ﻭﺩ ﺍﻟﺴﺖ ﻣﺸﻰ ﻟﺤﺎﺝ ﺍﺑﺮﺍﻫﻴﻢ ﻗﺎﻝ ﻟﻴﻬﻮ ﺑﺪﻭﺭﻙ ﺗﺨﻄﺐ ﻟﻲ ﺍﻣﻮﻧﺔ ﺑﺖ ﺍﻟﻜﺮﺍﺏ ﺣﺎﺝ ﺍﺑﺮﺍﻫﻴﻢ ﺳﻜﺖ ﻣﺴﺎﻓﺔ ﻭﻏﻠﺒﻮ ﺍﻟﺒﻘﻮﻟﻮ ﻋﺎﺭﻑ ﺍﻟﻜﺮﺍﺏ ﻣﻜﺠﻦ ﻭﺩ ﺍﻟﺴﺖ ﻭﻛﺎﺭﻫﻮ ﻭﻭﺩﺍﻟﺴﺖ ﻟﻤﻦ ﺷﺎﻑ ﺗﺮﺩﺩﻭ ﻭﺳﻜﺘﺘﻮ ﻭﻓﺘﻴﺸﻮ ﻟﻠﻜﻼﻡ ﻗﺎﻝ ﻟﻴﻬﻮ
_ ﻳﺎﻛﺎ ﺍﺑﻮﻱ ﺁ ﺣﺎﺝ ﺍﺑﺮﺍﻫﻴﻢ ﻭﻣﺎﻓﻲ ﺯﻭﻝ ﻭﻗﻒ ﻣﻌﺎﻱ ﻏﻴﺮﻙ ﺍﻧﺖ ﻭﺣﺎﺝ ﺍﻟﻀﻮ ﻳﻮﻡ ﺑﻘﻴﺖ ﻣﺎﺭﻕ ﻭﺍﻻﺗﻨﻴﻦ ﺣﻨﻴﺘﻮ ﻋﻠﻲ ﻭﺳﺎﻋﺪﺗﻮﻧﻲ ﻭﺍﺩﻳﺘﻮﻧﻲ ﻗﺮﻭﺵ ﻭﻣﺎ ﺧﻔﺘﻮﺍ ﻣﻦ ﺍﻧﻲ ﻣﻤﻜﻦ ﺍﻣﺶ ﺍﺳﻜﺮﺑﻬﻦ ، ﻭﺍﻧﺎ ﻭﺍﻟﻠﻪ ﻣﻦ ﻳﻮﻡ ﻣﺸﻴﺖ ﻣﺎ ﻓﻮﺕ ﻟﻲ ﺻﻼﺓ ﻭﻻ ﻳﺪﻱ ﺩﻱ ﻣﺴﻜﺘﻠﻬﺎ ﻗﺰﺍﺯﺓ ﻋﺮﻗﻲ ﻭﻻ ﺑﺠﻲ ﻳﻮﻡ ﺍﺷﺮﺏ ﻓﻮﻗﻮ ﺗﺎﻧﻲ ﺑﻌﺪ ﺍﻟﻠﻪ ﻓﻜﺎﻧﻲ ﻣﻨﻮ ﻭﻭﻓﻘﻨﻲ
_ ﻋﺪﻳﻠﺔ ﻋﻼ ﺑﺲ ﺍﻧﺖ ﺑﺮﺍﻙ ﻋﺎﺭﻑ ﺍﻟﻜﺮﺍﺏ ﻭﺍﻣﻜﻦ ﻣﺎ ﻳﺮﺿﻰ
_ ﺍﻥ ﻣﺎ ﺭﺿﻰ ﺍﻟﻘﺴﻤﺔ ﻣﺎ ﺍﺩﺕ ﻭﺍﻟﺸﻐﻠﺔ ﺩﻱ ﻻ ﺑﻴﺪﻙ ﻭﻻ ﺑﻴﺪﻱ ﻭﻻ ﺑﻴﺪﻭ ﻭﻳﺎﻣﺎ ﻧﺎﺱ ﺍﻛﺎﻧﻮ ﻣﻊ ﺑﻌﺾ ﺍﻟﺸﺤﻤﺔ ﻭﺍﻟﻨﺎﺭ ﺍﺗﻨﺎﺳﺒﻮﺍ ﻭﻓﻲ ﺍﻟﻌﺮﺳﻠﻮ ﺑﺖ ﻭﻫﻮ ﻛﺎﺗﻞ ﺍﺑﻮﻫﺎ ، ﻭﺍﻧﺎ ﺍﻟﻜﺮﺍﺏ ﻣﺎ ﺳﻮﻳﺘﻠﻮ ﺷﻲ ﺩﺍﻙ ﻃﻴﺶ ﺷﺒﺎﺏ ﻭﺭﺍﺡ ﻭﺍﻥ ﺭﺿﻰ ﻭﺍﻥ ﻣﺎ ﺭﺿﻰ ﺍﻧﺎ ﺭﺍﺿﻲ
_ ﺍﻧﺖ ﺑﺘﺪﻭﺭﺑﻬﺎ ﺷﻨﻮ ﺑﺘﻮ ﻫﻮ ﺑﺎﻟﺬﺍﺕ ؟ ﻣﺎ ﻳﻜﻮﻥ ﻋﺸﺎﻥ ﻣﺮﻗﺖ ﻭﺟﺒﺘﻠﻚ ﻗﺮﻳﺸﺎﺕ ﺩﺍﺭ ﺗﻘﻮﻝ ﺍﻟﻘﺮﻭﺵ ﺑﺠﺒﺮﻥ ﺍﻟﻤﺎ ﺑﻨﺠﺒﺮ . ﺩﻳﻞ ﻭﺳﺦ ﺩﻧﻴﺎ ﺳﺎﻛﺖ ﺁ ﺟﻨﻰ ﻣﺎ ﺑﻘﻦ ﺍﻟﺮﻣﺔ ﺯﻭﻝ
_ ﺩﺍﻙ ﺍﻟﺮﻣﺔ ﻟﻜﻦ ﺍﻧﺎ ﻣﺎﻧﻲ ﺭﻣﺔ ﺁ ﺣﺎﺝ ﻭﺍﻧﺎ ﻭﺭﻳﺘﻚ ﻭﺣﻠﻔﺘﻠﻚ ﻣﻦ ﻳﻮﻡ ﻣﺸﻴﺖ ﻻ ﺷﺮﺑﺖ ﻻ ﻓﻜﻴﺖ ﺩﺭﺏ ﺍﻟﻠﻪ ، ﻭﺍﻟﺰﻳﻦ ﺍﻟﻜﻨﺖ ﻣﻌﺎﻫﻮ ﻭﻗﻌﺪﺕ ﻓﻲ ﺑﻄﻦ ﺑﻴﺘﻮ ﻫﺪﺍﻙ ﻗﺎﻋﺪ ﻣﻤﻜﻦ ﺗﺴﻌﻠﻮ ﺍﻛﺎﻥ ﻣﺎﻙ ﻣﺼﺪﻗﻨﻲ
_ ﻻ ﻻ ﻣﺎﻧﻲ ﺳﺎﻋﻠﻮ ﺍﻧﺖ ﺍﻣﺶ ﻫﺴﻊ ﻭﺍﻧﺎ ﺑﻼﻗﻲ ﻋﻤﻚ ﺣﺎﺝ ﺍﻟﻀﻮ ﻭﺑﺴﻮﻕ ﻟﻴﻬﻮ ﻣﻌﺎﻱ ﻛﻢ ﻭﺍﺣﺪ ﻣﻦ ﺍﻋﻤﺎﻣﻜﻢ ﻭﺑﻨﻤﺶ ﻟﻠﻜﺮﺍﺏ ﻭﺍﻟﺒﻨﻮﺕ ﺭﺍﻗﺪﺍﺕ ﺍﻥ ﻫﻮ ﺃﺑﻰ
ﻭﺩ ﺍﻟﺴﺖ ﻓﺎﺕ ﺍﻟﺒﻴﺖ ﻭﻛﻠﻢ ﺍﻣﻮ ﻗﺎﻟﺖ ﻟﻴﻬﻮ ﻋﺮﺱ ﻧﻔﻴﺴﺔ ﺑﺖ ﺟﺎﺩ ﺍﻟﻜﺮﻳﻢ ﺟﻴﺮﺍﻧﺎ ﺩﻳﻞ ﺍﻛﺎﻥ ﺩﺍﻳﺮ ﺗﻌﺮﺱ ﺍﻣﻮﻧﺔ ﻣﺎ ﺑﺪﻙ ﻟﻴﻬﺎ ﻭﻧﻔﻴﺴﺔ ﺩﻱ ﺍﻣﻬﺎ ﺑﻠﻘﻴﺴﺔ ﺍﺧﺘﻲ ﺑﺖ ﺧﺎﻟﺘﻲ ﻭﺑﻠﻘﻴﺴﺔ ﺑﺘﺮﻳﺪﻙ ﻣﺎ ﺗﺎﺑﺎ ﻭﺑﺘﻬﺎ ﺯﺍﺗﻬﺎ ﺣﻠﻴﻮﺓ ﻭﻓﺎﻟﺤﺔ
ﻗﺎﻝ ﻟﻴﻬﺎ ﻳﻤﺔ ﺍﻧﺎ ﺯﻣﺎﻧﻚ ﻛﻨﺖ ﻋﻮﻻﻕ ﻣﺮﻣﺪ ﻟﻜﻦ ﻫﺴﻲ ﺍﻧﺎ ﻏﻨﻲ ﻭﻋﻨﺪﻱ ﺩﻛﺎﻥ ﻣﻼﻥ ﺑﻀﺎﻋﺔ ﻟﻌﻴﻨﻮ ﻭﺣﺎﺝ ﺍﻟﻜﺮﺍﺏ ﺯﺍﺗﻮ ﺍﻧﺎ ﻣﺎ ﺳﺎﻋﻞ ﻓﻮﻗﻮ ﺑﺲ ﺩﺍﻳﺮ ﺑﺘﻮ ﺑﺲ
ﺍﻣﻮﻧﺔ ﺑﺖ ﺍﻟﻜﺮﺍﺏ ﺳﻤﺎﺣﺘﻬﺎ ﻣﺎﻓﻲ ﻭﺍﺑﻮﻫﺎ ﺑﺮﻳﺪﻫﺎ ﻭﻣﺪﻟﻌﻬﺎ ﻭﺍﻟﺒﺘﺪﻭﺭﻭ ﻛﻠﻮ ﺑﺠﻴﺒﻮ ﻟﻴﻬﺎ ﻭﻣﻦ ﺩﺧﻠﺖ ﺍﻟﻤﺪﺭﺳﺔ ﻣﺎ ﻓﻜﺖ ﺍﻻﻭﻟﻰ ﻭﺑﺘﺪﻭﺭ ﺗﺒﻘﻰ ﺩﻛﺘﻮﺭﺓ ﻭﺭﺍﺳﻬﺎ ﻣﻦ ﺍﻟﻜﺘﺐ ﻣﺎ ﻗﺎﻋﺪﺓ ﺗﺮﻓﻌﻮ ﻭﻣﻦ ﺍﻟﺒﻴﺖ ﻣﺎ ﻗﺎﻋﺪﺓ ﺗﻤﺮﻕ ﺑﺲ ﺍﻟﻘﺮﺍﻳﺔ ﻭﻗﺎﻟﻮﺍ ﺑﺘﻘﺮﺍ ﻛﺘﺐ ﺍﻟﺴﻨﺔ ﺍﻟﺠﺎﻳﺔ ﻗﺒﺎﻝ ﺍﻟﻤﺪﺭﺳﺔ ﺗﻔﺘﺢ ﻭﻣﺮﺍﺕ ﻣﺮﺍﺕ ﺑﺘﺼﻠﺢ ﺍﻻﺳﺘﺎﺫ ﺍﻛﺎﻥ ﻏﻠﻂ ﻓﻲ ﺷﻲ ﻭﺍﻟﻤﻮﺍﺩ ﻛﻠﻬﻦ ﺑﺘﻘﻔﻠﻦ
ﻭﺩ ﺍﻟﺴﺖ ﺑﻌﺪ ﺍﻟﻘﺮﺵ ﻣﺎ ﻣﺸﻰ ﻓﻲ ﻳﺪﻭ ﻭﺷﺎﻑ ﻧﻈﺮﺓ ﺍﻟﻨﺎﺱ ﻟﻴﻬﻮ ﺍﺗﻐﻴﺮﺕ ﻗﺎﻝ ﻳﻌﺮﺱ ﺍﻣﻮﻧﺔ ﺑﺲ ، ﺍﻟﺰﻳﻦ ﺑﻌﺪ ﻗﻌﺪ ﻣﻌﺎﻫﻮ ﺍﺳﺒﻮﻉ ﻭﻋﺮﻑ ﺍﻫﻠﻮ ﻭﺷﺎﻑ ﺣﺎﻟﻬﻢ ﻟﺴﺔ ﻣﺒﺴﻮﻁ ﻣﻦ ﻭﺩ ﺍﻟﺴﺖ ﻭﻧﻈﺮﺕ ﻟﻴﻬﻮ ﻣﺎ ﺍﺗﻐﻴﺮﺕ ﺍﻻ ﻟﻤﻦ ﺣﺎﺟﺔ ﺍﻟﺴﺖ ﺟﺎﺕ ﻛﻠﻤﺘﻮ ﻗﺎﻟﺖ ﻟﻴﻬﻮ ﺻﺎﺣﺒﻚ ﻗﺎﻝ ﺩﺍ ﺑﺪﻭﺭﻟﻮ ﺑﻨﻴﺔ ﻣﺎ ﺑﺪﻭﻫﺎ ﻟﻴﻬﻮ ﻭﺍﻧﺎ ﻣﺎ ﺭﺿﻴﺎﻧﺔ ﺑﻤﺸﻴﺘﻮ ﻟﻴﻬﻢ ﺍﻧﻀﻢ ﻣﻌﺎﻫﻮ
ﺍﻟﺰﻳﻦ ﻧﻀﻢ ﻣﻌﺎﻫﻮ ﻭﻗﺎﻝ ﻟﻴﻬﻮ ﺍﺳﻤﻊ ﻛﻼﻡ ﺍﻣﻚ ﺁ ﺧﻮﻱ ﻭﻣﺎ ﺗﻌﺠﺒﻚ ﺍﻟﻘﺮﻭﺵ ﻭﺗﺘﺸﻮﺑﺮ
ﺍﻟﻜﻼﻡ ﺩﺍ ﺯﻋﻞ ﻭﺩ ﺍﻟﺴﺖ ﻭﻗﺎﻝ ﻟﻴﻬﻮ ﺍﻧﺎ ﻏﻴﺮ ﺍﻣﻮﻧﺔ ﻣﺎﻧﻲ ﺩﺍﻳﺮ ﻭﻣﺎ ﺗﺘﺪﺧﻞ ﻓﻲ ﺷﻴﺘﻦ ﻣﺎ ﺑﺨﺼﻚ ﻭﺯﻱ ﻣﺎ ﺍﻟﻜﺮﺍﺏ ﻋﻨﺪﻭ ﻗﺮﻭﺵ ﺍﻧﺎ ﺑﺮﺿﻮ ﺍﻟﻘﺮﻭﺵ ﻋﻨﺪﻱ
_ ﺍﻟﺸﻐﻠﺔ ﻣﻲ ﻗﺮﻭﺵ
_ ﺍﻟﺸﻐﻠﺔ ﻗﺮﻭﺵ ﻭﺍﻟﻘﺮﻭﺵ ﺍﻟﺒﺘﻐﻴﺮ ﺍﻟﻨﺎﺱ ﻭﺍﻟﻜﺮﺍﺏ ﻣﺎ ﺍﺣﺴﻦ ﻣﻨﻲ ﻓﻲ ﺷﻲ
_ ﻋﻠﻲ ﻛﻴﻔﻚ ﺁ ﺯﻭﻝ ﻭﺍﻧﺎ ﻓﺎﻳﺖ ﺍﻫﻠﻲ ﺑﻌﺪ ﻛﺪﻱ ﻭﻣﻌﻠﻴﺶ ﺍﻛﺎﻥ ﺍﺗﺪﺧﻠﺖ ﺑﺲ ﺍﻧﺎ ﻋﺪﻳﺘﻚ ﺍﺧﻮﻱ ﻭﺍﻥ ﻣﺎ ﺍﻣﻚ ﻭﺭﺗﻨﻲ ﻭﻗﺎﻟﺖ ﻟﻲ ﺍﻧﻀﻢ ﻣﻌﺎﻙ ﻣﺎ ﻛﻨﺖ ﻧﻀﻤﺖ ﻣﻌﺎﻙ
_ ﻣﺎ ﺑﺘﻔﻮﺕ ﺍﻻ ﺑﻌﺪ ﺗﺤﻀﺮ ﺧﻄﻮﺑﺘﻲ ﻭﺑﻌﺪﻳﻨﻚ ﻧﺎﺱ ﺣﺎﺝ ﺍﺑﺮﺍﻫﻴﻢ ﻣﺎﺷﻴﻦ ﻟﻠﻜﺮﺍﺏ ﺍﺻﺒﺮ ﺍﺻﺒﺮ
_ ﻭﺍﻥ ﻣﺎ ﺭﺿﻰ
_ ﺑﺮﺿﻰ ﺑﻌﺪ ﺷﺎﻑ ﺍﻟﻨﺎﺱ ﻗﺎﻋﺪﻳﻦ ﺍﺑﻨﻮﺍ ﻟﻲ ﻭﺷﺎﻑ ﺍﻟﻌﺮﺑﻴﺔ
_ ﺍﻧﺖ ﻏﻴﺮﻫﺎ ﻣﺎﻙ ﺩﺍﻳﺮ ؟
_ ﻏﻴﺮﻫﺎ ﻣﺎﻧﻲ ﺩﺍﻳﺮ ؟
_ ﻣﻦ ﺭﻳﺪﺗﻦ ﻓﻮﻕ ﺍﻟﺒﺖ ﻭﻟﻼ ﻋﺸﺎﻥ ﺷﻴﺘﻦ ﺗﺎﻧﻲ؟
_ ﻋﺸﺎﻥ ﺷﻴﺘﻦ ﺗﺎﻧﻲ ﻭﺍﻟﻠﻪ ﻭﺍﻧﺎ ﻣﺎ ﻣﺮﻗﺖ ﻣﻦ ﺍﻟﺤﻠﺔ ﺩﻱ ﺍﻻ ﺯﻋﻠﺘﻦ ﻣﻨﻮ ﻫﻮ ﻭﺟﻴﺘﻬﺎ ﻫﺪﺍ ﺍﻟﺒﺪﻓﺮﻧﻲ ﻣﺎ ﺑﺮﻣﻴﻨﻲ
ﻭﻋﺸﺎﻥ ﺍﻭﺭﻳﻬﻮ ﺍﻧﺎ ﺷﻨﻮ ﺑﻌﺮﺱ ﺑﺘﻮ ﻭﺑﺪﻭﺭﻙ ﺁ ﺍﻟﺰﻳﻦ ﺗﻤﺶ ﺗﺠﻴﺐ ﻟﻲ ﺧﻤﺴﻴﻦ ﺃﻟﻒ ﻭﺗﺠﻲ
_ ﻳﻮﻣﺪﺍﻙ ﺟﺒﺘﻠﻚ ﺧﻤﺴﻴﻦ
_ ﻧﺎﻥ ﻣﺎﻟﻮ ﺗﺎﻧﻲ ﺟﻴﺐ ﻟﻲ ﺧﻤﺴﻴﻦ ﺍﻧﺪﻓﻌﻦ ﻟﻴﻬﻢ ﻗﻮﻟﺔ ﺧﻴﺮ
_ ﻣﺎ ﺑﻘﺪﺭ ﻭﺍﻟﻠﻪ
_ ﻣﺎ ﺷﺎﺣﺪﻙ ﺍﻧﺎ ﺯﻭﻝ ﻣﻦ ﺣﻘﻲ
_ ﻭﺍﻟﻠﻪ ﻟﻮ ﺑﺘﺪﻭﺭﻥ ﻟﺒﻨﻴﺎﻥ ﻋﺸﺎﻥ ﺍﻫﻠﻚ ﻭﻟﻼ ﺷﻴﺘﻦ ﻧﺎﻓﻊ ﻫﺴﻲ ﺑﻤﺶ ﺍﺟﻴﺒﻦ ﻭﺍﺟﻲ ﻟﻜﻦ ﻋﺸﺎﻥ ﺗﺒﻮﺑﺮ ﺑﻴﻬﻦ ﺍﺳﻤﺢ ﻟﻲ ﻭﻭﺭﺡ ﻧﺠﺮﺩ ﺍﻟﺪﻛﺎﻥ ﺍﻛﺎﻥ ﺩﺍﻳﺮ
_ ﻳﺎﺯﻭﻝ ﺍﻧﺎ ﻣﺎ ﺷﺎﺣﺪﻙ
_ ﻣﺎﻙ ﺷﺎﺣﺪﻧﻲ ﺻﺎﺡ ﻣﺎ ﻗﻠﻨﺎ ﺷﻲ ﻟﻜﻦ ﺍﻟﺪﻛﺎﻥ ﻣﺎ ﻫﻴﻠﻚ ﺑﺮﺍﻙ
_ ﺍﻟﺪﻛﺎﻥ ﺍﻛﺎﻥ ﺭﻣﺔ ﺳﺎﻱ ﻭﻓﺎﺿﻲ ﻭﺍﻧﺎ ﺍﻟﻌﻤﻠﺘﻮ ﺩﻛﺎﻥ ﻭﺟﺮﺩﻱ ﺍﻟﻠﻮﻻﻧﻲ ﻗﺎﻋﺪ ﻟﻘﻴﺖ ﻓﻮﻗﻮ ﻋﺸﺮﺓ ﺗﺎﻻﻑ
_ ﻭﻫﺴﻲ ﻓﻮﻗﻮ ﻛﻢ ؟
_ ﻫﺴﻲ ﺍﻛﺎﻥ ﺑﻄﻞ ﻓﻮﻗﻮ ﻗﺮﻳﺐ ﺍﻟﻤﻴﺔ ﻭﺧﻤﺴﻴﻦ ﺍﻟﻒ
_ ﻣﺎ ﺑﺘﻤﻦ ﻣﻴﺔ ﻭﺧﻤﺴﻴﻦ ﻟﻜﻦ ﻗﻮﻝ ﻣﻴﺔ ﻭﺧﻤﺴﻴﻦ ﻣﺎ ﻣﺸﻜﻠﺔ ﺍﻫﺎ ﺟﻴﺖ ﻫﻨﺎ ﺑﻜﻢ ﺍﻟﻨﺰﻟﺘﺒﻦ ﺍﻟﻄﻮﺏ ﻭﺍﻻﺳﻤﻨﺘﻲ ﻭﺍﻟﺤﺪﻳﺪ
_ ﺟﻴﺖ ﻭﻣﻌﺎﻱ ﺳﺘﻴﻦ ﺍﻟﻒ ﻭﺷﻠﺖ ﻣﻨﻚ ﺧﻤﺴﻴﻦ
_ ﺩﻳﻞ ﻣﻴﺔ ﻭﻋﺸﺮﺓ ﻭﺑﺪﻭﺭﻟﻚ ﻓﻮﻗﻦ ﺧﻤﺴﻴﻦ ﻳﻌﻨﻲ ﺍﻛﺘﺮ ﻣﻦ ﺍﻟﻔﻲ ﺍﻟﺪﻛﺎﻥ . ﺍﻟﻜﻼﻡ ﺩﺍ ﺑﺠﻲ ؟
_ ﻣﺎﻟﻮ ﻣﺎ ﺑﺠﻲ
_ ﺍﻟﺪﻛﺎﻥ ﺍﻧﺎ ﻣﺎ ﻋﻨﺪﻱ ﻓﻮﻗﻮ ﺣﻖ ؟
_ ﺍﻟﻨﻜﺮ ﺣﻘﻚ ﻣﻨﻮ ﻫﺴﻲ ؟ ﺍﻧﺎ ﻟﻤﻦ ﺍﺭﺟﻊ ﺑﺒﻴﻊ ﻭﺑﺪﻳﻚ
_ ﺍﻧﺎ ﻣﻦ ﻳﻮﻡ ﺍﻧﺖ ﺩﺧﻠﺖ ﺍﻟﺪﻛﺎﻥ ﺣﺼﻞ ﺟﻴﺘﻚ ﻭﻗﻠﺖ ﻟﻴﻚ ﺍﺩﻳﻨﻲ ﻗﺮﺵ؟
_ ﻻ
_ ﻟﻠﺒﻴﺖ ﺷﻠﺖ ﺣﺎﺟﺔ ﺑﻼﺵ ﻭﻣﺎ ﺩﻓﻌﺘﻠﻚ ﺣﻘﻬﺎ ؟
_ ﻻ
_ ﻣﻌﻨﺎﺗﻬﺎ ﺍﻟﺪﻛﺎﻥ ﻫﻴﻠﻚ ﺑﺮﺍﻙ ﻛﺪﻱ ﻭﺍﻧﺎ ﺍﻟﺴﺘﻴﻦ ﺍﻻﻧﺖ ﺟﻴﺖ ﺑﻴﻬﺎ ﻫﻨﺎ ﻟﻮ ﺟﻴﻨﺎ ﻧﺘﺤﺎﺳﺐ ﻳﺎ ﺍﻧﺎ ﺍﺷﻴﻞ ﺯﻳﻬﺎ ﺳﺘﻴﻦ ﺯﻳﻬﺎ ﻳﺎ ﺗﻼﺗﻴﻦ ﻭﻧﺘﻘﺴﻤﻬﺎ ﺍﻟﻨﺺ ﺍﻟﻨﺺ
ﻭﺩ ﺍﻟﺴﺖ ﺳﻜﺖ ﺳﺎﻱ ﻭﻗﺎﻝ ﻟﻴﻬﻮ ﻳﻌﻨﻲ ﺩﺍﻳﺮ ﺗﻤﺮﻗﻨﻲ ﺳﻼﻕ ﺑﻴﺾ ﺳﺎﻱ ﺍﻧﺖ . ﻭﻣﺎ ﺩﺍﻳﺮ ﺗﻘﻴﻒ ﻣﻌﺎﻱ ﻣﻮﺵ؟
_ ﺍﻟﻤﺎﺭﻕ ﺳﻼﻕ ﺑﻴﺾ ﻣﻨﻮ ﻓﻴﻨﺎ ﻫﺴﻲ ﻭﺍﻧﺎ ﻭﺭﻳﺘﻚ ﻟﻮ ﺩﺍﻳﺮ ﺗﺘﺒﻮﺑﺮ ﺑﻴﻬﻦ ﻣﺎ ﻋﻨﺪﻱ
_ ﻳﺎ ﺯﻭﻝ ﺧﻴﺮ ﻋﻠﻲ ﻛﻴﻔﻚ ﻭﻛﺘﺮ ﺧﻴﺮﻙ
_ ﺍﺳﻤﻊ ﻛﻼﻡ ﺍﻣﻚ ﺩﻱ ﻭﻋﺮﻑ ﻧﻔﻴﺴﺔ ﺑﺖ ﺍﻫﻠﻚ ﺍﻟﻘﺎﻟﺘﻬﺎ ﻟﻴﻚ ﺩﻱ ﻭﻟﻮ ﺳﻘﺘﻬﺎ ﻣﻌﺎﻙ ﺣﻠﺘﻨﺎ ﺍﻟﺒﻴﺖ ﻣﺎ ﺗﺸﻴﻞ ﻫﻤﻮ ﺍﻧﺎ ﻋﻨﺪﻱ ﻣﺮﺑﻮﻉ ﺑﺎﻧﻲ ﻓﻮﻗﻮ ﺍﻭﺿﺔ ﺑﻈﺒﻄﻮ ﻟﻴﻚ ﻭﻗﺮﻳﺐ ﻣﻦ ﺍﻟﺪﻛﺎﻥ ﻭﺍﻧﺎ ﻟﺴﺔ ﺑﺎﻗﻲ ﻋﻠﻴﻚ ﻣﺎﻧﻲ ﻣﺤﺎﺳﺒﻚ ﺑﺎﻟﻔﺎﺕ
_ ﺍﻧﺎ ﺑﻌﺪ ﺍﺭﺟﻊ ﻣﺎ ﺩﺍﻳﺮ ﻟﻲ ﻣﻌﺎﻙ ﺷﺮﺍﻛﺔ ﻳﺎ ﺗﺒﻴﻊ ﻟﻲ ﺍﻟﺪﻛﺎﻥ ﻳﺎ ﺗﺄﺟﺮﻭ ﻟﻲ
_ ﻧﺤﻦ ﻣﻦ ﺍﻻﻭﻝ ﺍﺗﻔﻘﻨﺎ ﺑﺎﻟﻨﺺ ﻭﺍﻥ ﺍﺷﺘﻐﻠﺖ ﻣﺎ ﺑﻨﻜﺮ ﻭﻇﺒﻄﺖ ﺍﻟﺪﻛﺎﻥ ﻟﻜﻦ ﺍﻟﺤﻖ ﺣﻖ ﻭﺍﻧﺎ ﻛﻼﻣﻲ ﺩﺍ ﺟﻴﺐ ﺍﻱ ﺯﻭﻝ ﻣﻦ ﺣﻠﺘﻜﻢ ﺩﻱ ﻭﺍﻱ ﺯﻭﻝ ﻣﻦ ﺣﻠﺘﻨﺎ ﻭﻭﺭﻳﻬﻮ ﺍﻥ ﻛﻼﻣﻲ ﺍﻋﻮﺝ ﻟﻮﻣﻨﻲ
_ ﻻ ﻻ ﻛﻼﻣﻚ ﻋﺪﻳﻞ ﻭﺻﺎﺡ ﺑﺲ ﺯﻱ ﻣﺎ ﻗﻠﺖ ﻟﻴﻚ ﻳﺎ ﺑﻴﻊ ﻳﺎ ﺍﻳﺠﺎﺭ ﻟﻜﻦ ﺷﺮﺍﻛﺔ ﻣﺎﻧﻲ ﺩﺍﻳﺮ ﻟﻲ ﻣﻌﺎﻙ ﺷﺮﺍﻛﺔ ﺗﺎﻧﻲ ﻭﺍﺣﺴﻦ ﺍﺗﻌﺐ ﻓﻲ ﺣﻘﻲ ﻭﺍﻥ ﻣﺎﻙ ﺩﺍﻳﺮ ﺗﺒﻴﻊ ﻭﻻ ﺩﺍﻳﺮ ﺗﺄﺟﺮ ﻧﺠﺮﺩ ﺍﻟﺒﻀﺎﻋﺔ ﺍﻟﻔﻮﻗﻮ ﻭﺃﻱ ﻭﺍﺣﺪ ﻳﺸﻴﻞ ﺣﻘﻮ ﻭﻭﺭﺡ ﻫﺴﻲ ﻧﺠﺮﺩ ﺍﻧﺖ ﻣﺎ ﺑﺘﻨﻔﻊ ﻣﻌﺎﻱ ﺑﻌﺪ ﺩﺍ
_ ﻭﺭﺡ ﻧﺠﺮﺩ ﻋﺸﺎﻥ ﺍﻱ ﻭﺍﺣﺪ ﻳﻌﺮﻑ ﺍﻟﻠﻴﻬﻮ ﻣﻦ ﺍﻟﻌﻠﻴﻬﻮ ﻭﺍﻧﺎ ﻻ ﺑﺒﻴﻊ ﻭﻻ ﺑﺄﺟﺮ ﻭﻟﺴﺔ ﺑﺎﻗﻲ ﻋﻠﻴﻚ
ﻭﺭﻛﺒﻮﺍ ﺍﻟﻌﺮﺑﻴﺔ ﻭﻓﺎﺗﻮﺍ
ﻋﺒﺎﺱ ﻟﺴﺔ ﻳﻄﻨﻄﻦ ﻣﻦ ﺍﻟﺸﻐﻞ ﻭﺑﻄﻨﻮ ﻃﺎﻣﺔ ﻣﻦ ﺍﻟﺪﻛﺎﻥ ﻭﺑﻘﻰ ﻳﺘﺰﻫﺞ ﻭﻗﺎﻝ ﻟﻌﺒﺪ ﺍﻟﻘﻴﻮﻡ ﺍﻧﺎ ﻓﺎﻳﺖ ﺍﻟﺤﻠﺔ ﺍﻋﺪﻱ ﻟﻲ ﻓﻴﻬﺎ ﻛﻢ ﻳﻮﻡ ﻭﺃﺟﻲ
ﻭﺻﻞ ﻣﺪﻧﻲ ﻭﻣﺸﻰ ﻟﻌﻤﺮ ﻭﺩ ﺍﻟﻀﻮ ﻓﻲ ﺍﻟﺪﻛﺎﻥ ﻳﻘﻌﺪ ﻣﻌﺎﻫﻮ ﻟﻤﻦ ﻭﻛﺖ ﺍﻟﺒﺺ ﻳﺠﻲ ، ﺍﺗﻐﺪﻯ ﻣﻌﺎﻫﻢ ﻭﺍﻛﺎﻥ ﺍﻟﻴﻮﻡ ﺩﺍﻙ ﺍﻟﺸﻐﻞ ﺳﻤﺢ ﻭﻭﺩ ﺍﻟﻀﻮ ﻭﺍﻟﻌﺒﻴﺪ ﺑﺎﻋﻮﺍ ﻛﻮﻳﺲ ﻭﻟﻤﻦ ﺟﺎﺀ ﻭﻛﺖ ﺍﻟﺒﺺ ﻣﺎ ﻗﻔﻠﻮﺍ ﻭﻋﺒﺎﺱ ﻗﺎﻝ ﻟﻌﻤﺮ ﺍﻟﺒﺺ ﺑﻔﻮﺗﻨﺎ ﻋﻤﺮ ﺿﺤﻚ ﻭﻗﺎﻝ ﻟﻴﻬﻮ ﺍﻧﺖ ﻣﻦ ﺯﻣﻦ ﻧﺤﻦ ﺑﻨﻤﺶ ﺑﺎﻟﺒﺺ ؟ ﺍﻧﺎ ﺍﺷﺘﺮﻳﺖ ﻟﻲ ﺑﻜﺴﻲ ﻳﺎﺥ
_ ﻭﺍﻟﻠﻪ ﻣﺎﺷﺎﺀ ﺍﻟﻠﻪ ﻣﺒﺮﻭﻙ . ﻣﺘﻴﻦ ؟
_ ﻃﻮﻝ ﻳﺎﺥ ﻗﺒﻞ ﺍﻛﺘﺮ ﻣﻦ ﺷﻬﺮ
_ ﻭﺍﻟﻠﻪ ﺍﺣﺴﻦ ﻟﻴﻚ ﻣﺒﺮﻭﻙ ﻣﺒﺮﻭﻙ ﻋﺸﺎﻥ ﻛﺪﺍ ﻣﺎ ﻗﻔﻠﺖ ﺑﺪﺭﻱ
_ ﺣﻠﺘﻨﺎ ﺍﺗﻤﻠﺖ ﺑﻜﺎﺳﻲ ﻣﺎ ﺍﻧﺎ ﺑﺲ
_ ﻣﻨﻮ ﺗﺎﻧﻲ
_ ﻋﺒﺪ ﺍﻟﻠﻪ ﻭﺩ ﺍﻟﻜﺮﺍﺏ ﻭﺻﺎﺣﺒﻚ ﻭﺩ ﺍﻟﺴﺖ
_ ﻭﺩ ﺍﻟﺴﺖ ؟
_ ﺁﻱ ﻭﺩ ﺍﻟﺴﺖ ﺑﻜﺴﻲ ﺳﻤﺢ ﺧﻼﺱ ﺍﺷﺘﺮﺍﻭ ﻣﻦ ﻭﺍﺣﺪ ﻣﻐﺘﺮﺏ ﺟﺎﻳﺒﻮ ﻣﻌﺎﻫﻮ ﻣﻦ ﺍﻟﺴﻌﻮﺩﻳﺔ
_ ﻭﺩ ﺍﻟﺴﺖ ؟
_ ﻭﺩ ﺍﻟﺴﺖ ﺳﺎﻫﻞ ؟ ﺑﻌﺪ ﻧﺼﻞ ﺍﻟﺤﻠﺔ ﻭﺗﺸﻮﻑ ﺍﻟﺒﻴﺖ ﺍﻟﺸﻐﺎﻟﻴﻦ ﻳﺒﻨﻮﺍ ﻓﻮﻗﻮ
_ ﺟﺎﺏ ﺍﻟﻘﺮﻭﺵ ﻣﻦ ﻭﻳﻦ ؟
_ ﻋﻤﻞ ﻟﻴﻬﻮ ﺩﻛﺎﻥ ﻓﻲ ﺣﻠﺔ ﺟﻬﺔ ﺍﻟﻤﻨﺎﻗﻞ ﻭﺍﻟﻠﻴﻠﺔ ﻧﺎﺱ ﺍﺑﻮﻱ ﻓﺎﻳﺘﻴﻦ ﻳﺨﻄﺒﻮﺍ ﻟﻴﻬﻮ ﺍﻣﻮﻧﺔ ﺑﺖ ﺍﻟﻜﺮﺍﺏ
_ ﺍﻧﺖ ﺟﺎﺩﻱ ﻳﺎ ﻭﺩ ﺍﻟﻀﻮ ﻭﻟﻼ ﺑﺘﻜﻀﺐ ؟
_ ﺍﻛﻀﺐ ﻛﻴﻒ ﻳﺎﺥ ؟ ﻫﺪﺍ ﺍﻟﻌﺒﻴﺪ ﻗﺪﺍﻣﻚ ﺍﺳﻌﻠﻮ
ﺍﻟﻌﺒﻴﺪ ﻗﺎﻝ ﻟﻴﻬﻮ ﻭﺍﻟﻠﻪ ﻛﻼﻣﻮ ﻛﻠﻮ ﺻﺎﺡ ﻭﺩ ﺍﻟﺴﺖ ﺑﻘﻰ ﺟﻼﺑﻲ
ﻋﺒﺎﺱ ﺳﻜﺖ ﺳﺎﻱ ﻭﺳﺮﺡ ﻭﺑﻄﻨﻮ ﻃﻤﺖ ﺯﻳﺎﺩﺓ ﻭﻛﺮﻩ ﺍﻟﻤﺸﻴﺔ ﻟﻠﺤﻠﺔ ﻭﻗﺎﻝ ﻣﻌﻘﻮﻝ ﻭﺩ ﺍﻟﺴﺖ ﺍﻟﻔﺎﺷﻞ ﺑﻌﻤﻞ ﺑﻨﻴﺎﻥ ﻭﺩﻛﺎﻥ ﻭﺑﻮﻛﺴﻲ ﻭﺩﺍﻳﺮ ﻳﺨﻄﺐ ﺍﺣﻠﻰ ﺑﺖ ﻓﻲ ﺍﻟﺤﻠﺔ ؟ ﻭﺍﻧﺎ ﺍﻟﺒﻬﻴﻤﺔ ﻗﺎﻋﺪ ﻟﻲ ﻓﻲ ﻣﺤﻞ ﻣﺎ ﺟﺎﻳﺐ ﻫﻤﻮ ﻭﻓﺮﺣﺎﻥ ﺑﻴﻬﻮ ؟
ﺣﺎﺝ ﺍﻟﻜﺮﺍﺏ ﺭﻓﺾ ﻳﺪﻱ ﺑﺘﻮ ﻟﻮﺩ ﺍﻟﺴﺖ ﻭﺯﻋﻞ ﻣﻦ ﺣﺎﺝ ﺍﺑﺮﺍﻫﻴﻢ ﻭﺣﺎﺝ ﺍﻟﻀﻮ ﻭﻗﺎﻝ ﻟﻴﻬﻢ ﻭﺍﻟﻠﻪ ﻟﻮ ﺟﻴﺘﻮ ﻟﻲ ﻭﻗﻠﺘﻮ ﺩﺍﻳﺮﻧﻬﺎ ﻟﻠﻌﺒﻴﺪ ﺍﺧﻮﻫﻮ ﺍﻛﺎﻥ ﺑﻮﺍﻓﻖ ﻻﻧﻮ ﺭﺍﺟﻞ ﺿﻜﺮ ﻭﺷﺎﻳﻒ ﻣﺸﺎﻫﺪﻭ ﻭﻋﺎﻳﺶ ﺍﻫﻠﻮ ﻟﻜﻦ ﺍﻟﻌﻔﻴﻦ ﺩﺍ ﺍﻧﺎ ﻗﺒﻀﺘﻮ ﻛﻢ ﻣﺮﺓ ﻭﻫﺴﻲ ﻗﺮﻭﺷﻮ ﺍﻟﺠﺎ ﺑﻴﻬﺎ ﺩﻱ ﻣﺎ ﺑﻌﻴﺪ ﻳﻜﻮﻥ ﺳﺮﻗﻬﺎ ﻭﻟﻮ ﻣﺎ ﺳﺮﻗﻬﺎ ﻣﺎ ﺑﺪﻳﻬﻮ ﺑﺘﻲ ﺍﻧﺎ ﻣﻜﺠﻨﻮ ﻣﻦ ﺯﻣﺎﻥ ﻭﻣﺎ ﺑﻨﻔﻊ ﻣﻌﺎﻱ