ﻓﻲ ﺍﻟﺤﻠﺔ ﻋﻤﺮ ﻭﺩ ﺍﻟﻀﻮ ﺻﺤﻰ ﺑﺪﺭﻱ ﻭﻓﺎﺕ ﺻﻠﻰ ﺍﻟﺼﺒﺢ ﻓﻲ ﺍﻟﺠﺎﻣﻊ ﻭﻻﻗﺎﻫﻮ ﻋﺒﺪﻭ ﺍﺑﻮ ﻋﺒﺎﺱ ﻗﺎﻝ ﻟﻴﻬﻮ ﻭﻳﻨﻚ ﺁ ﻭﺩ ﺍﻟﻀﻮ ﻓﻘﺪﻧﺎﻙ ﻟﻴﻚ ﻛﻢ ﻳﻮﻡ ﻣﺎ ﺟﻴﺖ ﺍﻟﺠﺎﻣﻊ ﺍﻥ ﺷﺎﺀ ﺍﻟﻠﻪ ﺧﻴﺮ
ﻋﻤﺮ ﻭﺭﺍﻫﻮ ﺍﻧﻮ ﻛﺎﻥ ﻓﻲ ﺍﻟﺨﺮﻃﻮﻡ ﻭﻭﻗﻔﻮﺍ ﺑﺮﺓ ﺍﻟﺠﺎﻣﻊ ﻣﺴﺎﻓﺔ ﻭﻭﺭﺍﻫﻮ ﺍﻧﻮ ﻣﺸﻰ ﻟﻌﺒﺎﺱ ﻓﻲ ﻣﺤﻞ ﺷﻐﻠﻮ ﻭﻃﻤﻨﻮ ﻋﻠﻴﻬﻮ ﺗﺐ ﻭﻓﺎﺕ ، ﺑﺲ ﻣﺎ ﻗﺎﻝ ﻟﻴﻬﻮ ﻋﺒﺎﺱ ﻣﺎ ﺷﻐﺎﻝ . ﻭﺍﻛﺎﻥ ﻭﺍﻗﻒ ﻣﻌﺎﻫﻢ ﺍﻟﻌﺒﻴﺪ ﻭﺩ ﻋﻤﻮ ﻭﺑﻌﺪ ﻋﺒﺪﻭ ﻓﺎﺕ ﺍﻟﻌﺒﻴﺪ ﻻﻡ ﻋﻤﺮ ﻭﻗﺎﻝ ﻟﻴﻮ ﺍﻛﺎﻥ ﺗﻮﺭﻳﻬﻮ ﻳﺎﺥ
_ ﺍﻭﺭﻳﻬﻮ ﺷﻨﻮ ؟ ﺩﺍﻳﺮﻧﻲ ﺍﻗﻮﻝ ﻟﻴﻬﻮ ﻭﻟﺪﻙ ﻣﺠﻬﺠﻪ ﻫﻨﺎﻙ ﻭﻟﺴﺔ ﻣﺎ ﺍﺷﺘﻐﻞ ﻭﺍﻛﺎﻥ ﻋﻨﺪﻭ ﻣﺸﻜﻠﺔ ؟
_ ﻻ ﻻ ﺗﻮﺭﻳﻬﻮ ﺑﺎﻟﻘﺮﻭﺵ ﺍﻟﻌﻨﺪﻙ ﺍﻻﺩﺍﻙ ﻟﻴﻬﺎ ﻋﺒﺎﺱ ﻭﻟﺪﻭ
_ ﻣﺎ ﺑﻮﺭﻳﻬﻮ ﻭﻻ ﺷﻲ ﺍﻟﻌﺒﻴﺪ ﺍﻟﻘﺮﻭﺵ ﺩﻱ ﺍﻧﺎ ﻣﺎ ﻭﺭﻳﺖ ﺑﻴﻬﺎ ﺍﻻ ﺍﻧﺖ ﻭﺁﻣﻨﺔ ﻣﺮﺗﻲ ﺑﺲ ﻭﻣﺎ ﺗﻮﺭﻱ ﺑﻴﻬﺎ ﺯﻭﻝ
_ ﻻ ﻗﺼﺪﻱ ﺗﻮﺭﻱ ﺍﺑﻮﻫﻮ ﺩﺍ ﻋﺸﺎﻥ ﻳﻌﺮﻓﻚ ﻋﻤﻠﺖ ﺑﻴﻬﺎ ﺷﺘﻮ
_ ﻳﺎ ﺯﻭﻝ ﺍﻟﻘﺮﻭﺵ ﺩﻱ ﺗﺎﻧﻲ ﻣﺎ ﺗﺠﻴﺐ ﺳﻴﺮﺗﻬﺎ ، ﻭﺍﻧﺎ ﻭﺭﻳﺘﻚ ﻋﺸﺎﻥ ﻟﻮ ﺣﺼﻞ ﻟﻲ ﺣﺎﺟﺔ ﺣﻘﻮ ﻣﺎ ﻳﺮﻭﺡ ﻭﺗﺮﺟﻌﻮﻫﺎ ﻟﻴﻬﻮ . ﻭﺍﻟﺰﻭﻝ ﺩﺍ ﺍﻧﺎ ﻻ ﺑﻴﻨﻲ ﻭﺑﻴﻨﻮ ﻭﺭﻗﺔ ﻭﻻ ﻭﺻﻞ ﺍﻣﺎﻧﺔ ﺍﻻ ﺍﻟﻠﻪ ﺍﻟﻌﺎﻟﻢ ﻭﺷﺎﻫﺪ ﻭﺯﻱ ﻣﺎ ﻫﻮ ﻭﺛﻖ ﻓﻴﻨﻲ ﻛﺪﺍ ﺍﻧﺎ ﻛﻤﺎﻥ ﻣﺎ ﺍﺿﻴﻊ ﻟﻴﻬﻮ ﺣﻘﻮ
_ ﻭﺍﻟﻠﻪ ﺍﻧﺎ ﺭﺃﻳﻲ ﺗﺮﺟﻌﻦ ﻟﻴﻬﻮ ﺑﺲ ﻣﺎﻟﻚ ﻭﻣﺎﻝ ﺍﻟﻤﺸﺎﻛﻞ ، ﺍﻟﻘﺮﻭﺵ ﺩﻱ ﻣﻌﺎﻫﺎ ﺍﻟﺸﻴﻄﺎﻥ ﻭﺍﻧﺖ ﻣﺎﻙ ﻣﺤﺘﺎﺝ ﻟﻴﻬﺎ
_ ﻓﻲ ﺷﻨﻮ ﻫﺴﻲ ﺁ ﺍﻟﻌﺒﻴﺪ ﻳﺎﺥ ؟
_ ﻳﺎﺥ ﻭﺍﻟﻠﻪ ﺍﻧﺎ ﻋﺒﺎﺱ ﺩﺍ ﻣﺎ ﺍﺣﺘﻜﻴﺖ ﺑﻴﻬﻮ ﻟﻜﻦ ﺷﺎﻳﻔﻮ ﺃﻳﺎﻡ ﺳﻜﺮﻭ ﻭﻣﺒﺎﺭﺍﺗﻮ ﻟﻮﺩ ﺍﻟﺴﺖ ﺍﻟﺤﺮﺍﻣﻲ ﻭﻛﻢ ﻣﺮﺓ ﻛﻨﺖ ﺩﺍﻳﺮ ﺍﺩﻗﻮ ﻟﻜﻦ ﻋﺎﻳﻨﺖ ﻷﻫﻠﻮ ﺑﺲ
_ ﻻ ﻻ ﻳﺎﺥ ﺍﻟﺠﻨﻰ ﺩﺍ ﺍﺗﻐﻴﺮ ﺷﺪﻳﺪ ﻭﺑﻘﻰ ﺯﻭﻝ ﻣﻤﺘﺎﺯ
_ ﻳﺎﺧﻲ ﺩﺍ ﺷﺎﻓﻊ ﺳﺎﻱ ﻭﺍﻫﻠﻮ ﺩﻳﻞ ﻟﻮ ﻋﺮﻓﻮ ﺍﻧﻮ ﺍﺩﺍﻙ ﻗﺮﻭﺵ ﻟﻮ ﺍﻧﺖ ﺑﻨﻴﺖ ﻟﻴﻚ ﺑﻴﺖ ﺟﺪﺍﺩ ﺻﻐﻴﺮ ﺑﻘﻮﻟﻮﺍ ﻣﻦ ﻗﺮﻭﺷﻮ
_ ﺍﻫﻠﻮ ﻣﻨﻮ ﺍﻟﺒﻘﻮﻟﻮﺍ ﻛﺪﻱ ؟
_ ﺍﻫﻠﻮ ﺩﻳﻞ ﺍﻟﻔﻲ ﺍﻟﺤﻠﺔ ﺩﻱ
_ ﺃﻫﻠﻮ ﻣﺎ ﺑﻘﻮﻟﻮﺍ ﻭﺍﻧﺎ ﺍﻟﺤﻤﺪ ﻟﻠﻪ ﻻ ﻣﺤﺘﺎﺝ ﻟﻴﻬﻮ ﻭﻻ ﻣﺤﺘﺎﺝ ﻟﻘﺮﻭﺷﻮ ﻭﺍﻧﺖ ﻋﺎﺭﻑ ﻛﺪﺍ ﻭﻛﻮﻳﺲ ﺍﻧﻮ ﺍﺩﺍﻧﻲ ﻟﻴﻬﺎ ﻭﻣﺎ ﺿﻴﻌﻬﺎ ﺳﺎﻱ
_ ﺍﻧﺎ ﻏﺎﻳﺘﻮ ﻣﺎ ﻣﺮﺗﺎﺡ ﻟﻴﻬﻮ ﻭﺍﻟﻘﺮﻭﺵ ﺩﻱ ﺍﺧﻴﺮ ﺗﺮﺟﻌﻦ ﻟﻴﻬﻮ
_ ﺍﻧﺎ ﻋﺎﺭﻑ ﺑﺴﻮ ﻓﻲ ﺷﻨﻮ ﻣﺎ ﺗﺸﻴﻞ ﻫﻤﻬﻦ ﻭﺍﻃﻤﻦ ﺗﺐ ﺑﺲ ﻣﺎ ﺗﻮﺭﻳﺒﺎ ﺯﻭﻝ
_ ﺍﻫﺎ ﺍﻟﻠﻴﻠﺔ ﻣﺎﺷﻲ ﻣﺪﻧﻲ ﻭﻟﻼ ﻋﻠﻲ ﻛﻼﻣﻚ ﺣﻖ ﺍﻣﺲ ﻣﺎﻙ ﻣﺎﺵ ؟
_ ﻻ ﻻ ﺍﻟﻠﻴﻠﺔ ﻣﺎﻧﻲ ﻣﺎﺵ ﺑﻤﺶ ﺑﻜﺮﺓ ﺍﻛﺎﻥ ﺍﻟﻠﻪ ﺣﻴﺎﻧﺎ
ﺭﺑﻴﻊ ﺟﺎﺀ ﺍﻟﺒﻴﺖ ﺍﻟﺴﺎﻋﺔ ﻋﺸﺮﺓ ﻓﺘﺢ ﺍﻟﺒﺎﺏ ﻟﻘﻰ ﻋﺒﺎﺱ ﻧﺎﻳﻢ ﻗﻔﻠﻮ ﻭﺩﺧﻞ ﻧﺎﻡ
ﻋﺒﺎﺱ ﺻﺤﻰ ﺑﻌﺪ ﺍﻟﻌﺼﺮ ﺑﻤﺴﺎﺍﺍﻓﺔ ﻭﺭﺍﺳﻮ ﺗﻘﻴﻞ ﻭﺟﺴﻤﻮ ﻛﻠﻮ ﻣﺒﺘﺐ ﻭﻣﻦ ﺳﺮﻳﺮﻭ ﻣﺎ ﻗﺎﺩﺭ ﻳﻘﻮﻡ ﻭﺍﻛﺎﻥ ﺗﻌﺒﺎﻥ ﺷﺪﻳﺪ ﻭﻟﻴﻬﻮ ﻛﻢ ﻳﻮﻡ ﻣﺎ ﻧﺎﻡ ﻛﻮﻳﺲ ،
ﻭﻗﺎﻡ ﺑﻌﺪ ﺗﻌﺐ ﻭﻟﻤﻦ ﻣﺮﻕ ﻭﻟﻘﻰ ﺍﻟﺪﻧﻴﺎ ﻣﻐﺎﺭﺏ ﺍﻧﺨﻠﻊ ﻭﻣﺎ ﺻﺪﻕ ﻭﺟﺎﺀ ﺻﺤﻰ ﺭﺑﻴﻊ ﻗﺎﻝ ﻟﻴﻬﻮ ﻣﺎﻟﻚ ﻳﺎﺧﻲ ﻣﺎ ﺻﺤﻴﺘﻨﻲ ﻟﻤﻦ ﺟﻴﺖ
ﺭﺑﻴﻊ ﻗﺒﻞ ﻣﻨﻮ ﻋﻠﻲ ﺍﻟﺤﻴﻂ ﻭﻋﻴﻮﻧﻮ ﻣﺎ ﻓﺘﺤﻬﺎ ﻭﻗﺎﻝ ﻟﻴﻬﻮ ﻧﻮﻡ ﻧﻮﻡ ﺑﻌﺪ ﻛﺪﺍ ﺍﻟﺒﺺ ﺣﻘﻜﻢ ﺑﻜﻮﻥ ﻓﺎﺕ ﻣﺎ ﺑﺘﻠﺤﻘﻮ
ﻭﻋﺒﺎﺱ ﻗﻌﺪ ﻳﺘﺄﻓﻒ ﻭﻳﺴﻨﺘﺖ ، ﻳﻮﻡ ﺿﺎﻉ ﺳﺎﻱ ﻻ ﻣﺸﻰ ﻓﻴﻬﻮ ﻟﻮﺩ ﺍﻟﻀﻮ ﻭﻻ ﻋﻤﻞ ﻓﻴﻬﻮ ﺣﺎﺟﺔ ﻭﻟﻮ ﻣﺸﻰ ﻻ ﺑﻠﺤﻖ ﻭﺩ ﺍﻟﻀﻮ ﻭﻻ ﺑﻠﺤﻖ ﺍﻟﺒﺺ ﻭﺩﺧﻞ ﺍﺳﺘﺤﻤﻰ ﻭﺟﺎﺀ ﻗﻌﺪ ﻭﻛﻞ ﻣﺮﺓ ﻳﺼﺤﻲ ﻓﻲ ﺭﺑﻴﻊ ﻭﻟﻘﺮﻳﺐ ﺍﻟﻌﺸﺎﺀ ﺣﺘﻴﻦ ﺭﺑﻴﻊ ﻗﺎﻡ ﺍﺳﺘﺤﻤﻰ ﻭﺟﺎﺀ ﻗﺎﻝ ﻟﻴﻬﻮ ﻭﺭﺡ ﻧﺎﻛﻞ ﻟﻴﻨﺎ ﺣﺎﺟﺔ ﻭﻧﺠﻲ ﻭﻣﺮﻗﻮﺍ
ﻣﺸﻮﺍ ﺍﻟﺴﻮﻕ ﺍﻟﻜﺒﻴﺮ ﻭﻗﻌﺪﻭﺍ ﻓﻲ ﻣﻄﻌﻢ ﻋﺒﺎﺱ ﻭﻫﻢ ﺑﻴﺎﻛﻠﻮﺍ ﻗﺎﻝ ﻟﻴﻬﻮ
_ ﻳﺎﺧﻲ ﺩﻱ ﺍﻭﻝ ﻣﺮﺓ ﺍﻧﻮﻡ ﻧﻮﻣﺔ ﻃﻮﻳﻠﺔ ﻟﺒﻌﺪ ﺍﻟﻌﺼﺮ ﻛﺪﺍ
_ ﺍﺣﺴﻦ ﻭﺍﻧﺎ ﺟﻴﺖ ﺍﻟﺴﺎﻋﺔ ﻋﺸﺮﺓ ﻟﻘﻴﺘﻚ ﺗﺸﺨﺮ ﺍﺑﻴﺖ ﺍﺻﺤﻴﻚ
_ ﺃﺭﻳﺘﻚ ﺍﻛﺎﻥ ﺻﺤﻴﺘﻨﻲ ﻳﺎﺥ
_ ﺍﺻﻠﻮ ﻣﺎ ﺑﺮﻳﺪ ﺍﺻﺤﻲ ﻟﻲ ﺯﻭﻝ ﻧﺎﻳﻢ ﻭﻻ ﺑﺮﻳﺪ ﺯﻭﻝ ﻳﺼﺤﻴﻨﻲ ﻭﻧﺎﺱ ﺍﻟﺒﻴﺖ ﻋﺎﺭﻓﻴﻦ ﻛﺪﺍ ، ﺍﻟﻨﻮﻡ ﻣﻤﺘﻊ ﺑﺲ ﺍﻧﺎ ﺯﻭﻝ ﺳﻘﺪ ﻭﺑﺴﺎﻫﺮ ﻛﺘﻴﺮ ﻣﺎ ﺯﻳﻚ ،
_ ﺍﻟﺠﺎﺑﺮﻙ ﺷﻨﻮ ﻋﻠﻲ ﺍﻟﺴﻬﺮ ؟
_ ﺍﻧﺎ ﻣﻦ ﺧﻔﺎﻓﻴﺶ ﺍﻟﻀﻼﻡ ﻳﺎﺥ ، ﺷﻐﺎﻝ ﻭﻣﺴﻄﻮﻝ ﻟﻴﻼ ﻭﻧﺎﻳﻢ ﻣﺘﻨﺪﻝ ﻧﻬﺎﺭﺍ ﻭﻣﺎ ﻓﻲ ﺍﺣﻠﻰ ﻣﻦ ﺍﻟﻠﻴﻞ
_ ﺍﻟﻠﻴﻞ ﻟﻠﻨﻮﻡ ﻭﺍﻟﻨﻬﺎﺭ ﻟﻠﻤﻌﺎﺵ
_ ﻧﺤﻦ ﻋﻜﺲ ﻭﻣﻌﺎﺷﻨﺎ ﻟﻴﻞ ﻭﻧﻮﻣﻨﺎ ﺑﺎﻟﻨﻬﺎﺭ ، ﻳﺎﺥ ﺍﻧﺎ ﻣﺮﺍﺕ ﺑﺘﻤﻨﻰ ﺍﻟﺸﻤﺶ ﻛﻠﻮ ﻛﻠﻮ ﻣﺎ ﺗﻄﻠﻊ ﺷﺪﺓ ﻣﺎ ﺑﺮﻳﺪ ﺍﻟﻠﻴﻞ
_ ﺍﻟﻠﻴﻠﺔ ﺍﻧﺎ ﻳﻮﻣﻲ ﺿﺎﻉ ﺳﺎﻱ
_ ﺍﻣﻜﻦ ﻟﺨﻴﺮ ﻭﻛﻮﻳﺲ ﺍﻧﻚ ﻣﺎ ﻣﺸﻴﺖ ﻭﺑﻌﺪﻳﻦ ﺑﺴﻮﻗﻚ ﻣﻌﺎﻱ ﻣﺸﻮﺍﺭ ﺳﻤﺢ ﻓﻴﻬﻮ ﻣﺴﺤﺔ ﺷﻨﺐ ﺳﻤﺤﺔ
_ ﻣﺴﺤﺔ ﺷﻨﺐ ﺩﻱ ﺷﻨﻮ ؟
_ ﻣﺎ ﺑﺘﻌﺮﻑ ﻣﺴﺤﺔ ﺍﻟﺸﻨﺐ ؟
_ ﺍﻭﻝ ﻣﺮﺓ ﺍﺳﻤﻊ ﺑﻴﻬﺎ
_ ﻳﺎﺥ ﺍﻧﺖ ﺻﻐﻴﺮ ﻳﺎﺥ ﺧﻼﺱ ﺑﻮﺭﻳﻚ ﻟﻴﻬﺎ ﺑﻌﺪﻳﻦ ﺑﻌﺪ ﺗﻤﺶ ﻣﻌﺎﻱ
_ ﺍﻣﺶ ﻣﻌﺎﻙ ﻭﻳﻦ ؟
_ ﺑﻮﺭﻳﻚ ﺑﻌﺪ ﻧﻤﺸﻲ ﺍﻟﺒﻴﺖ ﻣﺎ ﺑﻨﻔﻊ ﺍﻭﺭﻳﻚ ﻫﻨﺎ
_ ﺍﻫﺎ ﻣﺴﻌﻮﻝ ﻣﻦ ﺍﻟﺨﻴﺮ ، ﻭﻳﻦ ﺻﺎﺣﺒﻚ ﺍﺑﺠﺎﻛﻮﻣﺔ ؟
_ ﺩﺍ ﺍﻟﺬﻛﺮﻙ ﻟﻴﻬﻮ ﺷﻨﻮ ﻫﺴﻲ ؟
_ ﺍﺗﺬﻛﺮﺗﻮ ﺳﺎﻱ
ﺭﺑﻴﻊ ﻗﺮﺏ ﺭﺍﺳﻮ ﻣﻦ ﻋﺒﺎﺱ ﻭﻗﻌﺪ ﻳﺘﻜﻠﻢ ﻣﻌﺎﻫﻮ ﺑﺮﺍﺣﺔ ﺯﻱ ﺍﻟﻤﺎ ﺩﺍﻳﺮ ﺯﻭﻝ ﻓﻲ ﺍﻟﻤﻄﻌﻢ ﻳﺴﻤﻌﻮ ﻭﻗﺎﻝ
_ ﺍﻧﺖ ﻓﺮﺡ ﻭﺩ ﻋﻢ ﺍﺑﺠﺎﻛﻮﻣﺔ ﺑﺘﻌﺮﻓﻮ ﻣﻮﺵ ؟
_ ﺁﻱ ﻻﻗﻴﺘﻮ ﻣﻌﺎﻛﻢ
ﺭﺑﻴﻊ ﺻﺮ ﻟﻌﺒﺎﺱ ﻭﻗﺎﻝ ﻟﻴﻬﻮ ﻣﺎ ﺗﺘﻜﻠﻢ ﺑﺼﻮﺕ ﻋﺎﻟﻲ ﻭﻟﻼ ﺍﻗﻮﻝ ﻟﻴﻚ ﻏﻴﺮ ﻏﻴﺮ ﺍﻟﻤﻮﺿﻮﻉ ﺑﻌﺪ ﻧﻤﺮﻕ ﻭﻧﻤﺶ ﺍﻟﺒﻴﺖ
ﻭﺭﺑﻴﻊ ﻗﻌﺪ ﻳﻌﺎﻳﻦ ﻟﻴﻬﻮ ﻟﻮﺍﺣﺪ ﺑﻄﺮﻑ ﻋﻴﻨﻮ ﻭﻋﺎﻣﻞ ﻓﻴﻬﺎ ﻣﺮﻛﺰ ﻣﻊ ﻋﺒﺎﺱ
ﻋﺒﺎﺱ ﻗﺎﻝ ﻟﻴﻬﻮ ﻣﺎﻟﻚ ؟ ﺭﺑﻴﻊ ﺿﺤﻚ ﺿﺤﻜﺔ ﺑﺎﻳﺨﺔ ﻭﻏﻤﺰ ﻟﻌﺒﺎﺱ ﻭﻗﺎﻝ ﻟﻴﻬﻮ ﻳﻠﻼ ﺍﻛﻞ ﺳﺮﻳﻊ ﺳﺮﻳﻊ ﻋﺸﺎﻥ ﻧﻠﺤﻖ ﺍﻟﻜﻮﺭﺓ ﻗﺮﺑﺖ ﺗﺒﺪﺍ
ﻭﻋﺒﺎﺱ ﺳﻜﺖ ﻭﻗﻌﺪ ﻳﺎﻛﻞ ، ﺑﻌﺪ ﺷﻮﻳﺔ ﺭﺑﻴﻊ ﻗﺎﻝ ﻟﻴﻬﻮ ﺍﻣﺮﻑ ﻭﺍﻣﺶ ﻃﻮﺍﻟﻲ ﻳﺪﻳﻚ ﻣﺎ ﺗﻐﺴﻠﻬﺎ ﻫﻨﺎ ﻭﺍﺳﺘﻨﺎﻧﻲ ﻭﺭﺍﺀ ﺍﻟﻜﺸﻚ ﺩﺍﻙ
ﻋﺒﺎﺱ ﺩﺍﻳﺮ ﻳﺴﺄﻟﻮ ﺭﺑﻴﻊ ﺻﺮ ﻭﺷﻮ ﻭﺿﻐﻂ ﺳﻨﻮﻧﻮ ﻗﻮﻱ ﻭﻗﺎﻝ ﻟﻴﻬﻮ ﺍﻣﺮﻕ ﻳﺎﺥ
ﻋﺒﺎﺱ ﻃﻮﺍﻟﻲ ﻣﺮﻕ ﻭﻣﺸﻰ ﻋﻠﻲ ﺍﻻﻛﺸﺎﻙ ﻭﻗﻌﺪ ﻳﻌﺎﻳﻦ ﻟﺮﺑﻴﻊ ﻣﻦ ﺑﻌﻴﺪ ﻭﻋﻴﻨﻮ ﻟﻴﻬﻮ ﻭﺍﻗﻒ ﻟﻴﻬﻮ ﻣﻊ ﻭﺍﺣﺪ ﺑﺮﺓ ﺍﻟﻤﻄﻌﻢ ﻭﺯﻱ ﺍﻟﺒﻌﺘﺬﺭ ﻟﻴﻬﻮ ﻭﺍﻟﺰﻭﻝ ﺩﺍ ﻳﺘﻜﻠﻢ ﻣﻌﺎﻫﻮ ﻭﻣﺎﺩﻱ ﻟﻴﻬﻮ ﺍﺻﺒﻌﻮ ﺯﻱ ﺍﻟﺒﻬﺪﺩ ﻓﻲ ﺭﺑﻴﻊ
ﺑﻌﺪ ﺷﻮﻳﺔ ﻗﺒﻘﺐ ﺭﺑﻴﻊ ﻭﺟﺮﺍﻫﻮ ﻋﻠﻴﻬﻮ ﻭﻗﺎﻝ ﻟﻴﻬﻮ ﻛﻼﻡ ﻭﺩﻓﺮﻭ ﻭﺭﺑﻴﻊ ﺍﺗﺮﺗﺢ ﻗﺮﺏ ﻳﻘﻊ ﻭﺟﺎﺀ ﻟﻌﺒﺎﺱ
ﻋﺒﺎﺱ ﻗﺎﻝ ﻟﻴﻬﻮ ﺩﺍ ﻣﻨﻮ ﻭﻣﺎﻟﻮ ﻣﻌﺎﻙ
_ ﻣﻮﺿﻮﻉ ﻣﺎ ﻋﻠﻴﻚ ﻣﻨﻮ ؟
_ ﻣﻨﻮ ﻫﻮ ﻭﻓﻲ ﺷﻨﻮ ؟
_ ﺗﻌﺎﻝ ﻧﺸﺮﺏ ﻟﻴﻨﺎ ﺟﺒﻨﺔ ﻭﻧﻤﺸﻲ ﺍﻟﺒﻴﺖ ﺑﻜﻠﻤﻚ ﻫﻨﺎﻙ
_ ﺧﻠﻴﻬﺎ ﺍﻟﺠﺒﻨﺔ ﻳﺎﺥ ﻭﺭﺡ ﺑﺲ
ﺭﺑﻴﻊ ﺿﺤﻚ ﻭﺳﺎﻗﻮ ﺷﺮﺑﻮﺍ ﺷﺎﻱ ﻭ ﺟﺒﻨﺔ ﻭﻓﺎﺗﻮﺍ ﺍﻟﺒﻴﺖ ﻭﺭﺑﻴﻊ ﻗﺎﻝ ﻟﻴﻬﻮ ﻫﻨﺎ ﺑﻨﻨﻀﻢ ﺑﺮﺍﺣﺘﻨﺎ ﺍﻛﻨﺎ ﺑﻨﻘﻮﻝ ﻓﻲ ﺷﻨﻮ ﻗﺒﻴﻞ ؟
_ ﺍﻭﻝ ﺣﺎﺟﺔ ﺍﻟﺰﻭﻝ ﺩﺍ ﻣﺎﻟﻮ ﻣﻌﺎﻙ ؟
_ ﺷﻠﺖ ﻣﻨﻮ ﻗﺮﻭﺵ ﻭﻣﺎ ﺭﺟﻌﺘﻬﺎ ﻟﻴﻬﻮ ﻭﺯﺍﻳﻎ ﻣﻨﻮ ﻟﻲ ﻓﺘﺮﺓ
_ ﻋﺸﺎﻥ ﻛﺪﺍ ﻏﻴﺮﺕ ﻛﻼﻣﻚ ﻭﻗﻠﺖ ﺍﻟﻜﻮﺭﺓ ؟
_ ﻻ ﻻ ﻣﺎ ﻋﺸﺎﻥ ﺧﺎﻳﻒ ﻣﻨﻮ ﺑﺲ ﻣﺎ ﺗﺘﻜﻠﻢ ﻋﻦ ﺍﻟﻤﺨﺪﺭﺍﺕ ﻭﻟﻼ ﺍﻟﻤﺒﺎﺣﺚ ﻣﻊ ﺯﻭﻝ ﻓﻲ ﻣﺤﻞ ﻋﺎﻡ ﻧﻬﺎﺋﻲ
_ ﺗﻤﺎﻡ ﻳﻠﻼ ﻧﺮﺟﻊ ﻟﻤﻮﺿﻮﻉ ﺍﺑﺠﺎﻛﻮﻣﺔ _ ﺍﺑﺠﺎﻛﻮﻣﺔ ﻭﻓﺮﺡ ﺍﻫﺎ ﺩﻳﻞ ﻋﺴﺎﻛﺮ ﻭﺍﻻﺗﻨﻴﻦ ﻓﻲ ﺍﻟﻤﺒﺎﺣﺚ
_ ﺍﺑﺠﺎﻛﻮﻣﺔ ﻋﺴﻜﺮﻱ ؟
_ ﻭﻓﺮﺡ ﺯﺍﺗﻮ ﻋﺴﻜﺮﻱ ﻭﻓﻲ ﺍﻟﻤﺒﺎﺣﺚ
_ ﻭﺍﻧﺖ ﻋﺎﺭﻑ ﺍﻧﻬﻢ ﻋﺴﺎﻛﺮ ؟
_ ﻣﻦ ﺯﻣﺎﺍﺍﺍﻥ
_ ﻭﻣﺎ ﺧﺎﻳﻒ ﻳﻘﺒﻀﻮﻙ
_ ﻳﻘﺒﻀﻮﻧﻲ ﻟﺸﻨﻮ ؟ ﺍﻧﺎ ﺯﺍﺗﻲ ﻋﺴﻜﺮﻱ ﻣﻌﺎﻫﻢ ﻭﻓﻲ ﺍﻟﻤﺒﺎﺣﺚ ﻭﻛﻤﺎﻥ ﻓﻲ ﻣﻜﺎﻓﺤﺔ ﺍﻟﻤﺨﺪﺭﺍﺕ
_ ﺍﻧﺖ ﺟﺎﺩﻱ ؟ ﻗﻮﻝ ﻭﺍﻟﻠﻪ
_ ﻣﺎ ﻳﺤﺘﺎﺝ ﺍﺣﻠﻒ ﻟﻴﻚ ﻭﺩﻗﻴﻘﺔ ﺍﻧﻮﺭﻳﻚ ﺍﻟﻜﺎﺭﻧﻲ ﺣﻘﻲ
ﺭﺑﻴﻊ ﻋﻨﺪﻭ ﻃﺮﺑﻴﺰﺓ ﺣﻘﺖ ﺧﺸﺐ ﺻﻐﻴﺮﺓ ﻗﻠﺒﻬﺎ ﻭﻃﻠﻊ ﻟﻴﻬﻮ ﻛﺎﺭﻧﻲ ﻓﻴﻬﻮ ﺻﻮﺭﺗﻮ ﺍﻛﺎﻥ ﻣﺪﺧﻠﻮ ﺗﺤﺖ ﺍﻟﻄﺮﺑﻴﺰﺓ ﻣﺎ ﻓﻲ ﺯﻭﻝ ﺑﺸﻮﻓﻮ ﺍﻻ ﻳﻘﻠﺒﻬﺎ
ﻋﺒﺎﺱ ﺷﺎﻓﻮ ﻭﻗﻠﺒﻮ ﻭﺍﺩﺍﻫﻮ ﻟﻴﻬﻮ ﻭﻗﻌﺪ ﻳﺘﻜﺸﻢ ﻭﺍﺗﻜﻴﻒ ﻣﻦ ﺭﺑﻴﻊ ﺷﺪﻳﺪ ﻭﻗﺎﻝ ﻟﻴﻬﻮ ﻭﺍﻟﻠﻪ ﺍﻧﺎ ﻗﺎﻳﻠﻚ ﺯﻭﻝ ﺻﺎﻳﻊ ﻭﺿﺎﻳﻊ ﺳﺎﻱ
_ ﺃﻱ ﺯﻭﻝ ﻗﺎﻳﻠﻨﻲ ﻛﺪﺍ ﻭﺩﻱ ﻣﻬﻤﺘﻲ ﺍﻧﻲ ﺍﺑﻘﻰ ﺑﺘﺎﻉ ﻣﺨﺪﺭﺍﺕ ﻭﺯﻭﻝ ﺳﺒﻬﻠﻞ ﻭﻏﺸﺎﺵ ﻭﺑﺼﺎﺣﺐ ﺍﻱ ﺯﻭﻝ ﻋﺸﺎﻥ ﺍﻗﺪﺭ ﺃﻛﺸﻔﻬﻢ
_ ﻭﻗﺒﻀﺖ ﻛﻢ ؟
_ ﻋﻴﻴﻴﻴﻚ ﻛﺘﻴﺮ ، ﻭﺍﻧﺎ ﺑﻌﻤﻞ ﺗﻘﺎﺭﻳﺮ ﻭﺑﺮﺳﻠﻬﺎ ﻭﺍﻟﻘﺒﺾ ﺩﺍ ﻣﻬﻤﺔ ﻋﺴﺎﻛﺮ ﺗﺎﻧﻴﻴﻦ
_ ﻃﻴﺐ ﻳﺎﺥ ﻳﻮﻣﺪﺍﻙ ﻟﻤﻦ ﻛﻨﺖ ﻣﻌﺎﻛﻢ ﺍﺑﺠﺎﻛﻮﻣﺔ ﺍﺩﺍﻙ ﺑﻨﻘﻮ ﺻﺎﺡ ؟
_ ﺃﻳﻮﺓ ﻭﻛﻮﻳﺲ ﺍﻧﺖ ﺫﻛﺮﺗﻨﻲ ﻋﺸﺎﻥ ﺍﺭﺟﻊ ﻟﻴﻚ ﻗﺮﻭﺷﻚ ﺍﻟﺸﻠﺘﻬﺎ ﻣﻨﻚ ﻋﻨﺪﻫﻢ
_ ﻳﻤﻴﻦ ﺑﺎﻟﻠﻪ ﻣﺎ ﺗﺮﺟﻊ ﻣﺎ ﺗﻌﻤﻞ ﻟﻲ ﺯﻱ ﻓﺮﺡ ﺻﺎﺣﺒﻚ ﻭﺍﻟﻠﻪ ﺗﺮﺟﻌﻬﺎ ﻫﺴﻲ ﺍﻓﻮﺕ ﻣﻨﻚ ﻓﻲ ﻟﻴﻠﻲ ﺩﺍ ﻭﺗﺎﻧﻲ ﻟﻴﻮﻡ ﺍﻟﺪﻳﻦ ﻣﺎ ﺍﻧﻀﻢ ﻣﻌﺎﻙ ﻭﻻ ﺧﻠﻘﺘﻲ ﺩﻱ ﻣﺎ ﺗﺸﻮﻓﻬﺎ
_ ﺑﺮﺍﺣﺔ ﺑﺮﺍﺣﺔ ﺳﻤﺢ ﺷﻨﻮ ﺍﻟﻮﺭﺭﺭﺭ ﻗﻌﺪﺕ ﺗﺘﺤﻠﻒ
_ ﻭﺍﻟﻠﻪ ﻣﺎ ﺗﺮﺟﻊ
_ ﺧﻼﺱ ﻳﺎﺥ ﻣﺎ ﺑﺮﺟﻌﻬﺎ ﺧﻼﺱ
_ ﺁﻱ ﻭﻻ ﺗﺠﻴﺐ ﻟﻲ ﺳﻴﺮﺗﻬﺎ ﺗﺎﻧﻲ
_ ﻧﺴﻴﺘﻬﺎ ﻛﻠﻮ ﻛﻠﻮ ﺧﻼﺱ ﺍﺑﺮﺩ ﺍﺑﺮﺩ ، ﻳﻠﻼ ﺍﺑﺠﺎﻛﻮﻣﺔ ﺍﺩﺍﻧﻲ ﺑﻨﻘﻮ ﻋﺸﺎﻥ ﺍﻭﺭﻳﻬﻮ ﻟﺘﺎﺟﺮ ﻧﻈﺎﻡ ﻋﻴﻨﺔ
_ ﻋﻴﻨﺔ ﻳﻌﻨﻲ ﺷﻨﻮ ؟
_ ﻳﻌﻨﻲ ﺍﻭﺭﻳﻬﻮ ﺟﺰﻭ ﻣﻦ ﺍﻟﺒﻀﺎﻋﺔ ﺍﻟﻌﻨﺪﻱ
_ ﺗﺠﺮﺑﺔ ﺗﺠﺮﺑﺔ ﻳﻌﻨﻲ
_ ﻋﻠﻴﻚ ﻧﻮﻭﻭﻭﺭ ﺗﺠﺮﺑﺔ
_ ﺍﻧﺎ ﻛﺪﺍ ﻓﻬﻤﺖ
_ ﺑﺲ ﺍﻭﻋﻰ ﻓﺮﺡ ﻭﻟﻼ ﺍﺑﺠﺎﻛﻮﻣﺔ ﻳﻌﺮﻓﻮﺍ ﺍﻧﻲ ﻭﺭﻳﺘﻚ ﺍﻟﻜﻼﻡ ﺩﺍ ﻻﻧﻮ ﺩﻱ ﺍﺳﺮﺍﺭ ﺷﻐﻞ ﻭﺑﺘﺪﺧﻠﻨﻲ ﻓﻲ ﺣﺘﺔ ﺿﻴﻘﺔ ﻭﺍﻟﺪﻟﻴﻞ ﻟﻮ ﻻﻗﻴﺘﻬﻢ ﺑﻘﻮﻟﻮﺍ ﻟﻴﻚ ﺍﺑﻌﺪ ﻣﻦ ﺭﺑﻴﻊ
، ﻭﺍﻟﻠﻪ ﻗﺎﻟﻮﻫﺎ ﻟﻲ ﺍﻻﺗﻨﻴﻦ ﻭﺍﻟﻠﻪ ﻳﺎ ﺭﺑﻴﻊ ﺍﻟﻄﻠﻌﺖ ﻣﺒﺎﺣﺚ ﻭﺍﻧﺎ ﻛﻨﺖ ﻗﺎﻳﻠﻚ ﺯﻭﻝ ﻛﻌﺐ ، ﻟﻜﻦ ﺍﻧﺖ ﺑﺘﺸﺮﺏ ﺑﻨﻘﻮ ﻟﺸﻨﻮ
_ ﻣﺰﺍﺝ ﺳﺎﻱ ﻭﺑﻌﺪﻳﻦ ﺩﺍ ﺑﻨﻘﻮ ﺃﻱ ﻛﻼﻡ ﻣﺎ ﺑﻀﺮ ، ﻭﻋﺸﺎﻥ ﺑﺘﺎﻋﻴﻦ ﺍﻟﻤﺨﺪﺭﺍﺕ ﻣﺎ ﻳﺸﻜﻮﺍ ﻓﻴﻨﻲ ﻭﻳﻘﺘﻠﻮﻧﻲ ﻣﺴﺘﻌﺪ ﺃﻱ ﺷﻲ ﺍﺳﻮﻳﻬﻮ
_ ﻳﻜﺘﻠﻮﻙ ﻋﺪﻳﻞ ؟
_ ﺯﻱ ﺍﻟﻤﺎ ﺣﺼﻞ ﺣﺎﺟﺔ ﻭﺭﻛﻚ ﻋﻠﻲ ﻃﻠﻘﺔ ﻭﻟﻼ ﻃﻌﻨﺔ ﺑﺴﻜﻴﻦ ﺑﺠﻴﺒﻮﺍ ﺃﺟﻠﻚ ﻓﻲ ﺛﻮﺍﻧﻲ ﻭﻛﺘﺎﺭ ﺍﻻﻧﻜﺸﻔﻮ ﻭﻛﺘﻠﻮﻫﻢ
_ ﺑﺘﺘﻜﻠﻢ ﺟﺪ ؟
_ ﻛﺎﻥ ﻣﻌﺎﻱ ﺯﻣﻴﻠﻲ ﻭﺯﻭﻝ ﺫﻛﻲ ﺧﻼﺱ ﻭﻣﻔﺘﺢ ﻛﺸﻔﻮﻫﻮ ﻭﺑﻌﺪ ﻛﺘﻠﻮﻫﻮ ﺟﺪﻋﻮﻫﻮ ﺑﺮﺓ ﻣﺪﻧﻲ
ﺣﺎﺩﺛﺔ ﻣﺸﻬﻮﺭﺓ ﻣﺪﻧﻲ ﺩﻱ ﻛﻠﻬﺎ ﺳﻤﻌﺖ ﺑﻴﻬﺎ ﻭﺍﻧﺎ ﺯﺍﺗﻲ ﺍﺣﺘﻤﺎﻝ ﻓﻲ ﺍﻱ ﻭﻗﺖ ﺍﻧﻜﺸﻒ ﻭﺃﻟﺤﻘﻮﻧﻲ ﻟﻴﻬﻮ ﻭﺍﻧﺖ ﻟﻮ ﻣﺎ ﻭﺍﺛﻖ ﻓﻴﻚ ﻣﺎ ﻭﺭﻳﺘﻚ
ﻋﺒﺎﺱ ﻋﺎﻳﻦ ﻟﺮﺑﻴﻊ ﻭﻛﺎﻥ ﻣﺒﺘﺴﻢ ﺍﺑﺘﺴﺎﻣﺔ ﺍﻋﺠﺎﺏ ﻭﻗﺎﻝ ﻟﻴﻬﻮ ﻭﺍﻟﻠﻪ ﻛﺒﺮﺕ ﻓﻲ ﻧﻈﺮﻱ ﻳﺎ ﺭﺑﻴﻊ ﻳﺎﺥ ﻭﺍﻧﺎ ﺑﻔﺘﺨﺮ ﺑﻴﻚ ﻭﺑﻤﻌﺮﻓﺘﻚ
_ ﻣﺎ ﻋﺎﺭﻑ ﻭﺭﻳﺘﻚ ﻟﺸﻨﻮ ﻻﻧﻮ ﺍﻟﺴﺮ ﺩﺍ ﻟﻮ ﺍﻧﻜﺸﻒ ﺍﻟﻠﻴﻠﺔ ﺑﻘﺘﻠﻮﻧﻲ
_ ﻭﺍﻟﻠﻪ ﻣﻊ ﺭﻭﺣﻲ ﻣﺎ ﺍﻧﻀﻢ ﺑﻴﻬﻮ ﺍﻧﺖ ﺯﻭﻝ ﺍﺧﻮﻱ ﻭﺑﺨﺎﻑ ﻋﻠﻴﻚ ﺯﻱ ﺭﻭﺣﻲ
_ ﻋﺎﺯﻗﻚ ﺿﻜﺮﺍﻥ ﺍﻧﺎ ﻭﺍﻣﺲ ﻛﺎﻥ ﻋﻨﺪﻧﺎ ﻋﻤﻠﻴﺔ ﺗﺴﻠﻴﻢ ﻣﺨﺪﺭﺍﺕ ﺑﻌﺪ ﺳﻠﻤﻨﺎ ﺍﻟﺒﻀﺎﻋﺔ ﻟﻠﺘﺎﺟﺮ ﻣﺸﻴﺖ ﻭﺩﻳﺖ ﺍﻟﺘﻘﺮﻳﺮ ﻣﻊ ﺻﻼﺓ ﺍﻟﺼﺒﺢ ﻭﺍﻟﺸﺒﺎﺏ ﻣﺴﻜﻮﻫﻢ ﺍﻟﺴﺎﻋﺔ ﺳﺘﺔ ﻭﺍﻟﻠﻴﻠﺔ ﺑﺮﺿﻮ ﻋﻨﺪﻧﺎ ﻋﻤﻠﻴﺔ
_ ﺍﻧﺎ ﺑﻘﺪﺭ ﺍﺳﺎﻋﺪ ﺑﺸﻲ ؟
_ ﻻ ﻻ ﻭﻻ ﺑﺪﺧﻠﻚ ﻓﻲ ﺍﻻﻣﻮﺭ ﺩﻱ
_ ﺍﻟﻤﻬﻢ ﺃﻱ ﺧﺪﻣﺔ ﺍﻧﺎ ﺟﺎﻫﺰ ﺍﻻ ﻣﺎ ﺗﻘﻮﻝ ﻟﻲ
_ ﺑﺲ ﺍﻛﺘﻢ ﺳﺮﻱ ﺑﺲ
_ ﺳﺮ ﺷﻨﻮ ؟ ﻭﻻ ﺑﻌﺮﻑ ﻋﻨﻚ ﺍﻱ ﺷﻲ ﺍﻧﺖ ﺯﻭﻝ ﺻﺎﻳﻊ ﺑﺘﺎﻉ ﻣﺨﺪﺭﺍﺕ ﺑﺲ
ﺍﻟﻌﺮﺑﻴﺔ ﺟﺎﺕ ﻭﺩﻗﺖ ﺍﻟﺒﻮﺭﻱ ﻭﻋﺒﺎﺱ ﻧﺎﻡ ﻃﻮﺍﻟﻲ . ﻭﺻﺤﻰ ﺍﻟﺼﺒﺎﺡ ﺑﺪﺭﻱ ﻭﻣﺸﻰ ﺍﻟﺴﻮﻕ ﺍﻟﺸﻌﺒﻲ ﻛﺎﻳﺲ ﻟﻌﻤﺮ ﻭﺩ ﺍﻟﻀﻮ ﻭﺍﻟﻮﻛﺖ ﺩﺍﻙ ﺑﺺ ﺍﻟﺤﻠﺔ ﻭﻻ ﺟﺎﺀ ﻭﺍﻧﺘﻈﺮﻭ ﺑﻌﻴﺪ ﻣﻦ ﺍﻟﻤﻜﺎﻥ ﺍﻟﺒﻘﻴﻒ ﻓﻴﻬﺎ ﻻﻧﻮ ﻣﺎ ﺩﺍﻳﺮ ﺯﻭﻝ ﻣﻦ ﺍﻟﺤﻠﺔ ﻳﻌﺮﻓﻮ ﺟﺎﺀ ﻣﺪﻧﻲ ﻏﻴﺮ ﻭﺩ ﺍﻟﻀﻮ
ﺍﻟﺒﺺ ﺟﺎﺀ ﻭﺍﻟﻨﺎﺱ ﻧﺰﻟﻮﺍ ﻣﻨﻮ ﻭﺍﻱ ﺯﻭﻝ ﻓﺎﺕ ﻋﻠﻲ ﻣﺸﻬﺎﺩﻭ ﻋﻤﺮ ﻣﺸﻰ ﻋﻠﻲ ﺍﻟﻌﺮﺑﺎﺕ ﺍﻟﻤﺎﺷﺔ ﺍﻟﺴﻮﻕ ﺍﻟﻜﺒﻴﺮ ﻭﺍﻭﻝ ﻣﺎ ﺭﻛﺐ ﻭﻗﻌﺪ ﻋﺒﺎﺱ ﺭﻛﺐ ﻭﻗﻌﺪ ﺟﻤﺒﻮ
_ ﺍﺯﻳﻚ ﺁ ﻭﺩ ﺍﻟﻀﻮ
_ ﺑﺴﻢ ﺍﻟﻠﻪ ﺧﻠﻌﺘﻨﻲ ﻳﺎﺥ ﺁ ﻋﺒﺎﺱ ﻣﺎ ﻣﺘﻮﻗﻌﻚ ، ﻛﻴﻒ ﺗﻤﺎﻡ ﻭﺟﻴﺖ ﻣﺘﻴﻦ ﻫﻨﺎ ؟
_ ﻣﻦ ﺍﻭﻝ ﺍﻣﺲ ﻭﺟﻴﺖ ﻭﺭﺍﻙ ﻃﻮﺍﻟﻲ ﺑﺲ ﻟﻘﻴﺘﻚ ﻣﺸﻴﺖ ﺍﻟﺤﻠﺔ ﻣﺎ ﻟﺤﻘﺖ ﺍﻟﺒﺺ
_ ﻣﺎﻟﻚ ﻃﻴﺐ ﻣﺎﺩﺍﻡ ﻣﻦ ﺍﻭﻝ ﺍﻣﺲ ﻣﺎ ﺟﻴﺖ ﺍﻟﺤﻠﺔ
_ ﺑﺮﺿﻮ ﺍﻟﻴﻮﻡ ﺍﻟﺘﺎﻧﻲ ﺍﻟﺒﺺ ﻓﺎﺗﻨﻲ
_ ﻟﻴﻪ ﻛﻨﺖ ﻭﻳﻦ ؟
_ ﻧﺎﻳﻢ ﻭﺍﻟﻠﻪ ﻟﻠﻤﻐﺮﺏ ، ﺑﺘﺼﺪﻕ ؟
_ ﺩﺍ ﻧﻮﻡ ﺷﻨﻮ ﺩﺍ ﻭﺍﻟﻠﻪ ﻣﺮﺗﺎﺡ ﻟﻜﻦ
_ ﺍﻟﻤﻬﻢ ﺍﻧﺖ ﻋﻤﻠﺖ ﺷﻨﻮ ؟
_ ﻓﻲ ﺷﻨﻮ ؟
_ ﻓﻲ ﺍﻟﻘﺮﻭﺵ ﺍﻟﻤﻌﺎﻙ
_ ﻳﻠﻼ ﺷﻮﻑ ﺑﻌﻴﻨﻚ ﻫﺴﻲ ﺑﻨﺼﻞ ﺍﻟﺪﻛﺎﻥ
_ ﻣﺎ ﺗﻘﻮﻝ ﻟﻲ ﺍﺷﺘﺮﻳﺖ ﺍﻟﺪﻛﺎﻥ ﺑﺲ
_ ﻗﺒﻞ ﺍﺳﺒﻮﻉ
ﻋﺒﺎﺱ ﺍﺗﻀﺎﻳﻖ ﻭﺑﻄﻨﻮ ﻃﻤﺖ ﻭﺯﻋﻞ ﺷﺪﻳﺪ ﻟﻤﻦ ﻗﻌﺪ ﻳﻌﻀﻌﺾ ﻓﻲ ﺳﻨﻮﻧﻮ ﻣﻦ ﺍﻟﺰﻋﻞ ﻭﻭﺩ ﺍﻟﻀﻮ ﻓﻜﺮ ﻟﻴﻬﻮ ﻭﻋﻤﻞ ﻓﻴﻬﺎ ﻣﺎ ﺷﺎﻳﻔﻮ
ﻭﺳﻜﺘﻮﺍ ﻟﺤﺪﻱ ﻣﺎ ﻧﺰﻟﻮﺍ ﻭﻣﺸﻮﺍ ﻋﻠﻲ ﺍﻟﺪﻛﺎﻥ ﻭﻋﺒﺎﺱ ﻛﺮﻫﺎﻧﻮ ﻭﻛﺮﻫﺎﻥ ﺍﻟﺪﻛﺎﻥ ﻗﺒﺎﻝ ﻳﺨﺸﻮ ﻭﻳﺸﻮﻓﻮ
ﻭﺩ ﺍﻟﻀﻮ ﻓﺘﺢ ﺍﻟﺪﻛﺎﻥ ﻭﺍﻛﺎﻥ ﻣﻈﺒﻂ ﺍﻟﺮﻓﻮﻑ ﻭﺍﻻﺩﺭﺍﺝ ﻭﻣﺠﻬﺰﻭ ﺑﺎﻟﻜﺎﻣﻞ ﺍﻛﺎﻥ ﻧﺎﻗﺼﻮ ﺑﺲ ﺍﻟﺒﻀﺎﻋﺔ ﻭﺣﺘﻰ ﺍﻟﻠﻮﺣﺔ ﺭﻛﺒﻬﺎ
_ ﺧﺶ ﺧﺶ ﺁ ﻋﺒﺎﺱ ﻭﺗﻌﺎﻝ ﺷﻮﻑ ﺍﺧﻮﻙ ﻭﺩ ﺍﻟﻀﻮ ﻋﻤﻞ ﺷﻨﻮ
_ ﺷﺎﻳﻒ ﻣﺒﺮﻭﻙ
_ ﻭﻣﺎﻟﻚ ﻗﺎﻳﻠﻬﺎ ﻛﺪﺍ ؟
_ ﺍﻧﺖ ﺑﻌﺖ ﺍﻟﻜﺸﻚ ﺣﻘﻚ ؟
_ ﺍﻳﻮﺓ ﻭﺑﻌﺘﻮ ﺑﺒﻀﺎﻋﺘﻮ ﺑﺴﺒﻌﻴﻦ ﻭﺍﺷﺘﺮﻳﺖ ﺩﺍ ﺑﻤﻴﺔ ﻭﺍﺭﺑﻌﻴﻦ ﻭﺍﺷﺘﺮﻳﺖ ﺑﻀﺎﻋﺔ ﺑﺨﻤﺴﻴﻦ ﻣﺎ ﺧﻠﻴﺖ ﺷﻲ ﺑﺘﺠﻲ ﺍﻟﻠﻴﻠﺔ ﻭﺑﺘﺸﻮﻓﻬﺎ ﻛﻞ ﺷﻲ ﻣﻦ ﻭﺇﻟﻰ ﺣﺘﻰ ﻣﻼﺑﺲ ﻟﻠﻜﺒﺎﺭ ﻭﺍﻟﺼﻐﺎﺭ ﻭﺭﺟﺎﻝ ﻭﺣﺮﻳﻢ ﻭﺣﺘﻰ ﺍﻟﺒﻠﺪﻭﻫﻢ ﺍﻟﻠﻴﻠﺔ ﻣﺎ ﺧﻠﻴﺖ ﺷﻲ ﻧﺎﻗﺺ ﺗﺐ
_ ﺗﻤﺎﻡ ،ﺑﺲ ﺍﻧﺎ ﻭﺍﻟﻠﻪ ﺟﻴﺘﻚ ﺩﺍﻳﺮ ﺍﻟﻘﺮﻭﺵ ﻋﺸﺎﻥ ﺃﺃﺟﺮ ﻟﻲ ﻣﺤﻞ ﺍﻟﻜﺘﺮﻭﻧﻴﺎﺕ ﻓﻲ ﺍﻟﺨﺮﻃﻮﻡ
_ ﻳﺎ ﺯﻭﻝ ﺍﻟﻠﻪ ﺟﺎﺑﻚ ﺯﺍﺗﻮ ﻣﺎﻟﻚ ﻭﻣﺎﻝ ﺍﻟﺨﺮﻃﻮﻡ ﻭﺍﻟﺸﻘﺎﺀ ﺍﺷﺘﻐﻞ ﻣﻌﺎﻱ ﻫﻨﺎ ﺑﺲ
_ ﻻ ﻻ ﺍﻧﺎ ﺍﻟﺒﻠﺪ ﺩﻱ ﻣﺎ ﺑﺘﻨﻔﻊ ﻣﻌﺎﻱ ، ﺍﻫﺎ ﺍﻟﺤﻞ ﺷﻨﻮ ﻫﺴﻲ ﺍﻧﺎ ﻣﺎ ﺑﻘﺪﺭ ﺍﺭﺟﻊ ﺑﺮﺍ ﻗﺮﻭﺵ
_ ﺍﻻﻟﻜﺘﺮﻭﻧﻴﺎﺕ ﺑﺘﻌﺮﻑ ﻟﻴﻬﺎ ﺷﻨﻮ ﺍﻧﺖ ؟
_ ﺑﺘﻌﻠﻤﻬﺎ ﻣﺎ ﻣﺸﻜﻠﺔ ﺑﺲ ﺷﻐﻠﺔ ﻓﻮﻗﻬﺎ ﻓﺎﻳﺪﺓ ﺍﺧﻴﺮ ﻣﻦ ﺍﻟﻬﺪﻭﻡ
_ ﻋﺮﻓﺘﻬﺎ ﻛﻴﻒ ﻓﻴﻬﺎ ﻓﺎﻳﺪﺓ ؟
_ ﻋﺎﺭﻓﻬﺎ ﺍﻧﺎ ﻛﻮﻳﺲ
_ ﻭﺍﻟﻠﻪ ﺷﻮﻓﺔ ﻋﻴﻨﻚ ﻭﻭﺭﻳﺘﻚ ﺍﻧﺎ ﻋﻤﻠﺖ ﺷﻨﻮ ﻓﻲ ﺍﻟﻘﺮﻭﺵ ﻭﺍﺳﻤﻊ ﻛﻼﻣﻲ ﺟﺮﺍﺩﺓ ﻓﻲ ﺍﻟﻜﻒ ﺍﺧﻴﺮ ﻡ ...
ﻋﺒﺎﺱ ﻗﺎﻃﻌﻮﺍ ﻃﻮﺍﻟﻲ ﻣﺎ ﺧﻼﻫﻮ ﻳﻜﻤﻞ ﻛﻼﻣﻮ ﻭﻗﺎﻝ ﻟﻴﻬﻮ ﻣﺎ ﺍﺧﻴﺮ ﻭﻻ ﺷﻲ ﺍﻧﺎ ﺩﺍﻳﺮ ﺍﻟﻘﺮﻭﺵ ﺣﻘﺘﻲ
_ ﺍﺟﻴﺒﻬﺎ ﻟﻴﻚ ﻣﻦ ﻭﻳﻦ ؟
_ ﺍﺗﺼﺮﻑ ﻭﺍﻧﺎ ﻻﻗﻲ ﺍﻟﺪﻛﺎﻥ ﻣﺎ ﺗﻀﻴﻌﻮ ﻋﻠﻲ ﺳﺎﻱ
_ ﺍﺗﺼﺮﻑ ﻛﻴﻒ ﻭﻣﻦ ﻭﻳﻦ ﻭﺭﻳﻨﻲ ؟
_ ﺩﻱ ﻣﺸﻜﻠﺘﻚ ﻣﺎ ﻣﺸﻜﻠﺘﻲ ﺍﻧﺎ ﺁ ﻭﺩ ﺍﻟﻀﻮ ﺍﻟﻤﻬﻢ ﺍﻧﺎ ﺩﺍﻳﺮ ﺍﻟﻤﻴﺔ ﺃﻟﻒ ﺍﻟﻤﺴﻜﺘﻚ ﻟﻴﻬﺎ
_ ﺍﻧﺎ ﺍﻟﻤﺤﻞ ﻣﺎ ﻓﺘﺤﺘﻮ ﻟﺴﺔ
_ ﺑﻴﻌﻮﺍ ﺯﻱ ﻣﺎ ﺍﺷﺘﺮﻳﺘﻮ
_ ﺑﻌﺪ ﺑﻌﺖ ﺍﻟﻜﺸﻚ ﻭﺩﺧﻠﺖ ﻗﺮﻭﺷﻲ ﻛﻠﻬﺎ ﻓﻮﻗﻮ ﺍﺑﻴﻌﻮ ؟
_ ﺧﻼﺱ ﺍﺗﺼﺮﻑ ﺍﻧﺎ ﺩﺍﻳﺮ ﻗﺮﻭﺷﻲ ﺑﺲ
_ ﻭﺍﻟﻠﻪ ﺍﻧﺎ ﻗﺎﻳﻠﻚ ﺭﺍﺟﻞ ﺁ ﻋﺒﺎﺱ ﻣﺎ ﻗﺎﻳﻠﻚ ﻟﺴﺔ ﺷﺎﻓﻊ ﺳﺎﻱ
ﻋﺒﺎﺱ ﺑﻨﻬﺮﺓ ﻗﺎﻝ ﻟﻴﻬﻮ ﺭﺍﺟﻞ ﻓﻮﻕ ﻋﻴﻨﻚ ﻭﺍﺭﺟﻞ ﻣﻨﻚ ﻛﻤﺎﻥ ﺍﻭﻋﻚ ﺗﻘﻮﻝ ﺷﺎﻓﻊ
ﻭﺩ ﺍﻟﻀﻮ ﺿﺤﻚ ﻭﻗﺎﻝ ﻟﻴﻬﻮ ﻭﺍﻟﻠﻪ ﺷﺎﻓﻊ ﻭﻛﻼﻣﻚ ﻛﻼﻡ ﺷﻔﻊ
ﻋﺒﺎﺱ ﻃﻮﺍﻟﻲ ﻗﺒﻘﺐ ﻭﺩ ﺍﻟﻀﻮ ﻭﺻﺮﺥ ﻓﻲ ﻭﺷﻮ ﻣﺎ ﺗﻘﻮﻝ ﺷﺎﻓﻊ
ﻭﺩ ﺍﻟﻀﻮ ﺿﺤﻚ ﻭﻗﺎﻝ ﻟﻴﻬﻮ ﺑﺮﺿﻮ ﺩﻱ ﺣﺮﻛﺎﺕ ﺷﻔﻊ ﻓﻚ ﻓﻚ
_ ﻣﺎ ﺑﻔﻚ ، ﺍﺩﻳﻨﻲ ﻗﺮﻭﺷﻲ ﺑﺲ ﻗﺒﺎﻝ ﺃﻟﻔﻬﺎ ﻣﻌﺎﻙ
_ ﻭﺍﻟﻠﻪ ﺍﺗﻠﻮﻣﺖ ﻣﻌﺎﻱ ﻟﻜﻦ ﺁ ﻋﺒﺎﺱ
_ ﺍﺗﻠﻮﻣﺖ ﻣﺎ ﺍﺗﻠﻮﻣﺖ ﺍﻧﺎ ﺩﺍﻳﺮ ﻗﺮﻭﺷﻲ ﺑﺲ ﻭﻟﻼ ﺑﺨﻨﻘﻚ ﻫﻨﺎ ﻭﺍﻧﺘﻬﻲ ﻣﻨﻚ
ﻭﺩ ﺍﻟﻀﻮ ﺩﻓﺮ ﻋﺒﺎﺱ ﺑﻌﻴﺪ ﻭﻫﻮ ﻣﺎﻧﻊ ﻭﻋﺒﺎﺱ ﺭﻗﻴﻖ ﻭﻗﺎﻝ ﻟﻴﻬﻮ ﻣﺎ ﺍﺩﻳﺘﻨﻲ ﻗﺮﻭﺵ
_ ﻛﻴﻒ ﻣﺎ ﺍﺩﻳﺘﻚ ﻗﺮﻭﺵ ﺁ ﻭﺩ ﺍﻟﻀﻮ ؟
_ ﺍﻣﺶ ﺍﺷﺘﻜﻴﻨﻲ ﻭﻻ ﺟﻨﻴﻪ ﻣﺎ ﺍﺩﻳﺘﻨﻲ ﻟﻴﻬﻮ ﻣﺎﺩﺍﻡ ﺑﻘﺖ ﻓﻴﻬﺎ ﻗﻠﺔ ﺍﺩﺏ ﻭﻗﺒﻘﻴﺐ ﺍﻧﺎ ﺯﺍﺗﻲ ﺑﻮﺭﻳﻚ ﺍﻧﺎ ﺷﻨﻮ ﻭﺍﻟﻠﻪ ﻣﺴﺘﻌﺪ ﻫﺴﻲ ﻟﻮ ﻣﺎ ﺑﻌﺎﻳﻦ ﻻﻫﻠﻚ ﺃﻛﻔﺘﻚ ﻭﺍﺩﻗﻚ ﻟﻤﻦ ﺗﺎﻛﻞ ﻳﺪﻳﻚ ﻳﻠﻼ ﺍﻃﻠﻊ ﺑﺮﺓ
_ ﺍﻧﺎ ﺑﻄﻠﻊ ﻟﻜﻦ ﻭﺍﻟﻠﻪ ﻣﺎ ﺍﺧﻠﻴﻚ ﻭﺍﻟﻠﻪ ﺗﻨﺪﻡ