ﺍﻟﺤﻠﺔ ﻣﻦ ﻳﻮﻡ ﻓﺎﺕ ﻣﻨﻬﺎ ﻭﺩ ﺍﻟﺴﺖ ﺑﻘﺖ ﻫﺎﺩﻳﺔ ﻻ ﺳﺮﻗﺔ ﻻ ﻋﻮﺓ ﻭﻛﻞ ﺯﻭﻝ ﻣﺎﺳﻚ ﻣﺸﻬﺎﺩﻭ . ﺍﻟﺮﺟﺎﻝ ﺍﻟﻜﺒﺎﺭ ﻣﻦ ﻳﻮﻡ ﺣﺎﺝ ﻋﻠﻲ ﻣﺮﺽ ﻭﺑﻘﻰ ﻣﺎ ﺑﻘﺪﺭ ﻳﻤﺮﻕ ﺑﻘﻮﺍ ﻳﺘﺠﻤﻌﻮﺍ ﻳﻮﻣﻴﺎ ﻓﻲ ﺩﻳﻮﺍﻧﻮ ﻭﻛﻞ ﻭﺍﺣﺪ ﺑﺠﻲ ﺑﻔﻄﻮﺭﻭ ﻭﺑﻴﺎﺧﺪﻭﺍ ﻭﻧﺴﺘﻬﻢ ﻟﻠﻀﻬﺮ ﺣﺘﻴﻦ ﻳﺘﻔﺮﻗﻮﺍ ﻭﻣﺎﻓﻮﻗﻬﻢ ﺯﻭﻝ ﺑﻐﻴﺐ ﻭﺍﻛﺘﺮ ﺍﺗﻨﻴﻦ ﺣﺮﻳﺼﻴﻦ ﻋﻠﻲ ﺍﻟﻠﻤﺔ ﺩﻱ ﺍﻟﻜﺮﺍﺏ ﻭﺣﺎﺝ ﺍﺑﺮﺍﻫﻴﻢ ﻋﺸﺎﻥ ﻗﺎﻟﻮﺍ ﺑﻌﺮﻓﻮﺍ ﺑﻴﻬﺎ ﺣﺎﻝ ﺑﻌﺾ ﻭﻫﻤﻮﻡ ﺑﻌﺾ ﻭﺑﻨﻀﻤﻮﺍ ﻭﺑﺘﻮﻧﺴﻮﺍ ﻓﻲ ﺃﻱ ﺣﺎﺟﺔ ﻭﺧﺎﺻﺔ ﻣﺸﺎﻛﻞ ﺍﻟﺤﻠﺔ ﻭﻫﻤﻮﻣﻬﺎ ﺍﻥ ﺍﻟﻤﺪﺭﺳﺔ ﻭﺍﻥ ﻏﻴﺮﻫﺎ ﻭﺍﻟﻠﻴﻠﺔ ﻓﻲ ﻭﻧﺴﺘﻬﻢ ﺟﺎﺑﻮﺍ ﺳﻴﺮﺓ ﻭﺩ ﺍﻟﺴﺖ ﺍﻟﺨﺘﺮ ﻭﻣﺎ ﻓﻲ ﺯﻭﻝ ﻋﺎﺭﻑ ﻟﻴﻬﻮ ﺟﻴﻬﺔ ﻭﺍﺗﺬﻛﺮﻭﺍ ﺳﺮﻗﺎﺗﻮ ﻭﺳﻜﺮﻭ ﻭﻋﻮﻻﻗﻮ ﻛﻠﻮ ﻭﺧﺎﺻﺔ ﺍﻟﺴﺮﻗﺔ ﺍﻷﺧﻴﺮﺓ ﺍﻟﺴﻮﺍﻫﺎ ﻗﺒﺎﻝ ﻳﻔﻮﺕ ﻟﻤﻦ ﺟﺎﺏ ﻣﻌﺎﻫﻮ ﺍﻟﺤﺮﺍﻣﻴﺔ ﻣﻦ ﻣﺪﻧﻲ ﻭﻛﻠﻬﻢ ﺍﻛﺎﻧﻮﺍ ﻣﻜﺠﻨﻨﻮ ﻭﻣﺎ ﺧﻠﻮﺍ ﻛﻠﻤﺔ ﻛﻌﺒﺔ ﻣﺎ ﻗﺎﻟﻮﻫﺎ ﻓﻮﻗﻮ ، ﺍﻻ ﺣﺎﺝ ﺍﺑﺮﺍﻫﻴﻢ ﻭﻫﻮ ﺍﻟﻮﺣﻴﺪ ﺍﻟﻤﺎ ﻧﻀﻢ ﻓﻴﻬﻮ ﻭﻣﺎ ﻋﺠﺒﻮ ﻛﻼﻣﻬﻢ ﻭﺧﻼﻫﻢ ﺑﻌﺪ ﻧﺒﺰﻭﺍ ﻭﺩ ﺍﻟﺴﺖ ﻧﺒﺰ ﺷﺪﻳﺪ ﻭﻟﻌﻨﻮﻫﻮ ﻭﺳﻜﺘﻮﺍ ﺣﺘﻴﻦ ﻧﻀﻢ ﻭﻗﺎﻝ ﻟﻴﻬﻢ ﻧﺤﻦ ﺁ ﻧﺎﺱ ﺍﻟﺴﺒﺐ ﻭﺣﻦ ﺍﻟﻐﻠﻄﺎﻧﻴﻦ ﻣﻮ ﻫﻮ ، ﻣﻔﺮﻭﺽ ﻧﺤﻦ ﺑﻌﺪ ﻭﻓﺎﺓ ﺍﺑﻮﻫﻮ ﻧﺴﺎﻋﺪﻭ ﻭﻧﺴﺎﻋﺪ ﺍﻣﻮ ﻭﻣﺎ ﻧﺨﻠﻴﻬﻮ ﻳﺤﺘﺎﺝ ﻟﻤﻦ ﻳﺴﺮﻕ ﻭﺍﻟﺠﻨﻰ ﺩﺍ ﻟﻤﻦ ﺳﺎﺏ ﺍﻟﻘﺮﺍﻳﺔ ﻭﻃﻠﻊ ﻣﻦ ﺍﻟﻤﺪﺭﺳﺔ ﻣﺎ ﻓﻴﻨﺎ ﻭﺍﺣﺪ ﻣﺸﻰ ﻗﻌﺪﻭ ﻭﻧﻀﻢ ﻣﻌﺎﻫﻮ ﻭﺭﺟﻌﻮ ﻟﻴﻬﺎ ﻭﻧﺤﻦ ﻛﻠﻨﺎ ﻋﺎﺭﻓﻴﻦ ﻇﺮﻭﻓﻬﻢ ﻭﺍﺑﻮﻫﻮ ﺍﻟﻠﻪ ﻳﺮﺣﻤﻮ ﻭﺍﻟﺴﺖ ﺍﻣﻮ ﺍﻟﻠﺘﻨﻴﻦ ﻣﻨﻨﺎ ﻭﻓﻴﻨﺎ ﻭﻟﻮ ﺍﻱ ﺯﻭﻝ ﻓﻴﻨﺎ ﻣﺮﻗﻠﻮ ﺑﻌﺪ ﺍﻟﺪﺭﺕ ﺷﻮﺍﻟﻴﻦ ﻭﻟﻼ ﺗﻼﺗﺔ ﺷﻮﺍﻻﺕ ﺣﻘﺎﺕ ﻋﻴﺶ ﻭﻟﻼ ﻗﻤﺦ ﻭﻟﻼ ﻓﻮﻝ ﻭﻭﺩﺍﻫﻦ ﻟﻴﻬﻢ ﻓﻲ ﺑﻴﺘﻦ ﻣﺎ ﻛﺎﻥ ﺍﻟﻮﻟﺪ ﺩﺍ ﺑﻘﻰ ﻫﺎﻣﻞ ﻭﺣﺮﺍﻣﻲ ﻭﺍﻟﻔﻘﺮ ﻛﻌﺐ ﺁ ﻧﺎﺱ ﻭﻫﻮ ﺍﻟﺒﺠﺒﺮ ﺍﻟﺰﻭﻝ ﻋﻠﻲ ﻣﺪﺕ ﺍﻟﻴﺪ ﻭﺍﻟﺴﺮﻗﺔ
ﺩﺣﻴﻦ ﻣﺎ ﺗﻠﻮﻣﻮﻫﻮ ﻭﻧﻠﻮﻡ ﺭﻭﺣﻨﺎ
ﻭﻛﻠﻬﻢ ﺳﻜﺘﻮﺍ ﺳﺎﻱ ﻭﻟﻘﻮﺍ ﻛﻼﻡ ﺣﺎﺝ ﺍﺑﺮﺍﻫﻴﻢ ﻛﻠﻮ ﺻﺎﺡ ﻭﻛﻠﻬﻢ ﻣﺘﻠﻮﻣﻴﻦ ﻭﻣﻘﺼﺮﻳﻦ ﻋﻼ ﺍﻟﻜﺮﺍﺏ ﺑﺲ ﺍﻟﻤﺎ ﻣﻘﺼﺮ ﻣﻨﻬﻢ .
ﺭﺣﻤﺔ ﺍﻟﻠﻪ ﺭﺍﺟﻞ ﻧﻌﻴﻤﺔ ﺍﻡ ﻋﺒﺎﺱ ﺍﻟﻤﺮﺽ ﺯﺍﺩ ﻋﻠﻴﻬﻮ ﻭﺗﻌﺐ ﺷﺪﻳﺪ ﻭﺍﺗﻀﺎﻳﻖ ﺗﺐ ﻭﺍﻭﻻﺩﻭ ﺟﺮﻭﺍ ﺑﻴﻬﻮ ﻣﺪﻧﻲ ﻭﺍﻟﺪﻛﺘﻮﺭ ﻛﺘﺒﻠﻮ ﺭﻗﺎﺩ ﻭﺭﻗﺪﻭﻫﻮ ﻓﻲ ﺍﻟﻤﺴﺘﺸﻔﻰ ﻭﺟﺎﺀ ﻭﺍﺣﺪ ﻣﻦ ﺍﻭﻻﺩﻭ ﺍﻟﺤﻠﺔ ﻭﻛﻠﻢ ﻧﻌﻴﻤﺔ ﻭﻟﺒﺴﺖ ﻭﻣﺮﻗﺖ ﻣﻌﺎﻫﻮ ، ﺍﻟﻮﻛﺖ ﺩﺍﻙ ﺍﻟﺮﺟﺎﻝ ﺍﻟﻜﺎﻧﻮﺍ ﻓﻲ ﺍﻟﺪﻳﻮﺍﻥ ﻛﻠﻬﻢ ﻓﺎﺗﻮﺍ ﺑﻴﻮﺗﻬﻢ ﺍﻛﺎﻥ ﺣﺎﺝ ﺍﺑﺮﺍﻫﻴﻢ ﺑﺲ ﺍﻟﻘﺎﻋﺪ ﻣﻊ ﺍﺑﻮﻫﺎ ﺣﺎﺝ ﻋﻠﻲ ﻭﻟﻤﻦ ﺟﺎﺕ ﻛﻠﻤﺘﻬﻢ ﺣﺎﺝ ﻋﻠﻲ ﺍﺑﻮﻫﺎ ﻋﻴﺎﻥ ﻭﻣﺎ ﺑﻘﺪﺭ ﻳﻤﺶ ﻣﻌﺎﻫﺎ ﻟﻜﻦ ﻗﺎﻡ ﻭﻗﺎﻝ ﻋﻼ ﻳﻤﺶ ﻭﻗﺎﻝ ﺭﺣﻤﺔ ﺍﻟﻠﻪ ﻧﺴﻴﺒﻲ ﻻﺯﻡ ﺍﻣﺶ ﺍﺷﻮﻓﻮ ﻭﻣﺎ ﺑﺨﻠﻲ ﺑﺘﻲ ﺗﻔﻮﺕ ﺑﺮﺍﻫﺎ ﻭﻻ ﺯﻭﻝ ﻣﻦ ﺍﻫﻠﻬﺎ ﻣﺎ ﻳﻔﻮﺕ ﻣﻌﺎﻫﺎ . ﻭﻗﺪﺭ ﻣﺎ ﻧﻀﻤﻮﺍ ﻣﻌﺎﻫﻮ ﺍﺑﻰ ، ﻟﻤﻦ ﺣﻠﻒ ﻋﻠﻴﻬﻮ ﺣﺎﺝ ﺍﺑﺮﺍﻫﻴﻢ ﻭﻗﺎﻝ ﻟﻴﻬﻮ ﺑﻤﺶ ﺍﻧﺎ ﻣﻌﺎﻫﺎ ﻭﺍﻧﺎ ﺑﺮﺿﻮ ﺍﺑﻮﻫﺎ ﺣﺘﻴﻦ ﻗﻌﺪ
ﺣﺎﺝ ﺍﺑﺮﺍﻫﻴﻢ ﻣﺸﻰ ﺍﻟﺒﻴﺖ ﻟﺒﺲ ﺟﻼﺑﻴﺘﻮ ﻭﻟﻔﻠﻒ ﻋﻤﺘﻮ ﻭﺟﺎﺀ ﺭﻛﺐ ﻣﻌﺎﻫﻢ ﻭﻫﻢ ﻣﺎﺭﻗﻴﻦ ﻻﻗﺎﻫﻢ ﺣﺎﺝ ﺍﻟﻀﻮ ﺍﺑﻮ ﻋﻤﺮ ﻭﻭﻗﻔﻬﻢ ﻭﻟﻤﻦ ﻋﺮﻓﻬﻢ ﻣﺎﺷﻴﻦ ﺍﻟﻤﺴﺘﺸﻔﻰ ﺑﺮﺿﻮ ﻗﺎﻝ ﺑﻤﺸﻲ ﻣﻌﺎﻫﻢ ﻭﻓﺎﺕ ﻟﺒﺲ ﺳﺮﻳﻊ ﻭﺟﺎﺀ ﺭﻛﺐ ،
ﻭﺻﻠﻮﺍ ﺍﻟﻤﺴﺘﺸﻔﻰ ﺍﻟﻌﺼﺮ ﻭﻋﺼﺮﺍ ﺑﺪﺭﻱ ﻭﺑﻌﺪ ﺯﺍﺭﻭﻫﻮ ﻭﺍﻃﻤﻨﻮﺍ ﻋﻠﻴﻬﻮ ﻭﺍﺧﺪﻭ ﻗﻌﺪﺗﻬﻢ ﻣﻊ ﺍﻭﻻﺩﻭ ﺣﺎﺝ ﺍﻟﻀﻮ ﻗﺎﻝ ﻓﺎﻳﺖ ﺍﻟﺴﻮﻕ ﻳﻜﻠﻢ ﺍﻭﻻﺩﻭ ﻋﻤﺮ ﻭﻋﻤﺎﺭ ﻭﺍﻟﻌﺒﻴﺪ ﻭﺩ ﺍﺧﻮﻫﻮ ﻭﺑﺎﻟﻤﺮﺓ ﻳﺸﻮﻑ ﺍﻟﺪﻛﺎﻥ ﺍﻟﺠﺪﻳﺪ ﺣﻖ ﻋﻤﺮ ﻭﻫﻮ ﺍﻛﺎﻥ ﻋﺎﺭﻑ ﻓﺠﺔ ﺍﻟﺪﻛﺎﻥ ﻭﺻﻔﻮﺍ ﻟﻴﻬﻮ ﻋﻤﺮ ﻗﺒﺎﻝ ﻳﺸﺘﺮﻳﻬﻮ
ﺣﺎﺝ ﺍﺑﺮﺍﻫﻴﻢ ﻣﺎ ﺑﺮﻳﺪ ﺍﻟﻘﻌﺎﺩ ﻓﻲ ﺍﻟﻤﺴﺘﺸﻔﻰ ﻭﻗﺎﻝ ﻟﻴﻬﻮ ﺍﻗﻴﻒ ﺳﻮﻗﻨﻲ ﻣﻌﺎﻙ ، ﻭﻣﺮﻗﻮﺍ
ﺭﺑﻴﻊ ﻗﺮﻭﺵ ﻋﺒﺎﺱ ﺍﺣﻤﺘﻮ ﺍﻟﻨﻮﻡ ﻭﻃﻴﺮﺕ ﺍﻟﻨﻌﺴﺔ ﻣﻦ ﺳﺎﻋﺔ ﻋﺒﺎﺱ ﻭﺭﺍﻫﻮ ﺑﻴﻬﻦ ﻭﻗﺎﻝ ﻟﻴﻬﻮ ﻣﻴﺔ ﺃﻟﻒ ﺍﻟﻨﻌﺴﺔ ﻃﺎﺭﺕ ﻭﺍﻛﺎﻥ ﺭﺍﻗﺪ ﺳﺎﻱ ﻛﻠﻮ ﻛﻠﻮ ﻣﺎ ﻧﺎﻡ ﻭﻗﺪﺭ ﻣﺎ ﻳﻐﻤﺾ ﻳﺘﺬﺭﻛﺮ ﺍﻟﻘﺮﻭﺵ ﻭﻋﺒﺎﺱ ﺷﺮﺏ ﺍﻟﺴﺠﺎﺭﺓ ﻭﺭﻗﺪ ﻧﺎﻡ ﺭﺑﻴﻊ ﻋﺎﻳﻦ ﻟﻠﺴﺎﻋﺔ ﻭﺍﺗﺬﻛﺮ ﺑﺺ ﺣﻠﺔ ﻧﺎﺱ ﻋﺒﺎﺱ ﻭﻓﺖ ﻗﺎﻡ ﻋﻠﻲ ﺣﻴﻠﻮ ﻭﻗﺎﻝ ﻟﻌﺒﺎﺱ ﻗﻮﻡ ﻗﻮﻡ ﻣﺎ ﺗﻨﻮﻡ ﻭﻭﺭﺡ ﻭﺭﻳﻨﻲ ﺯﻭﻟﻚ ﺍﻻﺩﻳﺘﻮ ﺍﻟﻘﺮﻭﺵ ﻗﺒﺎﻝ ﻳﻘﻔﻞ ﻭﻳﻔﻮﺕ ﺣﻠﺘﻜﻢ ﻋﺸﺎﻥ ﺍﻋﺮﻑ ﺷﻜﻠﻮ ﻭﺍﻋﺮﻑ ﺩﻛﺎﻧﻮ ﻣﻦ ﻫﺴﻲ ﻭﺑﻌﺪﻳﻦ ﺍﻭﺻﻔﻮ ﻟﺼﺎﺣﺒﻲ ﻋﺸﺎﻥ ﺑﻜﺮﺓ ﻣﻦ ﺍﻟﺼﺒﺎﺡ ﻳﺠﻴﻬﻮ ﻟﻴﻚ ﻭﻳﺠﻴﺐ ﻟﻴﻚ ﺣﻘﻚ ﻣﻨﻮ
ﻭﻋﺒﺎﺱ ﺍﻛﺎﻥ ﻃﺎﺷﻢ ﺗﺐ ﻭﻣﺴﻄﻮﻝ ﻭﺍﻧﺒﺴﻂ ﻣﻦ ﻛﻼﻡ ﺭﺑﻴﻊ ﻭﻗﺪ ﻳﻀﺤﻚ ﺯﻱ ﺍﻟﻌﻮﻳﺮ ﻭﻳﺒﺘﺒﺖ ﻓﻲ ﻋﻴﻮﻧﻮ ﻭﻗﺎﻝ ﻟﻴﻬﻮ ﻭﺭﺡ ﻃﻮﺍﻟﻲ ﻭﻋﻠﻴﻚ ﺍﻟﻠﻪ ﻛﻠﻢ ﺻﺎﺣﺒﻚ ﻳﺠﻴﻬﻮ ﻛﻮﻳﺲ ﻭﺍﺻﻠﻮ ﻣﺎ ﻳﺮﺗﻰ ﻟﻴﻬﻮ ﻋﺸﺎﻥ ﻳﻌﺮﻑ ﺍﻧﺎ ﺷﻨﻮ
_ ﺍﻧﺎ ﺍﺧﻮﻙ ﺁ ﻋﺒﺎﺱ ، ﻳﺎﻛﻠﻮﺍ ﺣﻘﻚ ﻭﺍﻧﺎ ﻗﺎﻋﺪ؟ ﻭﺍﻟﻠﻪ ﺯﻭﻟﻚ ﺩﺍ ﻳﺘﺄﺩﺏ ﺃﺩﺏ ﻭﺗﺎﻧﻲ ﻟﻮ ﻻﻗﺎﻙ ﻓﻲ ﺍﻟﺪﺭﺏ ﻳﻔﻜﻮ ﻟﻴﻚ .
_ ﻭﺭﺡ ﻭﺭﺡ ﻗﺒﺎﻝ ﻳﻘﻔﻞ ﻭﻳﻔﻮﺕ ﺍﻟﺤﻠﺔ .
ﻓﻲ ﺍﻟﺴﻮﻕ ﻭﺩ ﺍﻟﻀﻮ ﺍﻟﻌﺮﺑﻴﺔ ﺍﻟﺠﺎﺑﺖ ﻟﻴﻬﻮ ﺍﻟﺒﻀﺎﻋﺔ ﻣﻦ ﺍﻡ ﺩﺭﻣﺎﻥ ﻭﺻﻠﺘﻮ ﻣﻦ ﺍﻟﺴﺎﻋﺔ ﻋﺸﺮﺓ ﻭﻧﺰﻟﻮﺍ ﻣﻨﻬﺎ ﺍﻟﺒﻀﺎﻋﺔ ﻛﻠﻬﺎ ﻭﺑﻘﻰ ﺷﻐﺎﻝ ﻣﻊ ﺍﺧﻮﺍﻧﻮ ﻫﻮ ﻳﺮﺍﺟﻊ ﻓﻲ ﺍﻟﻔﻮﺍﺗﻴﺮ ﻭﻋﻤﺎﺭ ﻭﺍﻟﻌﺒﻴﺪ ﻳﺤﺴﺒﻮﺍ ﻭﻳﺮﺻﻮﺍ ﻓﻲ ﺍﻟﺒﻀﺎﻋﺔ ﻭﻗﺎﻓﻠﻴﻦ ﺍﻟﺒﺎﺏ ﻋﻠﻴﻬﻢ
ﺣﺎﺝ ﺍﻟﻀﻮ ﻭﺣﺎﺝ ﺍﺑﺮﺍﻫﻴﻢ ﻭﺻﻠﻮﻫﻢ ﻭﺩﻓﺮﻭﺍ ﺍﻟﺒﺎﺏ ﻭﺧﺸﻮﺍ ﻭﺑﻌﺪ ﺳﻠﻤﻮﺍ ﻋﻠﻴﻬﻢ ﻗﻌﺪﻭﺍ ﻳﺘﻔﺮﺟﻮﺍ ﻓﻲ ﺍﻟﺪﻛﺎﻥ ﻭﻓﻲ ﺍﻟﺒﻀﺎﻋﺔ ﻭﻳﺪﻋﻮﺍ ﻟﻴﻬﻢ ﺑﺎﻟﺘﻮﻓﻴﻖ
ﻭﺍﻟﺪﻛﺎﻥ ﺳﻤﺢ ﻭﻭﺍﺳﻊ ﻭﻣﻨﻈﻢ ﺻﺎﺡ
ﻭﺍﻟﺒﻀﺎﻋﺔ ﻛﺎﻧﺖ ﻛﺘﻴﺮﺓ ﻭﺭﺍﺩﻣﻨﻬﺎ ﻛﻠﻬﺎ ﻗﺪﺍﻣﻬﻢ
ﺍﻟﻌﺒﻴﺪ ﻣﺸﻰ ﻋﻠﻲ ﻋﻤﺮ ﻭﻭﻗﻒ ﺟﻤﺒﻮ ﻭﺑﺮﺍﺣﺔ ﻣﻦ ﻏﻴﺮ ﺩﻳﻠﻚ ﻳﺴﻤﻌﻮﻫﻮ ﻗﺎﻝ ﻟﻴﻬﻮ ﺯﻭﻟﻚ ﻛﻤﺎﻥ ﺟﺎﺏ ﺟﺪﻭ ﺑﺮﺿﻮ ﻣﻊ ﻋﻤﻲ ﺍﻫﺎ ﺑﺘﻌﻤﻞ ﺷﻨﻮ ﻭﺑﺘﻘﻮﻝ ﻟﻴﻬﻢ ﺷﻨﻮ ؟
ﻋﻤﺮ ﻗﺮﺻﻮ ﻭﻣﺸﻰ ﻋﻠﻴﻬﻢ ﻭﻗﺎﻝ ﺍﺣﺴﻦ ﺣﺎﺟﺔ ﺃﺑﺪﺭ ﻟﻴﻬﻢ ﺍﻧﺎ ﺑﺎﻟﻜﻼﻡ ﻭﺃﺷﺮﺡ ﻟﻴﻬﻢ ﺍﻟﺤﺼﻞ ﻛﻠﻮ ﻭﺍﻟﻌﻤﻠﻮ ﻋﺒﺎﺱ ﻣﻌﺎﻱ ﻗﺒﺎﻝ ﻋﺒﺎﺱ ﻳﺠﻲ ﺩﺍﺧﻞ
ﻭﻗﺎﻝ ﻟﻴﻬﻢ ﻋﺒﺎﺱ ..
ﺣﺎﺝ ﺍﻟﻀﻮ ﻣﻊ ﻛﻠﻤﺔ ﻋﺒﺎﺱ ﻗﺎﻝ ﻟﻴﻬﻢ ﻧﺤﻦ ﺟﺎﻳﻴﻦ ﻣﻦ ﺍﻟﻤﺴﺘﺸﻔﻰ ﺟﻴﻨﺎ ﻟﺮﺣﻤﺔ ﺍﻟﻠﻪ ﺭﺍﺟﻞ ﻧﻌﻴﻤﺔ ﺑﺖ ﺣﺎﺝ ﻋﻠﻲ ﻣﺮﻗﺪ ﻋﻴﺎﻥ ﻭﺟﻴﻨﺎ ﻣﻊ ﻧﻌﻴﻤﺔ ﻣﺮﺗﻮ ﺯﺭﻧﺎﻫﻮ ﻭﻛﻔﺮﻧﺎ ﻟﻴﻬﻮ ﻭﻗﻠﻨﺎ ﻧﺠﻲ ﻧﺸﻮﻑ ﺍﻟﺪﻛﺎﻥ ﻭﻧﻮﺭﻳﻜﻢ ﺑﻴﻬﻮ
ﻋﻤﺮ ﺍﻧﺒﺴﻂ ﺍﺗﻜﻴﻒ ﻟﻤﻦ ﻋﺮﻓﻬﻢ ﻣﺎ ﻋﺎﺭﻓﻴﻦ ﻭﻻ ﺟﻮﺍ ﻣﻊ ﻋﺒﺎﺱ ، ﻭﻗﺎﻝ ﺭﺑﻨﺎ ﻳﺸﻔﻴﻬﻮ ﻭﻳﻜﺘﺐ ﺳﻼﻣﺘﻮ
ﺣﺎﺝ ﺍﺑﺮﺍﻫﻴﻢ ﻗﺎﻝ ﻟﻴﻬﻮ ﻣﺎﻟﻮ ﻋﺒﺎﺱ ﺁ ﻋﻤﺮ ؟
ﺍﻟﻌﺒﻴﺪ ﻗﻌﺪ ﻳﻀﺤﻚ ﻭﻋﺎﻳﻦ ﻟﻌﻤﺮ ﻭﻗﺎﻝ ﻟﻴﻬﻮ ﺁﻱ ﻣﺎﻟﻮ ﻋﺒﺎﺱ ﺁ ﻋﻤﺮ ﻗﺒﺎﻝ ﻋﻤﻲ ﺩﺍ ﻳﻨﻀﻢ ﺍﻧﺖ ﻗﻠﺖ ﻋﺒﺎﺱ
ﻋﻤﺮ ﺣﺪﺭ ﻟﻴﻬﻮ ﻭﻗﻌﺪ ﻳﺘﻜﺸﻢ ﻭﻗﺎﻝ ﻟﺤﺎﺝ ﺍﺑﺮﺍﻫﻴﻢ ﺍﻛﻨﺖ ﺩﺍﻳﺮ ﺍﻗﻮﻝ ﻟﻴﻚ ﻋﺒﺎﺱ ﻭﻟﺪﻙ ﻟﻮ ﺳﺎﺏ ﺍﻟﺨﺮﻃﻮﻡ ﻭﺟﺎﺀ ﺍﺷﺘﻐﻞ ﻫﻨﺎ ﻗﺮﻳﺐ ﻣﺎ ﺍﺣﺴﻦ ﻟﻴﻬﻮ ؟
ﺣﺎﺝ ﺍﺑﺮﺍﻫﻴﻢ ﺿﺤﻚ ﻭﻗﺎﻝ ﻟﻴﻬﻮ ﻋﺒﺎﺱ ﻗﺎﻝ ﻣﺒﺴﻮﻁ ﻣﻦ ﺍﻟﺨﺮﻃﻮﻡ ﻭﺍﻇﻨﻬﺎ ﻧﻔﻌﺖ ﻣﻌﺎﻫﻮ ﻭﺟﺎﺀ ﻣﻨﻬﺎ ﻓﺎﻟﺢ ﻭﻧﺠﻴﺾ ﻭﻧﺤﻦ ﻣﺎ ﺑﻨﺪﻭﺭ ﻟﻴﻬﻮ ﺍﻟﺒﻌﺎﺩ ﻋﻼ ﺍﻟﺮﺯﻕ ﺑﺮﺍﻫﻮ ﺍﻟﺒﺴﻮﻕ ﺳﻴﺪﻭ ﻭﺍﻟﻤﻜﺘﻮﺑﺔ ﻟﻴﻬﻮ ﻟﻘﻤﺔ ﻟﻮ ﻭﻳﻦ ﻭﻭﻳﻦ ﻣﺠﺒﻮﺭ ﻳﻔﻮﺕ ﻟﻴﻬﺎ ﻭﻳﺸﻴﻠﻬﺎ
_ ﻓﻌﻼ ﻭﺍﻟﻠﻪ ﻛﻼﻣﻚ ﺻﺎﺡ ﺍﻟﻠﻘﻤﺔ ﺑﺘﺴﻮﻕ ﺻﺎﺣﺒﻬﺎ ﻭﻋﺒﺎﺱ ﻣﺎ ﺷﺎﺀ ﺍﻟﻠﻪ ﺑﻘﻰ ﻧﺠﻴﺾ ﺗﺐ ﻭﻓﺎﻟﺢ
_ ﻋﺒﺎﺱ ﺻﻐﻴﺮ ﻋﻠﻲ ﺍﻟﺸﻘﺎﺀ ﻟﻜﻦ ﺷﺎﻃﺮ ، ﻫﻮ ﺻﺎﺣﺒﻚ ﺁ ﻋﻤﺮ ، ﻣﻮ ﻳﺎ ؟
_ ﺁﻱ ﺻﺎﺣﺒﻲ ﻭﻫﻮ ﺯﻭﻝ ﺗﻤﺎﻡ ﻭﺍﻧﺎ ﻛﻞ ﻣﺎ ﺍﻣﺶ ﺍﻟﺨﺮﻃﻮﻡ ﻗﺎﻋﺪ ﺍﻏﺸﺎﻫﻮ
_ ﻛﺘﺮ ﺧﻴﺮﻙ ﺁ ﻭﻟﺪﻱ ﻭﺍﻛﺎﻥ ﻣﺸﻴﺖ ﻗﺮﻳﺐ ﺳﻠﻢ ﻋﻠﻴﻬﻮ ﻭﻗﻮﻝ ﻟﻴﻬﻮ ﺍﺑﻘﻰ ﻋﺸﺮﺓ ﻋﻠﻲ ﺭﻭﺣﻚ
_ ﺍﻥ ﺷﺎﺀ ﺍﻟﻠﻪ ﺍﻛﺎﻥ ﻣﺸﻴﺖ ﺑﻮﺭﻳﻬﻮ ﻭﺍﻟﺴﻼﻡ ﺑﻮﺻﻞ ﺑﻮﺻﻞ
ﻋﺒﺎﺱ ﻭﺭﺑﻴﻊ ﻭﺻﻠﻮﺍ ﺍﻟﺴﻮﻕ ﻭﻟﻘﻮﺍ ﺍﻟﺒﺎﺏ ﻣﻘﻔﻮﻟﻮﻣﻨﺎﻛﻰ ﺳﺎﻱ
ﻋﺒﺎﺱ ﻗﺎﻝ ﻟﺮﺑﻴﻊ ﻳﺎﻫﻮ ﺩﺍ ﺍﻟﺪﻛﺎﻥ ﺣﻘﻮ ﻭﻫﻮ ﻗﺎﻋﺪ ﺟﻮﺓ
_ ﻭﺭﺡ ﻟﻴﻬﻮ
_ ﺍﻧﺎ ﻣﺎ ﺩﺍﻳﺮﻭ ﻳﺸﻮﻓﻨﻲ ﻣﻌﺎﻙ ﺍﻣﺶ ﺍﻧﺖ ﺑﺮﺍﻙ
_ ﻭﺭﺡ ﺳﺎﻱ ﻳﺎﺥ ﺍﻧﺎ ﺍﻣﺶ ﺑﺮﺍﻱ ﺍﻗﻮﻝ ﺷﻨﻮ ؟
_ ﺍﻋﻤﻞ ﻓﻴﻬﺎ ﺯﻱ ﺍﻟﺪﺍﻳﺮ ﺗﺸﺘﺮﻱ ﻟﻴﻚ ﺣﺎﺟﺔ ﻭﻫﻮ ﺯﺍﺗﻮ ﻓﺎﺿﻲ ﻗﺸﺔ ﻣﺎ ﻓﻴﻬﻮ ﺍﻟﻤﻬﻢ ﺗﻌﺮﻑ ﻭﺩ ﺍﻟﻀﻮ
_ ﻛﻴﻒ ﻓﺎﺿﻲ ﻭﺍﻋﻤﻞ ﻓﻴﻬﺎ ﺯﻱ ﺍﻟﺪﺍﻳﺮ ﺍﺷﺘﺮﻱ ﻣﻨﻮ ﻭﺭﺡ ﺳﺎﻱ ﻳﺎﺥ ﻣﺎ ﻋﻠﻴﻚ ﻣﻨﻮ
_ ﻳﺎﺥ ﺍﻣﺶ ﺳﺎﻱ ﻭﺍﺗﺤﺠﺞ ﻟﻴﻬﻮ ﺑﺄﻱ ﺣﺠﺔ ﻣﺎ ﺑﻐﻠﺒﻚ ﺍﻟﻜﻼﻡ ﺍﻧﺖ
ﺭﺑﻴﻊ ﻣﺸﻰ ﺍﻟﺪﻛﺎﻥ ﻭﻋﺒﺎﺱ ﻭﻗﻒ ﺑﻌﻴﺪ ﻭﻗﻌﺪ ﻳﻌﺎﻳﻦ ﻭﻣﺘﻀﺎﺭﻱ ﻋﺸﺎﻥ ﻟﻮ ﻭﺩ ﺍﻟﻀﻮ ﻣﺮﻕ ﻟﺮﺑﻴﻊ ﻣﺎ ﻳﺸﻮﻓﻮ
ﺭﺑﻴﻊ ﺩﻕ ﺍﻟﺒﺎﺏ ﻭﺟﺎﻫﻮ ﺣﺎﺝ ﺍﺑﺮﺍﻫﻴﻢ ﻣﺎﺭﻕ ﻭﻋﺒﺎﺱ ﻣﻦ ﺷﺎﻑ ﺟﺪﻭ ﺍﻧﺨﻠﻊ ﻭﺯﺍﻍ ﻭﺍﺗﻀﺎﺭﻯ ﻣﻨﻮ ﻭﺭﺍﺀ ﻛﺸﻚ
ﻭﺭﺑﻴﻊ ﻣﺎ ﺍﺗﻜﻠﻢ ﻣﻊ ﺣﺎﺝ ﺍﺑﺮﺍﻫﻴﻢ ﻭﻗﻌﺪ ﻳﻌﺎﻳﻦ ﺟﻮﺓ ﺍﻟﺪﻛﺎﻥ ﻭﺍﻟﻌﺒﻴﺪ ﺟﺎﻫﻮ ﻣﺎﺭﻕ ﻗﺎﻝ ﻟﻴﻬﻮ ﻣﺮﺣﺐ
_ ﻣﺮﺣﺒﺘﻴﻦ ﺩﺍ ﺩﻛﺎﻥ ﺟﺪﻳﺪ ﻭﻟﻼ ﺷﻨﻮ ؟
_ ﺁﻱ ﺩﻛﺎﻥ ﺟﺪﻳﺪ ﻭﺷﻐﺎﻳﻦ ﻧﺮﺹ ﻭﻧﺮﺗﺐ ﻓﻴﻬﻮ ﻭﺑﻨﻔﺘﺤﻮ ﺑﻌﺪ ﻳﻮﻣﻴﻦ
_ ﺍﻳﻮﺍﺍﺍ ﻣﺒﺮﻭﻙ ﻭﺭﺑﻨﺎ ﻳﺴﺎﻋﺪ ﺧﻼﺱ ﺍﻧﺎ ﺑﺠﻲ ﺑﻌﺪ ﻳﻮﻣﻴﻦ ﺍﺷﺘﺮﻱ ﻣﻨﻜﻢ
_ ﺍﻥ ﺷﺎﺀ ﺍﻟﻠﻪ
_ ﺍﻧﺖ ﺍﺳﻤﻚ ﻣﻨﻮ ؟
_ ﺍﺳﻤﻲ ﺍﻟﻌﺒﻴﺪ ، ﻳﻠﻼ ﺑﻌﺪ ﺍﺫﻧﻚ ﻋﺸﺎﻥ ﻧﺤﻦ ﻣﺸﻐﻮﻟﻴﻦ
_ ﻳﻠﻼ ﻣﻊ ﺍﻟﺴﻼﻣﺔ ﻭﺑﺠﻴﻚ ﺑﻌﺪ ﻳﻮﻣﻴﻦ
ﺭﺑﻴﻊ ﻓﺎﺕ ﻟﻌﺒﺎﺱ ﻭﺍﻟﻌﺒﻴﺪ ﻭﺣﺎﺝ ﺍﺑﺮﺍﻫﻴﻢ ﺩﺧﻠﻮﺍ ﻭﻗﻔﻠﻮﺍ ﺍﻟﺒﺎﺏ ﻋﻠﻴﻬﻢ
ﻋﺒﺎﺱ ﻟﺴﺔ ﻻﺑﺪ ﻣﺎ ﺩﺍﻳﺮ ﻳﻈﻬﺮ ﻭﺑﻌﺪ ﺭﺑﻴﻊ ﻭﺻﻠﻮ ﻗﺎﻝ ﻟﻴﻬﻮ ﻳﻠﻼ ﻧﺘﺨﺎﺭﺝ ﻣﻦ ﻫﻨﺎ ﺳﺮﻳﻊ ﻗﺒﺎﻝ ﺟﺪﻱ ﻳﻤﺮﻕ ﻭﻳﺸﻮﻓﻨﻲ
_ ﺍﻟﻔﺘﺢ ﻟﻲ ﺍﻟﺒﺎﺏ ﺩﺍ ﻳﺎﻫﻮ ﺟﺪﻙ ؟
_ ﺁﻱ ﻭﻣﺎ ﻋﺎﺭﻑ ﺍﻟﺠﺎﺑﻮ ﺍﻟﻠﻴﻠﺔ ﻫﻨﺎ ﺷﻨﻮ ﺑﺲ ﻣﺎ ﺩﺍﻳﺮﻭ ﻳﺸﻮﻓﻨﻲ ﻭﺭﺡ ﻭﺭﺡ ﺳﺮﻳﻊ ﻣﻦ ﻫﻨﺎ
_ ﻭﺭﺡ ﻋﻠﻲ ﺍﻟﻌﺮﺑﺎﺕ
_ ﻻ ﻻ ﺍﻧﺎ ﺧﺎﻳﻔﻮ ﻳﺸﻮﻓﻨﻲ ﻭﺍﻟﻠﻪ ﻭﻗﻒ ﻟﻴﻨﺎ ﺗﻜﺴﻲ
_ ﺗﻜﺴﻲ ﺧﺴﺎﺭﺓ ﺳﺎﻱ ﻳﺎﺥ ﻭﺍﻟﺒﺼﺎﺕ ﺍﺭﺧﺺ
_ ﻣﺎ ﻣﺸﻜﻠﺔ ﺑﺪﻓﻊ ﺍﻧﺎ ﻭﺍﻧﺎ ﻣﻌﺎﻱ ﻗﺮﻭﺵ
_ ﻣﻌﺎﻙ ﻛﻢ ؟
_ ﻣﻌﺎﻱ ﺧﻤﺴﺔ ﺍﻟﻒ
_ ﺗﻤﺎﻡ ﺍﻧﺎ ﺑﺠﻴﺐ ﻟﻲ ﺗﻜﺴﻲ ﻭﺑﺠﻴﻚ ﻭﻛﺪﺍ ﺍﻟﻤﻮﺭ ﻇﺒﻄﺖ
_ ﻇﺒﻄﺖ ﻛﻴﻒ ؟
_ ﺑﻨﻤﺶ ﺑﺎﻟﺘﻜﺴﻲ ﻟﻠﺰﻭﻝ ﺍﻟﺒﺠﻴﺐ ﻟﻴﻚ ﺍﻟﻘﺮﻭﺵ ﻣﻦ ﺯﻭﻟﻚ ﺩﺍ ﻭﻧﺘﻔﻖ ﻣﻌﺎﻫﻮ ﻭﻧﺸﻮﻓﻮ ﺑﻴﺎﺧﺪ ﻛﻢ
ﺭﺑﻴﻊ ﻣﺸﻰ ﺟﺎﺏ ﺍﻟﺘﻜﺴﻲ ﻭﻓﺎﺗﻮﺍ ﻭﺭﺑﻴﻊ ﻳﻮﺻﻒ ﻟﺒﺘﺎﻉ ﺍﻟﺘﻜﺴﻲ ﻭﻣﺸﻮﺍ ﻟﺒﻴﺖ ﺑﻌﻴﺪ ﺁﺧﺮ ﺣﻲ ﺍﻟﻨﺼﺮ ﻭﺭﺑﻴﻊ ﻧﺰﻝ ﻭﻗﺎﻝ ﻟﻴﻬﻢ ﺩﻗﺎﻳﻖ ﻭﺑﺠﻴﻜﻢ ﻭﺩﺧﻞ ﺍﻟﺒﻴﺖ ﺑﻌﺪ ﻣﺴﺎﻓﺔ ﺟﺎﺀ ﻭﻣﻌﺎﻫﻮ ﻭﺍﺣﺪ ﻣﻌﻮﻟﻖ ﻭﻣﻦ ﺷﻜﻠﻮ ﺳﺎﻱ ﻣﺠﺮﻡ ﻭﻗﺎﻝ ﻟﻌﺒﺎﺱ ﺟﻴﺐ ﺗﻼﺗﺔ ﺃﻟﻒ ﻭﻟﻼ ﺍﻗﻮﻝ ﻟﻴﻚ ﺧﻠﻴﻬﻦ ﺍﺭﺑﻌﺔ ﻋﺒﺎﺱ ﻃﻠﻊ ﺍﻟﻘﺮﻭﺵ ﺍﺩﺍﻫﻮ ﺍﻻﺭﺑﻌﺔ ﻭﺭﺑﻴﻊ ﺍﺩﺍﻫﻦ ﺩﺍﻙ ﻭﻗﺎﻝ ﻟﻴﻬﻮ ﺍﻟﺒﺎﻗﻲ ﺑﻌﺪ ﺗﻨﻬﻲ ﻣﻦ ﺍﻟﻤﻮﺿﻮﻉ ﻭﺍﻧﺎ ﺑﻮﺭﻳﻚ ﺍﻟﺘﻔﺎﺻﻴﻞ ﺑﻌﺪ ﺑﻜﺮﺓ ﻭﺭﻛﺐ ﺍﻟﺘﻜﺴﻲ ﻭﻣﺸﻮﺍ ﺍﻟﺒﻴﺖ
ﺑﻌﺪ ﺧﺸﻮﺍ ﺍﻟﺒﻴﺖ ﻗﺎﻝ ﻟﻌﺒﺎﺱ ﺩﺍ ﺍﻟﺰﻭﻝ ﺍﻟﻘﻠﺘﻮ ﻟﻴﻚ
_ ﺍﻟﺰﻭﻝ ﻣﻨﻮ ؟
_ ﺍﻟﺰﻭﻝ ﺍﻟﺒﺠﻴﺐ ﻟﻴﻚ ﺍﻟﻘﺮﻭﺵ ﻳﺎﺥ ﺍﻧﺖ ﻟﺴﺔ ﻣﺴﻄﻮﻝ
_ ﻣﺎ ﻣﺴﻄﺰﻝ ﺑﺲ ﺑﻔﻜﺮ ﻓﻲ ﺟﺪﻱ ﻭﻣﺎ ﻋﺎﺭﻑ ﺍﻟﺠﺎﺑﻮ ﻣﺪﻧﻲ ﺷﻨﻮ
_ ﻳﺎﺥ ﺩﺍ ﻣﺎ ﻭﻛﺖ ﺟﺪﻙ ﻫﺴﻲ ﻭﺍﻟﻤﻬﻢ ﺍﻟﺰﻭﻝ ﺩﺍ ﻗﺎﻝ ﺑﻴﺎﺧﺪ ﺍﻟﺮﺑﻊ ﻟﻜﻦ ﺍﻧﺎ ﺣﻨﺴﺘﻮ ﻣﺎ ﺷﻔﺘﻨﻲ ﺍﺗﺄﺧﺮﺕ ﻣﻌﺎﻫﻮ ؟
_ ﺍﻟﺮﺑﻊ ﻛﺘﻴﺮ ﻳﺎﺥ
_ ﺍﻧﺎ ﺯﺍﺗﻲ ﻣﺎ ﺭﺿﻴﺖ ﻭﺣﻨﺴﺘﻮ ﻭﺑﻌﺪ ﺗﻌﺐ ﺭﺿﻰ ﺑﺎﻟﻌﺸﺮﻳﻦ ﻭﻗﺎﻝ ﺑﻴﺎﺧﺪ ﻋﺸﺮﺓ ﺍﻭﻝ ﺍﻧﺎ ﻗﻠﺖ ﻟﻴﻬﻮ ﺗﻼﺗﺔ ﺑﺲ ﻟﻜﻦ ﺧﻔﺘﻮ ﻣﺎ ﻳﻬﺘﻢ ﻋﺸﺎﻥ ﻛﺪﺍ ﺍﺩﻳﺘﻮ ﺍﺭﺑﻌﺔ ﺍﻟﻒ
_ ﺑﺲ ﻛﺘﻴﺮﺓ ﻳﺎﺥ ﻋﺸﺮﻳﻦ
_ ﻣﺎ ﻛﺘﻴﺮﺓ ﻭﻻ ﺷﻲ ﻳﺎ ﻋﺒﺎﺱ ﻳﻌﻨﻲ ﺑﻔﻀﻞ ﻟﻴﻚ ﺧﻤﺴﺔ ﻭﺗﻤﺎﻧﻴﻦ ﺃﻟﻒ ﻭﺍﻟﻤﺜﻞ ﺑﻘﻮﻝ ﺍﻟﻤﺎﻝ ﺗﻠﺘﻮ ﻭﻻ ﻛﺘﻠﺘﻮ ﻭﺍﻧﺖ ﺍﻟﺤﻤﺪ ﻟﻠﻪ ﺑﻔﻀﻞ ﻟﻴﻚ ﺍﻛﺘﺮ ﻣﻦ ﺍﻟﺘﻼﺗﺔ ﺍﺭﺑﺎﻉ ، ﻣﺎ ﺍﺣﺴﻦ ﻣﻦ ﻳﺮﻭﺣﻦ ﻛﻠﻬﻦ ؟
_ ﺍﺣﺴﻦ ﻟﻜﻦ ﺣﺎﻭﻝ ﻧﻘﺼﻮ ﺗﺎﻧﻲ
_ ﺧﻼﺱ ﺍﺗﻔﻘﺘﺎ ﻣﻌﺎﻫﻮ ﺍﻧﻘﺼﻮ ﻳﺎﺥ ﻛﻴﻒ ﺗﺎﻧﻲ ﺍﻧﻘﺼﻮ ، ﻛﺪﺍ ﻧﺤﻦ ﻣﺎ ﻋﻨﺪﻧﺎ ﻛﻠﻤﺔ ؟
_ ﻻ ﻻ ﺧﻼﺱ ﻣﺎ ﻣﺸﻜﻠﺔ
_ ﺑﻌﺪﻳﻦ ﻫﻮ ﻣﺎ ﺑﺮﺍﻭ ﻭﻣﻌﺎﻫﻮ ﻧﺎﺱ ﻣﺎ ﺗﻨﺴﻰ ﻭﻗﺎﻝ ﻟﻲ ﺑﺪﺧﻞ ﻓﻴﻬﺎ ﺿﺎﺑﻂ ﻛﺒﻴﺮ ﻭﺑﺮﺿﻮ ﺍﻟﻀﺎﺑﻂ ﺩﺍﻳﺮ ﺣﻘﻮ
_ ﺍﻟﻀﺎﺑﻂ ﺣﻘﻮ ﻣﻦ ﺍﻟﻌﺸﺮﻳﻦ ﻭﺭﻳﻬﻮ ﻣﻦ ﻫﺴﻲ
_ ﺍﻳﻮﺓ ﻣﻦ ﺍﻟﻌﺸﺮﻳﻦ
_ ﺑﺲ ﺍﻧﺖ ﻟﺸﻨﻮ ﻗﻠﺖ ﻟﻴﻬﻮ ﺑﻌﺪ ﺑﻜﺮﺓ
_ ﻻﻧﻮ ﺍﻟﻠﻜﺎﻥ ﺑﺘﻜﻠﻢ ﻣﻌﺎﻱ ﻗﺒﻴﻞ ﻗﺎﻝ ﺑﻔﺘﺤﻮﺍ ﺍﻟﺪﻛﺎﻥ ﺑﻌﺪ ﺑﻜﺮﺓ ﻭﺍﻧﺎ ﺑﻤﺶ ﻟﻴﻬﻢ ﻋﺸﺎﻥ ﺍﻋﺮﻑ ﺍﻟﺰﻭﻝ
_ ﻭﺭﺡ ﻟﻴﻬﻮ ﺑﻜﺮﺓ ﻳﺎﺥ
_ ﻳﺎﺧﻲ ﻛﺪﺍ ﺯﻭﻟﻚ ﺩﺍ ﺑﺸﻚ ﻓﻴﻨﻲ ﻭﺍﻧﺎ ﻣﺎ ﺑﻘﺪﺭ ﻳﻮﻣﻲ ﺍﺩﻕ ﻟﻴﻬﻮ ﺍﻟﺒﺎﺏ ﻭﻫﻮ ﻭﺭﺍﻧﻲ ﺍﻧﻬﻢ ﺑﻔﺘﺤﻮﻫﻮ ﺑﻌﺪ ﻳﻮﻣﻴﻦ
_ ﻛﻼﻣﻚ ﺻﺎﺡ ، ﻟﻜﻦ ﺣﻘﻮ ﺍﻧﺎ ﺍﻣﺸﻲ ﺍﻟﺤﻠﺔ ﻭﺍﺟﻲ ﺑﻌﺪ ﻳﻮﻣﻴﻦ
_ ﻻ ﻻ ﻻ ﺍﻧﺖ ﻧﻬﺎﺋﻲ ﻣﺎ ﺗﻮﺭﻳﻬﻮ ﻭﺷﻚ ﻭﻫﻮ ﻫﺴﻲ ﺑﻜﻮﻥ ﺧﺎﻳﻒ ﻣﻨﻚ ﻻﻧﻮ ﻣﺎ ﻋﺎﺭﻓﻚ ﺍﻧﺖ ﺡ ﺗﻌﻤﻞ ﺷﻨﻮ
_ ﺑﺮﺿﻮ ﻛﻼﻣﻚ ﺻﺎﺡ
_ ﺍﻧﺖ ﺑﺲ ﺗﻘﻌﺪ ﺳﺎﻱ ﻭﺧﺸﻤﻚ ﻋﻨﺪﻙ ﻭﺷﻮﻑ ﺍﺧﻮﻙ ﺑﻌﻤﻞ ﻟﻴﻚ ﻓﻴﻬﻮ ﺷﻨﻮ
_ ﻭﺍﻟﻠﻪ ﻣﺎ ﻋﺎﺭﻑ ﺍﺷﻜﺮﻙ ﻛﻴﻒ ﻳﺎﺥ
_ ﻣﺎ ﺗﺸﻜﺮﻧﻨﻲ ﻭﻧﺤﻦ ﺍﺧﻮﺍﻥ
_ ﻭﺍﻟﻠﻪ ﺍﺧﻮﺍﻥ ﻟﻠﻄﻴﺶ ، ﺑﺲ ﺍﻧﺎ ﻫﺪﻭﻣﻲ ﺩﻳﻞ ﻭﺳﺨﻦ ﻳﺎﺥ ﻭﻣﺎ ﻋﻨﺪﻱ ﻏﻴﺎﺭ ﻻﺯﻡ ﺍﻣﺸﻲ ﺍﻟﺤﻠﺔ
_ ﺍﻧﺎ ﺯﺍﺗﻲ ﻫﺪﻭﻣﻲ ﻛﻠﻬﺎ ﻓﻲ ﺍﻟﺒﻴﺖ ﻭﻟﻲ ﻛﻢ ﻳﻮﻡ ﻣﺎ ﻣﺸﻴﺖ ﻭﺑﻌﺪﻳﻦ ﺑﻤﺶ ﺍﻟﺒﻴﺖ ﻭﺑﺠﻴﺐ ﻟﻴﻚ ﻣﻌﺎﻱ ﻏﻴﺎﺭ ﻣﻦ ﻣﺠﺘﺒﻰ ﺍﺧﻮﻱ . ﻗﺪﺭﻙ ﻛﺪﺍ ﻫﻮ
_ ﻻ ﻻ ﻳﺎﺥ
_ ﻻ ﻟﺸﻨﻮ ؟ ﺍﻟﺒﺴﻦ ﻳﻮﻡ ﻭﺍﺣﺪ ﺑﺲ ﻭﻭﺩﻱ ﺩﻳﻞ ﻟﻠﻐﺴﺎﻝ
_ ﺗﻤﺎﻡ
ﻳﺘﺒﻊ