ﺟﻨــﺤﺔ ﺑﻼ ﺭﻳﺶ * ..
ﺍﻟﺤﻠﻘﺔ 5
ﺑﻘﻠﻢ ﻃﺎﺭﻕ ﺍﻟﻠﺒﻴﺐ ....
ـــــــــــــــ
ﻓﺘﺤﺖ ﻟﻲ ﺍﻟﺒﺎﺏ ﻧﺎﺩﻳﺔ .. ﺳﻠﻤﺖ ﻋﻠﻴﻬﺎ ﻭﻗﻠﺖ ﻟﻴﻬﺎ ﻛﻴﻔﻚ ﻳﺎﻧﺎﺩﻳﺔ ؟ ﺍﻫﺎ ﻣﺎﻟﻮ ﺻﺎﻟﺢ ﺍﺧﻮﻱ .. ﻗﺎﻟﺖ ﻟﻲ ﺍﻧﺎ ﺷﺎﻳﻔﺎﻫﻮ ﺯﻱ ﺍﻟﻌﻴﺎﻥ .. ﻟﻜﻦ ﻫﻮ ﺑﻘﻮﻝ ﺍﻧﺎ ﻛﻮﻳﺲ .. ﺧﺶ ﻟﻴﻬﻮ ﻓﻲ ﺍﻭﺿﺘﻮ .. ﺩﺧﻠﺖ ﻋﻠﻴﻬﻮ ﻃﻮﺍﻟﻲ ﻟﻘﻴﺘﻮ ﺭﺍﻗﺪ ..
ﺳﻠﻤﺖ ﻋﻠﻴﻬﻮ ﻗﺎﻡ ﻟﻘﻴﺘﻮ ﻟﻴﻚ ﻋﻴﻮﻧﻮ ﺣﻤﺮ ﻭﺻﻐﺎﺍﺍﺭ .. ﻭﺷﻜﻠﻮ ﻣﺎ ﻣﺮﻛﺰ .. ﻗﻠﺖ ﻟﻴﻬﻮ ﺍﻧﺖ ﻳﺎﺻﺎﻟﺢ ﻣﺎﻟﻚ؟ .. ﺍﻧﺖ ﻋﻴﺎﻥ ﺍﻭﺩﻳﻚ ﺍﻟﺪﻛﺘﻮﺭ؟ ..
ﻗﺎﻝ ﺍﻧﺘﻮ ﻳﺎﻧﺎﺱ ﻣﻮﺍﻫﻴﻢ ﻭﻻﺷﻨﻮ؟؟ .. ﻣﺎﻟﻜﻢ ﺩﺍﻳﺮﻳﻦ ﺗﻮﻫﻤﻮﻧﻲ ؟ .. ﺍﻧﺖ ﻭﻣﺮﺍﺗﻚ . ﺍﻧﺎ ﻛﻮﻳﺲ ﺟﺪﺍ ﺯﻱ ﺍﻟﻔﻞ .
ﻃﺒﻌﺎ ﺍﻧﺎ ﻋﻠﻰ ﺣﺴﺐ ﻓﻬﻤﻲ ﻭﺧﺒﺮﺗﻲ ﺍﻟﺒﺴﻴﻄﺔ .. ﻓﻲ ﺍﻟﺴﻔﺎﻫﺔ ﻭﺍﻟﻬﻠﺲ . ﺻﺎﻟﺢ ﺩﻩ ﺑﻜﻮﻥ ﺿﺮﺏ ﻟﻴﻬﻮ ﺳﺠﺎﺭﺓ ﺑﻨﻘﻮ ..
ﻣﺸﻴﺖ ﻃﻮﺍﻟﻲ ﺑﻴﻐﺎﺩﻱ ﻟﻲ ﻧﺎﺩﻳﺔ ﻓﻲ ﻏﺮﻓﺘﻬﺎ .. ﻟﻘﻴﺖ ﻣﻌﺎﻫﺎ ﻭﺍﺣﺪﺓ ﻣﻦ ﺍﻟﺠﻴﺮﺍﻥ . ﺍﺳﻤﻬﺎ ﻣﻮﺩﺓ . ﺻﺤﺒﺘﻬﺎ ﺷﺪﻳﺪ . ﻭﻧﺎﺩﻳﺔ ﻃﻮﺍﻟﻲ ﺑﺘﻤﺸﻲ ﻟﻴﻬﺎ ﻭﻫﻲ ﺑﺘﺠﻲ ﺍﻟﺒﻴﺖ ..
ﺳﻠﻤﺖ ﻋﻠﻴﻬﻦ .. ﻗﺎﻟﺖ ﻟﻲ ﺍﺳﻮﻱ ﻟﻴﻚ ﺣﺎﺟﺔ ﺗﺎﻛﻠﻬﺎ .. ﻗﻠﺖ ﻟﻴﻬﺎ ﻻﻻ ﺍﻧﺎ ﻛﻨﺖ ﺟﻴﻌﺎﻥ ﺷﺪﻳﺪ ﻭﺍﻛﻠﺖ ﻣﻦ ﺍﻟﺸﺎﺭﻉ ..
ﻗﺎﻟﺖ ﻟﻲ ﻳﻌﻨﻲ ﻣﺎﻋﻨﺪﻙ ﺻﺒﺮ ﻳﻮﺻﻠﻚ ﺍﻟﺒﻴﺖ .. ﺍﻧﺎ ﻣﺎ ﻗﻠﺖ ﻟﻴﻚ ﺍﻛﻞ ﺍﻟﺸﺎﺭﻉ ﺩﻩ ﻣﺎﺻﺤﻲ .. ﻗﻠﺖ ﻟﻴﻬﺎ ﺧﻼﺹ ﻗﻮﻡ ﺳﻮﻱ ﻟﻲ ﻛﺒﺎﻳﺔ ﺷﺎﻱ .
ﻗﺎﻣﺖ ﺧﺸﺖ ﺍﻟﻤﻄﺒﺦ .. ﻣﺸﻴﺖ ﻭﺭﺍﻫﺎ ﺍﻟﻤﻄﺒﺦ ..
ﻗﻠﺖ ﻟﻴﻬﺎ ﻣﻮﺩﻩ ﺟﺎﺕ ﻣﺘﻴﻦ؟ .. ﻗﺎﻟﺖ ﻟﻲ ﺍﻧﺎ ﺍﺻﻼ ﻛﻨﺖ ﻣﺎﺷﺔ ﻟﻴﻬﺎ . ﻟﻤﻦ ﺻﺎﻟﺢ ﺟﺎﺀ ﺍﻧﺎ ﻛﻨﺖ ﻓﻲ ﺍﻟﺒﺎﺏ ﻃﺎﻟﻌﺔ .. ﻣﺸﻴﺖ ﻧﺎﺩﻳﺘﻬﺎ ﻭﺟﻴﺖ . ﻋﺸﺎﻥ ﻣﺎﻳﻨﻔﻊ ﺍﺧﻠﻴﻬﻮ ﺑﺎﻟﺤﺎﻟﺔ ﺩﻱ ﺑﺮﺍﻫﻮ .. ﻭﺍﻣﺸﻲ ﺍﻗﻐﺪ ﻣﻌﺎﻫﺎ ﻓﻲ ﺍﻟﺒﻴﺖ ..
ﻃﻴﺐ .. ﻋﻠﻰ ﺣﺴﺐ ﻓﻬﻤﻲ ﺍﻧﻮ ﻧﺎﺩﻳﺔ ﻣﺎﻋﺎﻳﺰﺓ ﺗﻘﻌﺪ ﻣﻊ ﺻﺎﻟﺢ ﺑﺮﺍﻫﺎ .. ﺍﺣﺘﻤﺎﻝ ﺧﺎﻓﺖ ﻣﻨﻮ .. ﻟﻜﻦ ﻣﺎﻋﺎﻳﺰﺓ ﺗﺤﺴﺴﻨﻲ ﺑﻲ ﻛﺪﺍ ..
ﺑﺘﺤﺎﻭﻝ ﺗﺒﺮﺭ ﻭﺟﻮﺩ ﻣﻮﺩﺓ ﻓﻲ ﺍﻟﺒﻴﺖ .. ﻭﺍﻧﺎ ﻋﻘﻠﻲ ﺍﻟﻜﺎﻥ ﺑﻮﺩﻱ ﻭﻳﺠﻴﺐ .. ﻳﺎﺩﻭﺏ ﺭﻗﺪ ..
ﻭﺑﻘﺖ ﺟﻮﺍﻱ ﻃﻤﺄﻧﻴﻨﺔ ﺍﻧﻮ ﻧﺎﺩﻳﺔ ﺑﺖ ﺣﺮﺓ ﻭﺍﺻﻴﻠﺔ .. ﻭﻣﺎﺑﺘﻔﺮﻁ . ﻻﻧﻮ ﺻﺎﻟﺢ ﺩﻩ ﺑﻘﻰ ﻣﺎ ﻣﻀﻤﻮﻥ ﻭﺍﻟﻠﻪ .. ﻭﺍﻧﺎ ﻻﺯﻡ ﺍﺗﺼﺮﻑ ﻭﺍﺧﺎﺭﺟﻮ ﻣﻦ ﺍﻟﺒﻴﺖ ﺩﻩ ﻟﻜﻦ ﻛﻴﻒ ؟ ..
ﺍﻫﺎ ﻳﺎﺯﻭﻝ ﺑﻘﻴﺖ ﺍﻧﺎ ﻣﺎﺷﻐﺎﻝ ﺑﻮﺟﻮﺩ ﺻﺎﻟﺢ ﻭﻋﺪﻣﻮ .. ﻟﻜﻦ ﻣﺸﻐﻮﻝ ﺍﻛﺘﺮ ﺑﺎﻟﺘﻐﻴﻴﺮ ﺍﻟﺴﻠﻮﻛﻲ ﺍﻟﻤﻔﺎﺟﺊ ﺍﻟﺤﺼﻞ ﻟﻴﻬﻮ .. ﻭﺑﺎﻱ ﻃﺮﻳﻘﺔ ﺩﺍﻳﺮ ﺍﺷﻮﻓﻮ ﺑﻤﺸﻲ ﻭﻳﻦ ﻭﺑﻌﻤﻞ ﺷﻨﻮ ..
ﺍﻫﺎ ﻛﺎﻥ ﻋﻨﺪﻱ ﺻﺎﺣﺒﻲ ﻣﻦ ﺍﻟﺠﻤﺎﻋﺔ ﺍﻟﺒﻘﻌﺪﻭ ﻣﻌﺎﻧﺎ ﻓﻲ ﺍﻟﻔﺮﻥ . ﻛﺎﻥ ﺯﻣﺎﻥ ﻓﻲ ﺍﻟﺒﻮﻟﻴﺲ ﻫﺴﻲ ﻋﺎﻃﻞ ﻭﺯﻭﻝ ﺗﻔﺘﻴﺤﺔ ﺷﺪﻳﺪ .. ﺍﺳﻤﻮ ﺣﺴﻮﻧﺔ ﻳﻮﻡ ﺍﺗﻔﻘﺖ ﻣﻌﺎﻫﻮ ﻳﻼﻗﻴﻨﻲ ﺍﻟﺼﺒﺎﺡ ﻓﻲ ﺍﻟﻤﺤﻄﺔ .. ﻭﻳﺮﻛﺐ ﻣﻊ ﺻﺎﻟﺢ ﻳﺘﺎﺑﻌﻮ ﻳﺸﻮﻓﻮ ﺑﻤﺸﻲ ﻭﻳﻦ . ﻭﺑﺪﻳﻬﻮ ﺣﻘﻮ ..
ﻣﺎﺩﺍﻳﺮ ﺍﻛﻠﻒ ﺳﺎﻟﻢ ﺍﻟﺸﺎﻳﻘﻲ ﺻﺎﺣﺒﻲ .. ﺑﺎﻟﻤﻮﺿﻮﻉ ﺩﻩ ﻻﻧﻮ ﺻﺎﻟﺢ ﺑﻌﺮﻓﻮ .. ﻟﻜﻦ ﻣﺎﺑﻌﺮﻑ ﺣﺴﻮﻧﺔ ﻭﻻﺷﺎﻓﻮ .. ﻭﺣﺴﻮﻧﺔ ﺑﻘﺪﺭ ﻳﺘﺰﺍﻭﻍ ﻭﻣﺎﻳﺨﻠﻴﻬﻮ ﻳﺤﺲ ﺑﻲ ﺍﻧﻮ ﻣﺮﺍﻗﺐ ..
ﺍﻫﺎ ﻛﺎﻟﻌﺎﺩﺓ ﻃﻠﻌﻨﺎ ﺍﻟﺼﺒﺎﺡ ﺍﻧﺎ ﻭﺻﺎﻟﺢ .. ﻭﻣﺘﻮﺍﺻﻞ ﺑﺎﻟﺘﻠﻔﻮﻥ ﻣﻊ ﺣﺴﻮﻧﺔ .. ﺣﺴﻮﻧﺔ ﻃﻠﻊ ﺍﻟﺸﺎﺭﻉ ﻣﻌﺎﻧﺎ .. ﻟﻜﻦ ﻭﺍﻗﻒ ﺑﻌﻴﺪ ﺳﻼﻡ ﻣﺎﺳﻠﻢ ﻋﻠﻲ .. ﺑﺲ ﻏﻤﺰ ﻟﻲ ﺑﻲ ﻋﻴﻨﻮ ﻛﺪﺍ .. ﻭﺍﻧﺎ ﺃﺷﺮﺕ ﻟﻴﻬﻮ ﻋﻠﻲ ﺻﺎﻟﺢ .. ﻭﺧﻼﺹ ﺍﺗﺄﻛﺪ ﻣﻨﻮ .. ﺍﻭﻝ ﻣﻦ ﺟﺎﺕ ﺣﺎﻓﻠﺔ ﺑﺤﺮﻱ .. ﺻﺎﻟﺢ ﻧﻂ ﻓﻴﻬﺎ ﻭﺣﺴﻮﻧﺔ ﻧﻂ ﻭﺭﺍﻫﻮ .. ﻭﻣﺸﻮ .
ﺣﺴﻮﻧﺔ ﺿﺮﺏ ﻟﻲ ﻫﻮ ﻓﻲ ﺍﻟﺤﺎﻓﻠﺔ .. ﻗﺎﻝ ﻟﻲ ﻣﺎﺗﺘﺼﻞ ﻋﻠﻲ ﻛﺘﻴﺮ ﺍﻻ ﺍﺭﺟﻊ ﻟﻴﻚ ﺍﻧﺎ ﺑﺮﺍﻱ .. ﻳﻘﻮﻡ ﺍﻟﺰﻭﻝ ﺩﻩ ﻳﺸﻚ ﻛﻤﺎﻥ ..
ﺍﻟﻤﻬﻢ ﺯﻱ ﺍﻟﺴﺎﻋﺔ ﻋﺸﺮﺓ ﻛﺪﺍ .. ﺍﺗﺼﻞ ﻋﻠﻲ ﺣﺴﻮﻧﺔ ﻗﺎﻝ ﻟﻲ ﺍﺳﻤﻊ ..
ﺍﻟﺰﻭﻝ ﺩﻩ ﻧﺰﻝ ﻓﻲ ﺳﻮﻕ ﺑﺤﺮﻱ . ﻭﺩﺧﻞ ﺍﻟﺴﻮﻕ ﺟﻮﺓ ﻭﻗﻌﺪ ﻣﻊ ﺟﻤﺎﻋﺔ ﺍﻟﻈﺎﻫﺮ ﺍﺻﺤﺎﺑﻮ ﺷﺪﻳﺪ .. ﻭﻗﺎﻋﺪﻳﻦ ﺑﺘﻮﻧﺴﻮ .. ﻭﻫﺴﻲ ﺭﺳﻠﻮ ﺯﻭﻝ ﻳﺠﻴﺐ ﻟﻴﻬﻢ ﺍﻟﻔﻄﻮﺭ ..
ﻗﻠﺖ ﻟﻴﻬﻮ ﺣﻠﻮ .. ﺧﻠﻴﻚ ﻣﺘﺎﺑﻊ .. ﺍﻟﻠﻴﻠﺔ ﻳﻮﻣﻴﺘﻚ ﻣﻌﺪﻟﺔ .. ﻣﺎﺗﺸﻴﻞ ﻫﻢ ..
ﻗﺎﻝ ﻟﻲ ﻳﻮﻣﻴﺔ ﺷﻨﻮ ﻳﺎﺷﻤﺲ .. ﺩﻱ ﺷﻜﻠﻬﺎ ﺳﻬﺮﺓ ﻋﺪﻳﻞ .. ﻻﺯﻡ ﺗﺼﻠﺢ ﻟﻲ ﺍﻟﻮﺿﻊ ..
ﻗﻠﺖ ﻟﻴﻬﻮ ﻣﺎﻳﻬﻤﻚ ﺑﺲ ﺍﻧﺖ ﺗﻌﺎﻝ ﻟﻲ ﺑﻲ ﻧﺘﻴﺠﺔ .. ﻗﺎﻝ ﻟﻲ ﺟﺪﺍ ﻳﺎﺯﻭﻝ ﺍﻧﺘﻬﺖ ﺍﻟﻤﻜﺎﻟﻤﺔ ..
ﻭﺍﻧﺘﻬﻰ ﺍﻟﻴﻮﻡ ﺩﺍﻙ ﻭﺍﻟﺴﺎﻋﺔ 3 ﺟﺎﺕ .. ﺍﺗﺼﻠﺖ ﺍﻟﺒﺖ ﺍﻻﺳﻤﻬﺎ ﺍﻳﺔ ﻋﻠﻲ ﺗﻠﻔﻮﻧﻲ .. ﻭﺍﺑﻴﺖ ﺍﺭﺩ ﻟﻴﻬﺎ .. ﻭﻛﺘﺮﺕ ﺍﻟﻠﻴﺎﻗﺔ .. ﺭﺩﻳﺖ ﻟﻴﻬﺎ ﻗﻠﺖ ﻟﻴﻬﺎ
ﺍﻟﺤﺎﺻﻞ ﺷﻨﻮ ﻳﺎ ﺍﻳﺔ؟ .. ﻛﻴﻔﻚ ﻳﺎﺷﻤﺲ؟ .. ﻗﻠﺖ ﻟﻴﻬﺎ ﺗﻤﺎﻡ ﺍﻟﺤﻤﺪ ﻟﻠﻪ ..
ﻫﻲ : ﻣﺸﺘﺎﻗﻴﻦ ﻭﺍﻟﻠﻪ ..
ﺍﻧﺎ : ﻟﻴﻬﺎ ﺍﻟﻠﻪ ﻳﺒﺎﺭﻙ ﻓﻴﻚ ..
ﻗﺎﻟﺖ ﻟﻲ ﻣﺎﺑﻘﻮﻟﻮ ﻛﺪﺍ .. ﺑﻘﻮﻟﻮ ﻛﺘﻴﺮ .. ﺑﺎﻻﻛﺘﺮ .. ﺍﻱ ﺗﻌﺒﻴﺮ ﻳﻌﻨﻲ ..
ﺍﻧﺎ ﻗﻠﺖ ﻟﻴﻬﺎ ﻃﻴﺐ .. ﺍﺣﺴﻦ ﺑﺎﻻﻛﺘﺮ ﻭﻟﻼ ﺍﺣﺴﻦ ﺍﻟﻠﻪ ﻳﺒﺎﺭﻙ ﻓﻴﻚ؟؟ ..
ﻗﺎﻟﺖ ﻟﻲ ﺳﻴﺐ ﺍﻟﻔﻠﺴﻔﺔ .. ﺍﻧﺎ ﻋﺎﻳﺰﺍﻙ ﻻﺯﻡ ﻧﺘﻼﻗﺎ ﺍﻟﻠﻴﻠﺔ .. ﺍﻧﺎ ﻋﻨﺪﻱ ﻣﻮﺿﻮﻉ ﻣﻬﻢ ﻋﺎﻳﺰ ﺍﻗﻮﻟﻮ ﻟﻴﻚ ..
ﻗﻠﺖ ﻟﻴﻬﺎ ﻣﺎﺑﻘﺪﺭ ﻭﺍﻟﻠﻪ .. ﻋﻨﺪﻱ ﺷﻐﻼﻧﺎﺕ ﻣﺎﻻ ﺍﻭﻝ ﻭﻻ ﺍﺧﺮ ..
ﻗﺎﻟﺖ ﻟﻲ ﺍﻧﺖ ﻳﺎ ﺷﻤﺲ ﺍﻟﺪﻳﻦ ﺷﻜﻠﻚ ﻣﺎﺑﺘﺤﺒﻨﻲ .. ﻭﻣﺮﺍﺕ ﺑﺘﺤﺴﺴﻨﻲ ﺍﻧﻲ ﻓﺎﺭﺿﺔ ﻧﻔﺴﻲ ﻋﻠﻴﻚ .. ﻃﻴﺐ ﻭﻛﺖ ﻣﺎﺑﺘﺤﺒﻨﻲ ﻣﺎﻟﻚ ﺑﺘﺠﻴﻨﻲ ﻭﺗﻌﺰﻣﻨﻲ .. ﻭﺗﻘﻌﺪ ﻣﻌﺎﻱ ؟ .
ﻗﻠﺖ ﻟﻴﻬﺎ ﻫﺴﻲ ﺍﻧﺎ ﻣﺮﺍﺕ ﺑﻌﺰﻡ ﻭﺩ ﺧﺎﻟﺘﻲ .. ﻭﺑﻌﺰﻡ ﺍﺻﺤﺎﺑﻲ .. ﻭﺑﻌﺰﻡ ﺍﻟﻤﺪﻳﺮ .. ﺑﺮﺿﻮ ﺑﺤﺒﻮ . ؟؟
ﺍﻟﻤﻬﻢ ﺧﻠﻴﻬﺎ ﻭﻛﺖ ﺗﺎﻧﻲ ﻳﺎ ﺁﻳﻪ .. ﻗﺎﻟﺖ ﻟﻲ ﻻﻻ ﻻﺯﻡ ﺍﻟﻠﻴﻠﺔ ﻭﻻ ﺍﻧﺎ ﺑﻤﻮﺕ .. ..
ﻗﻠﺖ ﻟﻴﻬﺎ ﻳﺎﺧﻲ ﺗﻤﻮﺗﻲ .. ﺗﻨﺘﺤﺮﻱ .. ﺗﺤﺮﻗﻲ .. ﺗﻐﺮﻗﻲ .. ﺑﻲ ﻃﺮﻳﻘﺘﻚ ﻣﺎﺗﺘﻼﻳﻘﻲ
ﺍﻧﺎ ﺍﻟﻠﻴﺎﻗﺔ ﻣﺎﺑﺮﺿﺎﻫﺎ ﻣﻦ ﻣﺮﺗﻲ .. ﺍﺟﻲ ﺍﺗﺤﻤﻠﻚ ﺍﻧﺘﻲ؟؟
ﻋﻠﻴﻚ ﺍﻧﻘﻠﻌﻲ .. ﻭﻗﻔﻠﺖ ﺍﻟﺨﻂ .. ..
ﺍﺻﻼ ﻣﻦ ﺍﻟﻤﺮﺓ ﺍﻟﻔﺎﺗﺖ ﺍﻧﺎ ﻣﺘﻀﺎﻳﻖ ﻣﻨﻬﺎ ﻭﺑﻘﻴﺖ ﻟﻤﻦ ﺍﺗﺬﻛﺮﻫﺎ ﺳﺎﻱ ﺑﺤﺲ ﺑﻐﻤﺔ ﻓﻲ ﺻﺪﺭﻱ .. ﺩﻱ ﺷﻨﻮ ﻳﺎﺧﻲ ﺍﻟﻠﺼﻘﺔ ﺩﻱ ؟؟
ﺻﺮﺍﺣﺔ ﺑﻘﻴﺖ ﺑﻤﺸﻲ ﺍﻟﺒﻴﺖ ﺑﺪﺭﻱ .. ﻋﺸﺎﻥ ﺍﻧﺘﻈﺮ ﺻﺎﻟﺢ . ﻳﺎ ﻗﻌﺪﻧﺎ ﺍﻻﺗﻨﻴﻦ ﺳﻮﺍ ﻓﻲ ﺍﻟﺒﻴﺖ ﻳﺎ ﺍﻣﺎ ﻃﻠﻌﻨﺎ ﺳﻮﺍ ..
ﻣﺮﺕ ﻛﻢ ﺷﻬﺮ ﺑﺎﻟﻄﺮﻳﻘﺔ ﺩﻱ ..
ﺍﻫﺎ ﺍﻧﺎ ﻓﻲ ﺍﻟﺸﺎﺭﻉ ﻣﺎﺷﻲ ﻋﻠﻰ ﺍﻟﺒﻴﺖ .. ﺍﺗﺼﻞ ﻋﻠﻲ ﺣﺴﻮﻧﺔ ﻗﺎﻝ ﻟﻲ ﺍﻧﺎ ﻓﻲ ﺟﺒﺮﺓ .. ﺍﻟﺰﻭﻝ ﺩﻩ ﺭﻛﺐ ﻣﺸﻰ ﺟﺒﺮﺓ ﻭﺍﻧﺎ ﻓﻲ ﺧﻄﺮﺍﺗﻮ .. ﻭﻋﺮﻓﺖ ﻟﻴﻚ ﻭﺻﻒ ﺍﻟﺒﻴﺖ ﺍﻟﻤﺸﻰ ﻟﻴﻬﻮ .. ﺍﻧﺎ ﻗﻠﺖ ﻟﻴﻬﻮ ﻣﺎﺑﺘﻘﺪﺭ ﺗﺨﺶ ﺑﺎﻱ ﺣﺠﺔ ؟؟
ﻗﺎﻝ ﻟﻲ ﻣﺎﺑﻘﺪﺭ ﻭﺍﻟﻠﻪ ﻳﻌﻨﻲ ﺍﺧﺶ ﺍﻗﻮﻝ ﺷﻨﻮ؟ ﺍﻧﺎ ﺣﺪﻱ ﻭﻗﻒ ﻫﻨﺎ ﻳﺎﺷﻤﺲ . ﺟﻬﺰ ﻟﻲ ﺍﻟﻤﻴﺔ ﺍﻟﻘﻠﺘﻬﺎ ﻟﻲ .. ﻗﻠﺖ ﻟﻴﻬﻮ ﺧﻼﺹ ﺗﻌﺎﻝ ﺭﺍﺟﻊ ﻧﺘﻼﻗﺎ ﻓﻲ ﺍﻟﻔﺮﻥ ﺑﻌﺪﻳﻦ ﺑﺎﻟﻠﻴﻞ ..
ﻗﺎﻝ ﻟﻲ ﺧﻴﺮ ﻭﻗﻔﻠﻨﺎ ..
ﺍﻟﻤﻬﻢ ﺍﻧﺎ ﺍﻟﻔﻜﺮ ﺷﺎﻟﻨﻲ ﺗﺐ .. ﻭﺑﻘﻴﺖ ﺑﻔﻜﺮ ﺍﻧﺎ ﻻﺯﻡ ﺍﻋﺮﻑ ﺍﺻﺤﺎﺑﻮ ﺩﻳﻞ ﺍﺣﺘﻤﺎﻝ ﻧﺎﺱ ﺳﺠﺎﺭﺓ .. ﻭﺩﺍ ﺷﻲ ﻇﺎﻫﺮ .. ﺑﺲ ﺍﻧﺎ ﻻﺯﻡ ﺍﺗﺎﻛﺪ ..
ﺍﻫﺎ ﺍﻟﻴﻮﻡ ﺩﻩ ﺫﺍﺗﻮ ﻭﺻﻠﺖ ﺍﻟﺒﻴﺖ .. ﻭﺍﻧﺘﻈﺮﺗﻮ ﻭﺍﺗﺎﺧﺮ .. ﻭﺍﻟﺒﺮﻧﺎﻣﺞ ﻛﺎﻥ ﻃﺒﻴﻌﻲ . ﻭﻣﺸﻴﺖ ﺍﻟﻤﺴﺎﺀ ﻻﻗﻴﺖ ﺣﺴﻮﻧﺔ ﻭﺍﺩﻳﺘﻮ ﺣﻘﻮ . ﻭﻭﺻﻒ ﻟﻲ ﺍﻟﺒﻴﺖ ﻛﻮﻳﺲ ﻭﺍﻧﺎ ﺍﻟﺤﺘﺔ ﺩﻱ ﺑﻌﺮﻓﻬﺎ . ﺑﺲ ﻣﺎﺑﻌﺮﻑ ﻓﻴﻬﺎ ﺯﻭﻝ ..
ﻭﺍﻟﻴﻮﻡ ﺩﻩ ﺑﺎﻟﺬﺍﺕ ﺻﺎﻟﺢ ﺍﺗﺎﺧﺮ .. ﻭﺟﺎ ﺍﺧﺮ ﺍﻟﻠﻴﻞ ﺩﻕ ﺍﻟﺒﺎﺏ ﻭﻣﺎﺳﻠﻢ ﻋﻠﻲ ﺩﺧﻞ ﻃﻮﺍﻟﻲ ﺟﻮﺓ .. ﺍﻧﺎ ﺣﺎﻭﻟﺖ ﺍﻗﺮﺏ ﻣﻨﻮ ﻋﺸﺎﻥ ﺍﺷﻢ ﻟﻮ ﻓﻴﻬﻮ ﺭﻳﺤﺔ ﺣﺎﺟﺔ ﻭﻻﻻ .. ﻟﻜﻦ ﻣﺎ ﺍﺩﺍﻧﻲ ﻓﺮﺻﺔ .. ﺑﻌﺪ ﺩﺧﻞ ﺍﻭﺿﺘﻮ ﻭﻧﺎ ﻣﺸﻴﺖ ﻟﻲ ﻧﺎﺩﻳﺔ ﺑﻴﻐﺎﺩﻱ ..
ﻛﻮﺭﻙ ﻟﻲ ﺗﺎﻧﻲ .. ﻗﺎﻝ ﻟﻲ ﻣﺎﺗﺠﻴﺐ ﻟﻲ ﻋﺸﺎ ﺍﻧﺎ ﻣﺘﻌﺸﻲ .. ﻭﺗﻌﺎﻝ ﺷﻴﻞ ﺍﻟﻬﺪﻭﻡ ﺩﻳﻞ ﻭﺩﻳﻬﻦ ﻟﻲ ﻧﺎﺩﻳﺔ ..
ﻃﺒﻌﺎ ﻧﺎﺩﻳﺔ ﺑﺘﻐﺴﻞ ﻟﻴﻬﻮ ﻫﺪﻭﻣﻮ ﻣﻦ ﻳﻮﻣﻮ ﺍﻟﺠﺎﻧﺎ .
ﻣﺮ ﺍﻟﻠﻴﻞ ﻃﺒﻴﻌﻲ ﻭﻫﻮ ﺍﻟﻠﻴﻞ ﻛﻠﻮ ﻳﻜﺮﻛﺐ ﻭﻳﺪﺧﻞ ﻭﻳﻤﺮﻕ ﻭﺷﻜﻠﻮ ﻣﺎﻧﺎﻡ ﻧﻬﺎﺋﻲ ..
ﺍﻫﺎ ﺍﻟﺼﺒﺎﺡ ﻛﺎﻥ ﻓﻲ ﻧﻘﺎﺵ ﺑﻴﻨﻲ ﻭﺑﻴﻦ ﻧﺎﺩﻳﺔ .. ﺯﻱ ﺍﻱ ﻧﻘﺎﺵ ﺑﻴﻦ ﻣﺮﺍﺓ ﻭﺭﺍﺟﻼ .. ﻭﺍﻟﻨﻘﺎﺵ ﺍﺣﺘﺪ .. ﻭﺍﻧﺎ ﺍﺗﻜﻠﻤﺖ ﻣﻌﺎﻫﺎ ﻛﻼﻡ ﻓﺎﺿﻲ ﻛﺘﻴﺮ .. ﻭﺧﻠﻴﺘﻬﺎ ﺗﺒﻜﻲ .. ﺍﺗﺎﻳﻬﻮ ﺻﺎﻟﺢ ﻛﺎﻥ ﺑﺴﻤﻊ ..
ﻟﻤﻦ ﻃﻠﻌﻨﺎ ﻣﻦ ﺍﻟﺒﻴﺖ ﺻﺎﻟﺢ ﻛﺎﻥ ﺻﺎﺭﻱ ﻭﺷﻮ ﺻﺮﺓ ﺷﺪﻳﺪﺓ ﺧﻼﺹ .. ﺍﻧﺎ ﻗﻠﺘﺎ ﻳﻤﻜﻦ ﺯﻫﺠﺎﻥ ﺑﺮﺍﻫﻮ ..
ﻟﻜﻦ ﻓﺎﺟﺄﻧﻲ ﻗﺎﻝ ﻟﻲ .. ﺍﻧﺖ ﻳﺎﺳﺠﻢ .. ﻣﺎﻟﻚ ﺑﺘﺘﻜﻠﻢ ﻣﻊ ﻧﺎﺩﻳﺔ ﺑﺎﻟﻄﺮﻳﻘﺔ ﺩﻱ؟ .. ﻋﻠﻴﻚ ﺍﻟﻠﻪ ﻧﺎﺩﻳﺔ ﺩﻱ ﻣﺮﺍﺓ ﺑﺘﻌﺎﻣﻠﻮﻫﺎ ﻛﺪﻱ؟
ﻧﺎﺩﻳﺔ ﺩﻱ ﺍﻧﺎ ﻣﺎﺑﺮﺿﻰ ﻓﻴﻬﺎ .. ﺍﻧﺖ ﺯﻭﻝ ﻛﻠﺐ ﻭﻣﺎﺑﺘﺴﺘﺎﻫﻞ .. ﻭﺍﻟﻠﻪ ﻟﻮ ﻧﺎﺩﻳﺔ ﻛﺎﻧﺖ ﺩﻱ ﻛﺎﻧﺖ ﻣﺮﺗﻲ .. ﺍﻧﺎ ﺍﺷﻴﻼ ﻓﻮﻕ ﻛﻔﻮﻑ ﺍﻟﺮﺍﺣﺔ .. ﻭﺍﺧﺪﻣﻬﺎ ﺗﺤﺖ ﻛﺮﻋﻴﻬﺎ ﻟﻜﻦ ﺍﻧﺖ ﻣﺎﺑﺘﻔﻬﻢ ..
ﺍﻧﺎ ﻃﺒﻌﺎ " ﻭﻟﻌﺖ ﺍﻟﻨﺎﺭ ﻓﻲ ﻗﻠﺒﻲ ﻣﻦ ﻛﻼﻣﻮ ﺩﻩ .. ﻗﻠﺖ ﻟﻴﻬﻮ ﻃﻴﺐ ﺧﻠﻴﻨﻲ ﺍﻃﻠﻘﻬﺎ ﻟﻴﻚ .. ﻣﺎﺩﺍﻡ ﺑﺘﺮﻳﺪﻫﺎ ﻗﺪﺭ ﻛﺪﻱ ..
ﻗﺎﻝ ﻟﻲ ﻭﺍﻟﻠﻪ ﻟﻮ ﻣﺎ ﻓﻲ ﺍﻟﺸﺎﺭﻉ .. ﺍﻟﺰﻭﻝ ﺍﻗﺸﻄﻚ ﺑﻮﻧﻴﺔ .. ﺗﺎﻧﻲ ﺍﻟﺤﻮﺍﺩﺙ ﻣﺎﺗﻘﺒﻠﻚ .. ﺍﻧﺖ ﻫﺴﻲ ﻣﺘﺬﻛﺮ ﺍﻟﻜﻼﻡ ﺍﻟﻘﻠﺘﻮ ﻟﻲ ﻧﺎﺩﻳﺔ .. ﺍﻧﺖ ﻣﺎﺑﺘﻌﺮﻑ ﺍﺣﺎﺳﻴﺴﻬﺎ .. ﻭﻻﺑﺘﻘﺪﺭ ﻣﺸﺎﻋﺮ ﻧﺎﺩﻳﺔ .. ﺍﻧﺖ ﺯﻭﻝ ﻣﺎﺑﺘﺴﺘﺎﻫﻞ ﻧﺎﺩﻳﺔ ..
ﻭﺑﻘﻰ ﻳﺘﻜﻠﻢ ﻋﻦ ﻧﺎﺩﻳﺔ ﺑﻬﺴﺘﺮﻳﺎ .. ﺍﻟﺘﻘﻮﻝ ﺑﺎﻟﻠﻪ ﻣﺮﺗﻮ ﻫﻮ . ﻣﻲ ﻣﺮﺗﻲ ﺍﻧﺎ ..
ﺍﻧﺎ ﺍﺳﺎﺳﺎ ﻛﻨﺖ ﺑﻮﺳﻮﺱ .. ﻭﻗﻠﺒﻲ ﻣﺎﻛﻠﻨﻲ .. ﻟﻜﻦ ﻫﺴﻲ ﺍﺗﺄﻛﺪﺕ ﺍﻧﻮ ﻓﻲ ﺷﻲ ﻣﺎﻃﺒﻴﻌﻲ ﺑﻴﻦ ﻧﺎﺩﻳﺔ ﻭﺑﻴﻦ ﺻﺎﻟﺢ .. ﻭﺍﻧﺎ ﻻﺯﻡ ﺍﻋﺮﻓﻮ .
ﻭﺍﻟﻠﻪ ﻏﻀﺒﺖ ﻏﻀﺐ ..
ﺍﻫﺎ ﻫﻮ ﻟﻤﻦ ﺷﺎﻓﻨﻲ ﺍﺗﻌﻘﺪﺕ .. ﻗﺎﻝ ﻟﻲ ﻳﺎ ﻭﻫﻢ .. ﻳﺎ ﻣﺎﺑﺘﻔﻬﻢ ﺍﻧﺎ ﻧﺎﺩﻳﺔ ﺑﺸﻮﻓﻬﺎ ﺯﻱ ﺍﺧﺘﻲ .. ﻭﻣﺎ ﺑﺮﺿﻰ ﺍﻧﻚ ﺗﺰﻟﻬﺎ ﻭﺗﺘﻜﻠﻢ ﻣﻌﺎﻫﺎ ﺑﺎﻟﻄﺮﻳﻘﺔ ﺩﻱ .. ﺍﻧﺎ ﻣﺎ ﻣﺴﺘﻜﺘﺮﻫﺎ ﻋﻠﻴﻚ .. ﻭﺳﻜﺖ ..
ﺑﺲ ﺑﺮﺿﻮ ﺍﻧﺎ ﻣﺎ ﻣﻘﺘﻨﻊ ﺑﺎﻟﻜﻼﻡ ﺩﻩ .. ﻭﺑﻘﻴﺖ ﺧﻼﺹ ﺗﺎﻧﻲ ﻣﺎﻋﻨﺪﻱ ﺭﻏﺒﺔ ﺍﻧﻮ ﺍﻟﺰﻭﻝ ﺩﻩ ﻳﻘﻌﺪ ﻣﻌﺎﻱ ﻓﻲ ﺍﻟﺒﻴﺖ .. ﻭﺣﺎﺷﻮﻑ ﻃﺮﻳﻘﺔ ﺍﻟﻠﻴﻠﺔ ﻓﻲ ﺍﻟﻴﻮﻡ ﺩﻩ ﺍﺧﺎﺭﺟﻮ ﺑﻴﻬﺎ ﻣﻦ ﺑﻴﺘﻲ .. ﻭﻟﻮ ﺍﻟﻄﺮﻕ ﺍﺗﻘﻔﻠﺖ ﻓﻲ ﻭﺷﻲ .. ﺑﻄﺮﺩﻭ ﻋﺪﻳﻞ .. ﻳﻤﺸﻲ ﻳﺸﻮﻑ ﺣﻴﺎﺗﻮ ﺟﺎﻱ ﺟﺎﻱ ﻭﻳﺨﺘﺎﻧﻲ ..
ﺍﻟﻤﻬﻢ ﻛﻞ ﻭﺍﺣﺪ ﻓﻴﻨﺎ ﺭﻛﺐ ﻣﺸﻰ ﻟﻴﻬﻮ ﻋﻠﻰ ﺟﻴﻬﺔ .. ﺍﻧﺎ ﻣﺸﻴﺖ ﻃﺒﻌﺎ ﺍﻟﺸﺮﻛﺔ .. ﻭﻛﺖ ﻭﺻﻠﺖ ﺍﻟﺸﺮﻛﺔ .. ﺍﺗﺬﻛﺮﺕ ﺍﻧﻮ ﻓﻲ ﺑﺖ ﻣﻦ ﺯﻣﻴﻼﺗﻨﺎ ﻓﻲ ﺍﻟﺸﺮﻛﺔ ﺳﺎﻛﻨﺔ ﺟﺒﺮﺓ ..
ﺑﺲ ﻳﺎﺗﺮﻯ ﻗﺮﻳﺒﺔ ﻣﻦ ﺍﻟﻮﺻﻒ ﺍﻟﻘﺎﻟﻮ ﺣﺴﻮﻧﺔ ﻭﻻﻻ . ؟ .. ﺍﻧﺎ ﻻﺯﻡ ﺍﺳﺄﻟﻬﺎ ..
ﻣﺸﻴﺖ ﺳﺄﻟﺘﻬﺎ ﻗﻠﺖ ﻟﻴﻬﺎ ﺍﺳﻤﻌﻲ ﻳﺎ ﻣﻴﻤﻮﻧﺔ . ﺍﻧﺘﻲ ﺳﺎﻛﻨﺔ ﻭﻳﻦ ﻓﻲ ﺟﺒﺮﺓ ؟ ﻭﺻﻔﺖ ﻟﻲ .. ﻗﻠﺖ ﻟﻴﻬﺎ ﻻﻻ ﺍﻟﻮﺻﻒ ﺑﻌﻴﺪ ﻣﻦ ﺍﻟﻤﻜﺎﻥ ﺍﻟﻘﺎﺻﺪﻭ ﺍﻧﺎ .. ﻗﺎﻟﺖ ﻟﻲ ﺍﻧﺖ ﺑﺘﺴﺄﻝ ﻣﺎﻟﻚ؟ ﻭﺭﻳﻨﻲ ﺍﻣﻜﻦ ﺍﻗﺪﺭ ﺍﺳﺎﻋﺪﻙ ..
ﻗﻠﺖ ﻟﻴﻬﺎ ﻋﻨﺪﻱ ﺍﺧﻮﻱ ﺑﻤﺸﻲ ﻻﺻﺤﺎﺑﻮ ﻓﻲ ﺟﺒﺮﺓ .. ﻭﺍﻧﺎ ﺷﺎﻛﻲ ﻓﻲ ﺳﻠﻮﻛﻴﺎﺕ ﺍﺻﺤﺎﺑﻮ ﺩﻳﻞ ..
ﻗﺎﻟﺖ ﻟﻲ ﻭﺻﻒ ﻟﻲ ﺑﻴﺘﻬﻢ .. ﻭﺻﻔﺖ ﻟﻴﻬﺎ ..
ﻗﺎﻟﺖ ﻟﻲ ﺍﻧﺎ ﻃﻴﺐ ﻛﻮﻳﺲ ﺍﺧﻮﻱ ﻣﺘﺰﻭﺝ ﻓﻲ ﻧﻔﺲ ﺍﻟﻤﻨﻄﻘﺔ ﺩﻱ .. ﺑﺎﻛﺮ ﺑﺠﻴﺐ ﻟﻴﻚ ﺍﻟﻨﺘﻴﺠﺔ ﺗﺎﻧﻲ ﻓﻲ ﺣﺎﺟﺔ؟ .. ﻗﻠﺖ ﻟﻴﻬﺎ ﻭﺍﻟﻠﻪ ﺗﻜﻮﻧﻲ ﻣﺎﻗﺼﺮﺗﻲ ﻻﻧﻲ ﺍﻧﺎ ﻧﻮﻳﺖ ﺍﻣﺸﻲ ﻟﻴﻬﻢ ﻋﺪﻳﻞ ﻟﻜﻦ ﺧﺎﻳﻒ ﺍﺑﻮﻇﻬﺎ ..
ﺍﻟﻤﻬﻢ ﻣﻴﻤﻮﻧﺔ ﻏﺎﻳﺘﻮ ﺍﺩﺗﻨﻲ ﺍﻣﻞ .. ﺍﻋﺮﻑ ﺍﺧﻮﻱ ﺑﻤﺸﻲ ﻭﻳﻦ .. ﻭﺍﻟﻴﻮﻡ ﺩﻩ ﺍﻧﺘﻬﻰ ﻭﻃﻠﻌﻨﺎ .. ﺍﻧﺎ ﻣﻦ ﺍﻟﺸﺮﻛﺔ ﻣﺸﻴﺖ ﺑﻴﺘﻨﺎ ﻓﻲ ﺩﺍﺭ ﺍﻟﺴﻼﻡ ﻃﻮﺍﻟﻲ ..
ﻧﺎﺩﻳﺖ ﺍﻣﻲ . ﺑﺮﺍﻫﺎ .. ﻭﻗﻠﺖ ﻟﻴﻬﺎ ﺍﺳﻤﻌﻲ ﻳﺎ ﺣﺠﺔ .. ﺍﻧﺘﻲ ﻣﻦ ﺯﻣﺎﻥ ﺑﻴﺮ ﺍﺳﺮﺍﺭﻱ .. ﻭﺣﻼﻟﺔ ﻣﺸﺎﻛﻠﻲ .. ﺍﻧﺎ ﻣﺎ ﻣﺮﺗﺎﺡ ﻟﻲ ﻗﻌﺪﺓ ﺻﺎﻟﺢ ﻣﻌﺎﻱ ﻓﻲ ﺍﻟﺒﻴﺖ .. ﺻﺎﻟﺢ ﺍﺗﻐﻴﺮ ﺷﺪﻳﺪ .. ﻭﺑﻘﻰ ﺯﻭﻝ ﺿﺎﻝ ﺳﺎﻱ .. ﻣﺎﻋﺎﺭﻑ ﺍﻟﻠﻌﻨﺔ ﺍﻟﺤﻠﺖ ﻋﻠﻴﻬﻮ ﺷﻨﻮ ؟ ﺍﻟﺰﻭﻝ ﺩﻩ ﺍﻧﺎ ﺑﻘﻴﺖ ﻣﺎﻣﻄﻤﺌﻦ ﻟﻴﻬﻮ ﻭﺧﺎﻳﻒ ﺍﺗﻜﻠﻢ ﻣﻌﺎﻫﻮ .. ﻳﻄﻔﺶ ﻟﻴﻬﻮ ﻋﻠﻲ ﺟﻴﻬﺔ .. ﺗﺎﻧﻲ ﻣﺎﻧﺸﻮﻓﻮ ..
ﺍﻧﺎ ﻋﺎﻳﺰﻙ ﺗﺘﻜﻠﻤﻲ ﻣﻊ ﺍﺑﻮﻱ .. ﻳﺮﺟﻌﻮ ﺍﻟﺒﻴﺖ .. ﻭﺑﺮﺍﻛﻢ ﺗﺸﻮﻓﻮ ﺍﻟﺤﺎﺻﻞ ﻋﻠﻴﻬﻮ ..
ﺍﻣﻲ ﻗﺎﻟﺖ ﻛﺮﻋﻠﻲ ﻳﺎﺻﺎﻟﺢ ﻭﻟﺪﻱ ﻣﺎﻟﻮﻳﺎﺷﻤﺸﻲ؟؟ ﺍﻟﺤﺼﻞ ﻟﻴﻬﻮ ﺷﻨﻮ؟ ﺍﻧﺎ ﻭﺍﻟﻠﻪ ﻳﻮﻣﻴﺎ ﺑﺘﻜﻠﻢ ﻣﻊ ﺍﺑﻮﻫﻮ ﻳﺮﺟﻌﻮ .. ﻭﺍﺑﻮﻫﻮ ﺑﻘﻮﻝ ﻟﻲ ﺧﻠﻴﻬﻮ ﺍﻟﻴﻀﻮﻕ ﺍﻟﺬﻟﺔ ﻭﺍﻟﻤﻬﺎﻧﺔ ﻭﺍﻟﻄﺮﻃﺸﺔ .. ﻟﻜﻦ ﺍﻟﻠﻴﻠﺔ ﻣﺎ ﺑﺴﻜﺖ ﻟﻲ ﺍﺑﻮﻙ ﺩﻩ .. ﻻﺯﻡ ﺍﻟﻠﻴﻠﺔ ﻳﻤﺸﻲ ﻳﺠﻴﺐ ﺍﻟﻮﻟﺪ ﺩﻩ ..
ﺍﻧﺎ ﺍﺧﺪﺕ ﻛﻼﻡ ﺑﺸﺒﻪ ﺍﻟﻤﻮﺍﻓﻘﺔ ﻣﻦ ﺍﻣﻲ .. ﻭﻣﺸﻴﺖ ﺍﻟﺒﻴﺖ .. ﻟﻘﻴﺖ ﻧﺎﺩﻳﺔ .
ﻋﺎﺩﻳﺔ ﻛﻨﺖ ﺧﺎﻳﻒ ﺍﻧﻬﺎ ﺗﻜﻮﻥ ﺯﻋﻼﻧﺔ ﻟﺴﻪ ﻣﻦ ﻛﻼﻡ ﺍﻟﺼﺒﺎﺡ ..
ﻟﻜﻦ ﻣﻌﺎﻣﻠﺘﻬﺎ ﻣﻌﺎﻱ ﻛﺎﻧﻮ ﻣﺎﻓﻲ ﻧﻘﺎﺵ ﺣﺼﻞ .. ﺍﺻﻼ ﻧﺎﺩﻳﺔ ﺯﻭﻟﺔ ﺑﺮﻳﺌﺔ ﺷﺪﻳﺪ .. ﻭﺑﺘﻨﺴﻰ ﺍﻟﻜﻼﻡ ﺑﻲ ﺳﺮﻋﺔ .. ﺑﺲ ﻏﻴﺮ ﺗﺘﻮﻧﺲ ﻭﺗﻀﺤﻚ .. ﻭﺗﺘﺬﻛﺮ ﺍﻟﺤﻜﺎﻭﻱ ﺍﻟﻠﺬﻳﺬﺓ ﻣﺎﻋﻨﺪﻫﺎ ﺷﻲ ..
ﻭﺍﻱ ﻧﻘﺎﺵ ﻳﺤﺼﻞ ﺑﻴﻨﺎ .. ﻓﻲ ﺍﻟﻨﻬﺎﻳﺔ ﺍﻧﺎ ﺑﺠﻲ ﺑﻠﻘﻰ ﺍﻟﻐﻠﻂ ﻣﻨﻲ .. ﺑﺲ ﻣﺮﺍﺕ ﻫﻲ ﺑﺘﺘﻼﻳﻖ ﻭﺗﺪﻟﻊ ﻓﻴﻨﻲ ﺷﺪﻳﺪ .. ﺍﻟﺘﻘﻮﻝ ﺍﻧﺎ ﺍﻣﻬﺎ ..
ﺍﻫﺎ ﻫﺴﻊ ﻗﻤﺖ ﺳﺄﻟﺘﻬﺎ ﺳﺆﺍﻝ ﻋﺮﺿﻲ .. ﻣﺎﻋﺎﺭﻑ ﺍﻟﺨﻼﻧﻲ ﺍﺳﺄﻟﻮ ﺷﻨﻮ ؟ ﻗﻠﺖ ﻟﻴﻬﺎ ﻟﻴﻬﺎ . ﺍﻧﺘﻲ ﻳﺎﻧﺎﺩﻳﺔ؟ .. ﺍﻟﻠﻴﻠﺔ ﺻﺎﻟﺢ ﺍﺧﻮﻱ ﺍﻟﻨﻬﺎﺭ ﺟﺎ ﻫﻨﺎ؟؟؟ ..
ﻧﺎﺩﻳﺔ ﺍﺭﺗﺒﻜﺖ ﺷﺪﻳﺪ .. ﻭﺑﻘﺖ ﺗﺘﻤﺘﻢ .. ﻭﺗﺒﻠﻊ ﻓﻲ ﺭﻳﻘﻬﺎ ..
ﻭﻓﺠﺄﺓ .. ﺧﺘﺖ ﺍﻳﺪﻫﺎ ﻓﻮﻕ ﺻﺪﺭﻫﺎ .. ﻭ ﻗﺎﻟﺖ ﺑﺴﻢ ﺍﻟﻠﻪ ‏( ﺷﺤﺔ ﺍﻟﻘﻠﺐ ‏) ﺩﻱ ﻣﻦ ﺷﻨﻮ ﻳﺎﺭﺑﻲ . ؟ ﻳﺎ ﻟﻄﻴﻒ ..
ﻗﻠﺖ ﻟﻴﻬﺎ ﺷﺤﺔ ﺷﻨﻮﻳﺎﺑﺖ ؟ ﺍﻧﺎ ﺑٍﺴﺄﻝ ﻓﻴﻚ .. ﺗﻘﻮﻟﻲ ﻟﻲ ﺷﺤﺔ؟ ..
ﻗﺎﻟﺖ ﻟﻲ ﻗﻠﺖ ﺷﻨﻮﺍﻧﺖ ؟ ﺻﺎﻟﺢ ﺟﺎﺀ ﺍﻟﻨﻬﺎﺭ ؟ ﻻﻻﻻ ﺟﺎﺀ ﺯﻱ ﺍﻟﻌﺼﺮ ﻛﺪﻱ ﺍﺧﺪ ﻗﻌﺪﺗﻮ ﻭﻋﻤﻠﺖ ﻟﻴﻬﻮ ﺷﺎﻱ ﻭﻃﻠﻊ ..
ﺍﻟﻰ ﺍﻟﻠـــﻘﺎﺀ
*