# ﻋﺒﺎﺱ 52
ﻣﺠﺎﻫﺪ ﻳﻮﺳﻒ
ﺑﻌﺪ ﻣﺎ ﻋﺒﺎﺱ ﻓﺎﺕ ﻣﻦ ﻓﺮﺡ ﺟﺎﻫﻮ ﺍﻟﻨﺠﻮﻣﻲ ﻓﻲ ﺍﻟﺒﻴﺖ ﻭﻗﺎﻝ ﻟﻴﻬﻮ ﺑﻠﻎ ﺍﺑﺠﺎﻛﻮﻣﺔ ﻣﺎ ﻳﺪﻱ ﺍﻟﺠﻨﻰ ﺩﺍ ﺑﻨﻘﻮ ﺍﻧﺎ ﺧﺎﻳﻔﻮ ﻳﺸﻚ ﻭﻳﻄﻴﺮ ﻣﻨﻨﺎ
_ ﻳﺸﻚ ﺷﻨﻮ ﻫﺎ ﺩﺍ ﻃﻴﺮﺓ ﺳﺎﻱ ﻭﺃﻱ ﺷﻲ ﺗﻘﻮﻟﻮ ﻟﻴﻬﻮ ﺑﺼﺪﻗﻮ ﻟﻜﻦ ﺍﻧﺎ ﻣﺎ ﺧﺎﻳﻒ ﻣﻦ ﺩﻱ ، ﺍﻧﺎ ﺧﺎﻳﻒ ﻣﻦ ﺍﻟﺘﺎﺝ ﻳﻮﺭﻳﻬﻮ ﺍﻧﻚ ﺑﺘﻌﺮﻓﻨﻲ ﻭﻛﺪﺍ ﻳﺎﺩﻭﺏ ﺍﻟﺒﻄﻴﺮ ﻣﻨﻨﺎ
_ ﺍﻟﺘﺎﺝ ﻣﺎ ﺑﻮﺭﻳﻬﻮ ﻣﻊ ﺍﻧﻮ ﺯﻋﻞ ﻣﻨﻲ ﻟﻤﻦ ﻋﺮﻑ ﺍﻧﻨﺎ ﻏﺸﻴﻨﺎﻫﻮ ﻷﻧﻲ ﻗﻠﺖ ﻟﻴﻬﻮ ﺳﺎﻗﻮﻧﻲ ﺍﻟﺒﺴﻂ ﺍﻟﺸﺎﻣﻞ ﻭﻛﻀﺒﺖ ﻋﻠﻴﻬﻮ ﺑﺲ ﻫﻮ ﻣﺎ ﻋﺎﺭﻑ ﻧﺤﻦ ﻋﻤﻠﻨﺎ ﻛﺪﺍ ﻋﺸﺎﻥ ﻧﺴﺘﻐﻞ ﻋﺒﺎﺱ
_ ﻋﺸﺎﻥ ﻛﺪﺍ ﺍﻧﺎ ﻗﻠﺖ ﻟﻴﻚ ﺧﺎﻳﻒ ﻣﻦ ﺍﻟﺘﺎﺝ ﻳﻮﺭﻳﻬﻮ ﻻﻧﻮ ﺍﻛﻴﺪ ﺑﻘﻮﻝ ﻟﻴﻬﻮ ﺭﺳﻠﻮﻧﻲ ﻣﺪﻧﻲ ﺑﺒﻀﺎﻋﺔ
_ ﻣﺎ ﺑﻘﺪﺭ ﻳﻘﻮﻝ ﻛﺪﺍ ﻻﻧﻚ ﺍﻧﺖ ﻗﻠﺖ ﻟﻴﻬﻮ ﺍﻟﺘﺎﺝ ﺷﻐﺎﻝ ﻣﺨﺪﺭﺍﺕ ﻓﻤﺎ ﺑﻘﺪﺭ ﻳﺠﻴﺐ ﻟﻴﻬﻮ ﺳﻴﺮﺗﻬﺎ
_ ﻃﻴﺐ ﻟﻮ ﻗﺎﻝ ﻟﻴﻬﻮ ؟
_ ﻟﻮ ﻗﺎﻝ ﻟﻴﻬﻮ ﺍﻟﺘﺎﺝ ﺑﻌﺮﻑ ﺍﻧﻨﺎ ﻏﺎﺷﻴﻦ ﻋﺒﺎﺱ ﻭﺍﺣﺘﻤﺎﻝ ﻛﺒﻴﺮ ﻳﻤﻨﻌﻮﺍ ﻳﺠﻴﻚ
_ ﻓﻲ ﺍﻟﺤﺎﻟﺔ ﺩﻱ ﻧﻌﻤﻞ ﺷﻨﻮ ؟
_ ﻓﻲ ﺍﻟﺤﺎﻟﺔ ﺩﻱ ﻧﻠﻌﺐ ﻋﻠﻰ ﺍﻟﻤﻜﺸﻮﻑ ﻭﺍﻧﺎ ﺑﻈﻬﺮ ﻭﺑﻬﺪﺩ ﻋﺒﺎﺱ ﻭﺍﻧﺖ ﺯﺍﺗﻚ ﻫﺪﺩﻭ ﻭﺧﻮﻓﻮ ﻭﺑﺸﺘﻐﻞ ﻣﻌﺎﻧﺎ ﺭﺳﻤﻲ
_ ﺑﺮﺿﻰ ﻟﻜﻦ ؟
_ ﻳﺮﺿﻰ ﻭﻻ ﻋﻠﻲ ﻛﻴﻔﻮ ﻭﺍﻧﺎ ﺯﺍﺗﻲ ﻣﺘﻤﻨﻲ ﻳﺤﺼﻞ ﺍﻟﻜﻼﻡ ﺩﺍ
_ ﻟﻜﻦ ﺍﻟﺘﺎﺝ ﻣﺎ ﺑﺨﻠﻴﻬﻮ
_ ﺻﺪﻗﻨﻲ ﻣﺎ ﺡ ﻳﺴﻤﻊ ﻛﻼﻡ ﺍﻟﺘﺎﺝ ﻻﻧﻮ ﺑﻜﻮﻥ ﺧﺎﻳﻒ ﻭﻣﺎﻓﻲ ﻣﻜﺎﻥ ﻳﻤﺸﻲ ﻋﻠﻴﻬﺎ ﻟﻮ ﻗﻌﺪ ﻫﻨﺎ ﻧﺤﻦ ﻗﺎﻋﺪﻳﻦ ، ﻭﻟﻼ ﻓﺎﺕ ﻣﺪﻧﻲ ﺍﺑﺠﺎﻛﻮﻣﺔ ﻣﻮﺟﻮﺩ
_ ﻫﺴﻲ ﻟﻮ ﺍﻧﻘﺒﺾ ﺣﻘﻴﻘﺔ ﻣﺎ ﻓﻠﻢ ﺯﻱ ﺣﻖ ﻳﻮﻣﺪﺍﻙ ؟
_ ﻟﻮ ﺍﻧﻘﺒﺾ ﻣﺎ ﻳﻨﻘﺒﺾ ، ﻧﻜﻮﻥ ﺧﺴﺮﻧﺎ ﺑﻀﺎﻋﺔ ﻭﺑﺲ ﻭﻫﻮ ﻻ ﺑﻌﺮﻓﻨﺎ ﻭﻻ ﺑﻨﻌﺮﻓﻮ
_ ﻫﺴﻲ ﻫﻮ ﻗﺎﻳﻞ ﺭﻭﺣﻮ ﻣﺨﺒﺮ . ﺭﺍﻳﻚ ﺷﻨﻮ ﺑﻌﺪ ﻳﺠﻲ ﻧﺸﻐﻠﻮ ﺗﻮﺯﻳﻊ ﻫﻨﺎ ﻓﻲ ﺍﻟﺨﺮﻃﻮﻡ
_ ﻧﺸﻮﻑ ﺑﻌﺪ ﻳﺠﻲ ﺑﺲ ﻻﺯﻡ ﻧﺴﺘﻔﻴﺪ ﻣﻦ ﺑﻬﺎﻣﺘﻮ ﻭﺳﺰﺍﺟﺘﻮ ﺩﻱ ﺍﻛﺒﺮ ﻓﺎﻳﺪﺓ
_ ﺑﺎﻟﻤﻨﺎﺳﺒﺔ ، ﺍﻟﺘﺎﺝ ﺟﺎﺏ ﻟﻴﻚ ﺧﺒﺮ ﺍﻟﺴﺮﻗﺔ ﺣﻘﺖ ﺑﻴﺘﻮ ؟
_ ﻛﻠﻤﻨﻲ ﺑﻴﻬﺎ ﺑﺲ ﻣﺎ ﺑﻠﻎ ﺍﻟﺒﻮﻟﻴﺲ
_ ﺑﺴﺘﻔﻴﺪ ﺷﻨﻮ ﻟﻮ ﺑﻠﻎ ﻳﻌﻨﻲ ؟
_ ﻫﻮ ﺯﺍﺗﻮ ﻋﺎﺭﻑ ﻛﺪﺍ ﻻﻧﻲ ﺳﺄﻟﺘﻮ ﻗﺎﻝ ﻟﻲ ﺡ ﻳﻌﻤﻠﻮﺍ ﺷﻨﻮ ﻳﻌﻨﻲ ﺍﻟﺒﻘﺖ ﺑﻘﺖ ﻭﻳﺎﻣﺎ ﺑﻴﻮﺕ ﺍﻧﺴﺮﻗﺖ ﻭﺣﻘﻬﻢ ﺭﺍﺡ ﺳﺎﻱ
_ ﻳﺎﺥ ﻫﻮ ﺯﺍﺗﻮ ﺑﻴﺘﻮ ﻟﻮ ﻣﺎ ﺍﻟﻘﺮﻭﺵ ﺍﻟﺸﻮﻳﺔ ﺍﻟﻠﻘﻴﺘﻬﺎ ﺩﻱ ﻣﺎ ﻓﻴﻬﻮ ﺷﻲ ﻳﻨﺴﺮﻕ ﻭﺍﻟﻈﺎﻫﺮ ﻛﺎﻥ ﻧﺎﺳﻴﻬﺎ
_ ﺍﻟﻤﻬﻢ ﺍﻻﻭﺭﺍﻕ ﺣﻘﺖ ﺍﻣﻼﻛﻮ ﺧﺎﺗﻴﻬﺎ ﻭﻳﻦ
_ ﺍﻟﺰﻭﻝ ﺩﺍ ﺣﺎﺟﺔ ﺣﺮﻳﺼﺔ ﻳﺎﺥ ﻭﺍﻧﺎ ﺧﺎﻳﻒ ﺍﻣﻼﻙ ﺯﺍﺗﻮ ﺗﻜﻮﻥ ﻣﺎ ﻋﻨﺪﻭ ﻭﻧﺤﻦ ﻣﻮﻫﻮﻣﻴﻦ ﺳﺎﻱ
_ ﻻ ﻻ ﺣﺎﺟﺔ ﺣﺮﻳﺼﺔ ﻓﻌﻼ ﺑﺲ ﻣﻼﻥ ﻗﺮﻭﺵ ﻣﺎ ﻣﻮﻫﻮﻣﻴﻦ ﻭﻻ ﺷﻲ ﺑﺲ ﺍﻟﻐﺮﻳﺒﺔ ﺍﻟﻴﻮﻣﻴﻦ ﺩﻳﻞ ﺗﺎﺏ ﻣﻦ ﺍﻟﺴﻜﺮ ﻭﺑﻘﻰ ﻳﺼﻠﻲ
_ ﺳﺒﺤﺎﻥ ﻣﻐﻴﺮ ﺍﻻﺣﻮﺍﻝ ، ﻳﻌﻨﻲ ﺟﺪﻉ ﺍﻟﻜﻔﺘﻴﺮﺓ ؟
_ ﻭﺍﻟﻠﻪ ﺟﺪﻋﻬﺎ ﻭﺑﻘﻰ ﺷﻴﺦ ﻋﺪﻳﻞ ﻭﺑﺴﺒﺤﺘﻮ
ﺍﻟﻬﺎﺩﻱ ﺳﻴﺪ ﺍﻟﺘﻜﺴﻲ ﺑﻌﺪ ﻣﺮﻗﻮﺍ ﻣﻦ ﺍﻟﺨﺮﻃﻮﻡ ﻗﺎﻝ ﻟﻌﺒﺎﺱ ﺍﻟﻜﺮﺗﻮﻧﺔ ﺩﻱ ﻓﻮﻗﻬﺎ ﺷﻨﻮ ﻳﺎ ﺟﻨﻰ ؟
ﻋﺒﺎﺱ ﺣﺪﺭ ﻟﻴﻬﻮ ﻭﺻﺮﺍ ﻭﺷﻮ ﻭﻗﺎﻝ ﻟﻴﻬﻮ ﺑﻨﻬﺮﺓ
_ ﺟﻨﻰ ؟ ﺣﺴﻦ ﺃﻟﻔﺎﻇﻚ
_ ﺳﻤﺢ ﻣﻌﻠﻴﺶ ﻓﻮﻗﻬﺎ ﺷﻨﻮ ﺍﻟﻜﺮﺗﻮﻧﺔ ﺩﻱ ﻳﺎ ﺍﺑﻮ ﺍﻟﺸﺒﺎﺏ
_ ﻣﺎ ﺗﻘﻮﻝ ﻟﻲ ﻳﺎ ﺍﺑﻮ ﺍﻟﺸﺒﺎﺏ ﺍﻧﺎ ﺍﺳﻤﻲ ﻋﺒﺎﺱ
_ ﺳﻤﺢ ﻓﻮﻗﻬﺎ ﺷﻨﻮ ﻳﺎ ﺍﺳﺘﺎﺫ ﻋﺒﺎﺱ
_ ﺍﻧﺖ ﺑﺘﺴﺄﻝ ﻟﺸﻨﻮ ؟
_ ﺑﺴﺄﻝ ﺳﺎﻱ ﻋﺸﺎﻥ ﺍﻋﺮﻑ
_ ﻣﺎ ﺿﺮﻭﺭﻱ ﺗﻌﺮﻑ
_ ﻻ ﺿﺮﻭﺭﻱ ﺍﻋﺮﻑ ﻻﻧﻮ ﺩﻱ ﻋﺮﺑﻴﺘﻲ ﺍﻧﺎ ﻭﺍﻣﻜﻦ ﻓﻴﻬﺎ ﻣﺨﺪﺭﺍﺕ ﻫﺴﻊ
_ ﻣﻦ ﺳﺎﻋﺔ ﺍﺗﻔﻘﺖ ﻣﻌﺎﻙ ﻭﺭﻛﺒﺖ ﻣﺎ ﻋﺮﺑﻴﺘﻚ ﻟﺤﺪﻱ ﺍﻧﺎ ﻣﺎ ﺍﻧﺰﻝ ﻣﻨﻬﺎ ﺣﺘﻰ ﺗﺒﻘﻰ ﻋﺮﺑﻴﺘﻚ ﻷﻧﻲ ﺃﺟﺮﺗﻬﺎ
_ ﺍﻧﺖ ﻣﺎﻟﻚ ﻗﻄﻴﻢ ﻛﺪﻱ ﻫﺎ ؟
_ ﻋﻠﻴﻚ ﺍﻟﻠﻪ ﺳﻮﻕ ﺳﻮﺍﻗﺘﻚ ﺑﺲ ﻭﻣﺎ ﺗﺘﺤﺸﺮ ﻓﻲ ﺣﺎﺟﺔ ﻣﺎ ﺑﺘﺨﺼﻚ
_ ﻳﻌﻨﻲ ﻫﺴﻲ ﺍﻟﻌﺮﺑﻴﺔ ﺩﻱ ﻻﻧﻚ ﺍﺟﺮﺗﻬﺎ ﺑﻘﺖ ﺣﻘﺘﻚ ﻟﺤﺪﻱ ﻣﺎ ﺗﻨﺰﻝ ﻣﻨﻬﺎ ﻭﺃﻱ ﺣﺎﺟﺔ ﻣﻤﻜﻦ ﺗﺨﺘﻬﺎ ﻓﻴﻬﺎ
_ ﺃﻳﻮﺓ
_ ﻭﺍﻧﺎ ﺍﻟﺴﻮﺍﻕ ﺑﺘﺎﻋﻚ ﻭﻣﺎ ﻣﻦ ﺣﻘﻲ ﺍﻋﺮﻓﻚ ﺷﺎﻳﻞ ﺷﻨﻮ ؟
_ ﺃﻳﻮﺓ ﻭﻣﺎ ﺗﻨﻀﻢ ﻣﻌﺎﻱ ﺯﺍﺗﻮ ﺍﻻ ﺍﻧﺎ ﺍﻧﻀﻢ ﻣﻌﺎﻙ
_ ﺑﺴﻴﻄﺔ
ﺍﻟﻬﺎﺩﻱ ﺳﻜﺖ ﻭﺍﻟﺰﻣﻦ ﺩﺍﻙ ﻗﺮﺑﻮﺍ ﻳﺼﻠﻮﺍ ﺍﻟﻤﺴﻴﺪ ﻭﺍﻟﻤﺴﻴﺪ ﺟﺒﺪﺓ ﻣﻨﻬﻢ ﻭﻧﺰﻝ ﻣﻦ ﺍﻟﺸﺎﺭﻉ ﻭﻗﺎﻝ ﻟﻌﺒﺎﺱ ﺍﻧﺰﻝ
_ ﺃﻧﺰﻝ ﻭﻳﻦ ؟
_ ﺃﻧﺰﻝ ﻫﻨﺎ ﻭﺍﻧﺎ ﻋﺸﺎﻥ ﻗﻄﺎﻣﺘﻚ ﻭﻗﻠﺔ ﺍﺩﺑﻚ ﺩﻱ ﻣﺎﻧﻲ ﻣﻮﺩﻳﻚ ﻭﻣﺎ ﺩﺍﻳﺮ ﻣﻨﻚ ﻭﻻ ﻗﺮﺵ
_ ﺗﻮﺻﻠﻨﻲ ﻣﺪﻧﻲ
_ ﻣﺎ ﺩﺍﻳﺮ ﺍﻭﺻﻠﻚ ﻣﺪﻧﻲ ﻭﺍﺣﺴﻦ ﻟﻴﻚ ﺗﻨﺰﻝ ﻗﺒﺎﻝ ﺍﻧﺰﻟﻚ ﺑﻄﺮﻳﻘﺘﻲ
_ ﺳﻤﺢ ﻭﺻﻠﻨﻲ ﺍﻟﻤﺴﻴﺪ ﻫﻨﺎ ﻣﺎﻓﻲ ﻋﺮﺑﻴﺔ ﺑﺘﻘﻴﻒ ﻟﻲ
_ ﺑﺘﻨﺰﻝ ﻭﻟﻼ ﺍﻧﺰﻟﻚ ﺑﻄﺮﻳﻘﺘﻲ ؟
_ ﺳﻤﺢ ﻣﻌﻠﻴﺶ ﺍﻧﺎ ﻣﺘﺄﺳﻒ
_ ﺍﻧﺰﻝ ﺍﻧﺖ ﻭﻛﺮﺗﻮﻧﺘﻚ ﻭﺷﻴﻞ ﺃﺳﻔﻚ ﻣﻌﺎﻙ
_ ﻳﺎﺥ ﻭﺍﻟﻠﻪ ﺍﻧﺎ ﻣﺎ ﺭﻛﺒﺖ ﺍﻟﺒﺼﺎﺕ ﻋﺸﺎﻥ ﻣﺴﺘﻌﺠﻞ ﻭﺿﺮﻭﺭﻱ ﺍﻭﺻﻞ ﺍﻟﻜﺮﺗﻮﻧﺔ ﺩﻱ ﺳﺮﻳﻊ ﻭﺍﻛﺎﻥ ﻧﺰﻟﺖ ﺑﺪﺧﻞ ﻓﻲ ﻣﺸﻜﻠﺔ ﻛﺒﻴﺮﺓ
_ ﺳﻤﺢ ﺑﺘﻘﻞ ﻓﻲ ﺃﺩﺑﻚ ﻭﺗﺘﻘﺎﻃﻢ ﻟﺸﻨﻮ ، ﺍﻧﺖ ﻗﺎﻳﻞ ﺧﻼﺱ ﺍﻧﺎ ﻟﻮ ﻣﺎ ﻣﺸﻮﺍﺭﻙ ﺩﺍ ﺑﻤﻮﺕ ﺟﻮﻉ ﻭﻟﻼ ﻣﺎﻓﻲ ﺭﻛﺎﺏ ﻏﻴﺮﻙ ؟
_ ﺍﻧﺎ ﺑﻌﺘﺬﺭ ﺑﺲ ﻋﻠﻴﻚ ﺍﻟﻠﻪ ﺳﻮﻕ ﻣﺎ ﺗﻨﺰﻟﻨﻲ ﻫﻨﺎ
_ ﺍﻟﻜﺮﺗﻮﻧﺔ ﺩﻱ ﻓﻴﻬﺎ ﺷﻨﻮ ﻭﺍﻭﻋﻚ ﺗﻜﻀﺐ ﻋﻠﻲ ﻷﻧﻲ ﺑﺼﻞ ﺍﻟﻤﺴﻴﺪ ﻭﺑﺠﻴﺐ ﻟﻲ ﻋﺴﻜﺮﻱ ﺍﺧﻠﻴﻬﻮ ﻳﻔﺘﺤﻬﺎ
_ ﻛﻴﻒ ﺗﺠﻴﺐ ﻋﺴﻜﺮﻱ ﻳﻔﺘﺤﻬﺎ ؟
_ ﺍﻳﻮﺓ ﻋﺸﺎﻥ ﻣﺎ ﺍﺗﺒﺎﻟﻰ ﺑﻴﻚ ﻟﻮ ﻓﻴﻬﺎ ﻣﺼﻴﺒﺔ ، ﻓﻴﻬﺎ ﺷﻨﻮ ؟
_ ﻓﻴﻬﺎ ﺣﺒﻮﺏ ﺯﻱ ﺍﻟﻤﺨﺪﺭﺍﺕ ﻟﻜﻦ ﻣﺎ ﻣﺨﺪﺭﺍﺕ
_ ﻛﻴﻒ ﻛﻴﻒ ؟
_ ﺍﻧﻘﺺ ﻟﻴﻚ ﺍﻟﻘﺼﺔ ﻣﻦ ﺍﻻﻭﻝ . ﺍﺻﻼ ﺍﻧﺎ ﺷﻐﺎﻝ ﻣﺨﺒﺮ ﺳﺮﻱ ﻓﻲ ﺍﻟﻤﺒﺎﺣﺚ ﺗﺒﻊ ﻣﺤﺎﺭﺑﺔ ﺍﻟﻤﺨﺪﺭﺍﺕ ﻭﻭﻭ ..
ﻭﻋﺒﺎﺱ ﺣﻜﻰ ﻟﻠﻬﺎﺩﻱ ﺍﻟﻤﻮﺿﻮﻉ ﻛﻠﻮ
ﻭﻗﺼﺘﻮ ﻣﻊ ﻓﺮﺡ ﺍﻟﻜﻌﺐ ﻭﺍﺑﺠﺎﻛﻮﻣﺔ ﻣﻦ ﻃﻖ ﻃﻖ ﻟﺤﺪﻱ ﻣﺎ ﺭﻛﺐ ﻣﻌﺎﻫﻮ
_ ﺍﻟﻬﺎﺩﻱ ﻗﺎﻝ ﻟﻴﻬﻮ ﻳﺎ ﺟﻨﻰ ﻫﻮﻱ ﺍﻥ ﺑﻘﻰ ﻛﻼﻣﻚ ﺩﺍ ﺻﺎﺡ ﻭﻣﺎﻙ ﻛﻀﺎﺏ ﺍﻟﻨﺎﺱ ﺩﻳﻞ ﻣﺸﻴﻠﻨﻚ ﺍﻟﻘﻔﺔ
_ ﻣﺸﻴﻠﻨﻲ ﺍﻟﻘﻔﺔ ﻛﻴﻔﻦ ؟
_ ﺳﻤﺢ ﻻﻋﺒﻴﻦ ﺑﻴﻚ ﺗﻴﻮﺓ ، ﺑﺘﻌﺮﻑ ﺍﻟﺘﻴﻮﺓ ؟
_ ﺑﻌﺮﻑ ﺍﻟﺘﻴﻮﺓ ﻭﺍﻧﺎ ﻋﺎﺭﻑ ﻻﻋﺒﻴﻦ ﻋﻠﻲ ﻻﻧﻮ ﻓﺮﺡ ﺻﺎﺣﺐ ﺍﻟﻨﺠﻮﻣﻲ
_ ﺍﻟﻨﺠﻮﻣﻲ ﺩﺍ ﺷﻨﻮ ﻛﻤﺎﻥ
_ ﻳﺎﺧﻲ ﺍﻧﺤﻜﻲ ﻟﻴﻚ ﺍﻟﻘﺼﺔ ﻣﻦ ﺍﻭﻝ ﻣﺎ ﺟﻴﺖ ﺍﻟﺨﺮﻃﻮﻡ ﻭﺍﻟﻜﻼﻡ ﺩﺍ ﻗﺒﺎﻝ ﺳﺒﻌﺔ ﺗﻤﺎﻧﻴﺔ ﺷﻬﻮﺭ ﺍﻧﺎ ﻛﻨﺖ ﻋﺎﻃﻞ ﻓﻲ ﺍﻟﺤﻠﺔ ﻭﺑﺸﺮﺏ ﺍﻟﻌﺮﻗﻲ ﻭﻭﻭﻭ ...
ﻭﺩ ﺍﻟﻀﻮ ﻣﺸﻰ ﺍﻡ ﺩﺭﻣﺎﻥ ﻭﻣﺎ ﻗﻌﺪ ﻓﻴﻬﺎ ﻛﺘﻴﺮ ﻭﺍﻛﺎﻥ ﻋﻨﺪﻭ ﺣﺎﺟﺎﺕ ﺩﺍﻳﺮ ﻳﺸﺘﺮﻳﻬﺎ ﻭﻣﺎ ﻟﻘﺎﻫﺎ ﻭﺻﻰ ﻟﻴﻬﺎ ﻭﺭﺟﻊ ﺍﻟﺸﻌﺒﻲ ﻭﻓﺎﺕ ﻟﻌﺒﺪ ﺍﻟﻘﻴﻮﻡ ﻭﺳﺄﻟﻮ ﻣﻦ ﺍﻟﺸﻐﻞ ﻭﻋﺒﺪ ﺍﻟﻘﻴﻮﻡ ﻭﺭﺍﻫﻮ ﺍﻧﻮ ﺍﻟﺘﺎﺝ ﺍﻻﺩﻯ ﻋﺒﺎﺱ ﺍﻟﻘﺮﻭﺵ ﻭﻭﺭﺍﻫﻮ ﻟﻤﻦ ﻋﺼﺮﻭ ﺑﺎﻟﻘﻌﺎﺩ
ﻭﺩ ﺍﻟﻀﻮ ﺍﺗﻜﻴﻒ ﻣﻦ ﺍﻟﺘﺎﺝ ﺷﺪﻳﺪ ﻭﻓﺎﺕ ﻟﻴﻬﻮ ﺍﻛﺎﻥ ﺑﻌﺮﻓﻮ ﻟﻜﻦ ﻣﺎ ﻋﻨﺪﻭ ﺑﻴﻬﻮ ﻋﻼﻗﺔ ﻭﻣﺸﻰ ﺳﻠﻢ ﻋﻠﻴﻬﻮ ﻭﺷﻜﺮﻭ ﻋﻠﻰ ﻛﻞ ﺷﻲ ﻋﻤﻠﻮ ﻭﺍﻟﺘﺎﺝ ﻗﺎﻝ ﻟﻴﻬﻮ ﻋﺒﺎﺱ ﺩﺍ ﻣﺎﺷﻲ ﻣﻊ ﻧﺎﺱ ﻛﻌﺒﻴﻦ ﻭﺍﻧﺎ ﻣﺎ ﻗﺎﺩﺭ ﺍﺑﻌﺪﻭ ﻣﻨﻬﻢ ﻭﻟﻮ ﺳﻤﻌﺖ ﺑﻴﻬﻮ ﻣﺴﺠﻮﻥ ﻭﻟﻼ ﻣﻜﺘﻮﻝ ﺻﺪﻕ ﻭﻳﺎﺭﻳﺖ ﺗﺒﻠﻎ ﺃﻫﻠﻮ ﻭﺍﻧﺎ ﺑﺤﺎﻭﻝ ﺍﻣﻨﻌﻮ ﻟﻜﻦ ﻣﺎ ﺍﻇﻦ ﻳﺘﻤﻨﻊ ﻟﻲ ﻻﻧﻮ ﺑﻔﻮﺕ ﻟﻴﻬﻢ ﻣﻦ ﻭﺭﺍﻱ ﻭﻫﺴﻲ ﻟﻴﻬﻮ ﻳﻮﻣﻴﻦ ﻣﺎ ﺟﺎﺀ ﺍﻟﺒﻴﺖ ﻭﺩﺍ ﺍﻟﻴﻮﻡ ﺍﻟﺘﺎﻟﺖ ﻭﺍﻧﺎ ﺳﻮﻳﺖ ﺍﻟﻌﻠﻲ ﻭﺑﻠﻐﺘﻚ ﻭﻣﻦ ﻧﺎﺣﻴﺔ ﺳﻜﻦ ﻭﻗﻌﺎﺩ ﺑﻴﺘﻲ ﻣﻔﺘﻮﺡ ﻟﻴﻬﻮ ﺑﺲ ﻟﻮ ﻟﻘﻴﺘﻮ ﺑﺎﻗﻲ ﻋﻠﻲ ﺍﻟﺠﻤﺎﻋﺔ ﺩﻳﻠﻚ ﺗﺎﻧﻲ ﻣﺎ ﺑﺴﻜﻨﻮ ﻣﻌﺎﻱ
ﻋﻤﺮ ﻗﺎﻝ ﻟﻴﻬﻮ ﻛﻼﻣﻚ ﻋﺪﻳﻞ ﻟﻜﻦ ﺧﺘﻨﻲ ﻓﻲ ﺍﻟﺼﻮﺭﺓ ﺻﺎﺡ ﻋﺸﺎﻥ ﺍﻧﺎ ﺍﻋﺮﻑ ﺍﺗﺼﺮﻑ ﻛﻴﻒ
_ ﻛﻴﻒ ﺍﺧﺘﻚ ﻓﻲ ﺍﻟﺼﻮﺭﺓ ؟
_ ﻳﻌﻨﻲ ﺃﻱ ﺣﺎﺟﺔ ﺍﻧﺖ ﻋﺎﺭﻓﻬﺎ ﻋﻦ ﺍﻟﺠﻤﺎﻋﺔ ﺩﻳﻞ ﻗﻮﻟﻬﺎ ﻟﻲ ﻭﺍﻟﻌﻼﻗﺔ ﺷﻨﻮ ﺍﻟﺮﺑﻄﺖ ﻋﺒﺎﺱ ﺑﻴﻬﻢ ﻻﻧﻚ ﺧﻮﻓﺘﻨﻲ ﺑﻜﻼﻣﻚ ﺩﺍ ﻟﻤﻦ ﻗﻠﺖ ﻛﺘﻞ ﻭﺳﺠﻦ
_ ﺍﻛﺎﻥ ﻛﺪﺍ ﺍﻧﺖ ﺍﻟﻠﻴﻠﺔ ﻣﺎ ﺗﺴﺎﻓﺮ ﻣﺪﻧﻲ ﻭﺗﺒﻴﺖ ﻣﻌﺎﻱ ﻓﻲ ﺍﻟﺒﻴﺖ ﺑﺲ ﺍﻣﺶ ﻭﺗﻌﺎﻝ ﻟﻲ ﺍﻟﻤﻐﺮﺏ ﻻﻧﻲ ﻣﺸﻐﻮﻝ ﻭﺍﻟﻤﻮﺿﻮﻉ ﺍﺣﺘﻤﺎﻝ ﻳﻄﻮﻝ ﻭﻣﺎ ﺑﻨﻘﺎﻝ ﻫﻨﺎ ﺍﻭ ﻫﺎﻙ ﻣﻔﺘﺎﺡ ﺍﻟﺒﻴﺖ ﺍﻣﺶ ﺍﺧﺪ ﻓﻴﻬﻮ ﺭﺍﺣﺘﻚ ﻟﺤﺪﻱ ﺍﻧﺎ ﻣﺎ ﺍﺟﻴﻚ
_ ﻋﺪﻳﻠﺔ ﺗﺐ ﻭﺧﻠﻲ ﻣﻔﺘﺎﺣﻚ ﻣﻌﺎﻙ ﺍﻧﺎ ﺑﻤﺶ ﺍﻗﻨﺐ ﻣﻊ ﻋﺒﺪ ﺍﻟﻘﻴﻮﻡ ﻓﻲ ﺍﻟﺪﻛﺎﻥ ﻭﺑﻌﺪﻳﻦ ﺑﺠﻴﻚ ﻭﻟﻮ ﺍﺗﺄﺧﺮﺕ ﺍﻭ ﺍﻧﺖ ﻣﺸﻴﺖ ﺑﺪﺭﻱ ﺑﺨﻠﻲ ﻋﺒﺪ ﺍﻟﻘﻴﻮﻡ ﻳﻮﺻﻠﻨﻲ ﺑﻴﺘﻚ
ﺍﻟﻬﺎﺩﻱ ﺑﻌﺪ ﺳﻤﻊ ﻗﺼﺔ ﻋﺒﺎﺱ ﻛﻠﻬﺎ ﻗﺎﻝ ﻟﻴﻬﻮ ﺩﻱ ﻣﺨﺪﺭﺍﺕ ﻳﺎ ﺟﻨﻰ ﻭﺟﻨﻰ ﺍﻛﺎﻥ ﺗﺰﻋﻞ ﺍﻛﺎﻥ ﺗﺮﺿﻰ ﻭﻣﺎﻙ ﺟﻨﻰ ، ﺩﻱ ﻣﺨﺪﺭﺍﺕ ﺁ ﺷﺎﻓﻊ
_ ﺷﺎﻓﻊ ﻋﺪﻳﻞ ؟
_ ﺷﺎﻓﻊ ﺯﺍﺗﻬﺎ ﻛﺘﻴﺮﺓ ﻋﻠﻴﻚ ، ﺍﻧﺖ ﻣﺸﻜﻠﺘﻚ ﻗﺎﻳﻞ ﺭﻭﺣﻚ ﺭﺍﺟﻞ ﻭﻓﺎﻫﻢ ﻭﺑﺘﻌﺮﻑ ﻛﻞ ﺷﻲ ﻟﻜﻦ ﺍﻟﺤﻘﻴﻘﺔ ﻭﻣﻦ ﻛﻼﻣﻚ ﺍﻟﻘﻠﺘﻮ ﻟﻲ ﻭﻋﺸﺎﻥ ﻣﺎ ﺗﻐﺶ ﺭﻭﺣﻚ ﻭﺍﻟﻨﺎﺱ ﺗﻐﺸﻚ ﺑﻘﻮﻟﻬﺎ ﻟﻴﻚ ﻓﻲ ﻭﺷﻚ ﺍﻧﺖ ﺯﻭﻝ ﻃﻴﺮﺓ ﺳﺎﻱ ﻟﻜﻦ ﺍﻟﻠﻪ ﺣﺎﻟﻴﻚ ﻣﻦ ﻣﺸﺎﻛﻞ ﻛﺘﻴﺮﺓ ﻭﺑﺮﺍﻙ ﺍﻟﺒﺘﺪﺧﻞ ﻓﻴﻬﺎ ﺭﻭﺣﻚ
_ ﻳﻌﻨﻲ ﺍﻋﻤﻞ ﺷﻨﻮ ﻳﻌﻨﻲ ؟
_ ﺍﻧﺎ ﻟﻮ ﻓﻲ ﻣﻜﺎﻧﻚ ﻣﻦ ﺍﻟﺪﻛﺎﻥ ﻣﺎ ﺑﻤﺮﻕ ﻭﻣﺎ ﻋﻨﺪﻱ ﺷﻐﻠﺔ ﺑﺰﻭﻝ ﻭﺍﻟﺘﺎﺝ ﺍﻟﺒﺘﻘﻮﻝ ﻓﺮﺡ ﻋﻤﻠﻚ ﻣﺨﺒﺮ ﻋﻠﻴﻬﻮ ﺩﺍ ﺍﻟﻮﺣﻴﺪ ﺍﻟﻨﻔﻌﻚ ﻭﻟﻮ ﻣﺎ ﻫﻮ ﻛﺎﻥ ﺑﺘﻜﻮﻥ ﻻﻓﻲ ﺳﺎﻱ
_ ﻭﺍﻟﻠﻪ ﺍﻧﺎ ﺳﻜﻨﺖ ﻣﻌﺎﻫﻮ ﻳﻮﻡ ﻭﺍﺣﺪ ﻣﺎ ﺷﻔﺘﻮ ﺟﺎﺏ ﺳﻴﺮﺓ ﺯﻭﻝ ﻭﻻ ﺟﺎﺏ ﺳﻴﺮﺓ ﺍﻟﻤﺨﺪﺭﺍﺕ
_ ﻫﺴﻲ ﺍﻧﺖ ﻋﺎﺭﻑ ﺭﻭﺣﻚ ﻣﺎﺷﻲ ﺗﻮﺻﻞ ﻣﺨﺪﺭﺍﺕ ﻟﻌﺼﺎﺑﺔ ﺧﻄﻴﺮﺓ ﺟﺪﺍ ﻋﻠﻰ ﺍﻟﺒﻠﺪ ﻛﻠﻮ ؟
_ ﺑﺲ ﺩﻳﻞ ﺷﻐﺎﻟﻴﻦ ﺑﻮﺍﻟﻴﺲ ﻭﺿﺒﺎﻁ ﻓﻲ ﺍﻟﻤﺒﺎﺣﺚ
_ ﻭﻟﻮ ﺍﻟﺰﻭﻝ ﺍﻟﻔﺎﺳﺪ ﻣﺎ ﺍﻟﻮﻇﻴﻔﺔ ﺍﻟﻔﺎﺳﺪﺓ ﻭﻳﺎﻣﺎ ﻓﻲ ﻧﺎﺱ ﺷﻐﺎﻟﻴﻦ ﻓﻲ ﻣﻨﺎﺻﺐ ﻓﻮﻕ ﻭﻫﻢ ﺍﻓﺴﺪ ﺍﻟﻨﺎﺱ
_ ﻃﻴﺐ ﻭﺍﻟﺤﻞ ﺷﻨﻮ ؟
_ ﺍﻟﺤﻞ ﺍﻧﺎ ﻣﻦ ﺣﻠﺔ ﺯﻱ ﺣﻠﺘﻜﻢ ﻓﻲ ﺍﻟﺠﺰﻳﺮﺓ ﺩﻱ ﻭﻟﻮ ﺑﺘﺴﻤﻊ ﻛﻼﻣﻲ ﺗﻤﺸﻲ ﻣﻌﺎﻱ ﺣﻠﺘﻨﺎ ﻭﺗﻘﻌﺪ ﻟﻴﻚ ﻛﻢ ﻳﻮﻡ ﻓﻲ ﺑﻴﺘﻨﺎ ﻭﺗﺨﻠﻴﻬﻢ ﻳﺠﻘﻠﺒﻮﺍ ﻻ ﻋﺎﺭﻓﻨﻚ ﻣﻘﺒﻮﺽ ﻭﻟﻼ ﻋﺎﺭﻓﻨﻚ ﺣﻲ ﻭﻻ ﻣﻴﺖ ﻭﺍﻧﺎ ﺑﺮﺟﻊ ﺍﺷﻤﺸﻢ ﺑﺲ ﻭﺻﻒ ﻟﻲ ﺑﻴﺖ ﻓﺮﺡ ﺩﺍ ﻛﻮﻳﺲ ﻭﺷﻐﺎﻝ ﻭﻳﻦ ﻭﺍﺳﻤﻮ ﺑﺎﻟﻜﺎﻣﻞ ﻭﺑﺘﺼﺮﻑ ﺍﻧﺎ
_ ﺩﺍﻳﺮ ﺗﻌﻤﻞ ﺷﻨﻮ ؟
_ ﺧﻠﻴﻚ ﻣﻦ ﺍﻟﺪﺍﻳﺮ ﺍﻋﻤﻠﻮ ﺑﺲ ﺍﺳﻤﻊ ﻛﻼﻣﻲ ﺩﺍ ﻭﺍﻟﻨﺎﺱ ﺩﻳﻞ ﻟﻮ ﺑﻘﻮﺍ ﻋﺼﺎﺑﺔ ﺑﻨﻘﺒﻀﻬﻢ
_ ﻭﺍﻟﻜﺮﺗﻮﻧﺔ ؟
_ ﺍﻟﻜﺮﺗﻮﻧﺔ ﺑﺨﻠﻴﻬﺎ ﻣﻌﺎﻙ ﻓﻲ ﺑﻴﺘﻨﺎ ﻟﻤﻦ ﻧﺸﻮﻑ ﺍﻟﺒﺤﺼﻞ ﺷﻨﻮ ؟ ﺑﺲ ﻣﺎ ﻳﻜﻮﻥ ﻓﻲ ﻭﺍﺣﺪ ﺷﺎﻓﻚ ﻟﻤﻦ ﺭﻛﺒﺖ ﻣﻌﺎﻱ ؟
_ ﻻ ﻻ ﻣﺎﻓﻲ ﺯﻭﻝ ﺷﺎﻓﻨﻲ ﻭﻻ ﺷﻲ ﻻﻧﻬﻢ ﻗﺎﻳﻠﻨﻲ ﺑﺮﻛﺐ ﺍﻟﺒﺺ
_ ﺗﻤﺎﻡ ، ﻭﺭﺡ ﺣﻠﺘﻨﺎ