ﻭﻻﻳﻬﻤﻚ ..
ﻭﻻﺗﺎﺧﺪ ﻋﻠﻲ ﺑﺎﻟﻚ ..
ﻭﻻﺗﺘﺨﻴﻞ ﺍﻧﻲ ﻓﻲ ﻳﻮﻡ
ﺃﺷﻴﻞ ﻓﻲ ﺧﺎﻃﺮﻱ
ﺍﻭﺃﺯﻋﻞ ﻓﻲ ﻳﻮﻡ ﻣﻨﻚ
ﺃﻛﻮﻥ ﻻﻋﺸﺘﺎ .. ﻻﻛﻨﺘﺎ
ﻣﻨﻮ ﺍﻟﻐﻴﺮﻙ ﻣﻼﻧﻲ ﻓﺮﺡ
ﻭﻟﻮﻥ ﻓﻲ ﻋﻴﻮﻧﻲ ﺍﻟﻜﻮﻥ
ﻣﻨﻮ ﺍﻟﺨﻼﻧﻲ ﺯﻱ ﻣﻠﻜﺔ ..
ﻭﻓﺮﺵ ﻓﻲ ﺩﺭﺑﻲ
ﺃﺣﻠﻲ ﺯﻫﻮﺭ ..
ﻣﻨﻮﻭ ﺍﻟﺘﺎﺍﺍﺗﻴﺖ ﺍﻧﺎ ﻓﻲ ﺭﻳﺪﻭ
ﻟﺤﺪ ﻣﺎﺭﻳﺪﻱ ﺍﺿﺤﻲ ﺟﻨﻮﻥ
ﺃﻗﻮﻡ ﻣﻨﻚ ﺃﺷﻴﻞ ﻓﻲ ﺧﺎﻃﺮﻱ
ﺃﻭ ﺃﺯﻋﻞ ﻓﻲ ﻳﻮﻡ ﻣﻨﻚ ..
ﺃﻛﻮﻥ ﻻﻋﺸﺘﺎ .. ﻻﻛﻨﺘﺎ

ﺍﺟــﻤــﻞ ﺣﺎﺟــﺔ ﺍﻧــﻚ
ﻳﻮﻡ ﺗﻼﻗﻲ ﻋﻴﻮﻥ ﺗﺮﻳﺪﻙ
ﺩﻳﻤﺔ ﺷﺎﻳﻠﺔ ﺍﻟﻬﻢ ﻣﻌﺎﻛﺎ
ﻭﺩﻳﻤﺔ ﺗﺴﺂﻝ ﻭﻳﻦ ﺟﺪﻳﺪﻙ
ﻧﺎﺱ ﺗﻘﺪﺭ ﺣﺘﻲ ﺣﺮﻓـﻚ
ﻭﻧﺎﺱ ﺑﺘﺘﻨﻔﺲ ﻗﺼﻴﺪﻙ
ﺩﻳﻞ ﺑﻼﻫﻢ ﻣﺎﻓﻲ ﻓﺮﺣﺔ
ﻭﻟﻤﺎ ﻳﻤﺸﻮ ﺍﻟﻬﻢ ﺑﺼﻴﺪﻙ
ﻧﺎﺱ ﺣﻼﺗﻢ ﻳﻮﻣﻲ ﺫﺍﻳﺪﺓ
ﻭﺣﺘﻲ ﺍﺻﺒﺤﻮ ﻓﻲ ﺍﻟﻮﺭﻳﺪ
ﻧﺎﺱ ﻣﺴـﺘﻔـﺔ ﺑﺎﻻﻣـــﺎﻧﻲ
ﻭﻧﺎﺱ ﻣﺘﺮﺟﻤﺔ ﻓﻲ ﺍﻟﻘﺼﻴﺪ
ﻧﺎﺱ ﺻﻔﺎﺗﺎ ﺍﻟﻄـﻴﺒﺔ ﻣﻨـﺒـﻊ
ﻭﻧﺎﺱ ﻣﺸـﺖ ﺟﻮﺍﻱ ﺑﻌﻴﺪ
ﺍﻧﺘﻮ ﻧﺎﺱ ﻟﻠـﺨـﻮﺓ ﺳﺎﺳﺎ
ﻭﺑﺮﺿﻮ ﺍﻧﺘﻮ ﻣﻌﺎﻱ ﺣﻀﻮﺭ
ﺍﻟﻤﻬﻢ ﺍﻟﺒﻴﻨﺎ ﻋﺎﻣـــــﺮﺓ
ﻭﻣﺎ ﻣﻬﻢ ﺍﺧﺮ ﻇﻬــــﻮﺭ
ﻣﺎ ﺍﻟﻌﻼﻗﺔ ﺍﻟﺒﻴﻨﺎ ﺩﺍﻳﻤﺔ
ﻭﻳﺒﻘﻲ ﺣﺪﻫﺎ ﻓﻲ ﺍﻟﻘﺒﺭ

ﻋﺸﺎﻥ ﻣﺴﺘﻘﺒﻞ ﺍﻷﻃﻔﺎﻝ
ﻭﺟﺐ ﻧﻨﻬﻲ ﺍﻟﺨﻼﻑ ﺍﻟﻄﺎﻝ
ﻋﺸﺎﻥ ﺗﺘﺤﻘﻖ ﺍﻵﻣﺎﻝ
ﻋﺸﺎﻥ ﺃﻭﻃﺎﻧﻨﺎ ﺗﺘﻘﺪﻡ
ﻋﻠﻴﻨﺎ ﺗﻌﺎﻝ
ﻭﻫﺎﻛﺎ ﻗﻠﻢ …..
ﻗﻠﻢ ﻣﻦ ﺿﻲ
ﺻﺮﺥ ﺭﺻﺎﺻﻮ ﻣﺎ ﻫﺎﺏ ﺷﻲﺀ
ﻛﺘﺐ ﺧﺖ ﺍﻟﺴﻼﺡ ﻳﺎ ﺻﺒَﻲْ
ﺭﺻَﺎﺹ ﺑﺪﻝ ﺍﻟﺮﺻَﺎﺹ ﻳﺎﺧﻲ
ﺭﺻَﺎﺹ ﺑﺪﻝ ﺍﻟﺮﺻَﺎﺹ ﺍﻟﺤﻲ
ﺣﻨﺤﻘﻦ ﺑﻴﻬﻮ ﺳﻴﻞ ﺍﻟﺪﻡ …
ﻧﺰﻑ
ﺣﺒﺮ ﺍﻟﺤﻘﻴﻘﺔ ﺍﻟﺠﺎﻑ
ﺣﻠﻒ ﻏﻴﺮ ﺍﻟﻠﻪ ﻣﺎ ﺣﻴﺨﺎﻑ
ﻭﺑﻴﻦ ﺟﻠﺪﺓ ﻏﻼﻑ ﻭﻏﻼﻑ
ﺷﻄﺐ ﺑﺎﻟﺨﻮﺓ ﺃﻱ ﺧﻼﻑ
ﺭﺳﻢ ﺇﻳﺪﻳﻨﺎ ﺷﺎﻳﻠﺔ ﻋَﻠﻢ ….
ﻗﻠﻢ
ﺳﺎﻳﻞ ﻧﺰﻑ ﻗﻄﺮﺓ
ﺳﻘﺖ ﺟﻮﺓ ﺍﻟﻘﻠﺐ ﺑﺬﺭﺓ
ﻃﺮﺡ ﻓﻜﺮﺓ
ﺳﻼﻡ ﻳﺎ ﺃﺭﺿﻨﺎ ﺍﻟﺒﻜﺮﺓ
ﻧﺼﺎﻓﺢ ﺑﻴﻬﻮ ﻳﻮﻡ ﺑﻜﺮﺓ
ﻭ ﻧﺤﻘﻖ ﻛﻠﻤﺎ ﻧﺤﻠﻢ ….
ﻛﺘﺐ
ﺃﺣﻼﻣﻮ ﺿﻮﺍﻳﺔ
ﻛﺘﺐ ﻏﺎﻳﺔ
ﺭﻓﻊ ﺭﺍﻳﺔ
ﻧﺪﻩ ﻛﺮﺍﺱ ﻭﺑﺮﺍﻳﺔ
ﻛﺘﺎﺏ ﻭ ﺟﻼﺩ ﻭﻣﺤﺎﻳﺔ
ﻛﺘﺎﺑﺔ ﻭ ﺣﺼﺔ ﻭﻗﺮﺍﻳﺔ
ﻭﻣﻦ ﺃﺧﻄﺎﺀﻧﺎ ﻧﺘﻌﻠﻢ …
ﻋﺸﺎﻥ ﻣﺴﺘﻘﺒﻞ ﺍﻷﻃﻔﺎﻝ
ﻋﻠﻴﻨﺎ ﺗﻌﺎﻝ
ﻋﻠﻴﻨﺎ ﺗﻌﺎﻝ
ﻋﻠﻴﻨﺎ ﺗﻌﺎﻝ
ﺗﻌﺎﻝ ﻳﺎ ﺻﺒَﻲ . ْ . ﺗﻌﺎﻝ ﺧﺖ ﺍﻟﺴﻼﺡ ﻳﺎ ﺻﺒَﻲْ
ﻋﻠﻴﻨﺎ ﺗﻌﺎﻝ
ﻗﻠﻢ ﻣﻦ ﺿﻲ ..
ﺭﺻَﺎﺹ ﺑﺪﻝ ﺍﻟﺮﺻَﺎﺹ ﺍﻟﺤﻲ
ﺭﺻَﺎﺹ ﺑﺪﻝ ﺍﻟﺮﺻَﺎﺹ ﻳﺎﺧﻲ
ﺭﺻَﺎﺹ ﻳﺎﺧﻲ
ﻋﻠﻴﻨﺎ ﺗﻌﺎﻝ
ﻋﻠﻴﻨﺎ ﺗﻌﺎﻝ
ﻋَﻠﻢ
ﻛﺮﺍﺱ
ﻗﻠﻢ ﻣﻦ ﺿﻲ
ﻋﻠﻴﻨﺎ ﺗﻌﺎﻝ
ﻋﻠﻴﻨﺎ ﺗﻌﺎﻝ
ﻋِﻠﻢ
ﻛﺮﺍﺱ
ﻗﻠﻢ ﻣﻦ ﺿﻲ

ﻭﺯﻱ ﻋﺼﻔﻮﺭ ﺻﺒﺎﺣﻮ ﺑﻴﻌﻠﻦ ﺍﻟﻔﺮﺣﺔ
ﻭﻳﻐﻨﻲ ﺍﻟﺮﻳﺪﺓ ﻟﻲ ﺷﻤﺴﻮ
ﻋﺮﻭﺳﻮ ﺍﻟﻼﺑﺴﺔ ﻣﻦ ﺍﻟﻨﻮﺭ
ﻭﻣﻦ ﻭﻫﺞ ﺍﻷﻣﻞ ﻃﺮﺣﺔ
ﻭﻻ ﺷﺎﻳﻞ ﻫﻤﻮﻡ ﺑﻜﺮﺓ
ﻭﻻ ﻓﻲ ﺑﺎﻟﻮ ﻫﻢ ﺃﻣﺴﻮ
ﻭﺻﻮﺗﻮ ﺑﺠﺪﺩ ﺍﻵﻣﺎﻝ
ﻭﻻﻣﻦ ﻳﺘﻌﺒﻮ ﺍﻟﺘﺮﺣﺎﻝ !!!
ﻳﻮﺷﻮﺵ ﻟﻠﻐﺼﻦ ﺗﻌﺒﻮ
ﻭﻳﻐﺮﺩ ﺑﺎﻟﺨﻄﺮ ﻓﻲ ﺍﻟﺒﺎﻝ
ﻳﺴﺎﻓﺮ ﺑﻲ، ﺑﻲ ﺣﻠﻢ ﻣﻔﺮﻭﺩ
ﻭﻣﻮﻋﺪ ﺗﺎﻧﻲ ﻟﻠﻌﻮﺩﺓ
ﻫﻮ ﺣﺮ ﺇﺣﺴﺎﺳﻮ ﻣﺎ ﻣﺤﺪﻭﺩ
ﻭﺑﻨﺸﺪ ﺃﺣﻠﻰ ﺍﻧﺸﻮﺩﺓ
ﻣﺤﻞ ﻣﺎ ﺭﻳﺢ ﺧﻄﺎﻫﻮ ﺗﻘﻮﺩ
ﺩﺭﻭﺑﻮ ﻭﺗﺮﺿﻲ ﻣﺮﻳﻮﺩﺍ
ﺑﻴﻘﻮﻝ ﻣﻮﺍﻝ …
ﺣﺒﻴﺒﻲ ﺍﻟﺴﺎﻓﺮ ﺃﻣﺒﺎﺭﺡ
ﻭ ﻟﻠﺮﻭﺡ ﻣﺎﺳﻜﺖ ﻫﻤﺴﻮ
ﻛﻤﺎ ﺍﻟﻌﺼﻔﻮﺭ
ﺻﺒﺎﺣﻮ ﺑﻴﻌﻠﻦ ﺍﻟﻔﺮﺣﺔ
ﻭﻳﻐﻨﻲ ﺍﻟﺮﻳﺪﺓ ﻟﻲ ﺷﻤﺴ

ﺍﺑﻘﻲ ﻓﺎﻛﺮ ﺍﻭﻭﻋﻪ ﺗﻨﺴﻰ
ﻳﻮﻡ ﻭﺩﺍﺍﻋﻚ ﻛﻴﻒ ﻭﺟﻌﻨﻲ ..
ﻟﻤﺎ ﺟﻴﺘﻨﻲ ﻭﺍﻧﺖ ﺑﺎﺍﺍﻛﻲ
ﻭﻗﻠﺘﻪ ﻟﻴﻚ ﺣﺘﺴﻴﺒﻨﻲ ﻳﻌﻨﻲ ..!!
ﺩﻣﻌﻪ ﻣﻦ ﻋﻴﻨﻴﻚ ﻧﺰﻟﺖ
ﻛﺎﻥ ﺏ ﺍﻳﻪ ﺩﻣﻌﻚ ﻧﻔﻌﻨﻲ .. ؟
ﻛﻨﺖ ﻣﺰﺭﻭﻭﻉ ﺟﻮﻭﺓ ﺭﻭﻭﺣﻚ
ﻣﻴﻦ ﻗﺪﺭ ﻣﻨﻚ ﻗﻠﻌﻨﻲ ..
ﺍﺑﻘﻰ ﻓﺎﻛﺮ ﻟﻠﻤﺸﺎﻋﺮ
ﻟﻠﻌﻮﺍﻃﻒ ﻭﺍﻟﺴﻌﺎﺩﻩ ..
ﻭﺍﻧﻲ ﻣﺎ ﻗﺼﺮﺗﻪ ﻓﻴﻜﺎ
ﺭﻏﻢ ﺭﻭﺣﻚ ﻭﺍﺑﺘﻌﺎﺩﻩ ..
ﻭﻫﺴﻪ ﺟﺮﺣﻚ ﻓﻴﻨﻲ ﺑﻜﺒﺮ
ﻭﻛﻞ ﻳﻮﻡ ﺑﺰﺩﺍﺩ ﺯﻳﺎﺩﻩ ..
ﺭﻏﻢ ﻇﻠﻤﻚ ﻟﻲ ﺑﺮﻳﺪﻙ
ﺍﻧﺖ ﻧﻦ ﻋﻴﻨﻲ ﻭﺳﻮﺍﺩﻩ ..
ﺍﻟﺠﺮﻭﺡ ﻟﻮ ﻓﻴﻨﻲ ﻛﺘﺮﺕ
ﻣﻤﻜﻦ ﺍﻧﺖ ﺗﻜﻮﻥ ﻃﺒﻴﺒﺎ ..
ﻭﺍﻟﻌﻴﻮﻥ ﻣﺮﺍﺕ ﺑﺘﻌﺸﻖ
ﻗﺒﻞ ﻡ ﻳﺸﻮﻓﻚ ﻗﻠﻴﺒﺎ ..
ﻭﻛﻮﻧﻲ ﺭﺩﺗﻚ ﺑﻲ ﻋﻴﻮﻧﻲ
ﻭﻋﺎﺭﻑ ﺍﻧﻮ ﺍﻟﺮﻳﺪ ﻣﺼﻴﺒﻪ ..
ﺍﺑﻘﻰ ﺍﺳﺘﺎﻫﻞ ﻋﻤﺎﻳﻠﻚ
ﻭﻋﻴﻨﻲ ﺗﺴﺘﺤﻤﻞ ﻧﺤﻴﺒﺎ ..
ﺍﻧﺖ ﻭﺍﺻﻞ ﻓﻲ ﺣﻴﺎﺗﻚ
ﻋﺎﺩﻱ ﻡ ﺗﻬﺘﻢ ﺑﻴﺎ ..
ﺳﻴﺒﻨﻲ ﺍﺗﺠﺮﻉ ﺻﺪﻭﺩﻙ
ﺍﻭﻋﻪ ﺗﺎﻧﻲ ﺗﺤﻦ ﻟﻴﺎ ..
ﺟﻮﻭﺓ ﻓﻴﻚ ﺣﺎﺟﻪ ﺑﺘﺮﻳﺪﻧﻲ
ﺑﻜﺮﺓ ﺡ ﺗﺒﻜﻴﻚ ﻋﻠﻴﺎ ..
ﻟﻤﺎ ﺗﺸﺘﺎﻕ ﻟﻲ ﺣﻨﺎﻧﻲ ..
ﻭﻻ ﻟﻲ ﻟﻤﺴﻪ ﺍﻳﺪﻳﺎ ..
ﺍﻭﻋﻪ ﺗﺘﺮﺟﺎﻧﻲ ﺍﻋﻄﻒ
ﺍﻣﺸﻲ ﺍﺳﺘﺮﺣﻢ ﻋﻴﻨﻴﺎ

ﺧﺴﺎﺭﻩ ﺍﻟﺰﻭﻝ ﺗﻌﺪﻭ ﺭﻓﻴﻖ
ﻭﻫﻮ ﻳﻔﺘﺶ ﻋﺸﺎﻥ ﻳﺸﻘﻴﻚ
ﺗﺸﻴﻞ ﻫﻤﻮ ﻭﺗﺪﺍﺭﻱ ﻋﻠﻴﻬﻮ
ﺗﺒﻜﻲ ﺩﻣﻮﻋﻮ ﺑﻲ ﻋﻴﻨﻴﻚ
ﻭﻗﺖ ﻫﻤﻚ ﻳﻔﻮﺕ ﻭﻳﻨﺴﺎﻙ
ﻭﻣﺎ ﻳﺴﺄﻝ ﺷﻨﻮ ﺍﻟﻬﺎﻣﻴﻚ
ﻳﻐﻤﺾ ﻓﻴﻚ ﻋﻴﻮﻥ ﺍﻟﻔﺮﺣﻪ
ﻟﻸﻫﺂﺕ ﻳﺼﺤﻲ ﻳﻔﻴﻖ
ﺧﺴﺎﺭﻩ ﺗﻘﻮﻝ ﻋﻠﻴﻬﻮ ﺃﺧﻮﻙ
ﻭﻓﻲ ﺳﺮﻙ ﺗﺤﺴﺒﻮ ﺷﺮﻳﻚ
ﺑﺘﺤﻜﻲ ﺩﻭﺍﻡ ﻋﻠﻴﻮ ﺑﺎﻟﺨﻴﺮ
ﻭﺗﻠﻘﻰ ﻭﺭﺍﻙ ﺑﻴﻄﻌﻦ ﻓﻴﻚ
ﻛﺘﻴﺮ ﺻﺪﻗﺖ ﻛﺬﺑﻮ ﻋﻠﻴﻚ
ﻭﻣﺎﻓﻜﺮﺕ ﻓﻲ ﺍﻟﺮﺍﺟﻴﻚ
ﺷﻴﻞ ﻭﺟﻌﻚ ﺑﺮﺍﻙ ﺍﻟﻴﻮﻡ
ﻭﺃﺟﻨﻲ ﻭﺭﺩ ﻭﻓﺎﻙ ﻋُﻠِّﻴﻖ

ﺣﺼﻞ ﺟﺮﺑﺘﺎ ﻭﺟﻊ ﺍﻟﺮﻭﺡ ؟
ﺣﺼﻞ ﻫﺒﺸﺘﺎ ﺫﺍﺗﻚ ﻳﻮﻡ
ﻟﻘﻴﺖ ﻓﻲ ﻛﻞ ﺣﺘﺎ ﺟﺮﻭﺡ ؟
ﺣﺼﻞ ﻏﻠﺒﻚ ﺗﻮﺍﺻﻞ ﺍﻟﺴﻴﺮ
ﻣﻊ ﺍﻧﻮ ﺍﻟﻄﺮﻳﻖ ﻣﻔﺘﻮﺡ؟ !!
ﺣﺼﻞ ﺟﺮﺑﺖ ﺗﻤﺸﻲ ﺑﺮﺍﻙ
ﺣﺼﻞ ﺳﺎﻗﺖ ﺩﺭﻭﺑﻨﺎ ﺧﻄﺎﻙ
ﺣﺼﻞ ﺟﺮﺑﺖ ﺳﻬﺮ ﺍﻟﻠﻴﻞ
ﻋﺸﺎﻥ ﺧﺎﻃﺮ ﺣﺒﻴﺐ ﺣﺒﺎﻙ
ﺣﺼﻞ ﺟﺮﺑﺖ ﺗﻤﺸﻲ ﻋﺪﻳﻞ
ﺣﺼﻞ ﻛﻠﻤﺖ ﻣﻮﺝ ﺍﻟﻨﻴﻞ
ﺣﺼﻞ ﺟﺮﺑﺖ ﺗﻤﺸﻲ ﺑﺮﺍﻙ
ﺑﺪﻭﻥ ﺗﻬﺪﻱ ﺍﻟﻠﻴﺎﻟﻲ ﺩﻟﻴﻞ
ﺣﺼﻞ ﺳﺎﻫﺮﺗﺔ ﺍﻧﺖ ﺑﺮﺍﻙ
ﺗﻌﺎﻳﻦ ﻟﻲ ﺧﻴﺎﻝ ﺟﻮﺍﻙ
ﻭﻟﻤﺎ ﺗﺴﺎﻣﺮﻭ ﻳﻀﺤﻚ ﻟﻴﻚ
ﻭﺗﺒﻜﻲ ﺗﻼﻗﻲ ﻳﺒﻜﻲ ﻣﻌﺎﻙ
ﺣﺼﻞ ﻋﺎﻳﻨﺘﻪ ﻝ ﺫﺍﺗﻚ
ﺣﺼﻞ ﺣﺴﺖ ﻣﺮﺍﻓﺊ ﺍﻟﺸﻮﻕ
ﻭﻟﻮ ﻟﻲ ﻟﺤﻈﺔ ﻭﺟﻌﺎﺗﻚ
ﺣﺼﻞ ﻋﻀﻴﺖ ﺃﻧﺎﻣﻞ ﺍﻟﺒﻮﺡ
ﻋﺸﺎﻥ ﺧﺎﻃﺮ ﺣﻨﻴﻦ ﻓﺎﺗﻚ
ﺣﺼﻞ ﺟﺮﺑﺖ ﻟﺤﺲ ﺍﻟﻜﻮﻉ
ﺣﺼﻞ ﺿﻐﻀﻐﺖ ﺍﻫﺎﺗﻚ
ﻟﻘﻴﺖ ﻣﻦ ﻛﻞ ﺁﻫﺔ ﺩﻣﻮﻉ
ﺣﺼﻞ ﺷﺪﻳﺖ ﺧﻴﺎﻟﻚ ﻳﻮﻡ
ﻋﻠﻰ ﺿﻲ ﺍﻷﻣﺎﻧﻲ ﺷﻤﻮﻉ