ﺍﻟﺤﺐ ﺍﻟﺨﺠﻮﻝ ..
ﺍﻟﺤﻠــﻘﺔ ﺍﻻﻭﻟﻰ .
ﺑﻘﻠﻢ ﻃﺎﺭﻕ ﺍﻟﻠﺒﻴﺐ

ﺍﻟﺤﺐ ﺍﻟﺨﺠﻮﻝ ..
ﺍﻟﺤﻠــﻘﺔ ﺍﻻﻭﻟﻰ .
ﺑﻘﻠﻢ ﻃﺎﺭﻕ ﺍﻟﻠﺒﻴﺐ .
ﺍﻟﺮﻭﺍﻳﺔ ﺩﻱ ﺍﻧﺎ ﻛﺘﺒﺘﻬﺎ ﺑﺪﺭﻱ .. ﻓﻲ ﺷﻜﻞ ﻗﺼﺔ ﻗﺼﻴﺮﺓ .. ﻟﻜﻦ ﺍﻧﺎ ﻳﺘﺨﻴﻠﻲ .. ﺑﺘﺤﻤﻞ ﻣﻌﺎﻧﻲ ﺳﺎﻣﻴﺔ ﺷﺪﻳﺪ ﺟﺪﺍ .. ﻋﺸﺎﻥ ﻛﺪﺍ ﺍﻟﻤﻔﺮﻭﺽ ﺗﺤﻈﻰ ﺑﺎﻋﺘﺒﺎﺭ ﻭﻣﺘﻌﺔ ﺍﻛﺘﺮ ﺷﻮﻳﺔ .. ﻓﻌﺪﺕ ﺻﻴﺎﻏﺘﻬﺎ ﻟﻤﺎ ﻓﻴﻬﺎ ﻣﻦ ﺍﻟﻔﻮﺍﺋﺪ
ﻭﺍﻟﻌﻠﻢ ..
ﻣﺪﺭﺳﺔ ﺛﺎﻧﻮﻳﺔ .. ﺑﺘﺎﻋﺔ ﺑﻨﺎﺕ ﻣﺘﻮﺍﺿﻌﺔ ﺟﺪﺍ .. ﻭﺟﻤﻴﻠﺔ .. ﻣﻊ ﺍﻧﻮ ﺍﻟﻤﺪﺭﺳﺔ ﻣﺒﺎﻧﻴﻬﺎ ﺑﺴﻴﻄﺔ .. ﻟﻜﻦ ﻣﻬﺘﻤﻴﻦ ﺑﻴﻬﺎ ﺟﺪﺍ .. ﻭﺿﺎﺭﺑﻴﻨﻬﺎ ﺟﻴﺮ ﻭﺑﻮﻣﺎﺳﺘﻚ ﻟﺒﻨﻲ ﻛﻠﻬﺎ .. ﻭﺑﺮﻩ ﻭﻓﻮﻗﻬﺎ ﻻﻓﺘﺔ ﻛﺒﻴﺮﺓ .. ﻣﺪﺭﺳﺔ ﺍﻟﺠﺮﺍﺟﻴﺮ ﺍﻟﺜﺎﻧﻮﻳﺔ ﺑﻨﺎﺕ .. ﻭﺍﻟﺒﻮﺍﺑﺔ ﻛﺒﻴﺮﺓ .. ﻣﻦ ﺗﻼﺗﺔ ﺿﻠﻔﺎﺕ ﺑﺘﺪﺧﻞ ﻗﻨﺪﺭﺍﻥ ..
ﺧﻠﻲ ﻋﺮﺑﻴﺔ ﺻﻐﻴﺮﺓ . ﻟﻤﻦ ﻳﺠﻮ ﺍﻟﻤﻮﺟﻬﻴﻦ ﺑﺎﻟﻌﺮﺑﻴﺎﺕ ﺍﻟﺤﻜﻮﻣﻴﺔ ﺑﺪﺧﻠﻮ ﺟﻮﺓ .. ﺑﻲ ﻋﺮﺑﺎﺗﻬﻢ .. ﻃﻮﺍﻟﻲ ..
ﻭﺍﻟﻤﺪﺭﺳﺔ ﻓﻴﻬﺎ ﺷﻜﻞ ﺣﺪﻳﻘﺘﻴﻦ ﻛﺪﺍ ﺑﺘﺎﻋﺔ ﻧﺠﻴﻠﺔ ﻣﺴﻮﺭﺍﺕ ﺑﻲ ﻃﻮﺏ ﻣﻐﺰﻏﺰ ﻓﻲ ﺍﻻﺭﺽ .. ﺳﻴﺎﻓﻲ .. ﻭﺑﻴﻨﺎﺗﻬﻦ ﻣﻤﺸﻰ ..
ﺍﻟﻤﺒﺎﻧﻲ ﺑﺘﺎﻋﺔ ﺍﻟﻤﺪﺭﺳﺔ ﻓﻲ ﺷﻜﻞ ﺻﻒ ﻭﺍﺣﺪ .. ﻓﺼﻮﻝ ﺍﻭﻟﻰ ﻭ ﺗﺎﻧﻴﺔ ﻣﻦ ﺍﻟﻨﺎﺣﻴﺔ ﺍﻟﺸﺮﻗﻴﺔ .. ﺑﺘﺠﻲ ﺑﻌﺪﻳﻬﻢ ﺍﻟﻤﻜﺎﺗﺐ .. ﻣﻜﺘﺒﻴﻦ ﺑﻴﻨﻬﻢ ﺑﺮﻧﺪﻩ .. ﻣﻜﺘﺐ ﺍﻻﺳﺎﺗﺬﺓ ﺷﺮﻗﻲ .. ﻭﻣﻜﺘﺐ ﺍﻟﻤﺪﻳﺮ ﻏﺮﺑﻲ .. ﻭﺍﻟﻤﺪﻳﺮ ﻣﻌﺎﻫﻮ ﺍﻟﻮﻛﻴﻞ ﻓﻲ ﻣﻜﺘﺒﻮ .. ﻭﺑﻌﺪﺍﻙ ﻓﺼﻞ ﺗﺎﻟﺘﺔ ﻓﻲ ﺍﻟﻨﺎﺣﻴﺔ ﺍﻟﻐﺮﺑﻴﺔ ﺍﺧﺮ ﺷﻲ .
ﻭﺑﻮﺍﺑﺔ ﺍﻟﻤﺪﺭﺳﺔ ﻓﺎﺗﺤﺔ ﻏﺮﺏ ..
ﻫﻨﺎﻙ ﻓﻲ ﺍﻟﻨﺎﺣﻴﺔ ﺍﻟﺠﻨﻮﺑﻴﺔ ﻓﻲ ﻣﻴﺰ . ﻭﺑﻮﻓﻲ ﻓﻴﻬﻮ ﺳﻨﺪﻭﺗﺴﺎﺕ ﻭﺷﺎﻱ ﻭﻛﺪﺍ .. ﻭﺟﻨﺒﻮ ﻃﻮﺍﻟﻲ ﺍﻟﻤﺰﻳﺮﺓ .. ﻭﺍﻟﺤﻤﺎﻣﺎﺕ ﺑﺘﺎﻋﺔ ﺍﻟﻄﻠﺒﺔ ﻓﻲ ﺍﻟﺮﻛﻦ ﺍﻟﺠﻨﻮﺑﻲ ﺍﻟﻐﺮﺑﻲ .. ﻭﺣﻤﺎﻣﺎﺕ ﺍﻻﺳﺎﺗﺬﺓ ﻓﻲ ﺍﻟﺮﻛﻦ ﺍﻟﺸﻤﺎﻝ ﺍﻟﺸﺮﻗﻲ ..
ﺩﻱ ﺗﻘﺮﻳﺒﺎ ﺍﻟﺨﺮﻃﺔ ﺍﻟﺘﻘﺮﻳﺒﺔ ﻟﻠﻤﺪﺭﺳﺔ ..
ﻣﺪﺭﺳﺔ ﻋﺠﻴﺒﺔ ﻭﺭﻫﻴﺒﺔ .. ﻭﻓﻴﻬﺎ ﺭﻭﺡ ﻭﻫﺪﻭﺀ ﻏﺮﻳﺐ .. ﺣﺘﻰ ﺍﻟﺠﻮﻃﺔ ﺍﻟﻤﻌﺘﺎﺩﺓ .. ﺍﻟﺒﺸﺘﻜﻮ ﻣﻨﻬﺎ ﺟﻴﺮﺍﻥ ﺍﻟﻤﺪﺍﺭﺱ ﻣﺎﻓﻴﻬﺎ .. ﻭﺩﻩ ﻛﻠﻮ ﺑﻲ ﺳﺒﺐ ﺍﻟﻤﺪﻳﺮ ﺍﺳﺘﺎﺫ ﻓﺎﺭﺱ .. ﺍﻻﺳﺘﺎﺫ ﻓﺎﺭﺱ ﺍﺻﻐﺮ ﺍﻻﺳﺎﺗﺬﺓ ﻣﺎ ﺍﻛﺘﺮ ﻣﻦ 33 ﺳﻨﺔ . ﻟﻜﻨﻮ ﻫﻮ ﺍﻟﻤﺪﻳﺮ .. ﺍﻟﻮﻛﻴﻞ ﺍﻗﺮﺏ ﻟﻴﻬﻮ ﻓﻲ ﺍﻟﻌﻤﺮ ﺍﺳﻤﻮ ﻋﺒﺪ ﺍﻟﺮﺣﻤﻦ .. ﻭﻫﻮ ﺻﺪﻳﻘﻮ ﺍﻟﻤﻘﺮﺏ .. ﻭﺷﻐﺎﻝ ﻣﻌﺎﻫﻮ ﻓﻲ ﻧﻔﺲ ﺍﻟﻤﻜﺘﺐ ..
ﺍﺳﺘﺎﺫ ﻓﺎﺭﺱ ﺧﺒﻴﺮ ﻓﻲ ﺍﻟﺮﻳﺎﺿﻴﺎﺕ .. ﻋﺸﺎﻥ ﻛﺪﺍ ﻛﺘﻴﺮ ﺑﺮﺍﺟﻊ ﻟﻨﺎﺱ ﺗﺎﻟﺘﺔ ﺍﻟﺮﻳﺎﺿﻴﺎﺕ ﻭﺯﻭﻝ ﺗﺤﻔﺔ ..
ﺍﺻﻼ ﻣﺎ ﺑﻤﻴﻞ ﻟﻠﺠﻠﺪ .. ﻟﻜﻦ ﻋﻨﺪﻭ ﻛﻼﻡ ﻻﺫﻉ .. ﺍﺣﺴﻦ ﻣﻨﻪ ﻳﺠﻠﺪ ﺍﻟﺒﺖ ﺧﻤﺴﻴﻦ ﺻﻮﻁ ..
ﻭﺯﻭﻝ ﻣﻬﺬﺏ ﺷﺪﻳﺪ .. ﻭﺩﺍﻳﻤﺎ ﻣﺒﺘﺴﻢ .. ﻭﻭﺟﻴﻪ ﻭﺟﺎﻫﺔ ﻣﻜﺴﺮ ﺍﻟﺒﻨﺎﺕ ﻻﺣﺪﻫﻦ .. ﻭﻟﺒﻴﺲ ﻧﻀﻴﻒ ﻧﻀﺎﻓﺔ ﻟﺪﺭﺟﺔ .. ﻭﻻﺯﻡ ﺍﻟﻤﺪﺭﺳﺔ ﺍﻟﻤﺪﺭﺳﺔ ﺩﻱ .. ﻳﻮﻣﻴﺎ ﺗﻜﻮﻥ ﺑﺘﻠﻤﻊ .. ﻣﻦ ﺍﻟﻨﻀﺎﻓﺔ .. ﻭﺍﻻ ﺍﻟﻤﺪﻳﺮ ﺑﻜﻮﻥ ﻣﺘﻮﺗﺮ ..
ﺍﻟﻤﺪﻳﺮ ﻓﺎﺭﺱ ﻣﺤﺒﻮﺏ ﺣﺐ ﺷﺪﻳﺪ ﻣﻦ ﺍﻟﻄﻠﺒﺔ ﻭﺍﻻﺳﺎﺗﺬﺓ .. ﻭﻓﻲ ﺍﺳﺘﺎﺫﺗﻴﻦ .. ﺍﻻﺗﻨﻴﻦ ﻣﺘﻨﺎﻓﺴﺎﺕ ﻋﻠﻴﻬﻮ .. ﻣﻊ ﺍﻧﻬﻦ ﻣﺎﻣﻨﺎﺳﺒﺎﺕ ﻟﻴﻬﻮ ﻓﻲ ﺍﻟﻌﻤﺮ .. ﻭﺍﺣﺪﺓ ﻋﺎﻧﺲ ﻭﺍﻟﺘﺎﻧﻴﺔ ﻣﻄﻠﻘﺔ .. ﺑﺲ ﻫﻮ ﻣﺎﻓﺎﻫﻢ ﺍﻱ ﺣﺎﺟﺔ .. ﻭﺑﻨﺎﺕ ﺗﺎﻟﺘﺔ ﺩﻳﻞ .. ﺍﺳﻜﺖ ﺳﺎﻱ .. ﻋﺎﺷﻘﺘﻨﻮ ﻋﺸﻖ ﻋﺪﻳﻞ .. ﺟﺖ ﻋﻠﻴﻬﻦ . ﺍﻟﻮﺍﺣﺪﺓ ﻓﻴﻬﻦ ﺗﺘﻤﻨﻰ ﺗﺪﺧﻞ ﻣﻜﺘﺐ ﺍﻟﻤﺪﻳﺮ .. ﻋﺸﺎﻥ ﺗﺸﻮﻓﻮ ..
ﻭﻗﺖ ﻳﺠﻲ ﺩﺍﺧﻞ ﻣﻦ ﺑﺮﺓ .. ﻣﺎﺷﻲ ﻋﻠﻰ ﻣﻜﺘﺒﻮ .. ﻛﻠﻬﻦ ﻳﻤﺪﻥ ﺭﻭﺳﻴﻬﻦ ﺑﺎﻟﺸﺒﺎﺑﻴﻚ ﻳﻘﻌﺪﻥ ﻳﻌﺎﻳﻨﻦ ﻟﻴﻬﻮ ..
ﻫﻮ ﺯﻭﻝ ﺑﺎﻟﻤﻨﺎﺳﺒﺔ ﻣﻜﻤﻞ .. ﺍﻟﻜﻤﺎﻝ ﻟﻠﻪ .. ﺑﺲ ﻋﻨﺪﻭ ﻋﻴﺐ ﻭﺍﺣﺪ ﻣﺎﻗﺪﺭ ﻳﺘﺨﻠﺺ ﻣﻨﻪ ﺑﻨﻌﺮﻓﻮ ﻟﻲ ﻗﺪﺍﻡ ..
ﻓﺎﺭﺱ ﺩﻩ ﻛﺎﻥ ﺧﺎﻃﺐ ﺑﺖ ﺧﺎﻟﺘﻮ .. ﺍﺳﻤﻬﺎ ﻣﻨﺎﻝ .. ﻧﺎﺱ ﺍﻟﺤﻠﺔ ﻣﺴﻤﻨﻬﺎ ‏( ﻣﻨﺎﻝ ﺷﻄﻪ ‏) . .. ﻭﻣﻨﺎﻝ ﺑﺎﻋﺘﻮ ﻗﺒﻞ ﺳﻨﻴﺘﻦ .. ﺑﻲ ﺳﺒﺐ ﻭﺍﺣﺪ ﻣﻐﺘﺮﺏ .. ﻭﻛﺎﻥ ﺩﺧﻞ ﻓﻲ ﺣﺎﻟﺔ ﻧﻔﺴﻴﺔ .. ﻟﻜﻦ ﻫﺴﻲ ﺍﺗﺠﺎﻭﺯ ﺍﻻﻣﺘﺤﺎﻥ ﺩﻩ .. ﻟﻲ ﻗﺪﺍﻡ ﻫﻮ ﺣﻴﻜﻲ ﻗﺼﺘﻪ ﻣﻌﺎﻫﺎ ..
ﺍﻫﺎ ﻛﺎﻥ ﻓﻲ ﺍﻻﻳﺎﻡ ﺩﻱ ﻳﺎﺩﻭﺏ ﻣﻀﻰ ﺷﻬﺮ ﻟﺒﺪﺍﻳﺔ ﺍﻟﺴﻨﺔ ..
ﺣﺼﻠﺖ ﻗﺼﺔ .. ﺑﻨﺎﺕ ﺗﺎﻟﺘﺔ ﻃﺒﻌﺎ ﻓﻲ ﻣﺮﺣﻠﺔ ﻣﺮﺍﻫﻘﺔ .. ﻭﻣﺤﺘﺎﺟﺎﺕ ﻟﻲ ﻣﻌﺎﻣﻠﺔ ﺧﺎﺻﺔ ..
ﻭﻧﺴﺘﻬﻦ ﻛﻠﻬﺎ ﻓﻲ ﺍﻟﻤﺪﺭﺳﺔ .. ﺍﺳﺘﺎﺫ ﻓﺎﺭﺱ ﺍﺳﺘﺎﺫ ﻓﺎﺭﺱ .. ﻭﻧﺴﺒﺔ ﻻﻧﻮ ﺯﻭﻝ ﺩﻏﺮﻱ .. ﻭﻣﻬﺬﺏ .. ﻣﺎﻓﻲ ﻭﺍﺣﺪﺓ ﻗﺎﺩﺭﺓ ﺗﺘﻜﻠﻢ ﻣﻌﺎﻫﻮ ﻛﻠﻤﺘﻴﻦ ﻭﺭﺍ ﺑﻌﺾ .
ﺍﻫﺎ ﻳﻮﻡ ﻣﻦ ﺍﻻﻳﺎﻡ .. ﻓﻲ ﺑﻨﺎﺕ ﺻﺤﺒﺎﺕ ﻛﺪﺍ ﺑﺘﻮﻧﺴﻦ .. ﻭﺍﺣﺪﺓ ﺍﺳﻤﻬﺎ ﺃﺭﻳﺞ . . ﺑﺖ ﺣﻠﻮﺓ .. ﻣﺎﺷﺎﺀ ﺍﻟﻠﻪ . ﺯﻱ ﺍﻟﻮﺭﺩﺓ ﺍﻟﻤﺘﻔﺘﺤﺔ . ﻭﻋﻠﻴﻬﺎ ﺟﻨﺲ ﻋﻴﻮﻥ ﺗﺮﻣﻲ ﻓﻲ ﺍﻟﺸﻮﻙ . ﻭﺑﺖ ﻣﺴﻠﻄﺔ ﻭﺑﺘﺎﻋﺔ ﻛﻮﺍﺭﺙ . ﺍﻫﺎ ﺍﺭﻳﺞ ﻗﺎﻟﺖ ﻟﺼﺎﺣﺒﺎﺗﻬﺎ .. ﻭﺍﻟﻠﻪ ﺍﻧﺎ ﺍﻟﻠﻴﻠﺔ ﻛﺎﻥ ﺍﺷﺎﻏﻞ ﺍﺳﺘﺎﺫ ﻓﺎﺭﺱ ﻓﻲ ﺍﻟﻔﺼﻞ .. ﻭﺍﺷﻮﻑ ﺭﺩﺓ ﻓﻌﻠﻮ ﺍﻥ ﺷﺎﺀ ﺍﻟﻠﻪ ﻳﻄﺮﺩﻧﻲ ..
ﻻﺯﻡ ﺍﺟﺎﺯﻑ ﺍﺣﺘﻤﺎﻝ ﻳﻘﻊ ﻓﻲ ﺍﻟﺤﺒﻜﺎﻧﺔ .. ﺍﻟﺒﻨﺎﺕ ﻗﺎﻟﻦ ﻟﻴﻬﺎ ﺍﻧﺘﻲ ﻛﺬﺍﺑﺔ ..
ﻣﺎﺑﺘﻘﺪﺭﻱ .. ﺑﺘﺘﻔﺎﺻﺤﻲ ﻣﻌﺎﻧﺎ ﻫﻨﺎ ﺳﺎﻱ .. ﻟﻜﻦ ﻣﺎﺑﺘﺴﻮﻱ ﺍﻟﺤﺒﺔ ..
ﻗﺎﻟﺖ ﻟﻴﻬﻦ ﻛﻮﻳﺲ ﺑﺘﺸﻮﻓﻦ .. ﺍﻧﺎ ﺍﺻﻠﻲ ﻗﻨﻌﺎﻧﺔ ﻗﻨﻌﺎﻧﺔ .. ﻭﻫﻮ ﺍﻧﺎ ﻋﺎﺭﻓﺎﻫﻮ ﻣﺴﺘﺒﺪ ﻭﻣﺘﻜﺒﺮ ﺍﺣﺘﻤﺎﻝ ﻳﻄﺮﺩﻧﻲ 90 % ..
ﻭﻃﺒﻌﺎ ﺍﻟﻠﻴﻠﺔ ﺑﺎﻟﺬﺍﺕ .. ﺍﺳﺘﺎﺫ ﻓﺎﺭﺱ ﻋﻨﺪﻭ ﺣﺼﺔ ﺭﻳﺎﺿﻴﺎﺕ ﻣﻌﺎﻫﻦ .. ﻭﺍﻟﺒﻨﺎﺕ ﻣﺘﻮﺗﺮﺍﺕ .. ﻭﺧﺎﻳﻔﺎﺕ ﻣﻦ ﺍﻟﺒﺖ ﺗﻘﻮﻡ ﺗﻌﻤﻞ ﺍﻟﻌﻤﻠﺔ .. ﻫﻮ ﺩﺧﻞ ﺍﻟﻔﺼﻞ ﻣﺎﺷﺎﻳﻞ ﻛﺘﺎﺏ ﻭﻻ ﺍﻱ ﺷﻲ .. ﺍﺻﻼ ﺑﺠﻲ ﻳﺪﺭﺱ ﻣﻦ ﺭﺍﺳﻮ .. ﺯﻭﻝ ﻣﺒﺎﻟﻐﺔ ﻓﻲ ﺍﻟﺮﻳﺎﺿﻴﺎﺕ .. ﻣﻌﻠﻢ ﻣﻌﻠﻢ ..
ﻭﺑﺪﺃ ﻓﻲ ﺍﻟﺤﺼﻪ ﺍﻭﻝ ﺣﺎﺟﺔ ﺳﻠﻢ ﻋﻠﻴﻬﻦ ..
ﻭﻭﺻﺎﻫﻦ ﻗﺎﻟﻴﻬﻦ ﺍﻧﺘﻦ ﻃﺒﻌﺎ " ﺍﻣﻠﻲ ﺍﻟﻮﺣﻴﺪ .. ﻓﻲ ﻧﺠﺎﺡ ﺍﻟﻤﺪﺭﺳﺔ ﻭﻓﺸﻠﻬﺎ .. ﻭﺍﻟﺤﻤﺪ ﻟﻠﻪ ﺍﻧﺎ ﻣﺒﺴﻮﻁ ﻣﻨﻜﻢ .. ﻭﻣﻦ ﺍﺩﺑﻜﻢ ﻭﺍﺟﺘﻬﺎﺩﻛﻢ .. ﻃﺒﻌﺎ ﺍﻧﺘﻮ ﺍﻟﺴﻨﺔ ﺩﻱ ﺍﺣﺴﻦ ﻣﻦ ﺑﻨﺎﺕ ﺍﻟﺴﻨﺔ ﺍﻟﻔﺎﺗﺖ .. ﻋﺸﺎﻥ ﻛﺪﺍ ﺍﻧﺎ ﻣﺒﺴﻮﻁ ﻭﻧﻔﺴﻴﺎﺗﻲ ﻣﺮﺗﻔﻌﺔ ﻭﻣﺘﻔﺎﺋﻞ ..
ﻃﺒﻌﺎ ﻗﺎﻝ ﻟﻴﻬﻦ ﻛﻼﻡ .. ﻛﻞ ﺍﻟﺒﻨﺎﺕ ﺍﻟﻘﺒﻴﻞ ﻛﺎﻧﻦ ﻣﻊ ﺍﺭﻳﺞ .. ﺍﺗﻤﻨﻦ ﺍﻧﻮ ﺍﺭﻳﺞ ﺗﻐﻴﺮ ﺭﺍﻳﻬﺎ ﻣﻦ ﻗﺮﺍﺭﻫﺎ .. ﻋﺸﺎﻥ ﻣﺎﺗﺨﻴﺐ ﻇﻦ ﺍﻻﺳﺘﺎﺫ ﺍﻟﻄﻴﺐ ﺩﻩ ﻓﻲ ﺑﻨﺎﺕ ﺍﻟﻔﺼﻞ ..
ﻟﻜﻦ ﻃﺒﻌﺎ " ﺳﺒﻖ ﺍﻟﺴﻴﻒ ﺍﻟﻌﺰﻝ .. ﻭﺍﻟﺒﺖ ﺍﻟﻤﺘﻬﻮﺭﺓ ﺍﺗﻜﺤﻠﺖ ﻭﻣﺴﺤﺖ ﺷﻔﺎﻳﻔﻬﺎ .. ﺑﻲ ﻣﺮﻃﺐ .. ﻭﺑﻘﺖ ﺗﺘﻤﻠﻤﻞ .. ﻭﺍﻻﺳﺘﺎﺫ ﺍﻟﺠﻤﻴﻞ ﺑﺪﺃ ﻳﺸﺮﺡ ﺑﻜﻞ ﺫﻛﺎﺀ ﻭﻟﺒﺎﻗﺔ .. ﻭﺍﻟﺒﻨﺎﺕ ﺩﻳﻞ ﺑﺲ ﻋﻴﻮﻧﻦ ﻣﺴﻤﺮﺍﺕ ﻓﻴﻬﻮ .. ﻭﻓﺎﺗﺤﺎﺕ ﺧﺸﻮﻣﻦ ﺯﻱ ﺍﻟﻬﺒﻞ .. ﻭﺍﻇﻨﻬﻦ ﻣﺎﻓﺎﻫﻤﺎﺕ ﺣﺎﺟﺔ ﻟﻠﺮﻳﺎﺿﻴﺎﺕ .. ﻟﻜﻦ ﺳﺒﺤﺎﻥ ﺍﻟﻠﻪ ﺣﺼﺘﻮ ﺩﻱ ﺍﻛﺘﺮ ﺣﺼﺔ ﺑﻔﻬﻤﻨﻬﺎ ﻭﺑﺼﻤﺘﻦ ﻓﻴﻬﺎ ..
ﺍﻫﺎ ﺍﺭﻳﺞ ﺯﻱ .. ﺑﺲ ﻣﻨﺘﻈﺮﺓ ﻓﺮﺻﺔ ﺍﻧﻮ ﻳﻮﺍﺟﻬﺎ ﺑﻲ ﻋﻴﻮﻧﻮ ﺍﻟﻘﺎﺗﻠﺔ ﻋﺸﺎﻥ ﺗﻨﻔﺬ ﻗﺮﺍﺭﻫﺎ . ﻓﻲ ﺍﻟﻤﺠﺎﺯﻓﺔ ﺍﻟﻨﺎﻭﻳﺔ ﻋﻠﻴﻬﺎ ..
ﺍﻭﻝ ﻣﺎ ﻗﺒﻞ ﻋﻠﻴﻬﺎ ﺍﺑﺘﺴﻤﺖ .. ﻭﻫﻮ ﺷﺎﻑ ﺍﺑﺘﺴﺎﻣﺘﻬﺎ . ﻟﻜﻦ ﻋﻤﻞ ﻓﻴﻬﺎ ﻣﺎﺷﺎﻳﻒ ﺣﺎﺟﺔ ﻭﻣﺎ ﻣﻼﺣﻆ ..
ﻭﺑﻘﻰ ﺗﺎﻧﻲ ﻣﺎﺑﻘﺒﻞ ﻋﻠﻴﻬﺎ .. ﻫﻲ ﻗﺎﻋﺪﺓ ﻓﻲ ﺻﻒ ﺍﻟﻤﻘﺎﻋﺪ ﺍﻟﺘﺎﻧﻲ ﻭﻫﻲ ﻧﻤﺮﺓ ﺍﺗﻨﻴﻦ ﻣﻦ ﺍﻟﺸﺒﺎﻙ .. ﻋﻠﻰ ﻳﺪﻭ ﺍﻟﻴﻤﻴﻦ ..
ﻭﺍﻟﺴﺒﻮﺭﺓ ﻋﺒﺎﺭﺓ ﻋﻦ ﺍﺳﻤﻨﺘﻲ .. ﻣﻀﺮﻭﺏ ﺑﺎﻟﺒﻮﻫﻴﺔ ﺍﻟﺴﻮﺩﺍﺀ .. ﻓﻲ ﺍﻟﺤﺎﺋﻂ ﺍﻟﻐﺮﺑﻲ .
ﺍﻟﻤﻬﻢ ﺑﺪﻭﻥ ﻓﺎﺭﺱ ﻣﺎﻳﺸﻌﺮ ﻭﻓﻲ ﺍﺛﻨﺎﺀ ﺍﻧﺪﻣﺎﺟﻪ ﻓﻲ ﺷﺮﺡ ﺍﻟﺪﺭﺱ .. ﻗﺒﻞ ﻋﻠﻰ ﺟﻴﻬﺔ ﺍﺭﻳﺢ .. ﻗﺎﻣﺖ ﺍﻟﺒﺖ ‏( ﺟﺒﻜﺖ ‏) ﻏﻤﺰﺕ ﻟﻴﻬﻮ ﻋﻴﻨﻬﺎ ﺍﻟﺸﻤﺎﻝ .
ﺍﻻﺳﺘﺎﺫ ﺩﻩ . ﺍﺗﺨﻠﻊ ﺯﻱ ﺍﻟﻔﻲ ﺯﻭﻝ ﻣﺤﻄﻮ ﺻﻮﻁ .. ﻭﺍﻟﻄﺒﺸﻴﺮﺓ ﻭﻗﻌﺖ ﻣﻦ ﻳﺪﻭ ..
ﺍﻟﻰ ﺍﻟﻠﻘﺎﺀ