ﺷﺎﻳﻔﻚ ﺁ ﻋﺒﺪ ﺍﻟﻘﻴﻮﻡ
_ ﻣﺎﻟﻲ ؟
_ ﻣﺘﻜﻴﻒ ﻭﻣﺒﺴﻮﻁ
_ ﺁﻱ ﻭﺍﻟﻠﻪ ﻟﻜﻦ ﻣﺎ ﻋﺎﺭﻑ ﺍﻧﺖ ﺍﻟﻤﺎﻟﻚ ﻭﺍﻟﻨﺸﺎﻁ ﺩﺍ ﺟﺎﻙ ﻣﻦ ﻭﻳﻦ ؟
_ ﺍﻧﺖ ﻣﻜﻠﻢ ﺍﻟﺘﺎﺝ ﻟﺸﻨﻮ ؟ ﻫﺴﻲ ﻟﻮ ﻭﺭﻳﺘﻨﻲ ﺑﺮﺍﻙ ﻣﺎﻟﻮ
_ ﺍﻟﺘﺎﺝ ﺟﺎ ﻫﻨﺎ ﺑﺮﺍﻭ ﻳﺎﺥ ﻭﻟﻘﺎﻙ ﻣﺎﻓﻲ ﻭﺣﺴﻦ ﻭﺭﺍﻭ ﻭﺍﻧﺎ ﺯﺍﺗﻲ ﻭﺭﻳﺘﻮ ﻭﺍﻧﺖ ﻣﺎ ﻋﺎﺭﻑ ﺭﻭﺣﻚ ﻛﻨﺖ ﺷﻐﺎﻝ ﻛﺒﻒ
_ ﺷﻐﺎﻝ ﻛﻴﻒ ؟
_ ﺷﻐﺎﻝ ﺣﻮﺍﻣﺔ ﻭﺗﺨﻔﺲ ﺑﺲ ﻭﺩﻗﻴﻘﺔ ﻣﺎ ﻗﻌﺪﺗﻬﺎ ، ﻗﺎﻝ ﻟﻴﻚ ﺷﻨﻮ ﻫﻮ ؟
_ ﻗﺎﻝ ﺑﺸﻴﻞ ﻣﺤﻠﻮ
_ ﺍﺷﻴﻠﻮ ﻛﻴﻒ ﻳﻌﻨﻲ ﻫﻮ ﻋﻠﻲ ﻛﻴﻔﻮ ؟
_ ﻗﺎﻝ ﺑﺪﻳﻚ ﻗﺮﻭﺷﻚ ﻛﻠﻬﺎ ﻭﺑﺎﻟﺰﻳﺎﺩﺓ ﻛﻤﺎﻥ ﻭﻳﺸﻴﻠﻮﺍ ﻣﻨﻨﺎ
_ ﻭﺑﻘﻠﻊ ﻗﺮﻭﺷﻮ ﺍﻻﺩﺍﻙ ﻟﻴﻬﺎ ﻣﻨﻚ ﻭﻟﻼ ﺑﺪﻳﻚ ﻟﻴﻬﺎ ﺑﺮﺿﻮ ؟
_ ﺑﻘﻠﻌﻬﺎ ﻗﺎﻝ ﻟﻮ ﺍﻧﺎ ﺍﻟﻠﻴﻠﺔ ﻭﺑﻜﺮﺓ ﻣﺎ ﺣﻔﻈﺖ ﺍﻻﺳﻌﺎﺭ ﻭﻛﻼﻣﻮ ﺻﺎﺡ
_ ﻣﺎ ﻛﻼﻣﻮ ﺻﺎﺡ ﻭﻻ ﺷﻲ ، ﻣﺎ ﻋﻨﺪﻭ ﺣﺎﺟﺔ ﻫﻨﺎ ﻏﻴﺮ ﺍﻳﺠﺎﺭﻭ ﻭﺍﻧﺖ ﻫﻮ ﻋﻠﻲ ﻛﻴﻔﻜﻢ ﺑﺲ ﺍﻧﺎ ﻣﺎ ﺑﺘﺤﻜﻢ ﻓﻴﻨﻲ
_ ﻣﺎ ﻣﺸﻜﻠﺔ
_ ﻣﺎ ﻣﺸﻜﻠﺔ ﻛﻴﻒ ﺁ ﻋﺒﺎﺱ ﺍﻧﺎ ﻣﺎ ﻋﻨﺪﻱ ﺷﻐﻠﺔ ﺑﻘﺮﻭﺷﻮ ﺍﻻﺩﺍﻙ ﻟﻴﻬﺎ
ﺣﺴﻦ ﺳﻤﻊ ﺍﻟﻜﻼﻡ ﻭﺷﺎﻑ ﻋﺒﺪ ﺍﻟﻘﻴﻮﻡ ﺯﻋﻼﻥ ﺳﺎﻗﻮ ﺑﺮﺓ ﻭﻗﺎﻝ ﻟﻴﻬﻮ ﺍﻧﺎ ﺑﺎﻗﻲ ﻟﻲ ﺍﻟﺘﺎﺝ ﻗﺎﻝ ﺍﻟﻜﻼﻡ ﺩﺍ ﻋﺸﺎﻥ ﻳﻌﺼﺮ ﺑﻴﻬﻮ ﻋﺒﺎﺱ ﺍﻧﺖ ﻣﺎ ﺗﻔﻬﻤﻮ ﻏﻠﻂ
_ ﺍﻧﺎ ﻭﺍﻟﻠﻪ ﺯﻋﻠﺘﻨﻲ ﺣﺘﺔ ﻳﻘﻠﻌﻮ ﺩﻱ ﻣﺎ ﺻﺎﺡ ﺍﻧﺖ ﺑﺮﺍﻙ ﺍﻻﺩﻳﺘﻮ ﺍﻟﻘﺮﻭﺵ ﺩﻱ ﻻ ﺷﺤﺪﻫﺎ ﻣﻨﻚ ﻭﻻ ﺷﺎﻟﻬﺎ ﻣﻨﻚ ﺩﻳﻦ
_ ﺍﻧﺖ ﻓﺎﻫﻢ ﺍﻟﻤﻮﺿﻮﻉ ﻏﻠﻂ ﺍﻛﺎﻥ ﻛﺪﻱ
_ ﻳﻠﻼ ﺍﻓﻬﻤﻮ ﺍﻧﺖ ﺑﻄﺮﻳﻘﺘﻲ ﺷﻮﻓﻮ ﻣﺎ ﺑﺰﻋﻞ ؟
_ ﺑﺰﻋﻞ ﻟﻜﻦ ﺍﻧﺎ ﻣﺘﺄﻛﺪ ﻗﺎﻟﻬﺎ ﺳﺎﻱ ﻭﺍﻫﻲ ﻧﻔﻌﺖ ﻳﺎﺥ
_ ﻧﺸﻮﻑ ﻟﻜﻦ ﺍﻧﺎ ﻟﻤﻦ ﺍﻻﻗﻴﻬﻮ ﺑﻨﻀﻢ ﻣﻌﺎﻫﻮ ﻋﺸﺎﻥ ﻣﺎ ﺑﺜﻌﺪ ﻳﻬﺪﺩ ﺳﺎﻱ ﻭﺍﻧﺎ ﻣﺎ ﺑﻤﺮﻕ ﻟﻴﻬﻮ ﺑﻤﺰﺍﺟﻮ
ﻋﺒﺎﺱ ﺟﺎﺀ ﻣﺎﺭﻕ ﻭﻗﺎﻝ ﻟﻴﻬﻮ ﺍﻧﺖ ﻣﺎ ﻋﻨﺪﻙ ﺩﺧﻞ ﻓﻲ ﺍﻟﻤﻮﺿﻮﻉ ﻭﺩﻱ ﺣﺎﺟﺔ ﺯﻱ ﻣﺎ ﻗﻠﺖ ﺑﻴﻨﻲ ﻭﺑﻴﻨﻮ ﻭﺍﻧﺎ ﻣﺎ ﺯﻋﻼﻥ ﻻﻧﻲ ﻓﻬﻤﺖ ﻭﻋﺎﺭﻑ ﻧﻴﺘﻮ ﻭﺗﻌﺎﻝ ﺧﻠﻴﻨﺎ ﻧﻜﻤﻞ ﺷﻐﻠﻨﺎ ﺍﺣﺴﻦ
ﺗﻤﻮﺍ ﺍﻟﻴﻮﻡ ﻭﺍﻟﻴﻮﻡ ﺍﻟﺘﺎﻧﻲ ﻭﻋﺒﺎﺱ ﻣﺎ ﻣﺮﻕ ﻣﻦ ﺍﻟﺪﻛﺎﻥ ﺍﻻ ﻟﻠﺒﻴﺖ ﻭﺍﻟﺘﺎﺝ ﺟﺎﺀ ﻭﻟﻘﻰ ﻋﺒﺎﺱ ﺣﻔﻆ ﺍﻻﺳﻌﺎﺭ ﺟﺖ ﻭﺳﻌﻠﻮ ﻣﻦ ﻛﻢ ﺻﻨﻒ ﻭﺳﺎﺑﻮ ﻟﻤﻦ ﻟﻘﺎﻫﻮ ﺣﺎﻓﻆ ﻛﻮﻳﺲ ، ﻗﺎﻝ ﻟﻴﻬﻮ ﺗﻤﺎﻡ ﻭﻟﺴﺔ ﺍﻟﻴﻤﻴﻦ ﻗﺎﻳﻢ ﺑﺎﻗﻲ ﺍﻟﺤﻮﺍﻣﺔ ﻭﻓﺎﺕ ﻭﺣﺴﻦ ﻛﻮﺭﻙ ﻟﻴﻬﻮ ﻭﺭﺍﻫﻮ ﻛﻼﻡ ﻋﺒﺪ ﺍﻟﻘﻴﻮﻡ
ﺍﻟﺘﺎﺝ ﺟﺎﺀ ﺭﺍﺟﻊ ﻭﻗﺎﻝ ﻟﻌﺒﺪﻭﺍﻟﻘﻴﻮﻡ ﺍﻟﺪﻛﺎﻥ ﺣﻘﻚ ﻭﺍﻧﺎ ﻣﺎ ﺑﺘﺤﻜﻢ ﻓﻴﻚ ﺑﻤﺰﺍﺟﻲ ﻭﻻ ﺑﺠﻲ ﻳﻮﻡ ﻭﺍﻣﺮﻗﻚ ﻣﻨﻮ ﺍﻻ ﺗﺎﺑﺎﻫﻮ ﺑﺮﺍﻙ ﻭﺗﺠﻲ ﺗﺴﻠﻤﻨﻲ ﻟﻴﻬﻮ ﻟﻜﻦ ﺑﻤﺮﻕ ﻣﻨﻮ ﻋﺒﺎﺱ ﻭﻋﺸﺎﻥ ﻣﺎ ﺗﻔﻬﻤﻨﻲ ﻏﻠﻂ ﺍﻧﺎ ﻗﺪﺍﻣﻮ ﻭﻗﺪﺍﻣﻚ ﺑﻘﻮﻟﻬﺎ ﺁﻱ ﻋﺸﺎﻥ ﻗﺮﻭﺷﻲ ﻭﺍﻧﺎ ﺍﺩﻳﺘﻬﺎ ﻟﻴﻬﻮ ﻫﺪﻳﺔ ﻭﺍﺧﻮﺓ ﻣﻨﻲ ﻟﻜﻦ ﻟﻮ ﻫﻮ ﻣﺎ ﺑﻘﻰ ﺣﺮﻳﺺ ﻋﻠﻴﻬﺎ ﻭﻻ ﻧﻔﻊ ﺑﻴﻬﺎ ﺭﻭﺣﻮ ﺍﻧﺎ ﺍﻭﻟﻰ ﺑﻴﻬﺎ ﻓﻤﺎ ﺗﺰﻋﻞ ﻣﻨﻲ ﺳﺎﻱ
ﻋﺒﺪ ﺍﻟﻘﻴﻮﻡ ﺿﺤﻚ ﻭﻓﻬﻢ ﻛﻼﻡ ﺍﻟﺘﺎﺝ ﻭﻗﺎﻝ ﻟﻴﻬﻮ ﺍﻧﺎ ﻣﺎ ﺑﺨﺶ ﻭﻻ ﺑﺘﺪﺧﻞ ﻓﻲ ﺍﻟﺒﻴﻨﺎﺗﻜﻢ ﻭﻋﺪﻳﻠﺔ ﻳﺎ ﺯﻭﻝ ﻛﻼﻣﻚ ﺻﺎﺡ ﻭﺍﻟﻌﻔﻮ ﻭﺍﻟﻌﺎﻓﻴﺔ
ﺍﻟﺘﺎﺝ ﻓﺎﺕ ﻭﻋﺒﺎﺱ ﺑﻘﻰ ﺷﻐﺎﻝ ﺻﺎﺡ
ﻋﺒﺎﺱ ﻣﻊ ﻋﺼﺮﺓ ﺍﻟﺘﺎﺝ ﻟﻴﻬﻮ ﺩﻱ ﻭﺍﻧﺸﻐﺎﻟﻮ ﻧﺴﻰ ﻓﺮﺡ ﻧﻬﺎﺋﻲ
ﻭﻓﺮﺡ ﺟﺎﺀ ﺍﻟﺒﻴﺖ ﺑﺎﻟﻤﻔﺘﺎﺡ ﺣﻘﻮ ﻭﺩﺧﻠﻮ ﻭﻓﺘﺸﻮ ﻭﻓﺎﺕ ﻭﻣﺎ ﺟﺎﺀ ﺑﺮﺍﻫﻮ ﺟﺎﺏ ﻣﻌﺎﻫﻮ ﺍﺗﻨﻴﻦ ﺭﺍﻗﺒﻮﺍ ﻟﻴﻬﻮ ﺍﻟﺘﺎﺝ ﻭﻋﺒﺎﺱ ﻋﺸﺎﻥ ﻣﺎ ﻳﻘﺒﻀﻮﻫﻮ ﺟﻮﺍﻫﻮ ﻭﻣﺎ ﺍﻧﻌﺮﻑ ﻻﻧﻮ ﻛﺎﻥ ﺣﺮﻳﺺ ﺍﻧﻮ ﻣﺎ ﻳﻐﻴﺮ ﺷﻲ ﻳﻠﻔﺖ ﻧﻈﺮﻫﻢ ﻭﻳﻌﺮﻓﻮ ﺍﻧﻮ ﻓﻲ ﺯﻭﻝ ﺟﺎﺀ ﺍﻟﺒﻴﺖ ﻭﺭﺍﻫﻢ
ﻭﻓﻌﻼ ﺩﻳﻞ ﻣﺎ ﻋﺮﻓﻮﻫﻮ ﺑﺲ ﺍﻻﻭﺿﺔ ﺍﻟﺘﺎﻧﻴﺔ ﺣﻘﺖ ﺍﻟﺘﺎﺝ ﻣﺎ ﺩﺧﻠﻬﺎ ﻓﻴﻬﺎ ﻃﺒﻠﺔ ﻛﺒﻴﺮﺓ ﻭﺑﺎﺑﻬﺎ ﻣﺎ ﺗﻔﺘﺢ ﺍﻻ ﻳﻜﺴﺮﻫﺎ
ﻭﺗﺎﻧﻲ ﺑﻌﺪ ﻳﻮﻣﻴﻦ ﺟﺎﻫﻮ ﻭﻧﻔﺲ ﺍﻟﺤﺮﻛﺔ ﻣﻌﺎﻫﻮ ﻧﻔﺲ ﺍﻻﺗﻨﻴﻦ ﺑﺲ ﺍﻟﻤﺮﺓ ﺩﻱ ﻛﺴﺮ ﺍﻟﻄﺒﻠﺔ ﻭﺩﺧﻞ ﺍﻻﻭﺿﺔ ﻭﻗﻠﺒﻬﺎ ﻓﻮﻕ ﺗﺤﺖ ﻣﺎ ﻟﻘﻰ ﺷﻲ ﺍﻻ ﻋﺸﺮﻳﻦ ﺍﻟﻒ ﺷﺎﻟﻬﺎ ﻭﻓﺎﺕ
ﺩﻳﻞ ﻟﻤﻦ ﺟﻮﺍ ﻋﺮﻓﻮﺍ ﺟﺎﻫﻢ ﺣﺮﺍﻣﻲ ﻭﻋﺒﺎﺱ ﺍﺗﺬﻛﺮ ﺍﻟﻤﻔﺘﺎﺡ ﺍﻟﻄﺒﻌﻮ ﻓﺮﺡ ﻟﻜﻦ ﻣﺎ ﻛﻠﻢ ﺑﻴﻬﻮ ﺍﻟﺘﺎﺝ ﺧﺎﻑ ﻳﻠﻮﻣﻮ ﻭﻳﻘﻮﻝ ﻟﻴﻬﻮ ﻣﺎﻟﻚ ﻣﺎ ﻭﺭﻳﺘﻨﻲ ﻭﺍﻟﺨﻼﻫﻮ ﻳﺴﻜﺖ ﻛﺴﺮﺓ ﺍﻟﻄﺒﻠﺔ ﻭﺳﺮﻗﺔ ﺍﻟﻘﺮﻭﺵ ﻻﻧﻮ ﺍﺳﺘﺒﻌﺪ ﻳﻜﻮﻥ ﺩﺍ ﻓﺮﺡ ، ﻭﻓﺮﺡ ﺯﺍﺗﻮ ﺑﻘﻰ ﺣﺮﻳﻒ ﻻﻧﻮ ﻣﺎ ﻓﺘﺢ ﺍﻻﻭﺿﺔ ﺍﻟﻌﻨﺪﻭ ﻣﻔﺘﺎﺣﻬﺎ ﺑﺎﻟﻤﻔﺘﺎﺡ ﻭﻟﻤﻦ ﻣﺮﻕ ﻣﻦ ﺩﻳﻚ ﺟﺎﺀ ﻗﺮﺹ ﺍﻟﺒﺎﺏ ﻣﺎ ﻓﺘﺤﻮ ﺑﻴﻬﻮ ﺧﻼﻫﺎ ﻓﺎﺗﺤﺔ ﻭﻟﺨﺒﻄﻬﺎ ﺯﻱ ﺍﻟﻜﺎﻥ ﺑﻔﺘﺶ ﻓﻴﻬﺎ
ﺍﻟﺘﺎﺝ ﻣﺎ ﺑﻠﻎ ﺍﻟﺒﻮﻟﻴﺲ ﻭﻗﺎﻝ ﺣﺮﺍﻣﻲ ﻋﺎﺩﻱ ﻋﺮﻑ ﻣﺎﻓﻲ ﺯﻭﻝ ﻫﻨﺎ ﺑﺎﻟﻨﻬﺎﺭ ﻭﺟﺎﺀ ﺳﺮﻕ ﻭﻋﺒﺎﺱ ﺯﺍﺗﻮ ﺍﺳﺘﺒﻌﺪ ﺍﻧﻮ ﺩﺍ ﻳﻜﻮﻥ ﻓﺮﺡ ﻭﻏﻴﺮﻭ ﺍﻟﻤﻔﺎﺗﻴﺢ ﺍﻻﺗﻨﻴﻦ ﻭﺍﻻﻭﺿﺘﻴﻦ ﻋﻤﻠﻮﺍ ﻟﻴﻬﻦ ﻃﺒﻞ
ﻋﺒﺎﺱ ﻋﺪﻡ ﺍﺗﻬﺎﻣﻮ ﻟﻔﺮﺡ ﻭﺑﻌﺪ ﺗﻐﻴﻴﺮﻫﻢ ﻟﻠﻤﻔﺎﺗﻴﺢ ﺷﺎﻑ ﻣﺎﻓﻲ ﺩﺍﻋﻲ ﻳﻤﺸﻲ ﻳﺴﺄﻝ ﻓﺮﺡ ﻻﻧﻮ ﺍﻛﻴﺪ ﻣﺎﻫﻮ ﻭﺗﺎﻧﻲ ﺍﻟﻤﻔﺘﺎﺡ ﺍﻟﻌﻨﺪﻭ ﺑﻘﻰ ﻣﺎ ﺫﺍﺕ ﺍﻫﻤﻴﺔ ﻭﺧﻼﻫﻮ ﻋﻠﻲ ﻛﺪﺍ
ﺑﻌﺪ ﺍﻟﺴﺮﻗﺔ ﺑﺘﻼﺗﺔ ﻳﻮﻡ ﻓﺮﺡ ﺟﺎﺀ ﻟﻌﺒﺎﺱ ﻓﻲ ﺍﻟﺪﻛﺎﻥ ﺳﻠﻢ ﻋﻠﻴﻬﻮ ﻭﺍﺗﻮﻧﺲ ﻣﻌﺎﻫﻮ ﻭﺳﺎﻗﻮﺍ ﻋﻠﻰ ﺟﻤﺐ ﻭﻗﺎﻝ ﻟﻴﻬﻮ ﻭﻳﻦ ﺍﻟﺘﻘﺎﺭﻳﺮ
_ ﺗﻘﺎﺭﻳﺮ ﺷﻨﻮ ؟
_ ﺍﻧﺖ ﻧﺴﻴﺖ ﺍﻧﻚ ﻣﺨﺒﺮ ﻭﻟﻼ ﺷﻨﻮ ؟
_ ﻣﺎ ﻋﻤﻠﺖ ﺍﻱ ﺷﻲ ﻭﺍﻟﻠﻪ
_ ﻛﺪﺍ ﺍﺣﺮﺟﺘﻨﻲ ﺍﻧﺎ ﻣﻊ ﻧﺎﺱ ﺍﻻﺩﺍﺭﺓ
_ ﺍﺩﺍﺭﺓ ﺷﻨﻮ
_ ﺍﺩﺍﺭﺓ ﺍﻟﻤﺒﺎﺣﺚ ﻳﻌﻨﻲ ﺍﺩﺍﺭﺓ ﺷﻨﻮ
_ ﺍﻟﺤﻞ ﺷﻨﻮ ﻃﻴﺐ ؟
_ ﺍﻟﺤﻞ ﺗﻌﻤﻞ . ﺍﻟﺘﻘﺮﻳﺮ ﺑﺲ ،
_ ﺑﻌﻤﻠﻮﻫﻮ ﻛﻴﻒ ﻫﻮ ؟
_ ﺍﻧﺎ ﺑﻌﻤﻞ ﺗﻘﺮﻳﺮﻳﻦ ﺑﺎﺳﻤﻚ ﻭﺑﻮﺩﻳﻬﻦ ﻛﺄﻧﻚ ﺍﻧﺖ ﺍﻟﻌﻤﻠﺘﻬﻦ ﻭﺍﻧﺖ ﺗﺠﻴﻨﻲ ﺑﻜﺮﺓ ﻭﻟﻼ ﺑﻌﺪﻳﻦ ﻓﻲ ﺍﻟﺒﻴﺖ ﻋﻨﺪﻙ ﻣﺄﻣﻮﺭﻳﺔ ﻣﺪﻧﻲ
_ ﻣﺪﻧﻲ ﻟﺸﻨﻮ ؟
_ ﻳﺎﺯﻭﻝ ﺍﻧﺖ ﻣﺠﻨﺪ ﻣﺎ ﻋﻠﻲ ﻛﻴﻔﻚ ﻭﺍﺣﺘﻤﺎﻝ ﻳﺮﺳﻠﻮﻙ ﺍﻟﻐﺮﺏ
_ ﺍﻛﺎﻥ ﻛﺪﻱ ﺍﻧﺎ ﻣﺎ ﺩﺍﻳﺮ
_ ﻟﻌﺐ ﻫﻮ ؟ ﻭﺍﻟﻠﻪ ﺗﺘﻌﺎﻗﺐ ﻋﻘﺎﺏ ﻟﻤﻦ ﺗﻜﺮﻩ ﻧﻔﺴﻚ ﺍﻭﻋﻰ ﺗﺨﺎﻟﻒ ﺍﻻﻭﺍﻣﺮ ، ﺍﻧﺎ ﻗﻠﺖ ﻟﻴﻚ ﻣﺄﻣﻮﺭﻳﺔ ﻳﻌﻨﻲ ﻣﺄﻣﻮﺭ ﺍﻧﺖ ﺗﻨﻔﺬﻫﺎ
_ ﻟﻜﻦ ﺍﻧﺖ ﻣﺎ ﻭﺭﻳﺘﻨﻲ ﻛﺪﺍ ﻣﻦ ﺍﻻﻭﻝ ﻭﺍﻧﺎ ﻗﺎﻳﻞ ﺷﻐﻠﻲ ﺍﻟﺘﺎﺝ ﺑﺲ
_ ﻛﺪﻱ ﺗﻌﺎﻝ ﻟﻲ ﻓﻲ ﺍﻟﺒﻴﺖ ﺑﻌﺪﻳﻦ ﻭﺑﻨﺘﻔﺎﻫﻢ
ﻓﺮﺡ ﻓﺎﺕ ﻭﺧﻠﻰ ﻋﺒﺎﺱ ﻣﻬﻤﻮﻡ ﻭﺑﻄﻨﻮ ﻃﺎﻣﺔ ، ﺑﻌﺪ ﺍﻟﻤﻐﺮﺏ ﻗﺎﻝ ﻟﻠﺘﺎﺝ ﺍﻧﺎ ﻣﺎﺷﻲ ﻟﻔﺮﺡ ﻭﺟﺎﻱ ﻃﻮﺍﻟﻲ
ﻣﺸﻰ ﻭﻟﻘﻰ ﻣﻊ ﻓﺮﺡ ﻭﺍﺣﺪ ﻗﻌﺪ ﺷﻮﻳﺔ ﻭﺩﺍﻙ ﻓﺎﺕ ﻣﻨﻬﻢ ﻭﻓﺮﺡ ﻗﺎﻝ ﻟﻌﺒﺎﺱ ﺑﻜﺮﺓ ﺍﻟﻌﺼﺮ ﺗﻤﺸﻲ ﻣﺪﻧﻲ ﻓﻲ ﺍﺭﺳﺎﻟﻴﺔ ﺗﻮﺩﻳﻬﺎ ﻻﺑﺠﺎﻛﻮﻣﺔ ﻓﻲ ﺍﻟﺒﻴﺖ
_ ﻓﻴﻬﺎ ﺷﻨﻮ ؟
_ ﻓﻴﻬﺎ ﻣﺨﺪﺭﺍﺕ
_ ﺍﻧﺖ ﺟﺎﺩﻱ ؟
_ ﺑﻜﻀﺐ ﻋﻠﻴﻚ ﺑﻌﻨﻲ ؟
_ ﻭﺍﻛﺎﻥ ﻗﺒﻀﻮﻧﻲ ؟
_ ﺍﻟﺒﻘﺒﻀﻚ ﻣﻨﻮ ؟ ﻫﻲ ﺗﺒﻊ ﺍﻟﻤﺒﺎﺣﺚ ﺗﺸﻴﻠﻬﺎ ﻭﻋﻴﻨﻚ ﻗﻮﻳﺔ ﻭﻟﻮ ﻗﻠﺖ ﻻﻱ ﻋﺴﻜﺮﻱ ﻓﻲ ﺍﻟﻄﺮﻳﻖ ﺩﻱ ﻣﺨﺪﺭﺍﺕ ﻣﺎ ﺑﻘﺪﺭ ﻳﻤﺪ ﻳﺪﻭ ﻋﻠﻴﻬﺎ ﻭﻳﻠﻤﺴﻬﺎ ﻻﻧﻬﺎ ﻓﻴﻬﺎ ﺧﺘﻢ ﺍﻻﺩﺍﺭﺓ
_ ﻃﻴﺐ ﻟﻴﻪ ﺍﻭﺩﻳﻬﺎ ﺍﻧﺎ
_ ﺍﻧﺎ ﺍﻻﻗﻨﻌﺘﻬﻢ ﺑﻴﻚ ﻻﻧﻚ ﻣﺎ ﺷﻐﺎﻝ ﺷﻲ ﻭﺍﻧﺎ ﻭﺩﻳﺖ ﻟﻴﻬﻢ ﺗﻘﺮﻳﺮﻳﻦ ﺍﻟﻴﻮﻡ ﻭﺍﺭﻓﻘﺖ ﺻﻮﺭ ﻣﻨﻬﻦ ﻟﻠﻤﻠﻒ ﺣﻘﻚ ﻭﺍﻻﺭﺳﺎﻟﻴﺔ ﺩﻱ ﺳﺠﻠﺘﻬﺎ ﺑﺎﺳﻤﻚ ﻋﺸﺎﻥ ﻳﻌﺮﻓﻮﻙ ﺷﻐﺎﻝ ﻭﺍﻧﺖ ﺑﺘﻌﺮﻑ ﺍﺑﺠﺎﻛﻮﻣﺔ
_ ﻃﻴﺐ ﻳﺎﺥ ﺍﻧﺎ ﺩﺍﻳﺮ ﺍﺧﻠﻲ ﺍﻟﺸﻐﻞ ﺍﻋﻤﻞ ﺷﻨﻮ ؟
_ ﺍﻧﺖ ﻫﺴﻲ ﻣﺎﻓﻲ ﻃﺮﻳﻘﺔ ﺍﻻ ﺑﻌﺪ ﻛﻢ ﺷﻬﺮ ﻭﺍﻧﺎ ﺑﺤﺎﻭﻝ ﺍﻏﻄﻲ ﻟﻴﻚ ﻭﻣﺎ ﺗﺮﻓﻊ ﺗﻘﺎﺭﻳﺮ ﺑﺲ ﻭﺩﻱ ﺍﻻﺭﺳﺎﻟﻴﺎﺕ ﻭﺑﺨﻠﻴﻬﻢ ﻣﺎ ﻳﻮﺩﻭﻙ ﺑﻌﻴﺪ ﻣﺪﻧﻲ ﺑﺲ ﻭﺑﺎﻟﻤﺮﺓ ﺗﻐﺸﻰ ﺍﻫﻠﻚ
_ ﺑﺮﺳﻠﻮﻧﻲ ﻛﻢ ﻣﺮﺓ ؟
_ ﻋﻠﻰ ﺣﺴﺐ ﻭﺍﻟﻤﺨﺪﺭﺍﺕ ﺩﻱ ﻧﻮﻉ ﺟﺪﻳﺪ ﻭﻣﺨﺪﺭﺍﺕ ﻭﻫﻤﻴﺔ ﺍﺑﺠﺎﻛﻮﻣﺔ ﺑﺴﻠﻤﻬﺎ ﺍﻻﺩﺍﺭﺓ ﻓﻲ ﻣﺪﻧﻲ ﻭﻫﻢ ﺑﺘﺼﺮﻓﻮﺍ ، ﻋﺎﺭﻑ ﺍﻧﻮ ﻓﻲ ﺗﺠﺎﺭ ﻣﺨﺪﺭﺍﺕ ﻭﻫﻢ ﻣﺨﺒﺮﻳﻦ ؟ ﺑﺒﻴﻌﻮﺍ ﺍﻟﻤﺨﺪﺭﺍﺕ ﺍﻟﻮﻫﻤﻴﺔ ﺩﻱ ﻭﺩﻱ ﻧﺴﺨﺔ ﻃﺒﻖ ﺍﻻﺻﻞ ﻣﻦ ﺍﻟﻤﺨﺪﺭﺍﺕ ﺍﻻﺻﻠﻴﺔ ﻟﻜﻦ ﻣﺎ ﻟﻴﻬﺎ ﺍﻱ ﻣﻔﻌﻮﻝ ﺯﻱ ﺩﻳﻚ ﻭﺍﻟﺒﺴﺘﻌﻤﻠﻬﺎ ﻣﺎ ﻛﺄﻧﻮ ﺍﺳﺘﻌﻤﻞ ﺷﻲ
_ ﺍﻳﻮﺍﺍﺍ ﻋﺸﺎﻥ ﺍﻟﺘﺠﺎﺭ ﻳﺘﻌﺎﻣﻠﻮﺍ ﻣﻌﺎﻫﻢ ﻭﻳﻜﺸﻔﻮﻫﻢ ﻳﺎﺥ ﺩﻱ ﻓﻜﺮﺓ ﻋﺠﻴﺒﺔ ﻳﺎﺥ
_ ﺍﻟﻤﻬﻢ ﺑﻜﺮﺓ ﺑﺎﻟﻨﻬﺎﺭ ﺑﺠﻴﻚ ﺿﺎﺑﻂ ﻓﻲ ﺍﻟﺪﻛﺎﻥ ﺑﺴﻠﻤﻚ ﻛﺮﺗﻮﻧﺔ ﻭﺍﻧﺖ ﺍﺗﺤﺮﻙ ﻃﻮﺍﻟﻲ
_ ﺗﻤﺎﻡ ، ﺑﺲ ﻟﻜﻦ ...
_ ﻋﺒﺎﺱ ﺩﻱ ﺍﻭﺍﻣﺮ
_ ﺍﻧﺎ ﺑﻤﺶ ﺑﻜﺮﺓ ﺑﺲ ﻗﺼﺪﻱ ﻟﻮ ﺳﺄﻟﻨﻲ ﻋﺴﻜﺮﻱ ﻓﻲ ﺍﻟﺪﺭﺏ ﻗﺎﻝ ﻟﻲ ﺩﺍ ﺷﻨﻮ ﺍﻗﻮﻝ ﻟﻴﻬﻮ ﺷﻨﻮ
_ ﻣﺎ ﺑﺴﺄﻟﻚ ﻭﺍﻧﺖ ﻋﺎﺭﻑ ﺍﻧﻬﺎ ﻣﺨﺪﺭﺍﺕ ﻭﻫﻤﻴﺔ ﻳﻌﻨﻲ ﻣﺎ ﻓﻲ ﺷﻲ ﺑﺨﻮﻑ ﺣﻤﺮ ﻟﻴﻬﻮ ﻓﻲ ﻋﻴﻨﻮ ﻟﻮ ﺳﺄﻟﻚ ﻭﻧﻬﺎﺋﻲ ﻣﺎ ﺗﻜﺸﻒ ﻧﻔﺴﻚ ﻟﺰﻭﻝ ﺍﻧﻚ ﻣﺨﺒﺮ ﻭﻓﻲ ﺍﻟﻤﺒﺎﺣﺚ ﻭﺩﻱ ﺑﺘﻘﺪﺭ ﺗﻐﻄﻴﻬﺎ ﺑﺬﻛﺎﺀﻙ ﻭﺍﺳﺘﺨﺪﺍﻡ ﻣﻬﺎﺭﺍﺗﻚ ﻭﺑﺤﺴﻚ ﺍﻻﻣﻨﻲ
_ ﻛﻴﻒ ﺣﺴﻲ ﺍﻻﻣﻨﻲ
_ ﻳﻌﻨﻲ ﺍﻟﻤﺠﺮﻡ ﺑﻜﻮﻥ ﻇﺎﻫﺮ ﻭﺑﺘﻌﺮﻑ ﻣﻦ ﺗﺼﺮﻓﺎﺗﻮ ﺍﻧﻮ ﻣﺠﺮﻡ ﻻﻧﻮ ﺑﻜﻮﻥ ﺧﺎﺑﻒ ﻳﻨﻘﺒﺾ ﻓﺒﺘﻠﻘﺎﻫﻮ ﻣﺎ ﻃﺒﻴﻌﻲ ﻓﺎﻧﺖ ﺍﻭﻋﻚ ﺗﺘﺮﺟﻒ ﻭﺗﺘﻜﺒﻜﺐ ﺧﻠﻴﻚ ﻃﺒﻴﻌﻲ ﻻﻧﻮ ﺩﻱ ﻣﺄﻣﻮﺭﻳﺔ ﻭﻣﻬﻤﺔ ﺭﺳﻤﻴﺔ ﻓﻤﺎ ﺗﺨﻠﻲ ﺯﻭﻝ ﻳﺸﻚ ﻓﻴﻚ ﻋﺸﺎﻥ ﻣﺎ ﻳﺄﺧﺮﻙ ﺑﺲ
_ ﻳﺄﺧﺮﻧﻲ ﻛﻴﻒ؟
_ ﺍﺣﺘﻤﺎﻝ ﺗﻠﻘﻰ ﻋﺴﻜﺮﻱ ﺟﺪﻳﺪ ﻭﻳﺄﺧﺮﻙ ﻓﻲ ﺍﻟﻔﺎﺿﻲ ،
_ ﻻ ﻻ ﻓﻬﻤﺘﻚ ﺗﺐ ﻭﺍﻟﻤﻬﺎﺭﺍﺕ ﻭﺍﻟﺤﺲ ﺍﻻﻣﻨﻲ ﺩﻱ ﺷﻐﻠﺘﻲ ﺗﺐ ﺧﻠﻬﺎ ﺧﻠﻬﺎ ﻋﻠﻲ ﺩﻱ ﻭﻣﺴﺘﺤﻴﻞ ﺍﺧﻠﻲ ﺯﻭﻝ ﻳﺸﻚ ﻓﻴﻨﻲ
_ ﺍﻧﺎ ﻣﺎ ﺧﺎﻳﻔﻚ ﺍﻧﻚ ﺗﻨﻘﺒﺾ ﺑﺲ ﺧﺎﻳﻒ ﻣﻦ ﺍﻟﺘﺄﺧﻴﺮ ﺍﻛﺘﺮ ﺣﺎﺟﺔ ﻻﻧﻮ ﻟﻮ ﻗﺒﻀﻮﻙ ﺑﺘﻨﻔﻚ ﻟﻜﻦ ﺑﺘﺒﻘﻰ ﻛﺮﺕ ﻣﺤﺮﻭﻕ ﻭﺑﺘﺒﻘﻰ ﻣﻜﺸﻮﻑ ﻭﺍﻫﻢ ﺣﺎﺟﺔ ﻓﻲ ﺍﻟﻤﺨﺒﺮ ﺍﻧﻮ ﻳﻜﻮﻥ ﺫﻛﻲ ﻭﻣﺮﺍﻭﻍ ﻭﻣﺎ ﻳﻨﻜﺸﻒ
_ ﺳﻤﺢ ﻳﺎﺥ ﺍﻟﺘﺎﺝ ﺩﺍ ﻣﺎ ﺑﺘﺎﻉ ﻣﺨﺪﺭﺍﺕ ﻭﻻ ﺷﻲ ﺑﻘﻰ ﺯﻭﻝ ﻛﻮﻳﺲ ﻭﺗﺎﺏ ﻣﻦ ﺍﻟﺸﺮﺍﺏ ﻭﺻﻼﺗﻮ ﻛﻠﻬﺎ ﻓﻲ ﺍﻟﺠﺎﻣﻊ ﻭﻗﺎﻋﺪ ﻳﺘﺼﺪﻕ
_ ﺩﺍ ﺯﻭﻝ ﺣﺮﺑﻮﻳﺔ ﻣﺎ ﺗﺼﺪﻗﻮ ، ﻭﻧﻬﺎﺋﻲ ﻣﺎ ﺗﺠﻴﺐ ﻟﻴﻬﻮ ﺳﻴﺮﺗﻲ
_ ﻻ ﻻ ﻣﺎ ﺑﺠﻴﺒﻬﺎ ، ﻗﺒﻞ ﻛﻢ ﻳﻮﻡ ﺍﻟﺒﻴﺖ ﺍﻧﺴﺮﻕ ، ﺟﺎﺀ ﺣﺮﺍﻣﻲ ﻭﺳﺮﻕ ﻣﻨﻮ ﺧﻤﺴﺔ ﻭﻋﺸﺮﻳﻦ ﺍﻟﻒ
_ ﻫﻮ ﻛﺎﻥ ﺧﺎﺗﻴﻬﺎ ﻓﻲ ﺍﻟﺒﻴﺖ ؟
_ ﺁﻱ ﻓﻲ ﺍﻭﺿﺘﻮ ، ﺍﻻﻭﺿﺔ ﺩﺏ ﺍﻧﺎ ﺍﻭﻝ ﻣﺮﺓ ﺍﺧﺸﻬﺎ ﻳﻮﻡ ﺟﺎﺀ ﺍﻟﺤﺮﺍﻣﻲ ﻛﺴﺮ ﺍﻟﻄﺒﻠﺔ ﻣﺎ ﺣﺼﻞ ﺧﺸﻴﺘﻬﺎ ﻛﻠﻮ ﻛﻠﻮ ﻻﻧﻮ ﻣﺎ ﻗﺎﻋﺪ ﻳﻔﺘﺤﻬﺎ ﻛﺘﻴﺮ .
_ ﻋﻨﺪﻭ ﻓﻴﻬﺎ ﺷﻨﻮ ﻭﻫﻲ ﻏﻴﺮ ﺩﻭﻻﺏ ﻗﺼﻴﺮﻭﻧﻲ ﻭﺳﺮﻳﺮ ﺩﺑﻞ ﻣﻜﺴﺮ ﻣﺎ ﻓﻴﻬﺎ ﺷﻲ
_ ﻭﺍﻟﻠﻪ ﺻﺎﺡ ﺩﻭﻻﺏ ﺑﺲ ﻭﺳﺮﻳﺮ ﻣﻜﺴﻮﺭ ، ﻟﻜﻦ ﺍﻧﺖ ﻋﺮﻓﺘﻬﻦ ﻛﻴﻒ ؟
_ ﺍﻧﺎ ؟ ﻋﺮﻓﺖ ﺷﻨﻮ ﺁ ﺁﻱ ﺁﻱ ﺷﻔﺘﻬﺎ ﺯﻣﺎﻥ ﻳﺎﺥ ﺟﻴﺘﻮ ﻣﻊ ﺻﺎﺣﺒﻲ ﺍﻟﺼﺎﺣﺒﻮ
_ ﺳﺄﻟﺘﻮ ﻳﻮﻣﺪﺍﻙ ﻣﻨﻚ ﻗﺎﻝ ﻟﻲ ﺩﻱ ﻗﺼﺔ ﻃﻮﻳﻴﻴﻴﻠﺔ ﻭﻣﺎ ﺣﻜﺎﻫﺎ ﻟﻲ
_ ﻣﺎﻓﻲ ﺍﻱ ﻗﺼﺔ ﻛﻀﺐ ﻋﻠﻴﻚ ﺳﺎﻱ ، ﺍﻟﻤﻬﻢ ﺧﻠﻴﻨﺎ ﻣﻨﻮ ﻭﺑﻜﺮﺓ ﻟﻤﻦ ﺗﺴﺎﻓﺮ ﻣﺎ ﻓﻲ ﺯﻭﻝ ﻣﻦ ﺍﻟﻤﻌﺎﻙ ﻳﻌﺮﻑ ﺍﻟﻜﺮﺗﻮﻧﺔ
_ ﺍﻗﻮﻝ ﻣﺎﺷﻲ ﻟﺸﻨﻮ ؟
_ ﻗﻮﻝ ﺍﻱ ﺷﻲ ﺍﻟﻤﻬﻢ ﺍﺗﺼﺮﻑ