ﺳﺮﺍﺭﺓ ﺍﻟﻠﻌﻮﺕ 33
ﻣﺠﺎﻫﺪ ﻳﻮﺳﻒ
ﻭﺩ ﺍﻟﺴﻤﻴﺢ ﺑﻌﺪ ﻓﺎﺕ ﻣﻨﻬﻢ ﻣﺤﻤﺪ ﻭﺭﻛﺒﻮ ﺍﻟﻌﺮﺑﻴﺔ ﻗﺎﻝ ﻟﻤﺴﺎﻋﺪ ﻓﻲ ﺷﻨﻮ ﺁ ﺣﺎﺝ ؟
_ ﻣﺎ ﻓﻲ ﺷﻲ ، ﻣﺎﻟﻚ ﺁ ﺍﻟﻀﻴﻒ ؟
_ ﺍﻧﺖ ﺯﻱ ﺍﻟﺨﺎﻳﻒ ﻟﻴﻚ ﻣﻦ ﺣﺎﺟﺔ ﻭﻟﻼ ﻣﺘﻮﻗﻊ ﺣﺎﺟﺔ ﺗﺤﺼﻞ ﻓﻲ ﺍﻫﻠﻚ ﺩﻳﻞ
_ ﻟﺸﻨﻮ ﻗﻠﺖ ﻛﺪﺍ ؟
_ ﺍﻟﻠﻪ ﻳﺴﺘﺮ ﺍﻟﻘﻠﺘﻬﺎ ﻟﻤﻦ ﻗﻠﺖ ﺍﻟﻨﻌﻴﻢ ﻋﻨﺪﻭ ﺭﺍﻱ ﻣﻊ ﺍﻟﻄﻴﺐ
_ ﺍﻧﺖ ﺁ ﻭﺩ ﺍﻟﺴﻤﻴﺢ ﺩﻓﻊ ﺍﻟﻠﻪ ﺍﺧﻮﻙ ﻟﻮ ﺍﻭﻻﺩﻭ ﺩﻭﻙ ﺑﺘﺮﺿﻰ ﻭﺑﺘﻤﺶ ﺗﻌﺘﺬﺭ ﻟﻴﻬﻢ ؟
_ ﺍﻭﻻﺩ ﺍﻟﺪﻓﻊ ﺍﺧﻮﻱ ﻳﺪﻗﻮﻧﻲ ﻛﻴﻒ ﺁ ﺍﺣﺎﺝ ؟ ﻭﺍﻟﻠﻪ ﺑﺤﺘﺮﻣﻮﻧﻲ ﺯﻱ ﺍﺑﻮﻫﻢ ﻭﻭﺍﺣﺪ
_ ﺍﻧﺎ ﻗﻠﺖ ﻟﻴﻚ ﻟﻮ ﻟﻮﻭﻭﻭﻭ
_ ﻣﺎ ﺑﺮﺿﻰ ﻃﺒﻌﺎ
_ ﺍﻧﺎ ﺩﺍﻳﺮ ﺍﻗﻮﻝ ﻟﻴﻚ ﺳﺮ ﺑﺲ ﺳﺮ ﺳﺮ ﺁ ﺍﻟﻀﻴﻒ ﻭﻟﻮ ﻣﺎ ﻭﺍﺛﻖ ﻓﻮﻗﻚ ﻣﺎ ﺗﻤﺮﻗﻮ ﻣﺎ ﺑﻘﻮﻟﻮ ﻟﻴﻚ ﻭﺍﻟﻠﻪ
_ ﻓﻲ ﺑﻴﺮ ﻳﻤﻴﻦ ﻗﻮﻝ ﺳﺎﻱ ﻭﺍﺭﻗﺪ ﻗﻔﺎ
_ ﺧﺎﺑﺮﻙ ، ﺍﻟﺴﺮ ﺍﻧﻮ ﺍﻧﺎ ﺍﻫﻠﻨﺎ ﺩﻳﻞ ﺑﻌﺮﻓﻬﻢ ﻣﻦ ﺯﻣﺎﺍﺍﺍﻥ ﻋﻤﻲ ﻣﺴﺎﻋﺪ ﻭﺍﻟﻨﻌﻴﻢ ﺑﻌﺮﻓﻬﻢ ﺣﻖ ﺍﻟﻤﻌﺮﻓﺔ ﻭﺣﺘﻰ ﻋﻤﺎﺗﻲ ﻛﻠﻬﻦ ﺑﻌﺮﻓﻦ ﻭﻭﺭﺍﻧﻲ ﻟﻴﻬﻢ ﺍﺑﻮﻱ ﺑﺪﺭﻱ ﻭﻧﻔﺮ ﻧﻔﺮ ﻭﺣﺎﻓﻈﻬﻢ ﺣﻔﻆ ﻭﺍﻟﻠﻪ ﻭﺍﻟﻨﻌﻴﻢ ﺯﻭﻝ ﺧﺒﻴﺚ ﻭﺧﺴﻴﺲ ﻭﻗﺎﻳﻠﻨﻲ ﻣﺎ ﻋﺎﺭﻓﻮ ﻭﺍﻧﺰﻳﺪﻙ ﻣﻦ ﺍﻟﺸﻌﺮ ﺑﻴﺖ ﺍﻳﺎﻡ ﺍﻟﻔﺮﺍﺵ ﺍﻟﺘﻼﺗﺔ ﺍﻟﻘﻌﺪﻧﺎﻫﻦ ﻓﻲ ﺍﻟﻐﺒﺸﺔ ﺍﻧﺎ ﻣﺎ ﻗﻌﺪﺗﻬﻦ ﻛﻠﻬﻦ ﻓﻲ ﺍﻟﺪﻳﻮﺍﻥ
_ ﺑﺘﺬﻛﺮ ﺍﻟﻴﻮﻡ ﺍﻟﺘﺎﻧﻲ ﻟﻤﻦ ﺍﻧﺎ ﺟﺒﺖ ﻣﺤﻤﻮﺩ ﻣﺎ ﻟﻘﻴﻨﺎﻙ ﻓﻲ ﺍﻟﺪﻳﻮﺍﻥ ﻭﺳﻌﻠﻨﺎ ﻣﻨﻚ ﻗﺎﻟﻮﺍ ﺑﻜﻮﻥ ﻧﺎﻳﻢ
_ ﻻ ﻻ ﻣﺎﻧﻲ ﻧﺎﻳﻢ ﻣﺸﻴﺖ ﻟﻠﻌﺒﺪ ﻭﺩ ﺍﻟﻌﻮﻥ
_ ﺩﺍ ﻣﻨﻮ ﺩﺍ ﻛﻤﺎﻥ ؟
_ ﺩﺍ ﺻﺎﺣﺐ ﺍﺑﻮﻱ ﺻﺤﺒﺔ ﺷﺪﻳﺪﺓ ﺧﻼﺱ ﻭﻫﻮ ﺍﻟﻮﺣﻴﺪ ﻓﻲ ﺍﻟﻐﺒﺸﺔ ﺍﻟﻌﺎﺭﻑ ﺍﺑﻮﻱ ﻓﻲ ﻭﺩ ﻛﺴﺎﺭ ﻭﺯﻣﺎﻧﻚ ﺍﻛﺎﻥ ﺑﺠﻴﻨﺎ ﻭﺑﻘﻨﺐ ﻣﻊ ﺍﺑﻮﻱ ﻓﻲ ﺑﻴﺘﻨﺎ ﻳﻮﻣﻴﻦ ﺗﻼﺗﺔ ﻭﻣﺮﺍﺕ ﻳﺘﻢ ﺍﺳﺒﻮﻉ ﺣﺘﻴﻦ ﻳﻔﻮﺕ ﻋﻼ ﺍﺧﺪﻟﻮ ﻓﺘﺮﺓ ﻛﺪﻱ ﻣﺮﺽ ﻓﻴﻬﺎ ﻭﺗﻌﺐ ﻭﺍﺑﻮﻱ ﺟﺎﻫﻮ ﻓﻲ ﺍﻟﻐﺒﺸﺔ ﻭﺷﺎﻓﻮ ﻭﺍﻃﻤﻦ ﻋﻠﻴﻬﻮ ﻭﺭﺟﻊ ﻭﺑﻌﺪ ﺟﺎﺀ ﺍﻟﺤﻠﺔ ﺍﺑﻮﻱ ﺻﺎﻡ ﻟﻴﻬﻮ ﺗﻼﺗﺔ ﻳﻮﻡ ﻛﻔﺎﺭﺓ ﺍﻟﻴﻤﻴﻦ ﻻﻧﻮ ﻛﺎﻥ ﺣﺎﻟﻒ ﻣﺎ ﻳﺠﻲ ﺍﻟﻐﺒﺸﺔ ﻭﺟﺎﻫﺎ ﻣﺠﺒﻮﺭ ﻭﺗﺎﻧﻲ ﻟﻤﻦ ﻣﺎﺕ ﺍﻟﻠﻪ ﻳﺮﺣﻤﻮ ﻣﺎ ﺟﺎﻫﺎ ﻭﺣﻠﻒ ﻋﻠﻲ ﻋﻤﻲ ﻭﺩ ﺍﻟﻌﻮﻥ ﺍﻧﻮ ﻣﺎ ﻳﺠﻴﻬﻮ ﺗﺎﻧﻲ ﻟﻜﻦ ﺍﻟﻌﺮﻓﺘﻮ ﻛﻞ ﺳﻨﺔ ﺑﺘﻼﻗﻮﺍ ﻓﻲ ﻭﺩ ﺍﻟﻨﺎﺟﻲ ﺗﺎﻧﻲ ﺍﻻﺗﻨﻴﻦ ﻛﺒﺮﻭ ﻭﺍﺗﻔﺎﺭﻗﻮ
ﻭﺍﻧﺎ ﻣﺸﻴﺘﻠﻮ ﻓﻲ ﺑﻴﺘﻮ ﻭﻟﻘﻴﺘﻮ ﻛﺒﺮ ﺗﺐ ﻟﻜﻦ ﻋﺮﻓﻨﻲ ﻭﺑﻜﻰ ﺯﻳﻴﻴﻴﻦ ﺑﻌﺪ ﻭﺭﻳﺘﻮ ﺑﻮﻓﺎﺓ ﺍﺑﻮﻱ ﻭﻗﺎﻝ ﻟﻲ ﺳﺒﻘﻨﻲ ﻭﻓﺎﺕ ﻗﺒﻠﻴﻨﻲ ﻟﻜﻦ ﺍﻧﺎ ﺑﻠﺤﻘﻮ ﻗﺮﻳﺐ ، ﻭﻫﻮ ﻭﺍﻟﻠﻪ ﻭﺭﺍﻧﻲ ﺣﺎﺟﺎﺕ ﺗﺸﻴﺐ ﺍﻟﺮﺍﺱ ﻭﻋﻤﺎﻳﻞ ﺍﻟﺸﻴﻄﺎﻥ ﻣﺎ ﺍﻇﻦ ﺑﻌﻤﻠﻬﺎ ﺍﻟﻨﻌﻴﻢ ﻛﻠﻬﺎ ﺳﻮﺍﻫﺎ ﻭﻣﺴﺘﻌﺪ ﺍﺳﻮﻱ ﺃﻛﻌﺐ ﻣﻨﻬﺎ ﻭﺟﻴﺘﻮ ﻟﻠﻄﻴﺐ ﺗﺐ ﻣﻲ ﺳﺎﻱ
_ ﻳﻌﻨﻲ ﺍﻣﻜﻦ ﻳﻜﺘﻠﻮ ؟
_ ﻣﺎ ﺗﺴﺘﺒﻌﺪ ﻻﻧﻮ ﻫﻮ ﻭﻣﺴﺎﻋﺪ ﻛﺘﻠﻮ ﺍﺑﻮﻫﻢ ﻭﻫﻮ ﻭﻭﺩ ﺍﻟﻴﺎﺱ ﻛﺘﻠﻮ ﻣﺴﺎﻋﺪ ﻭﻣﺎ ﺑﻌﻴﺪ ﻳﻜﺘﻞ ﺍﻟﻄﻴﺐ ﻭﺩ ﻣﺴﺎﻋﺪ
_ ﻛﺘﻞ ﺍﺑﻮﻫﻮ ﻭﻛﺘﻞ ﻣﺴﺎﻋﺪ ﺍﺧﻮﻫﻮ ؟
_ ﻛﺘﻠﺔ ﻣﺴﺎﻋﺪ ﺩﻱ ﻭﺭﺍﻧﻲ ﻟﻴﻬﺎ ﻋﻤﻲ ﻭﺩ ﺍﻟﻌﻮﻥ
_ ﻭﻫﻮ ﻋﺮﻓﻬﻢ ﻛﻴﻒ ؟
_ ﺳﻌﻠﺘﻮ ﻧﻔﺲ ﺳﻌﺎﻟﻚ ﺩﺍ ﻗﺎﻝ ﻟﻲ ﻣﺴﺎﻋﺪ ﺍﻟﻜﻠﻤﻮ ﻭﺟﺎﻫﻮ ﻗﺒﺎﻝ ﻳﻤﻮﺕ ﺑﻴﻮﻣﻴﻦ ﺑﺲ ﻭﺍﻻﻳﺎﻡ ﺩﻳﻚ ﺍﻛﺎﻥ ﻃﺎﺭﺩ ﺍﻟﻄﻴﺐ ﻭﻟﺪﻭ ﻣﻦ ﺍﻟﺒﻴﺖ ﻭﻣﺘﺒﺮﻱ ﻣﻨﻮ
_ ﻓﻲ ﺷﻨﻮ ؟
_ ﺍﻟﻄﻴﺐ ﻋﺎﻕ ﻭﻣﺎ ﻛﺎﻥ ﺑﺤﺘﺮﻡ ﺍﺑﻮﻫﻮ ﻭﻓﻘﺮ ﺟﺎﺑﺪﺍﻫﻮ ﺍﻣﻮ ﺑﺖ ﺍﻟﻜﻠﺲ ﻭﻛﻢ ﻣﺮﺓ ﻫﺪﺩ ﺍﺑﻮﻫﻮ ﻭﻗﺎﻝ ﻟﻴﻬﻮ ﺑﻜﺘﻠﻚ
_ ﺳﻤﺢ ﺍﻟﻨﻌﻴﻢ ﺳﺒﺒﻮ ﻋﻠﻴﻬﻮ ﺷﻨﻮ ؟
_ ﺍﻟﻨﻌﻴﻢ ﺯﺍﺗﻮ ﺍﻛﺎﻥ ﻣﺸﺎﻛﻞ ﻣﺴﺎﻋﺪ ﻭﻣﺘﺤﺎﺭﺑﻴﻦ ﺯﻣﻦ ﺍﻟﺴﻼﻡ ﻣﺎ ﺑﻴﻨﻬﻢ
_ ﻓﻲ ﺷﻨﻮ ؟
_ ﻓﻲ ﺍﻟﻤﺎﻝ ﻭﺍﻟﻄﻴﻦ ، ﻣﺴﺎﻋﺪ ﺟﺒﺮ ﻋﻤﺎﺗﻲ ﺑﺎﻋﻦ ﻟﻴﻬﻮ ﺍﻟﺤﻮﺍﺷﺎﺕ ﻫﻴﻼﺗﻦ ﻭﺍﻟﻨﻌﻴﻢ ﻟﻤﻦ ﺷﺎﻓﻮﺍ ﺷﺎﻝ ﺍﻛﺘﺮ ﻣﻦ ﻧﺺ ﺍﻟﻮﺭﺛﺔ ﻭﺑﻌﺪ ﻛﺪﻱ ﺍﺷﺘﺮﻯ ﺣﻮﺍﺷﺎﺕ ﺍﺧﻮﺍﺗﻮ ﺯﻋﻞ ﻭﺟﺎﻫﻮ ﻗﺎﻝ ﻟﻴﻬﻮ ﻳﺎ ﺗﺪﻳﻨﻲ ﺣﻮﺍﺷﺔ ﻳﺎ ﻗﺴﻢ ﻟﻲ ﻭﺍﻃﺎﺓ ﺍﻟﺒﺤﺮ ﻭﻣﺴﺎﻋﺪﻃﺮﺩﻭ ﻭﻧﻬﺮﻭ ﻭﺍﺗﺸﺎﻛﻠﻮﺍ ﺷﻜﻠﺔ ﻛﺒﻴﺮﺓ ﺧﻼﺱ ﻭﺍﺗﻘﺎﻃﻌﻮﺍ ﻛﻢ ﺳﻨﺔ ﺍﻟﻌﻴﺪ ﻣﺎ ﺑﺒﺎﺭﻛﻮﻫﻮ ﻟﺒﻌﺾ ﻭﻣﺴﺎﻋﺪ ﺑﻌﺪ ﻃﺮﺩ ﺍﻟﻄﻴﺐ ﻭﻟﺪﻭ ، ﺍﻟﻄﻴﺐ ﻓﺎﺕ ﻟﻠﻨﻌﻴﻢ ﻋﻤﻮ ﻭﺍﻟﻨﻌﻴﻢ ﻗﺎﻝ ﻟﻴﻬﻮ ﺍﺑﻮﻙ ﺩﺍ ﺑﻤﺮﻗﻚ ﺳﺎﻱ ﻭﺍﺣﺴﻦ ﺣﺎﺟﺔ ﺗﻨﺘﻬﻲ ﻣﻨﻮ ﺑﺲ ﻭﻗﻌﺪ ﻳﺤﺮﺵ ﻓﻮﻗﻮ ﻭﺍﻟﻄﻴﺐ ﺭﺿﻰ ﻟﻜﻦ ﻗﺎﻝ ﻣﺎ ﺑﻘﺪﺭ ﻳﻜﺘﻠﻮ ﻭﻛﺘﻠﻮﻫﻮ ﻟﻴﻬﻮ ﺍﻟﻨﻌﻴﻢ ﻭﻭﺩ ﺍﻟﻴﺎﺱ ﻭﺍﻟﻄﻴﺐ ﻣﺎ ﻋﺎﺭﻓﻮ ﻋﺎﺭﻑ ﻭﻟﻼ ﻻ ﻟﻜﻦ ﻣﺎ ﺗﺴﺘﺒﻌﺪ ﻳﻜﻮﻥ ﻋﺎﺭﻑ ﻻﻧﻮ ﺑﻌﺪ ﻣﺎﺕ ﻣﺴﺎﻋﺪ ﺍﻟﻄﻴﺐ ﺍﺩﻯ ﺍﻟﻨﻌﻴﻢ ﺣﻮﺍﺷﺔ ﻛﺒﻴﺮﺓ ﻫﺪﻳﺔ ﻭﻳﻮﻣﻲ ﺑﺴﻘﻲ ﻟﻴﻬﻮ ﻭﺍﻃﺎﺗﻮ ﻣﻦ ﺑﺎﺑﻮﺭﻭ ﻭﺍﻟﻄﻴﺐ ﺑﻘﻰ ﻣﺎﺳﻚ ﻣﺎﻝ ﺍﺑﻮﻫﻮ ﻭﻣﺘﺤﻜﻢ ﻓﻲ ﺍﺧﻮﺍﻧﻮ ﻭﺍﺧﻮﺍﻧﻮ ﻃﻴﺮ ﺳﺎﻱ ﻣﺎ ﺟﺎﻳﺒﻴﻦ ﺧﺒﺮ ﻭﺍﻟﻨﺠﻴﺾ ﺍﻟﻮﺣﻴﺪ ﻓﻴﻬﻢ ﺍﻟﺸﻔﻴﻊ ﺍﻟﻤﺎﺕ ﻏﺮﻗﺎﻥ ﺩﺍ ﺑﺲ ﻋﻴﺒﻮ ﺍﻟﺴﻜﺮ ﻭﻳﻮﻣﻲ ﺑﺸﺮﺏ ﻭﻫﻮ ﺑﺲ ﻓﻲ ﺍﺧﺎﻧﻮ ﺍﻟﻜﺎﻥ ﻋﺎﺭﻑ ﻃﺮﺩﺓ ﺍﺑﻮﻫﻮ ﻟﻠﻄﻴﺐ ﻭﺳﻤﻌﺖ ﺍﻧﻮ ﻣﺎ ﺭﺿﻰ ﺍﻟﻨﻌﻴﻢ ﻳﺸﻴﻞ ﺍﻟﺤﻮﺍﺷﺔ ﻭﻻ ﺭﺍﺿﻲ ﻳﺴﻘﻲ ﺍﻃﺎﺗﻮ ﻣﻦ ﺑﺎﺑﻮﺭﻫﻢ
_ ﺍﻟﻨﻌﻴﻢ ﺍﻛﺎﻥ ﻛﺘﻞ ﺍﻟﻄﻴﺐ ﺑﺴﺘﻔﻴﺪ ﺷﻨﻮ ؟
_ ﺑﻜﻮﻥ ﺑﺎﻗﻲ ﻟﻴﻬﻮ ﻋﺒﺪ ﺍﻟﻌﺰﻳﺰ ﻭﺩﺍ ﺑﺲ ﺑﻌﺮﻑ ﻟﻠﺒﻘﺮ ﻭﺍﻟﺒﻬﺎﻳﻢ ﻭﺍﻟﺰﺭﺍﻋﺔ ﻳﻮﻡ ﻭﺍﺣﺪ ﻣﺎ ﺩﺧﻞ ﻓﻮﻗﻬﺎ ﻳﺪﻭ ، ﻭﺍﺧﻮﻫﻮ ﺣﺴﻦ ﻃﻴﺮﺓ ﺳﺎﻛﺖ ﻭﻻ ﻋﺎﺭﻑ ﻛﻮﻋﻮ ﻣﻦ ﺑﻮﻋﻮ ﻭﺍﻟﻨﻌﻴﻢ ﺑﺒﻘﻰ ﺍﻟﻮﺻﻲ ﻋﻠﻴﻬﻢ ﻭﺑﺸﻴﻞ ﻭﺍﻃﺎﺓ ﺍﻟﺒﺤﺮ ﻛﻠﻬﺎ ﻭﻣﺎ ﺑﻌﻴﺪ ﻳﻜﺘﻠﻬﻢ ﺍﻻﺗﻨﻴﻦ
_ ﻻ ﺣﻮﻝ ﻭﻻ ﻗﻮﺓ ﺍﻻ ﺑﺎﻟﻠﻪ ، ﻭﺍﻟﻠﻪ ﺩﺍ ﻛﻼﻡ ﻋﺠﻴﺐ
_ ﻋﺎﺭﻑ ﻟﺸﻨﻮ ﺍﻧﺎ ﻗﻠﺖ ﺍﻟﻠﻪ ﻳﺴﺘﺮ ﻗﺒﻴﻠﻚ ؟
_ ﻟﺸﻨﻮ ؟
_ ﻻﻧﻮ ﺍﻟﻨﻌﻴﻢ ﻗﺒﺎﻝ ﻳﻜﺘﻞ ﻣﺴﺎﻋﺪ ﻓﺎﺕ ﻟﻴﻬﻮ ﻓﻲ ﺍﻟﺒﻴﺖ ﻭﺍﻋﺘﺬﺭ ﻟﻴﻬﻮ ﻭﺑﻜﻰ ﺑﺪﻣﻮﻋﻮ ﻟﻤﻦ ﻣﺴﺎﻋﺪ ﻗﺒﻞ ﺍﻋﺘﺬﺍﺭﻭ ﻭﺻﺎﻟﺤﻮ ﻭﺍﻟﻨﻌﻴﻢ ﺑﻘﻰ ﻳﺠﻴﻬﻮ ﻓﻲ ﺑﻴﺘﻮ ﻋﺎﺩﻱ ﻭﻓﻲ ﺃﻱ ﻭﻛﺖ ﻭﺑﻌﺪﻫﺎ ﺑﺄﻳﺎﻡ ﻣﺴﺎﻋﺪ ﻣﺎﺕ ، ﻭﺍﻛﺎﻥ ﻣﺘﻔﻖ ﻣﻊ ﺍﻟﻄﻴﺐ ﻳﺨﻨﻘﻮ ﻭﻳﺸﺎﻛﻠﻮ ﺍﻳﺎﻡ ﺍﻟﻔﺮﺍﺵ ﻟﺴﺒﺒﻴﻦ ﻭﺩﻱ ﻗﺎﻟﻬﺎ ﻟﻲ ﻋﻤﻲ ﺍﻟﻌﺒﺪ ﻭﺩ ﺍﻟﻌﻮﻥ ، ﺍﻟﺴﺒﺐ ﺍﻟﻠﻮﻝ ﻳﺒﻌﺪ ﺍﻟﺸﺒﻬﺔ ﻣﻦ ﺍﻟﻨﻌﻴﻢ ﻻﻧﻮ ﺍﻟﻨﻌﻴﻢ ﺑﺰﻋﻞ ﻣﻨﻮ ﻭﺍﻟﻨﺎﺱ ﺑﺘﻌﺎﻃﻔﻮﺍ ﻣﻌﺎﻫﻮ ﻭﺑﻠﻮﻣﻮ ﺍﻟﻄﻴﺐ
_ ﻭﺍﻟﺴﺒﺐ ﺍﻟﺘﺎﻧﻲ
_ ﺍﻟﺴﺒﺐ ﺍﻟﺘﺎﻧﻲ ﺍﺧﻮﺍﻥ ﺍﻟﻄﻴﺐ ﻟﻤﻦ ﻳﺸﻮﻓﻮﺍ ﺍﻟﻄﻴﺐ ﺧﻨﻖ ﻋﻤﻮ ﻭﻃﺮﺩﻭ ﺑﻘﻮﻟﻮﺍ ﺍﻟﻄﻴﺐ ﺯﻋﻼﻥ ﻋﻠﻲ ﺍﺑﻮﻫﻮ ﻭﻣﺎ ﺑﺸﻜﻮﺍ ﺍﻧﻮ ﺍﺑﻮﻫﻢ ﻣﺎﺕ ﻣﻜﺘﻮﻝ ﻻﻧﻮ ﺍﻟﻄﻴﺐ ﻗﺎﻝ ﻣﺎﺕ ﺑﺮﺍﻫﻮ ﻭﺑﺴﻜﺘﺔ ﻗﻠﺒﻴﺔ ﻭﻗﺎﻝ ﻟﻴﻬﻢ ﺍﻛﺎﻥ ﺑﺸﻜﻲ ﻣﻦ ﻭﺟﻊ ﺍﻟﻘﻠﺐ ﻭﻣﺎ ﻛﻠﻤﺒﻮ ﻏﻴﺮﻭ ﻭﺩﻓﻨﻮﻫﻮ ﺳﺮﻳﻊ ﺳﺮﻳﻊ
_ ﻣﺎﻓﻲ ﺯﻭﻝ ﻭﺍﺟﻊ ﻗﻠﺒﻮ ﻋﻼ ﻫﻮ ، ﺑﺲ ﻧﺎﺳﻜﻢ ﺩﻳﻞ ﺍﻋﻮﺫ ﺑﺎﻟﻠﻪ ﻣﻨﻬﻢ ﻳﺎﺥ
_ ﺗﺎﻧﻲ ﻓﻲ ﺳﻮﻋﺎﻝ ﺁ ﺣﺎﺝ ﻭﻣﻌﻠﻴﺶ ﻫﻢ ﻟﺸﻨﻮ ﺍﻟﻠﻴﻠﺔ ﻃﺮﺩﻭﻙ
_ ﻻﻧﻬﻢ ﻋﺎﺭﻓﻴﻦ ﺍﻻﺭﺍﺿﻲ ﺍﻟﺰﺍﺭﻋﻨﻬﺎ ﺩﻱ ﺗﻼﺗﺔ ﺍﺭﺑﺎﻋﻬﺎ ﺣﻘﺖ ﺍﺑﻮﻱ ﻭﺧﺎﻳﻔﻨﻲ ﺍﺟﻲ ﺍﻃﺎﻟﺐ ﺑﻴﻬﺎ
_ ﻭﻫﻲ ﺻﺎﺡ ﺣﻘﺖ ﺍﺑﻮﻙ ؟
_ ﻛﻠﻬﺎ ﺣﻘﺘﻮ ﻭﺑﺄﻭﺭﺍﻕ ﺭﺳﻤﻴﺔ ﻭﻛﻠﻬﺎ ﻣﺴﺠﻠﺔ ﻭﻣﺨﺘﻮﻣﺔ ﻋﻨﺪ ﺍﻟﻤﺤﺎﻣﻲ ﻭﻣﺴﺠﻠﺔ ﻓﻲ ﺍﺩﺍﺭﺓ ﺍﻻﺭﺍﺿﻲ
_ ﺩﻳﻞ ﺍﻻﻭﺭﺍﻕ ﺍﻟﺠﺒﺘﻬﺎ ﻣﻦ ﺍﻟﻨﺒﻘﺎﻳﺔ؟ _ ﺍﻟﺠﺒﺘﻬﻦ ﻣﻦ ﺍﻟﻨﺒﻘﺎﻳﺔ ﺻﻮﺭ ﻭﻃﺒﻖ ﺍﻻﺻﻞ ﻭﺍﻻﺻﻞ ﺍﻛﺎﻥ ﻋﻨﺪ ﺍﺑﻮﻱ ﻭﻣﻦ ﺯﻣﺎﻥ ﻗﺒﺎﻝ ﺟﺪﻱ ﻳﻤﻮﺕ ﻭﺍﻧﺎ ﻟﻮ ﺩﺍﻳﺮ ﺍﻃﺮﺩ ﺍﻟﻌﻮﻟﻖ ﺩﻳﻞ ﺑﻜﺮﺓ ﺑﻄﺮﺩﻫﻢ ﻭﻃﺮﺩﺓ ﻛﻠﺐ ﻛﻤﺎﻥ ﻭﻛﻞ ﺷﻲ ﻣﺴﺠﻞ ﻭﻣﻜﺘﻮﺏ ﻭﺍﻟﺒﻌﺘﺮﺽ ﻓﻴﻬﻢ ﺑﺴﺠﻨﻮ ﺑﺲ ﻣﺎ ﺩﺍﻳﺮ
_ ﻭﺍﻟﻠﻪ ﻟﻮ ﻓﻲ ﻣﻜﺎﻧﻚ ﺍﻧﺎ ﻳﻮﻡ ﻭﺍﺣﺪ ﻣﺎ ﺍﺧﻠﻴﻬﻢ ﻳﻘﻌﺪﻭﺍ ﻓﻴﻬﺎ ﻭﺍﻃﺮﺩ ﺍﺑﻮﻫﻢ ﺯﺍﺗﻮ
_ ﺧﻠﻴﻬﻢ ﺍﺑﻮﻱ ﺍﻟﻠﻪ ﻳﺮﺣﻤﻮ ﻣﻮﺻﻴﻨﻲ ﻭﻣﻮﺭﻳﻨﻲ ﺍﻋﻤﻞ ﺷﻨﻮ ﻭﻣﺘﻴﻦ
_ ﻫﺴﻲ ﻣﺤﻤﻮﺩ ﻭﺍﻟﻨﻌﻴﻢ ﻋﺎﺭﻓﻴﻦ ﺍﻟﻜﻼﻡ ﺩﺍ ﻛﻠﻮ ؟
_ ﻣﺎ ﻋﺎﺭﻓﻨﻮ ﻟﻜﻦ ﻛﻠﻮ ﺑﻮﺭﻳﻬﻢ ﻳﺎ ، ﻭﺍﻧﺎ ﻭﺭﻳﺘﻚ ﻻﻧﻚ ﻏﻴﺮ ﺯﻭﻝ ﺍﺧﻮﻱ ﻭﺑﺮﻳﺪﻙ ﺍﻧﺖ ﺩﺍﻳﺮ ﺗﻨﺎﺳﺒﻨﺎ ﻭﻗﻠﺖ ﺍﻋﺮﻓﻚ ﻭﺍﻭﺭﻳﻚ ﻋﻤﺎﻳﻞ ﻧﺴﺎﺑﺘﻚ ﻗﺒﺎﻝ ﻣﺎ ﺗﻌﺮﺱ ﻣﻨﻬﻢ ﻭﺍﻛﺎﻥ ﺩﺍﻳﺮ ﺗﻨﻂ ﻧﻂ
_ ﺍﻧﺎ ﺍﺧﻮﻙ ﺁ ﺣﺎﺝ ﻣﺴﺎﻋﺪ ، ﻳﻤﻴﻦ ﺑﺎﻟﻠﻪ ﻣﺎ ﺑﻨﻂ ﻭﻣﺮﺗﻲ ﺩﻱ ﺍﺭﺟﻞ ﻣﻦ ﺍﻟﻨﻌﻴﻢ ﺧﺎﻟﻬﺎ ﻭﻣﻦ ﺍﻟﻄﻴﺐ ﻭﺍﺧﻮﺍﻧﻮ ﻛﻠﻬﻢ
_ ﺧﻼﺱ ﺯﻱ ﻣﺎ ﻗﻠﺖ ﻟﻴﻚ ﻗﺒﻴﻞ ﻣﺎ ﻳﺤﺘﺎﺝ ﺍﻭﺻﻴﻚ ﺍﻟﻜﻼﻡ ﺩﺍ ﺳﺮ ﻭﻣﺎﻙ ﺍﻟﺰﻭﻝ ﺍﻟﺒﻔﺸﻲ ﺍﻟﻠﺴﺮﺍﺭ
_ ﻭﻻ ﻭﺭﻳﺘﻨﻲ ﺑﻴﻬﻮ ﻭﻻ ﻗﻠﺖ ﻟﻲ ﺷﻲ ﻭﻻ ﻋﺎﺭﻓﻮ ﻭﺍﻛﺎﻥ ﻓﻲ ﺯﻭﻝ ﺟﺎﻧﻲ ﻭﻗﺎﻟﻮﺍ ﻟﻲ ﺑﺴﺘﻐﺮﺏ ﻭﺑﻌﻤﻞ ﻓﻴﻬﺎ ﻣﺎﻧﻲ ﺧﺎﺑﺮﻭ
ﺍﻟﻨﻌﻴﻢ ﺑﻌﺪ ﺍﺗﻔﻘﻮﺍ ﻫﻮ ﻭﺩ ﺍﻟﻴﺎﺱ ﻓﺎﺕ ﻟﻠﻄﻴﺐ ﻭﺍﻟﺰﻣﻦ ﺍﻛﺎﻥ ﻣﺘﺄﺧﺮ ﻭﺍﻟﺴﺎﻋﺔ ﻓﺎﺗﺖ ﻭﺍﺣﺪﺓ ﻭﻗﺮﺑﺖ ﻻﺗﻨﻴﻦ ﻭﺍﻟﺤﻠﺔ ﭼﺖ ﻧﺎﻳﻤﺔ ﻭﻫﺎﺩﻳﺔ ﻭﺻﺎﻧﺔ ﻭﺍﻟﻨﻌﻴﻢ ﻓﺎﺕ ﻋﻠﻲ ﺣﻮﺵ ﺍﻟﻄﻴﺐ ﻭﻧﺎﻏﻢ ﻟﻴﻬﻮ ﻭﺩﻕ ﺍﻟﺒﺎﺏ ﺑﺮﺍﺣﺔ ﺑﺮﺍﺣﺔ ﻭﺍﻟﻄﻴﺐ ﺟﺎﻫﻮ ﻣﺎﺭﻕ ﺟﺮﻱ ﻭﻣﺨﻠﻮﻉ ﻭﺑﻌﻜﺎﺯﻭ ﻭﻭﺩ ﺍﻟﻴﺎﺱ ﺍﻛﺎﻥ ﻻﺑﺪ ﻓﻲ ﺍﻟﻀﻠﻤﺔ ﺟﻤﺐ ﺍﻟﺰﺭﻳﺒﺔ ﻭﻣﺎ ﺑﻌﻴﺪ ﻣﻦ ﺍﻟﺒﺎﺏ ﻭﻣﺎ ﺑﻨﺸﺎﻑ ﻭﺳﻜﻴﻨﻮ ﻓﻲ ﺿﺮﺍﻋﻮ ﻭﻣﺘﺒﻠﻢ
ﻭﺍﻟﺨﻄﺔ ﺍﻻﺗﻔﻘﻮﺍ ﻋﻠﻴﻬﺎ ﻛﺎﻧﺖ ﻛﺎﻵﺗﻲ ﺍﻟﻨﻌﻴﻢ ﺑﻌﺪ ﺍﻟﻄﻴﺐ ﻳﺼﺤﻰ ﻭﻳﻤﺮﻗﻠﻮ ﻳﺴﻮﻗﻮ ﺑﻌﻴﺪ ﻣﻦ ﺍﻟﺒﺎﺏ ﻭﻳﻨﻀﻢ ﻣﻌﺎﻫﻮ ﻣﺴﺎﻓﺔ ﻓﻲ ﻧﺺ ﺍﻟﺸﺎﺭﻉ ﻭﺑﻌﺪﻫﺎ ﻳﺴﻮﻗﻮ ﻭﻳﺪﺧﻠﻮﺍ ﺍﻻﺗﻨﻴﻦ ﺟﻮﺓ ﺣﻮﺵ ﺍﺧﻮﺍﻧﻮ ﻋﺒﺪﻭ ﻭﺣﺴﻦ ﻭﻳﺼﺤﻴﻬﻢ ﻣﻦ ﺍﻟﻨﻮﻡ ﺍﻟﺴﺎﻋﺔ ﺩﻳﻚ ﻭﺩ ﺍﻟﻴﺎﺱ ﻳﻨﺰﻏﻢ ﺑﺮﺍﺣﺔ ﻭﻳﺨﺶ ﻓﻲ ﺣﻮﺵ ﺍﻟﻄﻴﺐ ﻭﺍﻟﻄﻴﺐ ﻋﻨﺪﻭ ﻣﺰﻳﺮﺓ ﻗﺮﻳﺒﺔ ﻣﻦ ﺍﻟﺒﺎﺏ ﻭﺩ ﺍﻟﻴﺎﺱ ﺑﻌﺪ ﻳﺨﺶ ﻳﻠﺒﺪ ﻟﻴﻬﻮ ﻓﻴﻬﺎ ﻭﺍﻟﻨﻌﻴﻢ ﺑﻌﺪ ﺍﺧﻮﺍﻥ ﺍﻟﻄﻴﺐ ﻣﺎ ﻳﺼﺤﻮﺍ ﻳﻌﺘﺬﺭ ﻟﻴﻬﻢ ﻛﺘﻴﺮ ﻭﻳﻘﻮﻝ ﻭﻳﺤﻠﻒ ﻟﻴﻬﻢ ﺑﺠﻤﻠﺔ ﺍﻻﻳﻤﺎﻥ ﻭﻳﻘﻮﻝ ﻟﻴﻬﻢ ﺍﻟﻨﻮﻡ ﻏﻠﺒﻨﻲ ﻭﻗﻠﺖ ﻋﻼ ﺍﺟﻲ ﺍﻭﺭﻳﻜﻢ ﺍﻧﻲ ﻣﺎ ﻛﻨﺖ ﻋﺎﺭﻑ ﻭﺩ ﺍﻟﻴﺎﺱ ﻓﻲ ﺍﻟﺤﻠﺔ ﻭﻛﻤﺎﻥ ﻓﻲ ﺑﻴﺘﻲ ﻭﺍﻧﻮ ﺟﺎﻫﺎ ﺍﻟﻴﻮﻡ ﻭﻫﻮ ﻣﺎ ﻻﻗﺎﻫﻮ ﻭﻳﺒﻜﻲ ﻟﻴﻬﻢ ﺑﺪﻣﻮﻋﻮ ﻭﻳﺤﻠﻒ ﻛﻠﻮ ﻛﻠﻮ ﻣﺎ ﺑﻔﻮﺕ ﺑﻴﺘﻮ ﻋﻼ ﻳﺼﺪﻗﻮﻫﻮ ﻭﻳﺴﺎﻣﺤﻮﻫﻮ ﻭﻳﻤﺸﻮﺍ ﻣﻌﺎﻫﻮ ﺣﺴﻦ ﻭﻋﺒﺪ ﺍﻟﻌﺰﻳﺰ ﻳﻮﺻﻠﻮﻫﻮ ﻟﺤﺪﻱ ﺑﺎﺏ ﺑﻴﺘﻮ ﺣﺘﻴﻦ ﻳﺮﺟﻌﻮﺍ ﻭﻟﻤﻦ ﺍﻟﻄﻴﺐ ﻳﺨﺶ ﺑﻴﺘﻮ ﻳﺴﺘﻠﻤﻮ ﻭﺩ ﺍﻟﻴﺎﺱ ﻭﻳﻨﺘﻬﻲ ﻣﻨﻮ ﻭﺑﻜﺪﺍ ﺍﻟﻨﻌﻴﻢ ﺑﻜﻮﻥ ﻣﺮﻕ ﻣﻦ ﻛﺘﻠﺔ ﺍﻟﻄﻴﺐ ﻭﺑﺸﻬﻮﺩﻭ ﻭﺍﺗﻨﻴﻦ ﻋﺒﺪﻭ ﻭﺣﺴﻦ ﺍﺧﻮﺍﻥ ﺍﻟﻤﻜﺘﻮﻝ ﻭﻛﺪﺍ ﻣﺎﻓﻲ ﺍﻱ ﺯﻭﻝ ﺑﻘﺪﺭ ﻳﺘﻬﻤﻮ ﺑﻴﻬﻮ
ﻭﺍﻟﺨﻄﺔ ﻃﺒﻘﻮﻫﺎ ﺑﺤﺬﺍﻓﻴﺮﻫﺎ ﻭﻣﺸﺖ ﺯﻱ ﻣﺎ ﺧﻄﻄﻮﺍ ﻟﻴﻬﺎ ﻭﺑﺎﻟﺴﻨﺘﻤﻠﻲ
ﻓﻲ ﻭﺩ ﻛﺴﺎﺭ ﺍﻟﺼﺒﺎﺡ ﺑﺪﺭﻱ ﺣﺎﺝ ﻣﺴﺎﻋﺪ ﻭﺑﻌﺪ ﺟﺎﺀ ﻣﻦ ﺻﻼﺓ ﺍﻟﻔﺠﺮ ﺍﺳﺘﻨﻰ ﻟﻤﻦ ﺍﻟﺸﻤﺶ ﻣﺮﻗﺖ ﻭﺭﺳﻞ ﻋﻤﺮ ﻭﻟﺪﻭ ﻟﻠﻨﻌﻴﻢ ﻋﻤﻮ ﻳﻨﺎﺩﻳﻬﻮ ﻭﺍﻟﻨﻌﻴﻢ ﻻﻗﺎﻫﻮ ﻓﻲ ﺍﻟﺪﺭﺏ ﻭﺍﻛﺎﻥ ﺟﺎﻱ ﻟﻴﻬﻮ ﻳﺼﺒﺢ ﻋﻠﻴﻬﻮ ﻻﻧﻮ ﺍﻣﺲ ﺑﺎﻟﻠﻴﻞ ﻓﺎﺕ ﺑﻴﺘﻮ ﻗﺒﺎﻝ ﻣﺴﺎﻋﺪ ﻳﺮﺟﻊ ﻣﻦ ﺍﻟﻐﺒﺸﺔ ﻭﻣﺴﺎﻋﺪ ﺟﻤﻌﻬﻢ ﺍﻻﺗﻨﻴﻦ ﻭﻣﻌﺎﻫﻢ ﻋﺸﺔ ﻭﺍﻧﺘﻈﺮﻭﺍ ﻟﻤﻦ ﺑﺪﺭﻳﺔ ﺍﺧﺘﻬﻢ ﻭﺍﻻﻓﻨﺪﻱ ﺭﺍﺟﻠﻬﺎ ﺟﻮﻫﻢ ﻭﻣﺴﺎﻋﺪ ﺧﻼﻫﻢ ﻗﺎﻋﺪﻳﻦ ﻭﻣﺸﻰ ﺑﻴﺘﻮ ﻭﺟﺎﻫﻢ ﺷﺎﻳﻞ ﻟﻴﻬﻮ ﻛﺮﻳﺘﻴﻨﺔ ﺳﻤﻴﺤﺔ ﻓﺘﺤﻬﺎ ﻭﻃﻠﻊ ﻣﻨﻬﺎ ﻛﻴﺲ ﻛﺒﻴﺮ ﻭﺍﻟﻜﻴﺲ ﻛﺎﻥ ﻣﻼﻥ ﺍﻭﺭﺍﻕ ﻭﻛﻠﻬﺎ ﺣﻘﺖ ﺍﺭﺍﺿﻲ ﻭﺧﺘﺎﻫﻦ ﻗﺪﺍﻣﻮ ﻭﻗﺎﻝ ﻟﻴﻬﻢ ﺍﻭﻻ ﻓﻲ ﺍﻟﺘﺒﺎﺩﻱ ﻭﺻﻴﺔ ﺍﺑﻮﻱ ﺍﻟﻜﺘﺒﻬﺎ ﻭﻗﺎﻟﻬﺎ ﻟﻲ ﻭﻗﺎﻟﻬﺎ ﻻﻋﻤﺎﻣﻨﺎ ﺣﺎﺝ ﻓﺮﺡ ﺍﻟﻠﻄﻴﺮﺵ ﻭﻋﻤﻨﺎ ﻭﺩ ﺍﻟﻜﺠﻴﻢ ﺍﻧﻮ ﺍﺭﺍﺿﻲ ﺍﻟﻐﺒﺸﺔ ﺍﻟﻤﻠﻜﻮ ﻛﻠﻬﺎ ﺗﻨﺒﺎﻉ ﻋﻼ ﺍﺭﺽ ﺍﻟﺒﺤﺮ ﺍﻟﻤﺎ ﺗﻨﺒﺎﻉ ﻭﺗﻨﻌﻤﻞ ﺑﻘﺮﻭﺷﻬﺎ ﻣﺪﺭﺳﺔ ﻓﻲ ﻭﺩ ﻛﺴﺎﺭ ﻭﺑﺎﺳﻤﻮ ﻭﺗﻨﺒﻨﻲ ﻣﻨﻬﻦ ﺍﻟﺨﻠﻮﺓ ﺣﻘﺖ ﺷﻴﺦ ﺍﻟﺰﻳﻦ ﻃﻮﺏ ﺍﺣﻤﺮ ﻭﻳﻜﺒﺮﻭﻫﺎ ﻭﻳﻮﺳﻌﻮﻫﺎ ﻭﻟﻴﻬﺎ ﺭﺑﻊ ﻣﺤﺼﻮﻝ ﻭﺍﻃﺎﺓ ﺍﻟﺒﺤﺮ ﺍﻟﻔﻲ ﺍﻟﻐﺒﺸﺔ ﻭﺑﺎﻗﻲ ﺍﻟﻘﺮﻭﺵ ﻳﻨﺒﻨﻲ ﺑﻴﻬﻦ ﺟﺎﻣﻊ ﻓﻲ ﺍﻟﻐﺒﺸﺔ ﻭﻳﻜﻮﻧﻮﺍ ﻣﺴﻌﻮﻟﻴﻦ ﻣﻨﻮ ﺣﺎﺝ ﺍﻟﻔﺎﺿﻞ ﻭﺍﻭﻻﺩﻭ ﻭﻟﻠﺠﺎﻣﻊ ﺭﺑﻊ ﻭﺍﻃﺎﺓ ﺍﻟﺒﺤﺮ ﻭﺍﻥ ﻓﻀﻠﺖ ﻗﺮﻭﺵ ﻗﺎﻝ ﺗﺘﻘﺴﻢ ﻛﻠﻬﺎ ﻋﻠﻲ ﺍﺧﻮﺍﺗﻮ ﻭﺍﻭﻻﺩ ﺍﺧﻮﺍﺗﻮ
ﻳﻌﻨﻲ ﺍﺭﺽ ﺍﻟﺒﺤﺮ ﻧﻘﺴﻤﻬﺎ ﻧﺼﻴﻦ ﻭﺍﻟﻨﺼﻴﻦ ﻧﻘﺴﻢ ﻣﻨﻬﻦ ﻧﺺ ﻋﻠﻰ ﺍﺗﻨﻴﻦ ﻭﺍﺣﺪ ﻟﻠﺨﻠﻮﺓ ﺍﻟﻬﻨﻲ ﻭﺍﻟﺘﺎﻧﻲ ﻟﺠﺎﻣﻊ ﺍﻟﻐﺒﺸﺔ ﻭﺍﻟﻨﺺ ﺍﻟﺘﺎﻧﻲ ﻗﺎﻝ ﻟﻴﻨﺎ ﻧﺤﻦ ﻧﺘﺼﺮﻑ ﺑﻴﻬﻮ ﻭﻧﺘﻌﺎﻳﺶ ﻣﻨﻮ ﻭﻗﺎﻝ ﻛﻤﺎﻥ ﻓﻲ ﺍﻟﻮﺻﻴﺔ ﺍﻭﻻﺩ ﻣﺴﺎﻋﺪ ﻭﺍﻭﻻﺩ ﺍﻟﻨﻌﻴﻢ ﻓﻲ ﺍﻟﻠﻮﻝ ﺧﻴﺮﻭﻫﻢ ﻟﻮ ﺑﻘﻮﺍ ﺩﺍﻳﺮﻳﻦ ﻳﺸﺘﺮﻭﺍ ﺍﻻﺭﺍﺿﻲ ﺑﻴﻌﻮﻫﺎ ﻟﻴﻬﻢ ﻻﻧﻬﻢ ﺍﻭﻟﻰ ﻣﻦ ﺍﻟﻐﺮﻳﺐ ﻋﻼ ﻣﺎ ﺗﺨﻠﻮﺍ ﻟﻴﻬﻢ ﺣﻘﻲ ﻛﻠﻮ ﻛﻠﻮ
ﺩﻱ ﻭﺻﻴﺘﻮ ﺑﺨﺼﻮﺹ ﺣﻘﻮ ﺍﻟﻔﻲ ﺍﻟﻐﺒﺸﺔ ﺍﻡ ﺷﻴﻤﺔ ﻛﻠﻮ ﻭﻛﻞ ﺍﻻﺭﺍﺿﻲ ﻣﺴﺠﻠﺔ ﻭﻣﻜﺘﻮﺑﺔ ﻭﻣﻌﺮﻭﻓﺔ ﻭﺍﻟﻤﺤﺎﻣﻲ ﻗﺎﻋﺪ ﻭﻋﺎﺭﻑ ﻛﻞ ﺷﻲ ﻭﻋﻨﺪﻭ ﺍﻟﺼﻮﺭ ﻭﺑﻨﻌﻤﻞ ﺍﻟﻘﺎﻟﻮﺍ ﺑﻜﻞ ﺑﺴﺎﻃﺔ ﻭﻧﺤﻦ ﻣﺎ ﻋﻨﺪﻧﺎ ﻓﻮﻗﻮ ﻋﻼ ﻧﺺ ﺍﺭﺽ ﺍﻟﺒﺤﺮ
ﺍﻣﺎ ﺑﺨﺼﻮﺹ ﺍﻟﺤﻮﺍﺷﺔ ﻭﺍﻟﺒﻴﺖ ﺍﻟﻬﻨﺎ ﻭﺭﻳﺘﻜﻢ ﻗﺒﺎﻝ ﻛﺪﻱ ﺑﻮﺻﻴﺘﻮ ﻟﻴﻨﺎ ﻭﺍﻻﻣﺮ ﻣﻨﺘﻬﻲ ﻭﻣﺎ ﺑﻴﻨﺎ ﻓﻮﻗﻦ ﺧﻼﻑ
ﺍﻟﻨﻌﻴﻢ ﻗﺎﻝ ﻟﻴﻬﻮ ﺑﺎﻗﻲ ﻟﻴﻚ ﺍﻫﻠﻨﺎ ﺩﻳﻠﻚ ﺑﺴﻠﻤﻮﻧﻞ ﺍﻻﺭﺍﺿﻲ ﻳﺎﻛﺖ ﻛﺪﻱ ﺑﺎﺧﻮﻱ ﻭﺍﺧﻮﻙ ﺁ ﺣﺎﺝ ؟
_ ﻳﺤﻤﺪﻭﺍ ﺍﻟﻠﻪ ﺍﻧﻮ ﺍﺑﻮﻱ ﺳﻜﺖ ﻭﻣﺎ ﻃﺮﺩﻫﻢ ﻣﻦ ﺍﺭﺍﺿﻴﻬﻮ ﻣﻦ ﺯﻣﺎﻥ ﻭﺍﻟﺤﻖ ﺣﻖ ﺁ ﺍﻟﻨﻌﻴﻢ ﻭﺍﻟﻘﺎﻝ ﺣﻘﻲ ﻏﻠﺐ ﻭﻟﻮ ﻋﻨﺪﻫﻢ ﺷﻴﺘﻦ ﺑﺜﺒﺖ ﺍﻧﻬﻢ ﻋﻨﺪﻫﻢ ﺣﻖ ﻳﻤﺮﻗﻮﻫﻮ ﻟﻴﻨﺎ
_ ﻳﻌﻨﻲ ﻧﻤﺶ ﻟﻴﻬﻢ ﻧﺎﺱ ﻣﺸﺎﻛﻞ ﻭﻗﻠﻊ ﻭﻟﻼ ﻛﻴﻒ ؟
_ ﻭﻻ ﻛﺮﺍﻋﻨﺎ ﻣﺎ ﺑﻨﺨﺘﻬﺎ ﻓﻲ ﺍﻟﻐﺒﺸﺔ ﻭﻋﻨﺪﻧﺎ ﺍﻟﻤﺤﺎﻣﻲ ﻫﻮ ﺍﻟﺒﺘﺼﺮﻑ ﻣﻌﺎﻫﻢ ﻭﺑﺮﺳﻞ ﻟﻴﻬﻢ ﻳﺴﻠﻤﻮﻫﻮ ﺍﻥ ﺍﺑﻮﺍ ﺑﺴﻮﻕ ﺍﻟﺒﻮﻟﻴﺲ ﻭﺑﻤﺸﻲ ﻟﻴﻬﻢ ﻭﻧﺤﻦ ﺧﺸﻤﻨﺎ ﻭﻋﻨﺪﻧﺎ ﺍﻥ ﺑﺪﻓﻌﻮﺍ ﻟﻴﻬﻮ ﻭﺑﺸﺘﺮﻭﺍ ﺍﻫﻼ ﻭﺳﻬﻼ ﻭﺍﻥ ﺑﻘﻮﺍ ﻻ ﻭﺩﺍﻳﺮﻳﻦ ﻣﺸﺎﻛﻞ ﺍﻟﻠﺸﺎﻛﻠﻮﺍ ﺍﻟﺤﻜﻮﻣﺔ ﻭﻭﺷﻨﺎ ﻣﺎ ﺑﺸﻮﻓﻮﻫﻮ
_ ﻭﺍﻛﺎﻥ ﺟﻮﻧﺎ ﻫﻨﺎ ؟
_ ﺍﻟﺒﺠﻮﻧﺎ ﻫﻨﻲ ﻭﺍﺣﺪ ﻣﻦ ﺍﺗﻨﻴﻦ ﻳﺎ ﺍﻟﻄﻴﺐ ﻭﺩ ﻣﺴﺎﻋﺪ ﻳﺎ ﺍﻟﻨﻌﻴﻢ ﻋﻤﻮ ﻭﺍﻣﺲ ﺍﻟﻠﺘﻨﻴﻦ ﺍﻧﺎ ﻣﺸﻴﺖ ﻟﻴﻬﻢ ﻓﻲ ﺑﻴﻮﺗﻬﻢ ﻭﺍﻟﻠﺘﻨﻴﻨﻲ ﻃﺮﺩﻭﻧﻲ ﻭﻗﺎﻟﻮﺍ ﻟﻲ ﻛﻴﺖ ﻭﻛﻴﺖ ﻭﻛﻴﺖ ﻭﺍﻧﺎ ﻭﺍﻟﻠﻪ ﺍﻛﺎﻥ ﺟﻮﻧﻲ ﺑﻘﻮﻝ ﻟﻴﻬﻢ ﻧﻔﺲ ﻛﻼﻣﻬﻢ ﺍﻟﻘﺎﻟﻮﻫﻮ ﻟﻲ ﻭﺑﺎﻟﺤﺮﻑ ﻭﻣﺎﻓﻲ ﺯﻭﻝ ﺍﺣﺴﻦ ﻣﻦ ﺯﻭﻝ
ﻓﻲ ﺍﻟﻐﺒﺸﺔ ..
ﻧﺨﻠﻲ ﺍﻟﻐﺒﺸﺔ ﻭﻛﺘﻠﺔ ﻭﺩ ﺍﻟﻴﺎﺱ ﻟﻠﻄﻴﺐ ﻭﺩ ﻣﺴﺎﻋﺪ ﺍﻟﺤﻠﻘﺔ ﺍﻟﺠﺎﻳﺔ ﺍﻥ ﺷﺎﺀ ﺍﻟﻠﻪ ﺇﻥ ﺑﻘﻴﻨﺎ ﺷﺪﺍﺩ ﻭﻧﻘﻮﻝ ﻳﺪﺑﻊ ﻳﺎﺥ
###################
ﻛﻞ ﻋﺎﻡ ﻭﺍﻧﺘﻢ ﺑﺨﻴﺮ ﺑﻤﻨﺎﺳﺒﺔ ﺍﻟﻌﺎﻡ ﺍﻟﻬﺠﺮﻱ ﺍﻟﺠﺪﻳﺪ ﻭﻧﺴﺎﻝ ﺍﻟﻠﻪ ﺍﻥ ﺗﻜﻮﻥ ﺳﻨﺔ ﺧﻴﺮ ﻋﻠﻴﻨﺎ ﻭﻋﻠﻴﻜﻢ ﻭﻋﻠﻰ ﺟﻤﻴﻊ ﺍﻟﻤﺴﻠﻤﻴﻦ ﻭﺭﺑﻨﺎ ﻳﺼﻠﺢ ﻓﻴﻬﺎ ﺣﺎﻝ ﺍﻟﺒﻼﺩ ﻭﺍﻟﻌﺒﺎﺩ
ﻭﺍﻟﻌﻔﻮ ﻭﺍﻟﻌﺎﻓﻴﺔ