ﺍﻟﻜﻼﻡ ﺩﺍ ﻣﺎ ﺻﺎﺡ ﺁ ﻧﺎﺱ ﻭﺧﻼﺱ ﺗﺎﻧﻲ ﻣﺎ ﺗﺪﻭﻗﻬﻢ ﻛﻔﺎﻫﻢ ﻭﺍﻧﺖ ﺁ ﺍﻟﻜﺮﺍﺏ ﺷﻴﻞ ﺍﻟﺴﻮﻁ ﻫﻴﻠﻚ ﺩﺍ ﻭﺩﻗﻬﻢ ﻫﺴﻲ ﻭﻋﺰ ﺣﻠﻴﻔﺘﻚ ﻭﺳﻮﻗﻮﻫﻢ ﻭﺩﻭﻫﻢ ﻣﻦ ﻫﺴﻲ ﺩﻱ ﺍﻟﺒﺎﻅ ﻭﺍﺭﺑﻄﻮﻫﻢ ﻓﻮﻗﻮ ﻟﻠﺼﺒﺎﺡ ﻭﻳﻘﻨﺒﻮﺍ ﻣﻌﺎﻫﻢ ﻛﻢ ﻭﺍﺣﺪ ﻣﻨﻜﻢ ﻳﺤﺮﺳﻮﻫﻢ ﻋﺸﺎﻥ ﺑﺎﻛﺮ ﺗﺴﻠﻤﻮﻫﻦ ﺍﻟﺒﻮﻟﻴﺲ
ﺩﺍ ﻛﻼﻡ ﺣﺎﺝ ﺍﺑﺮﺍﻫﻴﻢ
ﻟﻜﻦ ﻣﺎ ﻓﻲ ﺯﻭﻝ ﻓﻴﻬﻢ ﺭﺿﻰ ﺑﻴﻬﻮ ﺍﻻ ﻭﺩ ﺍﻟﻀﻮ ﻭﺍﻟﺤﻜﻴﻢ
ﻭﺍﻟﻜﺮﺍﺏ ﺍﺗﻀﺎﻳﻖ ﻣﻦ ﻛﻼﻡ ﺣﺎﺝ ﺍﺑﺮﺍﻫﻴﻢ ﺩﺍ ﺑﺎﻟﺤﻴﻞ ﻭﻗﺎﻝ ﻟﻴﻬﻮ ﺭﺍﻳﻚ ﺩﺍ ﻣﺎ ﺳﻤﺢ ﺁ ﺣﺎﺝ ﻭﺍﻧﺎ ﻭﺍﻟﻠﻪ ﺍﻛﺎﻥ ﻗﻠﺖ ﻟﻴﻜﻢ ﺑﺨﻠﻴﻜﻢ ﺗﺴﻠﻤﻮﻫﻦ ﺍﻟﺒﻮﻟﻴﺲ ﺑﺤﻼﺗﻦ ﺩﻱ ﻛﺪﻱ ﺍﻛﻮﻥ ﻛﻀﺒﺖ ﻋﻠﻴﻜﻢ ﻻﺯﻡ ﻳﺘﺄﺩﺑﻮﺍ ﻓﻲ ﺍﻟﻠﻮﻝ ﺍﻻﺩﺏ ﺍﻟﺼﺎﺡ
ﺍﻟﻌﺒﻴﺪ ﻗﺎﻝ ﻭﺍﻟﻠﻪ ﻟﻮ ﺑﺘﺪﻭﺭﻱ ﺭﺍﻳﻲ ﺍﻧﺎ ﺍﻟﻤﻴﺠﺮ ﺑﺲ
_ ﻣﻴﺠﺮ ﺷﻨﻮ ﺁ ﺍﻟﻌﺒﻴﺪ
_ ﻧﻐﺮﻗﻦ ﺍﻟﺘﻼﺗﺔ ﺑﻲ ﻭﺩ ﺍﻟﺴﺖ ﺍﻟﻤﻌﻮﻟﻖ ﺩﺍ ﻭﻧﻨﺘﻬﻲ ﻣﻨﻬﻢ ﻻ ﺑﻮﻟﻴﺲ ﻻ ﺷﻐﻠﺔ ﻓﺎﺿﻴﺔ
ﺣﺎﺝ ﺍﺑﺮﺍﻫﻴﻢ ﻗﺎﻝ ﻟﻴﻬﻮ ﺍﺳﺘﻐﻔﺮ ﺍﻟﻠﻪ ﺁ ﺍﻟﻌﺒﻴﺪ ﺁ ﻭﻟﺪﻱ ﺍﻧﺖ ﻗﺎﻳﻞ ﻛﺘﻞ ﺍﻟﺮﻭﺡ ﺩﺍ ﺳﺎﻫﻞ ؟
_ ﻭﺍﻟﻠﻪ ﻣﺎ ﺳﺎﻫﻞ ﻋﺎﺭﻑ ﻟﻜﻦ ﺩﻳﻞ ﺑﺴﺘﺎﻫﻠﻮﻫﻮ
_ ﻓﻲ ﻗﺎﻧﻮﻥ ﻭﻓﻲ ﺑﻮﻟﻴﺲ
_ ﻋﻠﻴﻚ ﺍﻟﻠﻪ ﺁ ﺣﺎﺝ ﺯﻱ ﺍﻟﻌﻮﻟﻖ ﺩﻳﻞ ﺍﻟﺒﺘﻠﺒﻮﺍ ﻋﻠﻲ ﻣﺮﺓ ﻧﺎﻳﻤﺔ ﻓﻲ ﺑﻄﻦ ﺑﻴﺘﻬﺎ ﻭﻳﺮﺑﻄﻮﺍ ﻟﻴﻬﺎ ﻳﺪﻳﻬﺎ ﻭﺧﺸﻤﻬﺎ ﻭﺷﺎﻳﻠﻴﻦ ﻟﻴﻬﺎ ﺍﻟﺴﻜﻴﻦ ﻣﺎ ﺑﺴﺘﺎﻫﻠﻮﺍ ﻳﻜﺘﻠﻮﻫﻢ
_ ﻫﻢ ﻋﻤﻠﻮﺍ ﻛﺪﻱ ؟
_ ﻳﻤﻴﻦ ﻋﻤﻠﻮﻫﻮ ﻭﻋﻤﺮ ﻭﺩ ﻋﻤﻲ ﺍﻟﻀﻮ ﺩﺍ ﺍﻟﺤﻼﻫﺎ ﻭﻧﺤﻦ ﻛﻠﻨﺎ ﺷﺎﻫﺪﻳﻦ ﻭﺩﻗﻴﻘﺔ ﺍﺳﻤﻌﻦ ﺑﺮﺍﻙ ﻋﺸﺎﻥ ﻣﺎ ﺗﻘﻮﻝ ﻛﻀﺒﺖ ﻋﻠﻴﻜﻢ ﻭﺍﻓﺘﺮﻳﺖ ﻋﻠﻴﻬﻢ ﺳﺎﻱ . ﻛﺪﻱ ﺍﺩﻳﻨﻲ ﺍﻟﺴﻮﻁ ﺁ ﻭﺩ ﺍﻟﻜﺮﺍﺏ ﺩﻗﻴﻘﺔ
ﻭﺷﺎﻝ ﺍﻟﺴﻮﻁ ﻭﻣﺤﻂ ﺑﻴﻬﻮ ﺗﻤﺴﺎﺡ ﻭﻗﺎﻝ ﻟﻴﻬﻮ ﻋﻤﻠﺘﻮﺍ ﻛﺪﻱ ﻭﻟﻼ ﻣﺎ ﻋﻤﻠﺘﻮﺍ ﺁ ﺭﻣﺔ ؟
ﻗﺎﻝ ﻟﻴﻬﻮ ﻋﻤﻠﻨﺎ ﻭﺩﺍ ﻭﺩ ﺍﻟﺴﺖ ﺩﺍ ﺍﻟﺠﺎﺑﻨﺎ ﻫﻨﻲ ﻭﻗﺎﻝ ﻟﻴﻨﺎ ﺍﻋﻤﻠﻮﺍ ﻛﺪﻱ
ﺣﺎﺝ ﺍﺑﺮﺍﻫﻴﻢ ﻗﺎﻝ ﻟﻴﻬﻮ ﻭﺍﻟﻠﻪ ﻋﻴﺐ ﺗﺐ ﻭﺩﻭﻫﻢ ﺍﻭﺿﺔ ﺍﻟﺮﻭﺍﻋﻴﺔ ﺳﺎﻱ ﺍﻛﺎﻥ ﻛﺪﻱ ﻭﺍﻧﺎ ﺯﺍﺗﻲ ﻳﺎ ﺍﻟﻜﺮﺍﺏ ﺑﺠﻲ ﺍﺩﻗﻬﻢ ﻣﻌﺎﻙ
ﺍﻟﻌﺒﻴﺪ ﻗﻌﺪ ﻳﻤﺤﻂ ﻓﻴﻬﻢ ﻭﻗﺎﻝ ﻟﻴﻬﻢ ﻗﻮﻣﻮﺍ ﻗﻮﻣﻮﺍ ﺍﻟﻠﻪ ﻳﺎﺯﺍﻛﻢ
ﻭﺳﺎﻗﻮﻫﻢ ﻫﻨﺎﻙ
ﺍﻟﺼﺒﺎﺡ ﻋﺒﺎﺱ ﺻﺤﻰ ﻭﻟﻘﻰ ﻓﺮﺡ ﻣﺎﺭﻕ ﻋﻠﻲ ﺷﻐﻠﻮ ﻗﺎﻝ ﻟﻴﻬﻮ ﺩﻗﻴﻘﺔ ﺍﻧﻤﺮﻕ ﻣﻌﺎﻱ
_ ﺗﻤﺮﻕ ﻣﻌﺎﻱ ﻭﻳﻦ ﺁ ﺯﻭﻝ ؟ ﺍﻧﺎ ﻣﺎﺷﻲ ﺍﻟﺸﻐﻞ
_ ﻭﺍﻧﺎ ﺍﻋﻤﻞ ﺷﻨﻮ ﻃﻴﺐ ؟
_ ﻧﻮﻡ ﺑﺲ ﻟﻤﻦ ﺍﺟﻲ ﺍﻧﺎ ﺑﻌﺪﻳﻦ ﻭﺍﻧﺎ ﻣﺎ ﺑﻄﻮﻝ ﺑﺘﻤﻢ ﻭﺑﺘﺨﺎﺭﺝ
_ ﻧﻤﺸﻲ ﺍﻟﺴﻮﻕ ﺍﻟﺸﻌﺒﻲ ﺑﻌﺪﻳﻦ ؟
_ ﺍﻟﺒﻮﺩﻳﻨﺎ ﻟﻴﻬﻮ ﺷﻨﻮ ؟
_ ﺍﻟﺸﻐﻞ ﻳﺎﺥ ﻭﻋﺸﺎﻥ ﻧﺸﻮﻑ ﻣﻮﺿﻮﻉ ﺍﻟﻌﺴﻜﺮﻱ ﺍﻟﻘﻠﺘﻮ ﻟﻴﻚ
_ ﺩﺍﻙ ﺷﺒﻪ ﺍﻧﺘﻬﻰ ﺍﻭ ﺍﻋﺘﺒﺮﻭ ﺍﻧﺘﻬﻰ
_ ﻛﻴﻒ ؟
_ ﺑﻜﻠﻤﻚ ﺑﻌﺪﻳﻦ ﺑﻌﺪ ﺍﺟﻲ
_ ﺧﻼﺱ ﺍﻧﺎ ﺑﻤﺮﻕ ﺃﻟﻔﻠﻒ ﺷﻮﻳﺔ ﻭﺑﺠﻲ ﺭﺍﺟﻊ
_ ﻟﻔﻠﻒ ﺳﺎﻱ ﺑﺲ ﻣﺎ ﺗﺮﻭﺡ
ﻓﺮﺡ ﻓﺎﺕ ﺍﻟﻤﺮﻛﺰ ﻭﻋﻨﺪﻭ ﺿﺎﺑﻂ ﺯﻣﻴﻠﻮ ﺍﺳﻤﻮ ﺍﻟﺮﺷﻴﺪ ﺍﻛﺎﻥ ﻣﻜﻠﻤﻮ ﺑﻤﻮﺿﻮﻉ ﻋﺒﺎﺱ ﻭﺩﺍﻙ ﺟﻨﻮ ﻭﺟﻦ ﺍﻟﺤﻘﺎﺭﺓ ﻭﺧﺎﺻﺔ ﺣﻘﺎﺭﺓ ﺍﻟﻌﺴﺎﻛﺮ ﺍﻟﺒﻴﺎﻛﻠﻮﺍ ﺍﻟﻘﺮﻭﺵ ﻭﺍﻟﻤﻤﻜﻦ ﻋﺸﺎﻧﻬﺎ ﻳﻌﻤﻠﻮﺍ ﺍﻱ ﺣﺎﺟﺔ ﺯﻱ ﻓﻴﺼﻞ ﻭﻙ ﻭﻙ ﺩﺍ ﻛﺪﺍ ﻭﻗﺎﻝ ﻟﻴﻬﻮ ﻋﺒﺎﺱ ﺟﺎﺀ ﻭﻟﻼ ﻟﺴﺔ ؟
_ ﻋﺒﺎﺱ ﺟﺎﺀ ﻭﻣﻦ ﺍﻣﺲ ﻣﻌﺎﻱ ﻓﻲ ﺍﻟﺒﻴﺖ ﻭﺍﻟﻠﻪ ﻭﻟﺪ ﻣﺴﻜﻴﻦ ﻭﻭﺩ ﺣﻼﻝ ﺧﻼﺱ
_ ﺍﻧﺎ ﺍﻧﺘﻬﻴﺖ ﻟﻴﻬﻮ ﻣﻦ ﻣﺸﻜﻠﺘﻮ ﻣﻦ ﻳﻮﻡ ﻛﻠﻤﺘﻨﻲ ﺩﺍﻙ
_ ﻣﺎ ﻭﺭﻳﺘﻨﻲ ﻣﺎﻟﻚ ؟ ﺍﻫﺎ ﻋﻤﻠﺖ ﺷﻨﻮ ؟
_ ﻣﺸﻴﺖ ﺍﻟﺴﻮﻕ ﺍﻟﺸﻌﺒﻲ ﻭﺳﺄﻟﺖ ﻣﻦ ﺍﻟﻨﺠﻮﻣﻲ ﺍﻟﻘﻠﺘﻮ ﻟﻲ ﺩﺍ ﻭﻟﻘﻴﺘﻮ ﺑﺎﻉ ﺍﻟﻤﺤﻞ ﻭﻗﺎﻋﺪﻳﻦ ﻓﻴﻬﻮ ﻧﻔﺮﻳﻦ ، ﺍﻟﻤﻬﻢ ﺍﻧﺎ ﺑﻤﺼﺎﺩﺭﻱ ﻋﺮﻓﺖ ﺑﻴﺘﻮ ﻭﻳﻦ ﻭﻣﺸﻴﺖ ﺍﻟﺒﺴﻂ ﺍﻟﺸﺎﻣﻞ ﺍﻟﻔﻲ ﺍﻟﻤﺮﻛﺰﻱ ﻃﺒﻌﺎ ﺗﺒﻌﻨﺎ ﻭﺭﺳﻠﺖ ﺍﻟﺸﺒﺎﺏ ﺟﺎﺑﻮﻫﻮ ﻭﺳﺄﻟﻮﻫﻮ ﻣﻦ ﺍﻟﻤﻮﺿﻮﻉ ﻭﺍﻭﻝ ﺣﺎﺟﺔ ﻧﻜﺮ ﻟﻜﻦ ﺍﻭﻝ ﻛﻔﻴﻦ ﺗﻼﺗﺔ ﻣﻦ ﺍﻟﺸﺒﺎﺏ ﺟﺎﺏ ﺁ ﺧﺮﻭ ﺑﺲ ﻧﻜﺮ ﻣﻮﺿﻮﻉ ﻭﻙ ﻭﻙ ﺩﺍ ﻧﻬﺎﺋﻲ ﻭﻗﺎﻝ ﻋﺒﺎﺱ ﺍﻟﻐﻠﻄﺎﻥ ﻋﻠﻴﻬﻮ ﺍﻟﻤﻬﻢ ﺧﻠﻮﻫﻮ ﻳﻮﻗﻊ ﻋﻠﻲ ﺗﻌﻬﺪ ﻭﻓﺎﺕ ﻭﺍﻟﻨﺠﻮﻣﻲ ﺩﺍ ﺯﻭﻝ ﻃﻴﺮﺓ ﺳﺎﻱ ﻳﺎﺥ
_ ﺍﻫﺎ ﻭﻓﻴﺼﻞ ﻭﻙ ﻭﻙ ﺍﻟﻌﺴﻜﺮﻱ ؟
_ ﻻ ﻻ ﺩﺍ ﻛﻤﺎﻥ ﻣﻮﺿﻮﻉ ﺗﺎﻧﻲ ﻭﺍﻧﺎ ﻣﺎ ﻻﻗﻴﺘﻮ ﻟﻜﻦ ﻭﺭﻳﺖ ﺑﻴﻬﻮ ﺻﺎﺣﺒﻚ ﺍﺣﻤﺪ ﻭﺩ ﻣﻨﺎﻉ ﻃﺒﻌﺎ ﻫﻮ ﻣﺪﻳﺮ ﺍﻟﻤﺮﻛﺰ ﺍﻟﺸﻐﺎﻝ ﻓﻴﻬﻮ ﺯﺍﺗﻮ . ﻭﺑﺴﻠﻢ ﻋﻠﻴﻚ ﻭﻗﺎﻝ ﻟﻴﻚ ﻫﺪﻳﻴﻴﻴﻴﻴﻚ ﻟﺤﻤﺔ
ﻭﻗﻌﺪﻭﺍ ﻳﻀﺤﻜﻮﺍ
_ ﻭﺩ ﻣﻨﺎﻉ ﻳﺎ ﺳﻼﺍﺍﺍﺍﻡ ﻳﺎﺥ ﻭﺍﻟﻠﻪ ﻃﻮﻟﺖ ﻣﻨﻮ ﻃﻮﻝ ﺍﻟﻤﺨﻠﻮﻕ ﺩﺍ ﻣﻦ ﻳﻮﻡ ﻣﺸﻴﻨﺎ ﺍﻻﺳﺘﺎﺩ ﺍﻧﺎ ﻭﺍﻧﺖ ﻭﻫﻮ ﺗﺎﻧﻲ ﻣﺎ ﻻﻗﻴﺘﻮ
_ ﻫﺪﻳﻚ ﻟﺤﻤﺔ ﺩﻱ ﻗﺼﺘﻬﺎ ﺷﻨﻮ ﺍﺑﻰ ﻳﻮﺭﻳﻨﻲ ﻟﻴﻬﺎ ﻛﻠﻮ ﻛﻠﻮ ﻭﻗﺎﻝ ﻟﻲ ﺍﺳﻌﻠﻚ ﻣﻨﻬﺎ
_ ﻫﺪﻳﻴﻴﻴﻴﻚ ﻳﺎﺥ ﺟﺮﻫﺎ ﺟﺮﻫﺎ ﻣﺎ ﻫﺪﻳﻚ ﺳﺎﻱ
_ ﺳﻤﺢ ﻫﺪﻳﻴﻴﻴﻴﻴﻴﻴﻴﻚ ﺍﻫﺎ ﻗﺼﺘﻬﺎ ﺷﻨﻮ ؟
_ ﺍﻛﺎﻥ ﻋﻨﺪﻧﺎ ﻣﺄﻣﻮﺭﻳﺔ ﻭﺍﻛﻨﺎ ﺳﺎﻛﻨﻴﻦ ﺳﻮﺍ ﺍﻧﺎ ﻭﻫﻮ ﻃﻴﻔﻮﺭ ﻭﻧﻔﺮﻳﻦ ﺗﺎﻧﻴﻦ ﻭﻫﻮ ﻃﺒﻌﺎ ﻣﺎ ﺑﻌﺮﻑ ﻳﻄﺒﺦ ﻭﻳﻮﻡ ﻛﻠﻨﺎ ﻣﺮﻗﻨﺎ ﻭﺧﻠﻴﻨﺎﻫﻮ ﻗﺎﻋﺪ ﻓﻲ ﺍﻟﺒﻴﺖ ﺑﺮﺍﻫﻮ ﻗﺎﻝ ﻳﻌﻤﻞ ﺣﻠﺔ ﺍﻟﻐﺪﺍﺀ ﻭﻃﻠﻌﺖ ﺣﻠﺔ ﺍﻱ ﻛﻼﻡ ﻭﺍﻟﻤﻮﻳﺔ ﻛﺘﻴﻴﻴﺮﺓ ﻣﺎﻟﻲ ﺑﻴﻬﺎ ﺍﻟﺤﻠﺔ ﻓﻞ ﻭﻟﻤﻦ ﺟﻴﻨﺎ ﻟﻠﻐﺪﺍﺀ ﻭﻓﺘﺤﻨﺎﻫﺎ ﻗﻌﺪﻧﺎ ﻧﻀﺤﻚ ﻋﻠﻴﻬﻮ ﻭﻃﻴﻔﻮﺭ ﻗﺎﻝ ﻟﻴﻬﻮ ﻫﺪﻳﻴﻴﻴﻴﻴﻚ ﻟﺤﻤﺔ ﺍﻧﻤﻠﺺ ﻭﺍﻧﺰﻝ ﺍﻋﻮﻡ ﻟﻴﻬﺎ
ﻭﺍﻻﺗﻨﻴﻦ ﻗﻌﺪﻭﺍ ﻳﻀﺤﻜﻮﺍ
_ ﻭﺑﻘﺖ ﻟﻴﻜﻢ ﺫﻛﺮﻯ
_ ﺑﻘﺖ ﺫﻛﺮﻯ ﻭﻣﺴﻜﻨﺎﻫﺎ ﻟﻴﻬﻮ ﺯﻣﻦ . ﻳﺎﺧﻲ ﺍﻟﺰﻭﻝ ﺩﺍ ﺑﺘﺎﻉ ﻣﺤﻦ . ﻟﻜﻦ ﻭﻙ ﻭﻙ ﻭﻗﻊ ﻣﻌﺎﻫﻮ
_ ﻭﻗﻊ ﻭﻗﻌﺔ ﺣﺎﺭﺓ ﻣﻌﺎﻫﻮ ﻭﻗﺎﻝ ﻧﻬﺎﺋﻲ ﻣﺎ ﺑﺮﻳﺪﻭ ﻭﻛﺎﻳﺲ ﻟﻴﻬﻮ ﻟﺴﺒﺐ ﻣﻌﺎﻫﻮ ﻣﻦ ﺯﻣﺎﻥ . ﻭﺍﻧﺖ ﻗﻮﻝ ﻟﻌﺒﺎﺱ ﺍﻣﺶ ﻋﻠﻲ ﺷﻐﻠﻚ ﺳﺎﻱ ﻣﺎ ﻓﻲ ﺯﻭﻝ ﺑﻘﺮﺏ ﻣﻨﻚ ﻻ ﻭﻙ ﻭﻙ ﻭﻻ ﺍﻟﻨﺠﻮﻣﻲ
_ ﺍﻟﻨﺠﻮﻣﻲ ﻃﺒﻌﺎ ﺻﺎﺣﺐ ﺍﻟﺘﺎﺝ
_ ﺍﻟﺘﺎﺝ ﻣﻨﻮ ؟
_ ﺍﻟﺘﺎﺝ ﺻﺎﺣﺒﻨﺎ ﺑﺘﺎﻉ ﺍﻟﺴﻮﻕ ﺍﻟﺸﻌﺒﻲ ﺗﺘﺬﻛﺮﻭ ؟
_ ﺍﻟﺘﺎﺝ ﺍﺏ ﻛﻔﺘﻴﺮﺓ ؟
_ ﺑﺲ ﻳﺎﻫﻮ ﺯﺍﺗﻮ ﻭﻫﻮ ﺍﻻﺷﺘﺮﻯ ﺍﻟﺪﻛﺎﻥ ﻣﻦ ﺍﻟﻨﺠﻮﻣﻲ
_ ﻳﺎ ﺭﺍﺟﻞ ؟ ﻭﻋﺒﺎﺱ ﺑﻌﺮﻑ ﺍﻟﺘﺎﺝ ﻣﻦ ﻭﻳﻦ ؟
_ ﺑﻌﺮﻓﻮ ﺑﺲ ؟ ﻳﺎﺧﻲ ﺩﺍ ﺍﻟﻮﺣﻴﺪ ﺍﻟﺒﺜﻖ ﻓﻴﻬﻮ ﺍﻟﺘﺎﺝ ﻭﺍﻟﻮﺣﻴﺪ ﺍﻟﺴﻜﻨﻮ ﻣﻌﺎﻫﻮ ﻓﻲ ﺑﻴﺘﻮ
_ ﺳﺎﻛﻦ ﻣﻊ ﺍﻟﺘﺎﺝ ؟
_ ﺍﺭﺭﺭﺭﺭﺑﻌﺔ ﺷﻬﻮﺭ
_ ﺍﻧﺖ ﺟﺎﺩﻱ ؟ ﻛﺪﻱ ﻓﻬﻤﻨﻲ ﺍﻟﻘﺼﺔ
_ ﺍﻓﻬﻤﻚ ﻳﺎ ﺳﻴﺪﻱ ، ﺍﻟﺘﺎﺝ ﺍﺷﺘﺮﻯ ﺍﻟﺪﻛﺎﻥ ﻣﻦ ﺍﻟﻨﺠﻮﻣﻲ
_ ﺩﻱ ﻋﺮﻓﺘﻬﺎ ﻳﺎﺥ ﺍﻧﺎ ﺩﺍﻳﺮ ﺍﻋﺮﻑ ﻋﻼﻗﺔ ﻋﺒﺎﺱ ﺑﺎﻟﺘﺎﺝ ﺷﻨﻮ
_ ﻋﺒﺎﺱ ﺍﻭﻝ ﻣﺎ ﺟﺎﺀ ﺍﻟﺨﺮﻃﻮﻡ ﻣﺎ ﻟﻘﻰ ﺑﻴﺖ ﻭﺍﺻﺤﺎﺑﻮ ﺍﻟﺸﻐﺎﻝ ﻣﻌﺎﻫﻢ ﻣﺎ ﺑﺴﻜﻨﻮﺍ ﻣﻌﺎﻫﻢ ﺍﻻ ﺯﻭﻝ ﻣﻦ ﺣﻠﺘﻬﻢ ﻭﻓﻲ ﻭﺍﺣﺪ ﻣﻨﻬﻢ ﺑﻌﺮﻑ ﺍﻟﺘﺎﺝ ﻭﻣﺸﻰ ﻛﻠﻢ ﻟﻴﻬﻮ ﺍﻟﺘﺎﺝ ﻳﺴﻜﻨﻮ ﻣﻌﺎﻫﻮ ﻭﺍﻟﺘﺎﺝ ﺍﻟﻐﺮﻳﺒﺔ ﻭﺍﻓﻖ ﻭﺳﻜﻨﻮ ﻣﻌﺎﻫﻮ ﻭﻗﻌﺪ ﻣﻌﺎﻭ ﺍﺭﺑﻌﺔ ﺷﻬﻮﺭ
_ ﻃﻴﺐ ﻋﺒﺎﺱ ﻋﻼﻗﺘﻮ ﺷﻨﻮ ﺑﺎﻟﻨﺠﻮﻣﻲ
_ ﺍﻟﺘﺎﺝ ﺍﺷﺘﺮﻯ ﺩﻛﺎﻥ ﺣﻖ ﺍﻟﻨﺠﻮﻣﻲ ﻭﺷﻐﻞ ﻓﻴﻬﻮ ﻋﺒﺎﺱ ﻭﺍﻟﻈﺎﻫﺮ ﻋﺒﺎﺱ ﻭﺍﻟﻨﺠﻮﻣﻲ ﺍﺗﻨﺎﻗﺸﻮﺍ ﻭﺳﺨﻨﻮﺍ ﻣﻊ ﺑﻌﺾ ﻭﻋﺒﺎﺱ ﺩﻗﺎﻫﻮ ﺩﻗﺔ ﺣﺎﺭﺓ ﺷﺪﻳﺪ
_ ﻋﺒﺎﺱ ﺩﺍ ﻗﺪﺭ ﻛﻴﻒ ؟
_ ﺷﺎﻓﻊ ﺳﺎﻱ ﻳﺎﺥ
_ ﺷﺎﻓﻊ ﺷﻨﻮ ﺍﻟﺒﺪﻕ ﺍﻟﻨﺠﻮﻣﻲ ﺍﻧﺖ ﻣﺎ ﺷﻔﺖ ﺍﻟﻨﺠﻮﻣﻲ ؟
_ ﻣﺎ ﺷﻔﺘﻮ ﻟﻜﻦ ﻋﺒﺎﺱ ﺻﻐﻴﺮ ﺷﺪﻳﺪ ﻭﺿﻌﻴﻔﻮﻧﻲ
_ ﻻ ﻻ ﺍﻗﻮﻝ ﻟﻴﻚ ﺣﺎﺟﺔ ﻭﺭﺡ ﺍﻟﺒﻴﺖ ﺍﻧﺎ ﺩﺍﻳﺮ ﺍﺷﻮﻑ ﻋﺒﺎﺱ ﺩﺍ .
_ ﺑﺲ ﺍﻭﻋﻰ ﺗﺠﻴﺐ ﻟﻴﻬﻮ ﺳﻴﺮﺓ ﺍﻟﺘﺎﺝ ﻓﻲ ﺧﺸﻤﻚ ﻭﻻ ﺗﻮﺿﺢ ﻟﻴﻬﻮ ﺍﻧﻚ ﺑﺘﻌﺮﻓﻮ
_ ﻓﺮﺡ ﺍﻧﺖ ﺩﺍﻳﺮ ﺗﻮﺭﻳﻨﻲ ﺷﻐﻠﻲ ﻭﻟﻼ ﺷﻨﻮ ؟ ﻗﻮﻡ ﺍﻋﻤﻞ ﺍﻧﺘﺒﺎﻩ
_ ﺍﻟﻌﻔﻮ ﻳﺎ ﺳﻴﺎﺩﺗﻚ ، ﺑﺲ ﺟﻠﻴﻬﻮ ﺍﻻﻧﺘﺒﺎﻩ ﻳﺎﺥ ﻋﺎﺭﻑ ﺭﺗﺒﺘﻚ ﺍﻋﻠﻰ ﻣﻨﻲ
_ ﺍﻧﺘﺒﺎﺍﺍﺍﻩ ﻗﻠﺖ ﻟﻴﻚ
_ ﺍﻧﺎ ﺑﻌﻤﻠﻮ ﻟﻴﻚ ﺍﻻﻧﺘﺒﺎﻩ ، ﻟﻜﻦ ﺑﻌﺪ ﻧﻤﺸﻲ ﺍﻟﺒﻴﺖ ﺑﺘﺄﺭﻧﺐ ﻭﺑﺪﺭﺷﻚ
_ ﺟﻠﻴﺘﻮ ﺧﻼﺱ ﻭﻳﻠﻼ ﻧﻼﻗﻲ ﻋﺒﺎﺱ ﺍﻟﺴﻜﻦ ﻣﻊ ﺍﻟﺘﺎﺝ ﺩﺍ ﻭﻧﺸﻮﻓﻮ
_ ﻭﺍﻟﻠﻪ ﺍﻧﺎ ﻟﻤﻦ ﻗﺎﺑﻠﺘﻮ ﻓﻲ ﻣﺪﻧﻲ ﻭﻗﺎﻝ ﻟﻲ ﻛﻨﺖ ﺳﺎﻛﻦ ﻣﻊ ﺍﻟﺘﺎﺝ ﻣﺎ ﺻﺪﻗﺘﻮ
_ ﺍﻟﺘﺎﺝ ﺩﺍ ﻧﺤﻦ ﺭﺳﻠﻨﺎ ﻟﻴﻬﻮ ﻭﺩﺳﻴﻨﺎ ﻟﻴﻬﻮ ﻛﻢ ﻧﻔﺮ
_ ﻋﻴﻴﻴﻴﻚ ﻣﺎ ﺩﺍ ﺍﻟﺤﻴﺮﻧﻲ ﺍﻧﺎ ﺯﺍﺗﻮ ﻭﺭﺡ ﺍﻟﺒﻴﺖ .
ﺍﻟﻜﺮﺍﺏ ﺑﻌﺪ ﺍﻟﻔﻄﻮﺭ ﻣﺸﻰ ﺟﻠﺪ ﻭﺩ ﺍﻟﺴﺖ ﻭﺍﺻﺤﺎﺑﻮ ﻟﻤﻦ ﻳﺪﻭ ﻓﺘﺮﺕ ﻭﻭﺭﻣﻬﻢ ﻭﺭﻡ ﺑﺎﻟﺴﻮﻁ ، ﻭﻣﺸﻰ ﻟﻠﺴﺖ ﻓﻲ ﺑﻴﺘﻬﺎ ﻭﻭﺭﺍﻫﺎ ﺑﺎﻟﻌﻤﻠﻮ ﻭﻟﺪﻫﺎ ﻛﻠﻮ ﻭﻟﻘﺎﻫﺎ ﻋﺎﺭﻓﺔ ، ﺍﺻﻼ ﺣﺎﺟﺔ ﺯﻱ ﺩﻱ ﻣﺎ ﺑﺘﻨﺪﺱ ﻗﺎﻝ ﻟﻴﻬﺎ ﻭﻟﺪﻙ ﺩﺍ ﻣﺎ ﺑﺘﻮﺏ
_ ﺍﻟﺸﻜﻮﻯ ﻟﻲ ﺍﻟﻠﻪ ﺁ ﺍﻟﻜﺮﺍﺏ ﺍﺧﻮﻱ ﻭﺍﻧﺎ ﻧﻀﻤﺖ ﻣﻌﺎﻫﻮ ﻟﻤﻦ ﻓﺘﺮﺗﺎ ﻟﻜﻦ ﺍﻟﻮﻟﺪ ﺑﺎﻳﻆ ﻣﻦ ﺻﻐﻴﺮ
_ ﺍﻟﺠﻤﺎﻋﺔ ﻗﺎﻟﻮﺍ ﻳﺴﻠﻤﻮﻫﻦ ﺍﻟﺒﻮﻟﻴﺲ ﻟﻜﻦ ﺍﻧﺎ ﺍﺑﻴﺖ ﻋﺸﺎﻥ ﻭﻟﺪﻙ ﻣﻌﺎﻫﻢ
_ ﺧﻠﻴﻬﻢ ﻳﻮﺩﻭﻫﻮ ﺳﺎﻱ ﺍﻣﻜﻦ ﺍﻟﺴﺠﻦ ﻳﺼﻠﺤﻮ
_ ﻭﺍﻟﻠﻪ ﺍﻛﺎﻥ ﻳﺒﻮﻅ ﻟﻴﻚ ﺯﻳﺎﺩﺓ
_ ﺍﺻﻼ ﺑﺎﻳﻆ
_ ﺍﻧﺎ ﻗﺒﺎﻝ ﻛﺪﻱ ﺩﻗﻴﺘﻮ ﻟﻤﻦ ﻓﺘﺮﺗﺎ ﻭﺷﻐﻠﺘﻮ ﻣﻌﺎﻱ ﻟﻜﻦ ﻗﻨﺐ ﻳﺴﺮﻕ ﻣﻨﻲ ﻭﻣﺎ ﺑﺸﻐﻠﻮ ﻣﻌﺎﻱ ﺗﺎﻧﻲ ﻟﻜﻦ ﻣﺎ ﺑﺨﻠﻴﻬﻢ ﻳﺴﺠﻨﻮﻫﻮ ﻭﺑﺪﻗﻬﻢ ﻛﻢ ﻳﻮﻡ ﻭﺑﻔﻜﻬﻢ
ﺍﻟﻜﺮﺍﺏ ﺭﺟﻊ ﺍﻟﺒﻴﺖ ﻭﺭﺳﻞ ﻭﻟﺪﻭ ﻗﺎﻝ ﻟﻴﻬﻮ ﺍﻣﺶ ﻧﺎﺩﻱ ﻟﻲ ﺍﻟﻌﺒﻴﺪ ﻭﻧﺎﺩﻱ ﻟﻲ ﻣﻌﺎﻫﻮ ﺍﻻﻭﻻﺩ ﺍﻟﻠﻜﺎﻧﻮﺍ ﻣﻌﺎﻛﻢ ﻳﻮﻡ ﻗﺒﻀﺘﻮﺍ ﺍﻟﺤﺮﺍﻣﻴﺔ ﺩﻳﻞ ﻛﻠﻬﻢ