ﺣﻜﺎﻳﺔ ﻣﺮﺽ ﺣﺎﻣﺪ !!
===
ﻃﺒﻌﺎً ﻓﻲ ﻧﺎﺱ ‏( ﻛﺘﺎﺭ ‏) ﺳﻤﻌﻮﺍ ﺑــ ‏( ﻣﺮﺽ ﺣﺎﻣﺪ ‏) ﻭ ‏( ﺃﻋﺮﺍﺽ ﻣﺮﺽ ﺣﺎﻣﺪ ‏) ﻟﻜﻦ ﺍﺣﺘﻤﺎﻝ ﻳﻜﻮﻧﻮﺍ ﻣﺎ ﻋﺎﺭﻓﻴﻦ ‏( ﺃﺻﻞ ‏) ﺍﻟﺤﻜﺎﻳﺔ ! ﻳُﻘﺎﻝ ‏( ﻭﺍﻟﻌُﻬﺪﺓ ﻋﻠﻰ ﺍﻟﺮﺍﻭﻱ ‏) ﺃﻧﻪ ﻓﻲ ﺇﺣﺪﻯ ‏( ﺍﻟﻘﺮﻯ ‏) ﻛﺎﻥ ﻫﻨﺎﻟﻚ ﺭﺟﻞ ﻋﺠﻮﺯ ‏( ﺳﺒﻌﻴﻨﻲ ‏) ﻭﻟﺪﻳﻪ ‏( ﺑﻨﺖ ‏) ﻭ ‏( ﻭﻟﺪ ‏) .. ﺍﻟﻮﻟﺪ ﻫﻮ ﺍﻟﻜﺒﻴﺮ ﻭﺇﺳﻤﻮ ‏( ﺣﺎﻣﺪ ‏) .. ﺣﺎﻣﺪ ﻣﻦ ﻫﻮ ﺻﻐﻴﺮ ﺷﻐﺎﻝ ﻣﻊ ‏( ﺍﺑﻮﻩ ‏) ﻓﻲ ﺍﻟﺰﺭﺍﻋﺔ ﻭﻓﻲ ﺍﻟﺘﺠﺎﺭﺓ ﺣﺘﻰ ﺑﻠﻎ ﺳﻦ ﺍﻟــ ‏( 30 ‏) ﻭﺃﺑﻮﻩ ﻣﺎ ﻓﻜﺮ ﻳﺰﻭﺟﻪ ﻧﻬﺎﺋﻴﺎً .. ﻷﻧﻮ ﺧﺎﺋﻒ ﻟﻮ ‏( ﻋﺮّﺱ ‏) ﻟﻴﻬﻮ .. ﺣﺎﻣﺪ ﻳﺒﻘﻰ ﻛﺴﻼﻥ ﻭﻳﺨﻠﻲ ‏( ﺍﻟﺸﻐﻞ ‏) ﻭﻳﺮﻛﻠﺲ ﻓﻲ ‏( ﺍﻟﺒﻴﺖ ‏) ﻣﻊ ‏( ﺍﻟﻌﺮﻭﺱ ‏) ﻭﺍﻟﺘﺠﺎﺭﺓ ﺗﺒﻮﺭ ﻭﺍﻟﺰﺭﺍﻋﺔ ﺗﺒﻮﻭﻭﻅ ! ﻭﻓﻲ ﻧﻔﺲ ﺍﻟﻮﻗﺖ ‏( ﻫﺎﺟﺲ ‏) ﺍﻟﺰﻭﺍﺝ ﺩﺍ ﻛﺎﻥ ﻋﺎﻣﻞ ﻟــ ‏( ﺣﺎﻣﺪ ‏) ﻗﻠﻖ ﺷﺪﻳﺪ ﻭﻛﺎﻥ ﻣﺘﻮﺗﺮ ﺟﺪﺍ ﻭﺧﺎﺋﻒ ﻳﻔﺎﺗﺢ ﺃﺑﻮﻫﻮ ﺃﻭ ﻋﻤﻮ ﻓﻲ ‏( ﺍﻟﺰﻭﺍﺝ ‏) ﻳﻌﺎﻛﺴﻮﻫﻮ !.. ﻭﻛﻞ ﻳﻮﻡ ‏( ﺣﺎﻣﺪ ‏) ﺗﻌﺒﻮ ﺯﺍﻳﺪ ﻭﺑﺤﺎﻭﻝ ﻳﻘﻨﻊ ﺍﺑﻮﻫﻮ ﺑﺤﻜﺎﻳﺔ ﺍﻟﺰﻭﺍﺝ ﻭﺍﺑﻮﻩ ‏( ﻛﺎﻟﻌﺎﺩﺓ ‏) ﺭﺍﻓﺾ ! .. ﻓﻲ ﻳﻮﻡ ﻣﻦ ﺍﻷﻳﺎﻡ ‏( ﺣﺎﻣﺪ ‏) ﻟﺤﺪﻱ ﺍﻟﺴﺎﻋﻪ 11 ﺻﺒﺎﺣﺎ ﻣﺎ ﻗﺎﻡ ﻣﻦ ‏( ﻋﻨﻘﺮﻳﺒﻮ ‏) ﻭﻻ ﻣﺸﻰ ﻟﻠﺰﺭﺍﻋﺔ ﻭﻻ ﻣﺸﻰ ﺍﻟﺪﻛﺎﻥ .. ﻭﻟﻤﺎ ﺻﺤﻰ ﻭﻗﺎﻡ ﻣﻦ ‏( ﻧﻮﻣﻮ ‏) ﻧﺎﺱ ﺍﻟﺒﻴﺖ ﺟﺎﺑﻮ ﻟﻴﻬﻮ ﺍﻷﻛﻞ ﺭﻓﻀﻮ .. ﺟﺎﺑﻮ ﻟﻴﻬﻮ ‏( ﺍﻟﺸﺎﻱ ‏) ﺭﻓﻀﻮ .. ﻭﻗﺎﻟﻮﺍ ﻟﻴﻬﻮ ﻛﻴﻒ ﺍﺻﺒﺤﺖ .. ﺍﺑﻰ ﻳﺮﺩ !!! ﺑﺲ ﺭﺍﻗﺪ ﻓﻲ ﺍﻟﻌﻨﻘﺮﻳﺐ ﻭﻋﺎﻣﻞ ﻓﻴﻬﺎ ‏( ﻛﺎﺿﻢ ‏) ﻻ ﺑﺠﺮ ‏( ﻳﺪ ‏) ﻭﻻ ‏( ﺭِﺟﻞ ‏) ﻭﻻ ﺣﺘﻰ ﺑﺘﺤﺮﻙ .. ﻭﺳﺎﻛﺖ ﺳﺎﻱ ..!! ﻭﺍﻟﺤﻜﺎﻳﺔ ﺩﻱ ﺍﺳﺘﻤﺮﺕ ﻣﻌﺎﻫﻮ ‏( ﻋﺪﺓ ﺃﻳﺎﻡ ‏) ﺍﺑﻮﻫﻮ ﻗﻠﻖ ﺷﺪﻳﺪ ﻭﺍﻣﻮ ﺧﺎﻓﺖ ﻳﻜﻮﻥ ‏( ﺣﺎﻣﺪ ‏) ﻣﺮﺿﺎﻥ ﻣﺮﺽ ﺧﻄﻴﺮ .. ﺍﻟﻤﻬﻢ ﺃﻫﻠﻮ ﺟﺎﺑﻮ ‏( ﺍﻟﺤﻤﺎﺭ ‏) ﻭﺭﻛﺒﻮﻫﻮ ﻭﺳﺎﻗﻮﻫﻮﻭ ‏( ﺍﻻﺳﺒﺘﺎﻟﻴﺔ !!( ﺍﻟﺪﻛﺘﻮﺭ ﻛﺸﻒ ﻋﻠﻰ ‏( ﺣﺎﻣﺪ ‏) ﻭﻟﻘﻰ ﻣﺎ ﻋﻨﺪﻭ ﺃﻱ ‏( ﺣﺎﺟﺔ ‏) ﺷﺪﻳﺪ ﻭ ‏( ﻟﻀﻴﺾ ‏) ﻟﻜﻦ ﺣﻴﻠﻮ ﻣﻴّﺖ ﻭﺣﺎﻟﺘﻮ ﺗﺤﻨّﻦ ‏( ﺍﻟﻜﺎﻓﺮ ‏) ﻭﺗﺠﺮﺗﻖ ‏( ﺍﻟﻴﻬﻮﺩﻱ ‏) ﻭﺗﻌﻤﻞ ‏( ﻧﻘﺸﺔ ‏) ﻟﻠﻬﻨﺪﻱ !! ﺍﻟﺪﻛﺘﻮﺭ ﻗﺎﻝ ﻟﻠﺠﻤﺎﻋﺔ ﻛﺪﻱ ﺍﻃﻠﻌﻮﺍ ﺑﺮﺓ ﺧﻠﻮﻧﻲ ﻣﻊ ﺍﻟﻤﺮﻳﺾ .. ﺍﻟﺪﻛﺘﻮﺭ ﻗﺎﻝ ﻟﺤﺎﻣﺪ ﻳﺎﺧﻲ ‏( ﺑﺎﻟﻮﺍﺿﺢ ‏) ﻛﺪﺍ ﺇﻧﺖ ﻣﺎﻟﻚ ؟ ﻣﺸﻜﻠﺘﻚ ﺷﻨﻮ ؟ ﺣﺎﻣﺪ ﺣﻜﻰ ﻟﻴﻬﻮ ﺍﻟﻤﻮﺿﻮﻉ ﻣﻦ ‏( ﻃﻖ ﻃﻖ .. ﻟﻠﺴﻼﻡ ﻋﻠﻴﻜﻢ ‏) .. ﺍﻟﺪﻛﺘﻮﺭ ﻗﺎﻡ ﻳﻀﺤﻚ .. ﻗﺎﻝ ﻟﻴﻬﻮ ﺧﻼﺹ ﻣﺸﻜﻠﺘﻚ ﻣﺤﻠﻮﻟﺔ ﻭﺍﻧﺎ ﺣﺄﺗﻜﻠﻢ ﻣﻊ ﺃﺑﻮﻙ ﻭﺣﺄﻗﻨﻌﻮ ﻳﻌﺮﺱ ﻟﻴﻚ ﻃﻮﺍﻟﻲ .. ﺍﻟﺪﻛﺘﻮﺭ ﻗﺎﻝ ﻻﺑﻮ ﺣﺎﻣﺪ .. ﻭﻟﺪﻙ ﺩﺍ ﻋﻴﺎﺍﺍﺍﻥ ﺷﺪﻳﺪ ﻭﺍﺣﺘﻤﺎﻝ ﻳﻤﻮﺕ !! ﺑﺲ ﻋﻼﺟﻮ ﻫﻴّﻦ ! ﺍﺑﻮ ﺣﺎﻣﺪ ﻗﺎﻝ ﻟﻴﻬﻮ ﺑﻲ ﻟﻬﻔﺔ ﻛﺪﺍ .. ﻃﻴﺐ ﻋﻼﺟﻮ ﺷﻨﻮ ؟ ! ﺍﻟﺪﻛﺘﻮﺭ ﻗﺎﻝ ﻟﻴﻬﻮ : ﻋﻼﺟﻮ ﺑﺲ ﺗﻌﺮِّﺱ ﻟﻴﻬﻮ ﻓﻮﺭﺍً .. ﻋﻠﻰ ﻃﻮﻝ ﺍﻟﺠﻤﺎﻋﺔ ﺭﺟﻌﻮﺍ ﺍﻟﺒﻴﺖ ﻭﻳﻮﻡ ﺍﻟﺨﻤﻴﺲ ﻛﺎﻥ ﺍﻟﻌﻘﺪ ﻭﺍﻟﻌﺮﺱ .. ﻭﺣﺎﻣﺪ ﺑﻘﺎ ﻓﺼﻴﺢ ﻭﻟﺪﻳﺢ ﻭﻧﺼﻴﺢ ﺯﻱ ‏( ﺍﻟﺤﺼﺎﻥ ‏) .. ﺑﻌﺪ ﺍﺳﺒﻮﻋﻴﻦ ﺗﻼﺗﺔ ﻛﺪﺍ ‏( ﺃﺧﺖ ‏) ﺣﺎﻣﺪ ﺍﻟﺼﻐﻴﺮﺓ ﻋﻤﻠﺖ ﻓﻴﻬﺎ ‏( ﻋﻴﺎﺍﺍﺍﻧﺔ ‏) ﻭﺣﺮﺩﺍﺍﺍﺍﻧﺔ ﻭﺃﺑﺖ ﺗﺎﻛﻞ ﻭﻻ ﺗﺸﺮﺏ ﻭﺳﺎﻛﺘﺔ ﺳﺎﺍﺍﺍﻱ .. ﻭﺍﻟﻴﻮﻡ ﻛﻠﻮﻭﻭﻭ ﻣﻘﻄﻤﺔ !.. ﻋﻠﻰ ﻃﻮﻭﻭﻝ ﺍﺑﻮﻫﺎ ﺳﺎﻗﻬﺎ ﺍﻻﺳﺒﺘﺎﻟﻴﺔ ﻟﻨﻔﺲ ﺍﻟﺪﻛﺘﻮﺭ .. ﺍﻟﺪﻛﺘﻮﺭ ﻋﺎﻳﻦ ﻟﻴﻬﺎ ﻣﻦ ﺑﻌﻴﺪ ﻭﻋﺮﻑ ﺍﻧﻬﺎ ‏( ﻧﺼﻴﺤﺔ ‏) .. ﻭﺷﺪﻳﺪﺓ ﻭﻟﻀﻴﻀﺔ ﻟﻜﻦ ﻣﺘﻤﺎﺭﺿﺔ ﺳﺎﺍﺍﺍﻱ .. ﻗﺎﻡ ﺷﺎﻝ ﻟﻴﻬﻮ ﺣﻘﻨﺔ ﻛﺒﻴﺮﺓ ‏( ﺯﻱ ﺣﻘﺖ ﺍﻟﺒﻘﺮ ﺩﻳﻚ ‏) ﻭﺟﺎﻱ ﻣﺎﺷﻲ ﻋﻠﻴﻬﺎ .. ﻣﻤﺎ ﺷﺎﻓﺖ ﺍﻟﺤﻘﻨﺔ ﺍﻟﻜﺒﻴﺮﺓ ﺍﻟﺒﺖ ﻧﻄﺖ ﻣﻦ ﺍﻟﺴﺮﻳﺮ ﻭﻗﺎﻟﺖ ﻟﻠﺪﻛﺘﻮﺭ ﺑﺼﻮﺕ ‏( ﻭﺍﻃﻲ ‏) ﻫﻮﻭﻭﻭﻭﻱ ﻫﺎ ﻣﺎ ﺗﺘﻌﺐ ﺭﻭﺣﻚ ﺳﺎﺍﺍﺍﻱ .. ﻭﺍﻟﻠﻪ ﺍﻧﺎ ﻋﻴﺎﺍﺍﺍﺍﺍﺍﻧﺔ ﻭﻋﻼﺟﻲ ﻣﺎﻓﻲ ﺍﻻﺑﺮﺓ ﻳﺎ ﺳﻴﺪ ﺍﻟﺨﺒﺮﺓ .. ﺍﻧﺎ ﻋﻨﺪﻱ ‏( ﻣﺮﺽ ﺣﺎﻣﺪ ‏) ﺫﺍﺗﻮ .. ﻭﻣﻦ ﺍﻟﻴﻮﻡ ﺩﺍﻙ ﺃﻱ ﻭﺍﺣﺪ ﻳﺘﻈﺎﻫﺮ ﺑﺎﻻﻛﺘﺌﺎﺏ ﻭﺍﻟﺪﺑﺮﺳﺔ ﻭﻳﺤﺮﺩ ﺍﻷﻛﻞ ﻭﺍﻟﺸﺮﺍﺏ ﻭﺍﻟﻘﻌﺎﺩ ﻣﻊ ﺍﻟﻨﺎﺱ .. ﻭﻳﻜﻮﻥ ‏( ﺍﻟﻘﻄﺮ ‏) ﻗﺮﺏ ﻳﻔﻮﺗﻮ ﺑﻴﻘﻮﻟﻮﺍ ﻋﻠﻴﻬﻮ ﻋﻨﺪﻭ ‏( ﻣﺮﺽ ﺣﺎﻣﺪ ‏)