ﻛﻞ ﺍﻟﻘﺮﻭﺵ ﺍﻟﻔﻲ ﺟﻴﺐ ﻋﺒﺎﺱ ﻛﻤﻠﺖ ﻣﺎ ﺑﺎﻗﻲ ﻏﻴﺮ ﺃﻟﻒ ﺟﻨﻴﻪ ﻭﺭﺑﻴﻊ ﻣﺸﻰ ﺑﻴﺘﻬﻢ ﺟﺎﺏ ﻟﻴﻬﻮ ﻏﻴﺎﺭ ﻭﺟﺎﺀ ﺳﺎﻕ ﻋﺒﺎﺱ ﻭﻣﺸﻮﺍ ﺍﻟﻤﻄﻌﻢ ﻭﺑﻌﺪ ﺍﻛﻠﻮ ﻗﺎﻝ ﻟﻌﺒﺎﺱ ﺣﺎﺳﺐ ﻭﺩﺍﻳﻤﺎ ﻫﻮ ﺍﻟﺒﺤﺎﺳﺐ
ﺑﻌﺪ ﻣﺮﻗﻮﺍ ﻣﻦ ﺍﻟﻤﻄﻌﻢ ﺭﺑﻴﻊ ﻗﺎﺑﻞ ﻟﻴﻬﻮ ﻭﺍﺣﺪ ﻣﻦ ﺍﺻﺤﺎﺑﻮ ﻭﺯﺡ ﺑﻴﻬﻮ ﺑﻌﻴﺪ ﻣﻦ ﻋﺒﺎﺱ ﻭﻧﻀﻢ ﻣﻌﺎﻫﻮ ﻣﺴﺎﻓﺔ ﻭﺟﺎﺀ ﻗﺎﻝ ﻟﻌﺒﺎﺱ ﺍﻧﺖ ﺍﻣﺸﻲ ﺍﻟﺒﻴﺖ ﺍﻧﺎ ﺟﺎﺗﻨﻲ ﺗﻌﻠﻴﻤﺎﺕ ﻋﻨﺪﻧﺎ ﻣﺄﻣﻮﺭﻳﺔ ﻭﺍﺣﺘﻤﺎﻝ ﺍﺗﺄﺧﺮ
_ ﺩﺍ ﻣﻨﻮ ﺍﻟﻜﻨﺖ ﺑﺘﺘﻜﻠﻢ ﻣﻌﺎﻫﻮ ﺩﺍ؟
_ ﺩﺍ ﺍﻟﺒﺠﻴﺐ ﻟﻲ ﺍﻟﺘﻌﻠﻴﻤﺎﺕ ﻭﺍﻟﻠﻴﻠﺔ ﻭﻓﻲ ﻣﺪﺍﻫﻤﺔ ﺍﻛﺎﻥ ﻇﺒﻄﺖ ﻭﻗﺒﻀﻨﺎ ﺍﻟﻤﺠﺮﻣﻴﻦ ﺑﺮﻗﻮﻧﻲ
ﻋﺒﺎﺱ ﺩﻋﻰ ﻟﻴﻬﻮ ﻭﻓﺎﺕ ﺍﻟﺒﻴﺖ ﻭﻛﺎﻥ ﻣﺒﺴﻮﻁ ﻣﻦ ﺭﺑﻴﻊ ﺩﺍ ﺷﺪﻳﺪ ﻭﺷﺎﻳﻔﻮ ﻋﺒﻘﺮﻱ ﻭﻣﻔﺘﺢ ﻭﺍﺣﺴﻦ ﺯﻭﻝ ﻷﻧﻮ ﻣﻀﺤﻲ ﺑﺴﻤﻌﺘﻮ ﻭﺑﺤﻴﺎﺗﻮ ﻓﻲ ﺳﺒﻴﻞ ﺷﻐﻠﻮ ﻭﻗﺎﻝ ﺭﺑﻴﻊ ﺩﺍ ﻣﻤﺜﻞ ﺑﺎﺭﻉ ﻻﻧﻮ ﻗﺪﺭ ﻳﻘﻨﻊ ﺍﻟﻨﺎﺱ ﻛﻠﻬﻢ ﺑﺈﻧﻮ ﺯﻭﻝ ﺻﺎﻳﻊ ﺳﺎﻱ ﻭﺑﺘﺎﻉ ﻣﺨﺪﺭﺍﺕ ﻭﺩﺍ ﻛﻠﻮ ﻋﺸﺎﻥ ﻳﻨﻀﻒ ﺍﻟﺒﻠﺪ ﺩﻱ ﻣﻦ ﺍﻟﻤﺠﺮﻣﻴﻦ ﻭﻏﻴﺮ ﻛﺪﺍ ﺯﻭﻝ ﺿﻜﺮﺍﻥ ﺷﺪﻳﺪ ﻭﺍﺧﻮ ﺍﺧﻮﺍﻥ ﻷﻧﻲ ﻣﻦ ﺳﺎﻋﺔ ﻛﻠﻤﺘﻮ ﺑﻮﺩ ﺍﻟﻀﻮ ﺍﻟﺪﺍﻳﺮ ﻳﺎﻛﻞ ﺣﻘﻲ ﺍﻟﺰﻭﻝ ﺩﺍ ﻣﺎ ﺍﺭﺗﺎﺡ ﻭﻗﻄﻊ ﻧﻮﻣﺘﻮ ﻭﻣﺸﻰ ﻣﻌﺎﻱ ﺍﻟﺴﻮﻕ ﻋﺸﺎﻥ ﻳﻼﻗﻲ ﻭﺩ ﺍﻟﻀﻮ ﻭﻳﻘﻠﻊ ﻟﻲ ﻗﺮﻭﺷﻲ ﻣﻨﻮ
ﻋﻤﺮ ﻗﻔﻞ ﺍﻟﺪﻛﺎﻥ ﻭﻣﺸﻰ ﻣﻊ ﺍﺑﻮﻫﻮ ﻭﺣﺎﺝ ﺍﺑﺮﺍﻫﻴﻢ ﺍﻟﻤﺴﺘﺸﻔﻰ ﻭﺯﺍﺭﻭﺍ ﺭﺣﻤﺔ ﺍﻟﻠﻪ ﻫﻮ ﻭﺍﺧﻮﺍﻧﻮ ﻭﻣﺸﻮﺍ ﻛﻠﻬﻢ ﻟﺤﻘﻮﺍ ﺑﺺ ﺍﻟﺤﻠﺔ
ﺍﻟﻌﺒﻴﺪ ﻗﻌﺪ ﺟﻤﺐ ﻋﻤﺮ ﻭﻗﺎﻝ ﻟﻴﻬﻮ ﺑﻨﻠﻘﻰ ﻋﺒﺎﺱ ﻓﻲ ﺍﻟﺤﻠﺔ ﻻﻧﻮ ﺍﻟﻈﺎﻫﺮ ﻫﻮ ﻭﻧﺎﺱ ﻋﻤﻲ ﺩﻳﻞ ﺍﺗﻌﺎﻗﺒﻮﺍ
_ ﻣﺎ ﺍﻇﻦ ﺟﺎﺀ ﺍﻟﺤﻠﺔ ﻻﻧﻬﻢ ﻟﻮ ﺍﺗﻌﺎﻗﺒﻮﺍ ﺍﻛﺎﻥ ﺟﺎﺀ ﺭﺍﺟﻊ ﻭﺍﻛﻨﺎ ﻟﻘﻴﻨﺎﻫﻮ ﻓﻲ ﺍﻟﻤﺴﺘﺸﻔﻰ
_ ﺍﻧﺖ ﺩﺍﻳﺮ ﺑﻘﺮﻭﺷﻮ ﺷﻨﻮ ، ﻣﺎﻙ ﻣﺤﺘﺎﺝ ﻟﻴﻬﺎ ﻭﻻ ﺷﻲ ﺍﺩﻳﻬﺎ ﻟﻴﻬﻮ ﻭﺭﻳﺢ ﻧﻔﺴﻚ
_ ﻣﺎ ﺑﺪﻳﻬﺎ ﻟﻴﻬﻮ ﻭﻻ ﺷﻲ
_ ﺳﻤﺢ ﺍﻛﺎﻥ ﺟﺎﺀ ﻭﻛﻠﻢ ﻋﻤﻲ
_ ﺑﻨﻜﺮ ﻭﺑﻘﻮﻝ ﻟﻴﻬﻮ ﺍﻟﺸﺎﻫﺪ ﻣﻨﻮ ﻭﻣﺎﻓﻲ ﺯﻭﻝ ﺑﺼﺪﻕ ﺯﺍﺗﻮ ﺍﻧﻮ ﻋﻨﺪﻭ ﻣﺒﻠﻎ ﻗﺪﺭ ﺩﺍ ﻭﺍﻛﺎﻥ ﻋﻨﺪﻭ ﻣﺎ ﺑﺪﻳﻨﻲ ﻟﻴﻬﻮ ﺳﺎﻱ
_ ﻫﻮ ﺻﺤﻲ ﺍﻟﺠﻨﻰ ﺩﺍ ﺟﺎﺑﻬﺎ ﻣﻦ ﻭﻳﻦ ﻭﺍﻛﺎﻥ ﺷﻐﺎﻝ ﺷﻨﻮ ؟
_ ﺷﻐﺎﻝ ﻳﺒﻴﻊ ﺑﻜﺮﺗﻮﻧﺔ ﻓﻲ ﺍﻟﺴﻮﻕ ﺍﻟﺸﻌﺒﻲ
_ ﻛﺮﺗﻮﻧﺔ ﺷﻨﻮ ﺍﻟﺒﺘﻌﻤﻞ ﻟﻴﻬﻮ ﻗﺮﻭﺵ ﺯﻱ ﺩﻱ ﻋﻼ ﺑﺒﻴﻊ ﺑﻼﻭﻱ ﻭﻻ ﺍﺷﺘﻐﻞ ﺣﺮﺍﻣﻲ ﺯﻱ ﻭﺩ ﺍﻟﺴﺖ
_ ﻣﺎ ﺑﻌﺮﻓﻮ ﻟﻜﻦ ﻣﺎ ﺍﺷﺘﻐﻞ ﺣﺮﺍﻣﻲ ﻭﺍﻧﺎ ﻻﻗﻴﺖ ﺍﻟﻨﺎﺱ ﺍﻻﺷﺘﻐﻞ ﻣﻌﺎﻫﻢ ﻭﻛﻠﻬﻢ ﻛﻮﻳﺴﻴﻦ ﻭﻋﻨﺪﻫﻢ ﻃﺒﻠﻴﺎﺕ
_ ﻳﺎﺥ ﻟﻮ ﻋﻨﺪﻭ ﻃﺒﻠﻴﺔ ﺣﻘﺘﻮ ﻓﻲ ﺍﻟﻔﺘﺮﺓ ﺍﻟﻤﺸﺎﻫﺎ ﺩﻱ ﻣﺎ ﺑﻌﻤﻞ ﺍﻟﻘﺮﻭﺵ ﺩﻱ
_ ﻓﻲ ﺣﺎﺟﺔ ﻏﺎﻳﺘﻮ ﺍﻧﺎ ﻣﺎ ﻓﺎﻫﻤﻬﺎ
_ ﺍﻛﺎﻥ ﺗﺴﻌﻠﻮ
_ ﺳﻌﻠﺘﻮ ﻭﻗﺎﻝ ﻣﻦ ﺷﻐﻠﻮ ﻭﻣﺎ ﺍﺩﺍﻧﻲ ﻛﻼﻡ ﻣﻘﻨﻊ
_ ﺍﻟﻤﻬﻢ ﺍﻛﺎﻥ ﺟﺎﻙ ﺍﺩﻳﻬﻮ ﺣﻘﻮ ﺑﺲ ﻧﺤﻦ ﻣﺎﻟﻨﺎ ﻭﻣﺎﻟﻮ ﻳﺎﺥ
ﺑﺎﻟﻠﻴﻞ ﺗﺐ ﺭﺑﻴﻊ ﺟﺎﺀ ﺍﻟﺒﻴﺖ ﻭﻗﺎﻝ ﻟﺮﺑﻴﻊ ﺍﻟﻌﻤﻠﻴﺔ ﻓﺸﻠﺖ ﻭﺍﻟﺰﻭﻝ ﺍﻟﻤﻔﺮﻭﺽ ﻧﻘﺒﺾ ﻋﻠﻴﻬﻮ ﺳﺎﻓﺮ ﺑﻮﺭﺳﻮﺩﺍﻥ
ﻋﺒﺎﺱ ﻗﺎﻝ ﻟﻴﻬﻮ ﻣﺎ ﻣﺸﻜﻠﺔ ﻭﻣﺼﻴﺮﻭ ﻳﻨﻘﺒﺾ
_ ﻓﻲ ﻣﺸﻜﻠﺔ ﺗﺎﻧﻴﺔ ﻣﺎ ﻋﺎﺭﻑ ﺍﻗﻮﻟﻬﺎ ﻟﻴﻚ ﻭﻟﻼ ﻻ
_ ﻣﺸﻜﻠﺔ ﺷﻨﻮ ﺩﻱ ؟
_ ﺗﺘﺬﻛﺮ ﺍﻟﻀﺎﺑﻂ ﺍﻻﺩﻳﻨﺎﻫﻮ ﺍﻻﺭﺑﻌﺔ ﺍﻟﻒ ﻋﺸﺎﻥ ﻳﺠﻴﺐ ﻟﻴﻚ ﻗﺮﻭﺷﻚ
_ ﺁﻱ ، ﻣﺎﻟﻮ ؟
_ ﺳﺎﻓﺮ ﺑﻮﺭﺳﻮﺩﺍﻥ ﻭﻛﻠﻔﻮﻫﻮ ﺑﻤﺮﺍﻗﺒﺔ ﺍﻟﻤﺠﺮﻡ ﻭﺍﺣﺘﻤﺎﻝ ﻳﻄﻮﻝ ﻫﻨﺎﻙ ﻳﻌﻨﻲ ﺍﻻ ﻧﺸﻮﻑ ﺯﻭﻝ ﻏﻴﺮﻭ ﻭﺍﻧﺎ ﻣﺎ ﻻﻗﻴﺘﻮ ﻋﺸﺎﻥ ﺍﺷﻴﻞ ﺍﻟﻘﺮﻭﺵ ﺣﻘﺘﻚ ﻣﻨﻮ
_ ﻣﺎ ﻣﺸﻜﻠﺔ ، ﺍﺣﺘﻤﺎﻝ ﻣﺤﺘﺎﺝ ﻟﻴﻬﺎ ﻟﻮ ﻣﺎ ﻣﺤﺘﺎﺝ ﻟﻴﻬﺎ ﺍﻛﺎﻥ ﺟﺎﺑﻬﺎ ﻟﻴﻚ
_ ﺷﻮﻑ ﻧﺤﻦ ﻟﻤﻦ ﺗﺠﻴﻨﺎ ﺗﻌﻠﻴﻤﺎﺕ ﺑﻨﻨﻔﺬﻫﺎ ﻃﻮﺍﻟﻲ ، ﻣﺎ ﺷﻔﺘﻨﻲ ﻗﺒﻴﻞ ﻃﻮﺍﻟﻲ ﻣﺸﻴﺖ
_ ﻳﺎﺥ ﺷﻐﻠﺘﻜﻢ ﺩﻱ ﺻﻌﺒﺔ
_ ﻳﺎ ﺯﻭﻝ ﻣﺮﺓ ﺍﻧﺎ ﺍﺩﻭﻧﻲ ﺗﻌﻠﻴﻤﺎﺕ ﺍﺗﺤﺮﻙ ﻛﺴﻼ ﻭﺍﻟﻴﻮﻡ ﺩﺍﻙ ﻛﺎﻥ ﻋﺮﺱ ﺍﺧﺘﻲ ﭘﻜﺮﺓ ، ﻣﺸﻴﺖ ﻃﻮﺍﻟﻲ ﻭﻻ ﺣﻀﺮﺗﻮ
_ ﻻﺯﻡ ﺗﻌﻤﻞ ﻛﺪﺍ . ﻣﺎ ﻗﻠﺖ ﻟﻴﻚ ﺻﻌﺒﺔ
_ ﺻﻌﺒﺔ ﺷﺪﻳﺪ ﺑﺲ ﻧﺤﻦ ﺍﺗﻌﻮﺩﻧﺎ ﺧﻼﺱ . ﻫﺴﻲ ﺍﻟﺤﻞ ﺷﻨﻮ ؟
_ ﺑﺎﻟﻨﺴﺒﺔ ﻟﺸﻨﻮ ؟
_ ﻧﻌﻤﻞ ﺷﻨﻮ ﻣﻊ ﺍﻟﻀﻮ ؟
_ ﺍﻧﺎ ﺑﻤﺸﻲ ﺍﻟﺤﻠﺔ ﻳﺎﺥ
_ ﺍﻣﺶ ﻟﻜﻦ ﻣﺎ ﺗﻨﻀﻢ ﻣﻌﺎﻫﻮ ﻭﺗﻌﺎﻝ ﺑﻌﺪ ﻳﻮﻣﻴﻦ ﺗﻼﺗﺔ ﺑﺘﻠﻘﺎﻧﻲ ﻟﻘﻴﺖ ﺯﻭﻝ ﻛﺎﺭﺏ ﺑﻄﻠﻊ ﻟﻴﻚ ﻗﺮﻭﺷﻚ ﻣﻨﻮ
_ ﺗﻤﺎﻡ
_ ﺑﺲ ﻧﻬﺎﺋﻲ ﻣﺎ ﺗﺘﻜﻠﻢ ﻣﻌﺎﻫﻮ ﻭﻻ ﺗﺴﺄﻟﻮ ﻣﻦ ﺷﻲ
_ ﻭﻻ ﺑﺠﻴﺐ ﻟﻴﻬﻮ ﺳﻴﺮﺗﻬﺎ
ﻋﺒﺎﺱ ﺳﺎﻫﺮ ﻣﻊ ﺭﺑﻴﻊ ﻟﻘﺮﻳﺐ ﺍﻟﺼﺒﺎﺡ ﻭﻧﺎﻡ ﻭﺻﺤﻰ ﻗﺮﻳﺐ ﺍﻟﻌﺼﺮ ﻟﻘﻰ ﺭﺑﻴﻊ ﻣﺎﻓﻲ ﻭﻣﺮﻕ ﻓﺎﺕ ﺍﻟﺴﻮﻕ ﺍﻟﺸﻌﺒﻲ ﻭﻫﻨﺎﻙ ﻗﻌﺪ ﻳﻔﻜﺮ ﻓﻲ ﻣﺸﻴﺘﻮ ﻟﻠﺤﻠﺔ ﻭﻳﻘﻮﻝ ﻻﻫﻠﻮ ﺷﻨﻮ ﻭﻣﺎﻟﻮ ﺟﺎﺀ ﻭﺧﺎﻑ ﻳﻘﻮﻟﻮﺍ ﻋﻨﺪﻭ ﻣﺸﻜﻠﺔ ﻻﻧﻮ ﻣﺎ ﺩﺍﻳﺮﻫﻢ ﻳﻌﺮﻓﻮﺍ ﻣﺸﻜﻠﺘﻮ ﻣﻊ ﻭﺩ ﺍﻟﻀﻮ ﻭﻛﺎﻥ ﻣﺘﺄﻛﺪ ﺍﻧﻮ ﺭﺑﻴﻊ ﺑﺤﻠﻬﺎ ﻭﺑﺠﻴﺐ ﻟﻴﻬﻮ ﻗﺮﻭﺷﻮ . ﺳﺎﺏ ﺍﻟﺤﻠﺔ ﻭﺍﻭﻝ ﺑﺺ ﻣﺎﺭﻕ ﺭﻛﺐ ﻓﻴﻬﻮ ﻭﻓﺎﺕ ﺍﻟﺨﺮﻃﻮﻡ
ﻭﻭﺻﻠﻬﺎ ﺑﻌﺪ ﺍﻟﻤﻐﺮﺏ ﻭﻗﺮﻳﺐ ﺍﻟﻌﺸﺎﺀ
ﻋﺜﻤﺎﻥ ﻭﺍﻟﺼﺪﻳﻖ ﻣﻘﻔﻠﻴﻦ ﻣﺸﻰ ﺍﻟﺪﻛﺎﻥ ﻳﻼﻗﻲ ﻋﺒﺪ ﺍﻟﻘﻴﻮﻡ ﻭﻟﻘﻰ ﺧﻀﺮ ﻗﺎﻋﺪ ﺑﺮﺍﻫﻮ ﻭﻻ ﺳﺄﻟﻮ ﻣﻨﻮ ﻭﻻ ﺳﻠﻢ ﻋﻠﻴﻬﻮ ﺗﺎﻭﻕ ﺳﺎﻱ ﻭﻓﺎﺕ ﻭﺧﻀﺮ ﻛﺄﻧﻮ ﻣﺎ ﺷﺎﻓﻮ ﻷﻧﻮ ﺍﺻﻼ ﻣﺎ ﺑﺪﻭﺭﻭ
ﻣﺸﻰ ﻟﺤﻴﺪﺭ ﻓﻲ ﻛﺸﻚ ﺍﻟﻤﺮﻃﺒﺎﺕ ﺳﻠﻢ ﻋﻠﻴﻬﻮ ﻭﺣﻴﺪﺭ ﻗﺎﻝ ﻟﻴﻬﻮ ﺷﻨﻮ ﻳﺎ ﺯﻭﻝ ﻣﺸﻴﺖ ﻭﻳﻦ ؟
_ ﻣﺸﻴﺖ ﺍﻟﺤﻠﺔ ، ﺣﺴﻦ ﻣﺎ ﻛﻠﻤﻚ ؟
_ ﻣﺎ ﻛﻠﻤﻨﻲ ﻭﻛﻞ ﻳﻮﻡ ﺍﻗﻮﻝ ﺍﻣﺶ ﻟﻴﻬﻮ ﺍﺳﺄﻟﻮ ﻣﻨﻚ ﺍﻧﺸﻐﻞ ﻫﻨﺎ
_ ﻣﺸﻴﺖ ﻓﺠﺄﺓ ﻭﺍﻟﻠﻪ ﻭﻗﺎﻳﻠﻮ ﺑﻮﺭﻳﻚ
_ ﻣﻌﻠﻴﺶ ﺍﻧﺎ ﻓﺘﺤﺖ ﺍﻟﺸﻨﻄﺔ ﺣﻘﺘﻚ ﺍﻟﺨﻠﻴﺘﻬﺎ ﻓﻲ ﺍﻟﺒﻴﺖ ﻻﻧﻮ ﺍﻟﺠﻤﺎﻋﺔ ﺍﻟﻤﻌﺎﻱ ﺧﺎﻓﻮﺍ ﻳﻜﻮﻥ ﻓﻴﻬﺎ ﺷﻲ ﻣﺎ ﻳﺎﻫﻮ ﻷﻧﻬﻢ ﻣﺎ ﻻﻗﻮﻙ ﻭﻻ ﺑﻌﺮﻓﻮﻙ ﻭﺻﺮﺍﺣﺔ ﺍﻧﺎ ﺯﺍﺗﻲ ﻣﺎ ﺑﻌﺮﻓﻚ
_ ﻣﺎ ﻣﺸﻜﻠﺔ ﻫﻲ ﺯﺍﺗﻬﺎ ﻣﺎ ﻓﻴﻬﺎ ﺷﻲ ﻏﻴﺮ ﺍﻟﻬﺪﻭﻡ
_ ﻓﻴﻬﺎ ﻗﺮﻭﺵ ﺍﺭﺑﻌﺔ ﺍﻟﻒ ﻭﺍﻧﺎ ﻃﻠﻌﺘﻬﺎ ﻣﻨﻬﺎ ﻭﻫﺪﻱ ﻫﺎﻙ ﻟﻴﻬﺎ
_ ﺍﺩﻳﻚ ﺍﻟﻌﺎﻓﻴﺔ ، ﺑﺘﻤﺸﻲ ﺍﻟﺒﻴﺖ ﻣﺘﻴﻦ ﺍﻧﺖ
_ ﺑﻌﺪ ﺷﻮﻳﺔ ﻛﺪﺍ ، ﺍﺳﺘﻨﺎﻧﻲ ﻧﻤﺶ ﺳﻮﺍ
_ ﻛﻮﻳﺲ ﻭﺍﻧﺎ ﻋﻨﺪﻱ ﻭﺍﺣﺪ ﺻﺎﺣﺒﻲ ﺑﻤﺶ ﻟﻴﻬﻮ ﻭﺑﺠﻴﻚ ﻭﻟﻮ ﺍﺗﺄﺧﺮﺕ ﺍﻣﺶ ﻣﺎ ﺗﻨﺘﻈﺮﻧﻲ
_ ﺑﺘﻌﺮﻑ ﺍﻟﺒﻴﺖ
_ ﺁﻱ ﺑﻌﺮﻓﻮ
ﻋﺒﺎﺱ ﻓﺎﺕ ﻟﻠﺘﺎﺝ ﻭﻋﺎﺭﻑ ﺯﻱ ﺍﻟﻮﻗﺖ ﺩﺍ ﺑﻠﻘﺎﻫﻮ ﻓﻲ ﺍﻟﺒﻴﺖ ﻭﻓﻌﻼ ﻟﻘﺎﻫﻮ ﺑﺮﺍﻫﻮ ﺩﻕ ﺍﻟﺒﺎﺏ ﻭﺟﺎﺀ ﺍﻟﺘﺎﺝ ﻓﺘﺤﻮ ﻭﻗﺎﻝ ﻟﻴﻬﻮ
_ ﺍﻫﻼ ﻋﺒﺎﺱ
_ ﻣﻤﻜﻦ ﺃﺧﺶ ؟
_ ﺧﺶ ﻟﻜﻦ ﻣﺎ ﺗﻄﻮﻝ
_ ﻻ ﻻ ﺩﺍﻳﺮ ﺍﺳﺄﻟﻚ ﻣﻦ ﺣﺎﺟﺔ ﻭﻣﺎﺷﻲ ﻃﻮﺍﻟﻲ
_ ﺗﻤﺎﻡ ، ﺑﺲ ﻣﺎ ﺗﻘﻮﻝ ﻟﻲ ﺍﻟﺴﻜﻦ ﻭﻣﺎ ﺍﻟﺴﻜﻦ
_ ﻧﺪﺧﻞ ﺍﻭﻝ ﻭﻧﺘﻜﻠﻢ ﻣﺎ ﻧﺘﻜﻠﻢ ﻛﺪﺍ ﻓﻲ ﺍﻟﺒﺎﺏ
_ ﺳﻤﺢ ﺧﺶ ﺑﺲ ﺯﻱ ﻣﺎ ﻗﻠﺖ ﻟﻴﻚ ﻣﺎ ﺗﻄﻮﻝ ﻋﺸﺎﻥ ﺍﻧﺎ ﻧﻌﺴﺎﻥ ﻭﺩﺍﻳﺮ ﺍﻧﻮﻡ
ﻋﺒﺎﺱ ﺩﺧﻞ ﻭﻧﻔﺲ ﺍﻟﻤﻨﻈﺮ ﻟﻤﻦ ﻛﺎﻥ ﻗﺎﻋﺪ ﻣﺎ ﺍﺗﻐﻴﺮ ﻓﻲ ﺍﻟﺒﻴﺖ ﺍﻱ ﺷﻲ ، ﺍﻟﺴﺮﻳﺮ ﺍﻟﻔﻲ ﻧﺺ ﺍﻟﺤﻮﺵ ﻭﺍﻟﻜﻔﺘﻴﺮﺓ ﻭﺍﻟﻜﺒﺎﻳﺔ ﺟﻤﺒﻮ
_ ﺍﻫﺎ ﻗﻮﻝ ﻳﺎ ﻋﺒﺎﺱ ﻓﻲ ﺷﻨﻮ ؟
_ ﺍﻟﻤﻴﺔ ﺃﻟﻒ
_ ﺷﻮﻑ ﻳﺎ ﻋﺒﺎﺱ ﺍﻧﺎ ﻭﺍﻟﻠﻪ ﻋﺪﻳﺘﻚ ﺯﻱ ﺍﺧﻮﻱ ﻭﻛﻨﺖ ﺷﺎﻳﻒ ﺷﻐﻠﺘﻚ ﺣﻘﺖ ﺍﻟﻜﺮﺗﻮﻧﺔ ﺩﻱ ﻣﻴﺔ ﺳﻨﺔ ﻣﺎ ﺑﺘﻔﻴﺪﻙ ﺑﺸﻲ ﻭﺍﻧﺎ ﺯﻭﻝ ﻋﻨﺪﻱ ﻗﺮﻭﺵ ﺍﻟﺤﻤﺪ ﻟﻠﻪ ﻭﻣﺎ ﺍﻛﻀﺐ ﻋﻠﻴﻚ ﺍﻟﻨﺎﺱ ﻗﺎﻳﻠﻴﻦ ﺍﻧﺎ ﻋﻨﺪﻱ ﺑﺺ ﻭﺍﺣﺪ ﻟﻜﻦ ﺍﻧﺎ ﻋﻨﺪﻱ ﺍﺭﺑﻌﺔ ﺑﺼﺎﺕ ﺷﻐﺎﻟﺔ ﻭﻛﻠﻬﺎ ﺟﺪﻳﺪﺓ ﻭﺷﻐﺎﻟﺔ ﻛﻮﻳﺲ ﻭﻛﻨﺖ ﺩﺍﻳﺮ ﺍﺳﺎﻋﺪﻙ ﻣﺸﻴﺖ ﺍﺷﺘﺮﻳﺖ ﺩﻛﺎﻥ ﺍﻟﻨﺠﻮﻣﻲ ﻭﻛﻨﺖ ﺩﺍﻳﺮ ﺍﺧﻠﻴﻬﻮ ﻟﻴﻚ ﺗﺸﺘﻐﻞ ﻭﺗﺨﺖ ﻓﻲ ﺟﻴﺒﻚ ﻻ ﺩﺍﻳﺮ ﻣﻨﻚ ﺍﻱ ﺍﻳﺠﺎﺭ ﻭﻻ ﺩﺍﻳﺮ ﻣﻨﻚ ﻗﺮﺵ ﻭﺑﻌﺪ ﺣﺼﻠﺖ ﺍﻟﻤﺸﻜﻠﺔ ﻣﻊ ﺍﻟﻨﺠﻮﻣﻲ ﺍﻧﺎ ﻗﻠﺖ ﺍﻧﺖ ﺗﺎﻧﻲ ﻣﺎ ﺑﺘﺠﻲ ﻫﻨﺎ ﻭﺧﺘﻴﺖ ﻟﻴﻚ ﺍﻟﻤﻴﺔ ﺍﻟﻒ ﺗﺴﺎﻋﺪﻙ ﻭﺗﺴﺎﻋﺪ ﺑﻴﻬﺎ ﺃﻫﻠﻚ ﻭﺃﺑﻴﺖ ﺍﻭﺭﻳﻚ ﺑﻴﻬﺎ ﻭﻻ ﺩﺍﻳﺮ ﺯﻭﻝ ﻳﻌﺮﻑ ﺍﻧﻲ ﺍﺩﻳﺘﻚ ﻟﻴﻬﺎ ﻭﺟﺎﻧﻲ ﻋﺒﺪ ﺍﻟﻘﻴﻮﻡ ﻫﻨﺎ ﻭﺳﺄﻟﻨﻲ ﻭﻗﻠﺖ ﻟﻴﻬﻮ ﻣﺎ ﻋﻨﺪﻱ ﺧﺒﺮ ﻭﻟﻮ ﺩﺍﻳﺮ ﻧﺼﻴﺤﺘﻲ ﺍﺭﺟﻊ ﺍﻫﻠﻚ ﻭﺍﺷﺘﻐﻞ ﺑﻴﻬﺎ ﺃﻱ ﺷﻐﻠﺔ ﺍﻥ ﺷﺎﺀ ﺍﻟﻠﻪ ﺗﻔﺘﺢ ﺑﻴﻬﺎ ﺩﻛﺎﻥ ﻓﻲ ﺍﻟﺤﻠﺔ ﻭﺍﻟﺒﻠﺪ ﺩﻱ ﻣﺎ ﺑﺘﻨﻔﻊ ﻣﻌﺎﻙ
_ ﻃﻴﺐ ﻣﺎﻟﻚ ﻣﺎ ﻭﺭﻳﺘﻨﻲ ﺑﻴﻬﺎ
_ ﺍﻧﺖ ﻛﻨﺖ ﺩﺍﻳﺮ ﺍﻟﺨﺮﻃﻮﻡ ﻭﺧﻔﺖ ﺍﻭﺭﻳﻚ ﺗﺼﺮ ﺍﻧﻚ ﺗﺠﻲ
_ ﻃﻴﺐ ﺍﻟﻤﺸﻜﻠﺔ ﺍﻟﻤﻊ ﺍﻟﻨﺠﻮﻣﻲ ﺍﻧﺤﻠﺖ ﻭﺍﻧﺎ ﺩﺍﻳﺮ ﺍﺭﺟﻊ ﺍﻟﺪﻛﺎﻥ
_ ﺍﻟﺪﻛﺎﻥ ﺍﺟﺮﻭ ﺧﻀﺮ
_ ﻋﺎﺭﻓﻮ ﻟﻜﻦ ﺍﻧﺎ ﺩﺍﻳﺮﻭ
_ ﻳﻌﻨﻲ ﺍﻃﻠﻌﻬﻢ ﻟﻴﻚ ﻣﻨﻮ ؟
_ ﺁﻱ ﻃﻠﻌﻬﻢ ﻣﻨﻮ ﻣﻮﺵ ﺍﻧﺖ ﺍﺷﺘﺮﻳﺘﻮ ﻟﻲ ﺍﻧﺎ ؟ ﺍﻧﺎ ﺩﺍﻳﺮﻭ
_ ﻭﻋﺒﺪ ﺍﻟﻘﻴﻮﻡ ﺻﺎﺣﺒﻚ ؟
_ ﺍﻧﺎ ﺗﺎﻧﻲ ﻣﺎ ﺩﺍﻳﺮ ﺍﻱ ﺻﺎﺣﺐ ، ﻭﺻﺎﺣﺒﻲ ﺟﻴﺒﻲ ﺑﺲ
_ ﻫﺴﻲ ﺩﺍﻳﺮﻧﻲ ﺍﻣﺶ ﺍﻃﻠﻌﻬﻢ ﻣﻨﻮ ﻭﺍﺳﻠﻤﻚ ﻟﻴﻬﻮ؟
_ ﺁﻱ ﻭﺍﻟﻠﻪ
_ ﻋﺒﺎﺱ ﺍﻣﺶ ﺍﻫﻠﻚ ﻳﺎﺥ ﺍﻧﺎ ﻣﺎ ﻋﻨﺪﻱ ﺷﻐﻠﺔ ﺑﻴﻚ ﺑﻌﺪ ﺩﺍ ﻭﻻ ﻣﻠﺰﻡ ﺑﻴﻚ ﻭﻻ ﻗﺮﻳﺒﻲ ﻭﻻ ﺩﺍﻳﺮ ﺍﻋﺮﻓﻚ ﻭﺍﻟﻤﻴﺔ ﺍﻟﻒ ﺧﻠﻴﺘﻬﺎ ﻟﻴﻚ ﺍﻋﺘﺒﺮﻫﺎ ﺻﺪﻗﺔ ﻣﻨﻲ ﻭﻟﻼ ﺍﻱ ﺣﺎﺟﺔ ، ﻭﻳﻠﻼ ﺑﻌﺪ ﺍﺫﻧﻚ ﺍﻧﺎ ﺩﺍﻳﺮ ﺍﺳﻜﺮ ﻭﺍﻧﻮﻡ ﻭﺗﺎﻧﻲ ﻣﺎ ﺗﺠﻴﻨﻲ ﻫﻨﺎ ﻭﻻ ﺗﺠﻴﻨﻲ ﻓﻲ ﺍﻟﻤﻜﺎﺗﺐ