ﻓﻲ ﺍﻟﻄﺮﻳﻖ ﻟﺒﺤﺮﻱ ﻋﺒﺎﺱ ﺍﻛﺎﻧﺖ ﺑﻄﻨﻮ ﻃﺎﺍﺍﺍﺍﻣﺔ ﻭﺍﺣﺴﺎﺱ ﺍﻧﻮ ﺑﻘﻰ ﻻﻓﻲ ﺳﺎﻱ ﻣﻮﺟﻌﻮ ﺷﺪﻳﺪ ﻭﻟﻤﻦ ﻫﻮ ﺟﺎﻱ ﻣﻦ ﺑﺤﺮﻱ ﻗﺒﻴﻞ ﺍﻟﺼﺒﺎﺡ ﺍﻛﺎﻥ ﻣﻼﻥ ﺍﺣﻼﻡ ﻭﺷﻐﻞ ﺍﻟﺪﻛﺎﻥ ﻋﺎﺟﺒﻮ ﺑﺎﻟﺤﻴﻞ ﻣﻊ ﺍﻧﻮ ﻗﻌﺪ ﻓﻮﻗﻮ ﻳﻮﻡ ﻭﺍﺣﺪ ﺑﺲ ﻭﻣﺎ ﺯﺍﺩﻭ ﻟﻜﻦ ﺷﺎﻓﻮ ﺍﺧﻴﺮ ﻣﻦ ﺍﻟﺤﻮﺍﻣﺔ ﻭﺍﻟﺠﺮﻱ ﺑﺎﻟﻜﺮﺗﻮﻧﺔ ﻭﺍﻟﺰﺍﺩ ﺍﻟﻄﻴﻦ ﺑﻠﺔ ﻟﻤﻦ ﺷﺎﻑ ﻋﺒﺪ ﺍﻟﻘﻴﻮﻡ ﺑﻘﻰ ﺯﻭﻝ ﻇﺮﻳﻒ ﻭﻭﺟﻴﻪ ﻭﻣﻬﺘﻢ ﺑﻨﻔﺴﻮ ﻭﺑﻠﺒﺴﻮ ﻭﻣﻠﺺ ﺍﻟﺠﻼﺑﻴﺔ ﻭﺑﻘﻰ ﻳﻠﺒﺲ ﺑﻨﻄﻠﻮﻥ ﻭﻗﻤﻴﺺ ﻭﻧﻀﻴﻒ ﻭﺷﺎﻳﻞ ﻟﻴﻬﻮ ﻣﻨﺪﻳﻞ ﻓﻲ ﺟﻴﺒﻮ ﻭﻗﻠﻢ ﻭﺗﺐ ﻣﺎ ﻳﺎﻫﻮ ﻋﺒﺪ ﺍﻟﻘﻴﻮﻡ ﺍﻟﻌﺮﻳﺒﻲ ﺍﻟﻼﺑﺲ ﺍﻟﺴﺪﻳﺮﻯ ﻭﺍﻟﻌﺮﺭﻕ ﻭﺍﻻﻋﺒﺶ ﺍﻟﺰﻣﺎﻥ ﺩﺍﻙ
ﻋﺒﺎﺱ ﻓﻲ ﺍﻟﺤﺎﻓﻠﺔ ﺳﺎﺭﺡ ﻭﻳﻔﻜﺮ ﺳﺎﻱ ﻭﻗﺎﻝ ﻫﺴﻲ ﺍﻧﺎ ﻣﺎﺷﻲ ﺑﺤﺮﻱ ﻟﺸﻨﻮ ﻣﺎ ﻛﻨﺖ ﻗﺎﻋﺪ ﻓﻴﻬﺎ ﺗﻼﺗﺔ ﻳﻮﻡ ﻭﻋﺪﻳﺘﻬﺎ ﻛﻠﻬﺎ ﺗﺮﻗﺪ ﻭﺗﺒﻄﺢ ﺳﺎﻱ ﺍﻟﻤﻔﺮﻭﺽ ﺍﻧﺎ ﺑﺪﻝ ﺍﻓﻮﺕ ﺑﺤﺮﻱ ﺍﻣﺸﻲ ﻣﻊ ﺣﺴﻦ ﻟﻠﺠﻤﺎﻋﺔ ﺍﻟﻘﺎﻟﻬﻢ ﻟﻲ ﻭﺍﺿﻤﻦ ﺧﺘﺔ ﺭﺍﺳﻲ ﻓﻲ ﺍﻻﻭﻝ ﻭﺍﺭﺟﻊ ﺍﻟﻌﺼﺮ ﻭﻟﻼ ﺑﻜﺮﺓ ﺍﻟﺼﺒﺎﺡ ﺍﻟﺴﻮﻕ ﻭﺍﻋﺒﻲ ﻛﺮﺗﻮﻧﺘﻲ ﻣﻦ ﻃﺒﻠﻴﺔ ﻋﺜﻤﺎﻥ ﻭﺍﺩﻋﻚ ﻳﺎﻫﺎ ﺷﻐﻠﺘﻲ ﺍﻟﺒﻌﺮﻓﻬﺎ ﻣﻦ ﻳﻮﻡ ﺩﺧﻠﺖ ﺍﻟﺨﺮﻃﻮﻡ ﻣﺎ ﺍﺷﺘﻐﻠﺖ ﻟﻲ ﺷﻐﻠﺔ ﻏﻴﺮﻫﺎ ﻭﻫﺴﻲ ﺑﻌﺪ ﺍﺻﻞ ﺑﺤﺮﻱ ﻭﺃﻻﻗﻲ ﻓﺮﺡ ﺍﻗﻮﻝ ﻟﻴﻬﻮ ﺟﻴﺖ ﻟﺸﻨﻮ ﻭﻋﺸﺎﻥ ﺷﻨﻮ ﻭﻫﻮ ﻣﺎ ﻗﺼﺮ ﻣﻌﺎﻱ ﻓﻲ ﺷﻲ ﻭﻣﺸﻜﻠﺘﻲ ﺍﻟﺠﻴﺘﻮ ﻟﻴﻬﺎ ﺣﻼﻫﺎ ﺗﺐ ﻭﻫﻲ ﺍﻟﻠﻜﺎﻧﺖ ﺣﺎﻣﻴﺎﻧﻲ ﺍﻟﺸﻐﻞ ﻭﻫﻲ ﺍﻟﻤﺮﻗﺘﻨﻲ ﻣﻦ ﺍﻟﺪﻛﺎﻥ ﻭﻣﻦ ﺍﻟﺨﺮﻃﻮﻡ ﻭﻛﻠﻮ ﻣﻦ ﺍﻟﻨﺠﻮﻣﻲ ﺍﻟﻌﻮﺍﻟﻴﻖ ﻭﻣﻊ ﺍﻧﻲ ﻣﺘﻜﻴﻒ ﻣﻦ ﺩﻗﺘﻲ ﻟﻴﻬﻮ ﻟﻜﻦ ﻫﺴﻲ ﻧﺪﻣﺖ ﻋﻠﻲ ﺩﻗﺘﻲ ﻟﻴﻬﻮ ﺩﻱ ﻭﻫﻮ ﺍﺻﻼ ﻣﺎ ﻛﺎﻥ ﺩﺍﻳﺮ ﻳﻘﻌﺪ ﻣﻌﺎﻱ ﻭﻋﻨﺪﻭ ﻛﺎﻥ ﻳﻮﻣﻴﻦ ﺗﻼﺗﺔ ﻣﻔﺮﻭﺽ ﺍﻧﺎ ﺍﺗﺤﻤﻠﻮ ﻓﻮﻗﻦ ﻟﻤﻦ ﻳﻄﻴﺮ
ﻋﺒﺎﺱ ﺳﻜﺖ ﻣﺴﺎﺍﺍﺍﻓﺔ
ﻭﻓﺠﺄﺓ ﻏﻴﺮ ﺭﺍﻳﻮ ﻭﺍﺷﺮ ﻟﻠﻜﻤﺴﺎﺭﻱ ﻭﻧﺰﻝ ﻭﻫﻮ ﺯﺍﺗﻮ ﻣﺎ ﻓﺎﺕ ﺑﻌﻴﺪ ﻭﺍﻭﻝ ﻋﺮﺑﻴﺔ ﻣﺎﺷﺔ ﻋﻠﻲ ﺍﻟﺸﻌﺒﻲ ﻭﻗﻔﺖ ﻟﻴﻬﻮ ﻧﻂ ﻓﻴﻬﺎ ﻭﻭﺻﻞ ﺍﻟﺸﻌﺒﻲ ﻭﻣﺸﻰ ﻟﺤﺴﻦ ﺭﺍﺳﻮ ﻋﺪﻳﻞ ﻭﻗﺎﻝ ﻟﻴﻬﻮ ﺍﻟﺠﻤﺎﻋﺔ ﺍﻟﻘﻠﺘﻬﻢ ﻟﻲ ﻗﺒﻴﻞ ﻭﻳﻦ ؟
ﺣﺴﻦ ﻗﻔﻞ ﺍﻟﻔﺘﺮﻳﻨﺔ ﻭﺟﺪﻉ ﺍﻟﻤﻔﺘﺎﺡ ﻟﻮﺍﺣﺪ ﺑﻌﺮﻓﻮ ﻭﻗﺎﻝ ﻟﻴﻬﻮ ﺩﻗﺎﻳﻖ ﻭﺑﺮﺟﻊ
ﻭﻗﺎﻝ ﻟﻌﺒﺎﺱ ﻳﻠﻼ ﻭﻣﺸﻮﺍ
ﻭﻟﻔﺘﻴﻦ ﺗﻼﺗﺔ ﺍﺭﺑﻌﺔ ﻟﻔﺎﺕ ﻭﺻﻠﻮﺍ ﻟﻜﺸﻚ ﺣﻖ ﻣﺮﻃﺒﺎﺕ ﻭﺣﺴﻦ ﻗﺎﻝ ﻟﻴﻬﻮ ﺩﻗﻴﻘﺔ ﺍﺳﺘﻨﺎﻧﻲ ﻫﻨﺎ ﻭﻣﺸﻰ ﻧﻀﻢ ﻣﻊ ﻭﺍﺣﺪ ﻣﺴﺎﻓﺔ ﻭﺍﻛﺎﻥ ﺑﺄﺷﺮ ﻟﻌﺒﺎﺱ ﺑﻌﺪ ﺷﻮﻳﺔ ﻗﺎﻝ ﻟﻴﻬﻮ ﺗﻌﺎﻝ ﻭﺩﺍ ﺍﺧﻮﻙ ﺣﻴﺪﺭ ﺍﻟﺒﺘﺴﻜﻦ ﻣﻌﺎﻫﻮ
ﺣﻴﺪﺭ ﺳﻠﻢ ﻋﻠﻲ ﻋﺒﺎﺱ ﻭﻛﺐ ﻟﻴﻬﻢ ﻟﻴﻤﻮﻥ ﺑﻌﺪ ﺷﺮﺑﻮﻫﻮ ﺍﺩﻯ ﺣﺴﻦ ﺍﻟﻤﻔﺘﺎﺡ ﻭﻗﺎﻝ ﻟﻴﻬﻮ ﻭﺩﻳﻬﻮ ﺍﻟﺒﻴﺖ
ﺍﻟﺒﻴﺖ ﻣﺎ ﻭﺍﺳﻊ ﺯﻱ ﺑﻴﺖ ﺍﻟﺘﺎﺝ ﻟﻜﻦ ﺳﻤﺢ ﻭﻓﻴﻬﻮ ﺣﻮﺵ ﺻﻐﻴﺮ ﻭﻓﺪ ﺍﻭﺿﺔ ﻭﺍﺣﺪﺓ ﺑﺲ ﻭﺍﻻﻭﺿﺔ ﻓﻴﻬﺎ ﺗﻼﺗﺔ ﺳﺮﺍﻳﺮ ﻭﻓﻲ ﺳﺮﻳﺮ ﺭﺍﺑﻊ ﺑﺮﺓ ﻓﻲ ﺍﻟﺤﻮﺵ
ﻋﺒﺎﺱ ﻗﺎﻝ ﻟﻴﻬﻮ ﻫﻢ ﻛﻢ ﻧﻔﺮ ﺍﻟﺴﺎﻛﻨﻴﻦ ﻫﻨﺎ؟
_ ﺍﺭﺑﻌﺔ ﺗﻨﻔﺎﺭ ﺑﺲ ﻛﻠﻬﻢ ﻣﻤﺘﺎﺯﻳﻦ ﻋﺎﻳﻦ ﺍﻭﺿﺘﻬﻢ ﺩﻱ ﻣﻲ ﺳﻤﺤﺔ ؟
_ ﺳﻤﺤﺔ ﻭﺍﻟﻠﻪ ﻭﺍﻟﺸﺒﺎﺏ ﺩﻳﻞ ﺍﻟﻈﺎﻫﺮ ﻋﻠﻴﻬﻢ ﻣﻨﻈﻤﻴﻦ ﺍﻻﻭﺿﺔ ﻧﻀﻴﻴﻴﻔﺔ ﻭ ﺍﻱ ﻭﺍﺣﺪ ﻣﻔﺮﺵ ﺳﺮﻳﺮﻭ ﺑﻤﻼﻳﺔ _. ﻭﻣﻤﺘﺎﺯﻳﻦ ﺷﺪﻳﺪ
ﻋﺒﺎﺱ ﺩﺧﻞ ﺍﻟﺸﻨﻄﺔ ﻭﻓﺎﺕ ﻣﻊ ﺣﺴﻦ ﻟﺤﻴﺪﺭ ﺭﺟﻌﻮﺍ ﻟﻴﻬﻮ ﺍﻟﻤﻔﺘﺎﺡ ﻭﻋﺒﺎﺱ ﻗﺎﻝ ﻟﻴﻬﻮ ﺑﺠﻴﻚ ﺍﻟﻤﻐﺮﺏ ﻫﻨﺎ
ﺣﻴﺪﺭ ﻗﺎﻝ ﻟﻴﻬﻮ ﻋﺪﻳﻠﺔ ﻭﻧﺤﻦ ﺗﻼﺗﺔ ﺑﺲ ﺍﻛﻨﺎ ﺍﺭﺑﻌﺔ ﻟﻜﻦ ﻓﻲ ﻭﺍﺣﺪ ﻓﺎﺕ ﺍﻫﻠﻮ ﻭﻣﺎ ﺍﻇﻦ ﻳﺮﺟﻊ ﺗﺎﻧﻲ ﻳﻌﻨﻲ ﻣﺎ ﺗﺠﻴﺐ ﻟﻴﻚ ﺳﺮﻳﺮ ﻭﺍﻟﻠﺤﺎﻑ ﺣﻘﻮ ﺯﺍﺗﻮ ﻣﻮﺟﻮﺩ
ﻭﻧﻀﻤﻮﺍ ﻣﻊ ﺣﻴﺪﺭ ﺷﻮﻳﺔ ﻭﻓﺎﺗﻮﺍ
ﻭﺣﺴﻦ ﻗﺎﻝ ﻟﻴﻬﻮ ﻛﺪﺍ ﺍﻧﺘﻬﻴﻨﺎ ﻟﻴﻚ ﻣﻦ ﻣﺸﻜﻠﺔ ﺍﻟﺴﻜﻦ
_ ﺁﻱ ﻭﺑﺎﻗﻲ ﺍﻟﺸﻐﻞ ﺑﺲ
_ ﺍﻟﺸﻐﻞ ﻫﻴﻦ ﻭﺑﺘﻠﻘﻲ ﺍﻟﻤﻬﻢ ﺍﻟﺰﻭﻝ ﻳﻜﻮﻥ ﻋﺎﺭﻑ ﻣﺤﻞ ﺭﻗﺎﺩﻭ ﻭﻳﻀﻤﻨﻮ ﻓﻲ ﺍﻻﻭﻝ
_ ﺍﻧﺎ ﻣﺎ ﺩﺍﻳﺮ ﺍﺭﺟﻊ ﻟﻠﻜﺮﺗﻮﻧﺔ ﺗﺎﻧﻲ ﻭﺍﻟﻨﺎﺱ ﺩﻳﻞ ﺍﻧﺎ ﻛﺠﻨﺘﻬﻢ ﻭﺑﻄﻨﻲ ﻃﻤﺖ ﻣﻨﻬﻢ ﻭﺍﻟﺴﺒﺐ ﺣﻴﺪﺭ
_ ﻣﺎ ﺗﺨﺮﺏ ﻋﻼﻗﺎﺗﻚ ﺑﻴﻬﻢ ﻟﻜﻦ ﺧﻠﻴﻚ ﻓﻲ ﺣﺎﻟﻚ ﺑﺲ ﻣﺎ ﺗﺸﺘﻐﻞ ﺑﻴﻬﻢ
_ ﻻ ﻻ ﻣﺎ ﺑﺨﺮﺑﻬﺎ ﺑﺮﺿﻮ ﻫﻢ ﻣﺎ ﻗﺼﺮﻭﺍ ﻣﻌﺎﻱ ﻭﺧﺎﺻﺔ ﻋﺒﺪ ﺍﻟﻘﻴﻮﻡ ، ﻟﻜﻦ ﺍﻧﺎ ﻣﺎ ﺩﺍﻳﺮ ﺍﺷﺘﻐﻞ ﺑﺎﻟﻜﺮﺗﻮﻧﺔ ﺗﺎﻧﻲ ﺩﺍ ﻗﺼﺪﻱ
_ ﺍﻫﺎ ﺩﺍﻳﺮ ﺗﺸﺘﻐﻞ ﺷﻨﻮ ؟
_ ﺃﻱ ﺷﻲ ﺑﺲ ﺷﻐﻞ ﻓﻲ ﺩﻛﺎﻥ ﻻﻧﻲ ﻛﺮﻫﺖ ﺍﻟﺤﻮﺍﻣﺔ ﻭﻣﺴﺎﻛﻜﺔ ﺍﻟﺰﺑﺎﻳﻦ ﻛﺮﺍﻫﻴﺔ ﺟﺪ
_ ﺷﻐﻠﺔ ﺍﻟﺪﻛﺎﻛﻴﻦ ﺩﻱ ﺍﻧﺎ ﻗﺒﻴﻞ ﻭﺭﻳﺘﻚ ﻟﻴﻬﺎ
_ ﺑﺮﺿﻮ ﺍﺧﻴﺮ ﻟﻲ ﻣﻦ ﺍﻟﻜﺮﺗﻮﻧﺔ
_ ﺍﻧﺖ ﺁ ﻋﺒﺎﺱ ﺍﺷﺘﻐﻠﺖ ﺷﻨﻮ ﻏﻴﺮ ﺑﺎﻟﻜﺮﺗﻮﻧﺔ
_ ﻣﺎ ﺍﺷﺘﻐﻠﺖ ﺷﻲ . ﻭﻓﻲ ﺍﻟﺪﻛﺎﻥ ﺍﺷﺘﻐﻠﺖ ﻳﻮﻡ ﻭﺍﺣﺪ ﺑﺲ ﺍﻟﻴﻮﻡ ﺍﻟﻼﻗﻴﺘﻚ ﻓﻮﻗﻮ ﺩﺍﻙ
_ ﺍﻛﺎﻥ ﻛﺪﺍ ﺍﻟﻴﻮﻡ ﺩﺍﻙ ﻳﺎﻫﻮ ﺍﻟﺨﺮﺑﻚ
_ ﻣﺎ ﺧﺮﺑﻨﻲ ﺑﺲ ﺍﻧﺎ ﺿﺮﺑﺘﻬﺎ ﻛﻮﻳﺲ ﻻﻧﻲ ﺍﺷﺘﻐﻠﺖ ﺑﺎﻟﻜﺮﺗﻮﻧﺔ ﺧﻤﺴﺔ ﺷﻬﻮﺭ ﻗﺎﻓﻠﺔ ﻭﻳﻮﻡ ﻭﺍﺣﺪ ﻣﺎ ﻓﻄﻴﺘﻮ . ﺍﻧﻘﺮ ﻋﻤﻠﺖ ﻓﻴﻬﻦ ﻛﻢ ﺍﻟﺨﻤﺴﺔ ﺷﻬﻮﺭ ﺩﻳﻞ ؟
_ ﻋﻤﻠﺖ ﻛﻢ ؟ ﻭﺍﻧﺎ ﻣﺎ ﺑﻘﺪﺭ ﺍﺣﺪﺩ ﻻﻧﻲ ﻋﺎﺭﻑ ﻓﻮﺍﻳﺪﻫﺎ ﻛﻴﻒ
_ ﻻ ﻻ ﺍﻧﻘﺮ ﺳﺎﻱ ﺑﺲ
_ ﺑﻌﺪ ﻣﺼﺎﺭﻳﻔﻚ ﻭﻛﻞ ﺷﻲ ؟
_ ﺁﻱ ﺻﺎﺍﺍﺍﻓﻴﺔ ﻭﺍﻧﻘﺮ ﺳﺎﻱ ﻗﻮﻝ ﺍﻱ ﺷﻲ ﺍﻧﺸﻮﻓﻚ ﺑﺘﻘﻮﻝ ﻛﻢ
_ ﻣﺎ ﻋﺎﺭﻑ ﻭﺍﻟﻠﻪ ﻻﻧﻲ ﻣﺎ ﻋﺎﺭﻑ ﺍﻟﻔﺎﻳﺪﺓ ﻣﺎ ﺑﻨﻘﺮ ﺳﺎﻱ
_ ﺳﻤﺢ ﻓﻲ ﻓﺘﺮﻳﻨﺘﻚ ﺩﻱ ﺧﻤﺴﺔ ﺷﻬﻮﺭ ﻃﻖ ﻃﺮﻕ ﺑﺘﻌﻤﻞ ﻓﻴﻬﻦ ﻛﻢ ؟
_ ﻋﻠﻰ ﺣﺴﺐ ﻟﻜﻦ ﻟﻮ ﺍﻟﺸﻐﻞ ﺳﻤﺢ ﻭﺑﻌﺪ ﻣﺼﺎﺭﻳﻒ ﺍﻟﺒﻴﺖ ﻭﺍﻻﻟﺘﺰﺍﻣﺎﺕ ﻭﻛﻞ ﺷﻲ ﻣﺎ ﺍﻗﻞ ﻣﻦ ﺧﻤﺴﻄﺎﺷﺮ ﺍﻟﻒ
_ ﺑﺲ ؟ ﻭﺍﻟﻠﻪ ﺍﻛﺎﻥ ﻛﺪﻱ ﺍﺧﻴﺮ ﺍﻟﻜﺮﺗﻮﻧﺔ ، ﺍﻧﺎ ﺻﺎﻓﻲ ﻋﺎﻣﻞ ﻟﻲ ﻛﻢ ﻭﻋﺸﺮﻳﻦ ﺃﻟﻒ
_ ﻭﺍﻟﻠﻪ ﺳﻤﺤﺔ ﻭﺍﻣﺶ ﻋﻠﻴﻬﺎ ﺳﺎﻱ ﻣﻦ ﻫﺴﻲ ﺍﻛﺎﻥ ﺑﺘﺼﻔﻲ ﻣﻨﻬﺎ ﺍﻟﻤﺒﻠﻎ ﺩﺍ . ﻟﻜﻦ ﺍﻧﺖ ﻋﺸﺎﻥ ﻋﻠﻲ ﺭﻗﺒﺘﻚ ﻭﻣﺼﺎﺭﻳﻔﻚ ﻣﺎ ﻛﺘﻴﺮﺓ . ﻣﺎ ﺯﻳﻨﺎ ﻧﺤﻦ ﻣﻮﺍﺻﻼﺕ ﻭﺑﻴﺖ ﻭﺍﻭﻻﺩ
_ ﺍﻧﺎ ﻛﻨﺖ ﺑﺒﻴﻊ ﺑﻴﻊ ﺟﺪ ﺍﻛﺘﺮ ﻣﻦ ﻋﺒﺪ ﺍﻟﻘﻴﻮﻡ ﻭﺑﻌﺮﻑ ﻟﻴﻬﺎ ﻛﻮﻳﺲ
_ ﺧﻼﺱ ﺍﺭﺟﻊ ﻟﻴﻬﺎ ﺳﺎﻱ
_ ﻻ ﻻ ﻧﺎﻧﻲ ﻳﺪﻱ ﻣﺎ ﺑﺨﺘﻬﺎ ﻓﻴﻬﺎ . ﺍﻧﺎ ﺩﺍﻳﺮ ﺍﺷﺘﻐﻞ ﻓﻲ ﺩﻛﺎﻥ ﺑﺲ
_ ﻭﺍﻟﻠﻪ ﺍﺧﻴﺮ ﻟﻴﻚ ﺍﻟﻜﺮﺗﻮﻧﺔ
_ ﺍﻧﺎ ﺟﺎﺗﻨﻲ ﻓﻜﺮﺓ ﺳﻤﺤﺔ ، ﻋﻨﺪﻱ ﻗﺮﻭﺵ ﻓﻲ ﻣﺪﻧﻲ ﻟﻮ ﺟﺒﺘﻬﺎ ﻫﻨﺎ ﻭﺃﺟﺮﺕ ﻟﻲ ﺩﻛﺎﻥ ﻣﺎ ﺍﺣﺴﻦ
_ ﻗﺮﻭﺵ ﻛﺘﻴﺮﺓ ؟
_ ﺯﻱ ﻣﻴﺔ ﺍﻟﻒ ﻛﺪﺍ
_ ﺟﺒﺘﻬﺎ ﻣﻦ ﻭﻳﻦ ﺩﻱ ﻭﺍﻧﺖ ﻗﻠﺖ ﻣﺼﻔﻲ ﻟﻴﻚ ﻛﻢ ﻭﻋﺸﺮﻳﻦ
_ ﻣﺎ ﻋﺎﺭﻑ ﺟﺒﺘﻬﺎ ﻣﻦ ﻭﻳﻦ ﺑﺲ ﻟﻮ ﻣﺸﻴﺖ ﺟﺒﺘﻬﺎ ﻣﺎ ﺑﺘﺸﻐﻠﻨﻲ ؟
_ ﺑﺘﺸﻐﻠﻚ
_ ﺧﻼﺱ ﺍﻧﺎ ﻓﺎﻳﺖ ﻣﺪﻧﻲ ﺃﺟﻴﺒﻬﺎ ﻭﺃﺟﻲ ﻣﻊ ﺍﻟﺴﻼﻣﺔ ﺍﻧﻠﺤﻖ ﺍﻟﻤﻮﺍﺻﻼﺕ
_ ﻣﺎ ﺗﺠﻴﺒﻬﺎ ﻭﻻ ﺷﻲ ﻭﺍﻣﺶ ﻋﻠﻲ ﻛﺮﺗﻮﻧﺘﻚ ﺍﺳﻤﻊ ﻛﻼﻣﻲ ﺩﺍ ﻭﺍﻧﺎ ﺧﺎﻳﻔﻚ ﺗﺠﻴﺒﻬﺎ ﻭﺗﻀﻴﻌﻬﺎ ﺳﺎﻱ ﻭﻫﻲ ﺯﺍﺗﻬﺎ ﻣﺎ ﺗﻠﻢ ﻓﻴﻬﺎ
_ ﻻ ﻻ ﺑﺠﻴﺒﻬﺎ ﺍﺣﺴﻦ ﻭﺍﻟﻜﺮﺗﻮﻧﺔ ﺗﻌﺐ ﺳﺎﻱ ﻭﺍﻧﺎ ﻣﺎﺷﻲ ﻋﺸﺎﻥ ﺃﻟﺤﻖ ﺍﻟﺰﻭﻝ ﺍﻟﺨﺎﺗﻴﻬﻦ ﻋﻨﺪﻭ ﻗﺒﺎﻝ ﻳﺘﺼﺮﻑ ﻓﻴﻬﻦ
_ ﺍﻧﺖ ﺧﺎﺗﻴﻬﻦ ﻋﻨﺪﻭ ﺍﻣﺎﻧﺔ ﻳﺘﺼﺮﻑ ﻓﻴﻬﻦ ﻛﻴﻒ ؟
_ ﻭﺍﺣﺪ ﻗﺮﻳﺒﻲ ﻣﻦ ﺍﻟﺤﻠﺔ ﻭﺍﻧﺎ ﺍﻟﻘﻠﺖ ﻟﻴﻬﻮ ﺍﺗﺼﺮﻑ ﻓﻴﻬﻦ ﻭﻗﺎﻝ ﺩﺍﻳﺮ ﻳﺸﺘﺮﻱ ﺑﻴﻬﻦ ﺩﻛﺎﻥ ﻓﻲ ﻣﺪﻧﻲ ﻭﻗﺒﻴﻞ ﺍﻛﺎﻥ ﻣﻌﺎﻱ ﻫﻨﺎ ﻭﻭﺭﺍﻧﻲ ﻭﺍﻧﺎ ﺑﻤﺶ ﻫﺴﻲ ﻋﺸﺎﻥ ﺍﻟﺤﻘﻮ ﻗﺒﺎﻝ ﻳﺸﺘﺮﻳﻬﻮ
_ ﺧﻠﻴﻬﻮ ﻳﺸﺘﺮﻳﻬﻮ ﻣﺎ ﺗﺠﻴﺒﻦ ﻣﻨﻮ ﺍﺳﻤﻊ ﻛﻼﻣﻲ
_ ﺍﻟﺪﻛﺎﻥ ﻫﻨﺎﻙ ﻣﺎ ﻓﻴﻬﻮ ﻓﺎﻳﺪﺓ ﻭﻻ ﺷﻲ ﻳﻠﻼ ﻣﻊ ﺍﻟﺴﻼﻣﺔ ﻭﺷﻨﻄﺘﻲ ﺧﻠﻴﻬﺎ ﻋﻨﺪ ﻧﺎﺱ ﺣﻴﺪﺭ ﺍﻧﺎ ﺑﺎﻛﺮ ﺑﺠﻲ ﺭﺍﺟﻊ
_ ﻋﺒﺎﺱ ﻣﺎ ﺗﻤﺶ ﺗﺠﻴﺒﻬﺎ
_ ﺑﺠﻴﺒﻬﺎ ﻭﺍﻟﻠﻪ ﻋﺸﺎﻥ ﺍﻭﺭﻱ ﺧﻀﺮ ﺍﻟﻤﻌﻮﻟﻖ ﺩﺍ ﺍﻧﺎ ﺷﻨﻮ ﻣﻊ ﺍﻟﺴﻼﻣﺔ ﻣﻊ ﺍﻟﺴﻼﻣﺔ
ﻋﺒﺎﺱ ﺟﺮﻯ ﺟﺮﻱ ﻋﻠﻰ ﺍﻟﻤﻮﻗﻒ ﻭﺍﻭﻝ ﺑﺺ ﻣﺎﺭﻕ ﻣﺸﻰ ﻗﻄﻊ ﺗﺬﻛﺮﺗﻮ ﻓﻮﻗﻮ ﻭﻋﺜﻤﺎﻥ ﺷﺎﻓﻮ ﻭﻛﻮﺭﻙ ﻟﻴﻬﻮ ﻭﻋﺒﺎﺱ ﻓﺎﺕ ﻟﻴﻬﻮ
_ ﺷﻨﻮ ﺍﻟﺠﻴﺖ ﺟﺎﺭﻱ ﻓﻴﻨﻲ ﺳﺎﻱ ﻣﺎﺷﻲ ﻭﻳﻦ ؟
_ ﻣﺎﺷﻲ ﻣﺪﻧﻲ ﻭﺟﺎﻱ
_ ﻣﺎﻟﻚ ﺧﻴﺮ ﻓﻲ ﺷﻨﻮ ؟ ﺍﻫﻠﻚ ﺷﺪﻳﺪﻳﻦ ؟
_ ﺍﻟﺤﻤﺪ ﻟﻠﻪ ﻣﺎ ﻋﻨﺪﻫﻢ ﺍﻱ ﻋﻮﺟﺔ ﺑﺲ ﺍﻧﺎ ﻋﻨﺪﻱ ﻣﻮﺿﻮﻉ ﻣﻬﻢ ﻭﻏﺮﺽ ﻣﺎﺷﻲ ﺍﺟﻴﺒﻮ ﻭﺍﺟﻲ
_ ﺍﻛﺎﻥ ﺗﻜﻠﻢ ﻋﻤﺮ ﻗﺒﻴﻞ ﺍﻛﺎﻥ ﺑﺮﺳﻠﻮ ﻟﻴﻚ
_ ﻫﻮ ﻋﻨﺪ ﻋﻤﺮ ﺩﺍ ﺯﺍﺗﻮ ؟
_ ﻣﻮﺿﻮﻉ ﺷﻨﻮ ؟ ﻭﻟﻼ ﺳﺮ ؟
_ ﻻ ﻻ ﻣﺎ ﺳﺮ ﻭﻻ ﺷﻲ ﻭﺍﻟﻤﻮﺿﻮﻉ ﻗﺮﻭﺵ
_ ﻳﺎﺧﻲ ﻣﺎ ﻋﻴﺐ ﻋﻠﻴﻚ ﻧﺤﻦ ﻗﺎﻋﺪﻳﻦ ﺗﻤﺮﻕ ﻟﻘﺮﻭﺵ ﻓﻲ ﻣﺪﻧﻲ . ﺩﺍﻳﺮ ﻛﻢ ؟
_ ﻣﺎ ﺑﺘﻘﺼﺮ ﻭﺍﻟﻠﻪ ﻟﻜﻦ ﻣﺎ ﻗﺮﻭﺵ ﺍﺗﺼﺮﻑ ﺑﻴﻬﺎ ﻳﺎﺥ ﻛﺪﻱ ﺧﻠﻴﻬﺎ ﻫﺴﻲ ﻭﺑﻌﺪ ﺍﺟﻲ ﺑﻜﺮﺓ ﺑﻮﺭﻳﻚ . ﻣﻊ ﺍﻟﺴﻼﻣﺔ ﻭﺍﻧﺎ ﺑﺠﻲ ﺑﻜﺮﺓ ﺍﻛﺎﻥ ﻋﺒﺪ ﺍﻟﻘﻴﻮﻡ ﺳﺄﻟﻚ ﻣﻨﻲ ﻋﻠﻴﻴﻴﻚ ﺍﻟﻠﻪ ﻣﺎ ﺗﻮﺭﻳﻬﻮ ﺍﻧﻲ ﻣﺸﻴﺖ ﻣﺪﻧﻲ
_ ﻟﻴﻪ ﻣﺎ ﺍﻭﺭﻳﻬﻮ ؟
_ ﺳﺎﻱ ﺑﺲ ﻣﺎ ﺗﻮﺭﻳﻬﻮ ، ﻳﻠﻼ ﺍﻫﺎ
_ ﻣﻊ ﺍﻟﺴﻼﻣﺔ
ﻋﺒﺎﺱ ﻓﺎﺕ ﻣﻦ ﻋﺜﻤﺎﻥ ﻭﺭﻛﺐ ﻓﻲ ﺍﻟﺒﺺ ﻭﺑﻌﺪ ﺭﺑﻊ ﺳﺎﻋﺔ ﺍﻟﺒﺺ ﺍﺗﺤﺮﻙ ﻭﺍﻟﺪﻧﻴﺎ ﻧﻬﺎﺭ ﻭﻳﺎﺩﻭﻭﻭﻭﻭﺏ ﺍﻟﻌﺼﺮ ﻣﺎﺷﻲ ﻓﻲ ﺍﻟﺪﺭﺏ ﻭﻟﻮ ﺍﻟﺒﺺ ﺩﺍ ﻛﺘﺢ ﻋﺒﺎﺱ ﺑﻠﺤﻖ ﺑﺺ ﺍﻟﺤﻠﺔ ﻭﺑﻼﻗﻲ ﻭﺩ ﺍﻟﻀﻮ
ﻭﺩ ﺍﻟﻀﻮ ﺑﺎﻉ ﺍﻟﻜﺸﻚ ﺣﻘﻮ ﻭﺍﺷﺘﺮﻯ ﺍﻟﻤﺤﻞ ﻭﺟﻬﺰﻭ ﺣﺘﻴﻦ ﻓﺎﺕ ﺍﻡ ﺩﺭﻣﺎﻥ ﻭﺍﺷﺘﺮﻯ ﺍﻟﺒﻀﺎﻋﺔ ﻛﻠﻬﺎ ﺍﻟﻤﺤﺘﺎﺝ ﻟﻴﻬﺎ ﺑﺲ ﻣﺎ ﺷﺎﻟﻬﺎ ﻣﻌﺎﻫﻮ ﻭﺧﺘﺎﻫﺎ ﻋﻨﺪ ﺗﺎﺟﺮ ﻭﺍﺩﺍﻫﻮ ﺍﺟﺮﺓ ﺍﻟﻌﺮﺑﻴﺔ ﻭﻗﺎﻝ ﻟﻴﻬﻮ ﺑﻜﺮﺓ ﺭﺳﻠﻬﺎ ﻟﻲ ﻭﻓﺎﺕ ﻗﺪﺍﻣﻬﺎ ﻭﻣﻨﺠﺾ ﺷﻐﻠﺘﻮ ﺗﺐ ﻭﻋﺎﺭﻑ ﺑﺴﻮﻱ ﻓﻲ ﺷﻨﻮ
ﻋﺒﺎﺱ ﻓﻲ ﺍﻟﺒﺺ ﻣﺎﺳﻜﺎﻫﻮ ﺍﻡ ﻫﻠﺔ ﻫﻠﺔ ﻭﻟﻴﻬﻮ ﻣﺮﺍﺩ ﻳﻐﻤﺾ ﻭﻳﻔﺘﺢ ﻭﻳﻠﻘﻰ ﺭﻭﺣﻮ ﻓﻲ ﻣﺪﻧﻲ ﻭﻳﻘﻮﻝ ﻳﺎﺭﺏ ﻭﺩ ﺍﻟﻀﻮ ﻣﺎ ﻳﻜﻮﻥ ﺍﺷﺘﺮﻯ ﺍﻟﺪﻛﺎﻥ ﻋﺸﺎﻥ ﻳﺠﻲ ﻗﺎﻟﺐ ﺑﻜﺮﺓ ﻃﻮﺍﻟﻲ ﺯﻱ ﻣﺎ ﻗﺎﻝ ﻟﺤﺴﻦ ﻭﻋﺜﻤﺎﻥ