ﻭﺭﻳﻨﻲ ﺷﻦ ﻃﻌﻢ ﺍﻟﺪﺭﻭﺱ ﻣﺎﺩﺍﻡ ﺑﻜﺎﻧﺎ ﻣﺸﻰ ﻗﻄﺮ
ﻭﻛﻴﻒ ﺫﺍﺗﺎ ﺗﺮﺗﺎﺡ ﺍﻟﻨﻔﻮﺱ ﺗﻘﺒﻞ ﻗﺮﺍﻳﺘﺎً ﻓﻰ ﺳﻔﺮ
ﻳﺎﻳﻤﻪ ﺣﺎﻥ ﺍﻹﻣﺘﺤﺎﻥ ﻣﻦ ﻭﻗﺘﻮ ﺑﺲ ﻓﺎﺿﻞ ﺷﻬﺮ
ﻣﺎ ﺍﻇﻨﻰ ﻣﻦ ﺟﻮﺭ ﺍﻟﺰﻣﺎﻥ ﺍﻧﺠﺢ ﻭﺍﺟﻴﺐ ﻟﻴﻜﻢ ﻧﻤﺮ
ﻛﻴﻒ ﺫﺍﺗﻰ ﻳﺎ ﻧﺒﻊ ﺍﻟﺤﻨﺎﻥ ﺍﻧﺠﺢ ﻣﻦ ﺁﻻﻡ ﺍﻟﺴﻬﺮ
ﻋﻤﺮﻙ ﺳﻤﻌﺘﻴﻠﻚ ﺟﺒﺎﻥ ﺧﺎﺽ ﺍﻟﻤﻌﺎﺭﻙ ﻭﺍﻧﺘﺼﺮ
ﺣﺒﻴﺒﺘﻲ ﻛﻞ ﻣﺎ ﺍﻓﺘﺢ ﻛﺘﺎﺏ ﺍﻟﻘﺎﻙ ﻓﻰ ﺃﻭﻝ ﺳﻄﺮ
ﺍﻟﻘﻰ ﺍﻟﺠﺪﺍﻭﻝ ﻭﺍﻟﺼﺤﺎﺏ ﺍﻟﻘﻰ ﺍﻟﺠﻨﺎﻳﻦ ﻭﺍﻟﺘﻤﺮ
ﻓﻰ ﺍﻟﺤﺼﺔ ﻋﻘﻠﻰ ﺃﻧﺎ ﻗﺎﻡ ﺳﺪﺭ ﻳﻤﻪ ﺍﻟﻤﺪﺭﺱ ﻟﻮ ﻓﻜﺮ
ﻛﺎﻥ ﺑﻠﻘﻰ ﻗﺎﻋﺪ ﻓﻮﻕ ﻛﻜﺮ ﻓﻰ ﺍﻟﺪﻭﻧﻜﻲ ﻟﺴﻊ ﻣﺎ ﻓﻄﺮ
ﻳﺴﻤﻊ ﻛﻠﻴﻤﺔ ﻳﺎ ﻋﺸﺎﻱ ﻭﺃﻏﻠﻰ ﺍﻟﺤﻜﻢ ﻋﻨﺪ ﺍﻟﻀﺠﺮ
ﺃﻧﺎ ﻗﻠﺒﻰ ﻛﻠﻮ ﻋﻠﻴﻚ ﺟﻨﺎﻯ ﻭﻗﻠﺐ ﺟﻨﺎﻯ ﻋﻠﻰ ﺣﺠﺮ
ﻭﺍﻟﻠﻪ ﻣﻮﺵ ﻟﻮ ﻛﺎﻥ ﻧﻬﺮ ﻟﻮ ﻛﺎﻟﻨﻰ ﺑﺴﻴﻄﺎﻥ ﺑﻘﺮ
ﻣﺎﺩﺍﻡ ﻋﻘﻴﻞ ﺍﻟﺠﻦ ﺳﺪﺭ ﻣﺎ ﺍﻇﻨﻮ ﻣﻦ ﻋﻨﺪﻙ ﺣﻀﺮ
ﺑﺬﺍﺗﻮ ﺍﺑﻮﻯ ﺗﻠﻘﺎﻫﻮ ﻗﺎﻡ ﻓﺎﺗﺢ ﻛﺘﺎﺑﻮ ﻣﻊ ﺍﻟﻔﺠﺮ
ﻳﻘﺮﺃ ﻭﻳﺮﺗﻞ ﻓﻰ ﻛﻼﻡ ﻣﺎ ﺑﻔﻬﻤﻮ ﺍﻟﻨﺎﺱ ﺍﻟﻜﻔﺮ
ﺣﺒﻴﺒﺘﻲ ﻛﺮ ﻣﻦ ﺣﺎﻟﻰ ﻛﺮ ﻗﺎﻋﺪ ﻟﻰ ﻓﻮﻕ ﻧﻴﺮﺍﻥ ﺟﻤﺮ
ﻏﺮﺑﺔ ﻭﻛﻤﺎﻥ ﺣﺎﻻً ﻓﻘﺮ ﻋﺬﺑﻨﻰ ﻗﺒﻞ ﺃﺻﻞ ﺍﻟﻘﺒﺮ
ﺍﻟﺸﻮﻕ ﻣﺘﻞ ﺷﻮﻙ ﺍﻟﻜﺘﺮ ﻃﻌﻦ ﺍﻟﺠﺴﻢ ﻟﻤﻦ ﺧﺪﺭ
ﻭﺍﻟﻠﻪ ﻟﻮ ﻣﺎ ﺑﻨﻘﺒﻞ ﻣﺎ ﻛﺎﻥ ﺑﻔﺎﺭﻗﻚ ﺑﻰ ﺷﺒﺮ
ﺣﺒﻴﺒﺘﻲ ﺩﻧﻴﺎ ﺍﻹﻏﺘﺮﺍﺏ ﺧﻠﺘﻨﻰ ﺯﻱ ﻭﺭﻕ ﺍﻟﺸﺪﺭ
ﺍﺗﺤﺖ ﻣﻦ ﻋﺪﻡ ﺍﻟﺸﺮﺍﺏ ﻋﻢ ﺍﻷﺭﺍﺿﻰ ﻭﺍﻧﺘﺸﺮ
ﺍﻟﻐﺮﺑﺔ ﺍﺻﻠﻮ ﻃﻌﻴﻤﻬﺎ ﻣﺮ ﻟﻜﻨﻰ ﺑﻘﻌﺪ ﺑﺎﻟﺠﺒﺮ
ﻟﻤﻦ ﺳﻨﻴﻦ ﺍﻟﻬﻢ ﺗﻤﺮ ﻳﺎ ﺭﺑﻰ ﺍﻟﻬﻤﻨﻰ ﺍﻟﺼﺒﺮ