ﻓﻲ ﺍﻟﺴﻮﻕ ﺍﻟﻌﺮﺑﻲ ﻭﺍﻟﺰﻣﻦ ﺩﺍﻙ ﺍﻛﺎﻧﺖ ﺍﻟﺴﺎﻋﺔ ﻣﺎﺷﺔ ﻋﻠﻲ ﺣﺪﺍﺷﺮ ﻭﺍﻟﻌﺮﺑﻲ ﺯﺣﻤﺔ ﺷﺪﻳﺪﺓ ﻋﺮﺑﺎﺕ ﺗﻮﺩﻱ ﻭﻋﺮﺑﺎﺕ ﺗﺠﻴﺐ ﻭﺍﻟﻨﺎﺱ ﻛﺘﺎﺍﺍﺭ ﻭﻛﻞ ﺯﻭﻝ ﻓﺎﻳﺖ ﻋﻠﻲ ﻫﻤﻮ ، ﺍﻟﺸﻤﺲ ﺍﻛﺎﻧﺖ ﻓﺎﻗﻌﺔ ﻭﺣﺎﺭﺓ ﺧﻼﺱ ﻭﻋﺒﺎﺱ ﻣﺎﺷﻲ ﻭﻳﺘﻠﻔﺖ ﺳﺎﻱ ﻭﻳﻌﺎﻳﻦ ﻓﻲ ﻭﺷﻮﺵ ﺍﻟﻨﺎﺱ ﺯﻱ ﺍﻟﺒﻔﺘﺶ ﻟﺰﻭﻝ ﻭﻣﺤﺘﺎﺭ ﻓﻲ ﻛﺘﺮﺗﻢ ﺩﻱ ﺟﺎﻳﻴﻦ ﻣﻦ ﻭﻳﻦ ﻭﻣﺎﺷﻴﻦ ﻭﻳﻦ ﻭﻟﺸﻨﻮ ﻭﻛﻠﻬﻢ ﻣﺎ ﻋﺮﻓﻠﻮ ﻓﻴﻬﻢ ﺯﻭﻝ ، ﻭﻗﻒ ﻓﻲ ﻣﻴﺪﺍﻥ ﺍﺑﻮ ﺟﻨﺰﻳﺮ ﻭﻗﻌﺪ ﻳﺘﻔﺮﺝ ﻋﻠﻲ ﺍﻟﺨﻠﻖ ﺟﺎﺀ ﺑﻌﻨﺪﻭ ﻭﻟﺪ ﺷﺎﻳﻞ ﻟﻴﻬﻮ ﻛﺮﺗﻮﻧﺔ ﻭﻣﺸﻰ ﻣﻨﻜﺮﺏ ﻋﻠﻲ ﺍﻟﻨﺎﺱ ﻭﺍﻟﻌﺮﺑﺎﺕ ﻛﺎﻳﺲ ﻟﻠﺒﺸﺘﺮﻱ ﻣﻨﻮ ﺣﺎﺟﺔ ﻭﻋﺒﺎﺱ ﺷﺎﻓﻮ ﻭﺍﺗﻜﺸﻢ ﻭﻗﻌﺪ ﻳﺮﺍﻗﺐ ﻓﻴﻬﻮ ﻭﺃﻱ ﺣﺮﻛﺔ ﻋﻤﻠﻬﺎ ﺍﻟﻮﻟﺪ ﺩﺍ ﺍﺗﺬﻛﺮ ﺍﻧﻮ ﻋﻤﻠﻬﺎ ﻗﺒﻞ ﻛﺪﺍ ﺷﻴﻠﺘﻮ ﻟﻠﻜﺮﺗﻮﻧﺔ ﻭﻭﻗﻔﺘﻮ ﻣﻌﺎﻳﻨﺘﻮ ﻟﻠﻨﺎﺱ ﺣﻮﺍﻣﺘﻮ ﺍﺗﻠﻔﺎﺗﻮ ﻭﺣﺘﻰ ﻛﻼﻣﻮ ﻭﻫﻮ ﺑﻌﻴﺪ ﻣﻨﻮ ﻭﻣﺎ ﺳﺎﻣﻌﻮ ﺍﻛﺎﻥ ﻋﺎﺭﻓﻮ ﻭﺯﻱ ﺍﻟﺴﺎﻣﻌﻮ ﻭﻣﻦ ﺗﻌﺎﺑﻴﺮ ﻭﺷﻮ ﺳﺎﻱ ﻓﻬﻤﻮ ﻭﻋﺮﻓﻮ ﻭﺑﻘﻰ ﻳﺴﺎﺑﻖ ﻓﻲ ﺍﻟﻮﻟﺪ ﺑﺨﻄﻮﺓ ﻭﻳﻘﻮﻝ ﻓﻲ ﺳﺮﻭ ﻫﺴﻲ ﺑﻌﻤﻞ ﻛﺪﺍ ﻭﺍﻛﻴﺪ ﻗﺎﻝ ﻟﻠﺰﻭﻝ ﺍﻟﺒﻨﻀﻢ ﻣﻌﺎﻫﻮ ﺩﺍﻙ ﻛﺪﺍ ﻭﻛﺪﺍ ﻭﺷﺎﻑ ﻓﻴﻬﻮ ﺭﻭﺣﻮ ﻭﺑﻘﻰ ﻳﺮﺍﻗﺐ ﻓﻴﻬﻮ ﻫﻮ ﺑﺲ ﻭﻟﻤﺎ ﺍﻟﻮﻟﺪ ﻳﻨﻜﺮﺏ ﻭﻳﺒﻌﺪ ﻭﺗﻐﻄﻴﻬﻮ ﻣﻨﻮ ﻋﺮﺑﻴﺔ ﺍﻛﺎﻥ ﺑﻐﻴﺮ ﻓﺠﺘﻮ ﺍﻟﻮﺍﻗﻒ ﻓﻴﻬﺎ ﻋﺸﺎﻥ ﻣﺎ ﻳﻐﻴﺐ ﻣﻦ ﻧﻈﺮﻭ ﻭﻟﺴﺔ ﺑﺨﻤﻦ ﻓﻲ ﺣﺮﻛﺎﺗﻮ ﻭﻛﻞ ﺷﻲ ﺧﻤﻨﻮ ﻭﺍﺗﻮﻗﻌﻮ ﺍﻟﻮﻟﺪ ﺳﻮﺍﻫﻮ ﻭﺑﻘﻰ ﻟﻴﻬﻮ ﺯﻱ ﺍﻟﺒﺄﻣﺮ ﻓﻴﻬﻮ ﻭﺩﺍﻙ ﺑﻨﻔﺬ
ﻭﺳﺎﺏ ﺣﺮﻛﺎﺕ ﺍﻟﻮﻟﺪ ﻭﺑﻘﻰ ﻣﺮﻛﺰ ﻓﻴﻬﻮ ﻫﻮ ﺯﺍﺗﻮ ﻭﻓﻲ ﻣﻼﻣﺤﻮ ﻭﻗﺎﻝ ﻫﺴﻲ ﺩﺍ ﻣﺎﻟﻮ ﻫﻨﺎ ﻭﺍﻟﺠﺎﺑﻮ ﻟﻠﺸﻘﺎﻭﺓ ﺩﻱ ﺷﻨﻮ ﻭﻫﻮ ﻣﻨﻮ ﻭﻭﺩ ﻣﻨﻮ ﻭﻣﻦ ﻭﻳﻦ ﻭﺍﻫﻠﻮ ﻭﻳﻦ ، ﻗﺮﺍﺏ ﻭﻟﻼ ﺑﻌﺎﺩ ﻭﺍﺑﻮﻫﻮ ﻣﻄﻠﻖ ﺍﻣﻮ ﻭﻣﻌﺮﺳﻬﺎ ﺭﺍﺟﻞ ﺗﺎﻧﻲ ﻭﻟﻼ ﻣﺎﻟﻮ ﻭﺍﻫﻠﻮ ﻣﺎﻟﻢ ﻣﺎ ﺷﻐﺎﻟﻴﻦ ﺑﻴﻬﻮ ﻭﺧﻠﻮﻫﻮ ﻳﻄﻠﻊ ﻣﻦ ﺍﻟﻤﺪﺭﺳﺔ ؟ ﺣﻜﺎﻳﺘﻮ ﺷﻨﻮ ﺍﻟﻮﻟﺪ ﺩﺍ ﻭﺑﺠﻴﺐ ﺍﻟﺒﻀﺎﻋﺔ ﻣﻦ ﻭﻳﻦ ؟ ﺑﺸﺘﺮﻳﻬﺎ ﺑﺮﺍﻫﻮ ﻭﻟﻼ ﻓﻲ ﺑﺘﺎﻉ ﻃﺒﻠﻴﺔ ﺯﻱ ﻋﺜﻤﺎﻥ ﺑﺪﻳﻬﻮ ﻭﺑﺎﻟﻠﻴﻞ ﺑﺤﺎﺳﺒﻮ ؟
ﺍﻱ ﺣﺎﺟﺔ ﻣﺮ ﻋﻠﻴﻬﺎ ﻋﺒﺎﺱ ﻓﻲ ﺷﻐﻠﻮ ﺑﺎﻟﻜﺮﺗﻮﻧﺔ ﺍﺗﺨﻴﻞ ﺍﻟﻮﻟﺪ ﺩﺍ ﺣﺎﻟﻴﺎ ﻣﺎﺭﻱ ﺑﻴﻬﺎ . ﻭﻓﻲ ﺍﻵﺧﺮ ﻛﻮﺭﻙ ﻟﻴﻬﻮ ﺯﻱ ﺍﻟﺪﺍﻳﺮ ﻳﺸﺘﺮﻱ ﻣﻨﻮ ﻭﻗﻌﺪ ﻳﻘﻠﺐ ﻓﻲ ﺍﻟﻜﺮﺗﻮﻧﺔ ﻭﺍﺗﺬﻛﺮ ﻛﺮﺗﻮﻧﺘﻮ ﺯﻳﻬﺎ ﻭﻭﺍﺣﺪ ﻭﻧﻔﺲ ﺍﻟﻤﻘﺎﺱ ﻭﻧﻔﺲ ﻃﺮﻳﻘﺔ ﺍﻟﺮﺻﺔ ﻳﺎﻫﺎ ﺯﺍﺗﻬﺎ ﺑﺲ ﺩﻱ ﻧﺎﻗﺼﺔ ﺷﻮﻳﺔ
ﻋﺒﺎﺱ ﻗﺎﻝ ﻟﻴﻬﻮ ﺷﺪ ﺣﻴﻠﻚ ﻭﻛﺮﺗﻮﻧﺘﻚ ﺩﻱ ﻧﺎﻗﺼﺔ ﻭﺫﻛﺮ ﻟﻴﻬﻮ ﻛﻢ ﺣﺎﺟﺔ ﻣﺎ ﻋﻨﺪﻭ ﻗﺎﻝ ﻟﻴﻬﻮ ﻻﺯﻡ ﺗﺠﻴﺒﻬﻦ
ﺍﻟﻮﻟﺪ ﻗﻌﺪ ﻳﻀﺤﻚ ﻭﻳﻌﺎﻳﻦ ﻓﻲ ﻋﺒﺎﺱ ﻣﺴﺘﻐﺮﺏ ﻭﻗﺎﻝ ﻟﻴﻬﻮ ﺍﻧﺖ ﺯﻣﻴﻞ ﻭﻟﻼ ﺷﻨﻮ ؟
_ ﺯﻣﻴﻞ ﻭﺧﺒﺮﺓ ﻛﻤﺎﻥ
_ ﻭﺷﻐﺎﻝ ﻓﻲ ﻳﺎﺗﻮ ﻣﻮﻗﻒ ؟
_ ﻓﻲ ﺍﻟﺴﻮﻕ ﺍﻟﺸﻌﺒﻲ
_ ﺧﻠﻴﺘﻬﺎ ﻭﻟﻼ ﻟﺴﻪ ﺷﻐﺎﻝ ؟
_ ﺧﻠﻴﺘﻬﺎ ﻭﻧﺎﻭﻱ ﺍﺷﺘﻐﻞ ﻓﻲ ﺩﻛﺎﻥ ﺍﻟﻜﺘﺮﻭﻧﻴﺎﺕ
_ ﻣﺎﻟﻚ ﻭﻣﺎﻝ ﺍﻟﺪﻛﻜﻦ ﻭﺍﻻﻳﺠﺎﺭﺍﺕ ﻭﺍﻟﻜﻼﻡ ﺍﻟﻔﺎﺿﻲ
_ ﺍﺧﻴﺮ ﻣﻦ ﺍﻟﺸﻐﻠﺔ ﺩﻱ
_ ﻭﺍﻟﻠﻪ ﺍﺧﻴﺮ ﺩﻱ ، ﻣﺮﺗﺎﺍﺍﺍﺡ ﺍﻟﺒﻀﺎﻋﺔ ﻛﻤﻠﺖ ﺗﻤﺸﻲ ﺗﺠﻴﺐ ﺗﺎﻧﻲ ﻭﺗﺒﻴﻊ ﻭﺗﺨﺖ ﻓﻲ ﺟﻴﺒﻚ ﻣﺎﻓﻲ ﺃﻱ ﺯﻭﻝ ﻃﺎﻟﺒﻚ ﺷﻲ
_ ﻳﺎﺧﻲ ﺍﻟﺪﻛﺎﻥ ﺍﺧﻴﺮ ﻣﻦ ﺍﻟﺠﺮﻱ ﻭﺍﻟﺤﻮﺍﻣﺔ ﻓﻲ ﺍﻟﻨﻬﺎﺭ ﺍﻟﺤﺎﺭ ﺩﺍ
_ ﺍﻧﺎ ﻏﺎﻳﺘﻮ ﺍﺧﻴﺮ ﻟﻲ ﺍﻟﺤﻮﺍﻣﺔ ﻭﺍﻟﻠﻪ ﻭﻛﺮﺗﻮﻧﺘﻲ ﺩﻱ . ﻟﻜﻦ ﺍﻧﺖ ﺑﺘﺒﻘﻰ ﻋﻠﻴﻚ ﺍﻟﺒﻘﺖ ﻋﻠﻲ ﺣﻤﺰﺓ
_ ﺣﻤﺰﺓ ﻣﻨﻮ ﻭﻣﺎﻟﻮ ؟
_ ﺣﻤﺰﺓ ﻭﺩ ﺍﻟﺸﻔﻴﻊ ﻭﺍﺣﺪ ﻣﻦ ﺟﻤﺎﻋﺘﻨﺎ ﺍﻛﻨﺎ ﺷﻐﺎﻟﻴﻦ ﺳﻮﺍ ﻓﻲ ﺍﻣﺎﻥ ﺍﻟﻠﻪ ﺳﺎﺏ ﺍﻟﺸﻐﻞ ﻭﻣﺸﻰ ﻋﻤﻞ ﻟﻴﻬﻮ ﺩﻛﺎﻥ
_ ﻛﻮﻳﺲ ﻳﺎﺥ
_ ﻛﻮﻳﺲ ﺷﻨﻮ ﻫﺎ ﻭﺍﻟﻠﻪ ﻫﺴﻲ ﻣﻄﻠﻮﺏ ﻗﺮﻭﺵ ﻛﺘﻴﺮﺓ ﺧﻼﺱ ﻭﻏﺮﻗﺎﻥ ﻟﻲ ﺍﺿﻨﻴﻬﻮ ﻻ ﻗﺎﺩﺭ ﻳﺨﻠﻲ ﺍﻟﺪﻛﺎﻥ ﻭﻻ ﻣﺴﺘﻔﻴﺪ ﻣﻨﻮ ﺷﻲ
_ ﺩﺍ ﻋﻮﻳﺮ ﺳﺎﻱ ﻣﺎ ﻋﺮﻑ ﻟﻴﻬﻮ ، ﻭﺍﻧﺎ ﻋﻨﺪﻱ ﺍﻟﻔﻜﺮﺓ ﻭﺣﺎﻓﻆ ﺍﻻﺳﻌﺎﺭ ﻭﺍﺷﺘﻐﻠﺖ ﻗﺒﻞ ﻛﺪﺍ ﻓﻲ ﺩﻛﺎﻥ ﻭﻋﺎﺭﻑ ﻛﻞ ﺷﻲ
_ ﻋﻠﻲ ﻛﻴﻔﻚ ﻟﻜﻦ ﻟﻮ ﺑﺘﺴﻤﻊ ﻛﻼﻣﻲ ﻣﺎ ﺗﺨﻠﻲ ﺍﻟﻜﺮﺗﻮﻧﺔ ﻧﻬﺎﺋﻲ ، ﻭﺍﻟﺪﻛﺎﻥ ﺑﻠﺤﻘﻚ ﺣﻤﺰﺓ ﻭﺩ ﺍﻟﺸﻔﻴﻊ
ﻋﺒﺎﺱ ﺿﺤﻚ ﻭﻓﺎﺕ ﻣﻨﻮ ﻭﻣﺸﻰ ﻋﻠﻲ ﻋﺮﺑﺎﺕ ﺑﺤﺮﻱ ﻭﻗﺒﻞ ﻳﺮﻛﺐ ﻗﺎﻝ ﻫﺴﻲ ﺍﻧﺎ ﻣﺎﺷﻲ ﻟﻔﺮﺡ ﺍﻟﻜﻌﺐ ﻟﺸﻨﻮ ؟ ﻳﺎﺥ ﻫﺎ ﻣﺎﻓﻲ ﺷﻲ ﺑﻮﺩﻳﻨﻲ ﻟﻴﻬﻮ ﺍﺭﺟﻊ ﺍﻟﺴﻮﻕ ﺍﻟﺸﻌﺒﻲ ﺑﺲ ﻭﻗﺒﺎﻝ ﺍﻛﻤﻞ ﻗﺮﻳﺸﺎﺗﻲ ﺩﻳﻞ ﺃﻣﺸﻲ ﻣﺪﻧﻲ ﻭﺍﺷﻮﻑ ﺭﺑﻴﻊ ﻋﻤﻞ ﺷﻨﻮ ﻭﺃﺟﻲ ﺭﺍﺟﻊ ﻣﻦ ﻫﻨﺎﻙ ﺑﻘﺮﻭﺷﻲ ﻭﺍﺷﻮﻑ ﻟﻲ ﺩﻛﺎﻥ ﺃﺃﺟﺮﻭ ﻭﺍﺷﺘﻐﻞ ﻭﺍﻧﺎ ﺑﻌﺮﻑ ﺍﻧﺠﺤﻮ ﻛﻴﻒ ﻭﺳﻨﺔ ﻭﺍﺣﺪﺓ ﺑﺲ ﺑﺸﺘﺮﻱ ﻟﻲ ﺑﻴﺖ ﻭﻟﻼ ﺩﻛﺎﻥ ﻣﻠﻚ ﻻ ﺍﻳﺠﺎﺭﺍﺕ ﻭﻻ ﻳﺤﺰﻧﻮﻥ
ﻭﺭﺟﻊ ﺍﻟﺴﻮﻕ ﺍﻟﺸﻌﺒﻲ ﻭﻣﺸﻰ ﻟﺤﻴﺪﺭ ﻗﺎﻝ ﻟﻴﻬﻮ ﺍﻧﺎ ﻣﺎﺷﻲ ﺍﻟﺤﻠﺔ ﺿﺮﻭﺭﻱ ﻭﺑﺠﻲ ﺑﻌﺪ ﻳﻮﻣﻴﻦ ﻭﻓﺎﺕ ﻣﻨﻮ ﻭﻣﺎ ﻏﺸﻰ ﻻ ﺣﺴﻦ ﻭﻻ ﻋﺒﺪ ﺍﻟﻘﻴﻮﻡ ﻗﺎﻝ ﻟﻮ ﻏﺸﺎﻫﻢ ﺑﺄﺧﺮﻭﻫﻮ ﺳﺎﻱ ﻭﺣﺴﻦ ﺑﻘﻌﺪ ﻳﻨﻈﺮ ﻟﻲ ﻭﺍﺣﺘﻤﺎﻝ ﻣﺎ ﻳﺨﻠﻮﻧﻲ ﺃﺭﺟﻊ ﻣﺪﻧﻲ
ﻗﻄﻊ ﺍﻟﺘﺬﻛﺮﺓ ﻭﺟﺎﺀ ﻟﻌﺜﻤﺎﻥ ﻗﻌﺪ ﻳﺘﻮﻧﺲ ﻣﻌﺎﻫﻮ ﻟﺤﺪﻱ ﻣﺎ ﺍﻟﺒﺺ ﺍﺗﻤﻼ
ﻭﻓﺎﺕ ﻭﻭﺻﻞ ﻣﺪﻧﻲ ﻗﺒﻞ ﺍﻟﻌﺼﺮ ﻟﺮﺑﻴﻊ ﻭﻗﺒﻞ ﻳﻤﺮﻕ ﻣﻦ ﺍﻟﺴﻮﻕ ﺷﺎﻑ ﺍﺑﺠﺎﻛﻮﻣﺔ ﻭﻛﻮﺭﻙ ﻟﻴﻬﻮ
ﻭﺑﻌﺪ ﺳﻠﻢ ﻋﻠﻴﻬﻮ ﻗﺎﻝ ﻟﻴﻬﻮ ﺟﻴﺘﻚ ﻓﻲ ﺍﻟﺒﻴﺖ ﻗﺒﻞ ﻛﻢ ﻳﻮﻡ . ﺍﺑﺠﺎﻛﻮﻣﺔ ﺿﺤﻚ ﻭﻗﺎﻝ ﻟﻴﻬﻮ ﻫﻮ ﺩﺍ ﺍﻧﺖ ﺑﺎﻟﻠﻪ ﺍﻟﺠﺒﺖ ﺍﻟﻔﻮﺍﻛﻪ ؟
_ ﺍﻱ ﻭﺟﻴﺖ ﻛﻨﺖ ﺩﺍﻳﺮ ﺍﺑﻴﺖ ﻣﻌﺎﻙ ﻻﻧﻮ ﺑﺺ ﺍﻟﺤﻠﺔ ﻓﺎﺗﻨﻲ ﻣﺎ ﻟﺤﻘﺘﻮ
_ ﻃﻴﺐ ﻟﻴﻪ ﻣﺎ ﻗﻠﺖ ﻟﻴﻬﻢ ﺍﺳﻤﻚ ﻭﻣﺸﻴﺖ ﻟﺸﻨﻮ ﺍﻛﺎﻥ ﺗﺒﻴﺖ ﻓﻲ ﺍﻟﺒﻴﺖ
_ ﺷﻔﺘﻬﺎ ﻣﺎ ﺣﻠﻮﺓ ﻳﺎﺥ ﻻﻧﻲ ﻣﺎ ﻟﻘﻴﺘﻚ
_ ﺍﻫﺎ ﻭﻣﺸﻴﺖ ﻭﻳﻦ ؟
_ ﻣﺸﻴﺖ ﻟﺮﺑﻴﻊ
_ ﺍﻋﻮﺫ ﺑﺎﻟﻠﻪ ، ﺍﻧﺖ ﺍﻟﺰﻭﻝ ﺩﺍ ﺍﻟﺪﺭﻋﻚ ﻓﻮﻗﻮ ﺷﻨﻮ ﺗﺎﻧﻲ
_ ﺯﻭﻝ ﺻﺎﺣﺒﻲ ﻳﺎﺥ ﻭﻫﻮ ﺯﻭﻝ ﻛﻮﻳﺲ ﺷﺪﻳﺪ
_ ﻣﺎ ﺑﺘﻌﺮﻑ ﺭﺑﻴﻊ ﺍﻛﺎﻥ ﻛﺪﺍ ﺍﻧﺖ
_ ﻭﺍﻟﻠﻪ ﺯﻭﻝ ﻛﻮﻳﺲ ﺷﺪﻳﺪ ﺍﻧﺘﻮ ﻇﺎﻟﻤﻨﻮ ﺳﺎﻱ
_ ﺍﻟﺰﻭﻝ ﺩﺍ ﺍﺣﺴﻦ ﻟﻴﻚ ﺗﺨﺘﺎﻫﻮ ﻭﺍﻧﺎ ﻛﻠﻤﺖ ﻓﺮﺡ ﻳﻮﺭﻳﻚ ، ﻣﺎ ﻭﺭﺍﻙ ؟
_ ﻭﺭﺍﻧﻲ ﺑﺲ ﺍﻧﺎ ﻣﺎ ﻟﻘﻴﺘﻚ ﺍﻟﻴﻮﻡ ﺩﺍﻙ ﻋﺸﺎﻥ ﻛﺪﺍ ﻣﺸﻴﺖ ﻟﻴﻬﻮ
_ ﺍﺑﻌﺪ ﻣﻨﻮ ﻭﻣﺎ ﺗﻤﺶ ﻟﻴﻮ ﺗﺎﻧﻲ
_ ﻫﻮ ﻣﻮﺵ ﺷﻐﺎﻝ ﻣﻌﺎﻛﻢ ؟
_ ﺷﻐﺎﻝ ﻣﻌﺎﻧﺎ ﺷﻨﻮ ﻳﺎﺥ ؟ ﺩﺍ ﺯﻭﻝ ﺣﻴﻮﺍﻥ ﻭﺻﺎﻳﻊ ﺳﺎﻱ ﻭﻛﻀﺎﺏ
_ ﻭﺍﻟﻠﻪ ﻗﺎﻝ ﻟﻲ ﺷﻐﺎﻝ ﻣﻌﺎﻛﻢ
_ ﻛﻀﺎﺏ
_ ﻭﺭﺍﻧﻲ ﺍﻟﻜﺎﺭﻧﻲ ﺣﻘﻮ
_ ﺍﻟﺘﺤﺖ ﺍﻟﻄﺮﺑﻴﺰﺓ ؟
_ ﺁﻱ ﺧﺎﺗﻴﻬﻮ ﺗﺤﺖ ﺍﻟﻄﺮﺑﻴﺰﺓ
_ ﻭﺩﺍ ﻛﺎﺭﻧﻲ ؟ ﺩﻱ ﺑﻄﺎﻗﺔ ﻋﻤﻠﻬﺎ ﻟﻴﻬﻮ ﻭﺍﺣﺪ ﺑﺘﺎﻉ ﻣﻜﺘﺒﺔ
_ ﻃﻴﺐ ﺷﻐﺎﻝ ﺷﻨﻮ ﻫﻮ ؟
_ ﺷﻐﺎﻝ ﻟﻒ ﻭﺩﻭﺭﺍﻥ ﺑﺲ ﻭﺷﺮﺍﺏ ﺑﻨﻘﻮ ﺯﻭﻝ ﺻﺎﻳﻊ ﺳﺎﻱ ﻗﻠﺖ ﻟﻴﻚ ﻭﻛﻀﺎﺏ ﻭﺍﻛﺎﻥ ﻟﻘﺎﻙ ﺯﻭﻝ ﻣﺴﻜﻴﻦ ﻭﺻﺪﻗﺘﻮ ﺑﻄﻠﻊ ﺑﻴﻚ ﺍﻟﻌﺎﻟﻲ ﻭﻛﻀﺒﻮ ﻛﻀﺐ ﻛﺒﺎﺭ ﻳﻮﻫﻤﻚ ﻟﻤﻦ ﺍﻧﺖ ﺗﺼﺪﻕ ﻛﻞ ﻛﻠﻤﺔ ﺑﻘﻮﻟﻬﺎ
_ ﺍﻧﺎ ﺻﺪﻗﺘﻮ ﻭﻛﻨﺖ ﻣﺎﺷﻲ ﻟﻴﻬﻮ ﻟﻮ ﻣﺎ ﻻﻗﻴﺘﻚ
ﻭﻛﻮﻳﺲ ﺍﻧﻲ ﻻﻗﻴﺘﻚ ﻭﺭﺡ ﺍﻟﺒﻴﺖ
ﻓﻲ ﺍﻟﻄﺮﻳﻖ ﻋﺒﺎﺱ ﺣﻜﻰ ﻟﻴﻬﻮ ﻛﻞ ﺷﻲ ﻗﺎﻟﻮ ﻟﺮﺑﻴﻊ ﺣﺘﻰ ﻗﺮﻭﺷﻮ ﺍﻟﻌﻨﺪ ﻭﺩ ﺍﻟﻀﻮ ﻭﺭﺍﻫﺎ ﻟﻴﻬﻮ ﻣﺎ ﺧﻠﻰ ﺷﻲ
ﺭﺑﻴﻊ ﺟﺎﺏ ﻟﻴﻬﻮ ﻧﻈﺎﺭﺓ ﻭﻟﺒﺲ ﻟﻴﻬﻮ ﺑﺪﻟﺔ ﻭﺍﺗﺸﻴﻚ ﺗﻤﺎﻡ ﻭﻣﺸﻰ ﺍﻟﺴﻮﻕ ﻟﻮﺩ ﺍﻟﻀﻮ ﻭﺩﺧﻞ ﺍﻟﺪﻛﺎﻥ ﻭﺻﺎﺭﻱ ﻭﺷﻮ ﻋﺎﻣﻞ ﻓﻴﻬﺎ ﺯﻭﻝ ﺣﺎﺯﻡ ﻭﺻﻌﺐ ﺍﻟﻌﺒﻴﺪ ﺍﻛﺎﻥ ﻗﺎﻋﺪ ﻗﺮﻳﺐ ﻣﻦ ﺍﻟﺒﺎﺏ ﻭﻣﻦ ﺷﺎﻑ ﺭﺑﻴﻊ ﺍﺗﺬﻛﺮﻭ
_ ﺍﻧﺖ ﺍﻟﻌﺒﻴﺪ ﻣﻮﺵ ؟
_ ﺁﻱ ﺍﻧﺎ ﺍﻟﻌﺒﻴﺪ ﺍﺗﻔﻀﻞ
ﺭﺑﻴﻊ ﻣﻠﺺ ﺍﻟﻨﻀﺎﺭﺓ ﻭﻗﻌﺪ ﻳﻌﺎﻳﻦ ﻓﻴﻬﻢ ﺍﻟﺘﻼﺗﺔ ﻭﻗﺎﻝ ﻟﻠﻌﺒﻴﺪ
_ ﺍﻧﺎ ﺟﻴﺘﻜﻢ ﺍﻭﻝ ﺍﻣﺲ ﻫﻨﺎ
_ ﺁﻱ ﺍﺗﺬﻛﺮﺗﻚ ﺍﺗﻔﻀﻞ
_ ﻭﻳﻦ ﺍﻻﺳﻤﻮ ﻋﻤﺮ
ﻋﻤﺮ ﻗﺎﻝ ﻟﻴﻬﻮ ﻣﺮﺣﺐ ﻣﺮﺣﺐ ﺍﻧﺎ ﻋﻤﺮ ﺍﺗﻔﻀﻞ
ﺭﺑﻴﻊ ﺑﺤﺮﻛﺔ ﺳﺮﻳﻌﺔ ﻃﻠﻊ ﺍﻟﻜﺎﺭﻧﻲ ﻭﺭﺍﻫﻮ ﻟﻌﻤﺮ ﻭﺳﺮﻳﻊ ﺳﺮﻳﻊ ﺭﺟﻌﻮ ﺟﻴﺒﻮ ﻭﻗﺎﻝ ﻟﻴﻬﻮ ﻣﻌﺎﻙ ﺍﻟﺮﻗﻴﺐ ﺭﺑﻴﻊ ﻣﻦ ﺍﻟﻤﺒﺎﺣﺚ ﻭﺍﻟﻤﺨﺎﺑﺮﺍﺕ ﻭﻣﺤﺎﺭﺑﺔ ﺍﻟﻤﺨﺪﺭﺍﺕ
ﻭﺩ ﺍﻟﻀﻮ ﻋﺎﻳﻦ ﻟﻠﻌﺒﻴﺪ ﻭﺍﺗﻜﺸﻢ ﻭﻗﺎﻝ ﻟﻴﻬﻮ ﺣﺒﺎﺑﻚ ﺣﺒﺎﺑﻚ ﺍﺗﻔﻀﻞ
_ ﺑﺘﻌﺮﻑ ﻋﺒﺎﺱ ؟
_ ﻋﺒﺎﺱ ﻣﻨﻮ ؟
_ ﻋﺒﺎﺱ ﺍﻟﻤﻦ ﺣﻠﺘﻜﻢ ﺍﻻﺩﺍﻙ ﺍﻟﻤﻴﺔ ﺃﻟﻒ ﻭﻧﻜﺮﺗﻬﺎ ﻣﺎ ﺩﺍﻳﺮ ﺗﺮﺟﻌﻬﺎ ﻟﻴﻬﻮ
_ ﺍﻳﻮﺓ ﺑﻌﺮﻓﻮ ﻣﺎﻟﻮ ؟
_ ﺷﻮﻑ ﻳﺎ ﺯﻭﻝ ﺍﻧﺎ ﺣﺎﻟﻴﺎ ﺟﺎﻳﻴﻚ ﺑﺄﺧﻮﻱ ﻭﺃﺧﻮﻙ ﻭﺩﺍﻳﺮ ﺍﺣﻞ ﺍﻟﻤﺸﻜﻠﺔ ﺩﻱ ﺑﺸﻜﻞ ﻭﺩﻱ ﺑﺪﻭﻥ ﺍﻱ ﻣﺸﺎﻛﻞ ﻭﺟﺮﺟﺮﺓ
_ ﻣﺸﻜﻠﺔ ﺷﻨﻮ ؟
_ ﺍﻟﻘﺮﻭﺵ ﺣﻘﺎﺗﻮ ﺍﻟﻌﻨﺪﻙ
_ ﻣﺎ ﻋﻨﺪﻭ ﻋﻨﺪﻱ ﻗﺮﻭﺵ
_ ﻛﻴﻒ ﺍﻟﻜﻼﻡ ﺩﺍ ؟
_ ﻋﺪﻳﻴﻴﻞ ﻛﺪﺍ ﻣﺎ ﺍﺩﺍﻧﻲ ﻭﻻ ﺟﻨﻴﻪ ﻭﻟﻮ ﻋﻨﺪﻭ ﺷﻬﻮﺩ ﻳﺠﻴﺒﻬﻢ
_ ﺍﻭﻛﻲ ﻳﻌﻨﻲ ﻧﺎﻛﺮ ؟ ﺍﻧﺖ ﻗﺎﻳﻞ ﺍﻟﺒﻠﺪ ﺩﻱ ﻫﺎﻣﻠﺔ ﻭﻟﻼ ﻋﺸﺎﻥ ﻟﻘﻴﺘﻮ ﺻﻐﻴﺮ ﻗﻠﺖ ﺗﺎﻛﻞ ﺣﻘﻮ
_ ﺍﻧﺎ ﻣﺎ ﺍﻛﻠﺖ ﺣﻖ ﺯﻭﻝ ﻭﺩﺍ ﻣﺤﻞ ﺷﻐﻞ ﻭﺍﻛﻞ ﺍﻟﻌﻴﺶ ﺍﺗﺨﺎﺭﺝ ﻟﻴﻨﺎ ﻣﻦ ﻫﻨﺎ
_ ﺍﻟﻜﻼﻡ ﺩﺍ ﺑﺪﻳﻨﻚ ﻭﺍﻧﺎ ﻛﺪﺍ ﺑﺘﻀﻄﺮ ﺍﺗﻌﺎﻣﻞ ﻣﻌﺎﻙ ﺑﺎﻟﻮﺵ ﺍﻟﺘﺎﻧﻲ ﻭﺍﺳﻮﻗﻚ ﻣﻌﺎﻱ
_ ﺗﺴﻮﻗﻨﻲ ﻣﻌﺎﻙ ﻭﻳﻦ ؟
_ ﺍﻧﺎ ﻋﺎﺭﻑ ﺑﺴﻮﻗﻚ ﻭﻳﻦ ﻭﺑﺘﻨﺪﻡ ﺑﻌﺪﻳﻦ ﻟﻬﺴﻲ ﺍﻧﺎ ﻣﺎﻳﻞ ﻟﻠﺤﻞ ﺍﻟﻮﺩﻱ
_ ﻳﺎﺧﻲ ﻟﻮ ﺍﻧﺎ ﻗﻠﺖ ﻟﻴﻚ ﺩﺍﻳﺮ ﻣﻦ ﺍﻟﻌﺒﻴﺪ ﺩﺍ ﻣﻠﻴﻮﻥ ﺟﻨﻴﻪ ﻣﺜﻼ ﺍﻧﺖ ﺑﺘﺼﺪﻗﻨﻲ ﻭﻃﻮﺍﻟﻲ ﺑﺘﺠﻲ ﺗﺴﻮﻗﻮ؟
_ ﺍﻧﺎ ﻣﺘﺄﻛﺪ ﺍﻧﻮ ﺃﺩﺍﻙ ﻟﻴﻬﻦ
_ ﺧﻼﺹ ﺍﻣﺸﻲ ﺍﻋﻤﻞ ﺑﻼﻍ ﺭﺳﻤﻲ ﻭﺟﻴﺐ ﻟﻲ ﺃﻣﺮ ﻗﺒﺾ ﻭﺗﻌﺎﻝ ﻭﺑﺘﻠﻘﺎﻧﻲ ﺍﻧﺎ ﻗﺎﻋﺪ ﻫﻨﺎ ﻭﺑﺮﺍﻱ ﺍﻟﺒﻤﺸﻲ ﻣﻌﺎﻙ
_ ﻻ ﺗﻤﺸﻲ ﻣﻌﺎﻱ ﻫﺴﻲ ﺩﻱ
_ ﺍﻧﺖ ﻣﻨﻮ ﻳﺎﺥ ؟ ﻭﺑﺼﻔﺘﻚ ﺷﻨﻮ ﻭﻛﺪﻱ ﺍﻟﻜﺎﺭﻧﻲ ﺩﺍ ﻋﺸﺎﻥ ﺍﺗﺄﻛﺪ ﻣﻨﻮ ﺯﺍﺗﻮ
_ ﺩﺍ ﻛﺎﺭﻧﻲ ﻣﺨﺎﺑﺮﺍﺕ ﻣﺎﻭﺑﺘﺸﻮﻓﻮ ﺗﺎﻧﻲ ﻭﺍﻧﺖ ﻣﺎ ﻋﺎﺭﻑ ﺑﺘﺘﻜﻠﻢ ﻣﻊ ﻣﻨﻮ
_ ﻳﺎﺯﻭﻝ ﺍﻣﺮﻕ ﻣﻦ ﻫﻨﺎ
_ ﻋﺎﺭﻑ ﻛﻼﻣﻚ ﺩﺍ ﺍﻧﺎ ﻣﻤﻜﻦ ﺍﺩﻳﻨﻚ ﺑﻴﻬﻮ ﻭﺃﺿﻴﻌﻚ ؟ ﺍﺣﺴﻦ ﻟﻴﻚ ﺗﻤﺸﻲ ﻣﻌﺎﻱ ﺑﺎﻟﻬﺪﺍﻭﺓ ﻭﻣﺎ ﺗﺨﻠﻴﻨﻲ ﺃﻛﻔﺘﻚ ﻗﺪﺍﻡ ﺍﻟﻨﺎﺱ ﻭﺍﺳﻮﻗﻚ ﻣﻜﻠﺒﺶ
ﻭﺩ ﺍﻟﻀﻮ ﻗﺮﺹ ﻟﻠﻌﺒﻴﺪ ﻭﻗﺎﻝ ﻟﻴﻬﻮ ﺧﻼﺱ ﻣﺎ ﻳﺤﺘﺎﺝ ﻭﺍﻧﺎ ﺑﻤﺸﻲ ﻣﻌﺎﻙ ﺑﺲ ﻧﺘﻔﺎﻫﻢ ﺍﻭﻝ ﻭﻋﺸﺎﻥ ﻧﺘﻔﺎﻫﻢ ﺑﺎﻟﻬﺪﺍﻭﺓ ﺍﺣﺴﻦ ﻧﻘﻔﻞ ﺍﻟﺒﺎﺏ ﻋﻠﻴﻨﺎ
ﻭﺍﻟﻌﺒﻴﺪ ﻛﻒ ﻛﺮﻑ ﻗﻔﻞ ﺍﻟﺪﻛﺎﻥ ﻭﺭﺑﻴﻊ ﻗﺎﻝ ﻟﻴﻬﻮ ﻣﺎ ﻓﻲ ﺗﻔﺎﻫﻢ ﻣﻌﺎﻙ ﺗﺎﻧﻲ ﻭﺻﺎﺭﻱ ﻟﻴﻬﻢ ﻭﺷﻮ
ﻭﺩ ﺍﻟﻀﻮ ﻃﻮﺍﻟﻲ ﻗﺒﻘﺒﻮ ﻭﺗﺎﺡ ﻗﺸﻄﻮ ﻛﻒ ﻭﺍﻟﻌﺒﻴﺪ ﻗﺎﻝ ﻟﻴﻬﻮ ﺯﺡ ﻟﻲ ﻣﻨﻮ ﻭﺍﺳﺘﻠﻤﻮ
ﺩﻗﻮﻫﻮ ﺩﻗﺔ ﻟﻤﻦ ﻗﻌﺪ ﻳﻜﻮﺭﻙ ﻭﺍﻟﻌﺒﻴﺪ ﻗﺎﻝ ﻟﻌﻤﺎﺭ ﺷﻐﻞ ﺍﻟﻤﺴﺠﻞ ﺍﻟﺠﻤﺒﻚ ﺩﺍ ﻭﺑﺄﻋﻠﻰ ﺻﻮﺕ ﻋﺸﺎﻥ ﻣﺎﻓﻲ ﺯﻭﻝ ﻳﺴﻤﻊ ﻛﻮﺭﺍﻙ ﺍﻟﺮﻣﺔ ﺩﺍ
ﻭﺭﺑﻴﻊ ﻗﻌﺪ ﻳﺒﻜﻲ ﻭﻳﺤﻨﺲ ﻓﻴﻬﻢ ﻋﻤﺮ ﻃﻠﻊ ﺍﻟﻜﺎﺭﻧﻲ ﻣﻦ ﺟﻴﺒﻮ ﻟﻘﺎﻫﻮ ﺑﻄﺎﻗﺔ ﺍﻱ ﻛﻼﻡ ﻭﻗﺎﻝ ﻟﻴﻬﻮ ﺍﻧﻌﺪﻝ ﻭﻭﻗﻊ ﻓﻴﻬﻮ ﺗﻜﻔﺖ ﻟﻤﻦ ﻗﺎﻝ ﺑﺲ ﻭﺭﺑﻴﻊ ﻳﺒﻜﻲ ﻭﻣﺮﺍﺕ ﻳﺼﺮﺥ ﻭﺯﻭﻝ ﺳﺎﻱ ﺳﺎﻣﻌﻮ ﻣﺎﻓﻲ ﻭﻗﻌﺪ ﻳﺘﺮﺟﻰ ﻓﻴﻬﻢ ﻭﻳﺤﻨﺲ ﻋﺸﺎﻥ ﻳﻔﻜﻮﻫﻮ
ﻭﺩﻳﻞ ﺍﻻﺗﻨﻴﻦ ﻣﺎ ﻗﺼﺮﻭﺍ ﻓﻴﻬﻮ ﺩﻕ ﺑﻔﻬﻢ ﻭﺑﻌﺪ ﻓﺘﺮﻭﺍ ﺗﺐ ﺣﺘﻴﻦ ﻓﻜﻮﻫﻮ ﻭﻋﻤﺮ ﻗﺎﻝ ﻟﻴﻬﻮ ﺍﻧﺖ ﺭﺑﻴﻊ ﺻﺎﺣﺐ ﺍﻟﺤﺮﺍﻣﻲ ﻭﺩ ﺍﻟﺴﺖ ﺍﻧﺖ ﻗﺎﻳﻠﻨﻲ ﺍﻧﺎ ﻣﺎ ﺑﻌﺮﻓﻚ ؟ ﻛﻤﺎﻥ ﺟﺎﻱ ﺗﻌﻤﻞ ﻟﻲ ﻓﻴﻬﺎ ﺭﻗﻴﺐ ؟ ﻭﻓﻲ ﺍﻟﻤﺨﺎﺑﺮﺍﺕ ﻛﻤﺎﻥ ، ﻭﺍﻟﻠﻪ ﺗﺠﻲ ﻫﻨﺎ ﺗﺎﻧﻲ ﻋﻼ ﺍﻧﺪﻣﻚ ﻋﻠﻲ ﺍﻟﻴﻮﻡ ﺍﻟﻌﺮﻓﺖ ﻓﻴﻬﻮ ﻋﺒﺎﺱ
ﻭﻓﺘﺤﻮﺍ ﻟﻴﻬﻮ ﺍﻟﺒﺎﺏ ﻭﺩﻓﺮﻭﻫﻮ ﺑﺮﺓ ﻭﻗﻌﺪ ﻳﻀﺤﻜﻮﺍ
ﺍﻟﻌﺒﻴﺪ ﻗﺎﻝ ﻟﻌﻤﺮ ﺑﺘﻌﺮﻓﻮ ﻣﻦ ﻭﻳﻦ ﺍﻟﺰﻭﻝ ﺩﺍ ؟
_ ﺩﺍ ﺯﻭﻝ ﺣﻴﻮﺍﻥ ﺳﺎﻱ ﻳﺎﺥ ﻭﺻﺎﺣﺐ ﻭﺩ ﺍﻟﺴﺖ ﻭﺭﺍﻧﻲ ﻟﻴﻬﻮ ﻋﺒﺎﺱ ﻗﺒﻞ ﻓﺘﺮﺓ ﻛﺎﻥ ﺟﺒﻨﺎ ﺳﻴﺮﺓ ﻭﺩ ﺍﻟﺴﺖ ﻭﻛﻠﻤﻨﻲ ﺑﻴﻬﻮ ﻭﻣﻦ ﺩﺍ ﻗﺎﻝ ﺭﺑﻴﻊ ﺳﺎﻱ ﺍﻧﺎ ﺍﺗﺬﻛﺮﺗﻮ ﻭﻋﺮﻓﺘﻮ ﻳﺎﻫﻮ ﻫﻮ
_ ﻳﻤﻴﻦ ﺑﺎﻟﻠﻪ ﻭﻣﺎﻙ ﻃﺎﻟﺒﻨﻲ ﺣﻠﻴﻔﺔ ﺁ ﻋﻤﺮ ﺍﻧﺎ ﺍﻭﻝ ﺍﻣﺲ ﻳﻮﻡ ﺟﺎﺀ ﻫﻨﺎ ﻣﻦ ﺷﻔﺖ ﺧﻠﻘﺘﻮ ﺩﻱ ﺳﺎﻱ ﺍﺗﺬﻛﺮﺕ ﻭﺩ ﺍﻟﺴﺖ ﺍﻟﺤﺮﺍﻣﻲ
ﻋﻤﺎﺭ ﻗﺎﻝ ﻟﻴﻬﻢ ﻫﺴﻲ ﺍﻟﺰﻭﻝ ﺩﺍ ﻫﺒﺪﺗﻮﻫﻮ ﺳﺎﻱ ، ﺍﻫﺎ ﻟﻮ ﻃﻠﻊ ﻋﺴﻜﺮﻱ ﻭﻣﺎ ﻳﺎﻫﻮ ﺻﺎﺣﺐ ﻭﺩ ﺍﻟﺴﺖ ﺑﺘﻌﻤﻠﻮﺍ ﺷﻨﻮ ؟
_ ﺍﻟﻤﺸﻜﻠﺔ ﺷﻨﻮ ﻳﻌﻨﻲ ؟ ﺟﺎﻧﺎ ﺑﺮﺍﻫﻮ ﻭﺍﺗﻬﺠﻢ ﻋﻠﻴﻨﺎ ﻓﻲ ﺩﻛﺎﻧﺎ ﻭﻻ ﺑﻨﻌﺮﻓﻮ
_ ﻋﻠﻲ ﻛﻴﻔﻜﻢ ﺍﻧﺎ ﻏﺎﻳﺘﻮ ﻣﺎ ﺩﻗﻴﺘﻮ ﻣﻌﺎﻛﻢ
_ ﻭﺍﻟﻠﻪ ﺑﺎﻟﻐﺖ ﻳﺎﺥ ﺍﻛﺎﻥ ﺗﺠﻲ ﺗﻠﻔﺨﻮ ﻭﺗﻀﻮﻗﻮ ﻳﺪﻙ .
ﺭﺑﻴﻊ ﺃﻛﺎﻥ ﻓﺎﻛﺮ ﻭﺩ ﺍﻟﻀﻮ ﻣﺴﻜﻴﻦ ﻭﻃﻴﺐ ﺯﻱ ﻋﺒﺎﺱ ﻭﺟﺎﺀ ﻗﺎﻝ ﻳﻐﺸﻮ ﻭﻳﺨﻮﻓﻮ ﺑﻜﻀﺒﺔ ﺍﻧﻮ ﺭﻗﻴﺐ ﻭﺍﻧﻮ ﻓﻲ ﺍﻟﻤﺒﺎﺣﺚ ﻭﺍﻟﻤﺨﺎﺑﺮﺍﺕ ﻭﻳﻮﻫﻤﻮ ﺑﺎﻟﻜﺎﺭﻧﻲ ﺣﻘﻮ ﻋﺸﺎﻥ ﻳﻠﻬﻂ ﺍﻟﻘﺮﻭﺵ ﺣﻘﺖ ﻋﺒﺎﺱ
ﻋﺒﺎﺱ ﻣﻊ ﺍﺑﺠﺎﻛﻮﻣﺔ ﻓﻲ ﺍﻟﺒﻴﺖ ﻭﻟﻬﺴﻲ ﻣﺎ ﻣﺼﺪﻕ ﺍﻧﻮ ﺭﺑﻴﻊ ﻛﻀﺎﺏ ﻭﻗﺎﻝ ﻻﺑﺠﺎﻛﻮﻣﺔ ﻳﺎﺥ ﺑﺘﺘﺬﻛﺮ ﻟﻤﻦ ﺟﻴﻨﺎ ﺍﻧﺎ ﻭﺭﺑﻴﻊ ﻫﻨﺎ ﺍﻭﻝ ﻣﺮﺓ ؟
_ ﺍﻳﻮﺓ
_ ﺍﻧﺖ ﺍﺩﻳﺘﻮ ﺑﻨﻘﻮ ؟
_ ﺑﻨﻘﻮ ؟ ﻫﻮ ﻗﺎﻝ ﻟﻴﻚ ﺍﻧﺎ ﺍﺩﻳﺘﻮ ﺑﻨﻘﻮ ؟
_ ﺁﻱ ﻭﺍﻟﻠﻪ
_ ﺑﻨﻘﻮ ﺷﻨﻮ ﻳﺎﺯﻭﻝ ﺩﻱ ﻭﺭﻗﺔ ﺳﺎﻱ ﻛﻨﺖ ﺑﻜﺮﻓﺲ ﻓﻴﻬﺎ ﻓﻲ ﻳﺪﻱ ﻭﻏﻤﺰ ﻟﻲ ﻋﺸﺎﻥ ﺍﺩﻳﻬﺎ ﻟﻴﻬﻮ ﻭﻫﻮ ﻏﻤﺘﻬﺎ ﺳﺮﻳﻊ ﻓﻲ ﺟﻴﺒﻮ ،ﺑﺲ ﺍﻧﺎ ﻣﺎ ﻛﻨﺖ ﺑﻌﺮﻓﻚ ، ﻗﺎﻳﻠﻚ ﻣﻦ ﺍﺻﺤﺎﺑﻮ ﺍﻟﻌﻮﺍﻟﻴﻖ ﺍﻟﺒﺒﺎﺭﻭﻫﻮ
_ ﺍﻧﺎ ﻋﺮﻓﻨﻲ ﺑﻴﻬﻮ ﻭﺍﺣﺪ ﻣﻦ ﺣﻠﺘﻨﺎ ﺍﺳﻤﻮ ﺣﺎﺗﻢ ﻭﺩ ﺍﻟﺴﺖ
_ ﺑﻌﺮﻓﻮ ﻭﺷﻐﺎﻝ ﺣﺮﺍﻣﻲ ﻭﺟﻨﻮ ﺳﻜﺮ ﻻﻗﻴﺘﻮ ﻣﻌﺎﻫﻮ ﻛﻢ ﻣﺮﺓ
_ ﺑﺲ ﻳﺎﻫﻮ . ﻟﻜﻦ ﺍﻧﺘﻮ ﻣﺎﻟﻜﻢ ﻣﺎ ﻗﺒﻀﺘﻮ ﻋﻠﻲ ﺭﺑﻴﻊ ﺩﺍ
_ ﺭﺑﻴﻊ ﺩﺍ ﻭﺩ ﺟﻴﺮﺍﻧﺎ ﻳﺎﺥ ﻭﺍﻟﻐﺮﻳﺒﺔ ﺍﻫﻠﻮ ﻛﻠﻮ ﻛﻮﻳﺴﻴﻦ ﻭﻋﻨﺪﻭ ﺍﺧﻮﺍﻥ ﺗﻤﺎﻡ ﺑﺲ ﻫﻮ ﺍﻟﺼﺎﻳﻊ ﻭﺯﻭﻝ ﺑﻠﻴﺪ ﺧﻼﺱ ﻣﺎ ﺗﺸﻮﻓﻮ ﻛﺪﺍ ، ﺍﺗﻌﻮﺩ ﻋﻠﻲ ﺍﻟﻜﻀﺐ ﻭﺍﻟﻠﻒ ﻭﺍﻟﺪﻭﺭﺍﻥ
_ ﺑﺲ ﻫﻮ ﻣﺎ ﺳﺎﻛﻦ ﻫﻨﺎ ﻣﻊ ﺍﻫﻠﻮ
_ ﺁﻱ ﺣﺎﺭﺱ ﺑﻴﺖ ﺍﺧﺘﻮ
_ ﻭﺍﻟﻠﻪ ﺍﻟﺰﻭﻝ ﺩﺍ ﻛﻀﺐ ﻋﻠﻲ ﻛﺘﺮﺓ ﻛﻀﺐ
_ ﻧﺤﻦ ﻗﻠﻨﺎ ﻟﻴﻚ ﺍﺑﻌﺪ ﻣﻨﻮ ﻟﺸﻨﻮ ؟ ﻻﻧﻮ ﻋﺎﺩﻱ ﻣﻤﻜﻦ ﻳﻮﺭﻃﻚ ﻓﻲ ﻣﺸﻜﻠﺔ ﻭﻳﺰﻭﻍ ﻣﻨﻚ
_ ﻭﺍﻟﻠﻪ ﺍﻟﺒﺮﻛﺔ ﺍﻟﻼﻗﻴﺘﻚ ﻳﺎﺥ ﺍﻟﺰﻭﻝ ﺩﺍ ﺍﻛﺎﻥ ﺳﺎﺭﺡ ﺑﻲ ﺳﺎﻱ ﻭﻛﻤﺎﻥ ﻗﺎﻝ ﻟﻲ ﺑﺠﻴﺐ ﻟﻴﻚ ﻗﺮﻭﺷﻚ ﻣﻦ ﻭﺩ ﺍﻟﻀﻮ
_ ﻭﺍﻟﻠﻪ ﺷﻮﻑ ﺁ ﻋﺒﺎﺱ ﺍﻧﺖ ﻗﺒﻴﻞ ﺣﻜﻴﺖ ﻟﻲ ﻛﻞ ﺷﻲ ﻭﻟﻮ ﺩﺍﻳﺮ ﻧﺼﻴﺤﺘﻲ ﺃﻣﺶ ﻟﻮﺩ ﺍﻟﻀﻮ ﺩﺍ ﻭﺍﻗﻌﺪ ﻣﻌﺎﻫﻮ ﻭﺍﻋﺘﺬﺭ ﻟﻴﻬﻮ ﻭﺍﻟﺰﻭﻝ ﺩﺍ ﻣﻦ ﻛﻼﻣﻚ ﺍﻟﻘﻠﺘﻮ ﻟﻲ ﺍﻭﻝ ﺯﻭﻝ ﻛﻮﻳﺲ ﻭﺑﺨﺎﻑ ﺍﻟﻠﻪ ﻣﺎ ﺑﻴﺎﻛﻞ ﺣﻘﻚ
_ ﻳﺎﺥ ﻗﺎﻝ ﺍﻣﺸﻲ ﺍﺷﺘﻜﻲ
_ ﻻﻧﻚ ﻣﺎ ﺍﺣﺘﺮﻣﺘﻮ ﻭﻗﻠﻴﺖ ﺍﺩﺑﻚ ﻣﻌﺎﻫﻮ
_ ﻫﺴﻲ ﺍﻧﺎ ﻭﺍﻟﻠﻪ ﺑﻘﻴﺖ ﻻﻓﻲ ﺳﺎﻱ ﻳﺎﺥ ﺣﺘﻰ ﺷﻐﻠﻲ ﺍﻻﻭﻝ ﺑﻘﻴﺖ ﺷﺎﻳﻔﻮ ﻣﺎ ﺳﻤﺢ
_ ﺍﻱ ﺷﻐﻞ ﺑﺠﻴﺐ ﻗﺮﻭﺵ ﺳﻤﺢ
_ ﻃﻴﺐ ﺭﺑﻴﻊ ﺩﺍ ﺍﺗﺼﺮﻑ ﻣﻌﺎﻫﻮ ﻛﻴﻒ ؟
_ ﻭﻻ ﺗﻼﻗﻴﻬﻮ ﺗﺎﻧﻲ ﻭﺣﻜﺎﻳﺔ ﻳﻜﻠﻢ ﺿﺎﺑﻂ ﻳﺠﻴﺐ ﻟﻴﻚ ﺣﻘﻚ ﺩﻱ ﻛﻀﺒﺔ ﻣﻨﻮ ﺳﺎﻱ ﺍﻛﺎﻥ ﺩﺍﻳﺮ ﻳﺎﻛﻞ ﺑﻴﻬﺎ ﺍﻟﻘﺮﻭﺵ ﺍﻟﻌﻨﺪﻙ
_ ﺻﺎﺡ ﻭﺍﻟﻠﻪ ، ﻋﺮﻓﺘﻮ ﻛﻴﻒ ؟
_ ﺑﺮﺍ ﻗﻠﺖ ﻟﻲ ﺷﺎﻝ ﻣﻨﻚ ﺍﺭﺑﻌﺔ ﺍﻟﻒ ﻭﺍﺩﺍﻫﺎ ﻭﺍﺣﺪ ؟
_ ﻭﺟﺎﺀ ﻓﻲ ﻧﻔﺲ ﺍﻟﻴﻮﻡ ﻗﺎﻝ ﻟﻲ ﺍﻟﺰﻭﻝ ﺳﺎﻓﺮ ﻭﻣﺎ ﺑﻌﻤﻞ ﺷﻲ ﺍﻻ ﺍﺷﻮﻑ ﺯﻭﻝ ﻏﻴﺮﻭ
_ ﺩﺍﻳﺮ ﺗﻮﺭﻳﻨﻲ ﺭﺑﻴﻊ ؟ ﺍﻧﺎ ﺣﺎﻓﻈﻮ ﺣﻔﻆ ﻣﻦ ﺳﺎﻋﺘﻮ ﺍﻟﺼﻐﻴﺮ .
ﻋﺜﻤﺎﻥ ﻗﺎﻝ ﻟﻌﺒﺪ ﺍﻟﻘﻴﻮﻡ ﻋﺒﺎﺱ ﺍﻛﺎﻥ ﻫﻨﺎ ﻭﺳﺎﻓﺮ ﺍﻟﺤﻠﺔ ﺍﻟﻠﻴﻠﺔ
_ ﻋﺒﺎﺱ ﺩﺍ ﻣﺎﻟﻮ ﺑﻘﻰ ﻛﺪﺍ ﻳﺎﺥ ؟
_ ﺑﻘﻰ ﺯﻭﻝ ﻃﻴﺮﺓ ﺳﺎﻱ
_ ﻭﺍﻛﺎﻥ ﻗﺎﻋﺪ ﻭﻳﻦ ﻭﺟﺎﺀ ﻫﻨﺎ ﻣﺘﻴﻦ ؟
_ ﻣﺎ ﺑﻌﺮﻓﻮ ﻭﺍﻟﻠﻪ ﺟﺎﻧﻲ ﻗﺎﻃﻊ ﺗﺬﻛﺮﺗﻮ ﻭﻗﻌﺪ ﻟﻤﻦ ﺍﻟﺒﺺ ﺍﺗﻤﻼ
_ ﻣﺎ ﺳﻌﻠﺘﻮ ﺍﻛﺎﻥ ﻭﻳﻦ ؟
_ ﺍﻧﺎ ﻣﻦ ﺍﻟﻴﻮﻡ ﺩﺍﻙ ﻏﺴﻠﺖ ﻳﺪﻱ ﻣﻨﻮ ، ﺍﺳﻌﻠﻮ ﻣﺎﻟﻲ ﻭﻣﺎﻟﻮ
_ ﺩﺍ ﺩﺍﻳﺮ ﻳﻜﻤﻞ ﻗﺮﻭﺷﻮ ﺳﺎﺳﺎﻕ ﺳﺎﻱ ﻓﻲ ﺍﻟﻔﺎﺿﻲ ﻭﻟﻼ ﺷﻨﻮ ؟
_ ﻓﻲ ﻧﺎﺱ ﻛﺘﺎﺭ ﺯﻳﻮ ﻛﺪﺍ ﺍﻟﻮﺍﺣﺪ ﻣﻦ ﻳﻤﺴﻚ ﻟﻴﻬﻮ ﻗﺮﻭﺵ ﺗﺎﻧﻲ ﻣﺎ ﺑﺸﺘﻐﻞ ﻋﻼ ﻳﻜﻤﻠﻦ ﻭﻳﻨﻌﺼﺮ
_ ﻟﻮ ﺟﺎ ﺍﻧﺎ ﻣﺎ ﺑﺨﻠﻴﻬﻮ ﻳﺴﺎﻓﺮ ﺗﺎﻧﻲ
_ ﻣﺎﻟﻚ ﻭﻣﺎﻟﻮ ﻭﻻ ﺗﺸﺘﻐﻞ ﺑﻴﻬﻮ ﺯﺍﺗﻮ ﻫﻮ ﺳﻼﻡ ﻣﺎ ﺟﺎﺀ ﺳﻠﻢ ﻋﻠﻴﻚ
ﺍﻟﻴﻮﻡ ﺍﻟﺘﺎﻧﻲ ﻋﺒﺎﺱ ﺳﻤﻊ ﻛﻼﻡ ﺍﺑﺠﺎﻛﻮﻣﺔ ﻭﻓﺎﺕ ﻟﻮﺩ ﺍﻟﻀﻮ ﻓﻲ ﺍﻟﺪﻛﺎﻥ ﻭﺳﺎﻗﻮ ﺑﺮﺓ ﺑﻌﻴﺪ ﻣﻦ ﺍﻟﻌﺒﻴﺪ ﻭﻋﻤﺎﺭ ﻭﺍﻋﺘﺬﺭ ﻟﻴﻬﻮ ﻛﺘﻴﺮ ﻭﻣﺎ ﺳﻜﺖ ﻣﻨﻮ ﺍﻻ ﻟﻤﻦ ﻭﺩ ﺍﻟﻀﻮ ﺣﻠﻒ ﻟﻴﻬﻮ ﺍﻧﻮ ﻣﺎ ﺯﻋﻼﻥ
ﻭﺗﺎﻧﻲ ﻋﺒﺎﺱ ﻗﺎﻝ ﻟﻴﻬﻮ ﺩﺍﻳﺮ ﺍﻟﻘﺮﻭﺵ
ﻗﺎﻝ ﻟﻴﻬﻮ ﻻ ﺍﺩﻳﺘﻨﻲ ﻗﺮﻭﺵ ﻭﻻ ﺑﻌﺮﻓﻚ
_ ﻳﺎ ﻋﻤﺮ ﻳﺎﺥ ﺍﻟﻜﻼﻡ ﺩﺍ ﻣﺎ ﺻﺎﺡ ﻭﺍﻧﺎ ﻣﺎﺷﻲ ﺍﺷﺘﻐﻞ ﺑﻴﻬﻦ ﻭﺍﻟﻠﻪ
_ ﺍﻛﺎﻥ ﺩﺍﻳﺮ ﺗﺸﺘﻐﻞ ﻫﻨﺎ ﻓﻲ ﻣﺪﻧﻲ ﺩﻱ ﺍﻧﺎ ﺑﺴﺎﻋﺪﻙ ﻭﻋﺸﺎﻥ ﺍﻧﺖ ﻭﺩ ﺣﻠﺘﻨﺎ ﺑﺲ
_ ﺗﺴﺎﻋﺪﻧﻲ ﻛﻴﻒ ﻭﺑﺸﻨﻮ ؟
_ ﺑﺪﻳﻨﻚ ﻗﺮﻭﺵ ﺗﻔﺮﺵ ﺑﻴﻬﺎ ﺧﻀﺎﺭ ﻭﻟﻼ ﺑﺼﻞ ﻭﻟﻼ ﺃﻱ ﺷﻲ ﻭﻟﻼ ﺗﺸﺘﻐﻞ ﺑﻴﻬﺎ ﻓﻲ ﺍﻟﻤﻮﻗﻒ ﺯﻱ ﺷﻐﻠﺘﻚ ﺍﻟﻜﻨﺖ ﺷﻐﺎﻟﻬﺎ ﻓﻲ ﺍﻟﺨﺮﻃﻮﻡ
_ ﻛﺮﺗﻮﻧﺔ ﺗﺎﻧﻲ ؟
_ ﺁﻱ ﻛﺮﺗﻮﻧﺔ ، ﻣﺎﻟﻬﺎ ﺍﻟﻜﺮﺗﻮﻧﺔ ﻋﻴﺒﻬﺎ ﻟﻲ
_ ﻳﺎﺧﻲ ﺩﺍﻳﺮ ﻗﺮﻭﺷﻲ ﺑﺲ ﻭﺍﻧﺎ ﻣﺎ ﺑﺸﺘﻐﻞ ﺑﻜﺮﺗﻮﻧﺔ ﺗﺎﻧﻲ ﻭﻫﺴﻲ ﻟﻮ ﻣﺎ ﺍﻧﺖ ﺍﻛﺎﻥ ﺑﻜﻮﻥ ﻋﻨﺪﻱ ﺩﻛﺎﻥ ﺍﻟﻜﺘﺮﻭﻧﻴﺎﺕ ﻛﺒﻴﺮ ﻓﻲ ﺍﻟﺨﺮﻃﻮﻡ
_ ﺍﻧﺎ ﻣﺎ ﺍﺣﻤﻴﺘﻚ ﻫﺪﻳﻚ ﺍﻟﺨﺮﻃﻮﻡ ﺍﻣﺶ ﻟﻴﻬﺎ
_ ﺍﻣﺶ ﻟﻴﻬﺎ ﺑﺮﺍ ﻗﺮﻭﺷﻲ ؟
_ ﺍﻭﻝ ﻣﺮﺓ ﻣﺸﻴﺖ ﻟﻴﻬﺎ ﺑﻘﺮﻭﺵ ؟
_ ﻳﻌﻨﻲ ﺍﻓﻬﻢ ﺷﻨﻮ ﺍﻧﺎ ؟
_ ﺍﻓﻬﻢ ﺍﻟﺪﺍﻳﺮ ﺗﻔﻬﻤﻮ ﻭﺍﻧﺎ ﻛﻼﻣﻲ ﻭﺍﺿﺢ
_ ﻳﻌﻨﻲ ﻣﺎ ﺩﺍﻳﺮ ﺗﺪﻳﻨﻲ ﻗﺮﻭﺷﻲ ؟
_ ﻣﺎ ﻋﻨﺪﻙ ﻋﻨﺪﻱ ﻗﺮﻭﺵ
ﻋﺒﺎﺱ ﺑﻜﻲ ﻭﻋﻤﺮ ﻗﺎﻝ ﻟﻴﻬﻮ ﻣﺎ ﺗﺘﺒﻜﻲ ﻟﻲ ﺍﻧﺎ ﻋﻨﺪﻱ ﺷﻐﻞ ﻣﺎ ﻓﺎﺿﻲ ﻟﻴﻚ ﻗﻠﺖ ﺷﻨﻮ ؟
_ ﻓﻲ ﺷﻨﻮ ؟
_ ﻓﻲ ﺍﻟﺸﻐﻞ ، ﻟﻮ ﺭﺿﻴﺎﻥ ﻭﺑﺘﺸﺘﻐﻞ ﻫﻨﺎ ﺍﻧﻘﻮﻡ ﺍﺷﻮﻑ ﻟﻴﻚ ﻛﺮﺗﻮﻧﺔ ﻣﻦ ﺍﻟﻜﺮﺍﺗﻴﻦ ﺍﻟﻔﺎﺿﻴﺔ ﺍﻟﻌﻨﺪﻱ ﻓﻲ ﺍﻟﺪﻛﺎﻥ ﺃﺟﻴﺒﻬﺎ ﻟﻴﻚ
_ ﺍﻧﺎ ﺩﺍﻳﺮ ﻗﺮﻭﺷﻲ ﺑﺲ
_ ﻳﺎ ﺯﻭﻝ ﻣﺎ ﺗﺸﻮﻑ ﻣﺸﻬﺎﺩﻙ ﻫﺴﻲ ﺍﻧﺖ ﺃﻣﻚ ﻓﻲ ﺍﻟﻤﺴﺘﺸﻔﻰ ﻟﻴﻬﺎ ﺗﻼﺗﺔ ﻳﻮﻡ
_ ﻣﺎﻟﻬﺎ ﺍﻣﻲ
_ ﺭﺍﺟﻠﻬﺎ ﻣﺮﻗﺪ ﻭﻫﻲ ﻣﻌﺎﻫﻮ ﻳﻌﻨﻲ ﻣﺎ ﻋﺎﺭﻑ ؟
_ ﻭﺍﻟﻠﻪ ﻣﺎ ﻋﺎﺭﻑ
_ ﺍﻧﺖ ﻓﺎﺿﻲ ﻣﻦ ﺍﻟﺼﻴﺎﻋﺔ ﻭﺍﻟﺴﻜﺮ ﻣﻊ ﺭﺑﻴﻊ ؟
_ ﺭﺑﻴﻊ ﺍﻧﺖ ﺑﺘﻌﺮﻓﻮ ﻣﻦ ﻭﻳﻦ ؟
_ ﺍﻣﺶ ﺍﻣﺶ ﻋﻠﻲ ﺍﻣﻚ ﻳﺎ ﻋﺒﺎﺱ ﻭﺑﻄﻞ ﺻﻴﺎﻋﺔ ﻭﺷﻮﻑ ﻟﻴﻚ ﺷﻐﻠﺔ ﺗﻨﻔﻌﻚ ﺑﺮﺍ ﺭﺑﻴﻊ ﺑﺮﺍ ﻋﻔﻦ
ﻋﺒﺎﺱ ﻓﺎﺕ ﺍﻟﻤﺴﺘﺸﻔﻰ ﻭﻋﻤﺮ ﺩﺧﻞ ﺍﻟﺪﻛﺎﻥ ، ﺍﻟﻌﺒﻴﺪ ﻗﺎﻝ ﻟﻴﻬﻮ ﻣﺎﻟﻮ ﺍﻟﺰﻭﻝ ﺩﺍ ﺟﺎﺀ ﻟﻠﻘﺮﻭﺵ ﻭﻟﻼ ﺷﻨﻮ ؟
_ ﺁﻱ ﺍﻟﺠﻨﻰ ﺩﺍ ﺗﺎﻧﻲ ﻣﺎ ﺍﻇﻦ ﻳﻨﻔﻊ ، ﺍﻟﻤﻬﻢ ﺍﻧﺎ ﻣﺎﺷﻲ ﺍﻟﺨﺮﻃﻮﻡ ﻫﺴﻲ
_ ﻟﺸﻨﻮ ؟
_ ﻓﻲ ﺑﻀﺎﻋﺔ ﺍﺷﺘﺮﻳﺘﻬﺎ ﻣﺎ ﺟﺎﺗﻨﻲ
_ ﻛﻞ ﺍﻟﺒﻀﺎﻋﺔ ﺟﺎﺕ ﻧﺤﻦ ﺭﺍﺟﻌﻨﺎ ﺍﻟﻔﻮﺍﺗﻴﺮ
_ ﻋﻨﺪﻱ ﻏﺮﺽ ﺗﺎﻧﻲ ﻭﺍﻧﺎ ﻣﺎﺷﻲ ﻭﺑﺠﻲ ﺑﻜﺮﺓ
ﻋﺒﺎﺱ ﻣﺸﻰ ﺍﻟﻤﺴﺘﺸﻔﻰ ﻭﻗﺎﺑﻞ ﺍﻣﻮ ﻭﺯﺍﺭ ﺭﺍﺟﻠﻬﺎ ﻭﻗﺎﻝ ﻻﻣﻮ ﻣﺎ ﻛﻨﺖ ﻋﺎﺭﻓﻜﻢ ﻫﻨﺎ ﻭﺍﻧﺎ ﺟﻴﺖ ﺍﻟﻠﻴﻠﺔ ﻭﻛﻠﻤﻨﻲ ﻭﺩ ﺍﻟﻀﻮ
ﻗﺎﻟﺖ ﻟﻴﻮ ﻭﺍﻟﻠﻪ ﻛﺘﺮ ﺧﻴﺮﻭ ﻭﺩ ﺍﻟﻀﻮ ﺯﻭﻝ ﺗﻤﺎﻡ . ﻓﺘﺢ ﻟﻴﻬﻮ ﺩﻛﺎﻥ ﻛﺒﻴﺮ ﻭﺍﻧﺖ ﻫﺴﻲ ﻟﻮ ﺍﺷﺘﻐﻠﺖ ﻣﻌﺎﻭ ﻣﺎ ﺍﺧﻴﺮ ﻟﻴﻚ ﻣﻦ ﺍﻟﺨﺮﻃﻮﻡ ؟
_ ﻣﺎ ﺍﺧﻴﺮ ﻟﻲ ﻭﻻ ﺷﻲ ﻭﺍﻧﺎ ﺯﺍﺗﻲ ﻓﺘﺤﺖ ﻟﻲ ﺩﻛﺎﻥ ﻓﻲ ﺍﻟﺨﺮﻃﻮﻡ ﺍﺣﺴﻦ ﻣﻦ ﺩﻛﺎﻧﻮ ﺍﻟﻔﺘﺤﻮ ﺩﺍ
ﻧﻌﻴﻤﺔ ﻗﺮﺑﺖ ﺗﺰﻏﺮﺩ ﻣﻦ ﺍﻟﻔﺮﺣﺔ ﻭﻣﺸﺖ ﻛﻠﻤﺖ ﺭﺍﺟﻠﻬﺎ ﻭﺍﻫﻞ ﺭﺍﺟﻠﻬﺎ ﻭﻛﻠﻬﻢ ﺑﺎﺭﻛﻮﻫﻮ ﻟﻴﻬﻮ ﻭﺍﻟﺒﺠﻴﻬﻢ ﺯﺍﻳﺮ ﻛﻠﻮ ﺑﺘﻜﻠﻤﻮ ﺑﺎﻟﺪﻛﺎﻥ ﺍﻟﻔﺘﺤﻮ ﻋﺒﺎﺱ ﻭﻟﺪﻫﺎ ﻓﻲ ﺍﻟﺨﺮﻃﻮﻡ ﻭﻣﺒﺴﻮﻃﺔ ﺗﻀﺤﻚ ﺳﻦ ﺳﻦ
ﻳﺘﺒﻊ