ﻋﺎﺭﻑ ﻧﻔﺴﻲ ﺑﻴﻚ ﻭ ﻟﻬﺎﻥ .. ﻭ ﺷﺎﻳﻔﻚ ﻣﻨﻲ ﺑﺘﺒﺎﻋﺪ
ﻭ ﻋﺎﺫﺭﻙ ﺑﺲ ﺑﻠﻮﻡ ﻗﻠﺒﻲ .. ﻭ ﺣﺒﻲ ﺍﻟﻤﻦ ﻃﺮﻑ ﻭﺍﺣﺪ
.............................................
ﻣﺨﻴﺮ ﻗﻠﺒﻲ ﻓﻲ ﺭﻳﺪﻭ ... ﺑﻴﺴﻮﻗﻨﻲ ﻣﻌﺎﻭ ﺷﻤﺎﻝ ﻭ ﻳﻤﻴﻦ
ﻭ ﺑﺘﻌﺬّﺏ ﻣﻊ ﺍﻷﻳﺎﻡ ... ﻭ ﺃﻗﺎﺳﻲ ﺍﻟﻠﻴﻞ ﺩﻣﻮﻉ ﻭ ﺃﻧﻴﻦ
ﻭ ﺩﺍﺋﻤﺎ ﻗﻠﺒﻲ ﻣﺸﻐﻮﻝ ﺑﻴﻚ .. ﻭ ﻗﻠﺒﻚ ﻟﻲ ﺳﻮﺍﻳﺎ ﺭﻫﻴﻦ
ﻭ ﻋﺎﺫﺭﻙ ﺑﺲ ﺗﻮﺭﻳﻨﻲ .. ﺣﻨﻴﻨﻲ ﺇﻟﻴﻚ ﺃﻭﺩﻳﻮ ﻭﻳﻦ؟؟
.....................................................
ﻏﺮﺍﻣﻲ ﺍﻟﻤﻦ ﻃﺮﻑ ﻭﺍﺣﺪ .. ﺑﺮﺍﻱ ﺑﻘﺪﺭ ﺃﻭﺍﺳﻴﻬﻮ
ﻭ ﺃﺟﻔﻒ ﺩﻣﻌﻮ ﺑﺎﻵﻣﺎﻝ .. ﻭ ﺃﺷﻴﻞ ﻣﻦ ﻋﻤﺮﻱ ﻭ ﺃﺩﻳﻬﻮ
ﻭ ﺃﺣﺎﻭﻝ ﺃﻧﺸﻐﻞ ﻋﻨﻚ .. ﺗﺠﻲ ﺍﻟﺬﻛﺮﻯ ﻭ ﺗﺼﺤﻴﻬﻮ
ﺑﻘﻴﺖ ﺑﺎﻟﻬﻢ ﺃﺻﺎﺑﺢ ﺍﻟﺮﻳﺪ .. ﻭ ﺑﺎﻟﺪﻣﻌﺎﺕ ﺃﻣﺴﻴﻬﻮ
.................................................
ﻋﻤﻮﻣﺎ ﺃﺻﻠﻮ ﻣﺎ ﺫﻧﺒﻚ .. ﻭﻻ ﺑﺮﻣﻲ ﺍﻟﻤﻼﻣﺔ ﻋﻠﻴﻚ
ﻛﻔﺎﻳﺔ ﻋﻠﻲ ﺃﺷﻮﻑ ﻃﻴﻔﻚ .. ﻣﺎﺩﺍﻡ ﻣﺎ ﺑﺸﻮﻑ ﻋﻴﻨﻴﻚ
ﻭ ﺃﻗﻮﻝ ﻟﻴﻚ ﻗﻠﺒﻲ ﻳﻮﻡ ﺑﻨﺴﺎﻙ .. ﻭﻻ ﻓﻲ ﻣﺮﺓ ﻳﺮﺟﻊ ﻟﻴﻚ
ﻭﻋﺸﺎﻥ ﻛﻞ ﺍﻟﺠﻤﺎﻝ ﺍﻟﻔﻴﻚ .. ﻓﻲ ﻣﻠﻴﻮﻥ ﺯﻭﻝ ﻣﻌﻠﻖ ﺑﻴﻚ