ﺍﺟﻨﺤــﺔ ﺑﻼ ﺭﻳﺶ * ...
ﺍﻟﺤﻠﻘﺔ 6
ﺑﻘﻠﻢ ﻃﺎﺭﻕ ﺍﻟﻠﺒﻴﺐ ....
ـــــــــــــــــــــ
ﺍﻧﺎ ﻭﻗﺖ ﻋﺮﻓﺘﺎ ﻣﻨﻬﺎ ﺍﻧﻮ ﺻﺎﻟﺢ ﺟﺎﺀ ﺑﻲ ﻭﺭﺍﻱ .. ﺳﻜﺘﺎ ﺳﺎﻱ ﻭﺑﻘﻴﺖ ﺍﻋﺎﻳﻦ ﻟﻴﻬﺎ .. ﻭﺑﻔﻜﺮ ﻳﻌﻨﻲ ﻣﻌﻨﺎﻫﺎ ﺻﺎﻟﺢ ﻗﺎﻋﺪ ﻳﺠﻲ ﺑﻲ ﻭﺭﺍﻱ ﻭﺍﻧﺎ ﻣﺎﺟﺎﻳﺐ ﺧﺒﺮ ؟ ﻭﺑﺠﻲ ﻭﺑﻄﻠﻊ ﻛﻤﺎﻥ ﻣﺎ ﺑﻨﺘﻈﺮﻧﻲ .. ﻳﺎﺭﺑﻲ ﺍﻟﻜﻼﻡ ﺩﻩ ﻣﻦ ﻣﺘﻴﻦ؟؟ .. ﻭﺍﻧﺎ ﺧﺎﻳﻒ ﺍﺳﺄﻝ ﻧﺎﺩﻳﺔ . ﺗﻘﻮﻡ ﺗﺰﻋﻞ .. ﻭﺗﻔﺘﻜﺮﻧﻲ ﺑﺸﻚ ﻓﻴﻬﺎ ﺍﻭ ﺑﺸﻚ ﻓﻲ ﺍﺧﻮﻱ .. ﻭﺍﻧﺎ ﻓﻌﻼ ﺷﺎﻛﻲ .. ﻭﺍﻟﺸﻴﻄﺎﻥ ﻻﻋﺐ ﻓﻲ ﺭﺍﺳﻲ ﻟﻌﺐ ﺷﺪﻳﺪ ﺧﻼﺹ ..
ﻓﻲ ﺍﺛﻨﺎﺀ ﺗﻔﻜﻴﺮﻱ ﺩﻩ . ﻻﺣﻈﺖ ﻟﻲ ﻧﺎﺩﻳﺔ ﻣﺎﻃﺒﻴﻌﻴﺔ .. ﻭﻣﺎﻋﺎﺭﻓﻬﺎ ﻣﺎﻻ .. ﻭﻣﺘﻮﺗﺮﺓ ﺷﺪﻳﺪ .. ﻭﺗﻔﺮﻙ ﻓﻲ ﻳﺪﻳﻬﺎ ..
ﺩﺧﻠﺖ ﺍﻟﻤﻄﺒﺦ ﺍﻧﺎ ﻣﻔﺘﻜﺮﻫﺎ ﺩﺍﻳﺮﺓ ﺗﺴﻮﻱ ﻟﻲ ﺍﻛﻞ ﻭﻻ ﺣﺎﺟﺔ .
ﺟﺎﺕ ﻣﺎﺭﻗﺔ .. ﻗﺎﻟﺖ ﻟﻲ ﻳﺎ ﺷﻤﺴﻲ .. ﻭﺩﻳﻨﻲ ﺑﻴﺘﻨﺎ .. ﺍﻧﺎ ﻣﺎﻋﺎﻳﺰﺓ ﺍﺳﺘﻤﺮ ﻣﻌﺎﻙ ..
ﻗﻠﺖ ﻟﻴﻬﺎ ﻳﺎﺑﺖ ﺩﻩ ﻛﻼﻡ ﺷﻨﻮ ﺍﻟﺒﺘﻘﻮﻟﻲ ﻓﻴﻬﻮ ﺩﻩ؟ .. ﺍﻧﺎ ﻣﺎﻟﻲ ﻫﺴﻲ ﺑﺘﺎﺑﻴﻨﻲ ؟ .. ﻗﺎﻟﺖ ﻟﻲ ﺑﺲ ﺍﻧﺎ ﻋﺎﻳﺰﺍﻙ ﺗﻄﻠﻘﻨﻲ ﻫﺴﻲ ..
ﻗﻠﺖ ﻟﻴﻬﺎ ﻛﺪﻱ ﺍﺻﺒﺮﻱ .. ﺧﻠﻴﻨﻲ ﺍﻓﻬﻢ ﺍﻟﺴﺒﺐ .. ﻗﺎﻟﺖ ﻟﻲ ﻣﺎﻓﻲ ﺍﻱ ﺳﺒﺐ ..
ﺍﻧﺎ ﻣﺎﻋﺎﻳﺰﺍﻙ ﻭﺑﺲ .. ﻭﻟﻮ ﺳﻤﺤﺖ ﻣﺎﺗﺘﻜﻠﻢ ﻣﻌﺎﻱ ﻛﺘﻴﺮ .. ﻻﻧﻲ ﻣﺎﺑﺘﺮﺍﺟﻊ ﻣﻦ ﻗﺮﺍﺭﻱ ﺩﻩ ..
ﻗﻠﺖ ﻟﻴﻬﺎ ﺍﻟﻘﺮﺍﺭ ﺩﻩ ﻗﺮﺭﺗﻴﻬﻮ ﻣﺘﻴﻦ ﻳﻌﻨﻲ ..
ﻗﻠﺘﺎ ﻟﻴﻬﺎ ﺧﻼﺹ ﻣﺎﻓﻲ ﻣﺸﻜﻠﺔ .. ﺑﺲ ﺍﺻﺒﺮﻱ ﺍﻭﺩﻳﻚ ﺍﻫﻠﻚ ﺑﺮﺍﻱ ..
ﻗﺎﻟﺖ ﻟﻲ ﻣﺘﻴﻦ ﺣﺘﻮﺩﻳﻨﻲ؟؟ .. ﻗﻠﺖ ﻟﻴﻬﺎ ﺑﻜﺮﺓ ﺍﻭ ﺑﻌﺪﻭ ..
ﻗﺎﻟﺖ ﻟﻲ ﻻﻻ ﺍﻧﺎ ﻋﺎﻳﺰﺓ ﺍﻣﺸﻲ ﺑﻜﺮﺓ ﺍﻟﺼﺒﺎﺡ ﻃﻮﺍﻟﻲ .. ﺗﻄﻠﻊ ﺑﺪﺭﻱ ﻭﺍﻧﺖ ﻃﺎﻟﻊ ﺗﻐﺸﻴﻨﻲ ﺑﻴﺘﻨﺎ .. ﻭﺗﻤﺸﻲ ﺷﻐﻠﻚ ..
ﻭﺍﻧﺎ ﻃﺒﻌﺎ " ﺑﻘﻴﺖ ﻣﺎﻓﺎﻫﻢ ﺍﻱ ﺣﺎﺟﺔ .. ﻳﺎﺭﺑﻲ ﺩﻩ ﻣﻦ ﻛﻼﻡ ﺍﻟﺼﺒﺎﺡ ﺍﻻﺗﻜﻠﻤﺘﻮ ﻣﻌﺎﻫﺎ ؟
ﻻﻻﻻ ﻣﺎ ﻣﻦ ﻛﻼﻡ ﺍﻟﺼﺒﺎﺡ . ﻻﻧﻬﺎ ﻫﺴﻲ ﻛﺎﻧﺖ ﺑﺘﺘﻜﻠﻢ ﻋﺎﺩﻱ ..
ﻃﻴﺐ ﻳﺎﺭﺑﻲ ﺑﺘﻜﻮﻥ ﺣﺴﺖ ﺑﺎﻧﻲ ﺷﺎﻛﻲ ﻓﻴﻬﺎ ﻣﻦ ﺧﻼﻝ ﺍﺳﺌﻠﺘﻲ ؟؟ ﻭﺍﻟﻠﻪ ﺩﻩ ﺍﺣﺘﻤﺎﻝ ﻛﺒﻴﺮ ..
ﻭﺍﻻﺣﺘﻤﺎﻝ ﺍﻻﻛﺒﺮ ﻣﻨﻮ .. ﺍﻧﻮ ﻳﻜﻮﻥ ﺻﺎﻟﺢ ﺟﺎ ﻗﺒﻴﻞ .. ﻭﻗﻌﺪ ﻳﺘﻜﻠﻢ ﻣﻌﺎﻫﺎ ﻭﻳﻮﺍﺳﻲ ﻓﻴﻬﺎ .. ﻋﺸﺎﻥ ﻛﻼﻣﻲ ﺑﺘﺎﻉ ﺍﻟﺼﺒﺎﺡ ﻣﻌﺎﻫﺎ .. ﻭﺑﻄﻴﺐ ﻓﻲ ﺧﺎﻃﺮﻫﺎ .. ﻭﻫﻲ ﺍﺳﺎﺳﺎ ﺷﺎﻳﻔﺎﻫﻮ ﺍﺣﺴﻦ ﻣﻨﻲ ﻭﺑﺘﺤﺘﺮﻣﻮ ﺷﺪﻳﺪ .. ﻳﻜﻮﻥ ﻳﺎﺭﺑﻲ ﺍﻟﻤﻮﺿﻮﻉ ﺍﺗﺤﻮﻝ ﻟﻲ ﺣﺐ ﻭﺭﻳﺪﺓ .. ﻭﻧﺎﺩﻳﺔ ﺩﺍﻳﺮﺓ ﺗﻄﻠﻖ ﻣﻨﻲ ﻭﺗﻌﺮﺱ ﺍﺧﻮﻱ ..
ﺍﻳﻮﺓ ﺍﻳﻮﺓ ﺗﻤﺎﻡ .. ﺩﻩ ﺍﻻﺣﺘﻤﺎﻝ ﺍﻻﻛﺒﺮﺭ .. ﺑﻜﻮﻧﻮ ﻣﺘﻔﻘﻴﻦ ﻋﻠﻰ ﺍﻟﻤﻮﺿﻮﻉ ﺩﻩ ﻣﻦ ﺯﻣﺎﻥ .. ﻣﺎﺩﺍﻡ ﺍﻧﻮ ﺑﺠﻲ ﺑﺎﻟﻨﻬﺎﺭ ﺑﺪﻭﻥ ﻋﻠﻤﻲ .. ﻭﻫﻲ ﺫﺍﺗﻬﺎ ﻣﺎﻛﻠﻤﺘﻨﻲ ﻭﻻ ﻛﺎﻧﺖ ﺡ ﺗﻜﻠﻤﻨﻲ ﺍﻻ ﻟﻤﻦ ﺳﺄﻟﺘﻬﺎ ..
ﻭﺭﺍﺳﻲ ﺑﻘﻰ ﻳﻮﺩﻱ ﻭﻳﺠﻴﺐ . ﻭﻛﻠﻬﺎ ﺍﻓﻜﺎﺭ ﻣﺎﻋﻨﺪﻱ ﻋﻠﻴﻬﺎ ﺍﺩﻧﻰ ﺩﻟﻴﻞ .. ﻟﻜﻦ ﺟﻮﺍﻱ ﺑﺮﺿﻮ ﻓﻜﺮ ﺑﻘﻮﻝ ﻟﻲ ﺍﻧﻮ ﻧﺎﺩﻳﺔ ﻣﺎﺟﺎﺩﺓ ﻓﻲ ﺍﻟﻤﻮﺿﻮﻉ ﺩﻩ .. ﻭﺍﻣﻜﻦ ﻟﻲ ﺑﻜﺮﺓ .. ﺗﻐﻴﺮ ﺭﺍﻳﻬﺎ ﻣﻦ ﺍﻟﻘﺼﺔ ﺩﻱ ..
ﻳﻌﻨﻲ ﻛﻴﻒ ﺍﻃﻠﻘﻬﺎ .. ؟ﻭﺍﻧﺎ ﻣﺎ ﻋﻨﺪﻱ ﻋﻠﻴﻬﺎ ﺍﺛﺒﺎﺕ ﻓﻲ ﻣﻮﺿﻮﻉ .. ﻫﺴﻲ ﻳﺎﺩﻭﺏ ﺑﺪﻳﺖ ﺍﺗﺨﻴﻞ ﻛﻴﻒ ﺗﻜﻮﻥ ﺣﻴﺎﺗﻲ ﻟﻮ ﻧﺎﺩﻳﺔ ﺑﻘﺖ ﻣﺎﻓﻴﻬﺎ .. ﺣﻴﺎﺗﻲ ﺑﺘﻜﻮﻥ ﻋﺒﺎﺭﺓ ﻋﻦ ﺧﺮﺍﺏ ﻭﻫﻢ ﻣﺎﻋﻨﺪﻭ ﺍﻱ ﻃﻌﻢ ..
ﻏﺎﻳﺘﻮ ﺍﻥ ﺷﺎﺀ ﺍﻟﻠﻪ ﺭﺑﻨﺎ ﻳﺴﺘﺮ .. ﻭﺍﻟﺒﺖ ﺩﻱ ﺗﻜﻮﻥ ﺑﺘﻬﻈﺮ ﺳﺎﻱ ..
ﺑﻘﺖ ﺳﺎﻛﺘﺔ ﻭﻣﺎﺑﺘﺘﻜﻠﻢ ﻣﻌﺎﻱ ﻭﺷﻜﻠﻬﺎ ﻣﺎﻃﺒﻴﻌﻴﺔ ﻧﻬﺎﺋﻲ .. ﻭﻻ ﻣﺘﺄﺛﺮﺓ ﺑﺎﻧﻬﺎ ﺣﺘﺘﻄﻠﻖ .. ﻭﺩﻱ ﺍﻟﺤﺎﺟﺔ ﺍﻟﺒﺘﺨﻮﻑ .. ﺍﻟﻤﺮﺍﺓ ﻟﻤﻦ ﺗﻄﻠﺐ ﺍﻟﻄﻼﻕ ﻓﻲ ﻇﺮﻭﻑ ﻋﺎﺩﻳﺔ ﺑﺘﻜﻮﻥ ﺟﺎﺩﺓ ﺷﺪﻳﺪ . ﻟﻜﻦ ﻭﻛﺖ ﺗﻄﻠﺐ ﺍﻟﻄﻼﻕ ﻓﻲ ﺛﻮﺭﺓ ﻏﻀﺐ .. ﺑﺘﻜﻮﻥ ﻣﻨﻔﻌﻠﺔ ﻭﻣﺎ ﻣﻘﺪﺭﺓ ﺍﻟﻌﻮﺍﻗﺐ . ﻭﻣﺎ ﺑﺘﻔﻜﺮ ﺑﻜﺎﻣﻞ ﻭﻋﻴﻬﺎ
ﻋﺸﺎﻥ ﻛﺪﺍ ﺑﻘﻮﻟﻮ ﺍﻟﻌﺼﻤﺔ ﺑﺘﻜﻮﻥ ﻓﻲ ﻳﺪ ﺍﻟﺮﺟﻞ ... ﺩﻩ ﻋﻠﻰ ﺣﺴﺐ ﻓﻬﻤﻲ ..
ﺍﻧﺎ ﺑﻘﻴﺖ ﺑﺤﺎﻭﻝ ﺍﺗﻜﻠﻢ ﻣﻌﺎﻫﺎ ﻭﻫﻲ ﺑﺘﺪﻳﻨﻲ ﺍﻟﺮﺩ ﺑﺎﻟﻘﻄﺎﺭﺓ ..
ﺑﺎﻟﺠﺪ ﺍﻟﺰﻭﻟﺔ ﺩﻱ ﺍﺗﻐﻴﺮﺕ ﻛﻠﻮ ﻛﻠﻮ ..
ﺍﻧﺎ ﺍﻟﻴﻮﻡ ﺩﻩ ﻣﺎ ﻃﻠﻌﺖ ﻣﻦ ﺍﻟﺒﻴﺖ .. ﻃﻠﻌﺖ ﺻﻠﻴﺖ ﺍﻟﻤﻐﺮﺏ ﻭﺟﻴﺖ ﺭﺍﺟﻊ ﺍﻟﺒﻴﺖ , ﻭﻣﻨﺘﻈﺮ ﺻﺎﻟﺢ ﻗﺎﺍﺍﻋﺪ .. ﻭﺑﺤﺎﻭﻝ ﺍﺗﻜﻠﻢ ﻣﻌﺎﻫﺎ ﺍﻓﻬﻢ ﻣﻨﻬﺎ ﺷﻲ . ﻭﻫﻲ ﺑﺲ ﺑﺘﻘﻮﻝ ﻟﻲ ﻣﺎ ﻓﻲ ﺷﻲ ﻳﺎﺷﻤﺲ ﺍﻟﺪﻳﻦ .
ﻃﺒﻌﺎ ﻭﻛﺖ ﺗﻜﻮﻥ ﺣﻠﻮﺓ ﻣﻌﺎﻱ ﺑﺘﻘﻮﻝ ﻟﻴﻚ ﻳﺎﺷﻤﺴﻲ .. ﻭﻛﺖ ﺗﻜﻮﻥ ﻣﺎﻃﺒﻴﻌﻴﺔ ﺍﻭ ﻓﻲ ﻣﺸﻜﻠﺔ ﺑﻴﻨﺎﺗﻨﺎ ,, ﺑﺘﻘﻮﻝ ﻟﻲ ﻳﺎ ﺷﻤﺲ ﺍﻟﺪﻳﻦ ..
ﺯﻱ ﺍﻟﺴﺎﻋﺔ ﺍﻟﺴﺎﻋﺔ . 8 ﺻﺎﻟﺢ ﺟﺎﺀ ﻭﺩﻕ ﺍﻟﺒﺎﺏ .. ﻭﻧﺎﺩﺍﻧﻲ ﻓﻲ ﺍﻻﻭﺿﺔ
ﻗﺎﻝ ﻟﻲ ﺍﺳﻤﻊ .. ﺍﻣﻲ ﺍﺗﺼﻠﺖ ﻋﻠﻲ .. ﻭﻗﺎﻟﺖ ﻟﻲ ﺍﺑﻮﻙ ﻭﺍﻓﻖ ﺗﺠﻲ ﺍﻟﺒﻴﺖ .
ﺍﻧﺖ ﻳﺎﺷﻤﺲ ﺍﻟﺪﻳﻦ . ﺍﺗﻜﻠﻤﺖ ﻣﻊ ﺍﻣﻲ ؟
ﻗﻠﺖ ﻟﻴﻬﻮ ﺍﺑﺪﺍ " ﺍﺗﻜﻠﻢ ﻣﻌﺎﻫﺎ ﺍﻗﻮﻝ ﻟﻴﻬﺎ ﺷﻨﻮ ﻳﻌﻨﻲ .. ؟؟
ﻗﺎﻝ ﻟﻲ ﺍﻟﻤﻬﻢ ﺍﻧﺎ ﺗﺎﻧﻲ ﻣﺎﺑﻘﺪﺭ ﺍﻗﻌﺪ ﻓﻲ ﺑﻴﺘﻨﺎ .. ﺍﻳﻮﺓ ﺡ ﺍﺭﺟﻊ ﻟﻴﻬﻢ ﻟﻜﻦ
ﺑﺠﻴﻬﻢ ﺑﺎﻟﻠﻴﻞ ﺑﺲ .. ﻭﻃﻮﻝ ﺍﻟﻴﻮﻡ ﺑﻜﻮﻥ ﻓﻲ ﺟﺒﺮﺓ ..
ﻗﻠﺘﺎ ﻟﻴﻬﻮ ﻳﺎ ﺻﺎﻟﺢ .. ﻣﺎﺩﺍﻡ ﺍﺑﻮﻱ ﺧﻼﺹ ﺍﺗﻨﺎﺯﻝ .. ﺍﻧﺖ ﺍﻏﺘﻨﻢ ﺍﻟﻔﺮﺻﺔ ﻭﺧﻠﻴﻬﻮ ﻳﺮﺿﻰ ﻣﻨﻚ ..
ﻭﺍﺑﻴﺖ ﺍﻗﻮﻝ ﻟﻴﻬﻮ ﺍﻧﻮ ﻧﺎﺩﻳﺔ ﻗﺎﻟﺖ ﻃﺎﻟﺒﺔ ﺍﻟﻄﻼﻕ .. ﺩﻱ ﻣﺸﻜﻠﺘﻲ ﺑﺮﺍﻱ ﺍﺣﺴﻦ ﻣﺎ ﺍﺳﺘﻌﺠﻞ ..
ﻗﺎﻝ ﻟﻲ ﻧﻤﺸﻲ ﻋﻠﻰ ﺍﻟﻔﺮﻥ ؟ ﻗﻠﺖ ﻟﻴﻬﻮ ﺩﻗﻴﻘﺔ ﺍﺟﻴﺐ ﺣﺎﺟﺔ ﺗﺎﻛﻠﻬﺎ ﻭﻧﻄﻠﻊ ..
ﻗﺎﻝ ﻟﻲ ﺍﻧﺎ ﻣﺎﻛﻞ ﻭﺷﺎﺭﺏ ﺍﻟﺤﻤﺪ ﻟﻠﻪ .. ﻃﻠﻌﻨﺎ ﻣﺸﻴﻨﺎ ﻋﻠﻰ ﺍﻟﻔﺮﻥ .. ﺍﺧﺪﻧﺎ ﻗﻌﺪﺓ ﺑﺘﺎﻋﺔ ﺳﺎﻋﻪ .. ﻃﺒﻌﺎ ﻓﻲ ﺍﻟﻜﻮﺷﺘﻴﻨﺔ ﻻﻋﺒﻴﻦ ﺑﺎﻟﻘﻴﻢ .. ﻧﺎﺱ ﺑﻜﻮﻧﻮ ﺑﻠﻌﺒﻮ ﻭﻧﺎﺱ ﻣﻨﺘﻈﺮﻳﻦ ﺍﻟﺪﻭﺭ ..
ﺍﻧﺎ ﻛﻨﺖ ﻣﻨﺘﻈﺮ ﺍﻟﺪﻭﺭ .. ﺍﻭﻝ ﺍﻟﻌﺸﺮﺓ ﻣﺎﻗﺎﻣﺖ .. ﻭﺍﻧﺎ ﺧﻼﺹ ﻧﺰﻟﺖ ﻓﻲ ﺍﻟﻘﻴﻢ ﺍﻟﺠﺪﻳﺪ .. ﻭﺑﻮﺯﻋﻮ ﻓﻲ ﺍﻟﻮﺭﻕ .. ﺻﺎﻟﺢ ﻗﺎﻝ ﻟﻲ ﺍﻧﺎ ﻣﺎﺷﻲ ﻗﺪﺍﻣﻚ ﺍﻟﺒﻴﺖ .. ﺗﻌﺒﺎﻥ ﺷﻮﻳﺔ ..
ﻗﻠﺖ ﻟﻴﻬﻮ ﻛﻮﻳﺲ ﺍﻣﺸﻲ ﺑﺤﺼﻠﻚ ..
ﻭﺍﻧﺎ ﺑﻘﻴﺖ ﻣﻘﻠﻖ ﻭﺩﺍﺧﻞ ﻓﻲ ﺣﻴﺺ ﺑﻴﺺ .. ﻭﻣﺎﻋﺎﺭﻑ ﺍﺗﺼﺮﻑ ﻛﻴﻒ .. ﺑﺲ ﺑﻘﻴﺖ .. ﺑﻠﻌﺐ ﻟﻌﺐ ﻣﺨﺎﺭﺟﺔ .. ﻋﺸﺎﻥ ﺍﻗﻮﻡ ﺳﺮﻳﻊ ﺍﻟﺤﻘﻮ .. ﺑﻘﻴﺖ ﻣﺎ ﻣﻄﻤﺌﻦ ﻧﻬﺎﺋﻲ ﻭﺍﻟﻠﻪ ..
ﺍﻫﺎ ﺟﺪﻋﺖ ﺍﻟﺨﻤﺴﻴﻦ ﻭﺟﺮﻭﻧﻲ . ﻭﻣﺎﺳﻚ 14 ﻛﺮﺕ ﻭﻓﻴﻬﻦ ﺟﻮﻛﺮ . ﻭﻗﺒﻀﻮﻧﻲ ﺑﺎﻟﻮﺭﻕ ﻛﺎﻣﻞ ﻳﻌﻨﻲ ﻓﻲ ﺗﻮﺯﻳﻌﺘﻴﻦ ﺍﻧﺎ ﻗﻤﺖ ..
ﻣﺎ ﺃﻛﺘﺮ ﻣﻦ ﺭﺑﻊ ﺳﺎﻋﺔ .. ﺣﺘﻰ ﺍﻟﻨﺎﺱ ﺍﻟﻤﻌﺎﻱ ﻻﺣﻈﻮ ﻟﻲ ﻭﺭﻗﻲ ﻓﻴﻬﻮ ﺍﻟﻨﺰﻭﻝ ﻭﻣﺎﻧﺰﻟﺖ .. ﺍﻟﻤﻬﻢ ﺑﺲ ﺍﺗﺨﺎﺭﺟﺖ ﻭﻃﻠﻌﺖ ﺳﺮﻳﻊ .. ﻭﻓﻲ ﺍﻟﺸﺎﺭﻉ ﻣﺎﻓﺎﺿﻞ ﻟﻲ ﺍﻻ ﺍﺟﺮﻱ ﺍﺣﺼﻞ ﺻﺎﻟﺢ .
ﻭﺍﻟﻠﻪ ﺩﻱ ﺣﻜﺎﻳﺔ ﻏﺮﻳﺒﺔ ﺧﻼﺹ ..
ﻭﻛﺖ ﻭﺻﻠﺖ ﻭﺩﻗﻴﺖ ﺍﻟﺒﺎﺏ .. ﺻﺎﻟﺢ ﺫﺍﺗﻮ ﻣﺎ ﻣﺘﻮﻗﻌﻨﻲ ﺍﺟﻲ ﺳﺮﻳﻊ ﻛﺪﻱ . ﻻﻧﻲ ﻗﺎﻋﺪ ﺍﺷﺨﺖ ﺍﻟﻨﺎﺱ ﻭﺍﻗﻮﻣﻬﻢ ﻛﻠﻬﻢ ﻓﻲ ﺍﻟﺤﺮﻳﻖ ﺩﻩ ..
ﻭﻛﺖ ﺟﺎﺀ ﻓﺘﺢ ﻟﻲ ﺍﻟﺒﺎﺏ .. ﻣﺎﻋﺮﻓﺖ ﻫﻮ ﺟﺎﻧﻲ ﻣﻦ ﻋﻠﻰ ﻭﻳﻦ .. ﻣﺮﺍﺕ ﻗﻠﺒﻲ ﻳﻘﻮﻝ ﻟﻲ ﺣﺲ ﺧﻄﻮﺍﺗﻮ ﺟﺎﻱ ﻣﻦ ﻋﻠﻲ ﻏﺮﻓﺘﻮ .. ﻭﻣﺮﺍﺕ ﺑﺘﺨﻴﻞ ﺍﻧﻮ ﺟﺎﻱ ﻣﻦ ﻋﻠﻲ ﻏﺮﻓﺔ ﻧﺎﺩﻳﺔ .. ﻏﺎﻳﺘﻮ ﺑﻘﻴﺖ ﻋﺎﻳﺶ ﻓﻲ ﻭﻫﻢ ﻭﻧﻔﺴﻴﺎﺕ ..
ﺍﻭﻝ ﻣﻦ ﺩﺧﻠﺖ ﺍﻟﺒﻴﺖ .. ﻣﺸﻴﺖ ﻃﻮﺍﻟﻲ ﻋﻠﻰ ﻏﺮﻓﺔ ﻧﺎﺩﻳﺔ .. ﻭﺍﻧﺎ ﺑﺘﻜﻠﻢ ﻣﻊ ﺻﺎﻟﺢ .. ﻗﻠﺖ ﻟﻴﻬﻮ ﻭﺍﻟﻠﻪ ﺧﺒﻄﻮﻧﻲ ﻟﻴﻚ ﺧﺒﻄﺔ .. ﺟﺮﻭﻧﻲ ﺧﻤﺴﻴﻦ ﻭﻗﺒﻀﻮﻧﻲ ﺏ ﺍﻟﻮﺭﻕ ﻭﺟﻮﻛﺮ . ﻣﺎﺧﻠﻮﻧﻲ ﺍﺭﺗﺤﺖ ﻓﻲ ﺍﻟﻘﻌﺪﺓ ..
ﺍﻧﺎ ﺑﺘﻜﻠﻢ ﻭﻣﺎﺷﻲ ﻋﻠﻰ ﻏﺮﻓﺔ ﻧﺎﺩﻳﺔ .. ﻟﻘﻴﺘﻬﺎ ﻗﺎﻋﺪﺓ .. ﻭﻋﻴﻮﻧﻬﺎ ﺣﻤﺮ ﻣﻦ ﺍﺛﺮ ﺍﻟﺒﻜﺎ .. ﺍﻧﺎ ﻣﺘﺄﻛﺪ ﻛﺎﻧﺖ ﺑﺘﺒﻜﻲ ﻗﺒﻞ ﻣﺎ ﺍﺩﺧﻞ ﺑﻲ ﺩﻗﻴﻘﺘﻴﻦ . ﻭﻣﺎﺳﺤﺔ ﺍﻟﺪﻣﻮﻉ ﺍﻟﺤﻜﺎﻳﺔ ﺩﻱ ﻇﺎﻫﺮﺓ ﻗﺪﺍﻣﻲ ﻣﺎ ﺩﺍﻳﺮﺓ ﻟﻴﻬﺎ ﻛﻼﻡ ..
ﻗﻠﺖ ﻟﻴﻬﺎ ﺍﻧﺘﻲ ﻛﻨﺖ ﺑﺘﺒﻜﻲ ﻳﺎ ﻧﺎﺩﻳﺔ ؟
ﻗﺎﻟﺖ ﻟﻲ ﺍﺑﻜﻲ ؟ ﺍﺑﻜﻲ ﻣﻦ ﺷﻨﻮ ؟ ﻓﻲ ﺣﺎﺟﺔ ﺑﺘﺒﻜﻲ ؟؟ ﺍﻧﺖ ﻳﺎ ﺷﻤﺲ ﺍﻟﺪﻳﻦ ﻣﺎﻟﻚ؟ . ﺑﻘﻴﺖ ﺗﺠﻴﺐ ﻟﻴﻚ ﺍﻭﻟﻬﺎﻡ ﻣﻦ ﺭﺍﺳﻚ ..
ﺍﻧﺎ ﺗﻌﺒﺎﻧﺔ ﻣﺎﻗﺎﺩﺭﺓ ﺍﻗﻮﻡ .. ﺗﻠﻘﻰ ﺍﻟﻌﺸﺎ ﻓﻮﻕ ﺍﻟﻄﺮﺑﻴﺰﺓ ﺑﺘﺎﻋﺔ ﺍﻟﻤﻄﺒﺦ ﺷﻴﻠﻮ ﺍﺗﻌﺸﻮ ﻭﻧﻮﻡ ﺳﺮﻳﻊ .. ﻋﺸﺎﻥ ﻧﺤﻦ ﻗﺎﻳﻤﻴﻦ ﺑﺪﺭﻱ ..
ﺩﺍﻳﺮ ﺍﻃﻠﻊ ﻛﺪﺍ ﻣﻦ ﺍﻟﻐﺮﻓﺔ ﻛﺪﺍ .. ﻋﺎﻳﻨﺘﺎ ﺑﻴﻦ ﺍﻟﺴﺮﻳﺮ ﻭﺍﻟﻴﻮﻧﻴﺖ . ﻟﻘﻴﺘﻬﺎ ﻣﺮﺑﻄﺔ ﺷﻨﻄﺘﻬﺎ .. ﻭﺧﺎﺗﺔ ﻓﻮﻗﻬﺎ ﺗﻮﺑﻬﺎ ﺍﻟﻜﺤﻠﻲ . ﻳﻌﻨﻲ ﻓﻌﻼ ﺟﺎﻫﺰﺓ ﺯﻱ ﺍﻟﺰﻭﻝ ﺍﻟﻤﺴﺎﻓﺮ ﺍﻟﺪﻏﺶ ..
ﻭﺍﻟﻠﻪ ﺍﻟﻤﺮﺍﺓ ﺩﻱ ﻣﻌﻨﺎﻫﺎ ﺟﺎﺩﺓ ﻓﻲ ﻣﻮﺿﻮﻋﻬﺎ ..
ﻗﻠﺘﺎ ﻟﻴﻬﺎ ﻃﻴﺐ .. ﻛﻮﻳﺲ ﻣﺎﺗﻨﻮﻣﻲ ﺍﻧﺎ ﺑﻌﺪ ﺍﻟﻌﺸﺎ ﻋﻨﺪﻱ ﻣﻌﺎﻙ ﻛﻠﻤﺘﻴﻦ ..
ﻗﺎﻟﺖ ﻟﻲ ﻳﺎﺷﻤﺲ ﺍﻟﺪﻳﻦ .. ﺗﺎﻧﻲ ﺍﻧﺎ ﻣﺎﻋﻨﺪﻱ ﻣﻌﺎﻙ ﻛﻼﻡ ﺍﻧﺎ .. ﺑﺲ ﺑﺎﻛﺮ ﺗﻮﺩﻳﻨﻲ ﺍﻫﻠﻲ . ﻭﻋﻠﻰ ﻣﻬﻠﺘﻚ ﺗﺮﺳﻞ ﻟﻲ ﻭﺭﻗﺘﻲ .. ﻣﺘﻲ ﻣﺎ ﺗﻘﺪﺭ ﻭﻟﻮ ﻣﺎﻋﺎﻳﺰ ﺗﺮﺳﻼ .. ﻋﻠﻰ ﻛﻴﻔﻚ ﺑﺲ ﺗﺎﻧﻲ ﺍﻧﺖ ﺍﻧﺎ ﻣﺎﻋﻨﺪﻱ ﻣﻌﺎﻙ ﻋﻴﺸﺔ ﺍﻧﺘﻬﻴﻨﺎ ..
ﻣﺸﻴﺖ ﺷﻠﺘﺎ ﺍﻟﻌﺸﺎ ﻭﺍﺗﻌﺸﻴﻨﺎ ﺍﻧﺎ ﻭﺻﺎﻟﺢ .. ﻭﺻﺎﻟﺢ ﺩﻩ ﺳﺎﺭﺡ ﺳﺮﺣﺔ ﺷﺪﻳﺪﺓ ﺧﻼﺹ . ﻳﺸﻴﻞ ﺍﻟﻠﻘﻤﺔ ﻳﻮﺩﻳﻬﺎ ﻋﻠﻰ ﺧﺸﻤﻮ .. ﻭﻳﻘﻴﻒ ﺯﻱ ﺍﻟﻘﻨﺎﺓ ﺍﻻﺷﺎﺭﺗﻬﺎ ﺿﻌﻴﻔﺔ .. ﻻﻣﻦ ﺍﻗﻮﻝ ﻟﻴﻬﻮ ﺻﺎﻟﺢ .. ﺍﻛﻞ ﻳﺎﺧﻲ ﺳﻴﺐ ﺍﻟﺘﻘﻬﻲ .. ﺑﻌﺪ ﺷﻮﻳﺔ ﻋﺎﻳﻨﺖ ﻟﻲ ﻋﻴﻮﻧﻮ ﺍﺗﻤﻠﻦ ﺯﻱ ﺍﻟﺪﺍﻳﺮ ﻳﺒﻜﻲ .. ﻳﺎﺭﺑﻲ ﺍﻟﺰﻭﻝ ﺩﻩ ﻣﺎﻟﻮ؟ ﻳﺎﺭﺑﻲ ﻋﺎﺭﻑ ﺍﻧﻮ ﻧﺎﺩﻳﺔ ﻃﺎﻟﺒﺔ ﺍﻟﻄﻼﻕ ؟ ﻭﺍﻟﻠﻪ ﺍﻧﺎ ﺫﺍﺗﻲ ﻣﺎﻗﺎﺩﺭ ﺍﻓﻜﺮ .. ﻭﻣﺨﻲ ﺧﻼﺹ ﻛﺒﺲ .. ﺷﻠﺘﺎ ﺍﻟﻌﺪﺓ ﻭﻣﺸﻴﺖ ﻟﻘﻴﺖ ﻧﺎﺩﻳﺔ ﻣﺎ ﺃﻛﻠﺖ ﺍﻱ ﺣﺎﺟﺔ .. ﻗﺎﻋﺪﺓ ﺑﺲ ﻣﺘﻤﺤﻨﺔ ..
ﺍﻧﺎ ﺑﻌﺪ ﺟﻴﺖ .. ﻗﻌﺪﺗﺎ ﺟﻤﺒﻬﺎ ﻓﻲ ﺳﺮﻳﻬﺎ .. ﻗﺎﻣﺖ ﻗﺎﻣﺖ ﻗﻌﺪﺕ ﻓﻲ ﺍﻟﻜﺮﺳﻲ ..
ﻗﻠﺖ ﻟﻴﻬﺎ ﺗﻌﺎﻟﻲ ﺍﻗﻌﺪﻱ .. ﺍﻧﺎ ﻣﺎﺷﻲ ﺍﻟﺴﺮﻳﺮ ﺍﻟﺘﺎﻧﻲ .. ﺍﻟﺰﻭﻟﺔ ﺩﻱ ﺷﻜﻠﻬﺎ ﻗﻨﻌﺎﻧﺔ ﻭﺍﻟﻠﻪ ﺍﻟﻠﻪ ﻳﺴﺘﺮ ..
ﺑﻘﻴﺖ ﺑﺴﺄﻝ ﻓﻴﻬﺎ .. ﻗﻠﺖ ﻟﻴﻬﺎ ﻳﺎ ﻧﺎﺩﻳﺔ .. ﻣﻤﻜﻦ ﺍﺳﺄﻟﻚ ﺳﺆﺍﻝ .. ﻗﺎﻟﺖ ﻟﻲ ﺍﺳﺄﻝ ﺍﻧﺎ ﺳﺎﻣﻌﺔ ..
ﻗﻠﺖ ﻟﻴﻬﺎ ﺍﻧﺘﻲ ﺷﺎﻛﺔ ﻓﻴﻨﻲ .. ﺍﻧﻲ ﻋﻨﺪﻱ ﺍﻧﺴﺎﻧﺔ ﻏﻴﺮﻙ ﻓﻲ ﺣﻴﺎﺗﻲ ؟؟؟
ﻗﺎﻟﺖ ﻟﻲ ﺍﺑﺪﺍ ﻭﻻ ﺣﺼﻞ ﻇﻨﻴﺖ ﻓﻴﻚ ﻇﻦ ﺯﻱ ﺩﻩ .. ﻭﻣﺘﺄﻛﺪﺓ ..
ﻗﻠﺖ ﻟﻴﻬﺎ ﻃﻴﺐ .. ﺯﻋﻼﻧﺔ ﻣﻦ ﺍﻧﻲ ﻣﺎﻣﻬﺘﻤﻲ ﺑﻴﻚ؟ . ﻭﺑﻄﻠﻊ ﻛﺘﻴﺮ ؟؟
ﻗﺎﻟﺖ ﻟﻲ ﺍﺑﺪﺍ ﺍﻧﺖ ﻣﻦ ﺯﻣﺎﻥ ﺑﺘﻄﻠﻊ .. ﻭﻣﺎﻋﻨﺪﻙ ﺍﻫﺘﻤﺎﻡ .. ﺍﻧﺎ ﺣﺼﻞ ﻃﻠﺒﺖ ﻣﻨﻚ ﺍﻟﻄﻼﻕ ؟؟
ﻗﻠﺖ ﻟﻴﻬﺎ ﻃﻴﺐ .. ﻣﺘﻀﺎﻳﻘﺔ ﻣﻦ ﻗﻌﺪﺓ ﺻﺎﻟﺢ ﻣﻌﺎﻧﺎ ﻓﻲ ﺍﻟﺒﻴﺖ ؟
ﻗﺎﻟﺖ ﻟﻲ ﺍﺑﺪﺍ .. ﺩﻩ ﺻﺎﻟﺢ ﺍﺧﻮﻙ .. ﻭﺍﻧﺎ ﻣﺎ ﻣﻤﻜﻦ ﺍﺗﻀﺎﻳﻖ ﻣﻦ ﺍﺧﻮ ﺯﻭﺟﻲ ..
ﻗﻠﺖ ﻟﻴﻬﺎ ﺣﺼﻞ ﺻﺎﻟﺢ ﺩﻩ ﺳﻤﻌﻚ ﻛﻠﻤﺔ ﻣﺎﻳﺎﻫﺎ ؟؟
ﻗﺎﻟﺖ ﻟﻲ ﺍﺑﺪﺍ ﻣﺎﺣﺼﻞ ..
ﻗﻠﺖ ﻟﻴﻬﺎ ﻋﻨﺪﻙ ﺯﻭﻝ ﻣﻌﻴﻦ ﻓﻲ ﺭﺍﺳﻚ .. ﻋﺎﻳﺰﺓ ﺗﻄﻠﻘﻴﻨﻲ ﻋﺸﺎﻧﻮ؟
ﻗﺎﻟﺖ ﻟﻲ ﺍﺑﺪﺍ ﻣﺎﻋﻨﺪﻱ .. ﺍﻫﺎ ﺗﺎﻧﻲ ﻋﻨﺪﻙ ﺍﺳﺌﻠﺔ ﻭﻻ ﻛﻤﻠﺖ؟
ﻗﻠﺖ ﻟﻴﻬﺎ ﺑﺲ ﻭﺍﻟﻠﻪ ﻣﺎﻋﺎﺭﻑ ﺍﻟﺨﻼﻙ ﻓﺠﺄﺓ ﺗﻔﻜﺮﻱ ﻓﻲ ﺍﻧﻚ ﺗﺨﻠﻴﻨﻲ ﺷﻨﻮ؟
ﻗﺎﻟﺖ ﻟﻲ ﺑﺲ ﻣﺎﻋﺎﻳﺰﺍﻙ .. ﻣﻮﺵ ﺍﻧﺎ ﺍﺗﺰﻭﺟﺘﻚ ﻭﻗﺒﻠﺖ ﺑﻴﻚ ﺑﻲ ﺍﺭﺍﺩﺗﻲ ؟
ﻫﺴﻲ ﺍﻧﺎ ﻣﺎﻋﺎﻳﺰﺍﻙ ﺑﻲ ﺍﺭﺍﺩﺗﻲ .. ﻋﻠﻴﻚ ﺍﻟﻠﻪ ﻧﻮﻡ ﻋﺸﺎﻥ ﺗﻘﻮﻡ ﻟﻲ ﺑﺪﺭﻱ .. ﺗﻮﺩﻳﻨﻲ ﺑﻴﺘﻨﺎ ﺍﻧﺎ ﻟﻮ ﻗﻌﺪﺕ ﻣﻌﺎﻙ ﺍﻛﺘﺮ ﻣﻦ ﻛﺪﺍ .. ﻣﺎﻋﺎﺭﻓﺔ ﺍﻟﺒﺤﺼﻞ ﻟﻲ ﺷﻨﻮ
ﺍﻧﺎ ﻃﺒﻌﺎ ﺯﻫﺠﺖ ﺷﺪﻳﺪ ﻣﻦ ﺍﻟﻘﺼﺔ ﺩﻱ .. ﻗﻠﺖ ﻟﻴﻬﺎ ﻳﺎﺯﻭﻟﺔ ﻋﻠﻰ ﻛﻴﻔﻚ .. ﺍﻧﺎ ﺩﺍﻳﺮ ﺍﺟﺒﺮﻙ ﺗﻌﻴﺸﻲ ﻣﻌﺎﻱ؟؟ .. ﻋﻠﻰ ﻛﻴﻔﻚ .. ﺑﺎﻛﺮ ﺑﻮﺩﻳﻚ ﻣﺎﻋﻨﺪﻙ ﻣﺸﻜﻠﺔ ..
ﺑﺲ ﻃﺒﻌﺎ ﻗﻠﺒﻲ ﻣﻮﺟﻌﻨﻲ ﻭﺟﻊ ﺷﺪﻳﺪ ﺧﻼﺹ .. ﻭﺍﻛﺘﺮ ﺣﺎﺟﺔ ﻣﺎﻟﻴﺔ ﺭﺍﺳﻲ ﻣﺎﻋﺎﺭﻑ ﻫﻲ ﻣﺎﻻ ..
ﺑﺎﻛﺮ ﺍﻟﺼﺒﺎﺡ ﻟﺒﺴﻨﺎ .. ﺍﻧﺎ ﻭﺻﺎﻟﺢ .. ﻭﻟﻤﻦ ﺧﻼﺹ ﺟﻬﺰﻧﺎ ﻫﻲ ﻛﺎﻧﺖ ﺧﻼﺹ ﻻﺑﺴﺔ ﺗﻮﺑﻬﺎ ﺍﻟﻜﺤﻠﻲ ﻭﺭﺍﺑﻄﺔ ﺭﺍﺳﻬﺎ ﺑﻲ ﻃﺮﺣﺔ ﺑﻨﻔﺴﺠﻴﺔ .. ﻭﻻﺑﺴﻪ ﺷﺒﺸﺐ .. ﻭﺍﻟﺸﺒﺸﺐ ﺑﻨﻔﺴﺠﻲ ﺑﺮﺿﻮ ..
ﺍﻧﺎ ﺷﻠﺘﺎ ﺍﻟﺸﻨﻄﺔ .. ﻭﻛﻠﻤﺖ ﺻﺎﻟﺢ ﻗﻠﺖ ﻟﻴﻬﻮ ﻧﺎﺩﻳﺔ ﻣﺎﺷﺔ ﺗﺎﺧﺪ ﻟﻴﻬﺎ ﻛﻢ ﻳﻮﻡ ﻣﻊ ﺍﻫﻠﻬﺎ .. ﺍﻧﺎ ﻭﺍﻧﺖ ﺡ ﻧﻘﻌﺪ ﻋﺰﺍﺑﺔ ﻛﻢ ﻳﻮﻡ ﻛﺪﺍ .. ﻗﺎﻝ ﻟﻲ ﻣﺎ ﻓﻲ ﻣﺸﻜﻠﺔ .. ﺍﻧﺎ ﺫﺍﺗﻲ ﺗﺎﻧﻲ ﻣﺎ ﺑﺤﻴﻜﻢ .. ﺍﻻ ﺯﻳﺎﺭﺍﺕ .. ﺧﻼﺹ ﻣﺪﺗﻲ ﻣﻌﺎﻛﻢ ﺍﻧﺘﻬﺖ .. ﻭﻛﺖ ﺍﺩﻭﺭ ﺍﺳﻠﻢ ﻋﻠﻰ ﻧﺎﺩﻳﺔ ﺑﻤﺸﻴﻼ ﻋﻨﺪ ﺍﻫﻠﻬﺎ .. ﻧﺎﺩﻳﺔ ﺳﻜﺘﺖ ﺳﺎﻱ .. ﻣﺎﻗﺎﻟﺖ ﻟﻴﻬﻮ ﺣﺒﺎﺑﻚ ﻭﻻ ﻗﺎﻟﺖ ﻟﻴﻬﻮ ﺗﺸﺮﻑ ﻓﻲ ﺍﻱ ﻟﺤﻈﺔ . ﻭﺩﻩ ﺍﻟﺮﺩ ﺍﻟﻄﺒﻴﻌﻲ ..
ﺍﻧﺎ ﻭﺻﻠﺘﻬﺎ ﺑﻴﺖ ﺍﻫﻠﻬﺎ ﻭﻣﺎ ﺩﺧﻠﺖ ﻣﻌﺎﻫﺎ ﻗﻠﺖ ﻟﻴﻬﺎ ﺑﺠﻲ ﻏﺎﺷﻴﻚ ﺍﺧﺮ ﺍﻟﻴﻮﻡ ﻭﻣﺸﻴﺖ ..
ﻭﻛﺖ ﻭﺻﻠﺖ ﺍﻟﺸﺮﻛﺔ ﻻﻗﺘﻨﻲ ﻣﻴﻤﻮﻧﺔ . ﺍﻟﺒﺖ ﺍﻟﺮﺳﻠﺘﻬﺎ ﺗﺸﻮﻑ ﻟﻲ ﺧﺒﺮ ﻣﻦ ﻧﺎﺱ ﺟﺒﺮﺓ ..
ﻗﻠﺖ ﻟﻴﻬﺎ ﺍﻫﺎ ﻻﻗﻴﺘﻲ ﺍﺧﻮﻙ ﻭﺳﺄﻟﺘﻴﻬﻮ ؟؟ ﻭﻻﻻ ؟؟ .. ﻗﺎﻟﺖ ﻟﻲ ﺍﻳﻮﻩ ﺟﺎﻧﺎ ﺍﻣﺒﺎﺭﺡ ﻭﺳﺄﻟﺘﻮ؟
ﻗﻠﺘﺎ ﻟﻴﻬﺎ ﺍﻫﺎ ﺍﺧﻮﻙ ﻗﺎﻝ ﻟﻴﻚ ﺷﻨﻮ ؟؟ ........................
ﺍﻟﻰ ﺍﻟﻠــــــﻘﺎﺀ