪﻯ ﻓﻲ ﻣﺴﺎﻣﺎ
ﻳﻮﺻﻞ ﻣﺎ ﺍﻧﻔﺼﻞ
ﺍﻟﺒﺮﻕ ﺍﺑﺘﺴﺎﻣﺔ
ﺣﻴﻦ ﻳﻔﻠﺖ ﺯﻣﺎﻣﺎ
ﻛﻞ ﺍﻟﻜﻮﻥ ﻭﺻﻞ ........
# ﻭﺋﺎﻡ _ ﻛﻤﺎﻝ _ ﺍﻟﺪﻳﻦ

ﺃﻧﺎ ﻭﺍﻷﺷﻮﺍﻕ ﻭﺍﻟﺮﻳﺪ ﻭﺍﻟﺒﻴﻦ
ﻭﺍﻟﻠﻬﻔﺔ ﺍﻟﺪﺍﻳﻤﺎ ﻣﺎﻟﻴﺎﻧﺎ ..
ﻓﻲ ﺣﻀﺮﺓ ﻃﻴﻔﻚ ﻣﺘﻠﻤﻴﻦ
ﻣﺮﺍﺕ ﺇﺣﺴﺎﺳﻚ ﺑﻐﺸﺎﻧﺎ ..
ﻓﺘﺤﻨﺎ ﺟﺮﻭﺣﻨﺎ ﻭ ﻛﻞ ﻣﺎ ﺗﺒﻴﻦ
ﺍﻟﺬﻛﺮﻯ ﺍﻟﺪﺍﻳﻤﺎ ﻻﻣﺎﻧﺎ ..
ﻧﻌﺰﻣﺎ ﺗﺘﻔﻀﻞ ﻣﺒﺘﺴﻤﻴﻦ
ﻭﺣﺒﺎﺑﺎ ﺑﺘﺴﻌﺪ ﻧﺠﻮﺍﻧﺎ ..
ﺃﻫﺎ ﻻﻣﻦ ﻣﺮ ﻋﻠﻴﻨﺎ ﺣﻨﻴﻦ
ﻭﻋﺰﻣﻨﺎﻫﻮ ﺍﻟﻘﻌﺪﺓ ﻣﻌﺎﻧﺎ ..
ﻛﻞ ﻣﺎ ﻳﺸﺮﺡ ﻛﻴﻒ ﻣﺸﺘﺎﻗﻴﻦ
ﺃﺷﻮﺍﻗﻚ ﺗﻀﺤﻚ ﻏﺎﻣﺮﺍﻧﺎ ..
ﻭﺑﺪﻳﻨﺎ ﺍﻟﻮﻧﺴﺔ ﺧﺸﻢ ﺧﺸﻤﻴﻦ
ﻗﺎﻡ ﺩﻕ ﺍﻟﻨﻮﻡ ﺑﺎﺑﻨﺎ ﻭﺟﺎﻧﺎ ..
ﺩﺧﻞ ﻃﻴﻔﻚ ﺟﻮﺓ ﺍﻟﻌﻴﻨﻴﻦ
ﺇﺗﺨﻴﻞ ﺧﻼﻧﺎ ﺑﺮﺍﻧﺎ .. !!!
ﻭ ﺃﻧﺎ ﻋﺸﺖ ﻣﻌﺎﻙ ﻓﻲ ﺣﻠﻤﻲ ﺳﻨﻴﻦ
ﻭﺑﻨﻴﺖ ﻓﻲ ﺍﻷﺣﻼﻡ ﺩﻧﻴﺎﻧﺎ ..
ﻭﺍﻟﺸﻮﻕ ﻭﺍﻟﺤﻦ ﻭﺍﻟﻜﻞ ﻋﺎﺭﻓﻴﻦ
ﺑﻲ ﺣﺎﻝ ﺍﻟﺮﻳﺪﺓ ﺍﻟﻈﺎﻟﻤﺎﻧﺎ ....
ﻟﻮ ﻣﺮﺓ ﺗﻔﻜﺮ ﺇﻧﻮ ﺗﻠﻴﻦ
ﻭﺗﺮﺍﺿﻲ ﺭﺅﺍﻧﺎ ﺍﻟﻌﺸﻤﺎﻧﺔ ..
ﺣﻨﻜﻮﻥ ﻭﺣﻴﺎﺗﻚ ﻣﻤﺘﻨﻴﻦ
ﻳﺎ ﺭﻳﺖ ﺗﺘﻜﺮﻡ ﻭﺗﻄﺮﺍﻧﺎ

ﺍﻟﺸﻮﻕ ﺍﻧﺤﻴﺎﺯﻱ
ﻭﺍﻟﺨﻮﻑ ﺍﺣﺘﺮﺍﺯﻱ
ﻭﻧﻘﻄﺔ ﺍﺭﺗﻜﺎﺯﻱ ﻛﺎﻧﺖ ﺍﻟﺘﺒﺎﺱ
ﺍﻟﺨﻮﻑ ﻣﺎ ﺗﻮّﺟﺲ ﻓﻲ ﻋﻤﻖ ﺍﻟﺤﻮﺍﺱ
ﻭﺍﻟﺸﻮﻕ ﺃﻥ ﺗﻬﺠِّﺲ ﻣﻦ ﺩﻭﻥ ﺍﻟﺘﻤﺎﺱ
ﺍﻟﺨﻮﻑ ﻭ ﺍﻟﺮﻗﺎﺑﺔ ﻣﻠﻌﺒﻢ ﺍﻟﻤﻬﺎﺑﺔ ﻓﻲ ﺧﻂ ﺍﻟﺘّﻤﺎﺱ
ﻭﺍﻟﺸﻮﻕ ﻭ ﺍﻟﺘﻤﻨﻊ ﻣﻨﻬﺠﻢ ﺍﻟﺘﺼﻨﻊ ‏( ﺃﻥْ ﺻﻌﺐ ﺍﻟﻤﺮﺍﺱ ‏)
ﻣﻦ ﺩﻭﻥ ﺍﺧﺘﻴﺎﺭﻱ
ﺑﻴﻦ ﺧﻮﻑ ﺍﻧﻬﻴﺎﺭﻱ
ﻭﺍﻟﺸﻮﻕ ﺍﻟﺤﺮﺍﺭﻱ ﻛﺎﻥ ﺍﻻﺣﺘﺒﺎﺱ
ﻓﻴﺎ - ﺗﺨﺘﻢ ﺟﻮﺍﺯﻱ -
ﺃﻭ - ﺗﺨﺘﻢ ﺟﻮﺍﺯﻱ -
ﺧﻄﻴﻦ ﺑﺎﻟﺘﻮﺍﺯﻱ
ﻭ ﻳﺮﺟﻰ ﺍﻻﺣﺘﺮﺍﺱ

ﻓﺎﻛﺮ ﻧﻔﺴﻚ ﻻﻋﺐ ﺑﻴﻬﺎ؟
ﻣﺮﺟﻴﺤﺔ ﺗﻼﻋﺒﻚ ﻭ ﺇﺕ ﻣﺒﺴﻮﻁ
ﻗﻠﺒﻚ ﻣﺴﻜﻴﻦ ﺃﻣﻦ ﻟﻴﻬﺎ
ﺧﺸﺒﺔ ﻭﻋﺮﺍﺿﺔ ﺣﺒﻞ ﻣﺮﺑﻮﻁ
ﻣﺎﺑﻴﻦ ﻋﺎﻟﻴﻬﺎ ﻭ ﻭﺍﻃﻴﻬﺎ
ﻭﺍﻃﻴﻬﺎ ﺍﻟﻐﻢ ﻭﺍﻟﺪﻧﻴﺎ ﺗﺠﻮﻁ
ﺃﻫﻲ ﺑﺲ ﺃﻳﺎﻡ ﺑﻨﻌﺪﻳﻬﺎ
ﺇﺣﺴﺎﺱ ﺃﻓﺮﺍﺡ ﺑﺎﻟﻬﻢ ﻣﺨﻠﻮﻁ
ﻣﺎﺑﻴﻦ ﺟﺮﺓ ﺷﻬﻘﺔ ﻭ ﺯﻓﺮﺓ
ﻣﺴﻜﻴﻦ ﺍﻟﻮﻃﻦ ﺍﻟﻤﺘﺮﺗﻮ ﻭ ﻣﺠﻨﻮﻧﺔ ﺧﻴﺎﻻﺕ ﺍﻟﻔﻜﺮﺓ
ﻭﻋﻠﺸﺎﻥ ﻣﺎ ﺗﺤﺲ ﺑﻲ ﺇﻧﻚ ﻓﻮﻕ
ﻻﺑﺪ ﻏﻴﺮﻙ ﻳﺪﻳﻚ ﺩﻓﺮﺓ
ﻭﻗﺒﺎﻝ ﻣﺎ ﺗﺸﻤﻮ ﻧﺴﻴﻢ ﺍﻟﻨﻴﻞ
ﻻﺯﻡ ﺗﻌﺮﻑ ﺭﻳﺤﺔ ﺍﻟﻐﺒﺮﺓ
ﻭ ﺃﻛﻴﺪ ﻗﺒﻞ ﺩﻣﻮﻉ ﺍﻟﻔﺮﺣﺔ
ﺣﻴﻀﻮﻕ ﺣﻠﻘﻚ ﻃﻌﻢ ﺍﻟﻌﺒﺮﺓ
ﺣﺒﻴﺘﻚ ﺑﻲ ﻣﻨﻄﻖ ﺷﻔﻊ
ﻣﺎ ﻋﺮﻓﻮ ﺍﻟﺤﺐ ﻏﻴﺮ ﺑﺎﻟﻔﻄﺮﺓ
ﻳﺘﺸﺎﺑﻮ ﻋﺸﺎﻥ ﻳﻠﻤﺴﻮ ﻏﻴﻤﺔ
ﻭ ﻳﻤﺪﻭ ﻛﻔﻮﻓﻢ ﻟﻠﻘﻤﺮﺓ
ﻳﺘﺸﺒﻜﻮ ﻓﻴﻬﺎ ﻭ ﺍﺫﺍ ﻏﺎﺑﺖ
ﻋﻴﻨﻴﻬﻢ ﺗﻔﻀﻞ ﻣﻨﺘﻈﺮﺓ
ﺩﻣﻌﺎﺗﻢ ﺗﺠﺮﻱ ﺇﺫﺍ ﺻﺪ
ﺍﻟﻤﺤﺒﻮﺏ ﺃﻭ ﻏﻴﺮ ﻓﻲ ﺍﻟﻨﺒﺮﺓ
ﻭ ﺇﺫﺍ ﺟﺮﺣﺖ ﻫﻮﺍﻫﻢ ﻳﻮﻡ
ﺑﺲ ﺃﺿﺤﻚ ﻭﺍﻟﺠﺮﺡ ﺣﻴﺒﺮﺍ
ﺣﺒﻴﺘﻚ ﻭﻗﺎﻟﻮ ﺍﻟﺤﺐ ﻧﻌﻤﺔ
ﻭﺍﻟﺮﻳﺪﺓ ﺍﻟﻬﻴﻦ ﺗﺠﺮﻳﺤﺎ
ﺷﻔﺎﻓﺔ ﻛﻤﺎ ﻣﻮﻳﺔ ﺍﻟﻜﻠﻤﺔ
ﻭﺍﻟﻠﻬﻔﺔ ﺍﻟﺰﺍﻳﺪﺓ ﺗﺒﺎﺭﻳﺤﺎ
ﺳﺎﻳﻘﺎﻧﻲ ﺧﻄﺎﻫﺎ ﻋﻠﻲ ﺍﻟﻀﻠﻤﺔ
ﻭ ﺃﺷﻮﺍﻗﻲ ﺍﻟﻤﺘﺮﺍﻣﻴﺔ ﻃﺮﻳﺤﺔ
ﻣﺎﻋﺮﻓﺖ ﺇﻧﻮ ﺍﻟﺤﺐ ﺃﻋﻤﻰ
ﻭ ﺑﺘﻄﻮﻃﺢ ﻣﺘﻞ ﺍﻟﻤﺮﺟﻴﺤﺔ
ﻳﺎ ﻋﺎﺷﻖ ﻭﻭﺍﺻﻠﻚ ﻃﺮﻑ ﺍﻟﺴﻮﻁ
ﻓﺎﻛﺮ ﻧﻔﺴﻚ ﻻﻋﺐ ﺑﻴﻬﺎ؟؟
ﻣﺮﺟﻴﺤﺔ ﺗﻼﻋﺒﻚ ﻭﺇﺕ ﻣﺒﺴﻮﻁ
ﻗﻠﺒﻚ ﻣﺴﻜﻴﻦ ﺁﻣﻦ ﻟﻴﻬﺎ
ﺧﺸﺒﺔ ﻭﻋﺮﺍﺿﺔ ﺣﺒﻞ ﻣﺮﺑﻮﻁ
ﻣﺎﺑﻴﻦ ﻋﺎﻟﻴﻬﺎ ﻭ ﻭﺍﻃﻴﻬﺎ
ﻭﺍﻃﻴﻬﺎ ﺍﻟﻐﻢ ﻭﺍﻟﺪﻧﻴﺎ ﺗﺠﻮﻁ
ﺃﻫﻲ ﺑﺲ ﺃﻳﺎﻡ ﺑﻨﻌﺪﻳﻬﺎ
ﺇﺣﺴﺎﺱ ﺃﻓﺮﺍﺡ ﺑﺎﻟﻬﻢ ﻣﺨﻠﻮﻁ

ﻣﺎ ﻳﻘﻮﻟﻮ ﺍﻟﻨﺎﺱ ﻛﺎﻥ ﻗﺎﻟﻮ ..
ﻣﺎ ﺃﺻﻠﻮ ﺑﻠﺪﻧﺎ ﺩﻩ ﺣﺎﻟﻮ ..
ﺑﻨﺤﺐ ﺑﻲ ﺻﻤﺖ ﻣﻐﻠﻒ ..
ﻭ ﻛﻼﻣﻨﺎ ﻏﺮﻳﺐ ﻣﻮﺍﻟﻮ ..
ﺣﻴﻘﻮﻟﻮ ﺑﻤﻌﻨﻰ ﻣﻘﻠﺒﻦ ..
ﺇﻧﻚ ﻣﺴﺘﻌﻤﺮ ﻗﻠﺒﺎ ..
ﺑﺎﻧﻴﺒﻚ ﻛﻞ ﺁﻣﺎﻟﻮ ..
ﻭ ﺣﺮﻭﻑ ﺗﺴﺘﺮﺳﻞ ﺳﺮﺩﺍ ..
ﺗﻤﺪﺩ ﻃﻮﻻ ﻭﻋﺮﺿﺎ ..
ﻭﻛﻼﻡ ﺑﻴﺠﺮﺡ ﻋﻤﺪﺍ ..
ﻭﺧﻼﺻﺘﻮ ﺑﺤﺒﻚ ﺟﺪﺍ ..
ﻳﺎﺥ ﺃﻳﻮﺓ ﺑﺤﺒﻚ ﻭﻣﺎﻟﻮ

ﺍﻟﺒﺎﻗﻲ ﻟﻴﻚ ﺧﻤﺴﺔ
ﺍﺧﺘﺎﺭ ﺭﻗﻢ ﺣﺰﻧﻚ
ﻣﺎ ﺗﻘﻮﻟﻮ ﻳﺎ ﺍﻟﻐﺒﻴﺎﻥ ....
ﻭﺍﻟﺪﻙ ﻣﻼﻫﻮ ﺍﻟﻬﻢ
ﻭ ﺃﺩﺍﻙ ﻛﻤﺎﻥ ﻗﺪﺭﻭ
ﺷﺎﻥ ﺃﻧﻬﻜﻮ ﺍﻟﺤﺮﻣﺎﻥ ....
ﻭﺃﻧﺎ ﺭﻏﻢ ﻗﺮﺑﻚ ﻟﻲ ﺯﺩﺗﻚ ﻋﻠﻴﻮ ﻋﺸﺮﺓ :
ﺍﻟﻔﻘﺮ ﻭ ﺍﻟﺤﺎﺟﺔ
ﻭ ﺍﻟﺪﻣﻌﺔ ﻭ ﺍﻟﻌﺒﺮﺓ
ﻭﻋﻄﺎﻟﺔ ﻭ ﺍﺳﺘﻐﻼﻝ
ﻭ ﺍﻟﺠﻮﻉ ﻭﺿﻴﻖ ﺍﻟﺤﺎﻝ
ﻭﺿﻴﺎﻉ ﺭﺧﺎ ﺍﻷﺳﻮﺍﻕ ﻭﻛﺮﺍﻣﺔ ﺍﻻﻧﺴﺎﻥ .....
ﺃﻣﺴﻚ ﺟﺮﺍﺑﻚ ﺯﻳﻦ ﻣﺎﺗﻤﻠﻰ ﺑﺎﻟﺤﺴﺮﺓ
ﻭﻣﺎ ﺗﻠﺨﺒﺖ ﺍﻟﻜﻴﻤﺎﻥ .....
ﻣﺶ ﻗﺎﻟﻮ ﺟﺎﻧﺎ ﺍﻟﺴﻴﻞ
ﺃﺩﻱ ﺍﻟﺒﺤﺮ ﻧﺼﻮ ﻛﺎﻥ ﺗﻤﻨﻊ ﺍﻟﻔﻴﻀﺎﻥ ......
ﺭﺟﻊ ﻛﻤﺎﻥ ﺍﻟﺪﻳﻦ ﻟﻲ ﻭﺍﻟﺪﻙ ﺍﻟﺘﻌﺒﺎﻥ ....
ﺍﻟﺒﺎﻗﻲ ﻟﻴﻚ ﺧﻤﺴﺔ
ﻭﻃﻨﻚ ﺻﺒﺢ ﻣﻘﺴﻮﻡ
ﺑﻴﺘﻚ ﺻﺒﺢ ﻣﻬﺪﻭﻡ
ﻓﺮﺣﻚ ﺻﺒﺢ ﻣﻌﺪﻭﻡ
ﻫﻤﻚ ﺻﺒﺢ ﻣﺮﺩﻭﻡ
ﻭﺍﻟﻜﻞ ﺻﺒﺢ ﻣﻈﻠﻮﻡ
ﻳﺎ ﺣﻠﻴﻞ ﺯﻣﻨﺎ ﺯﻣﺎﻥ ....
ﺍﻟﺼﺤﺒﺔ ﻭﺍﻟﺨﻼﻥ ....
ﻳﺎ ﻳﻤﺔ ﺟﻴﺒﻲ ﺷﻠﻦ
ﺑﻲ ﺳﺮﻋﺔ ﻟﻠﺪﻛﺎﻥ ...
ﻋﻢ ﻃﻪ ﻛﺎﻥ ﺑﻴﻘﻮﻝ
ﻣﺮﺣﺐ ﺣﺒﺎﺏ ﻋﺜﻤﺎﻥ ...
ﻳﺎﻋﻤﻮ ﺩﺍﻳﺮ ﻟﻲ ﺣﺮﺑﺔ ﻭﺣﻼﻭﺓ ﻟﺒﺎﻥ ......
ﺑﻲ ﺳﺮﻋﺔ ﺷﺎﻥ ﺃﻟﺤﻖ ﺍﻟﻌﺐ ﻣﻊ ﺍﻟﺠﻴﺮﺍﻥ ....
ﺍﻟﻨﻮﺭ ﻭ ﻭﺩ ﺍﻟﺰﻳﻦ ﺑﻴﺤﺒﻮ ﻟﻌﺐ ﺍﻟﻄﻴﻦ ﻭﺩ ﺃﺑﻜﺮ ﻭ ﺍﻟﺨﻴﺮ ﻭ ﺃﺩﺭﻭﺏ ﻭ ﺟﻮﻥ ﻭﺣﺴﻴﻦ ﻭ ﺳﻼﻣﺔ ﻭﺩ
ﺟﺮﺟﺲ ﻣﺎﺷﻴﻦ ﻋﻠﻰ ﺍﻟﻤﻴﺪﺍﻥ ....
ﺷﺎﻥ ﻳﻠﺤﻘﻮ ﺍﻟﺘﻤﺮﻳﻦ
ﻣﺎ ﻛﺎﻧﻮ ﺑﺲ ﺟﻴﺮﺍﻥ ﺩﻳﻞ ﻛﺎﻧﻮ ﺟﺪ ﺃﺧﻮﺍﻥ ....
ﺣﺒﻮﺑﺔ ﺣﺠﺘﻨﻲ
ﺑﻲ ﺍﻟﺴﻤﺤﺔ ﻭﺍﻟﻐﻴﻼﻥ .....
ﺑﻲ ﻗﺼﺔ ﺍﻟﺮﺍﻋﻲ ﻭﺍﻟﺪﻳﺐ ﻣﻊ ﺍﻟﻘﻄﻌﺎﻥ ..
ﺑﺎﻟﻔﺎﺭﺱ ﺍﻟﻤﻐﻮﺍﺭ ﻭﺑﺴﺎﻟﺘﻮ ﻓﻲ ﺍﻟﻤﻴﺪﺍﻥ ....
ﺑﺎﻟﻌﻤﺪﺓ ﺭﺍﺟﻼ ﺯﻳﻦ ﻛﻴﻒ ﺑﻜﺮﻡ ﺍﻟﻀﻴﻔﺎﻥ .....
ﻭﺍﻟﺤﺎﻛﻢ ﺍﻟﻌﺎﺩﻝ ﻭﺍﻟﻘﺴﻂ ﻓﻲ ﺍﻟﻤﻴﺰﺍﻥ .....
ﻳﺎ ﺣﻠﻴﻞ ﺣﺠﺎﻫﺎ ﺍﻟﻜﺎﻥ .....
ﻣﺪﻳﺖ ﻛﻔﻮﻑ ﺭﺣﻤﺔ
ﻟﻲ ﺭﻭﺣﺎ ﻳﺎ ﺭﺣﻤﻦ .....
ﻭﺑﺼﻤﺖ ﺑﺎﻟﺨﻤﺴﺔ
ﺍﻟﻮﺣﺪﺓ ﻭﺍﻟﺬﻛﺮﻯ
ﻭﺍﻟﺨﻮﺓ ﻭﺍﻟﻨﺼﺮﺓ
ﻭﺍﻟﺨﺎﻣﺲ ﺍﻟﺘﺤﺬﻳﺮ ﺃﻭﻋﻚ ﺗﻜﻮﻥ ﻏﻠﻄﺎﻥ .....
ﻗﺎﻟﺘﻠﻲ ﺑﻲ ﻫﻤﺴﺔ
ﺍﺧﺘﺎﺭ ﺭﻗﻢ ﺣﺰﻧﻚ
ﻣﺎ ﺗﻘﻮﻟﻮ ﻳﺎ ﺍﻟﻐﺒﻴﺎﻥ .......
ﻭ ﺍﺗﻼﻗﺖ ﺍﻷﺭﻭﺍﺡ
ﻣﺪﺕ ﻛﻔﻮﻑ ﺍﻟﺸﻮﻕ
ﻟﻌﺒﺖ ﻣﻌﺎﻱ ﺿﺒﺎﺡ
ﺿﺒﺎﺡ ﺿﺒﺎﺡ
ﻛﺴﺮﺓ ﺑﻤﻼﺡ
ﺩﻩ ﺍﻟﻀﺒﺤﻮ
ﻭ ﺩﻩ ﺍﻟﺴﻠﺨﻮ
ﻭ ﺩﻩ ﺍﻟﻘﻄﻌﻮ
ﻭ ﺩﻩ ﺍﻟﻘﺴﻤﻮ
ﻭ ﺩﻩ ﺍﻷﻛﻠﻮ
ﻭ ﺍﻟﺒﺎﻗﻲ ﻟﻴﻚ ﺧﻤﺴﺔ

ﻣﺎ ﻳﻘﻮﻟﻮ ﺍﻟﻨﺎﺱ ﻛﺎﻥ ﻗﺎﻟﻮ ..
ﻣﺎ ﺃﺻﻠﻮ ﺑﻠﺪﻧﺎ ﺩﻩ ﺣﺎﻟﻮ ..
ﺑﻨﺤﺐ ﺑﻲ ﺻﻤﺖ ﻣﻐﻠﻒ ..
ﻭ ﻛﻼﻣﻨﺎ ﻏﺮﻳﺐ ﻣﻮﺍﻟﻮ ..
ﺣﻴﻘﻮﻟﻮ ﺑﻤﻌﻨﻰ ﻣﻘﻠﺒﻦ ..
ﺇﻧﻚ ﻣﺴﺘﻌﻤﺮ ﻗﻠﺒﺎ ..
ﺑﺎﻧﻴﺒﻚ ﻛﻞ ﺁﻣﺎﻟﻮ ..
ﻭ ﺣﺮﻭﻑ ﺗﺴﺘﺮﺳﻞ ﺳﺮﺩﺍ ..
ﺗﻤﺪﺩ ﻃﻮﻻ ﻭﻋﺮﺿﺎ ..
ﻭﻛﻼﻡ ﺑﻴﺠﺮﺡ ﻋﻤﺪﺍ ..
ﻭﺧﻼﺻﺘﻮ ﺑﺤﺒﻚ ﺟﺪﺍ ..
ﻳﺎﺥ ﺃﻳﻮﺓ ﺑﺤﺒﻚ ﻭﻣﺎﻟﻮ