ﻗﺒﻞ ﺻﻼﺓ ﺍﻟﻌﺸﺎﺀ ﺑﺸﻮﻳﺔ ﻋﺒﺎﺱ ﺟﺎﺀ ﻟﻠﺘﺎﺝ ﻭﻟﻘﺎﻫﻮ ﻛﺎﻟﻌﺎﺩﺓ ﺍﻟﺴﺮﻳﺮ ﻓﻲ ﻧﺺ ﺍﻟﺤﻮﺵ ﻭﺍﻟﻜﻔﺘﻴﺮﺓ ﻭﺍﻟﻜﺒﺎﻳﺔ ﺟﻤﺒﻮ ﻭﺍﻟﺘﺎﺝ ﻣﺎ ﻣﻬﻠﻮ ﻟﻤﻦ ﻳﻘﻌﺪ ﻗﺎﻝ ﻟﻴﻬﻮ ﺍﻫﺎ
_ ﺍﻫﺎ ﺷﻨﻮ ؟
_ ﺩﺍﻳﺮ ﺷﻨﻮ ؟
_ ﺩﺍﻳﺮ ﺍﺧﻮﻱ ﺍﻟﻜﺒﻴﺮ
_ ﻋﺒﺎﺱ ﺍﻧﺎ ﻣﺎ ﺍﺧﻮﻙ ﻭﺍﻧﺎ ﻗﺒﻞ ﻛﺪﺍ ﻭﺭﻳﺘﻚ ﻛﻼﻡ ﻣﺎﻓﻲ ﺩﺍﻋﻲ ﺍﻋﻴﺪﻭ ﻟﻴﻚ
_ ﻛﻼﻡ ﺷﻨﻮ ﺩﺍ
_ ﻳﺎ ﺍﺧﻮﻱ ﻭﺍﻟﻠﻪ ﺍﻧﺎ ﻣﺎ ﻓﺎﺿﻲ ﻟﻴﻚ
_ ﻳﺎ ﺍﺧﻮﻱ ؟ ﺍﻫﺎ ﺑﺮﺍﻙ ﺍﻟﺤﻤﺪ ﻟﻠﻪ ﺍﻟﻘﻠﺘﻬﺎ
_ ﺍﻟﻤﻮﺿﻮﻉ ﺷﻨﻮ ﺍﻟﺒﻬﻤﻨﻲ ؟
_ ﻣﻤﻜﻦ ﺍﺗﻜﻠﻢ ﻭﻣﺎ ﺗﻘﺎﻃﻌﻨﻲ
_ ﺩﺍﻳﺮ ﺗﻘﻮﻝ ﺷﻨﻮ
_ ﺩﺍﻳﺮ ﺍﻗﻮﻝ ﻛﻼﻡ ﻛﺘﻴﺮ ﻭﺩﺍﻳﺮﻙ ﺗﺴﻤﻌﻨﻲ ﺑﺲ ﻣﺎ ﺍﻛﺘﺮ
_ ﻃﻴﺐ ﻗﻮﻝ
_ ﺍﻭﻝ ﺣﺎﺟﺔ ﻳﺎ ﺍﻟﺘﺎﺝ ﺍﻧﺖ ﺟﻴﺖ ﻫﻨﺎ ﻟﺸﻨﻮ ؟
_ ﺟﻴﺖ ﻫﻨﺎ ﻛﻴﻒ ﻟﺸﻨﻮ ؟ ﺩﺍ ﺑﻴﺘﻲ
_ ﻣﺎ ﻗﺼﺪﻱ ﺍﻟﺒﻴﺖ ، ﻗﺼﺪﻱ ﻗﺒﺎﻝ ﺍﻟﺒﻴﺖ ﺩﺍ ﺟﻴﺖ ﻟﺸﻨﻮ ﺍﻟﺴﻮﻕ ﺍﻟﺸﻌﺒﻲ ؟
_ ﻫﺴﻲ ﺩﺍ ﺷﻨﻮ ﺩﺍ ؟
_ ﺟﺎﻭﺑﻨﻲ ﺑﺲ
_ ﺍﺟﺎﻭﺑﻚ ﺍﻗﻮﻝ ﻟﻴﻚ ﺷﻨﻮ ﻳﻌﻨﻲ؟ ﺍﻫﺎ ﺟﻴﺖ ﻋﺸﺎﻥ ﺍﺷﻮﻓﻚ ﺍﻧﺖ ، ﻋﺒﺎﺱ ﺍﻧﺖ ﺩﺍﻳﺮﻧﻲ ﺍﺳﻜﻨﻚ ﻫﻨﺎ ﺗﺎﻧﻲ ﺻﺎﺡ ؟
_ ﺻﺎﺡ ﻭﻏﻴﺮ ﺩﺍ ﻓﻲ ﻛﻼﻡ ﺩﺍﻳﺮﻙ ﺗﻌﺮﻓﻮ
_ ﻗﻮﻝ
_ ﺑﺲ ﻣﻌﻠﻴﺶ ﺍﺳﺘﺤﻤﻠﻨﻲ ﻋﺸﺎﻥ ﻛﻼﻡ ﻛﺘﻴﺮ
_ ﻃﻴﺐ ﻗﻮﻟﻮ
_ ﻭﺍﻟﻠﻪ ﻣﺤﺘﺎﺝ ﻟﻴﻚ ﻳﺎﺥ
_ ﺩﺍﻳﺮ ﻗﺮﻭﺵ ؟
_ ﻣﺎ ﺩﺍﻳﺮ ﻗﺮﻭﺵ ﻭﺍﻟﻠﻪ
_ ﺩﺍﻳﺮ ﺗﺴﻜﻦ ﻣﻌﺎﻱ ؟
_ ﺁﻱ ﻟﻜﻦ ﻗﺒﻠﻬﺎ ﺩﺍﻳﺮﻙ ﺗﺴﻤﻌﻨﻲ ﻳﺎﺥ
_ ﻃﻴﺐ ﺳﺆﺍﻝ ، ﺍﻟﺰﻭﻝ ﺍﻛﺎﻥ ﻣﺎ ﺩﺍﻳﺮﻙ ﺗﺴﻜﻦ ﻣﻌﺎﻫﻮ ، ﺑﺘﻔﺮﺽ ﻧﻔﺴﻚ ﻋﻠﻴﻬﻮ ﻭﺗﺴﻜﻦ ﻏﺼﺐ ؟
_ ﻻ ﻭﺍﻟﻠﻪ ، ﻭﺍﻧﺎ ﺳﺎﻛﻦ ﻣﻊ ﺷﺒﺎﺏ ﻭﻗﺮﻳﺐ ﻣﻦ ﺍﻟﺴﻮﻕ ﺑﺲ ﻭﻣﺤﺘﺎﺝ ﻟﻴﻚ ﺗﺴﻤﻌﻨﻲ ﺑﺲ
_ ﺍﻟﺰﻣﻦ ﺩﺍ ﻣﺎﻓﻲ ﺯﻭﻝ ﺑﺴﻤﻊ ﻟﺰﻭﻝ ﻭﻛﻠﻨﺎ ﻣﺤﺘﺎﺟﻴﻦ ﺯﻭﻝ ﻳﺴﻤﻌﻨﺎ ﻭﻣﺎ ﻻﻗﻨﻮ ﺍﻫﺎ ﻗﻮﻝ ﺑﺲ ﻣﺎ ﺗﺴﺄﻟﻨﻲ ﻭﺍﺗﻜﻠﻢ ﺑﺲ ﻟﻤﻦ ﺗﻔﺘﺮ
_ ﺗﻤﺎﻡ ، ﻭﺑﺒﺪﺍ ﻟﻴﻚ ﻣﻦ ﺍﻟﺼﻔﺮ ﻭﻣﻦ ﻛﻠﻤﺘﻚ ﺍﻟﻘﻠﺘﻬﺎ ﺍﻧﺖ ﻳﻮﻡ ﺍﻧﻘﻬﺮﺕ ﻭﺫﻻﻙ ﺍﻟﻔﻠﺲ ﻻﻧﻲ ﺍﻟﻜﻠﻤﺔ ﺩﻱ ﺍﻧﺎ ﺑﺮﺿﻮ ﻗﻠﺘﻬﺎ ﻭﻗﻠﺘﻬﺎ ﻭﺍﻧﺎ ﺭﺍﻛﺐ ﻓﻲ ﺑﺺ ﺍﻟﺤﻠﺔ ﻳﻮﻣﻲ ﺍﻟﺠﻴﺖ ﻫﻨﺎ ﺍﻭﻝ ﻣﺮﺓ ﻭﺍﻧﺎ ﻣﺎ ﻗﻠﺘﻬﺎ ﺫﺍﻟﻴﻨﻲ ﺍﻟﻔﻠﺲ ﻟﻜﻦ ﻗﻠﺘﻬﺎ ﻋﺸﺎﻥ ﺍﻟﺰﻣﻦ ﺩﺍ ﺑﻘﻰ ﺯﻣﻦ ﻗﺮﺵ ﺑﺲ ، ﺍﻟﻜﻠﻤﺔ ﺩﺍﻳﺮ ﺍﺭﺟﻊ ﻭﺍﻧﺎ ﺍﻏﻨﻰ ﺯﻭﻝ ﻭﻋﻨﺪﻱ ﻗﺮﻭﺵ ﻛﺘﻴﺮﺓ ﻭﺍﻟﺰﻣﻦ ﺩﺍﻙ ﻗﻠﺘﻬﺎ ﺳﺎﻱ ﻭﻣﺎ ﻋﺮﻓﺖ ﻗﻴﻤﺔ ﺍﻟﻘﺮﻭﺵ ﺍﻻ ﻗﺮﻳﺐ ، ﻓﻲ ﺣﻠﺘﻨﺎ ﻋﻨﺪﻧﺎ ﻭﺍﺣﺪ ﺍﺳﻤﻮ ﺍﻟﻜﺮﺍﺏ ﻏﻨﻴﺎﻥ ﻭﻣﻼﻥ ﻗﺮﻭﺵ ﺯﻱ ﺧﺎﻟﻚ ﻭﺍﻟﻨﺎﺱ ﻛﻠﻬﺎ ﺑﺘﺤﺘﺮﻣﻮﺍ ﻭﻛﻠﻤﺘﻮ ﻣﺴﻤﻮﻋﺔ ﻋﺸﺎﻥ ﺑﺲ ﻋﻨﺪﻭ ﻗﺮﻭﺵ ، ﺍﻧﺎ ﻣﻦ ﺍﺳﺮﺓ ﺣﺎﻟﺘﻨﺎ ﺍﻟﻤﺎﺩﻳﺔ ﻣﺎ ﻛﻌﺒﺔ ﻭﻣﺎ ﺳﻤﺤﺔ ﻭﻋﺎﻳﺸﻴﻦ ﻣﺴﺘﻮﺭﻳﻦ ﻭﺍﻧﺎ ﻃﻠﻌﺖ ﻣﻦ ﺍﻟﻤﺪﺭﺳﺔ ﻭﻛﻨﺖ ﺻﺎﻳﻊ ﺍﺑﻮﻱ ﻋﻠﻤﻨﻲ ﺍﻟﺴﻜﺮ ﻭﺍﻧﺎ ﺷﺎﻓﻊ ﻭﻣﻦ ﻗﻤﺖ ﻟﻘﻴﺘﻮ ﺑﺴﻜﺮ ﻳﻮﻣﻲ ﻭﺍﺳﻤﻮ ﻋﺒﺪﻭ ﺍﻟﻤﺮﻣﺪ ﻭﻟﻘﻴﺖ ﺍﻣﻲ ﻓﻲ ﻭﺍﺩﻱ ﻭﺍﺑﻮﻱ ﺩﺍ ﻓﻲ ﻭﺍﺩﻱ ﻭﺍﻧﺎ ﺍﻟﻀﺎﻳﻊ ﻓﻲ ﺍﻟﻨﺺ ﻃﻮﺍﻟﻲ ﻭﺍﻧﺎ ﻣﻌﺎﻫﺎ ﻣﻨﻬﺮ ﻭﻣﺮﺍﺕ ﻛﺘﻴﺮ ﻣﺠﻠﻮﺩ ﻭﻣﻦ ﺭﺍﺟﻠﻬﺎ ﻣﺎ ﺑﺮﻳﺪﻧﻲ ﻭﺍﻧﺎ ﺯﺍﺗﻲ ﻣﺎ ﺑﺮﻳﺪﻭ ﻭﻟﻤﻦ ﺍﻣﺸﻲ ﻻﺑﻮﻱ ﺩﻳﻤﺔ ﺑﻨﻬﺮﻧﻲ ﻭﺑﺪﻗﻨﻲ ﻭﻭﻗﻌﺖ ﻓﻲ ﺍﻟﺴﻜﺮ ﻭﻳﻮﻣﻲ ﺑﺸﺮﺏ ﻟﻤﻦ ﺍﺑﻘﻰ ﻃﻴﻨﺔ ﻭﺑﻘﻴﺖ ﺍﻟﻤﺮﻣﺪ ﻭﺩ ﺍﻟﻤﺮﻣﺪ ﻭﻳﻮﻡ ﺍﻧﺎ ﺳﻜﺮﺍﻥ ﺷﺎﻛﻠﺖ ﺍﺑﻮﻱ ﻭﺍﺗﻀﺎﺭﺑﻨﺎ ﻭﻟﻤﻴﻨﺎ ﻓﻮﻗﻨﺎ ﺍﻟﻨﺎﺱ ﻭﻣﺮﺓ ﻓﻜﺮﺕ ﺍﺳﺮﻕ ﻭﺍﻧﻘﺒﻀﺖ ﻓﻲ ﺍﻭﻝ ﺳﺮﻗﺔ ﻭﺍﻟﻘﺒﻀﻨﻲ ﺍﻟﻜﺮﺍﺏ ﺍﻟﻘﻠﺖ ﻟﻴﻚ ﻋﻨﺪﻭ ﻗﺮﻭﺵ ﺩﺍ ، ﺍﻟﻤﻬﻢ ﺍﻟﻨﺎﺱ ﻛﻠﻬﻢ ﺑﻘﻮﺍ ﻳﻜﺮﻫﻮﻧﻲ ﻭﺷﺎﻳﻔﻨﻲ ﻣﺎ ﺯﻭﻝ ﻣﺎ ﺯﻭﻝ ﻭﻗﺮﺭﺕ ﺍﻣﺮﻕ ﻭﺟﻴﺖ ﻫﻨﺎ ﻭﺍﺷﺘﻐﻠﺖ ﻋﺸﺎﻥ ﺍﻋﻤﻞ ﻗﺮﻭﺵ ﻟﻜﻦ ﻭﺍﻟﻠﻪ ﻣﺎ ﻋﺮﻓﺖ ﺍﻟﻘﻴﻤﺔ ﺍﻟﺤﻘﻴﻘﻴﺔ ﻟﻠﻘﺮﻭﺵ ﺍﻻ ﻟﻤﻦ ﺭﺟﻌﺖ ﺍﻟﺤﻠﺔ ﺑﻌﺪ ﺷﻜﻠﺘﻲ ﻣﻊ ﺍﻟﻨﺠﻮﻣﻲ ، ﻃﺒﻌﺎ ﻣﺸﻴﺖ ﻣﻨﻜﻢ ﻭﻣﻌﺎﻱ ﻗﺮﻭﺵ ﻭﻗﺮﻭﺵ ﻣﺎ ﺷﻮﻳﺔ ﻭﻣﺎ ﻛﻨﺖ ﻋﺎﺭﻓﻚ ﺍﻧﺖ ﺧﺘﻴﺖ ﻟﻲ ﻗﺮﻭﺵ ، ﻭﺻﻠﺖ ﺍﻟﺤﻠﺔ ﻭﺍﻟﻨﺎﺱ ﻋﺮﻓﻮﺍ ﺍﻧﻲ ﺟﻴﺖ ﺑﻘﺮﻭﺵ ﻛﺘﻴﺮﺓ ﻭﻫﻨﺎ ﺍﻟﻮﺿﻊ ﺍﺧﺘﻠﻒ ﻭﻧﻈﺮﺓ ﺍﻟﻨﺎﺱ ﻟﻲ ﺍﺗﻐﻴﺮﺕ ﻭﺍﻟﺴﺒﺐ ﺍﻟﻘﺮﻭﺵ ﺑﻘﻮﺍ ﻳﺤﺘﺮﻣﻮﻧﻲ ﻭﻧﺴﻮﺍ ﺍﻟﺴﻜﺮ ﻭﻗﻠﺔ ﺍﻻﺩﺏ ﻭﻧﺴﻮﺍ ﺍﻟﻤﺮﻣﺪ ﻭﺩ ﺍﻟﻤﺮﻣﺪ ﻳﺎﺧﻲ ﺍﻧﺎ ﺯﺍﺗﻲ ﺍﺗﻐﻴﺮﺕ ﻭﺑﻘﻴﺖ ﺃﻟﺒﺲ ﻛﻮﻳﺲ ﻭﺍﻟﺒﺲ ﻧﻀﻴﻒ ﺣﺘﻰ ﻛﻼﻣﻲ ﺯﺍﺗﻮ ﺍﺗﻐﻴﺮ ﻭﻣﺸﻴﺘﻲ ﺍﺗﻐﻴﺮﺕ ﻭﺍﻟﺴﺒﺐ ﺑﺮﺿﻮ ﺍﻟﻘﺮﻭﺵ
ﺍﻟﻤﻴﺔ ﺃﻟﻒ ﺍﻻﺩﻳﺘﻨﻲ ﻟﻴﻬﺎ ﺍﻧﺖ ﺩﻱ ﻋﻠﻤﺘﻨﻲ ﺣﺎﺟﺎﺕ ﻛﺘﻴﺮﺓ ﻣﺎ ﻛﻨﺖ ﻋﺎﺭﻓﻬﺎ ﺍﻭﻝ ﺣﺎﺟﺔ ﻭﺃﻫﻢ ﺣﺎﺟﺔ ﺍﻧﻲ ﻣﺎ ﺍﺛﻖ ﻧﻬﺎﺋﻲ ﻓﻲ ﺯﻭﻝ ﻣﻬﻤﺎ ﻛﻨﺖ ﻋﺎﺭﻓﻮ ﻭﻣﺼﺎﺣﺒﻮ ﻣﺎ ﺃﺛﻖ ﻓﻴﻬﻮ
_ ﺣﺘﻰ ﻟﻮ ﺻﺎﺣﺒﻚ ﺷﺪﻳﺪ ؟
_ ﺣﺘﻰ ﻟﻮ ﻣﺎ ﻋﻨﺪﻙ ﺍﻱ ﺻﺎﺣﺐ ﻏﻴﺮﻭ
_ ﻣﺎ ﻣﻌﺎﻙ ﻓﻲ ﺩﻱ
_ ﺑﻮﺭﻳﻚ ﻟﻴﻪ ﺍﻧﺎ ﻗﻠﺖ ﻛﺪﺍ ﺍﺻﺒﺮ ﻟﻲ ﺍﻭﻻ ﻻﻧﻲ ﺍﻟﻤﻴﺔ ﺍﻟﻒ ﺩﻱ ﺍﺩﻳﺘﻬﺎ ﻟﻮﺍﺣﺪ ﻣﻦ ﺣﻠﺘﻨﺎ ﻭﺍﺩﻳﺘﻬﺎ ﻟﻴﻬﻮ ﺑﺜﻘﺔ ﻋﻤﻴﺎﺀ ﺍﻟﺰﻭﻝ ﺩﺍ ﻛﻮﻳﺲ ﺷﺪﻳﺪ ﻭﻣﺤﺘﺮﻡ ﺧﻼﺱ ﻭﻏﻴﺮ ﻛﺪﺍ ﺻﻼﺗﻮ ﻛﻠﻬﺎ ﻓﻲ ﺍﻟﺠﺎﻣﻊ ﻭﺑﻘﺮﻭﺷﻮ ﻭﺑﺪﻛﺎﻧﻮ ﻭﺑﺎﻧﻲ ﻟﻴﻬﻮ ﺑﻴﺖ ﺳﻤﺢ ﻭﻛﻞ ﺍﻟﻨﺎﺱ ﺑﺤﺘﺮﻣﻮﻫﻮ ﻭﺑﺪﻭﺭ ﻟﻠﻨﺎﺱ ﺍﻟﺨﻴﺮ ﻭﺩﺍ ﺍﻟﺨﻼﻧﻲ ﺍﺛﻖ ﻓﻴﻬﻮ ﻭﺍﺣﻠﻒ ﺍﻧﻮ ﺍﺣﺴﻦ ﺯﻭﻝ ﻭﺩﺍ ﻧﻜﺮ ﺍﻧﻲ ﺍﺩﻳﺘﻮ ﺍﻟﻘﺮﻭﺵ ﻭﺍﻛﻞ ﺣﻘﻲ ﻭﺍﻟﺴﺒﺐ ﺷﻨﻮ ؟ ﻃﺒﻌﺎ ﺍﻟﻘﺮﻭﺵ ، ﺍﻟﻮﺻﻠﺖ ﻟﻴﻬﻮ ﺍﻧﻮ ﺍﻟﻘﺮﻭﺵ ﺍﻫﻢ ﺣﺎﺟﺔ ﻣﺎﻓﻲ ﺷﻲ ﺍﻫﻢ ﻣﻨﻬﺎ ﻭﻫﻲ ﺍﻟﺒﺘﺴﻤﺢ ﺍﻟﻜﻌﺐ ﻭﺍﻟﺒﺘﻜﻌﺐ ﺍﻟﺴﻤﺢ .
_ ﺍﺗﻜﻠﻢ ﻭﻟﻼ ﻟﺴﺔ ﻣﺎ ﺍﻧﺘﻬﻴﺖ ؟
_ ﻣﺎ ﺍﻧﺘﻬﻴﺖ ﻟﻜﻦ ﺍﺗﻜﻠﻢ
_ ﻻ ﻻ ﻭﺍﺻﻞ ﻭﺍﺻﻞ
_ ﺍﺗﻜﻠﻢ ﻳﺎﺥ ﻭﺍﻧﺎ ﺑﻮﺍﺻﻞ ﺑﻌﺪ ﻛﻼﻣﻚ
_ ﺍﻧﺎ ﺩﺍﻳﺮ ﺍﺳﺄﻟﻚ ﺑﺲ ﺳﺆﺍﻝ ﻭﺍﺣﺪ
_ ﻃﻮﺍﻟﻲ
_ ﺍﻧﺎ ﺍﻟﺘﺎﺝ ﺍﻟﻘﺪﺍﻣﻚ ﺩﺍ ﻛﻼﻣﻚ ﺩﺍ ﻛﻠﻮ ﺩﺧﻠﻲ ﺑﻴﻬﻮ ﺷﻨﻮ ﺃﻧﺎ ﻭﻭﻳﻨﻮ ﺍﻟﻤﻮﺿﻮﻉ ﺍﻟﻘﻠﺖ ﺑﺨﺼﻨﻲ ﻭﺑﻬﻤﻨﻲ ؟
_ ﺟﺎﻳﻴﻚ ﻓﻲ ﺍﻟﻜﻼﻡ . ﻭﺑﻮﺭﻳﻚ ﺍﻟﻤﻮﺿﻮﻉ
_ ﺁﻱ ﻻﻧﻮ ﻛﻼﻣﻚ ﺍﻟﻔﺎﺕ ﺩﺍ ﻛﻠﻮ ﺍﻧﺎ ﻣﺎ ﻋﻨﺪﻱ ﺑﻴﻬﻮ ﻋﻼﻗﺔ
_ ﻛﻮﻳﺲ ، ﻭﺑﺨﺶ ﻟﻴﻚ ﻓﻲ ﻣﻮﺿﻮﻋﻚ ، ﺍﻧﺎ ﻟﻲ ﻗﺮﻳﺐ ﺍﺳﺒﻮﻋﻴﻦ ﺯﻭﻝ ﺗﺎﻳﻪ ﻭﻻﻓﻲ ﺳﺎﻱ ﺑﻴﻦ ﺍﻟﺨﺮﻃﻮﻡ ﻭﻣﺪﻧﻲ ، ﻭﻓﻲ ﻣﺪﻧﻲ ﺍﻧﺎ ﺑﻌﺮﻑ ﻟﻲ ﻭﺍﺣﺪ ﺻﺎﻳﻊ ﻭﺿﺎﻳﻊ ﻭﻫﻠﻔﻮﺕ ﺳﺎﻱ ﺍﺳﻤﻮ ﺭﺑﻴﻊ ﻭﻋﻦ ﻃﺮﻳﻘﻮ ﻭﺑﺎﻟﺼﺪﻓﺔ ﺍﺗﻌﺮﻓﺖ ﻋﻠﻲ ﻧﻔﺮﻳﻦ ﺍﻭﻻﺩ ﻋﻢ ﻭﻫﻢ ﻓﺮﺡ ﺍﻟﻜﻌﺐ ﻭﺍﺑﺠﺎﻛﻮﻣﺔ ﻭﺩﻳﻞ ﺍﻻﺗﻨﻴﻦ ﻓﻲ ﺍﻟﻤﺒﺎﺣﺚ ﻭﺗﺎﺑﻌﻴﻦ ﻟﻤﺤﺎﺭﺑﺔ ﺍﻟﻤﺨﺪﺭﺍﺕ ، ﻳﺎﺥ ﻋﻤﺮ ﻭﺩ ﺍﻟﻀﻮ ﺍﻟﻨﻜﺮ ﺍﻟﻤﻴﺔ ﺃﻟﻒ ﺩﺍ ﺩﺭﺳﻨﻲ ﺩﺭﺱ ﺑﻤﻼﻳﻴﻦ ﺍﻟﺪﻭﻻﺭﺍﺕ ﻋﺪﻳﻞ ، ﻓﺮﺡ ﺟﻴﺖ ﻭﻗﻌﺪﺕ ﻣﻌﺎﻫﻮ ﻛﻢ ﻳﻮﻡ ﻭﻟﻘﻴﺖ ﺻﻮﺭﺗﻚ ﻋﻨﺪﻭ ﻣﻊ ﺻﻮﺭ ﻧﺎﺱ ﻛﺘﻴﺮﻳﻦ ﻭﻣﻜﺘﻮﺏ ﻭﺭﺍﻫﺎ ﻓﻮﺭ ﺷﻴﻦ ﻳﻌﻨﻲ ﻧﻤﺮﺓ ﺍﺭﺑﻌﺔ ﻭﺷﻴﻦ ﺍﻟﺴﻮﻕ ﺍﻟﺸﻌﺒﻲ
_ ﺻﻮﺭﺗﻲ ﺍﻧﺎ ؟
_ ﺃﻳﻮﺓ ﺻﻮﺭﺗﻚ ﺍﻧﺖ ﻭﻗﺒﻠﻬﺎ ﻳﻮﻡ ﻻﻗﻴﺘﻮ ﻓﻲ ﻣﺪﻧﻲ ﻋﺮﻓﻚ ﻭﺣﺘﻰ ﻛﻔﺘﻴﺮﺗﻚ ﺩﻱ ﺫﻛﺮﻫﺎ ﻟﻲ ﻭﻭﺭﺍﻧﻲ ﻗﺼﺘﻚ ﻣﻊ ﺧﺎﻟﻚ ﻭﺣﺎﺟﺎﺕ ﻛﺘﻴﺮﺓ ﻋﻨﻚ ﻭﺍﻧﻬﻢ ﻣﺮﺍﻗﺒﻨﻚ ﻛﻤﺎﻥ ﻭﺣﺎﻭﻟﻮ ﻳﺴﻜﻨﻮﺍ ﻣﻌﺎﻙ ﻛﻢ ﻭﺍﺣﺪ ﻣﺎ ﻗﺪﺭﻭﺍ
_ ﺑﺘﺘﻜﻠﻢ ﺟﺪ ؟
_ ﻭﺍﻟﻠﻪ ﺻﺎﺡ ﻭﺍﺻﺒﺮ ﻟﻲ ﺍﻧﻜﻤﻞ ﻟﻴﻚ
ﻃﺒﻌﺎ ﻫﻮ ﺍﻟﻜﻠﻢ ﺍﻟﻀﺎﺑﻂ ﻭﺣﻞ ﻟﻲ ﻣﺸﻜﻠﺔ ﺍﻟﻨﺠﻮﻣﻲ ﺑﺲ ﺍﻟﻤﻮﺿﻮﻉ ﻣﺎ ﻛﺪﺍ ﺑﺲ ﻭﻓﻲ ﺑﺎﻗﻲ ﻟﺴﺔ
_ ﻃﻴﺐ ﻗﻮﻟﻮ
_ ﺁﺧﺮ ﻣﺮﺓ ﺭﺟﻌﺖ ﻣﺪﻧﻲ ﻗﺒﻞ ﺗﻼﺗﺔ ﻳﻮﻡ ﻭﻻﻗﻴﺖ ﻭﺩ ﻋﻤﻮ ﺍﺑﺠﺎﻛﻮﻣﺔ ﻭﻗﺎﻝ ﺑﺸﻐﻠﻨﻲ ﻣﻌﺎﻫﻢ ﻣﺨﺒﺮ ﺳﺮﻱ ﺑﺸﺮﻁ ﺍﻧﺎ ﺍﺳﻜﻦ ﻣﻌﺎﻙ ﻋﺸﺎﻥ ﺍﺭﺍﻗﺒﻚ ﻟﻴﻬﻢ
_ ﺍﻧﺖ ﺟﺎﺩﻱ ؟
_ ﺁﻱ ﻭﺍﻟﻠﻪ ﻭﺍﻧﺎ ﺍﺗﺤﺪﻳﺘﻬﻢ ﻻﻧﻬﻢ ﻗﺎﻟﻮﺍ ﻟﻲ ﺍﻧﺖ ﻣﺎ ﺑﺘﺴﻜﻨﻲ ﻣﻌﺎﻙ ﺗﺎﻧﻲ
_ ﺍﻧﺖ ﻟﻴﻪ ﺑﺘﻮﺭﻳﻨﻲ ﺍﻟﻜﻼﻡ ﺩﺍ ﺑﺼﺮﺍﺣﺔ ﻛﺪﺍ ؟
_ ﻟﺴﺒﺒﻴﻦ ﻭﺍﻟﻠﻪ ﺍﻻﻭﻝ ﺍﻧﻚ ﺍﺧﻮﻱ ﺍﻟﻜﺒﻴﺮ ﻭﺍﺧﻮﻱ ﻻﻧﻚ ﻭﻗﻔﺖ ﻣﻌﺎﻱ ﺳﻜﻨﺘﻨﻲ ﻣﻌﺎﻙ ﻫﻨﺎ ﺧﻤﺴﺔ ﺷﻬﻮﺭ ﻭﺍﺷﺘﺮﻳﺖ ﻟﻲ ﺩﻛﺎﻥ ﻋﺸﺎﻥ ﺗﻨﻔﻌﻨﻲ ﺑﻴﻬﻮ ﻭﻟﻤﻦ ﺣﺼﻠﺖ ﺍﻟﻤﺸﻜﻠﺔ ﻭﺧﻔﺖ ﻋﻠﻲ ﺍﻧﺴﺠﻦ ﻭﻗﻠﺖ ﻟﻲ ﺳﺎﻓﺮ ﺍﻫﻠﻚ ﻭﺍﺩﻳﺖ ﻋﺒﺪ ﺍﻟﻘﻴﻮﻡ ﻋﺸﺮﺓ ﺍﻟﻒ ﻫﻮ ﺯﺍﺗﻮ ﺻﺎﺣﺒﻲ ﺍﻟﻴﻮﻣﻲ ﻣﻌﺎﻫﻮ ﻣﺎ ﺩﻓﻊ ﺯﻳﻚ ﻭﺍﻛﺘﺮ ﻣﻨﻮ ﻭﻣﻦ ﻛﻞ ﺍﺧﻮﺍﻧﻮ ﺍﻟﺸﻐﺎﻝ ﻣﻌﺎﻫﻢ ﻭﺍﻻﺳﺘﻔﺎﺩﻭ ﻛﺘﻴﺮ ﻣﻦ ﺷﻐﻠﻲ ﻭﻏﻴﺮ ﻛﺪﺍ ﺩﺳﻴﺖ ﻟﻲ ﻣﻴﺔ ﺃﻟﻒ ﻓﻲ ﺷﻨﻄﺘﻲ ﻣﻦ ﻏﻴﺮ ﺗﻜﻠﻤﻨﻲ ﺑﻴﻬﺎ ﻭﺩﺍ ﺍﻟﺴﺒﺐ ﺍﻻﻭﻝ
_ ﻭﺍﻟﺴﺒﺐ ﺍﻟﺘﺎﻧﻲ ؟
_ ﺍﻟﺴﺒﺐ ﺍﻟﺘﺎﻧﻲ ﺍﻟﺜﻘﺔ ﺍﻟﻌﻤﻴﺎﺀ ﻭﻋﺸﺎﻥ ﺍﻭﺭﻳﻚ ﺍﻧﻮ ﺍﻟﻮﺍﺣﺪ ﻣﺎ ﻳﺜﻖ ﻓﻲ ﺯﻭﻝ ﺩﻱ ﺻﺎﺡ ، ﻃﺒﻌﺎ ﺩﻳﻞ ﺩﺍﻳﺮﻳﻦ ﻳﺸﻐﻠﻮﻧﻲ ﻣﻌﺎﻫﻢ ﺯﻱ ﻣﺎ ﻗﻠﺖ ﻟﻴﻚ ، ﻭﺍﻧﺎ ﺟﻴﺖ ﻭﻣﻌﺎﻱ ﻭﺻﻴﺔ ﻣﻦ ﺍﺑﺠﺎﻛﻮﻣﺔ ﻟﻔﺮﺡ ﺍﻟﻘﻠﺖ ﻟﻴﻚ ﻣﺎﺷﻲ ﺍﻭﺩﻳﻬﺎ ﻟﻴﻬﻮ ﻗﺒﻴﻞ ، ﺑﺲ ﺍﻟﻮﺻﻴﺔ ﺩﻱ ﺍﻧﺎ ﺷﺎﻛﻲ ﺍﻧﻬﺎ ﻣﺨﺪﺭﺍﺕ
_ ﻣﺨﺪﺭﺍﺕ ؟
_ ﺷﺎﻛﻲ ﺑﺲ ﻻﻧﻲ ﻓﺘﺤﺖ ﺍﻟﻮﺻﻴﺔ ﻭﺍﻧﺎ ﻓﻲ ﺑﻴﺖ ﻓﺮﺡ ﻭﺷﻔﺘﻬﺎ ﻭﻟﻘﻴﺘﻬﺎ ﺣﺒﻮﺏ ﻛﺘﻴﺮﺓ
_ ﺑﺘﺘﻜﻠﻢ ﺟﺪ ؟
_ ﺁﻱ ﻭﺍﻟﻠﻪ ﻣﺎ ﻗﻠﺖ ﻟﻴﻚ ﻭﺩ ﺍﻟﻀﻮ ﺍﺩﺍﻧﻲ ﺩﺭﺱ ﺑﻤﻼﻳﻴﻦ ﺍﻟﺪﻭﻻﺭﺍﺕ ؟
_ ﺍﻧﺖ ﻋﺎﺭﻑ ﻟﻮ ﻛﺎﻧﺖ ﻣﺨﺪﺭﺍﺕ ﻭﺍﻧﻘﺒﻀﺖ ﺑﻴﻬﺎ ﺗﺎﻧﻲ ﻣﻦ ﺍﻟﺴﺠﻦ ﻧﻬﺎﺋﻲ ﻣﺎ ﺑﺘﻤﺮﻕ ؟
_ ﺍﻧﺎ ﺍﺗﺨﻴﻞ ﻟﻲ ﺍﻟﻨﺎﺱ ﺩﻳﻞ ﻣﺎ ﻓﻲ ﺍﻟﻤﺒﺎﺣﺚ ﻭﻻ ﺷﻲ ﻭﻛﻀﺎﺑﻴﻦ ﺳﺎﻱ
_ ﻻ ﻻ ﻓﻲ ﺍﻟﻤﺒﺎﺣﺚ ﻭﺍﻧﺎ ﺑﻌﺮﻑ ﻓﺮﺡ ﺩﺍ ﻛﻮﻳﺲ
_ ﻫﻮ ﻗﺎﻝ ﺍﻧﺖ ﺻﺎﺣﺐ ﺻﺎﺣﺒﻮ ﻭﺟﺎﻙ ﻓﻲ ﺍﻟﺴﻮﻕ ﻛﻢ ﻣﺮﺓ
_ ﻫﻮ ﻗﺎﻝ ﻟﻴﻚ ﺍﻧﺎ ﺻﺎﺣﺐ ﺻﺎﺣﺒﻮ ؟
_ ﻣﺎ ﺻﺎﺣﺐ ﺻﺎﺣﺒﻮ ﻭﻻ ﺷﻲ ﺑﺲ ﺍﻧﺎ ﻋﺮﻓﺘﻮ ﻗﺎﺻﺪ ﺷﻨﻮ
_ ﺍﻫﺎ ﻭﺍﻟﺮﺍﻱ ﺷﻨﻮ ؟
_ ﺍﻟﺮﺍﻱ ﻃﻠﻊ ﺳﺮﻳﺮﻙ ﻭﻧﻮﻡ ﻭﺑﻜﺮﺓ ﺍﻛﺎﻥ ﺍﻟﻠﻪ ﺣﻴﺎﻧﺎ ﻧﺘﻔﺎﻛﺮ ﻓﻲ ﺍﻟﻤﻮﺿﻮﻉ ﺩﺍ ﻭﻧﻮﻡ ﻗﺒﻠﻚ ﻻﻧﻮ ﺍﻟﻠﻴﻞ ﺍﺗﺄﺧﺮ ﺑﺲ ﻣﺎ ﻋﺸﺎﻥ ﺩﺍﻳﺮﻙ ﺗﺴﻜﻦ ﻣﻌﺎﻱ
ﻋﺒﺎﺱ ﺿﺤﻚ ﻭﻗﺎﻝ ﻟﻴﻬﻮ ﺑﺮﺍﻙ ﻗﻠﺖ ﻟﻲ ﻃﻠﻊ ﺳﺮﻳﺮﻙ