ﺍﻟﺼﺒﺎﺡ ﻭﻛﺎﻟﻌﺎﺩﺓ ﺍﻟﺘﺎﺝ ﻗﺎﻡ ﺑﺪﺭﻱ ﻭﻋﺒﺎﺱ ﻟﺴﺔ ﻧﺎﻳﻢ ﺟﺎﺀ ﺻﺤﺎﻫﻮ ﻗﺎﻝ ﻟﻴﻬﻮ ﻳﻠﻼ
_ ﻳﻠﻼ ﻭﻳﻦ ؟
_ ﻣﺎ ﻣﺎﺷﻲ ﺍﻟﺸﻐﻞ ﻭﻟﻼ ﺷﻨﻮ ؟
_ ﺍﻧﺎ ﻣﺎ ﺷﻐﺎﻝ ﻳﺎﺥ ﻭﻟﻲ ﻛﻢ ﻳﻮﻡ ﻣﺎ ﻧﻤﺖ ﻛﻮﻳﺲ ﻭﺍﻟﻠﻴﻠﺔ ﺩﺍﻳﺮ ﺍﻧﻮﻡ ﺑﺲ ﻟﻤﻦ ﺍﺷﺒﻊ ﻧﻮﻡ ﻭﺑﻌﺪﻳﻦ ﺑﺠﻲ ﻋﻠﻴﻜﻢ ﺍﻛﺎﻥ ﺻﺤﻴﺖ
_ ﻣﺎ ﺗﺘﻌﻮﺩ ﻋﻠﻲ ﺍﻟﻨﻮﻡ ﺩﺍ ﻗﻮﻡ ﻗﻮﻡ ﺍﺭﺡ ﺍﻟﺴﻮﻕ
_ ﺍﺳﻮﻱ ﻓﻴﻬﻮ ﺷﻨﻮ ﺍﻟﺴﻮﻕ ﻣﻦ ﺍﻟﺼﺒﺎﺡ ﻛﺪﺍ؟
_ ﺧﻼﺱ ﻧﻮﻡ ﻳﺎ ﺯﻭﻝ ﻭﺍﻟﻤﻔﺘﺎﺡ ﺍﻟﻜﺎﻥ ﻋﻨﺪﻙ ﺑﺘﻠﻘﺎﻫﻮ ﺟﻮﺓ ﻓﻲ ﺍﻟﺸﺒﺎﻙ ﻭﺑﻌﺪﻳﻦ ﺟﻴﺒﻮ ﻟﻲ ﻣﻌﺎﻙ
_ ﺍﻧﺖ ﻟﺴﺔ ﻣﺼﺮ ﻋﻠﻰ ﺍﻧﻲ ﻣﺎ ﺍﺳﻜﻦ ﻣﻌﺎﻙ ﻫﻨﺎ ﻟﺸﻨﻮ ؟
_ ﻭﺭﻳﺘﻚ ﺍﻧﺎ ﻳﺎﺥ ﻣﻦ ﻳﻮﻣﺘﺎ
_ ﻣﺎ ﺗﻘﻮﻝ ﻟﻲ ﻋﺸﺎﻥ ﺍﻟﻨﺠﻮﻣﻲ ﺻﺎﺣﺒﻚ
_ ﺁﻱ ﻋﺸﺎﻥ ﺍﻟﻨﺠﻮﻣﻲ ﺻﺎﺣﺒﻲ
_ ﺻﺎﺣﺒﻚ ﺷﻨﻮ ﺁ ﺍﻟﺘﺎﺝ ﻳﺎﺥ ﻫﺴﻲ ﻫﻮ ﺑﺴﺘﻔﻴﺪ ﺷﻨﻮ ﻟﻮ ﺍﻧﺎ ﺳﻜﻨﺖ ﻣﻌﺎﻙ ﻭﻟﻼ ﻣﺎ ﺳﻜﻨﺖ
_ ﻣﺎﻋﺎﺭﻑ ﺍﻟﻤﻬﻢ ﺟﻴﺐ ﻟﻲ ﺍﻟﻤﻔﺘﺎﺡ ﻣﻌﺎﻙ
_ ﺍﻟﺒﻴﺖ ﺩﺍ ﻋﻨﺪﻭ ﻓﻮﻗﻮ ﻧﺺ ؟
_ ﻣﺎ ﻋﻨﺪﻭ ﻓﻴﻬﻮ ﺍﻱ ﺷﻲ ﻭﻻ ﻫﻮ ﻭﻻ ﻏﻴﺮﻭ
_ ﺑﺲ ﺍﻧﺎ ﻋﻨﺪﻱ
_ ﻋﻨﺪﻙ ﻓﻴﻬﻮ ﺷﻨﻮ ﺍﻧﺖ ؟
_ ﻋﻨﺪﻱ ﻓﻴﻬﻮ ﺫﻛﺮﻳﺎﺕ ﺧﻤﺴﺔ ﺷﻬﻮﺭ ﻭﻋﻨﺪﻱ ﻓﻴﻬﻮ ﺍﺧﻮﻱ ﺍﻟﻜﺒﻴﺮ
_ ﻛﻮﻳﺲ ، ﺑﺲ ﺑﺮﺿﻮ ﺟﻴﺐ ﻟﻲ ﺍﻟﻤﻔﺘﺎﺡ ﻣﻌﺎﻙ
_ ﻻ ﻻ ﻭﺍﻟﻠﻪ ﺑﺨﻠﻴﻬﻮ ﻣﻌﺎﻱ ﻋﺸﺎﻥ ﺑﻌﺪﻳﻦ ﺍﻧﺎ ﺯﺍﺗﻲ ﺩﺍﻳﺮ ﺍﻭﺭﻳﻚ ﻣﻮﺿﻮﻉ ﻣﻬﻢ ﻭﺑﺨﺼﻚ ﺷﺪﻳﺪ
_ ﺗﺎﻧﻲ ﻣﻮﺿﻮﻉ ﻳﺎ ﻋﺒﺎﺱ ؟
_ ﻭﺍﻟﻠﻪ ﺩﺍ ﺍﻫﻢ ﻣﻦ ﺍﻻﻣﺲ ﺑﻤﻴﺔ ﻣﺮﺓ ﻭﺑﺘﺸﻜﺮﻧﻲ ﻋﻠﻴﻬﻮ
_ ﻗﻮﻟﻮ ﻫﺴﻲ
_ ﻻ ﻻ ﺩﺍﻳﺮ ﻟﻴﻬﻮ ﻗﻌﺪﺓ ﺑﻤﺰﺍﺝ ﺩﺍ
_ ﻋﺎﺭﻓﻚ ﻣﺎ ﻋﻨﺪﻙ ﻣﻮﺿﻮﻉ ﺑﺲ ﻣﺎ ﻣﺸﻜﻠﺔ ﺍﻗﻌﺪ ﻳﺎ ﺯﻭﻝ ﻭﻣﺎ ﻋﺸﺎﻥ ﻣﻮﺍﺿﻴﻌﻚ ﺍﻟﻔﺎﺿﻴﺔ ﺩﻱ ﻟﻜﻦ ﻋﺸﺎﻥ ﺣﺎﺟﺔ ﻓﻲ ﻧﻔﺴﻲ ﺑﺲ
_ ﺷﻨﻲ ﺍﻟﺤﺎﺟﺔ ﺩﻱ
_ ﺑﺘﻌﺮﻓﻬﺎ ﺑﺮﺍﻙ ﺑﺲ ﻣﺎ ﻫﺴﻲ
ﺍﻟﺘﺎﺝ ﻓﺎﺕ ﻭﻋﺒﺎﺱ ﺩﺧﻞ ﺍﻟﺴﺮﻳﺮ ﺟﻮﺓ ﻋﺸﺎﻥ ﻳﻨﻮﻡ ﺗﺎﻧﻲ ﻟﻜﻦ ﻣﺎ ﻧﺎﻡ ﻭﻣﺒﺴﻮﻁ ﻭﻣﺘﻜﻴﻒ ﻣﻦ ﺍﻟﺘﺎﺝ ﻻﻧﻮ ﻣﺎ ﺭﻓﺾ ﻳﺴﻜﻨﻮ ﻣﻌﺎﻫﻮ ﺯﻱ ﺍﻭﻝ ﻭﻫﻮ ﻋﺎﺭﻓﻮ ﺯﻭﻝ ﻃﻴﺐ ﻣﻌﺎﻫﻮ ﻭﺩﺍﻳﺮ ﻟﻴﻬﻮ ﺍﻟﺨﻴﺮ ﻭﺑﺮﺿﻮ ﺍﺣﺘﻤﺎﻝ ﻋﺸﺎﻥ ﻫﻮ ﺍﺗﻜﻠﻢ ﻣﻌﺎﻫﻮ ﺑﺼﺮﺍﺣﺔ ﺷﺪﻳﺪﺓ ﻭﻭﺭﺍﻫﻮ ﺣﺎﺟﺎﺕ ﻣﺎ ﻛﺎﻥ ﻣﺘﻮﻗﻊ ﻳﻮﺭﻳﻬﻮ ﻟﻴﻬﺎ ﺯﻱ ﻣﻮﺿﻮﻉ ﻧﺎﺱ ﻓﺮﺡ ﺍﻟﻜﻌﺐ ، ﻟﻜﻦ ﺍﻟﺤﺎﺟﺔ ﺍﻟﻔﻲ ﻧﻔﺴﻮ ﺷﻨﻮ ﻋﺒﺎﺱ ﻻ ﻋﺮﻓﻬﺎ ﻭﻻ ﻗﻌﺪ ﻳﻔﻜﺮ ﻓﻴﻬﺎ ، ﻭﺳﺎﺏ ﺍﻟﺘﺎﺝ ﻭﻣﺴﻚ ﻓﻲ ﻓﺮﺡ ﻭﺍﺑﺠﺎﻛﻮﻣﺔ ﻭﻗﺎﻝ ﻣﻌﻘﻮﻝ ﺍﻟﻨﺎﺱ ﺩﻳﻞ ﻳﻜﻮﻧﻮﺍ ﺑﺘﺎﻋﻴﻦ ﻣﺨﺪﺭﺍﺕ ؟ ﺍﻛﺎﻥ ﻛﺪﺍ ﺍﻟﻴﻮﻡ ﺩﺍﻙ ﺍﺑﺠﺎﻛﻮﻣﺔ ﻓﻌﻼ ﺍﺩﻯ ﺭﺑﻴﻊ ﺑﻨﻘﻮ ﻣﺎ ﺍﺩﺍﻫﻮ ﻭﺭﻗﺔ ﺯﻱ ﻣﺎ ﻗﺎﻝ ، ﻭﺍﻛﻴﺪ ﺍﺑﺠﺎﻛﻮﻣﺔ ﻏﺸﺎﻧﻲ ﺑﻤﻮﺿﻮﻉ ﺍﻟﻤﺨﺒﺮ ﺍﻟﺴﺮﻱ ﺩﺍ ﺳﺎﻱ ﻋﺸﺎﻥ ﺍﻭﺻﻞ ﻟﻴﻬﻮ ﺍﻟﺒﻀﺎﻋﺔ ﻃﻴﺐ ﻟﻴﻪ ﻣﺎ ﺧﺎﻕ ﺍﻧﺎ ﺍﻧﻘﺒﺾ ﻭﻳﺴﺎﻟﻮﻧﻲ ﺣﻘﺖ ﻣﻨﻮ ﻭﺍﻭﺭﻳﻬﻢ ؟ ﺍﻟﻤﻮﺿﻮﻉ ﺩﺍ ﻓﻴﻬﻮ ﺣﺎﺟﺔ ﻣﺎ ﻳﺎﻫﺎ ﻭﺍﻟﻤﻔﺮﻭﺽ ﺍﻧﺎ ﺍﻗﻮﻡ ﺍﻣﺸﻲ ﻣﺪﻧﻲ ﻭﺍﻗﻌﺪ ﻟﻲ ﻳﻮﻣﻴﻦ ﺗﻼﺗﺔ ﻓﻲ ﺍﻟﺤﻠﺔ ﻣﻊ ﺍﻫﻠﻲ ﻭﺍﻣﺸﻲ ﺍﻻﻗﻲ ﺍﺑﺠﺎﻛﻮﻣﺔ ﺍﺣﺘﻤﺎﻝ ﺗﺎﻧﻲ ﻳﺪﻳﻨﻲ ﻭﺻﻴﺔ ﻟﻔﺮﺡ ، ﻻ ﻻ ﺍﻧﺘﻈﺮ ﺍﻟﺘﺎﺝ ﻭﺍﺷﻮﻑ ﺭﺍﻳﻮ ﺷﻨﻮ ﻭﺍﺩﺑﺮ ﻟﻲ ﻓﻜﺮﺓ ﺑﻌﺪﻳﻦ ﻣﻌﺎﻫﻮ ﺩﺍ ﻟﻮ ﻛﺎﻥ ﻫﻮ ﺷﻐﺎﻝ ﻣﺨﺪﺭﺍﺕ ﺯﻱ ﻣﺎ ﻗﺎﻝ ﻓﺮﺡ ﻻﻧﻮ ﺍﻛﻴﺪ ﺑﻜﻮﻥ ﺩﺍﻳﺮﻫﺎ ، ﺑﺲ ﻣﺤﺘﺎﺝ ﻗﺮﻭﺵ ﺍﻧﺎ ﺍﺗﺼﺮﻑ ﺑﻴﻬﺎ ﻋﻼ ﺍﻗﻮﻡ ﻭﺍﻣﺸﻲ ﻟﻌﺒﺪ ﺍﻟﻘﻴﻮﻡ ﺍﺷﻴﻠﻬﺎ ﻣﻨﻮ . ﻣﺎ ﻓﻲ ﻏﻴﺮ ﻛﺪﺍ ، ﺍﻧﺎ ﺯﺍﺗﻲ ﺍﻟﻨﺎﻳﻢ ﻟﻴﻬﺎ ﺷﻨﻮ ﺍﻗﻮﻡ ﺍﺗﺨﺎﺭﺝ ﻭﺑﺎﻟﻤﺮﺓ ﺍﻏﺸﻰ ﻧﺎﺱ ﺣﻴﺪﺭ ﺍﺟﻴﺐ ﻣﻼﺑﺴﻲ ﻭﺷﻨﻄﺘﻲ ﻫﻨﺎ ﻣﻨﻬﻢ
ﺣﺴﻦ ﻓﺘﺮﻳﻨﺔ ﻣﺘﻜﻴﻒ ﻣﻦ ﺭﺟﻌﺘﻮ ﻓﺠﺘﻮ ﺍﻟﻘﺪﻳﻤﺔ ﻭﻣﺒﺴﻮﻁ ﻣﻦ ﻋﺒﺪ ﺍﻟﻘﻴﻮﻡ ﺟﺎﻫﻮ ﺑﻌﺪ ﻓﺘﺢ ﻃﻠﻊ ﺍﻟﻔﺘﺮﻳﻨﺔ ﻭﻗﺎﻝ ﻟﻴﻬﻮ ﻋﺒﺎﺱ ﺑﺠﻲ ﻣﺘﻴﻦ ؟
_ ﻣﺎ ﻋﺎﺭﻑ ﻟﻜﻦ ﻟﻮ ﻋﻤﺮ ﻭﺭﺍﻫﻮ ﺑﺠﻲ ﻃﻮﺍﻟﻲ ﻳﺎ ﺍﻟﻠﻴﻠﺔ ﻳﺎ ﺑﻜﺮﺓ
_ ﻋﻤﺮ ﺩﺍ ﺯﻭﻝ ﻛﻮﻳﺲ ﻳﺎﺥ
_ ﺷﺪﻳﺪ ﻭﺍﻟﻠﻪ
_ ﻣﺎﻓﻲ ﺯﻭﻝ ﺍﻟﺰﻣﻦ ﺩﺍ ﺑﻌﻤﻞ ﻛﺪﺍ ﻟﻮ ﻏﻴﺮﻭ ﻳﺎ ﺭﺟﻌﻦ ﻧﺎﻗﺼﺎﺕ ﻭﺑﺎﻟﻘﻄﺎﺭﺓ ﻳﺎ ﺍﻛﻠﻦ ﻛﻠﻬﻦ
_ ﻳﺎﺥ ﺩﺍ ﺑﻌﺪ ﺍﺩﺍﻧﻲ ﻟﻴﻬﻦ ﺩﺍﻳﺮ ﻳﺮﺳﻞ ﻟﻲ ﺗﺎﻧﻲ ﺧﻤﺴﻴﻦ ﺑﺲ ﻛﻮﻳﺲ ﺍﻧﻲ ﻣﺎ ﻣﺤﺘﺎﺝ ﻟﻴﻬﻦ
_ ﺑﺘﺮﺟﻌﻦ ﻳﻌﻨﻲ ؟
_ ﺁﻱ ، ﺍﺷﻴﻠﻦ ﻟﺸﻨﻮ ؟ ﻭﺍﻟﺒﺮﻛﺔ ﺍﻟﻔﺘﺤﻨﺎ ﺍﻟﺪﻛﺎﻥ ﺩﺍ
_ ﻋﺒﺎﺱ ﺑﺘﻜﻴﻒ ﻟﻮ ﻋﺮﻑ
_ ﺍﻟﻠﻪ ﻳﺠﻴﺒﻮ
ﺣﺴﻦ ﻣﺮﻕ ﻣﻦ ﻋﺒﺪ ﺍﻟﻘﻴﻮﻡ ﻭﻋﻴﻨﻮ ﻟﻌﺒﺎﺱ ﻣﺎﺷﻲ ﻋﻠﻴﻬﻢ ﻳﺘﻜﺸﻢ ﺳﺎﻱ ، ﺭﺟﻊ ﻗﺎﻝ ﻟﻴﻬﻮ ﺟﺎﺀ
_ ﻣﺎ ﺗﻘﻮﻝ ﻟﻲ ﻋﺒﺎﺱ
_ ﻓﻲ ﻏﻴﺮﻭ ؟
ﻭﻋﺒﺎﺱ ﺟﺎﻫﻢ ﺩﺍﺧﻞ ﻓﻲ ﺍﻻﻭﻝ ﻭﻗﻒ ﺩﺍﻳﺮ ﻳﻨﺎﺩﻱ ﻋﺒﺪ ﺍﻟﻘﻴﻮﻡ ﻗﺎﻳﻞ ﺧﻀﺮ ﻗﺎﻋﺪ ﻟﻜﻦ ﻟﻤﻦ ﺷﺎﻑ ﻓﺘﺮﻳﻨﺔ ﺣﺴﻦ ﻭﺷﺎﻓﻬﻢ ﺍﻻﺗﻨﻴﻦ ﻓﻲ ﺍﻟﺪﻛﺎﻥ ﻭﺧﻀﺮ ﻣﺎﻓﻲ ﺩﺧﻞ ، ﻭﺳﻠﻢ ﻋﻠﻴﻬﻢ ﺳﻼﻡ ﺣﺎﺭ ﻭﻗﺎﻝ ﻟﺤﺴﻦ ﻣﺎﻟﻚ ﺑﻲ ﺟﺎﻱ ﺻﺮﺍﺭ ﻭﺷﻮ ﻭﻳﻦ ﺍﻟﻠﻴﻠﺔ
_ ﺻﺮﺍﺭ ﻭﺷﻮ ﻣﻨﻮ ؟
_ ﺧﻀﺮ ، ﻣﺎ ﻳﺴﻤﻌﻨﻲ ﺑﺲ
_ ﻻ ﻻ ﻣﺎ ﺑﺴﻤﻌﻚ ، ﺍﻟﺪﻛﺎﻥ ﺑﻘﻰ ﺣﻖ ﻋﺒﺪ ﺍﻟﻘﻴﻮﻡ ﺑﺮﺍﻫﻮ ﻭﺩﺍﻙ ﺷﺎﻝ ﻗﺮﻭﺷﻮ ﻭﻓﺎﺕ
ﻋﺒﺎﺱ ﺣﻀﻦ ﻋﺒﺪ ﺍﻟﻘﻴﻮﻡ ﻭﻗﺎﻝ ﻟﻴﻬﻮ ﻭﺍﻟﻠﻪ ﻣﺒﺮﻭﻙ ﻭﺍﺣﺴﻦ ﺣﺎﺟﺔ ﻋﻤﻠﺘﻬﺎ ﻣﻦ ﺯﻣﺎﻥ ﻣﻔﺮﻭﺽ ﺗﻌﻤﻞ ﻛﺪﺍ
ﻋﺒﺪ ﺍﻟﻘﻴﻮﻡ ﻭﺣﺴﻦ ﺍﻱ ﻭﺍﺣﺪ ﻳﻌﺎﻳﻦ ﻓﻲ ﺍﻟﺘﺎﻧﻲ ﻭﻋﺮﻓﻮﻫﻮ ﻣﺎ ﻋﺎﺭﻑ ﻗﺎﻡ ﻋﺒﺪ ﺍﻟﻘﻴﻮﻡ ﻗﺎﻝ ﻟﻴﻬﻮ ﺍﻧﺖ ﺟﺎﻱ ﻣﻦ ﺍﻟﺤﻠﺔ ﻭﻟﻼ ﻣﻦ ﻭﻳﻦ ؟
_ ﺍﻧﺎ ﻣﻦ ﺍﻣﺲ ﺍﻟﺼﺒﺎﺡ ﻫﻨﺎ
_ ﻭﺩ ﺍﻟﻀﻮ ﻻﻗﺎﻙ ؟
_ ﻭﻫﻮ ﺟﺎﺀ ﻫﻨﺎ ، ﻣﺎ ﻻﻗﺎﻧﻲ ﻓﻲ ﺷﻨﻮ ﻓﻲ ﺍﻟﺤﻠﺔ ؟
_ ﻣﺎﻓﻲ ﺷﻲ ﻓﻲ ﺍﻟﺤﻠﺔ ﺑﺲ ﻫﻮ ﺍﻭﻝ ﺍﻣﺲ ﺟﺎﺀ ﻫﻨﺎ ﻭﺑﻴﺖ ﻣﻌﺎﻧﺎ ﻭﻓﺎﺕ ﺍﻣﺲ ﺍﻟﺼﺒﺎﺡ
_ ﺍﻭﻝ ﺍﻣﺲ ﺍﻧﺎ ﻛﻨﺖ ﻣﻌﺎﻫﻮ ﻓﻲ ﻣﺪﻧﻲ ﻣﺎ ﻗﺎﻝ ﻟﻲ ﺟﺎﻱ ﺍﻟﺨﺮﻃﻮﻡ ، ﻳﺎﺧﻲ ﻓﻲ ﺷﻨﻮ ﻳﺎ ﻧﺎﺱ
_ ﻻ ﻻ ﻣﺎﻓﻲ ﺷﻲ
_ ﻭﺍﻟﻠﻪ ﻓﻲ ، ﻓﻲ ﺯﻭﻝ ﻣﺎﺕ ﺁ ﻋﺒﺪﺍﻟﻘﻴﻮﻡ ﻣﻮﺵ ؟
_ ﻻ ﻻ ﻳﺎﺥ ﻣﻮﺕ ﺷﻨﻮ ؟
_ ﻃﻴﺐ ﺍﻟﺠﺎﺏ ﻭﺩ ﺍﻟﻀﻮ ﺷﻨﻮ ؟
_ ﺟﺎﺀ ﺳﺎﻱ ﻣﺎ ﻓﻲ ﺷﻲ
_ ﻣﺎ ﻣﺸﻜﻠﺔ ﺍﻧﺎ ﺯﺍﺗﻲ ﻣﺎﺷﻲ ﺍﻟﺤﻠﺔ ﻭﺟﻴﺘﻚ ﺩﺍﻳﺮ ﻟﻲ ﻗﺮﻭﺵ ﺍﻣﺸﻲ ﺑﻴﻬﺎ ﻭﺍﺟﻲ
ﻋﺒﺪ ﺍﻟﻘﻴﻮﻡ ﻗﻌﺪ ﻳﻀﺤﻚ ﻭﻗﺎﻝ ﻟﻴﻬﻮ ﺟﻴﺐ ﺍﻟﻜﺮﺳﻲ ﺩﺍ ﻭﺍﻗﻌﺪ ﺍﻛﺎﻥ ﻛﺪﺍ ﺍﻧﻔﻬﻤﻚ ﺍﻟﻤﻮﺿﻮﻉ
ﻋﺒﺎﺱ ﻗﻌﺪ ﻭﻋﺒﺪ ﺍﻟﻘﻴﻮﻡ ﺣﻜﻰ ﻟﻴﻬﻮ ﺍﻟﺤﺼﻞ ﻛﻠﻮ ﻭﻛﻼﻡ ﻭﺩ ﺍﻟﻀﻮ ﺍﻟﻘﺎﻟﻮ ﭼﺖ ﻣﺎ ﻧﻘﺺ ﻣﻨﻮ ﺣﺮﻑ ﻭﻗﺎﻝ ﻟﻴﻬﻮ ﺍﺩﻳﺖ ﺧﻀﺮ ﺣﻘﻮ ﻭﺍﺷﺘﺮﻳﺖ ﻟﻲ ﺷﻮﻳﺔ ﺑﻀﺎﻋﺔ ﻭﻳﺎﻗﻲ ﻟﻴﻚ ﻋﺸﺮﻳﻦ ﻭﺍﻟﺪﻛﺎﻥ ﻧﺼﻮ ﺣﻘﻚ ﻭﺩﻱ ﺍﻟﻌﺸﺮﻳﻦ ﻭﻧﺤﻦ ﻟﻤﻦ ﺿﺮﺑﻨﺎ ﺍﻟﺤﺴﺎﺑﺎﺕ ﻛﻠﻬﺎ ﺍﻣﺲ ﻣﻊ ﺧﻀﺮ ﻭﻧﻘﺼﻨﺎ ﺍﻟﺒﻀﺎﻋﺔ ﺍﻟﻠﻘﻴﻨﺎﻫﺎ ﻓﻲ ﺍﻟﺪﻛﺎﻥ ﻃﻠﻊ ﺣﻘﻮ ﺧﻤﺴﺔ ﻭﺳﺒﻌﻴﻦ ﻭﺍﻧﺎ ﻭﺍﻟﺼﺪﻳﻖ ﺍﺧﻮﻱ ﺯﻳﻮ ﻓﺎﺩﻳﺘﻮ ﺣﻘﻮ ﻣﻦ ﻗﺮﻭﺷﻚ
ﻋﺒﺎﺱ ﺿﺤﻚ ﻭﻗﺎﻝ ﻟﻴﻬﻮ ﺗﻤﺎﻡ ﻳﺎ ﺯﻭﻝ ﺍﺣﺴﻦ ﺣﺎﺟﺔ ﻋﻤﻠﺘﻬﺎ ﻭﻣﺎ ﺗﺸﻴﻞ ﻗﺮﻭﺵ ﻭﺩ ﺍﻟﻀﻮ ﺍﻟﺠﺎﻳﺒﻬﺎ ﻣﺎ ﺩﺍﻳﺮﻳﻦ ﻟﻴﻨﺎ ﺩﻳﻮﻥ ﻭﻣﺎ ﻣﺤﺘﺎﺟﻴﻦ ﻟﻴﻬﺎ ﻭﺍﻧﺎ ﺯﺍﺗﻲ ﻣﺎ ﻣﺤﺘﺎﺝ ﻟﻠﻌﺸﺮﻳﻦ ﻛﻠﻬﺎ ، ﺧﻠﻴﻬﺎ ﻣﻌﺎﻙ ﻭﺍﺩﻳﻨﻲ ﺧﻤﺴﺔ ﺍﻟﻒ ﺑﺲ ﻭﺍﻧﺎ ﺑﻤﺸﻲ ﺍﻟﺤﻠﺔ ﻭﺑﺠﻲ ﺑﻌﺪ ﻛﻢ ﻳﻮﻡ ﻭﺍﻧﺎ ﺭﺟﻌﺖ ﺳﻜﻨﺖ ﻣﻊ ﺍﻟﺘﺎﺝ ﻭﺭﺡ ﻣﻌﺎﻱ ﻳﺎ ﺣﺴﻦ ﻟﺤﻴﺪﺭ ﻧﺠﻴﺐ ﺷﻨﻄﺘﻲ ﻭﺍﻧﺖ ﻳﺎ ﻋﺒﺪ ﺍﻟﻘﻴﻮﻡ ﺑﺘﺸﺘﻐﻞ ﺑﺮﺍﻙ ﻛﻢ ﻳﻮﻡ ﻻﻧﻲ ﻻﺯﻡ ﺑﻜﺮﺓ ﺍﻧﺎ ﺍﻣﺸﻲ ﺍﻟﺤﻠﺔ
_ ﻋﻨﺪﻙ ﺷﻨﻮ ﻓﻲ ﺍﻟﺤﻠﺔ ؟
_ ﺭﺍﺟﻞ ﺍﻣﻲ ﻣﺮﻗﺪ ﻓﻲ ﺍﻟﻤﺴﺘﺸﻔﻰ ﻳﺎﺥ ﺑﻤﺶ ﺍﻗﻌﺪ ﻣﻌﺎﻫﻢ ﻛﻢ ﻳﻮﻡ ﻭﻛﻮﻳﺲ ﺍﻧﻲ ﺍﺗﺬﻛﺮﺗﻮ ﺟﺎﻱ ﺍﻟﻌﺸﺮﻳﻦ ﻛﻠﻬﺎ ﺍﺣﺘﻤﺎﻝ ﻳﺤﺘﺎﺟﻮﺍ ﻟﻴﻬﺎ ﻭﺍﻟﻠﻪ ﻛﻨﺖ ﻣﻌﺎﻫﻢ ﻭﻻ ﺟﺒﺖ ﺳﻴﺮﺓ ﺍﻟﻘﺮﻭﺵ ﻻﻧﻲ ﻛﻨﺖ ﻣﻔﻠﺲ ﻭﻛﻀﺒﺖ ﻋﻠﻲ ﺍﻣﻲ ﻗﻠﺖ ﻟﻴﻬﺎ ﻓﺘﺤﺖ ﻟﻲ ﻣﺤﻞ ﻭﺍﻟﻠﻪ ﻓﺮﺣﺖ ﻓﺮﺡ ﻭﻗﻌﺪﺕ ﺗﻜﻠﻢ ﻓﻲ ﺍﻟﻨﺎﺱ ﻭﺍﻟﺤﻤﺪ ﻟﻠﻪ ﺍﻟﻜﻀﺒﺔ ﺑﻘﺖ ﺣﻘﻴﻘﺔ ﺍﻛﺎﻥ ﻋﺎﺭﻑ ﻛﺪﺍ ﺍﻛﺎﻥ ﻗﻠﺖ ﻟﻴﻬﺎ ﺍﺷﺘﺮﻳﺖ ﻟﻲ ﺑﻴﺖ
ﻭﻛﻠﻬﻢ ﺿﺤﻜﻮﺍ ﻭﻓﻄﺮﻭﺍ ﺳﻮﺍ ﻭﻋﺒﺎﺱ ﻣﺸﻰ ﺟﺎﺏ ﺷﻨﻄﺘﻮ ﻭﺍﻋﺘﺬﺭ ﻟﻨﺎﺱ ﺣﻴﺪﺭ ﻭﻣﺸﻰ ﻭﺩﺍﻫﺎ ﺑﻴﺖ ﺍﻟﺘﺎﺝ ﻭﻣﺮﻕ ﻓﺎﺕ ﻟﺒﺤﺮﻱ ﻭﺍﻟﻤﺮﺓ ﺩﻱ ﻣﺸﻰ ﻟﻔﺮﺡ ﻓﻲ ﺍﻟﻤﺮﻛﺰ ﺣﻖ ﺍﻟﺸﺮﻃﺔ ﻣﺎ ﻟﻘﺎﻫﻮ ﻭﻓﺎﺕ ﺍﻟﺒﻴﺖ ﺑﺮﺿﻮ ﻣﺎ ﻟﻘﺎﻫﻮ ﻭﻗﻌﺪ ﺍﻧﺘﻈﺮﻭ ﻟﻤﻦ ﺟﺎﺀ
ﻭﺭﺍﻫﻮ ﺍﻧﻮ ﺑﻴﺖ ﻣﻊ ﺍﻟﺘﺎﺝ ﻭﻭﺭﺍﻫﻮ ﻣﻔﺘﺎﺡ ﺍﻟﺒﻴﺖ ﻭﻣﺸﻮﺍ ﺍﺗﻐﺪﻭﺍ ﺳﻮﺍ ﻭﻓﺮﺡ ﻧﻬﺎﺋﻲ ﺍﺑﻰ ﻳﺨﻠﻲ ﻋﺒﺎﺱ ﻳﻔﻮﺕ ﻭﺣﻠﻒ ﻋﻠﻴﻬﻮ ﺍﻻ ﻳﺒﻴﺖ ﻣﻌﺎﻫﻮ ﻓﻲ ﺑﺤﺮﻱ
ﺟﻮﺍ ﺍﻟﺒﻴﺖ ﺍﺗﻮﻧﺴﻮﺍ ﻭﺍﻟﻤﻐﺮﺏ ﻓﺮﺡ ﺟﺎﺏ ﻟﻌﺒﺎﺱ ﻋﺮﺍﻗﻲ ﻭﺳﺮﻭﺍﻝ ﻗﺎﻝ ﻟﻴﻬﻮ ﻣﺎ ﺗﻨﻮﻡ ﺑﺎﻟﺒﻨﻄﻠﻮﻥ ﻋﺒﺎﺱ ﺧﺘﺎﻫﻦ ﺟﻤﺒﻮ ﻟﻜﻦ ﻓﺮﺡ ﻗﺎﻝ ﻟﻴﻬﻮ ﻗﻮﻡ ﺃﻟﺒﺴﻦ
_ ﺑﺲ ﺍﻧﺎ ﻣﺎ ﺩﺍﻳﺮ ﺍﻧﻮﻡ ﻫﺴﻲ
_ ﻳﺎﺧﻲ ﻣﺘﺸﻨﻂ ﺑﺒﻨﻄﻠﻮﻧﻚ ﻭﻗﻤﻴﺼﻚ ﻟﺸﻨﻮ ﻗﻮﻡ ﺃﻟﺒﺴﻦ
_ ﻧﺤﻦ ﻣﺎﺭﻗﻴﻦ ﻧﺘﻌﺸﻰ ﻣﺎ ﺑﻤﺶ ﺑﻴﻬﻦ
_ ﻻ ﻻ ﺑﻤﺸﻲ ﺑﺮﺍﻱ ﻋﺸﺎﻥ ﺩﺍﻳﺮ ﺍﻻﻗﻲ ﻟﻲ ﺯﻭﻝ ﻭﺑﺠﻴﺐ ﺍﻟﻌﺸﺎﺀ ﻣﻌﺎﻱ
_ ﺧﻼﺱ ﺑﻐﻴﺮ ﺑﻌﺪﻳﻦ ﺍﻧﺎ ﻛﺪﺍ ﻣﺮﺗﺎﺡ
_ ﻭﺍﻟﻠﻪ ﺗﻐﻴﺮ ﻫﺴﻲ ﺩﻱ
ﻋﺒﺎﺱ ﻣﺸﻰ ﻏﻴﺮ ﻭﺟﺎﺀ ﻗﻌﺪ ﻳﺘﻮﻧﺲ ﻭﻓﺮﺡ ﻗﺎﻝ ﻟﻴﻬﻮ ﻗﻮﻡ ﺳﻮﻱ ﻟﻴﻨﺎ ﺷﺎﻱ ﻣﺴﺎﻓﺔ ﺍﺩﺧﻞ ﺍﻏﻴﺮ ﻫﺪﻭﻣﻲ ﺩﻳﻞ
ﻋﺒﺎﺱ ﺩﺧﻞ ﺳﻮﺍ ﺍﻟﺸﺎﻱ ﻭﻓﺮﺡ ﻭﻻ ﻏﻴﺮ ﻫﺪﻭﻣﻮ ﺟﺎﺀ ﻣﺎﺭﻕ ﻭﻗﺎﻝ ﻟﻌﺒﺎﺱ ﺍﻧﺎ ﻣﺎﺷﻲ ﻭﻛﺎﻥ ﻣﺴﺘﻌﺠﻞ ﺷﺪﻳﺪ
_ ﺍﻟﺸﺎﻱ
_ ﺑﻤﺸﻲ ﻭﺑﺠﻲ ﺍﺗﺬﻛﺮﺕ ﻟﻲ ﺣﺎﺟﺔ ﻣﻬﻤﺔ ﻓﻲ ﺍﻟﻤﺮﻛﺰ ﻭﻓﻲ ﻭﺭﻕ ﻣﻔﺮﻭﺽ ﺍﺟﻴﺒﻮ ﻣﻌﺎﻱ ﺍﻟﺒﻴﺖ ﻧﺴﻴﺘﻮ ﻫﻨﺎﻙ ﺩﻗﺎﻳﻖ ﻭﺑﺠﻲ
_ ﺗﻤﺎﻡ ﻳﺎ ﺯﻭﻝ
ﻋﺒﺎﺱ ﺳﺎﺏ ﺍﻟﺸﺎﻱ ﻭﺟﺎﺀ ﺍﻧﺒﻄﺢ ﻗﺎﻝ ﻓﺮﺡ ﺩﺍ ﺍﻟﻠﻴﻠﺔ ﻣﺎﻟﻮ ؟ ﺍﻳﺎﻡ ﻗﻌﺪﺕ ﻣﻌﺎﻫﻮ ﺍﻟﻤﺮﺓ ﺍﻟﻔﺎﺗﺖ ﺑﺘﺬﻛﺮ ﻗﺎﻝ ﻟﻲ ﻣﺎ ﺑﺮﻳﺪ ﺍﺗﻌﺸﻰ ﻓﻲ ﺍﻟﺒﻴﺖ ﻻﻧﻮ ﻣﻦ ﺗﻤﺸﻰ ﻭﻛﻨﺎ ﺑﻨﻤﺶ ﺍﺑﻌﺪ ﻣﻄﻌﻢ ﺍﻟﺠﺪ ﻋﻠﻴﻬﻮ ﺷﻨﻮ ﻭﺍﻟﻮﺭﻕ ﺷﻨﻮ ﺍﻟﻤﻔﺮﻭﺽ ﻳﺠﻴﺒﻮ ﺍﻟﺒﻴﺖ ﺩﺍ
ﺑﻌﺪ ﻣﺴﺎﺍﺍﺍﻓﺔ ﻭﻗﺮﻳﺐ ﻧﺺ ﺳﺎﻋﺔ ﻓﺮﺡ ﺟﺎﺀ ﺩﺍﺧﻞ ﻭﻣﺎ ﺷﺎﻳﻞ ﻭﺭﻕ ﻭﻋﺒﺎﺱ ﻓﻜﺮ ﻟﻴﻬﻮ ﻭﻟﻤﻦ ﺍﻧﺘﺒﻪ ﻟﻌﺒﺎﺱ ﻗﺎﻝ ﻟﻴﻬﻮ ﻟﻘﻴﺘﻮ ﺷﺎﻟﻮ ﻓﻴﺼﻞ
_ ﻓﻴﺼﻞ ﻓﻴﺼﻞ ﻓﻴﺼﻞ ﺍﻻﺳﻢ ﺩﺍ ﻣﺎ ﻏﺮﻳﺐ ﻋﻠﻲ
_ ﻣﺎ ﻓﻴﺼﻞ ﻭﻙ ﻭﻙ ﻗﺼﺪﻙ ﻭﻙ ﻭﻙ ﺻﺎﺡ ؟
_ ﺁﻱ ﻭﺍﻟﻠﻪ
_ ﻻ ﻻ ﺩﺍ ﻓﻴﺼﻞ ﺗﺎﻧﻲ ﺍﻟﻤﻬﻢ ﻟﻘﻴﺘﻮ ﺷﺎﻝ ﺍﻟﻮﺭﻕ ﻫﻮ
_ ﻳﺎ ﺯﻭﻝ ﺗﻤﺎﻡ
_ ﻗﻮﻡ ﻭﺭﺡ ﻧﺘﻌﺸﻰ ﻭﻧﺠﻲ
_ ﻣﺎ ﻗﻠﺖ ﺑﺘﺠﻴﺒﻮ ﻫﻨﺎ
_ ﻻ ﻻ ﻳﺎﺥ ﻫﻨﺎ ﺷﻨﻮ ﻣﻦ ﺗﻌﺸﻰ ﺗﻤﺸﻰ ﻭﻭﺭﺡ ﺑﻬﺪﻭﻣﻚ ﺩﻳﻞ ﺳﺎﻱ
_ ﻳﺎﺧﻲ ﺩﻳﻞ ﺍﻛﺒﺮ ﻣﻨﻲ ﻭﺍﻧﺎ ﻋﺎﻳﻢ ﻓﻴﻬﻦ ﻋﻮﻡ ﺍﻧﺨﺶ ﺍﻏﻴﺮ
_ ﺩﻗﻴﻘﺔ ﺍﻧﺨﺶ ﺍﻏﻴﺮ ﺍﻧﺎ ﺍﻭﻝ ﻗﺒﻴﻞ ﻭﻻ ﻏﻴﺮﺕ
_ ﺩﻗﻴﻘﺔ ﻟﺸﻨﻮ ﻣﻌﺎﻧﺎ ﺣﺮﻳﻢ ﻫﻨﺎ
_ ﺁﻱ ﻭﺍﻟﻠﻪ ﺻﺎﺡ
ﻓﺮﺡ ﺩﺧﻞ ﻗﺒﺎﻝ ﻋﺒﺎﺱ ﻭﺟﺎﺀ ﻣﺎﺭﻕ ﻗﺎﻝ ﻟﻴﻬﻮ ﻳﺎﺥ ﺍﻧﺎ ﺯﺍﺗﻲ ﻣﺎ ﺩﺍﻳﺮ ﺍﻏﻴﺮ ﺍﻣﺶ ﻏﻴﺮ ﺑﺮﺍﻙ
ﺑﺮﺿﻮ ﻋﺒﺎﺱ ﺷﺎﻋﺮ ﺑﻔﺮﺡ ﺩﺍ ﻣﺎ ﻳﺎﻫﻮ ﻟﻜﻦ ﻣﺎ ﺳﺄﻟﻮ ﻭﺩﺧﻞ ﻏﻴﺮ ﻫﺪﻭﻣﻮ ﻭﻓﺎﺗﻮﺍ ﺍﺗﻌﺸﻮﺍ ﻭﺟﻮﺍ ﻣﺘﺄﺧﺮﻳﻦ ﻭﻃﻮﺍﻟﻲ ﺭﻗﺪﻭﺍ ﻧﺎﻣﻮﺍ
ﻳﺪﺑﻊ ﻳﺎﺥ
ﻧﺨﻠﻴﻬﻢ ﻧﺎﻳﻤﻴﻦ ﻭﺑﺎﻛﺮ ﺑﻌﺪ ﻳﺼﺤﻮﺍ ﻧﻜﻤﻞ ﺍﻥ ﺷﺎﺀ ﺍﻟﻠﻪ ﺍﻛﺎﻥ ﺑﻘﻴﻨﺎ ﺷﺪﺍﺩ