ﺍﻟﻠﻴﻞ ﻫﺎﺩﻱ ﻭﺍﻟﺠﻮ ﺳﻤﺢ ﻭﻓﺮﺡ ﺑﻌﺪ ﺍﺗﻌﺸﻮﺍ ﺍﺗﻮﻧﺲ ﻣﻊ ﻋﺒﺎﺱ ﺷﻮﻳﺔ ﻭﺭﻗﺪ ﻧﺎﻡ ﻭﻋﺒﺎﺱ ﻣﺎ ﻧﺎﻡ ﻭﻳﻔﻜﺮ ﻓﻲ ﻳﻮﻡ ﺑﺎﻛﺮ ﺍﻭﻝ ﻣﺎ ﻳﺼﻞ ﺍﻟﺴﻮﻕ ﺍﻟﺸﻌﺒﻲ ﻗﺎﻝ ﻳﻔﻮﺕ ﻟﻌﺒﺪ ﺍﻟﻘﻴﻮﻡ ﻓﻲ ﺍﻟﺪﻛﺎﻥ ﻭﻳﺸﺘﻐﻞ ﻣﻌﺎﻫﻮ ﻭﻳﺪﻋﻚ ﺩﻋﻚ ﺻﺎﺡ ﻭﻳﻔﺘﺢ ﻣﺨﻮ ﻛﻮﻳﺲ ﻋﺸﺎﻥ ﻳﺘﻌﻠﻢ ﺍﻟﺸﻐﻠﺔ ﺩﻱ ﺳﺮﻳﻊ ﻭﻳﺤﻔﻆ ﺍﻻﺳﻌﺎﺭ ﻛﻠﻬﺎ ﺳﺮﻳﻊ ﻭﺍﻟﺪﻛﺎﻥ ﻭﺷﻐﻞ ﺍﻟﺪﻛﺎﻥ ﺳﻤﺢ ﻭﺍﺧﻴﺮ ﻣﻦ ﺍﻟﻮﺍﺣﺪ ﻳﻜﻮﻥ ﻃﺎﺑﻲ ﻟﻴﻬﻮ ﻛﺮﺗﻮﻧﺔ ﻭﺍﻟﻴﻮﻡ ﻛﻠﻮ ﻳﺘﺤﺎﻭﻡ ﺑﻴﻬﺎ ﻓﻲ ﺍﻟﺴﺨﺎﻧﺔ ﻭﺣﺮ ﺍﻟﻨﻬﺎﺭ ﺩﺍﻙ ﺟﻤﺐ ﺍﻟﻌﺮﺑﺎﺕ ﻭﺍﻟﻜﺮﺗﻮﻧﺔ ﻣﺘﻌﺒﺔ ﻣﺎ ﺯﻱ ﺍﻟﺪﻛﺎﻥ ﻷﻧﻲ ﺑﻜﻮﻥ ﻻﺑﺲ ﻧﻀﻴﻒ ﻭﻗﺎﻋﺪ ﻟﻲ ﻓﻲ ﺍﻟﻜﺮﺳﻲ ﻭﺍﻟﺪﻛﺎﻥ ﻣﻜﻴﻒ ﻭﺑﺎﺭﺩ ﻣﺎ ﺯﻱ ﺍﻟﺤﻮﺍﻣﺔ ﻭﺍﻟﻤﻜﺎﺑﺴﺔ ﻭﺳﻂ ﺍﻟﺰﺣﻤﺔ ﻭﺍﻟﻌﺮﺑﺎﺕ ﻭﺍﻟﺠﺮﻱ ﻟﻠﺰﺑﺎﻳﻦ .
ﻭﺍﺗﺬﻛﺮ ﺍﻟﺘﺎﺝ
ﻗﺎﻝ ﺑﻐﺸﺎﻫﻮ ﺍﻭﻝ ﻗﺒﺎﻝ ﻳﻤﺶ ﻟﻌﺒﺪ ﺍﻟﻘﻴﻮﻡ ﻋﺸﺎﻥ ﻣﺎ ﻳﺰﻋﻞ ﻣﻨﻲ ﻭﻟﻮ ﺳﺄﻟﻨﻲ ﻣﻦ ﺍﻟﺰﻭﻝ ﺍﻟﺤﻼ ﻟﻲ ﺍﻟﻤﺸﻜﻠﺔ ﺑﻘﻮﻝ ﻟﻴﻬﻮ ﻭﺍﺣﺪ ﻗﺮﻳﺒﻲ ﺑﻌﺮﻑ ﺿﺎﺑﻂ ﻓﻲ ﻣﺪﻧﻲ ﻭﺍﻟﻀﺎﺑﻂ ﻛﻠﻢ ﺿﺎﺑﻂ ﻫﻨﺎ ﺻﺎﺣﺒﻮ ﻭﻫﻮ ﺍﻟﺤﻼﻫﺎ
ﻭﻗﺎﻝ ﺍﺣﺴﻦ ﺣﺎﺟﺔ ﺍﻧﻬﻢ ﻣﺎ ﻋﺎﺭﻓﻨﻲ ﺍﻧﺎ ﺟﻴﺖ ﻭﻗﺎﻋﺪ ﻫﻨﺎ ﻟﻲ ﻛﻢ ﻳﻮﻡ ﻭﺑﻘﻮﻝ ﻟﻴﻬﻮ ﺟﻴﺖ ﺍﻟﻠﻴﻠﺔ ﻭﺑﻌﺮﺑﻴﺔ ﺻﻐﻴﺮﺓ ﻧﺰﻟﺖ ﻣﻨﻬﺎ ﺑﺮﺓ ﺍﻟﺴﻮﻕ ﻭﻟﻮ ﺳﺄﻟﻨﻲ ﻣﻦ ﺍﻟﻀﺎﺑﻂ ﺑﻘﻮﻝ ﻟﻴﻬﻮ ﺍﻧﺎ ﺯﺍﺗﻲ ﻣﺎ ﺑﻌﺮﻓﻮ ﻭﻻ ﺑﻌﺮﻑ ﺍﺳﻤﻮ ﻣﻨﻮ ﻋﺸﺎﻥ ﻣﺎ ﻳﻌﺮﻓﻮ ﻓﺮﺡ ﺩﺍ
ﻭﺳﺎﺏ ﺍﻟﺘﺎﺝ ﻭﻗﻌﺪ ﻳﻔﻜﺮ ﻓﻲ ﺍﻟﻘﺮﻭﺵ ﺍﻻﺩﺍﻫﺎ ﻟﻮﺩ ﺍﻟﻀﻮ ﻓﻲ ﻣﺪﻧﻲ ﻣﻌﻘﻮﻝ ﻳﻜﻮﻥ ﺧﺘﺎﻫﺎ ﻟﻲ ﺍﻟﺘﺎﺝ ؟
ﻻ ﻻ ﻻ ﺍﻟﺘﺎﺝ ﻣﺎ ﺑﺨﺘﻬﺎ ﻻﻧﻬﺎ ﻛﺘﻴﺮﺓ ﻭﻫﻮ ﺑﻠﻤﻠﻢ ﻋﺸﺎﻥ ﻳﻐﻨﻰ ﻭﻏﻴﺮ ﻛﺪﺍ ﺍﻟﺘﺎﺝ ﺟﻠﺪﺓ ﻭﺑﺮﻳﺪ ﺍﻟﻘﺮﻭﺵ ﻭﻣﺎ ﺑﻄﻠﻊ ﻟﻴﻮ ﻗﺮﺵ ﺑﺎﻟﺴﺎﻫﻞ ﻭﺣﺘﻰ ﻋﻠﻲ ﺭﻭﺣﻮ ﻣﺎ ﻗﺎﻋﺪ ﻳﺨﺴﺮ ﻭﻻ ﻣﺴﺘﻤﺘﻊ ﺑﺎﻟﻘﺮﻭﺵ ﺍﻟﻌﻨﺪﻭ ﻭﻣﺮﺍﺕ ﻛﺘﻴﺮﺓ ﺑﻴﺎﻛﻞ ﺳﻨﺪﻭﺗﺸﺎﺕ ﺑﺲ ﻭﻋﺒﺎﺱ ﻣﺮﺓ ﺣﻀﺮ ﻟﻴﻬﻮ ﺷﻜﻠﺔ ﻣﻊ ﻭﺍﺣﺪ ﻭﺍﻛﺎﻧﺖ ﻓﻲ ﻗﺮﻭﺵ ﺑﺴﻴﻄﺔ ﻣﺎ ﺑﺘﺴﺘﺎﻫﻞ
ﻭﻗﺎﻝ ﺍﻟﻘﺮﻭﺵ ﺩﻱ ﺍﻛﻴﺪ ﺧﺘﺎﻫﺎ ﻋﺒﺪ ﺍﻟﻘﻴﻮﻡ ﻭﺍﻟﺘﺎﺝ ﻣﺎ ﺑﺨﺘﻬﺎ ﻟﻲ ﻻﻧﻮ ﻏﻴﺮ ﺍﻧﻮ ﺯﻭﻝ ﺟﻠﺪﺓ ﻣﺎﻓﻲ ﺳﺒﺐ ﺑﺨﻠﻴﻬﻮ ﻳﺪﻳﻨﻲ ﻗﺮﻭﺵ ﻗﺪﺭ ﺩﻱ ﻭﻫﻮ ﺯﺍﺗﻮ ﻗﺮﻭﺷﻮ ﺣﻘﺎﺕ ﺣﺮﺍﻡ ،
ﺑﺲ ﻋﺒﺪ ﺍﻟﻘﻴﻮﻡ ﻳﻮﻡ ﺍﻧﺎ ﻣﺎﺷﻲ ﺟﺎﺏ ﺍﻟﻘﺮﻭﺵ ﻭﺍﺩﺍﻧﻲ ﻟﻴﻬﺎ ﻓﻲ ﻳﺪﻱ ﻭﻣﺎ ﻛﺎﻧﺖ ﻛﺘﻴﺮﺓ ﻛﺪﺍ ﻣﻌﻘﻮﻝ ﻳﻜﻮﻥ ﺧﺘﺎﻫﺎ ﺍﻟﺘﺎﺝ ؟
ﻃﻴﺐ ﻟﺸﻨﻮ ؟ ﻻ ﻻ ﺧﺘﺎﻫﺎ ﺍﻟﺘﺎﺝ ﺍﻛﺎﻥ ﻛﺪﺍ
ﻋﺒﺎﺱ ﻋﻘﻠﻮ ﺷﻐﺎﻝ ﻳﺠﻴﺐ ﻭﻳﻮﺩﻱ ﻭﻳﻜﺘﺐ ﻭﻳﻤﺴﺢ ﻭﻛﻞ ﻣﺮﺓ ﺑﺮﺍﻱ ﻭﻟﻘﺮﻳﺐ ﺍﻟﺴﺎﻋﺔ ﺗﻼﺗﺔ ﻻ ﻧﺎﻡ ﻭﻻ ﻧﻌﺲ
ﺣﺎﺟﺔ ﺍﻟﺴﺖ ﻗﺎﻟﺖ ﻟﺤﺎﺗﻢ ﻭﻟﺪﻫﺎ ﻣﺎ ﺗﺘﻤﺮﺿﻦ ﺁ ﻭﻟﺪﻱ ﻭﻗﻮﻡ ﺍﻣﺶ ﻧﺎﺱ ﺣﺎﺝ ﻋﻠﻲ ﻭﻗﻨﺐ ﻣﻌﺎﻫﻮ ﻭﺍﻋﺘﺬﺭ ﻟﻴﻬﻮ ﻭﻟﻨﻌﻴﻤﺔ ﺑﺘﻮ ﻭﺍﺳﻤﻊ ﻛﻼﻡ ﺣﺎﺝ ﺍﻟﻜﺮﺍﺏ ﺍﻟﻘﺎﻟﻮ ﻟﻴﻚ ﻭﺍﻣﺶ ﺍﺷﺘﻐﻞ ﻣﻌﺎﻫﻮ ﻭﺧﻠﻴﻚ ﻓﺎﻟﺢ ﻭﺑﻄﻞ ﺍﻟﺸﺮﺍﺏ ﻭﺻﻠﻲ ﻭﻣﺎ ﺗﻘﺼﺮ ﻣﻊ ﻋﻤﻚ ﺍﻟﻜﺮﺍﺏ ﺩﺍ ﻓﻲ ﺷﻲ ﻭﺍﻟﺒﻘﻮﻟﻮ ﻟﻴﻚ ﻛﻠﻮ ﺳﻮﻳﻬﻮ ﻻ ﺍﻛﺎﻥ ﻣﺎﻫﻮ ﺍﻛﺎﻥ ﺑﺘﻜﻮﻥ ﻫﺴﻲ ﻓﻲ ﺍﻟﺴﺠﻦ
ﻭﺩ ﺍﻟﺴﺖ ﻗﻌﺪ ﻳﻄﻨﻄﻦ ﻭﻗﺎﻝ ﻟﻴﻬﺎ ﺍﻧﺎ ﺯﺍﺗﻲ ﻣﺎ ﻣﺎﺷﻲ ﻟﻴﻮ ﻭﻓﺎﻳﺖ ﻟﻴﻬﻮ ﻣﻦ ﺍﻟﺤﻠﺔ ﺩﻱ ﻛﻠﻬﺎ ﻭﺗﺎﻧﻲ ﻣﺎ ﺑﺠﻲ ﺭﺍﺟﻊ ﻭﻣﺎ ﺩﺍﻳﺮ ﺷﻐﻠﻮ
_ ﻓﺎﻳﺖ ﻣﺎﺷﻲ ﻭﻳﻦ ؟
_ ﺃﻱ ﻓﺠﺔ ﺍﻥ ﺷﺎﺀ ﺍﻟﻠﻪ ﺍﻟﺴﻤﺎﺀ ﺍﻟﻠﺤﻤﺮ ﺑﺲ ﻣﺎ ﺑﻘﻨﺐ ﻓﻲ ﺍﻟﺤﻠﺔ ﺩﻱ ﺗﺎﻧﻲ ﻭﻻ ﻳﻮﻡ
_ ﺍﻧﺖ ﻗﺎﻳﻞ ﺍﻛﺎﻥ ﻣﺸﻴﺖ ﺑﺎﺭﻳﺖ ﺍﻟﻌﻮﻟﻖ ﺍﻟﺠﻮﺍ ﻣﻌﺎﻙ ﻫﻨﺎ ﺩﻳﻞ ﻭﻗﻌﺪﺕ ﺗﺴﺮﻕ ﻣﻌﺎﻫﻢ ﻭﻗﺒﻀﻮﻙ ﺑﺤﻨﻮ ﻋﻠﻴﻚ ﺯﻱ ﺩﻳﻞ ﻭﺑﻔﻜﻮﻙ ؟
_ ﻻ ﻳﺤﻨﻮﺍ ﻋﻠﻲ ﻭﻻ ﺍﺣﻦ ﻋﻠﻴﻬﻢ ﻭﺍﻧﺎ ﺍﻟﻜﺮﺍﺏ ﺩﺍ ﺯﺍﺗﻲ ﻣﺎ ﺑﺮﻳﺪﻭ ، ﻭﻛﻢ ﻣﺮﺓ ﺩﻗﺎﻧﻲ ﻭﻋﺎﻣﻞ ﻓﻴﻬﺎ ﻭﻻ ﺧﻼﺱ ﻋﺸﺎﻥ ﻋﻨﺪﻭ ﻗﺮﻭﺵ ﻭﻧﺤﻦ ﺍﺑﻮﻧﺎ ﻣﻴﺖ ﻭﻣﺴﺎﻛﻴﻦ
_ ﺩﺍ ﻛﻼﻡ ﺷﻨﻮ ﺩﺍ ﺁ ﻭﻟﺪﻱ ﻭﻫﻮ ﺩﻗﺎﻙ ﺳﺎﻱ ﺑﺮﺍ ﺳﺒﺐ ؟ ﻣﺎ ﻋﺸﺎﻥ ﺳﺮﻗﺘﺎ
_ ﺍﻧﺎ ﻣﺎﺷﻲ ﺍﺷﺘﻐﻞ
_ ﺃﺭﻳﺘﻚ ، ﻭﺍﻟﺸﻐﻞ ﺳﻤﺢ ﻭﺑﺮﺍﻙ ﺷﻔﺖ ﻋﺒﺎﺱ ﻭﺩ ﻧﻌﻴﻤﺔ
_ ﻣﺎﻟﻮ ﻋﺒﺎﺱ ؟
_ ﻓﺎﺕ ﺍﺷﺘﻐﻞ ﻭﺟﺎﺀ ﻣﻼﻥ ﻗﺮﻭﺵ ﺍﻣﺶ ﻟﻴﻮ ﺧﻠﻴﻬﻮ ﻳﺸﻐﻠﻚ ﻣﻌﺎﻭ ﺍﻛﺎﻥ ﻣﺎ ﺩﺍﻳﺮ ﺷﻐﻞ ﺣﺎﺝ ﺍﻟﻜﺮﺍﺏ
_ ﻣﺎ ﺑﻤﺶ ﻟﻴﻬﻮ ﻭﻻ ﺷﻲ ﻭﺍﻧﺎ ﺑﻌﺮﻑ ﺍﺷﺘﻐﻞ ﺷﻨﻮ ﻭﻭﻳﻦ
_ ﻋﻼ ﺍﻛﺎﻥ ﺑﺘﺪﻭﺭ ﺗﻤﺶ ﺗﺴﺮﻕ ﺳﺎﻱ
_ ﻣﺎ ﻓﻲ ﺯﻭﻝ ﻋﻨﺪﻭ ﻗﺮﻭﺵ ﻣﺎ ﺣﺮﺍﻣﻲ ، ﺍﻧﺎ ﺑﻤﺶ ﻭﻛﻠﻬﺎ ﻛﻢ ﺷﻬﺮ ﻭﺑﺠﻲ ﻭﺑﻜﺴﺮ ﺑﻴﻮﺗﻨﺎ ﺩﻳﻞ ﻛﻠﻬﻦ ﻭﺑﺒﻨﻴﻬﻦ ﺍﺣﺴﻦ ﻣﻦ ﺑﻴﺖ ﺍﻟﻜﺮﺍﺏ ﺯﺍﺗﻮ
_ ﺍﻛﺎﻥ ﺑﻘﺮﻭﺵ ﺍﻟﺤﺮﺍﻡ ﻭﻗﺮﻭﺵ ﺍﻟﺴﺮﻗﺔ ﻭﻻ ﺗﺠﻲ ﺍﻟﺤﻠﺔ ﺗﺎﻧﻲ ﻣﺎ ﺑﻨﺪﻭﺭ ﻟﻴﻨﺎ ﻣﻨﻚ ﺷﻲ ﻭﺑﺎﻟﻔﻲ ﻭﺑﺎﻟﻤﺎﻓﻲ ﺑﻨﻌﻴﺶ
_ ﺍﻧﺎ ﺣﻠﻔﺖ ﻓﻲ ﺍﻟﻤﺼﺤﻒ ﺗﺎﻧﻲ ﻣﺎ ﺑﺴﺮﻕ ﻭﻣﻮﺵ ﺍﻟﻘﺮﻭﺵ ﺍﻟﺬﺍﻟﺘﻨﻨﺎ ﺩﻱ ﺑﺠﻴﺒﻬﺎ ﻭﺑﻠﻌﺐ ﺑﻴﻬﻦ ﻟﻌﺐ
_ ﺟﺪ ﻟﻴﻨﺎ ﺍﻛﺎﻥ ﻣﻴﻦ ﺣﻘﺎﺕ ﺣﺮﺍﻡ ﻭﺍﻣﺶ ﺳﺎﻱ ﻋﻠﻲ ﻛﻴﻔﻚ ﻣﻦ ﺑﻜﺮﺓ ﺍﻛﺎﻥ ﻣﺎﺵ
_ ﺳﻤﺢ ﺑﺲ ﺩﺍﻳﺮ ﻟﻲ ﻗﺮﻭﺵ ﺍﻣﺶ ﺑﻴﻬﻦ
_ ﻛﻠﻢ ﺣﺎﺝ ﺍﻟﻜﺮﺍﺏ ﻣﺎ ﺑﻴﺎﺑﻰ ﻟﻴﻚ ﺑﻴﻬﻦ
_ ﺗﺎﻧﻲ ﺍﻟﻜﺮﺍﺏ ؟
ﻭﺩ ﺍﻟﺴﺖ ﻣﺮﻕ ﻭﻓﺎﺕ ﺑﻴﺖ ﻧﺎﺱ ﻋﻤﺮ ﻭﺩ ﺍﻟﻀﻮ ﻭﺩﻗﺎ ﺍﻟﺒﺎﺏ ﺟﺎﻫﻮ ﺍﻟﻌﺒﻴﺪ ﻗﺎﻝ ﻟﻴﻬﻮ ﺟﺎﻱ ﻫﻨﺎ ﻟﺸﻨﻮ ﺁ ﺣﺮﺍﻣﻲ ؟
_ ﺩﺍﻳﺮ ﻋﻤﺮ
_ ﺩﺍﻳﺮ ﺑﻴﻬﻮ ﺷﻨﻮ ﻋﻤﺮ ؟
_ ﺩﺍﻳﺮﻭ ﺳﺎﻱ ﻓﻲ ﻣﻮﺿﻮﻉ ﻧﺎﺩﻳﻮ ﻟﻲ
_ ﻋﻤﺮ ﻣﺎﻓﻲ ﻳﻠﻼ ﻃﻴﺮ ﻣﻦ ﻫﻨﺎ
_ ﺑﻤﺸﻲ ﻭﺑﺠﻴﻬﻮ ﻭﻟﻮ ﺟﺎﺀ ﻗﻮﻝ ﻟﻴﻬﻮ ﻭﺩ ﺍﻟﺴﺖ ﺟﺎﻙ ﻫﻨﻲ
_ ﻣﺎ ﺗﺠﻴﻬﻮ ﻭﻫﻮ ﺯﺍﺗﻮ ﻣﺎ ﺑﺠﻲ ﺍﻟﻠﻴﻠﺔ ﻓﺎﺕ ﺍﻟﺨﺮﻃﻮﻡ . ﺍﻗﻴﻒ ﻫﻨﺎ . ﺩﺍﻳﺮ ﺑﻴﻬﻮ ﺷﻨﻮ ﺍﻧﺖ ﺁ ﻛﻠﺐ ؟
_ ﺧﻼﺱ ﺧﻠﻴﺘﻮ ﻳﺎﺥ
ﺍﻟﻌﺒﻴﺪ ﻣﺴﻚ ﻭﺩ ﺍﻟﺴﺖ ﻭﻗﺒﻘﺒﻮ ﻃﻮﺍﻟﻲ ﻭﻋﺼﺮﻭ ﻋﻠﻲ ﺍﻟﺤﻴﻂ ﻭﻗﺎﻝ ﻟﻴﻮ ﻭﺍﻟﻠﻪ ﺍﻟﻠﻴﻠﺔ ﺁ ﺧﺎﺯﻭﻕ ﻣﺎ ﺗﻮﺭﻳﻨﻲ ﺩﺍﻳﺮ ﺑﻴﻬﻮ ﺷﻨﻮ ﻣﻦ ﻫﻨﺎ ﻣﺎ ﺑﺘﻔﻮﺕ
_ ﻓﻜﻨﻲ ﺁ ﺍﻟﻌﺒﻴﺪ ﻳﺎﺥ ﻭﺍﻧﺎ ﻗﻠﺖ ﻟﻴﻚ ﺧﻼﺱ ﺧﻠﻴﺘﻮ
_ ﻣﺎ ﺑﻔﻜﻚ ﻋﻼ ﺗﻮﺭﻳﻨﻲ ﺟﻴﺖ ﻟﺸﻨﻮ
_ ﺟﻴﺖ ﺩﺍﻳﺮ ﻟﻲ ﻗﺮﻭﺵ
_ ﻛﻀﺎﺏ ﻣﺎ ﺟﻴﺖ ﻋﺸﺎﻥ ﻛﺪﺍ ﺑﺘﻜﻮﻥ ﺟﻴﺖ ﺗﺴﺮﻕ
_ ﺍﻛﺎﻥ ﺩﺍﻳﺮ ﺍﺳﺮﻕ ﺑﺪﻕ ﺍﻟﺒﺎﺏ ؟
_ ﻣﺎ ﺟﻴﺖ ﻟﻘﺮﻭﺵ ﻋﺎﺭﻓﻚ ﺍﻧﺎ . ﺳﻤﺢ ﺩﺍﻳﺮ ﺑﻴﻬﺎ ﺷﻨﻮ ﺍﻟﻘﺮﻭﺵ ﻭﻟﻴﻪ ﻳﺪﻳﻚ ﻟﻴﻬﺎ ﻫﻮ
_ ﻭﺭﻳﺘﻚ ﺍﻟﺠﻴﺖ ﻟﻴﻬﻮ ﻓﻜﻨﻲ ﺧﻠﻴﻨﻲ ﺍﻧﻔﻮﺕ ﺑﻴﺘﻨﺎ
_ ﻳﻠﻼ ﻃﻴﺮ ﻭﻣﺎ ﺍﺷﻮﻓﻚ ﺗﺘﺤﺎﻭﻡ ﺗﺎﻧﻲ ﺟﻤﺐ ﺑﻴﻮﺗﻨﺎ ﺩﻳﻞ
ﻭﺩ ﺍﻟﺴﺖ ﻓﺎﺕ ﻭﺍﻟﻌﺒﻴﺪ ﺩﺧﻞ ، ﺣﺎﺝ ﺍﻟﻀﻮ ﻋﻤﻮ ﻗﺎﻝ ﻟﻴﻬﻮ ﺩﺍ ﻣﻨﻮ ﺍﻟﺠﺎﺀ ﺩﺍ
_ ﺩﺍ ﻭﺩ ﺍﻟﺴﺖ ﺍﻟﺤﺮﺍﻣﻲ
_ ﻣﺎﻟﻮ ﺩﺍﻳﺮ ﺷﻨﻮ ؟
_ ﻗﺎﻝ ﺩﺍﻳﺮ ﻋﻤﺮ ﻳﺪﻳﻬﻮ ﻗﺮﻭﺵ ، ﺍﻇﻨﻮ ﻣﺎ ﻋﻨﺪﻭ ﺣﻖ ﺍﻟﻌﺮﻗﻲ ﺍﻟﻜﻠﺐ
_ ﺍﻣﻜﻦ ﻣﺎ ﺩﺍﻳﺮ ﻳﺴﻜﺮ ﺑﻴﻬﻦ ﻭﺍﻣﻜﻦ ﻣﺤﺘﺎﺟﻴﻦ ﻟﻴﻬﻦ ﻓﻲ ﺍﻟﺒﻴﺖ . ﻣﺎ ﻗﺎﻝ ﻟﻴﻚ ﻛﻤﻬﻦ ؟
_ ﻣﺎ ﻗﺎﻝ ﻟﻲ ﻭﻓﻲ ﺍﻟﻠﻮﻝ ﻣﺎ ﻭﺭﺍﻧﻲ ﺍﻧﻮ ﺟﺎﺀ ﺩﺍﻳﺮ ﻗﺮﻭﺵ ﻟﻤﻦ ﺍﻧﺎ ﺧﻨﻘﺘﻮ ﺣﺘﻴﻦ ﻗﺎﻝ
_ ﺧﺎﻧﻘﻮ ﻣﺎﻟﻚ ؟ ﻻ ﻻ ﺍﻛﺎﻥ ﻛﺪﻱ ﻣﺎ ﺩﺍﻳﺮ ﻳﺴﻜﺮ ﺑﻴﻬﻦ
_ ﻫﺎ ﺩﺍ ﻋﻮﻻﻕ ﻭﺭﻣﺔ ﺳﺎﻱ ﺁ ﺣﺎﺝ ﻣﺎ ﺗﺸﺘﻐﻞ ﺑﻴﻬﻮ
ﻭﺩ ﺍﻟﺴﺖ ﻣﺎ ﻓﺎﺕ ﺍﻟﺒﻴﺖ ﻭﻣﺸﻰ ﻟﺤﺎﺝ ﺍﺑﺮﺍﻫﻴﻢ ﻭﻗﺒﺎﻝ ﻳﺪﻕ ﺍﻟﺒﺎﺏ ﺷﺎﻓﻮ ﺍﻟﻔﻀﻞ ﺍﻟﺴﺠﻤﺎﻥ ﻭﺍﻛﺎﻥ ﻗﺎﻋﺪ ﺟﻤﺐ ﺍﻟﺒﺎﺏ ﺣﻘﻬﻢ ﻭﺳﻜﺮﺍﻥ ﻟﻂ ﻭﻧﺎﻏﻢ ﻟﻴﻬﻮ
_ ﺗﻌﺎﻝ ﺗﻌﺎﻝ ﺁ ﻭﺩ ﺍﻟﺴﺖ ، ﺍﻟﻠﻴﻠﺔ ﺍﻟﺠﺎﺑﻚ ﻓﺮﻳﻘﻨﺎ ﺩﺍ ﺷﻨﻮ ﺑﺎﻟﻠﻴﻞ ﻛﺪﺍ ﺍﻟﻨﻌﻠﻚ ﺩﺍﺭ ﺗﺴﺮﻕ ؟
ﻭﺩ ﺍﻟﺴﺖ ﻣﺸﻰ ﻟﻴﻬﻮ ﻭﻗﺎﻝ ﻟﻴﻮ ﺟﻴﺖ ﻟﺤﺎﺝ ﺍﺑﺮﺍﻫﻴﻢ ﺩﺍ
_ ﺩﺍﻳﺮ ﺑﻴﻮ ﺷﻨﻮ ﺣﺎﺝ ﺍﺑﺮﺍﻫﻴﻢ ﺩﺍ ؟
_ ﺩﺍﻳﺮﻭ ﻓﻲ ﻣﻮﺿﻮﻉ
ﺍﻟﻔﻀﻞ ﻗﻌﺪ ﻳﻀﺤﻚ ﻭﻳﻘﻌﻘﻊ ﺑﺼﻮﺕ ﻋﺎﻟﻲ ﻭﻗﺎﻝ ﻟﻴﻮ ﻭﺍﻟﻠﻪ ﺿﺤﻜﺘﻨﻲ ﺁ ﺍﻟﺴﺎﻳﺐ
_ ﻗﻠﺖ ﺷﻨﻮ ﺍﻧﺎ ﻫﺴﻲ ﺑﻀﺤﻜﻚ ﻛﺪﺍ ؟
_ ﻗﻠﺖ ﺩﺍﻳﺮﻭ ﻓﻲ ﻣﻮﺿﻮﻉ
_ ﻫﺴﻲ ﺩﻱ ﺑﺘﻀﺤﻚ ﻛﺪﺍ ؟
_ ﺁﻱ ﺑﺘﻀﺤﻚ ، ﺍﻛﺎﻥ ﻣﺎ ﺑﺘﻀﺤﻚ ﺍﻧﺎ ﺑﻀﺤﻚ ؟
_ ﻣﺎ ﺑﺘﻀﺤﻚ ﻭﻻ ﺷﻲ
_ ﺑﺘﻀﺤﻚ ﻻﻧﻲ ﻋﺎﺭﻓﻚ ﻣﺎ ﻋﻨﺪﻙ ﻣﻮﺿﻮﻉ ﻋﺸﺎﻥ ﻛﺪﻱ ﺿﺤﻜﺘﺎ ﻭﺟﺒﺘﻮ ﻣﻦ ﻭﻳﻦ ﺍﻧﺖ ﺍﻟﻤﻮﺿﻮﻉ ﺩﺍ
ﻭﺗﺎﻧﻲ ﻗﻌﺪ ﻳﻀﺤﻚ ﻭﻳﻘﻌﻘﻊ ﻟﻤﻦ ﺩﻣﻮﻋﻮ ﺟﺮﺕ ﻭﻗﺎﻝ ﻟﻮﺩ ﺍﻟﺴﺖ ﺍﻟﻠﻪ ﻳﻘﻄﻌﻚ ﺁ ﺍﻟﺤﺮﺍﻣﻲ ﺍﻟﻠﺺ ﻭﺍﻟﻠﻪ ﺿﺤﻜﺘﻨﻲ ﻭﺍﻧﺎ ﺳﻜﺮﺍﻥ ، ﺧﺶ ﺍﻻﻭﺿﺔ ﺟﻮﺓ ﺁ ﺍﻟﺴﺠﻤﺎﻥ ﻭﺟﻴﺐ ﺍﻟﻘﺰﺍﺯﺓ ﻭﺗﻌﺎﻝ ﻭﺍﺗﺴﺠﻢ ﻣﻌﺎﻱ ﻭﺍﻣﻼ ﺭﺍﺳﻚ ﺍﻟﻤﻄﺮﻃﺶ ﺩﺍ ﻭﺍﻋﻤﻞ ﻟﻴﻚ ﻣﻮﺿﻮﻉ
_ ﺑﻤﺶ ﻟﺤﺎﺝ ﺍﺑﺮﺍﻫﻴﻢ ﻭﺑﺠﻴﻚ
_ ﺟﻴﺐ ﺍﻟﻘﺰﺍﺯﺓ ﻭﺻﻠﺢ ﺭﻭﻳﺴﻚ ﻓﻲ ﺍﻟﻠﻮﻝ ﻋﺸﺎﻥ ﺗﻌﺮﻑ ﺗﻘﻌﺪ ﻟﻴﻬﻮ ﺍﻟﻤﻮﺿﻮﻉ
_ ﺑﻨﺘﻬﻲ ﻣﻦ ﻣﻮﺿﻮﻋﻲ ﻣﻌﺎﻫﻮ ﺳﺮﻳﻊ ﻭﺑﺠﻴﻚ
_ ﺧﻼﺱ ﺍﻣﺶ ﻭﺗﻌﺎﻝ ﺳﺮﻳﻊ ﻣﺎ ﺗﺘﺄﺧﺮ ﺍﻧﺎ ﺑﺴﺘﻨﺎﻙ ﻓﻲ ﻓﺠﺘﻲ ﺩﻱ
_ ﺳﻤﺢ
ﻛﻮﻛﻮ ﺩﻕ ﺍﻟﺒﺎﺏ ﻭﺑﻌﺪ ﻣﺴﺎﻓﺔ ﺟﺎﻫﻮ ﻋﺒﺪﻭ ﻭﺍﺳﺘﻐﺮﺏ ﻟﻤﻦ ﻟﻘﺎﻫﻮ ﺩﺍ ﻭﺩ ﺍﻟﺴﺖ ﻭﺍﻛﺎﻥ ﺑﻜﺮﻫﻮ ﻋﻤﻰ ﻭﻻ ﺳﻼﻡ ﻣﺎ ﻗﺎﻟﻮ ﻟﻴﻬﻮ ﺍﻭﻝ ﻛﻠﻤﺔ ﻭﺻﺎﺭﻱ ﻟﻴﻬﻮ ﻭﺷﻮ ﺷﺪﻳﺪ : ﺩﺍﻳﺮ ﺷﻨﻮ ﻫﺎ ؟
ﻭﺩ ﺍﻟﺴﺖ ﻣﻦ ﺯﻣﺎﻥ ﺍﺻﻠﻮ ﻣﺎ ﻓﻲ ﺯﻭﻝ ﺑﺪﻳﻬﻮ ﻛﻼﻡ ﺳﻤﺢ ﻭﺍﻟﻨﺎﺱ ﻛﻠﻬﻢ ﻣﻜﺠﻨﻨﻮ ﻭﻣﺎ ﺑﺮﻳﺪﻭﻫﻮ ﻷﻧﻮ ﻣﻦ ﺳﻌﺘﻮ ﺍﻟﺼﻐﻴﺮ ﻫﺎﻣﻞ ﻭﻣﻄﻠﻮﻕ ﻭﺣﺮﺍﻣﻲ ﻭﻣﺪﻣﺮ ﻭﻏﻴﺮ ﺍﻟﺴﻜﺮ ﻭﺍﻟﺴﺮﻗﺔ ﻣﺎ ﻓﻲ ﺯﻭﻝ ﻋﺎﺭﻑ ﻟﻴﻬﻮ ﺷﻲ ﻭﻻ ﻓﻲ ﺯﻭﻝ ﺷﺎﻑ ﻣﻨﻮ ﺧﻴﺮ ﻭﻧﻬﺎﺋﻲ ﻣﺎ ﻓﻲ ﺯﻭﻝ ﺑﺪﻭﺭﻭ
_ ﺍﻟﺴﻼﻡ ﻋﻠﻴﻜﻢ
_ ﻳﺴﻞ ﻧﻔﺴﻚ ، ﺩﺍﻳﺮ ﺷﻨﻮ ﻗﻮﻝ ﺳﺮﻳﻊ
_ ﺩﺍﻳﺮ ﻋﻤﻲ ﺣﺎﺝ ﺍﺑﺮﺍﻫﻴﻢ
_ ﻃﻴﺮ ﻣﻦ ﻫﻨﺎ ﺑﺮﺍ ﻋﻤﻲ ﺣﺎﺝ ﺍﺑﺮﺍﻫﻴﻢ ﻭﺃﻭﻋﻚ ﺗﺠﻲ ﻫﻨﺎ ﺗﺎﻧﻲ . ﺳﺎﻣﻊ ؟
_ ﺣﺎﺿﺮ
ﻋﺒﺪﻭ ﺩﺧﻞ ﻭﻛﻮﻭﻭﻭ ﻗﻔﻞ ﺍﻟﺒﺎﺏ ﻗﻮﻭﻭﻭﻱ ﻭﻭﺩ ﺍﻟﺴﺖ ﺭﺟﻊ ﻭﺗﺎﻧﻲ ﺍﻟﺴﺠﻤﺎﻥ ﻧﺎﻏﻢ ﻟﻴﻬﻮ ﻭﻳﻀﺤﻚ ﻗﺎﻝ ﻟﻴﻬﻮ ﺗﻌﺎﻝ ﺧﺶ ﺟﻴﺐ ﺍﻟﻘﺰﺍﺯﺓ ﺳﺎﻱ ﺍﻟﺪﻧﻴﺎ ﺩﻱ ﻏﻴﺮ ﺗﺸﻠﺘﻚ ﻣﺎ ﺑﺘﺸﻮﻑ ﻓﻴﻬﺎ ﺷﻲ ﻋﺸﺎﻥ ﻛﺪﺍ ﻋﺒﻲ ﻓﻴﻬﺎ ﺭﺍﺳﻚ ﻭﺍﻧﺴﻰ
ﻭﺩ ﺍﻟﺴﺖ ﺍﻟﺴﺠﻤﺎﻥ ﺍﻟﺸﻴﻄﺎﻥ ﻳﺠﺮﻭﺍ ﻓﻴﻬﻮ ﺟﺮ ﻋﻠﻲ ﺍﻟﺴﻜﺮ ﻭﺍﻟﻨﺎﺱ ﻣﻜﺠﻨﻨﻮ ﻭﺷﺎﻑ ﻛﻼﻡ ﺍﻟﻔﻀﻞ ﺻﺎﺡ ﻭﺍﻟﺸﻴﻄﺎﻥ ﻗﺎﻝ ﻟﻴﻮ ﺍﺣﺴﻦ ﺣﺎﺟﺔ ﺗﺸﺮﺏ ﻭﺗﻤﻼ ﺭﺍﺳﻚ ﺩﺍ ﻟﻤﻦ ﻣﺎ ﺗﺨﻠﻲ ﻓﻴﻬﻮ ﺍﻱ ﻓﺮﻗﺔ ﻭﺍﻟﺮﻫﻴﻔﺔ ﺍﻝ ﺗﻨﻘﺪ
ﻭﻣﺸﻰ ﻟﻠﺴﺠﻤﺎﻥ ﻭﻗﺒﺎﻝ ﻳﺨﺶ ﻳﺠﻴﺐ ﺍﻟﻘﺰﺍﺯﺓ ﻗﺎﻝ ﻳﻘﻌﺪ ﻳﻨﻀﻢ ﻣﻌﺎﻫﻮ ﺷﻮﻳﺔ ﻷﻧﻮ ﺍﻛﺎﻥ ﻣﺘﺮﺩﺩ ﺑﻴﻦ ﻳﺸﺮﺏ ﻭﻣﺎ ﻳﺸﺮﺏ
ﺍﻟﺴﺎﻋﺔ ﺩﻳﻚ ﻟﻤﻦ ﻋﺒﺪﻭ ﻗﻔﻞ ﺍﻟﺒﺎﺏ ﻗﻮﻱ ﻭﺍﻛﺎﻥ ﺯﻋﻼﻥ ﺍﺑﻮﻫﻮ ﺍﻧﺨﻠﻊ ﻭﺷﺎﻓﻮ ﺻﺎﺭﻱ ﻭﺷﻮ ﻗﺎﻝ ﻟﻴﻬﻮ ﺩﺍ ﻣﻨﻮ ﻭﻣﺎﻟﻚ ﻗﻔﻠﺖ ﺍﻟﺒﺎﺏ ﺩﺍ ﻛﺪﻱ ؟
_ ﺩﺍ ﺍﻟﺤﻴﻮﺍﻥ ﺍﻟﺤﺮﺍﻣﻲ ﻭﺩ ﺍﻟﺴﺖ
_ ﻣﺎﻟﻮ ﻭﺍﻟﺠﺎﺑﻮ ﺷﻨﻮ ؟
_ ﺟﺎﺀ ﻟﻴﻚ ﺍﻧﺖ ﻭﺍﻧﺎ ﻃﺮﺩﺗﻮ
_ ﺍﻛﺎﻥ ﺗﺴﻌﻠﻮ ﺩﺍﻳﺮﻧﻲ ﻓﻲ ﺷﻨﻮ
_ ﻣﺎ ﺳﻌﻠﺘﻮ ﻭﻃﺮﺩﺗﻮ ﻃﻮﺍﻟﻲ ﺩﺍ ﺟﻨﻰ ﻛﻠﺐ
_ ﻓﺎﺕ ﻭﻳﻦ ﻫﺴﻲ
_ ﻃﺎﺭ ﻋﻠﻲ ﺍﻫﻠﻮ ﻭﺷﺎﻳﻒ ﺍﻟﻔﻀﻞ ﻗﺎﻋﺪ ﺑﺮﺓ ﻭﺳﻤﻌﺘﻮ ﻳﻜﻮﺭﻙ ﻟﻴﻬﻮ ﺑﻜﻮﻥ ﻣﺸﻰ ﻳﺴﻜﺮ ﻣﻌﺎﻫﻮ
ﺣﺎﺝ ﺍﺑﺮﺍﻫﻴﻢ ﻗﺎﻡ ﻭﻣﺮﻕ ﻓﺘﺢ ﺍﻟﺒﺎﺏ ﻭﻟﻘﺎﻫﻮ ﻗﺎﻋﺪ ﻣﻊ ﺍﻟﻔﻀﻞ ﻭﺃﺷﺮ ﻟﻴﻬﻮ ﻭﻭﺩ ﺍﻟﺴﺖ ﻓﺮﺡ ﻭﺟﺎﻫﻮ ﻣﻨﻜﺮﺏ
ﺑﻌﺪ ﺳﻠﻢ ﻋﻠﻴﻬﻮ ﺣﺎﺝ ﺍﺑﺮﺍﻫﻴﻢ ﻗﺎﻝ ﻟﻴﻬﻮ ﺧﺶ ﺗﻌﺎﻝ ﺗﻌﺎﻝ ﺁ ﻭﻟﺪﻱ ﻭﺑﻌﺪ ﻗﻌﺪﻭﺍ ﺟﻮﺓ ﻗﺎﻝ ﻟﻴﻬﻮ ﻋﺒﺪﻭ ﺩﺍ ﺯﻱ ﺍﺧﻮﻙ ﺍﻟﻜﺒﻴﺮ ﻣﺎ ﺗﺰﻋﻞ ﻣﻨﻮ
_ ﻻ ﻻ ﺍﻧﺎ ﻣﺎ ﺯﻋﻼﻥ
_ ﺳﻤﺢ ﻣﺎﻟﻚ ﻓﻲ ﺷﻨﻮ ، ﻭﺍﻣﻚ ﺷﺪﻳﺪﺓ ؟
_ ﺷﺪﻳﺪﺓ ﺍﻟﺤﻤﺪ ﻟﻠﻪ ﻭﺃﻧﺎ ﺁ ﻋﻤﻲ ﻭﺍﻟﻠﻪ ﺗﺒﺖ ﻣﻦ ﺍﻟﺴﻜﺮ ﻭﺗﺎﻧﻲ ﻻ ﺑﺴﻜﺮ ﻭﻻ ﺑﺴﺮﻕ ﻭﻋﺎﺭﻑ ﺭﻭﺣﻲ ﻛﻨﺖ ﻛﻌﺐ ﻭﻏﻠﻄﺎﻥ ﻭﺍﻟﻌﻤﻠﺘﻮ ﻛﻠﻮ ﻛﻌﺐ ﻭﻫﺴﻲ ﺩﺍﻳﺮ ﺍﺳﺎﻓﺮ ﻣﻦ ﺍﻟﺤﻠﺔ ﺩﻱ ﻭﺍﺷﻮﻑ ﻟﻲ ﺷﻐﻞ ﺯﻱ ﺍﻟﻨﺎﺱ
_ ﺍﺣﺴﻦ ﺣﺎﺟﺔ ﻭﻣﺎﻟﻮ ﺍﻟﻜﺮﺍﺏ ﻣﺎ ﺷﻐﻠﻚ ﻣﻌﺎﻫﻮ ﻣﺎ ﻗﺎﻝ ﺑﺸﻐﻠﻚ
_ ﺍﻧﺎ ﺍﻟﻤﺎ ﺩﺍﻳﺮ ﺍﺷﺘﻐﻞ ﻣﻌﺎﻫﻮ ﻭﺍﻛﺎﻥ ﻗﻌﺪﺕ ﻫﻨﺎ ﺗﺎﻧﻲ ﺑﺮﺟﻊ ﻟﻠﺴﻜﺮ ﻭﺍﻟﺴﺮﻗﺔ
_ ﺳﻤﺢ ﺍﻟﻤﻄﻠﻮﺏ ﻣﻨﻲ ﺷﻨﻮ ﺍﻧﺎ ؟
_ ﺟﻴﺘﻚ ﺩﺍﻳﺮ ﻟﻲ ﻗﺮﻭﺵ ﺍﺳﺎﻓﺮ ﺑﻴﻬﺎ ﻭﺍﻟﻠﻪ ﺣﻖ ﺍﻟﺮﻛﻮﺏ ﻟﻤﺪﻧﻲ ﻣﺎ ﻋﻨﺪﻱ ﻭﺑﻌﺪ ﺍﺷﺘﻐﻞ ﻭﺍﺟﻲ ﺑﺮﺟﻌﻦ ﻟﻴﻚ
_ ﺑﺘﺪﻭﺭ ﻛﻢ ﺁ ﻭﻟﺪﻱ ﻭﺍﻟﺒﻜﻔﻴﻚ ﻛﻢ ؟
_ ﺃﻱ ﺣﺎﺟﺔ ﺑﺲ ﺍﺳﺎﻓﺮ ﺑﻴﻬﺎ
_ ﺍﻧﺎ ﺑﺪﻳﻚ ﻟﻴﻬﻦ ﺑﺲ ﻣﺎ ﺩﻳﻦ ﻟﻲ ﺍﻟﻠﻪ ﺳﺎﻛﺖ ﻭﺍﻧﺖ ﺯﻱ ﻭﻟﺪﻱ ﻣﺎ ﻓﻲ ﺯﻭﻝ ﺑﺘﺪﻳﻦ ﻣﻦ ﺍﺑﻮﻫﻮ . ﻭﺍﺑﻮﻙ ﺍﻟﻠﻪ ﻳﺮﺣﻤﻮ ﻛﺎﻥ ﺯﻭﻝ ﻣﺎ ﺳﺎﻫﻞ ﻭﺩﺍﻳﺮﻙ ﺗﺒﻘﻰ ﻓﺎﻟﺢ ﺯﻳﻮ ﻭﺍﻣﺴﻚ ﻣﺸﻬﺎﺩﻙ ﻭﺍﻧﻔﻊ ﺍﻣﻚ ﻭﺍﺧﻮﺍﻧﻚ ﺩﻳﻞ ﻭﺍﻟﺪﺭﺏ ﺍﻟﺒﻄﺎﻝ ﻏﻴﺮ ﻳﻮﺩﺭﻙ ﻣﺎ ﺑﻘﺪﻣﻚ ﻭﺍﻧﺎ ﻋﺪﻧﻲ ﺯﻱ ﺍﺑﻮﻙ ﺁ ﻭﻟﺪﻱ ﻭﻗﺼﺮﻧﺎ ﻛﺘﻴﺮ ﻓﻲ ﺣﻘﻜﻢ ﺍﻧﺖ ﻭﺃﻣﻚ ﺍﻋﻔﻮﺍ ﻟﻴﻨﺎ
ﻭﺩ ﺍﻟﺴﺖ ﺳﻜﺖ ﻣﺴﺎﺍﺍﺍﻓﺔ ﻭﻣﺎ ﻃﻮﻳﻠﺔ ﻟﻜﻦ ﻣﺎ ﻗﺼﻴﺮﺓ ﻭﻣﺤﻨﺒﻚ ﺗﺐ ﻭﻣﺰﺭﺯﺭ ﻭﻗﻌﺪ ﻳﺼﺎﺭﻉ ﻓﻲ ﺭﻭﺣﻮ ﻭﺍﻟﺒﻜﻴﺔ ﻗﺪﺭ ﻣﺎ ﺣﺎﻭﻝ ﻳﺘﺠﻠﺪ ﻭﻳﻤﺴﻜﻬﺎ ﻏﻠﺒﺘﻮ ﻭﻣﺮﻗﺖ ﻣﻨﻮ ﻏﺼﺐ ﻭﻣﺘﻠﻔﺖ ﻛﺪﺍ ﻣﻦ ﺣﺎﺝ ﺍﺑﺮﺍﻫﻴﻢ ﻭﺍﻟﺪﻣﻮﻉ ﺗﺘﺮﺏ ﺗﺘﺮﺏ ﻧﺰﻟﺖ ﻭﺍﻟﻌﺒﺮﺓ ﺳﺎﺩﺓ ﺣﻠﻘﻮ ﺑﺲ ﺍﻟﻠﻮﺯ ﺍﻟﻤﻠﺘﻬﺒﺔ ﻭﺭﻳﻘﻮ ﻣﺎ ﻗﺪﺭ ﻳﺒﻠﻌﻮ
ﺣﺎﺝ ﺍﺑﺮﺍﻫﻴﻢ ﻋﺮﻓﻮ ﻭﻛﻠﻤﺔ ﻣﺎ ﻗﺎﻟﻬﺎ ﻟﻴﻬﻮ ﺗﺎﻧﻲ ﻭﻗﺎﻡ ﺩﺧﻞ ﺍﻻﻭﺿﺔ ﺷﺎﻝ ﻣﻨﻬﺎ ﻗﺮﻭﺵ ﻭﻣﺸﻰ ﻟﻌﺒﺪﻭ ﺑﻬﻨﺎﻙ ﻭﻧﻀﻢ ﻣﻌﺎﻭ ﻣﺴﺎﻓﺔ ﻭﺷﺎﻝ ﻣﻨﻮ ﺑﺮﺿﻮ ﻗﺮﻭﺵ ﻭﺍﻛﺎﻧﺖ ﻛﺘﻴﺮﺓ ﻣﻲ ﺷﻮﻳﺔ ﻭﺟﺎﺀ ﺍﺩﺍﻫﺎ ﻟﻮﺩ ﺍﻟﺴﺖ