ﻛﻴﻒ ﺍﻋﻴﺪ ﺍﻟﻤــﺎﺿﻲ ﺗﺎﻧــــﻲ
ﺍﺻﻠﻮ ﻛﺎﻥ ﺍﻟﻘﺴﻮﻩ ﻣﻨﻚ ﻭﺍﻧــﺖ ﻗﻠﺒﻚ ﻫـــﻮ ﺍﻻﺑــﺎﻧــــﻲ
ﻛﻨﺖ ﺑﺴﺄﻝ ﺩﻳﻤﻪ ﻋــﻨﻚ ﻭﺍﻧــﺖ ﻃﺒﻌــــﻚ ﺯﻭﻝ ﺍﻧﺎﻧـــــﻲ
ﻛﻴﻒ ﺍﻋﻴﺪ ﻣﻦ ﺗﺎﻧﻲ ﻇﻠﻤﻚ ﻭﺍﻫـــﻮﻱ ﺯﻭﻻ ﻓﺎﺕ ﻧﺴﺎﻧﻲ
ﻛﻴﻒ ﺍﻓﻜﺮ ﻟﻴﻚ ﺍﺭﺟﻊ ﻭﻟﺴﻪ ﺟﺮﺣـــﻚ ﺑﻴﻬـــﻮ ﺣﺎﺳــــﻲ
ﻳﺎﻣﺎ ﺍﻫﺪﻳﺘﻚ ﻣﺸﺎﻋﺮ ﻭﻛﻨـــﺖ ﺩﺍﺋـــﻤﺎ ﻟﻴـــــﻚ ﺑﻮﺍﺳــﻲ
ﺷﻔﺖ ﻓﻲ ﺭﻳﺪﻙ ﻋﺠﺎﺋﺐ ﻭﻋﺸﺖ ﻓﻲ ﺣﺒــــﻚ ﻣﺄﺳﻲ
ﻣﺎﺕ ﺧﻼﺹ ﺍﺣﺴﺎﺳﻲ ﺑﻴﻚ ﻛﻴﻒ ﺍﻋﻴﺪﻙ ﻭﻟﻴﻪ ﺍﻗﺎﺳﻲ
________________________________________
اذا لم تتفاعل مع المنشور لن تظهر لك
منشوراتنا علي الصفحة الرئيسية

تم الإرسال من خلال التطبيق Topic'it

إصرار

من رحم الوجع مولودة
لونا جميل و ناعمة سمرة
ريحتا صندلية وخمرة
فيها عقاب دعاش المطرة
أجمل صيدة وأسمح مهرة
حارسة الصاج وعايسة الكسرة
سمحة ضمة مامنكسرة
شايلة الريدة حافظة العشرة
تلقاك بي حبابك عشرة
ما بتشوف عليها الكشرة
زي النيل مستفة حسرة
فقرها شق صمت العبرة
يمرق بالمغايس نبرة
تعزم في الدموع للمرقة

من ما فتحت مخلوعة
تترقب رحيل الفرحة والدمعة القبيل مجدوعة
دي البتمنى ديمة رجوعا
صورتا في الفؤاد مطبوعة
ضحكتا في السكات مسموعة
باسمة وإن بقت موجوعة
بالألم البزيد الشرقة

عمرها ألف قصة قديمة
أقدم من شجرة النيمة
بت ما كملت تعليما
سارحة بترعا ليها بهيمة
فاردة وشيها ماهي لئيمة
صح ماعندها المليمة
جد فقرانة إلا كريمة
ماشبعانة جوعا نديما
عينا ملانة تحمد ديمة
مابتعرف دروب السرقة

ومن قامت تريد الحلة
تحكي عن البعيد والخلة
ترتى علي هموم خلق الله
رغم الجور بهيجة طلة
كاربة بيوتا ما بتتحلا
عن إيمانا ما بتتخلى
تدعي المولى يهدي الضل
لا بتتهان ولا بتتذلا
ما بتطاطي غير لي الله
صوتا بيعلى رغم الخنقة

صوتا ينادي حالا السادي
نفس الخوف ونفس الكلمة
نطق بي حنينو البغمة
طاري الجار وحس اللمة
جدعة توب ولفة عمة
حس دوبيت وجرة نمة
ويا تربالنا سولك همة
في الشمش البتحرق حرقة

شايلة من القصص كمية
في جواها راكوبتنا والقطية
والجرارة والطورية
دق الريحة والصبحية
والألفية
والحولية
بيت الزار وصوت لولية
كل الدايرو فيها بتلقى

بت في الجوف ملانة حنان
ما بتبخل علي العدمان
تتجود علي الضيفان
بت بتقول أنا ام درمان
أنا السودان
وزي النيل بتسقي الظامي والعطشان
وتروي جنان
ووقت الجن تشيل الغرقى

لا تلفانة لامعيوبة
ديمة عديلة مي مقلوبة
دارا عامرة ما مخروبة
بت غنيانة فاضية جيوبا
سيرتا بالفرح مصحوبة
فرحة عيد ودقة نوبة
حس( إصرار) وحن حبوبة
وقت الحارة ساعة الحوبه
للفرسان بتكرب توبا
ريدتا في دماي مصبوبة
صورة تجسد المحبوبة
وتصور عذاب الفرقة

#وئام_كمال_الدين .....

تم الإرسال من خلال التطبيق Topic'it

ﻛﻴﻒ ﺍﻋﻴﺪ ﺍﻟﻤــﺎﺿﻲ ﺗﺎﻧــــﻲ
ﺍﺻﻠﻮ ﻛﺎﻥ ﺍﻟﻘﺴﻮﻩ ﻣﻨﻚ ﻭﺍﻧــﺖ ﻗﻠﺒﻚ ﻫـــﻮ ﺍﻻﺑــﺎﻧــــﻲ
ﻛﻨﺖ ﺑﺴﺄﻝ ﺩﻳﻤﻪ ﻋــﻨﻚ ﻭﺍﻧــﺖ ﻃﺒﻌــــﻚ ﺯﻭﻝ ﺍﻧﺎﻧـــــﻲ
ﻛﻴﻒ ﺍﻋﻴﺪ ﻣﻦ ﺗﺎﻧﻲ ﻇﻠﻤﻚ ﻭﺍﻫـــﻮﻱ ﺯﻭﻻ ﻓﺎﺕ ﻧﺴﺎﻧﻲ
ﻛﻴﻒ ﺍﻓﻜﺮ ﻟﻴﻚ ﺍﺭﺟﻊ ﻭﻟﺴﻪ ﺟﺮﺣـــﻚ ﺑﻴﻬـــﻮ ﺣﺎﺳــــﻲ
ﻳﺎﻣﺎ ﺍﻫﺪﻳﺘﻚ ﻣﺸﺎﻋﺮ ﻭﻛﻨـــﺖ ﺩﺍﺋـــﻤﺎ ﻟﻴـــــﻚ ﺑﻮﺍﺳــﻲ
ﺷﻔﺖ ﻓﻲ ﺭﻳﺪﻙ ﻋﺠﺎﺋﺐ ﻭﻋﺸﺖ ﻓﻲ ﺣﺒــــﻚ ﻣﺄﺳﻲ
ﻣﺎﺕ ﺧﻼﺹ ﺍﺣﺴﺎﺳﻲ ﺑﻴﻚ ﻛﻴﻒ ﺍﻋﻴﺪﻙ ﻭﻟﻴﻪ ﺍﻗﺎﺳﻲ
________________________________________
اذا لم تتفاعل مع المنشور لن تظهر لك
منشوراتنا علي الصفحة الرئيسية

تم الإرسال من خلال التطبيق Topic'it

ما لايماك ..
لايمة الزمن الدففق حنك فوق واطاتي ..
ولايمة الحلم الروج وسووق فكرة عشم الزمن الآتي ..
وخلى الأمل يتمدد فيني ويبني الجاي بيوت وقطاطي وفات خلاني ..
(وأنا راجياك) ......

وأنا راجياك في النار بيغادي .. موسم ييغير موجة الواقع .. ويقلب وجهة ريح الغبرة ...

يحنس غيمة ملانة مواجع .. ومن دمعاتا تنقط مطرة ...

تبل الأرض الضاقت و واسع فيها الضيق للضاق الحسرة
( المن فرقاك) .........

ومن فرقاك إتعودت أداوي الفرقة و وجع الشوق بي هم يوم باكر ..

هم بيشلو موظف وطلبة وفي الدكان نملابو دفاتر ..

و جوا عيون خريج بتذكر كيفن كان شقيان بيذاكر ..

وكيفن فرحتو بي تخريجو وكيف الحظ كان أغبر وعاثر ..

وسامع صوت المنطق ينقنق أحسن ليك يا انت تسافر ..

عارفك مابتتحمل تبعد ولي إخلاصك انا ماناكر
(وفي جواك) !!"""

في جواك أحلام كمية وفي واقعنا بلاوي عجيبة ..

تسرق مرة براءة طفلة وتمحي ملامح أحلى حبيبة ..

وترسم بدل النور زنزانة و ترمي الحن بي خلف قضيبا ..

تقلع شجرة حنة وتزرع فتنة يولع فينا لهيبا ..
( و أصلو الجاك) .....

أصلو الجاك ما كان في الخاطر ولا يا حنين كان في النية ..

ولا متخيلة في أوصالك ببقى بلاءك شر بلية ..

و أنا ما بعرف كيفن داير ترمي هموم الجاي عليا !!!

وجرة سوط العنج الشقت باقي كرامة كل بنية ..

سرقت مني الحيل والقدرة ونجضت الدمعات النية ..

ونشلت روح الحاضر وبكرة وكفرت عمدا بالحرية ..

وعذرا إذا جافيت وهجرت يا أسمى معاني الحنية ..
(جد فاقداك) .......

وفاقدة كتير يا غالي وحاتك ولابسة الكضبة عباية وطرحة..

فاقدة القيمة وكل أحوالك تقتل في جواي الفرحة ..

بات الدم مهدور في نيلك ووحدك حاري القتلى وجرحى ..

ويشهد نيلك كم عاشقنك وكم علشانك عاشق ضحى ..

وفيك بتصنت صوت الطيبة وباقي صداك الصوتو انبحا ..

وسكن الشارع ونام مستني ضمير الفكرة يتبتبو يصحى ..
(ولليوم داك) أنا ما لايماك ..

بس لايمة الزمن الدفق حنك فوق واطاتي ..
ولايمة الحلم الروج وسوق فكرة عشم الزمن الآتي ..
وخلى الأمل يتمدد فيني ويبني الجاي بيوت وقطاطي ..
وفات خلاني و أنا راجياك ..

#وئام_كمال_الدين .....

تم الإرسال من خلال التطبيق Topic'it

ﻋﻴﻮﻧﻚ ﺇﺫﺍ ﻓﻲ ﺍﻟﻌﻴﻮﻥ ﺍﺭﺗﺤﺎﻝ
ﺑﻠﻤﻦ ﺷﺘﺎﺕ ﺍﻟﺒﻠﻮﺩ ﺍﻟﺮﺣﻴﺒﺔ
ﺩﺭﻭﺑﻚ ﻛﺘﻴﺮﺓ ﻭﻭﺻﻮﻟﻚ ﻣﺤﺎﻝ
ﺩﺭﺏ ﻓﺮﺣﺘﻚ ﻭﻳﻨﻮ ﻛﻴﻔﻦ ﺃﺟﻴﺒﺎ
ﻭ ﺍﻧﺎ ﺍﻟﺪﻭﻥ ﺯﻭﺍﺩﺗﻚ ﺷﺪﺩﺕ ﺍﻟﺮﺣﺎﻝ
ﺭﺳﻤﺘﻚ ﺣﺪﻭﺩ ﻟﻲ ﻣﺪﺍﻳﻦ ﻏﺮﻳﺒﺔ ......
ﺑﺤﺐ ﻓﻲ ﻗﺴﺎﻭﺗﻚ ﻛﻼﻡ ﻟﺴﻪ ﻃﻴﺐ
ﺑﺸﺎﺑﻪ ﻋﺘﺎﺏ ﺍﻟﻤﺤﺐ ﻟﻠﺤﺒﻴﺐ
ﻭﻳﺠﺒﺮ ﺧﻮﺍﻃﺮﺍ ﻛﺘﻴﺮﺓ ﻭﻳﻄﻴﺐ .
ﻛﻤﺎ ﺍﻟﻨﻴﻞ ﺟﺮﺍﺡ ﺍﻟﺠﺮﻭﻑ ﺍﻟﺨﺼﻴﺒﺔ ......
ﻭﺭﻏﻢ ﺇﻧﻮ ﺿﺎﻣﻴﻨﻲ ﻟﻴﻚ ﺍﻧﺘﻤﺎﺋﻲ ﻭﻳﺸﻬﺪ ﻋﻠﻲ ﺭﺑﻲ ﻋﺎﻟﻢ ﺍﻟﻐﻴﻮﺏ
ﺑﺤﺲ ﻓﻴﻜﻲ ﺣﻦ ﺍﻟﻤﺤﺐ ﺍﻟﻤﻔﺎﺭﻕ ﻛﻤﺎ ﻓﺎﺭﻗﺖ ﺃﺭﺿﻲ ﺃﺭﺽ ﺍﻟﺠﻨﻮﺏ
ﻭﺑﺮﺿﻚ ﺑﻘﻮﻝ ﺑﻴﻨﺎ ﻧﻴﻞ ﻣﺎ ﺑﻴﻨﻀﺐ ﻭﺭﻳﺪﺗﻚ ﺗﺸﺒﻊ ﺟﻴﺎﻉ ﺍﻟﻘﻠﻮﺏ
ﺗﺼﺪﻱ ﻭﺗﺠﺎﻓﻲ ﻭﺣﺘﻰ ﺍﻟﺼﺪﻭﺩ ﻓﻴﻚ ﻛﺎﺳﻴﺎﻫﻮ ﻃﻴﺒﺔ .....
ﻣﻨﻮ ﺍﻟﻔﻲ ﺍﻟﺸﻤﺎﻝ ﻣﺎﺑﻐﻨﻴﻚ ﻣﺤﻨﺔ
ﻭﻣﻨﻮ ﺍﻟﻤﺎﺑﺸﻢ ﻓﻴﻚ ﻧﻘﺎﻭﺓ ﺃﻫﻠﻨﺎ
ﻣﻨﻮ ﺍﻟﻤﺎ ﺣﻠﻢ ﺑﻜﺮﺓ ﻳﺘﻠﻢ ﺷﻤﻠﻨﺎ
ﻭﺍﻧﺖ ﺍﻟﺴﻜﻨﺖ ﺍﺣﺘﻤﺎﻻﺕ ﺻﻮﺭﻧﺎ
ﻗﺼﺼﻨﺎ
ﻭﻟﺤﻨﻨﺎ
ﻭ ﻏﻨﺎﻭﻱ ﺍﻟﺤﻘﻴﺒﺔ ....
ﺑﻨﺒﻌﺪ ﻭﻧﻘﺴﻰ ﻭﺑﺘﺤﻠﻒ ﺻﻮﺭ ﻓﻲ ﺍﻟﺨﻴﺎﻝ ﺇﻻ ﺗﺒﻘﻰ
ﻣﺤﻨﺔ ﺩﻣﺎﻱ ﻓﻲ ﻋﺮﻭﻗﻚ ﺑﺘﻨﺘﺢ ﺗﺴﻤﻴﻨﻲ ﻣﻨﻚ ﻭﺍﻗﻮﻝ ﺇﻧﺖ ﺃﻧﻘﻰ
ﻭ ﺍﺟﻴﻚ ﻟﻮﻧﻲ ﺃﺳﻤﺮ ﻭ ﺃﻟﻘﺎﻙ ﺃﺳﻤﺮ ﺃﻧﺎﻭﻟﻚ ﺗﻤﺮﻧﺎ ﻭﺗﻨﺎﻭﻟﻴﻨﻲ ﻣﻨﻘﺎ
ﺗﻘﻮﻝ ﻟﻲ ﺑﺤﺒﻚ ﺃﺭﺩ ﺣﺒﻲ ﺃﻛﺒﺮ ﻭﻣﺸﺘﺎﻕ ﺍﺿﻤﻚ ﻭﺃﺷﻮﻑ ﺷﻮﻗﻚ ﺃﻛﺘﺮ ﻭﺗﻌﻠﻦ ﺩﻣﻮﻉ ﺍﺷﺘﻴﺎﻗﻚ ﻧﺤﻴﺒﺎ .......
ﺑﺸﻮﻑ ﺑﻜﺮﺓ ﺃﺟﻤﻞ ﺇﺫﺍ ﻓﻲ ﻋﻴﻮﻧﻚ ﺗﺮﺍﺀﺕ ﺇﻟﻴﻚ ﺃﻱ ﺫﻛﺮﻯ ﺑﺘﻄﻤﻦ
ﺇﺫﺍ ﻓﻲ ﺧﻴﺎﻟﻚ ﺭﺳﻤﺖ ﺍﺑﺘﺴﺎﻣﺔ ﺑﺘﺨﻔﻒ ﻣﺮﺍﺭﺓ ﺧﻼﻓﻨﺎ ﻭﺗﻬﻮﻥ
ﻭ ﺍﺿﻮﻕ ﻓﻲ ﻣﺴﺎﻣﻚ ﻣﻠﻮﺣﺔ ﺍﻟﻘﺒﺎﻳﻞ ﺍﻟﻤﻦ ﺍﻟﻄﻴﻦ ﺗﺸﻜﻞ ﺻﻮﺭﻧﺎ ﻭﺗﻠﻮﻥ
ﻭﺩﻭﻥ ﺷﻚ ﻋﻴﻮﻧﻚ ﺑﺮﻏﻢ ﺍﻟﻨﻬﺎﻳﺔ ﺑﻘﺖ ﻟﻲ ﺣﺠﺎﻭﻳﻨﺎ ﺳﻤﺤﺔ ﻭ ﺣﺒﻴﺒﺔ ...........
ﻭﺑﺮﺟﻊ ﻭ ﺍﻗﻮﻝ ‏( ﻋﺬﺭﺍ ﺇﻥ ﻗﻮﻟﻲ ﻃﺎﻝ ‏)
ﺗﻌﺎﻟﻲ ﺍﻟﻨﻤﺪ ﺑﻴﻨﺎ ﺳﻜﺔ ﻭﺻﺎﻝ
ﻋﻴﻮﻧﻚ ﺇﺫﺍ ﻓﻲ ﺍﻟﻌﻴﻮﻥ ﺍﺭﺗﺤﺎﻝ
ﺑﻠﻤﻦ ﺷﺘﺎﺕ ﺍﻟﺒﻠﻮﺩ ﺍﻟﺮﺣﻴﺒﺔ .......
# ﻭﺋﺎﻡ _ ﻛﻤﺎﻝ _ ﺍﻟﺪﻳﻦ

نقطة بتفرق
تزرع وسط (الزحمة) (الرحمة) ..
وتقلب (حن) العاشق (جن) ..
وتبني بدال ( البيت) (البين) ..
وتحول (طن) الريد لي (ظن) ..

مرة (تعرب) فيك الكلمة ..
ومرة (تغرب) حرفك يطش ..
(تحني ) غرامك ييزرع وردة ..
و (تجني) عقابا فراقا هش ..
(تحوي) و (تخوي) وقلبك يئن ..

وأصلو (الفاضي ) بيعمل (قاضي) ..
يخلي هزارك يصل (الحد) ويقلب (جد) ..
يرمي (الحب) في أعملق (جب) ..
يمد (للراد) (الزاد) من سم ..
ويسقي (الجوف) (الخوف) بالدن ..

ما نقطة بتفرق
تزرع وسط الزحمة الرحمة وتقلب حن العاشق جن ..

#وئام_كمال_الدين

دوما معا ..
هربي التزام مبهم ..
مثل ارتحالات الطيور اإلى الشمال وهجرها دفء الجنوب ..
هذا أنا ..
أو هكذا قد علمتني كل لحظات الهروب ..

أن ارتحالات الأحبة تصنع الثلج الذي وسمته سمرة بشرتي ..
لكن صدفة موعد بيني وبينك سوف تجعله يذوب.....
أن الدموع الاسفات ذريعة الروح الوحيدة للخلاص من الذنوب ..
حتى ملاك الحب لا يخلو هواه من العيوب ..

ألقاك أمسا أو غدا ..
متوازيات العمر مرجعها لقاءات التقاطع ..
نقطة حيث التلاشي ..
خطة قد أتقنتها خفية كل الدروب ...
ليت المرايا الشاهدات على انعكاسات الخلاف تكف دمع مدينة حبلت بشوق عابر ..
حبلى وملأى بالندوب ..
يا للقلوب ..
قلبي معسكر نازحين فربما عاد الأحبة يطلبون مكانهم أو يطلبون الأمن من فتك الحروب ..

ذاك الغروب مصيره إشراق شمس .. لا الشروق مصيره منا الغروب ..
نشط هو الشوق الذي قد حرك الذكرى الكسولة .. مثلما نشط هو القدر الذي قد خط عمدا قصتي بيد لعوب ..
في الروح شيء من وعاء سابق ..
يومي بذاكرة لأمر قد مضى أو لم يحن ..
تفني وعاء تلو آخر تلو آخر تلو آخر طاقة تأبى النضوب....
و الروح أبدا لن تشيخ ..
جلدي قصاصات الهوى ..
نقش التجاعيد التي كتب الزمان ودونت تاريخ مشوار التحول خطو ظفر ناعم حتى استكان إلى الشحوب .....

ما بين رعشاتي و نبرة صوتك التعبى لفافات القصائد .. والسجائر و اسطوانات لحنجرة طروب ..
نفس المساحة قد عرفناها لغربال يرينا كيف يبقى الحب حيا حين يمضي العمر من بين الثقوب ....
وهنا تأكد دون شك أننا دوما معا ..
أو هكذا قد علمتني كل لحظات الهروب ..
هربي التزام مبهم ..
مثل ارتحالات الطيور إلى الشمال وهجرها دفء الجنوب
هذا أنا ..

#وئام_كمال_الدين ...

وحاة الريدة

وحاة الريدة ما بقدر اقول للريدة تتخفى ..
وحاة الشوق نزفت الشوق ودم أشواقي اتصفا ..
وحاة البيننا اصلو البيننا ما بس لقيا بالصدفة ..
كتبت هواك بي دمي وكتاب الحب نشف جفا ..
لامن انت تبقى بعيد والقى الدمع ما وفى ..
بشيل الصبر كاس ظمأي وبي نار شوقك إتدفا ..
واقول بكرة القريب بلقاك وبكرة يفوت وما ترجع اضوق الصبر من تاني والاقي الدمع ما كفى ..
وحاتك لا بنام الليل ولا طرف الجفن بغفا ..
وحاة دمعي الذرفتو عليك ..
وحاة جفني الطرف رفا ..
بريدك وانت عالم بي وبدلت المحنة جفا ..
لامن انت ترجع لي بيموت حزني وبيتوفى ..
اسالم كفك النادي والاقي عيونك المرفا ..
واحس بالفرحة غامراني وبيتظهر في العيون لهفة ..
واتمتم في الكلام واخجل تموت اطرافي بالرجفة ..
ملامح الريدة ترسمني وأزيد فوق الخجل عفة ..
واخبي الريدة مــــــــــــــــــــــــااا بقدر ..
وحاتك صعبة مابقدر اخلي الريدة تتخفى ..

#وئام_كمال_الدين

منو الخلاك تخش في الجوف تداعب بؤرة الإحساس ..

وتنهيدات بواقي الوحشة ..

والشهقة التجيب الشوق ..

والبسمة التشدها ذكرى إجتاحت سكون البال ........


منو الوراك رطانة النظرة وكتين حبست الأنفاس ..

ولكنات الجلد والرعشة ..

والرجفة و توابع الخوف ..

ولهجات ما بتتغير مع الترحال .........


ومن وين ليك حديث الضحكة ..

كيفن ركبك في لحظة لين الريد وقوة راس ..

تكابر اشتهاك من خش ..

تلتقط إنعكاس الفكرة و(انفاسك) ..

و تتلذذ عناد اللهفة وتصور لسان الحال .......


منو العلم نغم صوتك واناملك وارتداد طرفك (ونسة الروح ) !!!!

ولغة الفن وحب الناس ..

وخلاك في الوريد تتمشى ..

تتصبب عشق في لحظة يرجع لي صدى سكوتك ويملى الجوف عقاب صمتك قصيد ومقال .........

وكيفن في حضورك بنسى صورة الأنثى واتلبس ملامح طفلة بي كراس ..

تلاحق حرفها الطش ..

وتتلاعب مع الروح التوانس في صخب روحك ..
واحاسيسا كتيرة معاك لا بتتعد لا بتنقال .........

وكيف بتشيل ملامحك من هدير أبباي ..

سمار النيل و حس تانا الشجي وحساس ..

ومن الغيم دعاش نقاطك الرش ..

علي الأرض التضج ريدة وتكش شعرة مسام البوح ..

حبيبة من الزمان الفات وباقيهو الطريقو محال ....

#وئام_كمال_الدين ......