ﺑﻌﺪ ﺍﻧﺘﻬﻮﺍ ﻣﻦ ﻛﻼﻣﻬﻢ ﻋﺒﺎﺱ ﻭﻋﺒﺪ ﺍﻟﻘﻴﻮﻡ ﻗﻔﻠﻮﺍ ﺍﻟﺪﻛﺎﻥ ﻭﻏﺸﻮﺍ ﻋﺜﻤﺎﻥ ﻟﻘﻮﻫﻮ ﻳﺎﺩﻭﺏ ﺑﻘﻔﻞ ﻓﻲ ﺍﻟﻄﺒﻠﻴﺔ ﻭﻓﺎﺗﻮﺍ ﺍﻟﺘﻼﺗﺔ ﺷﺮﺑﻮﺍ ﻟﻴﻬﻢ ﺷﺎﻱ ﻭﺍﺗﻔﺎﺭﻗﻮﺍ ﻭﻋﺒﺎﺱ ﻣﺸﻰ ﻋﻠﻲ ﺍﻟﺘﺎﺝ ﻟﻘﺎﻫﻮ ﻣﺴﺘﻨﻴﻬﻮ ﻭﻣﻦ ﺍﻣﺲ ﻳﻌﺎﻳﻦ ﻟﻴﻬﻮ ﻻﻧﻮ ﻗﺎﻝ ﻟﻴﻬﻮ ﺑﺠﻲ ﻭﺩﺍﻳﺮ ﺍﻭﺭﻳﻚ ﻣﻮﺿﻮﻉ ﻣﻬﻢ ﺑﺨﺼﻚ ، ﻭﻣﻦ ﺷﺎﻓﻮ ﻓﺘﺢ ﺍﻟﺒﺎﺏ ﻭﺩﺧﻞ ﻗﻌﺪ ﻳﻀﺤﻚ ﻭﺍﻟﻐﺮﻳﺒﺔ ﺍﻟﻜﻔﺘﻴﺮﺓ ﻣﺎ ﻛﺎﻧﺖ ﺟﻤﺒﻮ ﻋﺒﺎﺱ ﺯﺍﺗﻮ ﺿﺤﻚ ﻭﻗﺎﻝ ﻟﻴﻬﻮ ﺍﻟﻠﻴﻠﺔ ﻣﺎﻟﻚ ﻣﺒﺴﻮﻁ ﻛﺪﺍ ﻭﻭﻳﻦ ﺍﻟﻜﻔﺘﻴﺮﺓ ؟
_ ﺍﻟﺪﻧﻴﺎ ﺩﻱ ﺳﻤﺤﺔ ﻳﺎ ﻋﺒﺎﺱ ﻟﻮ ﻋﺸﻨﺎﻫﺎ ﺻﺎﺡ
_ ﺩﺍ ﻛﻼﻡ ﻛﺒﻴﺮ ﻭﻋﻤﻴﻖ ﺧﻼﺱ ﻭﻭﺭﺍﻫﻮ ﺳﺮ ﻏﺎﻳﺘﻮ ﻋﻼ ﺑﻘﻴﺖ ﺗﺤﺐ
_ ﻣﺸﻴﺖ ﺑﻌﻴﺪ
_ ﺳﻤﺢ ﻣﺎﻟﻚ ؟
_ ﻣﺎ ﻣﺎﻟﻲ ﺷﻲ ﺑﺲ ﻣﻦ ﺍﻣﺲ ﺟﺪﻋﺖ ﺍﻟﻜﻔﺘﻴﺮﺓ ﻭﺗﺎﻧﻲ ﻣﺎ ﺑﺸﺮﺏ
_ ﺩﺍ ﺍﺣﺴﻦ ﺧﺒﺮ ﻟﻜﻦ ﺑﺮﺿﻮ ﺍﻟﻜﻼﻡ ﺩﺍ ﻭﺭﺍﻫﻮ ﺳﺮ
_ ﻣﺎﻓﻲ ﺍﻱ ﺍﺳﺮﺍﺭ ﻭﺍﻻﺳﺮﺍﺭ ﻋﻨﺪﻙ ﻃﻠﻊ ﺳﺮﻳﺮﻙ ﻭﻭﺭﺡ ﻧﺼﻠﻲ ﺍﻟﻌﺸﺎﺀ ﻓﻲ ﺍﻟﺠﺎﻣﻊ ﻭﻧﺠﻲ ﻧﺸﻮﻑ ﻣﻮﺿﻮﻋﻚ ﺍﻟﻤﻬﻢ
_ ﻭﺍﻟﻠﻪ ﻣﺒﺮﻭﻙ ﻭﺍﻟﺤﻤﺪ ﻟﻠﻪ ﺩﺍ ﺍﻟﻜﻼﻡ ﺍﻟﺼﺎﺡ ﻳﺎﺥ ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﻌﻴﻨﺎ ﻋﻠﻲ ﺫﻛﺮﻭ ﻭﺷﻜﺮﻭ
_ ﺍﻟﻠﻬﻢ ﺁﻣﻴﻦ ﺍﻧﺎ ﺑﻤﺶ ﺍﻟﺠﺎﻣﻊ ﻗﺪﺍﻣﻚ ﻃﻠﻊ ﺳﺮﻳﺮﻙ ﻭﻏﻴﺮ ﻭﺃﻟﺤﻘﻨﻲ
_ ﻟﺴﺔ ﻣﺎ ﺃﺫﻥ ﻳﺎﺥ
_ ﻋﺎﺭﻑ ﺑﺲ ﻋﻨﺪﻱ ﺭﺍﻱ ﻳﻠﻼ
ﺑﻌﺪ ﺍﻟﺘﺎﺝ ﻣﺮﻕ ﻋﺒﺎﺱ ﺩﺧﻞ ﻓﺘﺶ ﻟﻠﻜﻔﺘﻴﺮﺓ ﻣﺎ ﻟﻘﺎﻫﺎ ﻭﻃﻠﻊ ﺍﻟﺴﺮﻳﺮ ﻭﻣﺒﺴﻮﻭﻭﻁ ﻟﻤﻦ ﻣﺎ ﻣﺼﺪﻕ ، ﻗﺎﻝ ﻣﻌﻘﻮﻟﺔ ﺩﺍ ﺍﻟﺘﺎﺝ ﻭﺍﻟﻠﻪ ﺳﺒﺤﺎﻥ ﻣﻐﻴﺮ ﺍﻻﺣﻮﺍﻝ ﻣﻦ ﻋﺮﻓﺘﻮ ﻣﺎ ﺷﻔﺘﻮ ﺭﻛﻊ ﺍﻟﺤﻤﺪ ﻟﻠﻪ ﺍﻟﻬﺪﺍﻭ ﻭﺍﻻﻭﺿﺔ ﻟﻘﺎﻫﺎ ﻧﻀﻴﻔﺔ ﻭﻓﻲ ﻣﺼﺤﻒ ﻓﻲ ﺍﻟﻄﺮﺑﻴﺰﺓ ﻭﻗﺒﺎﻝ ﻳﻐﻴﺮ ﻫﺪﻭﻣﻮ ﺳﻤﻊ ﺍﻻﺫﺍﻥ ﻭﻋﺮﻓﻮ ﺩﺍ ﺍﻟﺘﺎﺝ ﻟﻤﻦ ﺧﺖ ﻳﺪﻭ ﻓﻲ ﺭﺍﺳﻮ ﻭﻗﻌﺪ ﻳﻀﺤﻚ
ﻣﺸﻰ ﺻﻠﻰ ﻭﺑﻌﺪ ﺟﻮﺍ ﺍﻟﺒﻴﺖ ﺍﻟﺘﺎﺝ ﻗﺎﻝ ﻟﻴﻬﻮ ﺍﻓﺘﺢ ﺍﻟﺪﺭﺝ ﺩﺍﻙ ﺑﺘﻠﻘﻰ ﻓﻴﻬﻮ ﻣﺼﺤﻒ ﺟﺒﺘﻮ ﻟﻴﻚ ﻣﻦ ﺍﻣﺲ ﺑﺎﻟﻠﻴﻞ ﻭﺗﻌﺎﻝ ﻧﺒﺪﺍ ﻣﻦ ﺍﻟﻠﻴﻠﺔ ﻛﻞ ﻳﻮﻡ ﺑﻌﺪ ﻧﺠﻲ ﻣﻦ ﺻﻼﺓ ﺍﻟﻌﺸﺎﺀ ﻧﻘﺮﺍ ﻟﻴﻨﺎ ﺟﺰﻭ
_ ﺍﻗﺴﻢ ﺑﺎﻟﻠﻪ ﻳﺎ ﺍﻟﺘﺎﺝ ﺍﻧﺎ ﺭﺍﺳﻲ ﻻﻓﻲ ﻭﺷﺎﻳﻒ ﺭﻭﺣﻲ ﺣﻠﻤﺎﻥ ﺣﻠﻤﺎﻥ
_ ﺟﻴﺐ ﺍﻟﻤﺼﺤﻒ ﻭﺗﻌﺎﻝ ﻣﺎ ﺗﺒﻘﻰ ﻟﻲ ﺍﺑﻠﻴﺲ
ﻋﺒﺎﺱ ﺟﺎﺏ ﺍﻟﻤﺼﺤﻒ ﻭﺑﺪﻭﺍ ﻳﻘﺮﻭﺍ ﻛﻞ ﻭﺍﺣﺪ ﻳﻘﺮﺍ ﺭﺑﻊ ﺣﺰﺏ ﻭﺍﻟﺘﺎﻧﻲ ﻳﺴﺘﻤﻊ ﻭﻳﺘﺎﺑﻊ ﺑﺎﻟﻤﺼﺤﻒ ﻭﻟﻮ ﻏﻠﻂ ﻳﺼﻠﺤﻮﺍ ﻧﻔﺲ ﺍﻟﻄﺮﻳﻘﺔ ﺍﻟﺸﻐﺎﻟﻴﻦ ﺑﻴﻬﺎ ﻧﺎﺱ ﺣﻴﺪﺭ ﺑﺲ ﺩﻳﻠﻚ ﻗﺒﻞ ﻳﻨﻮﻣﻮﺍ ﻭﻣﺮﺍﺕ ﺑﻌﺪ ﻳﺠﻮﺍ ﻣﻦ ﺻﻼﺓ ﺍﻟﺼﺒﺢ
ﻭﺑﻌﺪ ﺍﻧﺘﻬﻮﺍ ﻣﻦ ﺍﻟﺠﺰﻭ ﺍﻻﻭﻝ ﻗﻔﻠﻮﺍ ﺍﻟﻤﺼﺎﺣﻒ ﻭﻣﺸﻮﺍ ﻋﻠﻲ ﺍﻟﺴﺮﺍﻳﺮ
ﻋﺒﺎﺱ ﻗﻌﺪ ﻳﻀﺤﻚ ﻭﻳﻌﺎﻳﻦ ﻟﻠﺘﺎﺝ ﺳﺎﻱ
_ ﻣﺎﻟﻚ ﺁ ﻋﺒﺎﺱ
_ ﻭﺍﻟﻠﻪ ﻣﺘﻜﻴﻒ ﻛﻴﻒ ﻟﻤﻦ ﺍﻟﻀﺤﻚ ﺷﺎﺭﻃﻨﻲ
_ ﻋﻠﻴﻚ ﺍﻟﻠﻪ ﻣﺎ ﻣﺮﺗﺎﺡ ﻧﻔﺴﻴﺎ
_ ﻗﻠﺖ ﻟﻴﻚ ﻟﻤﻦ ﺍﻟﻀﺤﻚ ﺷﺎﺭﻃﻨﻲ ﻋﺪﻳﻞ ﻭﺍﻟﻠﻪ ﺑﺲ ﺷﻨﻮ ﺍﻟﺘﻐﻴﻴﺮ ﺍﻟﻤﻔﺎﺟﻲﺀ ﺩﺍ
_ ﺍﻟﻠﻪ ﻫﺪﺍﻧﻲ ﺑﺲ ، ﻣﺎ ﻗﻠﺖ ﻟﻴﻚ ﺍﻟﺪﻧﻴﺎ ﺩﻱ ﺳﻤﺤﺔ ﻭﺣﻠﻮﺓ ﻟﻮ ﻋﺸﻨﺎﻫﺎ ﺻﺎﺡ ،
_ ﺑﺲ ﻓﻲ ﺳﺒﺐ
_ ﻓﻲ ﻭﺍﻟﻠﻪ ﻣﺎ ﺍﻛﻀﺐ ﻋﻠﻴﻚ ﻭﺑﻮﺭﻳﻚ ﻟﻴﻬﻮ ﺑﺲ ﻣﺎ ﻫﺴﻲ
_ ﻭﺍﻟﻠﻪ ﺍﻛﺎﻥ ﺗﻘﻮﻟﻮﺍ ﻫﺴﻲ
_ ﺃﻣﺲ ﺍﻟﺼﺒﺎﺡ ﺑﻌﺪ ﻣﺸﻴﺖ ﻣﻦ ﻫﻨﺎ ﺟﺎ ﻛﻨﺘﺮ ﻗﺪﺍﻣﻲ ﻣﺎﺷﻲ ﺳﺮﻳﻊ ﻭﺍﻧﺎ ﺧﻠﻴﺘﻮ ﺑﻌﺪ ﻓﺎﺗﺖ ﻭﻃﻮﺍﻟﻲ ﺟﻴﺖ ﺍﻗﻄﻊ ﺍﻟﺸﺎﺭﻉ ﻭﺍﻟﻜﻨﺘﺮ ﺩﺍ ﻋﻤﻞ ﺣﺎﺩﺙ ﻭﺍﻟﺤﺎﺩﺙ ﺧﻔﻴﻒ ﻣﺎ ﻗﻮﻱ ﻻﻧﻮ ﺳﻮﺍﻕ ﺍﻟﻜﻨﺘﺮ ﺩﻗﺎ ﻓﺮﻣﻠﺔ ﻗﻮﻳﺔ ﻭﻭﻗﻒ ﻭﺍﻧﺎ ﻛﻨﺖ ﻭﺭﺍﻫﻮ ﻋﺪﻳﻞ ﻭﺍﻛﺎﻥ ﻓﻴﻬﻮ ﺣﺪﻳﺪ ﻭﺳﻴﺦ ﻭﻛﻤﺮ ﻭﺍﻟﺴﻴﺦ ﻣﻊ ﺍﻟﻔﺮﺍﻣﻞ ﺍﻟﻘﻮﻳﺔ ﻛﻠﻮ ﺍﺗﻮﻗﻊ ﻭﻓﻲ ﺳﻴﺨﺔ ﺟﺎﺕ ﻃﺎﻳﺮﺓ ﻟﻮ ﻣﺎ ﺍﻟﻠﻪ ﺳﺘﺮ ﺍﻛﺎﻧﺖ ﺑﺘﻘﺪ ﻟﻲ ﺭﺍﺳﻲ ﺑﺲ ﻣﺎ ﺿﺮﺑﺘﻨﻲ ﺍﻧﺎ ﺧﻠﻌﺘﻨﻲ ﺍﻟﻔﺮﺍﻣﻞ ﻟﻤﻦ ﻋﺘﺮﺗﺎ ﻭﻣﻊ ﻋﺘﺮﺗﻲ ﻭﺩﻧﻘﻴﺮﺗﻲ ﺍﻟﺴﻴﺨﺔ ﻓﺎﺗﺖ ﻭﺍﻛﺎﻧﺖ ﺯﻱ ﺍﻟﺤﺮﺑﺔ ﺍﻭ ﺍﻟﺴﻬﻢ ﻭﺍﻟﻨﺎﺱ ﺍﻟﺤﻀﺮﻭﺍ ﺍﻟﺤﺎﺩﺙ ﻛﻠﻬﻢ ﺟﻮﻧﻲ ﺟﺎﺭﻳﻴﻦ ﻳﺘﺤﻤﺪﻟﻮﺍ ﻟﻲ ﻓﻲ ﺍﻟﺴﻼﻣﺔ ﻭﺍﻧﺎ ﻣﺎ ﺟﺎﻳﺐ ﺧﺒﺮ ﻭﻣﺸﻴﺖ ﺍﻟﻤﻜﺘﺐ ﻭﻟﺤﺪﻱ ﻛﺪﺍ ﻋﺎﺩﻱ ﻣﺎ ﻓﻲ ﺷﻲ ﻭﺩﺧﻠﺖ ﻭﺑﺪﻳﺖ ﺍﺷﺘﻐﻞ ﻭﻧﺴﻴﺖ ﺍﻟﺤﺎﺩﺙ ﻛﻠﻮ ﻛﻠﻮ
_ ﻭﺍﻟﻠﻪ ﺩﻱ ﺳﻼﻣﺔ ﻛﺒﻴﺮﺓ ﻳﺎﺥ ﺍﻟﺤﻤﺪ ﻟﻠﻪ ﺍﻟﻨﺠﺎﻙ ﻣﻦ ﺍﻟﺴﻴﺨﺔ ﺩﻱ
_ ﻗﻠﺖ ﻟﻴﻚ ﺍﻛﺎﻧﺖ ﺑﺘﻘﺪ ﺭﺍﺳﻲ ﻟﻮ ﻣﺎ ﻋﺘﺮﺕ ﻳﺎﺥ ﺯﻱ ﺍﻟﺤﺮﺑﺔ ﻭﺍﻟﻠﻪ ﺳﻬﻢ ﺑﺲ ﻭﻃﺎﺭﺕ ﺑﻌﻴﺪ ﻣﻨﻲ
_ ﺍﻟﺒﺮﻛﺔ ﺍﻻﻧﺨﻠﻌﺖ ﻭﺍﻧﺖ ﺯﺍﺗﻚ ﺑﺘﺒﺎﻟﻎ ﺍﻛﺎﻥ ﺗﺨﻠﻲ ﺍﻟﻜﻨﺘﺮ ﻳﺒﻌﺪ ﺷﻮﻳﺔ ﺣﺘﻴﻦ ﺗﻘﻄﻊ ﺍﻟﺸﺎﺭﻉ
_ ﺍﻟﺤﻤﺪ ﻟﻠﻪ ﻳﺎﺥ
_ ﺍﻫﺎ ﻭﺑﻌﺪﻳﻦ ﺩﻱ ﻳﺎﻫﺎ ﺍﻟﺘﻮﺑﺘﻚ
_ ﺍﻧﺎ ﻗﻠﺖ ﻟﻴﻚ ﺩﺧﻠﺖ ﺍﻟﻤﻜﺘﺐ ﻭﻧﺴﻴﺖ ﺍﻟﺤﺎﺩﺙ ﻛﻠﻮ ﻛﻠﻮ ﺑﺲ ﻓﻲ ﻋﻤﻚ ﻛﺒﻴﺮ ﻛﺪﺍ ﺟﺎﺀ ﻛﺎﻳﺲ ﻟﻲ ﻭﻗﺎﻝ ﻟﻲ ﺩﺍﻳﺮﻙ ﻓﻲ ﻛﻼﻡ ﻭﺍﻧﺎ ﻭﻻ ﺑﻌﺮﻓﻮ ﻣﺮﻗﺖ ﻣﻌﺎﻫﻮ ﻗﺎﻝ ﻟﻲ ﺍﻧﺖ ﻗﺎﻋﺪ ﺗﻌﻤﻞ ﺷﻨﻮ ؟ ﻗﻠﺖ ﻟﻴﻬﻮ ﻣﺎ ﻓﻬﻤﺘﻚ ﻗﺎﻝ ﻟﻲ ﺍﻧﺎ ﺣﻀﺮﺕ ﺍﻟﺤﺎﺩﺙ ﺍﻟﻘﺒﻴﻞ ﻭﺷﻔﺖ ﺍﻟﺴﻴﺨﺔ ﻟﻤﻦ ﻃﺎﺭﺕ ﻋﻠﻴﻚ ﻭﺍﻛﺎﻧﺖ ﺡ ﺗﻘﺪ ﻟﻴﻚ ﺭﺍﺳﻚ ﻭﺗﺨﻔﺲ ﻭﺑﺘﻜﻠﺘﻚ ﺑﺲ ﺍﻟﻠﻪ ﻧﺠﺎﻙ ﻭﺍﻧﺖ ﺯﻭﻝ ﺻﺎﻟﺢ ، ﺍﻧﺎ ﻗﻌﺪﺕ ﺍﺿﺤﻚ ﺻﺎﻟﺢ ﺷﻨﻮ ﻳﺎﺥ ﻭﺍﻧﺎ ﺍﻟﺴﺎﻋﺔ ﺩﻳﻚ ﺍﻟﺴﻜﺮﺓ ﺑﺎﻳﺘﺔ ﻣﻌﺎﻱ ﻭﻻ ﻓﻜﺖ ﻭﻗﺎﻝ ﻟﻲ ﻭﺍﺻﻞ ﻭﺍﺻﻞ ﻓﻲ ﺍﻟﻌﻤﻞ ﺍﻟﻘﺎﻋﺪ ﺗﺴﻮﻱ ﻓﻮﻗﻮ ﺩﺍ ﻣﺎ ﺗﻘﻄﻌﻮ ﻭﺻﻠﻲ ﺑﺎﻟﻠﻪ ﻣﺎ ﺗﺨﻠﻲ ﺍﻟﺼﻼﺓ ﻧﻬﺎﺋﻲ ﻭﻋﻠﻴﻚ ﺍﻟﻠﻪ ﺍﺩﻋﻲ ﻟﻲ ﻭﺍﺑﻰ ﻳﺨﻠﻴﻨﻲ ﺍﻻ ﻟﻤﻦ ﺩﻋﻴﺖ ﻟﻴﻬﻮ ﺣﺘﻴﻦ ﻓﺎﺕ
_ ﺍﻟﻌﻤﻞ ﺷﻨﻮ ﺍﻟﻘﺎﻝ ﻟﻴﻚ ﻣﺎ ﺗﻘﻄﻌﻮﺍ ﺩﺍ ﻭﻋﺮﻑ ﻛﻴﻒ ؟
_ ﺳﺎﻟﺘﻮ ﻭﻗﻠﺖ ﻟﻴﻬﻮ ﺍﻟﻌﻤﻞ ﺷﻨﻮ ﺍﻻﻭﺍﺻﻞ ﻓﻴﻬﻮ ﺩﺍ ؟ ﻗﺎﻝ ﻟﻲ ﺍﻟﺼﺪﻗﺔ
_ ﺍﻧﺖ ﻗﺎﻋﺪ ﺗﺘﺼﺪﻕ ؟
_ ﺍﺗﺼﺪﻕ ﺷﻨﻮ ﻳﺎﺥ ﺍﻧﺖ ﺻﺪﻗﺖ ﻛﻼﻣﻮ ؟
_ ﻭﺍﻟﻠﻪ ﺍﻇﻨﻚ ﻗﺎﻋﺪ ﺗﺘﺼﺪﻕ ﻋﻠﻴﻚ ﺍﻟﻠﻪ ﻭﺭﻳﻨﻲ
_ ﻣﺎ ﻗﺎﻋﺪ ﺍﺗﺼﺪﻕ ﻭﻻ ﺷﻲ
_ ﺍﻧﺎ ﺣﻠﻔﺘﻚ ﺑﺎﻟﻠﻪ ﻳﺎﺥ ﻋﻠﻴﻚ ﺍﻟﻠﻪ ﻭﺭﻳﻨﻲ
_ ﻣﺎ ﻓﻲ ﺷﻲ ﻳﺎﺥ ﺍﻭﺭﻳﻚ ﺑﺎﻟﻜﻀﺐ
_ ﻻ ﻻ ﻣﺎ ﺑﺎﻟﻜﻀﺐ ، ﺍﻛﻴﺪ ﻗﺎﻋﺪ ﺗﺘﺼﺪﻕ ﻭﻋﺎﻣﻠﻬﺎ ﺑﻴﻨﻚ ﻭﺑﻴﻦ ﺍﻟﻠﻪ ﻭﻣﺎ ﺩﺍﻳﺮ ﺯﻭﻝ ﻳﻌﺮﻓﻬﺎ ، ﺻﺎﺡ ؟
_ ﺻﺎﺡ ﻭﺍﻟﻠﻪ
_ ﻳﺎﺥ ﺍﻧﺎ ﺯﻭﻝ ﺍﺧﻮﻙ ﻣﺎ ﺩﺍﻳﺮ ﺍﻛﻠﻢ ﺑﻴﻬﻮ ﺯﻭﻝ ﺑﺲ ﺩﺍﻳﺮ ﺍﻋﺮﻑ ﻋﺸﺎﻥ ﺍﻧﺎ ﺑﺮﺿﻮ ﺍﻋﻤﻞ ﺯﻳﻚ ﻳﺎﺥ
_ ﺍﻧﺎ ﻟﻤﻦ ﺟﻴﺖ ﺍﻟﺴﻮﻕ ﺍﻟﺸﻌﺒﻲ ﺩﺍ ﻭﺍﺷﺘﻐﻠﺖ ﻓﻲ ﺍﻟﻤﻜﺎﺗﺐ ﺍﻛﺎﻥ ﻓﻲ ﻭﺍﺣﺪ ﺍﺳﻤﻮ ﻋﻠﻲ ﺷﻐﺎﻝ ﻣﻌﺎﻧﺎ ﻓﻲ ﺍﻟﻤﻜﺎﺗﺐ ﻭﺯﻭﻝ ﻃﻴﺐ ﺧﻼﺱ ﻣﺮﺓ ﺑﻌﺘﻞ ﻭﻣﺮﺓ ﺑﻜﺘﺐ ﺍﻟﻤﻨﻔﺴﺘﻮ ﺍﻟﻤﻬﻢ ﺯﻭﻝ ﺍﻟﻠﻪ ﻭﻣﺴﻜﻴﻦ ﺭﺯﻕ ﺍﻟﻴﻮﻡ ﺑﺎﻟﻴﻮﻡ ﻭﻳﻮﻡ ﻋﻠﻲ ﺩﺍ ﺟﺎﺗﻮ ﺻﺪﻣﺔ ﻭﻟﻼ ﺟﻠﻄﺔ ﻭﻭﻗﻊ ﺑﺮﺩﻻﺍﺍﺏ ﻭﻭﺩﻳﻨﺎﻫﻮ ﺍﻟﺪﻛﺘﻮﺭ ﻭﻣﺎ ﺗﻢ ﻳﻮﻣﻴﻦ ﺑﺲ ﻣﺎﺕ ﻭﺍﻧﺎ ﻣﺎ ﺑﻌﺮﻓﻮ ﻛﻮﻳﺲ ﻭﻣﺎ ﻋﺎﺭﻑ ﺣﺎﻟﻮ ﻓﻲ ﺍﻟﺒﻴﺖ ﻟﻜﻦ ﻣﻌﺎﻧﺎ ﻭﺍﺣﺪ ﺻﺎﺣﺒﻮ ﺷﺪﻳﺪ ﻭﺑﻌﺮﻑ ﺍﻱ ﺷﻲ ﻋﻨﻮ ﻭﺟﺎﻧﺎ ﺑﻌﺪ ﺷﻬﺮﻳﻦ ﺗﻘﺮﻳﺒﺎ ﻣﻦ ﻭﻓﺎﺗﻮ ﻭﻗﺎﻝ ﻟﻴﻨﺎ ﻃﻠﻌﻮﺍ ﺍﻟﺴﺎﻫﻠﺔ ﻻﻭﻻﺩ ﻋﻠﻲ ﺍﻟﻤﺮﺣﻮﻡ ﻻﻧﻮ ﺍﻟﺒﻴﺖ ﺍﻟﻘﺎﻋﺪﻳﻦ ﻓﻴﻬﻮ ﺑﺎﻻﻳﺠﺎﺭ ﻭﺳﻴﺪﻭ ﺩﺍﻳﺮ ﻳﻄﺮﺩﻫﻢ ﻣﻨﻮ ﻭﺍﻟﺠﻤﺎﻋﺔ ﻣﺎ ﻗﺼﺮﻭﺍ ﻟﻜﻦ ﻣﺎ ﻟﻤﻮﺍ ﻟﻴﻬﻢ ﻣﺒﻠﻎ ﻳﺮﻳﺤﻬﻢ ﻭﻗﺪﺭ ﺍﻟﻘﺮﻭﺵ ﺍﻟﻠﻤﻮﻫﻦ ﻣﺎ ﻋﻤﻠﻦ ﻟﻴﻬﻢ ﺷﻲ ﻻﻧﻮ ﻋﻨﺪﻭ ﺍﺭﺑﻌﺔ ﺍﻭﻻﺩ ﻭﺻﻐﺎﺭ ﻭﺍﻫﻠﻬﻢ ﻣﺎ ﺷﻐﺎﻟﻴﻦ ﺑﻴﻬﻢ ﻭﻣﺎ ﻋﺎﺭﻑ ﻫﻢ ﻣﻦ ﻭﻳﻦ ﺑﺎﻟﻈﺒﻂ ﻟﻜﻦ ﻣﺎ ﻋﻨﺪﻫﻢ ﺯﻭﻝ ﻫﻨﺎ ﻓﻲ ﺍﻟﺨﺮﻃﻮﻡ ﻭﺍﻟﻈﺎﻫﺮ ﻓﻲ ﻣﺸﺎﻛﻞ ﻻﻧﻮ ﺍﻟﻤﺮﺓ ﻣﺎ ﻗﺎﺩﺭﺓ ﺗﺮﺟﻊ ﻭﺻﺎﺣﺒﻮ ﻭﺭﺍﻧﻲ ﻛﻞ ﺷﻲ ﻋﻨﻮ ﻭﺍﻧﺎ ﻣﺸﻴﺖ ﺩﻓﻌﺖ ﻟﻴﻬﻢ ﺍﻻﻳﺠﺎﺭ ﻭﺑﺲ
_ ﻳﺎﺧﻲ ﻭﺍﻟﻠﻪ ﻣﺎ ﻗﺼﺮﺕ ﺗﺐ ﻭﻓﻲ ﻣﻴﺰﺍﻥ ﺣﺴﻨﺎﺗﻚ ﺍﻥ ﺷﺎﺀ ﺍﻟﻠﻪ
_ ﺑﺲ ﻛﻼﻡ ﺍﻟﺰﻭﻝ ﺩﺍ ﻣﺎ ﻳﺎﻫﻮ ﺍﻟﻐﻴﺮﻧﻲ
_ ﺍﻫﺎ
_ ﺍﻣﺲ ﺍﻟﻤﻐﺮﺏ ﺍﻟﺠﻤﺎﻋﺔ ﻣﺸﻮﺍ ﺻﻠﻮﺍ ﻭﺍﻧﺎ ﻗﺎﻋﺪ ﻓﻲ ﺍﻟﻤﻜﺘﺐ ﻣﺎ ﻗﺎﻋﺪ ﺍﺻﻠﻲ ﻃﺒﻌﺎ ﻗﻌﺪﺕ ﺑﺮﺍﻱ ﺯﻱ ﺍﻟﻜﺎﻓﺮ ﻭﻓﻜﺮﺕ ﻓﻲ ﺭﻭﺣﻲ ﻭﻓﻲ ﺣﻴﺎﺗﻲ ﺩﻱ ﻟﻘﻴﺖ ﺭﻭﺣﻲ ﺑﻬﻴﻤﺔ ﺳﺎﻱ ﻭﺍﺗﺬﻛﺮﺕ ﺍﻟﺤﺎﺩﺙ ﻭﺍﺗﺬﻛﺮﺕ ﻋﻠﻲ ﺍﻟﻌﺘﺎﻟﻲ ﺍﻟﻮﻗﻊ ﻭﻛﺎﻥ ﺷﺪﻳﺪ ﻭﺑﺘﻮﻧﺲ ﻣﻌﺎﻧﺎ ﻭﻃﻮﺍﻟﻲ ﻟﻌﻨﺖ ﺍﺑﻠﻴﺲ ﻭﺟﻴﺖ ﻫﻨﺎ ﺍﻏﺘﺴﻠﺖ ﻭﺻﻠﻴﺖ ﻭﺍﻟﻠﻪ ﻳﺎﺩﻭﺏ ﺣﺴﻴﺖ ﺍﻧﻲ ﺍﻧﺴﺎﻥ ﻭﺣﺴﻴﺖ ﺑﺮﺍﺣﺔ ﻭﻃﻤﺄﻧﻴﻨﺔ ﻋﺠﻴﺒﺔ ﻭﻋﻨﺪﻱ ﻗﻴﻤﺔ ﻭﻗﻤﺖ ﻃﻮﺍﻟﻲ ﺟﺪﻋﺖ ﺍﻟﻜﻔﺘﻴﺮﺓ ﻭﻧﻀﻔﺖ ﺍﻟﺒﻴﺖ ﻭﻣﺸﻴﺖ ﺟﺒﺖ ﻟﻲ ﻣﺼﺤﻔﻴﻦ ﻭﻣﻨﺒﻪ ﻟﺼﻼﺓ ﺍﻟﺼﺒﺢ ﻭﺍﻟﻠﻴﻠﺔ ﺍﻟﺤﻤﺪ ﻟﻠﻪ ﺻﻠﻮﺍﺗﻲ ﺍﻟﺨﻤﺴﺔ ﺻﻠﻴﺘﻦ ﻓﻲ ﺍﻟﺠﺎﻣﻊ
_ ﺳﻤﺢ ﺍﻻﺫﺍﻥ ، ﻭﻗﺒﻴﻞ ﺍﺫﻧﺖ ﺍﻧﺖ ﺩﺍ
_ ﺻﻼﺓ ﺍﻟﻤﻐﺮﺏ ﺟﻴﺖ ﺻﻠﻴﺘﻬﺎ ﻫﻨﺎ ﻭﺍﻟﻤﺆﺫﻥ ﺍﻟﻈﺎﻫﺮ ﻋﻨﺪﻭ ﻣﺸﻮﺍﺭ ﻗﺎﻝ ﻟﻲ ﻟﻮ ﺳﻤﺤﺖ ﺑﻌﺪﻳﻦ ﺍﺫﻥ ﻟﻠﻌﺸﺎﺀ ﻗﻠﺖ ﻟﻴﻬﻮ ﺟﺪﺍ ﻭﻣﺸﻴﺖ ﺃﺫﻧﺖ ، ﻭﺻﺪﻓﺔ ﺳﺎﻱ ﻟﻘﺎﻧﻲ ﺟﻤﺒﻮ ﻭﻛﻠﻔﻨﻲ
_ ﻭﺍﻟﻠﻪ ﺑﺨﺘﻚ ، ﻳﻮﻡ ﺍﻧﺎ ﺯﺍﺗﻲ ﺑﻘﻮﻝ ﻟﻴﻬﻮ ﺩﺍﻳﺮ ﺃﺃﺫﻥ
_ ﺍﻫﺎ ﺍﻟﻤﻮﺿﻮﻉ ﺷﻨﻮ ؟
_ ﻣﻮﺿﻮﻉ ﺷﻨﻮ ؟
_ ﺍﻫﺎﺍﺍﺍﺍﺍﺍ
_ ﺍﻳﻮﺍﺍﺍ ﻳﺎﺥ ﺩﺍﻙ ﻣﻮﺿﻮﻉ ﺍﺧﻴﺮ ﻋﺪﻣﻮ
_ ﻗﻮﻟﻮ
_ ﻳﺎﺥ ﺑﺼﺮﺍﺣﺔ ﻭﻫﻮ ﺳﺆﺍﻝ ﻟﻲ ﻛﻢ ﻳﻮﻡ ﺩﺍﻳﺮ ﺍﺳﺄﻟﻚ ﻣﻨﻮ ﻣﺎ ﻣﻮﺿﻮﻉ
_ ﺍﺳﺄﻝ
_ ﺍﻧﺎ ﺯﻭﻝ ﺍﺧﻮﻙ ﻭﺯﻱ ﻣﺎ ﺍﻧﺖ ﺑﺘﻬﻤﻚ ﻣﺼﻠﺤﺘﻲ ﻭﺩﺍﻳﺮ ﻟﻲ ﺍﻟﺨﻴﺮ ﺍﻧﺎ ﺯﺍﺗﻲ ﻛﺪﺍ ﻭﺍﻟﻠﻪ ﻭﺍﻟﻌﻤﻠﺘﻮ ﻣﻌﺎﻱ ﻣﺎﻓﻲ ﺯﻭﻝ ﺑﻌﻤﻠﻮ ﻭﻗﺒﻞ ﺍﺳﺄﻟﻚ ﺍﻟﺴﺆﺍﻝ ﺍﻧﺎ ﻧﺴﻴﺖ ﺍﻛﻠﻤﻚ ﺑﺎﻟﺪﻛﺎﻥ ﺣﻘﻚ ؟
_ ﻣﺎﻟﻮ ﺍﻟﺪﻛﺎﻥ ؟
_ ﺍﺳﺘﻠﻤﻨﺎﻫﻮ ﺍﻧﺎ ﻭﻋﺒﺪ ﺍﻟﻘﻴﻮﻡ ﺑﺮﺍﻧﺎ ﻭﻃﻠﻌﻨﺎ ﻣﻨﻮ ﺧﻀﺮ
_ ﻋﺎﺭﻑ ﻣﻦ ﺍﻭﻝ ﺍﻣﺲ ﻭﺍﻟﻜﻠﻤﻨﻲ ﺧﻀﺮ ﺟﺎﺀ ﻗﺎﻝ ﻟﻲ ﺍﻧﺎ ﻣﺮﻗﺖ ﻣﻦ ﺍﻟﺪﻛﺎﻥ ﻭﺍﻻﻳﺠﺎﺭ ﺍﺳﺄﻟﻚ ﻣﻨﻮ ﺍﻧﺖ ﻭﻋﺒﺪ ﺍﻟﻘﻴﻮﻡ
_ ﺁﻱ ﻭﻋﻤﺮ ﺭﺟﻊ ﻟﻲ ﺍﻟﻘﺮﻭﺵ ﻛﺎﻣﻠﺔ
_ ﻻﻗﻴﺘﻮ ﻳﻮﻣﻮ ﺍﻟﺴﺎﻓﺮ ﺑﺲ ﻣﺎ ﺍﺗﻜﻠﻤﺖ ﻣﻌﺎﻫﻮ ﺷﺎﻳﻔﻮ ﻣﻦ ﺑﻌﻴﺪ
_ ﺗﻤﺎﻡ
_ ﺑﺲ ﺍﻻﻳﺠﺎﺭ ﺍﻫﻢ ﺣﺎﺟﺔ ﻭﻗﺮﻭﺵ ﺍﻟﺒﻀﺎﻋﺔ ﺍﻟﻜﺎﻧﺖ ﻓﻴﻬﻮ ﺍﺩﻓﻌﻮﺍ ﻟﻲ ﻧﺼﻬﺎ ﻋﺸﺎﻥ ﻣﻌﺎﻱ ﺷﺮﻳﻚ
_ ﺷﺮﻳﻚ ﻣﻨﻮ ﺩﺍ ؟
_ ﻭﺍﻟﻠﻪ ﺑﺎﻟﻮﺍﺿﺢ ﺍﻭﻻﺩ ﺍﻟﻤﺮﺣﻮﻡ ﺍﻟﻜﻠﻤﺘﻚ ﺑﻴﻬﻢ ﻗﺒﻞ ﺷﻮﻳﺔ ﺍﻧﺎ ﺍﻟﺪﻛﺎﻥ ﺩﺍ ﺍﺷﺘﺮﻳﺘﻮ ﻟﻴﻬﻢ ﻭﺍﻳﺠﺎﺭﻭ ﻛﻠﻮ ﻟﻴﻬﻢ
_ ﻳﺎ ﺳﻼﻡ ﻳﺎﺥ ﻭﺍﻟﻠﻪ ﻣﺎ ﻋﺎﺭﻑ ﺍﻗﻮﻝ ﻟﻴﻚ ﺷﻨﻮ
_ ﻗﻮﻝ ﻟﻲ ﺍﻟﺴﺆﺍﻝ
_ ﺑﻌﺪ ﻛﻼﻣﻚ ﺩﺍ ﻣﺎ ﻓﻲ ﺩﺍﻋﻲ ﻟﻴﻬﻮ
_ ﻻ ﻻ ﻓﻲ
_ ﺍﻟﺴﺆﺍﻝ ﺑﺼﺮﺍﺣﺔ ﺍﻧﺖ ﻳﺎ ﺍﻟﺘﺎﺝ ﺻﺎﺡ ﺷﻐﺎﻝ ﻣﺨﺪﺭﺍﺕ ؟
_ ﻧﻮﻡ ﺁ ﻋﺒﺎﺱ ﻳﺎﺥ ﻋﺸﺎﻥ ﺍﻟﺼﺒﺢ ﻣﺎ ﻳﻔﻮﺗﻨﺎ