ﻋﺒﺎﺱ ﻭﻭﺩ ﺍﻟﻀﻮ ﺍﺗﻌﺎﻗﺒﻮﺍ ﻓﻲ ﺍﻟﻄﺮﻳﻖ ﻣﺎ ﺍﺗﻼﻗﻮﺍ ﺩﺍ ﺩﺧﻞ ﻭﺩﺍﻙ ﻣﺮﻕ ﻭﻋﺒﺎﺱ ﻃﻴﻠﺔ ﺍﻟﻤﺸﻮﺍﺭ ﻛﺎﻥ ﺑﻔﻜﺮ ﻓﻲ ﺍﻟﺘﺎﺝ ﻭﺩﺍﻳﺮ ﻟﻴﻬﻮ ﻓﻜﺮﺓ ﺣﻠﻮﺓ ﻳﺠﻲ ﺩﺍﺧﻞ ﻟﻴﻬﻮ ﺑﻴﻬﺎ ﻭﻗﺪﺭ ﻣﺎ ﻓﻜﺮ ﻣﺎ ﻟﻘﻰ ﻓﻲ ﺍﻵﺧﺮ ﻗﺎﻝ ﺍﺗﻠﻬﻤﻮ ﺑﺲ ﻭﺃﻗﻊ ﻟﻴﻬﻮ ﻓﻲ ﻋﺒﻮ ﻣﻮﺵ ﻫﻮ ﺑﺮﺍﻭ ﺍﻟﻘﺎﻝ ﻋﺎﺩﻳﻨﻲ ﺯﻱ ﺍﺧﻮﻫﻮ ،ﺧﻼﺱ ﻳﻤﺴﻚ ﻋﻠﻴﻬﻮ ﺍﺧﻮﻫﻮ
ﻭﺍﻭﻝ ﻣﺎ ﻧﺰﻝ ﻓﺎﺕ ﻟﻴﻬﻮ ﻭﺍﻟﺘﺎﺝ ﻣﻦ ﺷﺎﻓﻮ ﻗﻌﺪ ﻳﺼﺮﺻﺮ ﻓﻲ ﻭﺷﻮ ﻭﻋﺒﺎﺱ ﻋﻤﻞ ﺭﺍﻳﺢ ﻭﺳﻠﻢ ﻋﻠﻴﻬﻮ ﺳﻼﻡ ﺷﻮﻕ ﻭﺍﻟﺒﺴﻤﺔ ﻣﺎﻟﻴﺔ ﻭﺷﻮ ﻟﻤﻦ ﺍﻟﺘﺎﺝ ﻗﻌﺪ ﻳﺘﻜﺸﻢ ﻭﻗﺎﻝ ﻟﻴﻬﻮ ﺍﻧﺎ ﻗﻠﺖ ﻟﻴﻚ ﺷﻨﻮ ﻳﻮﻣﺪﺍﻙ ؟
_ ﻗﻠﺖ ﻟﻲ ﺷﻨﻮ ﻳﺎﺥ ؟
_ ﻣﺎ ﻗﻠﺖ ﻟﻴﻚ ﻣﺎ ﺗﺠﻴﻨﻲ ﺗﺎﻧﻲ ؟
_ ﺍﻓﻮﺗﻚ ﺍﻗﺒﻞ ﻭﻳﻦ ﺍﻧﺎ ﻓﻲ ﺯﻭﻝ ﻋﻴﻨﻮ ﻻﺧﻮﻫﻮ ﺍﻟﻜﺒﻴﺮ ﻭﻣﺎ ﻳﺠﻴﻬﻮ ؟
_ ﺍﺧﻮﻙ ﺍﻟﻜﺒﻴﺮ ؟
_ ﻭﺍﻛﺘﺮ ﻣﻦ ﺍﺧﻮﻱ ﻛﻤﺎﻥ ﻭﺳﻴﻚ ﺳﻴﻚ ﻭﻣﻌﻠﻖ ﻓﻴﻚ
_ ﻫﻮﻱ ﺍﻧﺎ ﻣﺎ ﻓﺎﺿﻲ ﻟﻴﻚ
_ ﺍﻧﺎ ﺯﺍﺗﻲ ﺟﻴﺖ ﻫﺴﻲ ﻭﺍﻟﻠﻪ ﻭﻣﺎﺭﻕ ﻓﻲ ﺑﺤﺮﻱ ﺍﻭﺩﻱ ﺍﻟﻮﺻﻴﺔ ﺩﻱ ﻭﺍﺟﻲ
_ ﻟﻔﺮﺡ ﻭﻟﻼ ﺷﻨﻮ ؟
_ ﺁﻱ ﻟﻔﺮﺡ ﺍﺩﺍﻧﻲ ﻟﻴﻬﺎ ﻭﺍﺣﺪ ﻗﺮﻳﺒﻮ ﻭﺑﻮﺩﻳﻬﺎ ﻟﻴﻬﻮ ﻭﺑﺠﻴﻚ
_ ﺗﺠﻴﻨﻲ ﻭﻳﻦ ؟
_ ﻟﺒﻌﺪﻳﻦ ﻳﺎ ﺍﺑﻮ ﺍﻟﺮﺟﺎﻝ ﺑﻔﻬﻤﻚ ﺍﻟﻤﻮﺿﻮﻉ ﻛﻠﻮ ﻣﻦ ﻃﻘﻄﻖ ﻭﺍﻟﻤﻮﺿﻮﻉ ﺑﻬﻤﻚ ﺷﺪﻳﺪ
_ ﻧﺸﻮﻑ ﻭﺑﻌﺪﻳﻦ ﻗﺮﻳﺒﺔ
ﺍﻟﺘﺎﺝ ﻗﻌﺪ ﻳﻀﺤﻚ ﻭﻗﺎﻝ ﺍﻟﺠﻨﻰ ﺩﺍ ﻓﺘﺢ ﻭﺍﻛﺎﻥ ﻣﺴﻜﻴﻦ ﻭﻃﻴﺮﺓ ﺳﺎﻱ ﻭﻣﺎ ﺑﺘﻜﻠﻢ ﻛﺪﺍ ، ﻣﺎﻟﻮ ﺍﻟﺠﺪﺍ ﻋﻠﻴﻬﻮ ﺷﻨﻮ ؟ ﻭﺍﻟﻤﻮﺿﻮﻉ ﺷﻨﻮ ﺍﻟﺒﻬﻤﻨﻲ ﺷﺪﻳﺪ ﺩﺍ ؟
ﻭﻋﺒﺎﺱ ﻭﻻ ﻏﺸﻰ ﻋﺜﻤﺎﻥ ﻣﺮﻕ ﻣﻦ ﺍﻟﺘﺎﺝ ﻭﻓﺎﺕ ﻋﻠﻲ ﺍﻟﻤﻮﺍﺻﻼﺕ ﻣﺸﻰ ﺑﺤﺮﻱ ﻭﻣﺒﺴﻮﻁ ﻣﻦ ﻛﻼﻣﻮ ﻣﻊ ﺍﻟﺘﺎﺝ ﻭﻗﺎﻝ ﺍﻟﻠﻴﻠﺔ ﺩﻱ ﺑﺠﻴﺐ ﺭﺍﺳﻮ ﻭﺑﺴﻜﻦ ﻣﻌﺎﻫﻮ ﻭﻛﻮﻳﺲ ﺍﻧﻲ ﻗﻠﺖ ﻟﻴﻬﻮ ﻓﻲ ﻣﻮﺿﻮﻉ ﺑﻬﻤﻚ ﻛﺪﻱ ﺑﺠﻴﻬﻮ ﻓﻲ ﺍﻟﺒﻴﺖ ﺑﻌﻴﻦ ﻗﻮﻳﺔ
ﻣﺸﻰ ﺑﺤﺮﻱ ﻭﻃﺒﻌﺎ ﺑﻌﺮﻑ ﺍﻟﺒﻴﺖ ﻣﺸﻰ ﻋﻠﻴﻬﻮ ﻃﻮﺍﻟﻲ . ﺍﻳﺎﻣﻮ ﺍﻟﻜﺎﻥ ﻗﺎﻋﺪ ﻣﻊ ﻓﺮﺡ ﻋﺎﺭﻑ ﺍﻟﻄﺮﻳﻘﺔ ﺍﻟﺒﻨﻔﺘﺢ ﺑﻴﻬﺎ ﺑﺎﺏ ﺍﻟﺤﻮﺵ ﻟﻮ ﻣﺎ ﻋﻨﺪﻭ ﻣﻔﺘﺎﺡ ﻭﻓﻲ ﺣﺠﺮ ﻗﺮﻳﺐ ﻣﻦ ﺍﻟﺒﺎﺏ ﺗﺤﺘﻮ ﻓﻲ ﻣﻔﺘﺎﺡ ﺍﺣﺘﻴﺎﻃﻲ ﻏﻴﺮ ﺍﻟﻤﻔﺎﺗﻴﺢ ﺍﻟﻌﻨﺪﻫﻢ ﻭﺧﺎﺗﻨﻮ ﻋﺸﺎﻥ ﻟﻮ ﻭﺍﺣﺪ ﻣﻨﻬﻢ ﻣﻔﺘﺎﺣﻮ ﺭﺍﺡ ﻳﺸﻴﻠﻮ ﻳﻄﻠﻊ ﻣﻨﻮ ﻧﺴﺨﺔ ﻭﻳﺮﺟﻌﻮ ﻓﻲ ﻓﺠﺘﻮ
ﻓﺘﺢ ﺑﺎﺏ ﺍﻟﺤﻮﺵ ﻭﺭﻓﻊ ﺍﻟﺤﺠﺮ ﺷﺎﻝ ﺍﻟﻤﻔﺘﺎﺡ ﻭﺩﺧﻞ ﺍﻟﺒﻴﺖ ﻭﺩﺧﻞ ﺍﻟﻮﺻﻴﺔ ﺟﻮﺓ ﺍﻻﻭﺿﺔ ﺟﻤﺐ ﺍﻟﻜﺘﺐ ﻭﻣﺸﻰ ﻋﻤﻞ ﻟﻴﻬﻮ ﺷﺎﻱ ﻭﺟﺎﺀ ﻗﻌﺪ
ﻋﺒﺪ ﺍﻟﻘﻴﻮﻡ ﺑﻌﺪ ﻭﺩ ﺍﻟﻀﻮ ﻓﺎﺕ ﻣﺪﻧﻲ ﻣﺸﻰ ﻟﺤﺴﻦ ﻓﺘﺮﻳﻨﺔ ﻗﺎﻝ ﻟﻴﻬﻮ ﺩﺍﻳﺮ ﻟﻲ ﺩﻛﺎﻥ ﻟﻮ ﻋﺮﻓﺖ ﺯﻭﻝ ﺩﺍﻳﺮ ﻳﺒﻴﻊ ﻟﻴﻬﻮ ﺩﻛﺎﻥ ﻭﻟﻼ ﺩﺍﻳﺮ ﻳﺄﺟﺮﻭ ﻛﻠﻤﻨﻲ ﻭﻛﻠﻢ ﻟﻴﻬﻮ ﺗﺎﻧﻲ ﻛﻢ ﻭﺍﺣﺪ ﻭﻫﻮ ﺯﺍﺗﻮ ﻗﻌﺪ ﻳﻜﻮﺱ ﻭﻳﺴﺄﻝ
ﺍﻟﺼﺪﻳﻖ ﺟﺎﺀ ﺍﻟﺪﻛﺎﻥ ﻭﻗﺎﻝ ﻟﺨﻀﺮ ﺑﺘﺸﺘﻐﻞ ﺑﺮﺍﻙ ﻭﻟﻼ ﻧﺸﻮﻑ ﻟﻴﻚ ﺯﻭﻝ ﻣﻦ ﺍﻭﻻﺩ ﺍﻟﺤﻠﺔ ؟
ﻗﺎﻝ ﻟﻴﻬﻮ ﻣﺎ ﺩﺍﻳﺮ ﺍﻱ ﺯﻭﻝ ﻭﺣﻘﻜﻢ ﻭﺣﻘﻲ ﻣﺤﻔﻮﻅ ﻭﻣﻌﺮﻭﻑ ﻛﻢ ﻭﻭﺍﺣﺪ ﻣﻦ ﺍﺗﻨﻴﻦ ﻳﺎ ﺗﻤﺮﻗﻮﺍ ﻭﺗﺨﻠﻮﻫﻮ ﻟﻲ ﻳﺎ ﺗﺪﻭﻧﻲ ﺣﻘﻲ ﻭﺍﺗﺨﺎﺭﺝ ﻟﻴﻜﻢ ﻣﻨﻮ ﻟﻜﻦ ﺣﻜﺎﻳﺔ ﺷﺮﺍﻛﺔ ﺑﺎﻟﻨﺺ ﺍﻟﻨﺺ ﻭﺍﺷﺘﻐﻞ ﻓﻮﻗﻮ ﺍﻧﺎ ﺑﺮﺍﻱ ﻣﺎ ﺭﺿﻴﺎﻥ ﺑﻴﻬﺎ ﻟﻮ ﻋﺒﺪ ﺍﻟﻘﻴﻮﻡ ﻣﺎﺭﻕ ﻳﺎ ﺍﻣﺎ ﻏﻴﺮ ﺍﻟﻨﺺ ﺍﻧﺎ ﺁﺧﺪ ﻟﻲ ﻣﺮﺗﺐ ﺷﻬﺮﻱ
ﺍﻟﺼﺪﻳﻖ ﻗﺎﻝ ﻟﻴﻬﻮ ﻛﻼﻣﻚ ﺻﺎﺡ ﻭﻋﺪﺍﻙ ﺍﻟﻌﻴﺐ ﺗﺐ ﺑﺲ ﺧﻠﻴﻨﻲ ﺍﺷﻮﻑ ﺭﺍﻱ ﻋﺒﺪ ﺍﻟﻘﻴﻮﻡ ﺷﻨﻮ
ﻋﺒﺪ ﺍﻟﻘﻴﻮﻡ ﻟﻤﻦ ﺟﺎﺀ ﻟﻠﺼﺪﻳﻖ ﻭﻋﺮﻑ ﻛﻼﻡ ﺧﻀﺮ ﻗﺎﻝ ﻟﻴﻬﻮ ﻳﺘﺨﺎﺭﺝ ﻟﻴﻨﺎ ﻃﻮﺍﻟﻲ ﻭﺍﻟﻠﻴﻠﺔ ﺩﻱ ﻳﺎﺧﺪ ﺣﻘﻮ ﻛﺎﺍﺍﻣﻞ ﻭﺍﻧﺎ ﺯﺍﺗﻲ ﻛﻨﺖ ﺩﺍﻳﺮ ﺍﻗﻮﻝ ﻟﻴﻬﻮ ﻧﻔﻚ ﺍﻟﺸﺮﺍﻛﺔ ﻟﻜﻦ ﺧﻔﺘﻮ ﻳﺰﻋﻞ ﻭﻛﻮﻳﺲ ﺍﻟﺠﺎﺕ ﻣﻨﻮ ﻫﻮ
ﻭﻣﺸﻮﺍ ﻗﻌﺪﻭﺍ ﻣﻌﺎﻫﻮ ﻭﻃﻠﻌﻮﺍ ﺍﻟﺪﻓﺎﺗﺮ ﻭﺿﺮﺑﻮﺍ ﺣﺴﺎﺑﺎﺗﻬﻢ ﻭﻋﺒﺪ ﺍﻟﻘﻴﻮﻡ ﺳﻠﻤﻮﺍ ﺣﻘﻮ ﻭﺧﻀﺮ ﻣﺮﻕ
ﺍﻭﻝ ﺣﺎﺟﺔ ﻋﻤﻠﻬﺎ ﻋﺒﺪ ﺍﻟﻘﻴﻮﻡ ﻣﺸﻰ ﺟﺎﺏ ﺣﺴﻦ ﺑﻔﺘﺮﻳﻨﺘﻮ ﻭﻗﻌﺪﻭﺍ ﻗﺪﺍﻡ ﺍﻟﻤﺤﻞ ﺯﻱ ﺯﻣﺎﻥ ﻭﺍﺩﺍﻫﻮ ﺍﻟﺴﺎﻋﺎﺕ ﺍﻟﺠﺎﺑﻬﺎ ﺧﻀﺮ ﻛﻠﻬﺎ ﻭﻗﺎﻝ ﻟﻴﻬﻮ ﻣﺎ ﺳﺎﻋﻠﻚ ﻣﻦ ﺗﻤﻨﻬﺎ ﻫﺴﻲ ﻭﺧﻠﻴﻬﺎ ﻋﻨﺪﻙ ﺑﻌﺪ ﺗﺒﻴﻌﻬﺎ ﺷﻴﻞ ﻓﺎﻳﺪﺗﻚ ﻭﺭﺟﻊ ﻟﻲ ﺣﻘﻲ ﻭﻛﻞ ﻳﻮﻡ ﺩﺧﻞ ﻓﺘﺮﻳﻨﺘﻚ ﺟﻮﺓ ﺍﻟﺪﻛﺎﻥ ، ﺣﺴﻦ ﺍﺗﻜﻴﻒ ﻣﻨﻮ ﺷﺪﻳﺪ ﻭﺩﻋﻰ ﻟﻴﻬﻮ
ﻭﻋﺒﺪ ﺍﻟﻘﻴﻮﻡ ﻳﺎﺩﻭﺏ ﻛﺪﺍ ﺷﻢ ﺍﻟﻬﻮﺍﺀ ﺑﻤﺮﻗﺔ ﺧﻀﺮ ﺩﻱ ﻭﺍﺭﺗﺎﺡ ﻣﻨﻮ ﻭﻣﻦ ﻭﺷﻮ ﺍﻟﺪﻳﻤﺔ ﺻﺎﺭﻳﻬﻮ ﻭﻗﺎﻝ ﻳﺎﺭﺏ ﺗﺠﻴﺐ ﻋﺒﺎﺱ
ﻓﺮﺡ ﺟﺎﺀ ﺍﻟﺒﻴﺖ ﻭﻟﻘﻰ ﻋﺒﺎﺱ ﻗﺎﻋﺪ ﻳﻘﺮﺍ ﻟﻴﻬﻮ ﻓﻲ ﻛﺘﺎﺏ ﺳﻠﻢ ﻋﻠﻴﻬﻮ ﻭﻗﻌﺪﻭﺍ ﻳﺘﻮﻧﺴﻮﺍ ﻭﻋﺒﺎﺱ ﺑﺎﻟﺘﻔﺼﻴﻞ ﺍﻟﻤﻤﻞ ﺍﺻﻼ ﻫﻮ ﺯﻱ ﺍﻟﺠﺮﻳﺪﺓ ﺍﻟﺤﺎﺋﻄﻴﺔ ﺣﻜﻰ ﻟﻔﺮﺡ ﻛﻞ ﺷﻲ ﻣﻦ ﻳﻮﻡ ﻓﺎﺕ ﻣﻨﻮ ﻟﺤﺪﻱ ﻗﻌﺪﺗﻮ ﻣﻌﺎﻫﻮ ﺩﻱ
_ ﻭﺍﻟﻠﻪ ﻟﻜﻦ ﺍﺗﺠﻬﺠﻬﺘﺎ ﻭﺍﺗﻌﺬﺑﺘﺎ ﻳﺎ ﻋﺒﺎﺱ
_ ﻋﺬﺍﺏ ﺟﺪ ﻳﺎﺧﻲ ﺍﻧﺎ ﻟﻤﻦ ﺑﻜﻴﺖ ﻭﻃﺮﻳﻖ ﻣﺪﻧﻲ ﺍﻟﺨﺮﻃﻮﻡ ﺩﺍ ﺣﻔﻈﺘﻮ ﺣﻔﻆ ﻣﺎﺷﻲ ﻭﺟﺎﻳﻲ
_ ﻭﻣﺎﻟﻚ ﻣﺎ ﺟﻴﺘﻨﻲ ﻫﻨﺎ ؟
_ ﺟﻴﺖ ﻭﺍﻟﻠﻪ ﻭﻭﺻﻠﺖ ﻟﺤﺪﻱ ﺍﻟﻌﺮﺑﻲ ﻭﺑﻌﺪ ﺩﺍﻳﺮ ﺍﺭﻛﺐ ﺗﺐ ﺭﺟﻌﺖ ﻭﻃﻮﺍﻟﻲ ﻣﺸﻴﺖ ﻣﺪﻧﻲ ﻭﺍﻟﺒﺮﻛﺔ ﺍﻟﻤﺸﻴﺖ ﻷﻧﻬﺎ ﺍﻛﺘﺮ ﻣﺸﻴﺔ ﻛﺎﻧﺖ ﺳﻤﺤﺔ
_ ﻛﻴﻒ ؟
_ ﺍﻭﻝ ﺣﺎﺟﺔ ﻻﻗﻴﺖ ﻓﻴﻬﺎ ﺍﻣﻲ ﻭﻻﻗﻴﺖ ﺍﺑﺠﺎﻛﻮﻣﺔ ﻭﻋﺮﻓﺖ ﺣﻘﻴﻘﺔ ﺭﺑﻴﻊ ﻛﻠﻬﺎ
_ ﺍﻧﺎ ﻭﺍﺑﺠﺎﻛﻮﻣﺔ ﺍﻟﻠﺘﻨﻴﻦ ﻗﻠﻨﺎ ﻟﻴﻚ ﺍﺑﻌﺪ ﻣﻦ ﺭﺑﻴﻊ ﺩﺍ ﻟﻜﻦ ﺍﻧﺖ ﻣﺎ ﺳﻤﻌﺖ ﻛﻼﻣﻨﺎ
_ ﻳﺎﺧﻲ ﺩﺍ ﻛﻀﺎﺏ ﻛﻀﺐ
_ ﻛﻠﻨﺎ ﻋﺎﺭﻓﻨﻮ ﻛﻀﺎﺏ
_ ﺍﻟﻠﺬﻳﺬﺓ ﺍﻣﺲ ﺍﻧﺎ ﻣﺸﻴﺖ ﺑﻴﺖ ﻣﻌﺎﻫﻮ ﻭﻣﺎ ﻭﺭﻳﺘﻮ ﺍﻧﻲ ﻋﺎﺭﻓﻮ ﻭﺑﺮﺿﻮ ﻛﻀﺐ ﻟﻲ ﻭﻛﻀﺐ ﻛﺒﺎﺭ ﻛﺒﺎﺭ
_ ﻣﺴﻜﻴﻦ ﻳﺎﺥ
_ ﺩﻱ ﻣﺎ ﻣﺴﻜﻨﺔ ﻳﺎﺥ ﺩﻱ ﻏﺒﺎﻭﺓ
_ ﻛﻮﻳﺲ ﺍﻧﻚ ﻋﺮﻓﺘﻮ ﻛﻀﺎﺏ
_ ﺍﻟﻮﺻﻴﺔ ﻓﻲ ﺍﻻﻭﺿﺔ ﺟﻮﺓ ﺟﻤﺐ ﺍﻟﻜﺘﺐ
_ ﺗﻤﺎﻡ
_ ﻣﻌﺎﻫﺎ ﺟﻮﺍﺏ ﻣﻦ ﺍﺑﺠﺎﻛﻮﻣﺔ ﺍﻗﺮﺍﻫﻮ ﻳﺎﺥ
ﺍﺑﺠﺎﻛﻮﻣﺔ ﻛﺘﺐ ﻟﻔﺮﺡ ﻭﺭﻗﺔ ﺑﺨﺼﻮﺹ ﻛﻼﻣﻮ ﻣﻊ ﻋﺒﺎﺱ ﻭﻓﺮﺡ ﻗﺮﺍﻫﺎ ﻭﺟﺎﻫﻮ ﻣﺎﺭﻕ ﻭﻗﺒﻞ ﻳﺘﻜﻠﻢ ﻋﺒﺎﺱ ﻗﺎﻝ ﻟﻴﻬﻮ ﻭﻳﻦ ﺍﻟﺸﺒﺎﺏ ﺍﻟﺴﺎﻛﻨﻴﻦ ﻣﻌﺎﻙ ؟ ﻣﺎ ﺗﻘﻮﻝ ﻟﻲ ﻟﺴﺔ ﻣﺎ ﺟﻮﺍ
_ ﻟﺴﺔ ﻭﺍﻟﻠﻪ ﻭﻻ ﺍﻧﺎ ﻣﺸﻴﺖ ﺍﻫﻠﻲ
_ ﻟﻴﻪ
_ ﺷﻐﻠﺘﻨﺎ ﺩﻱ ﻛﻌﺒﺔ ﻳﺎﺥ ﻣﺮﺍﺕ ﺍﻟﻮﺍﺣﺪ ﺷﻬﻮﺭ ﻣﺎ ﻣﻌﺮﻭﻑ ﻭﻳﻦ
_ ﺍﻧﺎ ﻗﺮﻳﺐ ﻭﺑﺒﻘﻰ ﻣﻌﺎﻛﻢ ﻓﻴﻬﺎ
_ ﻛﻴﻒ ؟
_ ﻣﺎ ﻗﺮﻳﺖ ﺍﻟﻮﺭﻗﺔ ؟
_ ﻗﺮﻳﺘﻬﺎ ﻟﻜﻦ ﻣﺎ ﺑﻨﺼﺤﻚ ﺗﺸﺘﻐﻞ ﻣﺨﺒﺮ
_ ﺍﺗﻮﻗﻌﺘﻚ ﺗﻔﺮﺡ ﻟﻲ ﻳﺎﺥ
_ ﺍﻟﺸﻐﻠﺔ ﺩﻱ ﺧﻄﺮﺓ ﻋﻠﻴﻚ ﻳﺎ ﻋﺒﺎﺱ ﻭﻋﺎﺩﻱ ﻣﻤﻜﻦ ﺗﻨﻘﺘﻞ
_ ﻻ ﺧﻄﺮﺓ ﻭﻻ ﺷﻲ ﻭﻣﺎﻓﻲ ﺯﻭﻝ ﺑﻤﻮﺕ ﻗﺒﺎﻝ ﻳﻮﻣﻮ
_ ﻣﺎﻓﻲ ﻟﻜﻦ ﻟﻮ ﻓﻲ ﻗﻄﺮ ﻣﺎﺷﻲ ﺑﺘﻘﻴﻒ ﻗﺪﺍﻣﻮ ﻭﺑﺘﻘﻮﻝ ﻣﺎ ﺑﻤﻮﺕ ﻟﻮ ﻳﻮﻣﻲ ﻣﺎ ﺗﻢ ؟
_ ﻻ ﻻ ﻣﺎ ﺑﻘﻴﻒ
_ ﻳﻠﻼ ﺍﻧﺖ ﻫﺴﻲ ﺩﺍﻳﺮ ﺗﻘﻴﻒ ﻗﺪﺍﻣﻮ ﻋﺎﺭﻑ ﻛﺪﺍ ؟
_ ﻳﺎﺧﻲ ﻟﻮ ﺍﻱ ﺯﻭﻝ ﻗﺎﻝ ﻛﻼﻣﻚ ﺩﺍ ﺍﻟﺒﺸﺘﻐﻠﻬﺎ ﻣﻨﻮ ؟
_ ﺍﻟﻤﻬﻢ ﺍﻟﺪﺭﺏ ﺩﺍ ﺍﺑﻌﺪ ﻣﻨﻮ ﺧﻄﺮ ﺷﺪﻳﺪ ﻭﺧﻄﺮ ﺑﻤﻌﻨﻰ ﺍﻟﻜﻠﻤﺔ ﻭﺍﻟﻨﺎﺱ ﺩﻳﻞ ﻣﺎ ﺑﻌﺮﻓﻮ ﻛﺒﻴﺮ ﻭﺻﻐﻴﺮ ﻭﻻ ﺑﺮﺣﻤﻮﺍ ﻭﻋﺎﺩﻱ ﻳﻘﺘﻠﻮﻙ
_ ﻣﻌﻘﻮﻝ ؟
_ ﺍﻧﺖ ﻟﻮ ﻗﺒﻀﺖ ﻭﺍﺣﺪ ﺑﻀﻴﻊ ﻋﺸﺎﻥ ﻛﺪﺍ ﺑﻀﻴﻌﻚ ﻟﻮ ﻋﺮﻓﻚ ﻣﺨﺒﺮ
_ ﻋﻠﻴﻚ ﺍﻟﻠﻪ ﻣﺎ ﺗﻌﻘﺪﻫﺎ ﺳﺎﻱ ﻭﺗﻄﻤﻢ ﻟﻲ ﺑﻄﻨﻲ ﻣﻨﻬﺎ ﺍﻧﺎ ﻣﺎ ﺑﺸﺘﻐﻞ ﺷﻐﻠﺔ ﻏﻴﺮﻫﺎ ﻭﺩﻱ ﻓﺮﺻﺔ ﺍﺧﺪﻡ ﺑﻴﻬﺎ ﺑﻠﺪﻱ ﻣﺎ ﺗﺤﺮﻣﻨﻲ ﻣﻦ ﺧﺪﻣﺔ ﺍﻟﻮﻃﻦ
_ ﻳﺎ ﺳﻼﻡ ﻳﺎﺥ ﻭﺍﻟﻠﻪ ﻏﻠﺒﺘﻨﻲ ﺑﺎﻟﻜﻠﻤﺔ ﺩﻱ ﺑﺲ ، ﻳﺎﺥ ﺍﻧﺖ ﻋﻘﻠﻚ ﺍﻛﺒﺮ ﻣﻦ ﻋﻤﺮﻙ ﻳﺎ ﻋﺒﺎﺱ
_ ﺍﻧﺖ ﺷﻔﺖ ﺣﺎﺟﺔ ﺑﺘﻌﺮﻓﻨﻲ ﻛﻮﻳﺲ ﺑﻌﺪ ﺗﺸﻮﻓﻨﻲ ﺑﻌﻤﻞ ﺷﻨﻮ
_ ﺑﺲ ﺍﻟﺘﺎﺝ ﻣﺎ ﺑﺮﺿﻰ ﻳﺮﺟﻌﻚ ﺗﺴﻜﻦ ﻣﻌﺎﻫﻮ
_ ﺑﺎﻟﻤﻨﺎﺳﺒﺔ ﺍﻟﺘﺎﺝ ﺑﻌﺮﻓﻚ
_ ﺑﻌﺮﻓﻨﻲ ﻛﻴﻒ ﺍﻭﻋﻰ ﺗﻜﻮﻥ ﺍﻧﺖ ﺍﻟﻮﺭﻳﺘﻮ
_ ﺑﺮﺍﻫﻮ ﻭﺍﻟﻠﻪ ﺍﻟﻘﺎﻝ ﻟﻲ ﺍﻧﺖ ﻛﻨﺖ ﻓﻲ ﺑﺤﺮﻱ ﻣﻊ ﻓﺮﺡ ﺍﻟﻜﻌﺐ
_ ﺍﻧﺖ ﺟﺎﺩﻱ ؟
_ ﻭﺍﻟﻠﻪ ﺻﺎﺡ ﻛﻤﺎﻥ ﻟﻘﺒﻚ ﻋﺎﺭﻓﻮ
_ ﺍﺣﻜﻲ ﻟﻲ ﺍﻟﻘﺎﻟﻮ ﻟﻴﻚ
ﻭﻋﺒﺎﺱ ﺣﻜﻰ ﻟﻔﺮﺡ ﻛﻼﻡ ﺍﻟﺘﺎﺝ ﻣﻌﺎﻫﻮ ﻛﻠﻮ
_ ﺍﻟﺰﻭﻝ ﺩﺍ ﺧﻄﺮ ﺍﺣﺴﻦ ﺗﺒﻌﺪ ﻣﻨﻮ
_ ﻭﺍﻟﻠﻪ ﺍﻧﺎ ﺍﺧﻄﺮ ﻣﻨﻮ ﻭﺑﺬﻛﺮﻙ ﻛﻼﻣﻲ ﺩﺍ
_ ﻳﻠﻼ ﻧﻤﺸﻲ ﻧﺘﻐﺪﺍ ﻭﺍﻧﺖ ﻻﺯﻡ ﺗﺘﺼﻮﺭ ﺍﺭﺑﻌﺔ ﺻﻮﺭ ﻋﺸﺎﻥ ﺍﻧﺎ ﺑﻜﺮﺓ ﺍﻣﺸﻲ ﺍﻟﻤﺮﻛﺰ ﺍﺳﺠﻠﻚ
_ ﺩﺍ ﺍﻟﻜﻼﻡ ﺍﻟﺼﺎﺡ ﻳﺎﺥ ﻭﺭﺡ ﻭﺭﺡ
ﻭﺩ ﺍﻟﻀﻮ ﻭﺻﻞ ﻣﺪﻧﻲ ﻭﻓﺎﺕ ﺍﻟﺪﻛﺎﻥ ﻭﻭﺭﻯ ﺍﻟﻌﺒﻴﺪ ﺑﺎﻟﻌﻤﻠﻮ ﻛﻠﻮ ﻭﺍﻟﻌﺒﻴﺪ ﺍﻧﺒﺴﻂ ﻭﻗﺎﻝ ﻟﻴﻬﻮ ﺍﺣﺴﻦ ﺣﺎﺟﺔ ﻭﺍﻟﻠﻪ ﻛﺪﺍ ﺍﺭﺗﺤﺖ ﻣﻨﻮ ﻭﻣﻦ ﻗﺮﻭﺷﻮ
ﻋﺒﺎﺱ ﺑﻌﺪ ﺍﻟﻐﺪﺍﺀ ﻣﺸﻰ ﺍﺗﺼﻮﺭ ﻭﺍﺩﻯ ﻓﺮﺡ ﺍﻳﺼﺎﻝ ﺍﺳﺘﻼﻡ ﺍﻟﺼﻮﺭ ﻭﻗﺎﻝ ﻟﻴﻬﻮ ﻣﻊ ﺍﻟﺴﻼﻣﺔ ﻭﺍﻧﺎ ﺍﻟﻠﻴﻠﺔ ﺑﺒﻴﺖ ﻓﻲ ﺑﻴﺖ ﺍﻟﺘﺎﺝ ﻭﻓﺎﺕ ﺍﻟﺸﻌﺒﻲ ﻭﻗﻌﺪ ﻳﺘﺴﻜﻊ ﺑﻌﻴﺪ ﻣﻨﻮ ﻟﻤﻦ ﺟﺎﺀ ﺍﻟﻮﻛﺖ ﺍﻟﺒﻔﻮﺕ ﻓﻴﻬﻮ ﺍﻟﺘﺎﺝ ﺍﻟﺒﻴﺖ ﻭﻣﺸﻰ ﻟﻴﻬﻮ