ﺍﻟﺼﺒﺎﺡ ﻋﺒﺎﺱ ﻗﺎﻝ ﻟﻔﺮﺡ ﺍﻧﺎ ﺍﻟﻠﻴﻠﺔ ﻣﺎﺷﻲ ﻣﺪﻧﻲ
_ ﺍﻧﺖ ﺟﻴﺖ ﻣﻨﻬﺎ ﺍﻣﺲ
_ ﺍﻭﻝ ﺍﻣﺲ ﻳﺎﺥ
_ ﺍﻣﺲ ﻭﺍﻭﻝ ﺍﻣﺲ ﺍﻟﻔﺮﻕ ﺷﻨﻮ ؟
_ ﺧﻠﻴﺖ ﺍﻣﻲ ﻓﻲ ﺍﻟﻤﺴﺘﺸﻔﻰ ﺭﺍﺟﻠﻬﺎ ﻋﻴﺎﻥ ﻭﻃﻮﻟﺖ ﻣﻦ ﺍﻟﺤﻠﺔ ﻣﺸﻴﺎﺗﻲ ﺩﻳﻞ ﭼﺖ ﻣﺎ ﻣﺸﻴﺘﻠﻬﺎ ﻭﺣﺪﻱ ﻣﺪﻧﻲ ﺑﺲ
_ ﻳﺎ ﺯﻭﻝ ﺧﻴﺮ ﺍﻟﻠﻪ ﻳﺸﻔﻴﻬﻮ ، ﺑﺲ ﺭﻭﺣﻚ ﻃﻮﻳﻠﺔ ، ﺍﻧﺎ ﻛﺎﻥ ﻣﺸﻴﺖ ﻣﺮﺓ ﻭﺍﺣﺪﺓ ﺑﺰﻫﺞ ﻣﻦ ﺍﻟﻘﻌﺪﺓ ﻭﺍﻟﻄﺮﻳﻖ ﻣﻊ ﺍﻧﻬﺎ ﻣﺎ ﺑﻌﻴﺪﺓ
_ ﺍﻧﺎ ﻏﺎﻳﺘﻮ ﺍﺗﻌﻮﺩﺕ . ﺍﻫﺎ ﻋﻨﺪﻙ ﻭﺻﻴﺔ ﻻﻧﻲ ﺍﺣﺘﻤﺎﻝ ﻛﺒﻴﺮ ﺍﻏﺸﻰ ﺍﺑﺠﺎﻛﻮﻣﺔ ﺍﺳﻠﻢ ﻋﻠﻴﻬﻮ
_ ﻻ ﻻ ﻣﺎ ﻋﻨﺪﻱ ﺍﻱ ﻭﺻﻴﺔ ، ﺑﺲ ﻛﻨﺖ ﺩﺍﻳﺮﻙ ﺗﻘﻌﺪ ﻣﻊ ﺍﻟﺘﺎﺝ ﺩﺍ ﻛﻢ ﻳﻮﻡ ﻋﺸﺎﻥ ﺗﺮﻓﻊ ﻟﻲ ﺗﻘﺮﻳﺮ
_ ﺑﻌﺪ ﺍﺟﻲ ﻣﻦ ﻣﺪﻧﻲ ﻭﺗﻘﺎﺭﻳﺮ ﻣﺎ ﺗﻘﺮﻳﺮ ﻭﺍﺣﺪ ، ﻳﻠﻼ ﻣﻊ ﺍﻟﺴﻼﻣﺔ
ﻓﻲ ﺍﻟﺤﺎﻓﻠﺔ ﻋﺒﺎﺱ ﻗﻌﺪ ﻳﻔﻜﺮ ﻭﻗﺎﻝ ﻓﺮﺡ ﺍﻣﺲ ﻋﻤﻠﻬﺎ ﻇﺎﻫﺮﺓ ﺷﺎﻝ ﺍﻟﻤﻔﺘﺎﺡ ﺣﻖ ﺑﻴﺖ ﺍﻟﺘﺎﺝ ﺻﻮﺭﻭ ﻗﺎﻳﻠﻨﻲ ﻣﺎ ﺑﻨﺘﺒﻪ ﻟﻴﻬﻮ ﻟﻜﻦ ﺩﺍﻳﺮ ﺑﻴﻬﻮ ﺷﻨﻮ ﻫﻮ ﻭﻣﺎﻟﻮ ﻣﺎ ﻛﻠﻤﻨﻲ ﻋﺪﻳﻞ ﻟﻮ ﺍﻟﻤﻔﺘﺎﺡ ﺑﺨﺪﻡ ﺑﺸﻲ ، ﺑﻜﻮﻥ ﺩﺍﻳﺮ ﻳﻔﺘﺸﻮ ؟ ﺑﺲ ﻫﻮ ﻛﺎﻥ ﻣﻤﻜﻦ ﻳﻔﺘﺸﻮ ﻓﻲ ﺍﻱ ﻭﻛﺖ ﻭﺑﻄﺮﻳﻘﺔ ﺭﺳﻤﻴﺔ ، ﻣﻌﻘﻮﻝ ﻳﻜﻮﻥ ﺩﺍﻳﺮ ﻳﺴﺮﻕ ﺣﺎﺟﺔ ﻣﻦ ﺍﻟﺒﻴﺖ ؟ ﺍﻟﻠﻪ ﺍﻋﻠﻢ ، ﺑﺲ ﺍﻟﺘﺎﺝ ﺳﺮﻗﺘﻮ ﺳﺎﻫﻠﺔ ﻻﻧﻮ ﺑﻤﺮﻕ ﻣﻦ ﺍﻟﺼﺒﺎﺡ ﻭﻣﺎ ﺑﺮﺟﻊ ﺍﻻ ﺍﻟﻤﻐﺮﺏ ﻭﺍﻟﻴﻮﻡ ﻛﻠﻮ ﺍﻟﺒﻴﺖ ﻓﺎﺿﻲ ، ﻣﺎ ﺿﺮﻭﺭﻱ ﺍﻟﻤﻔﺘﺎﺡ ، ﺍﻛﻴﺪ ﻓﻲ ﺳﺮ ﻟﻜﻦ ﺍﻟﺴﺮ ﺷﻨﻮ ﻣﺎ ﻣﻌﺮﻭﻑ ، ﺑﺲ ﺍﻧﺎ ﺑﻮﺭﻱ ﺍﻟﺘﺎﺝ ﻳﻐﻴﺮ ﺍﻟﻤﻔﺘﺎﺡ ﻭﻟﻼ ﺑﻐﻴﺮﻭ ﺍﻧﺎ ﺑﺮﺍﻱ ﻭﺑﻘﻮﻝ ﻟﻴﻬﻮ ﺍﻟﻤﻔﺘﺎﺡ ﺍﻟﻌﻨﺪﻱ ﺭﺍﺡ ﻭﻟﻼ ﺍﻱ ﻋﺬﺭ ، ﻭﻓﺮﺡ ﺩﺍ ﻟﻮ ﻣﺎﺷﻲ ﻏﻠﻂ ﻣﺼﻴﺮﻭ ﻳﻨﻜﺸﻒ .
ﻋﺒﺪ ﺍﻟﻘﻴﻮﻡ ﻗﺎﻝ ﻟﺤﺴﻦ ﻣﺎ ﻻﺣﻈﺖ ﻟﻌﺒﺎﺱ ﺩﺍ ﺍﻣﺲ ﺁ ﺣﺴﻦ ؟
_ ﻣﺎﻟﻮ ؟
_ ﻣﺎ ﻋﺎﺭﻓﻮ ﺑﺲ ﻣﺎ ﻳﺎﻫﻮ ﻋﺒﺎﺱ ﺍﻟﺒﻌﺮﻓﻮ ﻳﺎﺥ ﻭﺣﺘﻰ ﺍﻟﺪﻛﺎﻥ ﺍﻟﻜﺎﻥ ﻣﺘﻤﻨﻴﻬﻮ ﻣﺎ ﻓﺮﺡ ﺑﻴﻬﻮ ﻭﻻ ﺩﺍﻳﺮ ﻳﻘﻌﺪ ﻓﻮﻗﻮ ﻗﺎﻝ
_ ﺍﻣﻜﻦ ﻋﺸﺎﻥ ﺍﻣﻮ ﻓﻲ ﺍﻟﻤﺴﺘﺸﻔﻰ ؟
_ ﻻ ﻻ ﻓﻲ ﺣﺎﺟﺔ ﺗﺎﻧﻴﺔ ﻭﺍﻟﻤﺴﺘﺸﻔﻰ ﻓﻴﻬﺎ ﺭﺍﺟﻞ ﺍﻣﻮ ﻭﻫﻮ ﻣﻜﺠﻨﻮ
_ ﻃﻴﺐ ﻣﺎﻟﻮ ﺍﻧﺎ ﺷﺎﻳﻔﻮ ﻋﺎﺩﻱ
_ ﻣﺎ ﻋﺎﺩﻱ ﻭﺍﻟﻠﻪ ﺍﻧﺎ ﻣﺘﺄﻛﺪ ﻓﻲ ﺣﺎﺟﺔ ﻭﻭﺭﺟﻌﺘﻮ ﻟﺒﻴﺖ ﺍﻟﺘﺎﺝ ﺩﻱ ﻣﺎ ﺳﺎﻱ
_ ﺧﻠﻴﻬﻮ ﺑﻌﺪ ﻳﺠﻲ ﻧﺴﺄﻟﻮ
_ ﺩﺍ ﻟﻮ ﺟﺎﺀ
_ ﻣﺎ ﺑﺠﻲ ﺑﻔﻮﺕ ﻭﻳﻦ ؟
_ ﺍﻟﻠﻪ ﺍﻋﻠﻢ ﺑﺲ ﺍﻧﺎ ﻣﺎ ﺑﺨﻠﻴﻬﻮ ﻭﺍﻟﻠﻪ
ﻋﺒﺎﺱ ﻭﺻﻞ ﺍﻟﺴﻮﻕ ﺍﻟﺸﻌﺒﻲ ﻭﻓﺎﺕ ﻟﻠﺘﺎﺝ ﻣﺎ ﻟﻘﺎﻫﻮ ﻣﺸﻰ ﻟﻌﺜﻤﺎﻥ ﻭﻗﻒ ﻣﻌﺎﻫﻮ ﻣﺴﺎﺍﺍﻓﺔ ﻣﻨﺘﻈﺮ ﺍﻟﺘﺎﺝ ﻭﻟﻤﻦ ﺷﺎﻓﻮ ﺍﺗﺄﺧﺮ ﻭﻗﺎﻝ ﻟﻌﺜﻤﺎﻥ ﺍﻧﺎ ﻓﺎﻳﺖ ﺍﻟﺪﻛﺎﻥ ﻟﻌﺒﺪ ﺍﻟﻘﻴﻮﻡ ﻭﻟﻮ ﺷﻔﺖ ﺍﻟﺘﺎﺝ ﻭﺭﻳﻨﻲ
ﻋﺜﻤﺎﻥ ﻗﺎﻝ ﻟﻴﻬﻮ ﺍﻭﺭﻳﻚ ﻛﻴﻒ ﻳﻌﻨﻲ ؟ ﺩﺍﻳﺮﻧﻲ ﺍﺳﻴﺐ ﺍﻟﻄﺒﻠﻴﺔ ﻓﺎﺿﻴﺔ ﻭﺍﺟﻴﻚ ﻫﻨﺎﻙ ﺍﻗﻮﻝ ﻟﻴﻚ ﺍﻟﺘﺎﺝ ﺟﺎﺀ ؟
_ ﻻ ﻻ ﻣﺎ ﻗﺼﺪﻱ ﻛﺪﺍ
_ ﺍﻫﺎ ﻗﺼﺪﻙ ﺷﻨﻮ ﻭﻭﺭﻳﻨﻲ ﺍﻭﺭﻳﻚ ﻛﻴﻒ ﻏﻴﺮ ﻛﺪﺍ
_ ﺧﻼﺱ ﻣﻌﻠﻴﺶ ﻳﺎﺥ ﺑﻤﺸﻲ ﻭﺑﺠﻴﻬﻮ ﺗﺎﻧﻲ
_ ﻗﺒﻞ ﺗﻤﺸﻲ ﺍﺳﺘﻨﻰ ﻗﺮﻳﺒﻚ ﺍﻟﻤﺎﺷﻲ ﻋﻠﻴﻨﺎ ﺩﺍﻙ ﻭﺳﻮﻗﻮ ﻣﻌﺎﻙ ﻣﺎ ﺗﻘﻴﻔﻮﺍ ﻟﻲ ﻫﻨﺎ
ﻋﺒﺎﺱ ﺍﺗﻠﻔﺖ ﻟﻘﻰ ﻋﻤﺮ ﻭﺩ ﺍﻟﻀﻮ ﺟﺎﻱ ﻋﻠﻴﻬﻢ ﻭﻳﺘﺒﺴﻢ ﻣﻦ ﺑﻌﻴﺪ ﻭﻟﻤﻦ ﻭﺻﻠﻬﻢ ﻋﺒﺎﺱ ﺳﻠﻢ ﻋﻠﻴﻬﻮ ﺳﻼﻡ ﻣﺴﻴﺦ ﻭﺑﺎﺭﺩ
_ ﻣﻌﻠﻴﺶ ﺁ ﻋﺒﺎﺱ
_ ﻣﻌﻠﻴﺶ ؟
_ ﺁﻱ ﻣﻌﻠﻴﺶ ﻗﺎﻳﻠﻨﻲ ﺑﺎﻛﻞ ﺣﻘﻚ ﻣﻮﺵ ؟
_ ﻳﺎﺥ ﺍﻧﺖ ﻭﺍﻟﻠﻪ ﺫﻟﻴﺘﻨﻲ ﺫﻟﺔ ﻛﻠﺐ ﻭﺑﻜﻴﺘﻨﻲ ﺑﺪﻣﻮﻋﻲ ﻋﺪﻳﻞ
_ ﺍﻧﺖ ﻏﻠﻄﺖ ﻋﻠﻲ ﻳﺎﺥ ﻭﺍﻟﻠﻪ ﺍﻧﺎ ﺍﻭﻝ ﻣﺎ ﺟﻴﺘﻨﻲ ﻛﻨﺖ ﺑﻬﻈﺮ ﻣﻌﺎﻙ ﺑﺲ ﻟﻜﻦ ﺍﻧﺖ ﻗﻠﺒﺘﻬﺎ ﺟﺪ ﻭﻗﻌﺪﺕ ﺗﻨﺒﺰ ﻭﺗﻘﺒﻘﺐ ﻓﻴﻨﻲ ﻭﺍﻧﺎ ﺯﻋﻠﺖ ﻭﺍﻟﻠﻪ ﻭﻗﺼﺪﺕ ﺍﻋﻤﻞ ﻛﺪﺍ
_ ﻃﻴﺐ ﻳﻮﻣﺪﺍﻙ ﺍﻧﺎ ﻛﻨﺖ ﻣﻌﺎﻙ ﺍﺑﻴﺖ ﺗﺪﻳﻨﻲ ﺍﻟﻘﺮﻭﺵ ﻭﺟﻴﺖ ﻫﻨﺎ ﻓﻲ ﻧﻔﺲ ﺍﻟﻴﻮﻡ ﺍﺩﻳﺘﻦ ﻟﻌﺒﺪ ﺍﻟﻘﻴﻮﻡ ﻟﺸﻨﻮ ؟
_ ﻻﻧﻚ ﺭﺳﻠﺖ ﻟﻲ ﺭﺑﻴﻊ ﻭﺟﺎﻧﻲ ﻋﻤﻞ ﻟﻲ ﻓﻴﻬﺎ ﻋﺴﻜﺮﻱ ﻭﻗﺎﻝ ﻟﻲ ﺗﻤﺸﻲ ﻣﻌﺎﻱ ﺍﻟﻨﻘﻄﺔ
_ ﺭﺑﻴﻊ ﺍﻟﺠﺎﻙ ﻭﻟﻼ ﻭﺍﺣﺪ ﺗﺎﻧﻲ ؟
_ ﺭﺑﻴﻊ ﺯﺍﺗﻮ ﻭﺍﻧﺎ ﻭﺍﻟﻌﺒﻴﺪ ﺩﻗﻴﻨﺎﻫﻮ ﻟﻤﻦ ﻗﻠﻨﺎ ﺑﺲ ﻭﺩﺍ ﺍﻟﺨﻼﻧﻲ ﻣﺎ ﺍﺩﻳﻚ ﻟﻴﻬﻦ ﻭﺍﺟﻴﺒﻦ ﻟﻌﺒﺪ ﺍﻟﻘﻴﻮﻡ ﻋﺸﺎﻥ ﻧﻌﻤﻞ ﻟﻴﻚ ﺍﻟﺪﻛﺎﻥ ﺍﻟﻘﻠﺖ ﺩﺍﻳﺮﻭ
_ ﺳﻤﺢ ﻣﺎﻟﻚ ﻣﺎ ﻛﻠﻤﺘﻨﻲ ﻭﻗﻠﺖ ﻟﻲ ﺭﺑﻴﻊ ﺟﺎﻙ ﻭﺻﺎﺡ ﺩﻗﻴﺘﻮﻫﻮ ؟
_ ﻳﺎﺧﻲ ﺩﺍ ﺯﻭﻝ ﺣﺮﺍﻣﻲ ﻭﺑﻬﻴﻤﺔ ﺳﺎﻱ ﻭﺍﻧﺎ ﺯﻋﻠﺘﻨﻲ ﺟﻴﺘﻮ ﻟﻲ ﻭﻣﺒﺎﺭﺍﺗﻚ ﻟﻴﻬﻮ
_ ﺍﻧﺎ ﻣﺎ ﺑﺎﺭﻳﺘﻮ ﻭﻻ ﺷﻲ
_ ﻟﻮ ﻣﺎ ﺑﺎﺭﻳﺘﻮ ﻋﺮﻑ ﺍﻟﻘﺮﻭﺵ ﻛﻴﻒ ﻭﻋﺮﻑ ﺩﻛﺎﻧﻲ ﻛﻴﻒ ؟
_ ﻛﻠﻤﺘﻮ ﺍﻧﺎ ﻭﻫﻮ ﺯﺍﺗﻮ ﻏﺸﺎﻧﻲ
_ ﺍﺫﻥ ﺍﻧﺎ ﻛﻼﻣﻲ ﺻﺎﺡ ﻭﻟﻮ ﺍﺩﻳﺘﻚ ﻟﻴﻬﻦ ﺍﻛﺎﻥ ﺍﻛﻠﻦ ﻣﻨﻚ ﻛﻠﻬﻦ ﻭﺭﺍﺣﻦ ﺳﺎﻱ
_ ﺻﺎﺡ ﺩﻗﻴﺘﻮﻫﻮ ؟
_ ﻭﺍﻟﻠﻪ ﺩﻗﻴﻨﺎﻫﻮ ﻟﻤﻦ ﻗﻌﺪ ﻳﻜﻮﺭﻙ ، ﺍﻧﺴﺎﻧﺎ ﻣﻨﻮ ﻳﺎﺥ ﻭﺍﻟﻌﻔﻮ ﻭﺍﻟﻌﺎﻓﻴﺔ
_ ﺍﻟﻌﻔﻮ ﻭﺍﻟﻌﺎﻓﻴﺔ ﻟﻜﻦ ﻭﺍﻟﻠﻪ ﺍﻧﺎ ﻟﺴﺔ ﺯﻋﻼﻥ ﻣﻨﻚ
_ ﻣﺎ ﻣﺸﻜﻠﺔ ﻭﺍﻟﺰﻋﻞ ﺑﺮﻭﺡ ﻭﺍﻧﺎ ﺍﺧﻮﻙ ﺍﻟﻜﺒﻴﺮ . ﻭﺭﺡ ﻧﺸﻮﻑ ﻋﺒﺪ ﺍﻟﻘﻴﻮﻡ ﻋﻤﻞ ﺷﻨﻮ ﻭﺍﻧﺎ ﺟﺒﺖ ﻣﻌﺎﻱ ﺍﻟﻘﺮﻭﺵ
_ ﻋﺒﺪ ﺍﻟﻘﻴﻮﻡ ﺃﺟﺮ ﺍﻟﺪﻛﺎﻥ ﺣﻖ ﺍﻟﺘﺎﺝ ﺍﻻﻧﺎ ﻛﻨﺖ ﺷﻐﺎﻝ ﻓﻴﻬﻮ ﻭﺩﺍﻳﺮﻭ ﺯﺍﺗﻮ ﻭﺭﺡ ﻧﻨﻀﻢ ﻫﻨﺎﻙ
ﻭﺩ ﺍﻟﺴﺖ ﺑﻘﻰ ﺗﺎﺟﺮ ﺗﺐ ﻭﻳﻮﻣﻴﺎ ﺑﺠﻴﺐ ﺑﻀﺎﻋﺔ ﻭﻧﻬﺎﺋﻲ ﻣﺎ ﺑﻤﺴﻚ ﻗﺮﺵ ﻭﺻﺎﺣﺐ ﻟﻴﻬﻮ ﻭﺍﺣﺪ ﻣﻦ ﺍﻟﺤﻠﺔ ﺍﺳﻤﻮ ﺍﻟﻠﻤﻴﻦ ﻋﻨﺪﻭ ﺑﻜﺴﻲ ﺑﻤﺸﻲ ﺑﻴﻬﻮ ﺍﻟﻤﻨﺎﻗﻞ ﻳﻮﻣﻲ ﻭﺑﻘﻰ ﻛﻞ ﻳﻮﻡ ﺑﻌﺪ ﻣﺎ ﻳﻘﻔﻞ ﺑﺎﻟﻠﻴﻞ ﺑﻤﺶ ﻟﻴﻬﻮ ﻓﻲ ﺑﻴﺘﻮ ﻳﺪﻳﻬﻮ ﺍﻟﻘﺮﻭﺵ ﺍﻟﻌﻨﺪﻭ ﻛﻠﻬﺎ ﻭﺑﻜﺘﺐ ﻟﻴﻬﻮ ﺍﻟﺤﺎﺟﺎﺕ ﺍﻟﺪﺍﻳﺮﻫﺎ ﺑﻴﻬﻦ
ﻭﻣﺎﺳﻚ ﺷﻐﻠﺘﻮ ﻭﺷﺎﻳﻒ ﻣﺸﻬﺎﺩﻭ ﻭﻧﺠﻴﺾ ﻭﺃﻱ ﺯﻭﻝ ﻳﺴﺄﻝ ﻣﻦ ﺣﺎﺟﺔ ﻣﺎ ﻳﻠﻘﺎﻫﺎ ﻋﻨﺪﻭ ﺑﻘﻮﻝ ﻟﻴﻬﻮ ﺗﻌﺎﻝ ﻟﻴﻬﺎ ﺑﻜﺮﺓ ﺑﺘﻠﻘﺎﻫﺎ ﻭﺩﻳﻤﺔ ﺍﻟﺪﻛﺎﻥ ﻣﻔﺘﻮﺡ ﻭﻧﻬﺎﺋﻲ ﻣﺎ ﺍﺗﻜﻮﻋﺐ ﻣﻊ ﺯﻭﻝ ﻭﺍﻟﻨﺎﺱ ﻛﻠﻬﻢ ﺑﺘﻜﻴﻔﻮﺍ ﻟﻴﻬﻮ ﻭﺑﺮﻳﺪﻭﻫﻮ ﻛﺒﺎﺭ ﻭﺻﻐﺎﺭ ﻭﺍﻟﺰﻳﻦ ﺍﻛﺘﺮ ﻭﺍﺣﺪ ﻣﺘﻜﻴﻒ ﻣﻨﻮ ﻭﻗﺎﻝ ﻟﻴﻬﻮ ﺑﻌﻠﻤﻚ ﺍﻟﺴﻮﺍﻗﺔ
ﻋﻤﺮ ﺷﺎﻑ ﺍﻟﺪﻛﺎﻥ ﻭﻓﻄﺮ ﻣﻌﺎﻫﻢ ﻭﻗﺎﻝ ﺭﺍﺟﻊ ﻣﺪﻧﻲ ﻭﻗﺎﻝ ﻟﻌﺒﺎﺱ ﻣﺎﻓﻲ ﺩﺍﻋﻲ ﺗﻤﺸﻲ ﻭﻧﺎﺱ ﺍﻣﻚ ﺯﺍﺗﻢ ﻣﺮﻗﻮﺍ ﻣﻦ ﺍﻟﻤﺴﺘﺸﻔﻰ ﻭﻛﻮﻳﺴﻴﻦ ﻭﺍﻧﺎ ﺑﻤﺸﻲ ﻟﻴﻬﻢ ﻓﻲ ﺍﻟﺒﻴﺖ ﺑﻌﺪﻳﻦ ﻭﻟﻮ ﻣﺤﺘﺎﺟﻴﻦ ﺷﻲ ﺑﺠﻴﺒﻮ ﻟﻴﻬﻢ
ﻋﺒﺎﺱ ﻗﺎﻝ ﻟﻴﻬﻮ ﺧﻴﺮ ﻭﻋﻤﺮ ﻓﺎﺕ ﻭﻣﺎ ﺷﺎﻟﻮﺍ ﻣﻨﻮ ﺍﻟﻘﺮﻭﺵ ﺭﺟﻊ ﺑﻴﻬﺎ
ﻭﻋﺒﺎﺱ ﺗﺎﻧﻲ ﻗﺎﻝ ﻣﺎﺷﻲ ﻣﺪﻧﻲ ﻋﺸﺎﻥ ﻳﻼﻗﻲ ﺍﺑﺠﺎﻛﻮﻣﺔ ﻟﻜﻦ ﻋﺒﺪ ﺍﻟﻘﻴﻮﻡ ﺍﺣﻤﺎﻫﻮ ﻭﺣﻠﻒ ﻭﻗﺎﻝ ﻟﻴﻬﻮ ﺍﻻ ﺗﻮﺭﻳﻨﻲ ﻓﻲ ﺷﻨﻮ
_ ﻣﺎﻓﻲ ﺷﻲ
_ ﺷﻮﻑ ﺁ ﻋﺒﺎﺱ ﺍﻧﺎ ﻭﺍﻧﺖ ﺍﺧﻮﺍﻥ ﻭﺍﻧﺎ ﻭﺍﻟﻠﻪ ﺻﺮﻳﺢ ﻣﻌﺎﻙ ﻟﻠﻄﻴﺶ ﻣﺎ ﺣﺼﻞ ﺩﺳﻴﺖ ﻣﻨﻚ ﺷﻲ ﻓﻠﻮ ﻓﻲ ﺣﺎﺟﺔ ﻭﺭﻳﻨﻲ ﻟﻴﻬﺎ ﺍﺣﺘﻤﺎﻝ ﺍﺩﻳﻚ ﺭﺍﻱ
_ ﺍﻧﺖ ﻟﻴﻪ ﻣﺎ ﻣﺼﺪﻕ ﻣﺎﻓﻲ ﺷﻲ
_ ﻃﻴﺐ ﺍﻟﻘﺮﻭﺵ ﺩﻱ ﺍﻧﺖ ﺟﺒﺘﻬﺎ ﻣﻦ ﻭﻳﻦ ؟
_ ﺑﻌﺪ ﺍﺟﻲ ﻣﻦ ﻣﺪﻧﻲ ﺑﻮﺭﻳﻚ
_ ﺗﺎﺍﺍﺍﺍﻧﻲ ﻣﺪﻧﻲ ﺍﻧﺎ ﺣﻠﻔﺖ
_ ﺍﻧﺎ ﺑﻘﻌﺪ ﻳﻮﻡ ﺍﻟﻠﻴﻠﺔ ﺩﺍ ﻋﺸﺎﻥ ﺍﻧﺖ ﺣﻠﻔﺖ ﺑﺲ ﻭﺑﻤﺸﻲ ﺑﻜﺮﺓ
_ ﻋﻠﻲ ﻛﻴﻔﻚ ﻳﺎ ﺯﻭﻝ ﻭﻟﻮ ﻣﺎ ﻋﺎﻭﺯ ﺗﺘﻜﻠﻢ ﻗﻮﻝ ﻣﺎ ﻋﺎﻭﺯ ﺑﺲ
_ ﺧﻼﺱ ﺑﻌﺪﻳﻦ ﺑﻌﺪ ﻧﻘﻔﻞ ﺑﺤﻜﻲ ﻟﻴﻚ ﺍﻟﺤﺼﻞ ﻭﺑﺎﻟﺘﻔﺼﻴﻞ ﺑﺲ ﻛﻼﻡ ﺳﺮ ﻣﺎ ﺩﺍﻳﺮ ﺍﻱ ﺯﻭﻝ ﻳﻌﺮﻓﻮ
ﻭﻗﻌﺪ ﻳﺮﺗﺐ ﻓﻲ ﺍﻟﻤﺤﻞ ﻭﻳﻨﻈﻢ ﻓﻴﻬﻮ ﻭﻳﺤﻔﻆ ﻓﻲ ﺍﻻﺳﻌﺎﺭ ﻭﻣﺎ ﻣﺮﻕ ﻧﻬﺎﺋﻲ
ﺑﻌﺪ ﺍﻟﻤﻐﺮﺏ ﺣﺴﻦ ﺩﺧﻞ ﺍﻟﻔﺘﺮﻳﻨﺔ ﻭﻓﺎﺕ ﻭﻋﺒﺪ ﺍﻟﻘﻴﻮﻡ ﻗﻔﻞ ﺍﻟﺒﺎﺏ ﻋﻠﻴﻬﻢ ﻭﻗﺎﻝ ﻟﻴﻬﻮ ﺃﻫﺎ ﻗﻮﻝ
ﻋﺒﺎﺱ ﻣﺎ ﺩﺱ ﻣﻨﻮ ﺷﻲ ﻭﺯﻱ ﻣﺎ ﻗﺎﻝ ﺑﺎﻟﺘﻔﺼﻴﻞ ﺍﻟﻤﻤﻞ ﻭﺑﻌﺪ ﺍﻧﺘﻬﻰ ﻋﺒﺪ ﺍﻟﻘﻴﻮﻡ ﻗﺎﻝ ﻟﻴﻬﻮ ﻛﺘﺮ ﺧﻴﺮﻭ ﺍﻟﺘﺎﺝ ﺑﺲ ﺑﺘﺴﻤﻊ ﻛﻼﻣﻲ ؟
_ ﻗﻮﻝ ﻛﻼﻣﻚ
_ ﻣﺎ ﺗﺸﺘﻐﻞ ﻣﻌﺎﻫﻢ ﻣﺨﺒﺮ ﻭﻻ ﺗﺴﻜﻦ ﻣﻊ ﺍﻟﺘﺎﺝ ﻭﻻ ﻋﻨﺪﻙ ﺷﻐﻠﺔ ﺑﺄﻱ ﺷﻲ ﻻ ﻓﺮﺡ ﻻ ﺍﻟﺘﺎﺝ ﻭﻻ ﺑﻄﻴﺦ
_ ﻛﻴﻒ ﻣﺎ ﻋﻨﺪﻱ ﺷﻐﻠﺔ ﺑﻴﻬﻢ ؟
_ ﺍﻧﺖ ﻣﺎﻟﻚ ﻭﻣﺎﻟﻬﻢ ، ﻳﺎﺧﻲ ﻧﺤﻦ ﺟﻴﻨﺎ ﻫﻨﺎ ﻋﺸﺎﻥ ﻧﺘﺮﺯﻕ ﺑﺲ
_ ﻃﻴﺐ ﺩﺍ ﺯﺍﺗﻮ ﻣﺎ ﺷﻐﻞ
_ ﺩﺍ ﻣﺎ ﺷﻐﻞ ﻭﻻ ﺷﻲ ﻭﺍﺣﺘﻤﺎﻝ ﻛﺒﻴﺮ ﻓﺮﺡ ﺩﺍ ﻳﻜﻮﻥ ﻛﻀﺎﺏ ﺳﺎﻱ ﻭﻫﻮ ﻣﻨﻮ ﻫﻮ ﻋﺸﺎﻥ ﻳﻌﻴﻨﻚ ﻣﺨﺒﺮ . ﻳﺎﺧﻲ ﺣﺮﻳﻘﺔ ﻓﻴﻬﻢ ﻛﻠﻬﻢ ، ﻳﺎ ﺯﻭﻝ ﺷﻮﻑ ﺷﻐﻠﺘﻚ ﻭﻋﺎﻳﻦ ﻻﻫﻠﻚ ﺍﻟﺒﻌﺎﻳﻨﻮﺍ ﻟﻴﻚ ﺩﻳﻚ ﻭﺍﺑﻌﺪ ﻣﻦ ﺍﻟﻨﺎﺱ ﺍﻟﺒﻬﺎﻳﻢ ﺩﻳﻞ ﻧﻬﺎﺋﻲ ﻭﻭﺭﺡ ﻫﺴﻲ ﻧﺠﻴﺐ ﺷﻨﻄﺘﻚ ﻭﺭﺟﻊ ﻟﻴﻬﻮ ﻣﻔﺘﺎﺣﻮ ﻭﺍﺳﻜﻦ ﻣﻊ ﻧﺎﺱ ﺣﻴﺪﺭ ﻭﻟﻼ ﺍﻱ ﻓﺠﺔ ﺗﺎﻧﻴﺔ
_ ﻻ ، ﻭﺍﻧﺎ ﻣﺎ ﻭﺭﻳﺘﻚ ﻋﺸﺎﻥ ﺗﻘﻮﻝ ﻟﻲ ﻛﺪﺍ
_ ﺩﺍﻳﺮﻧﻲ ﺍﻗﻮﻝ ﻟﻴﻚ ﺗﻤﺎﻡ ﺗﻤﺎﻡ ﻭﺍﺷﻜﺮﻙ ﻳﻌﻨﻲ ؟ ﺩﻳﻞ ﻧﺎﺱ ﻣﺠﺮﻣﻴﻦ ﺁﻋﺒﺎﺱ ﻋﺎﺭﻑ ﺷﻨﻮ ﻣﺠﺮﻣﻴﻦ ؟ ﻭﺍﻟﻠﻪ ﻧﺤﻦ ﺑﻨﺴﻤﻊ ﺑﻜﺘﺮﺓ ﺑﻼﻭﻱ ﻭﺣﺎﺟﺎﺕ ﺗﺸﻴﺐ ﺍﻟﺮﺍﺱ
_ ﻫﺴﻲ ﺍﻟﺘﺎﺝ ﺑﺘﻘﻮﻝ ﻣﺠﺮﻡ ؟
_ ﺍﻟﺒﻌﺮﻓﻮ ﻣﻨﻮ ؟ ﻳﺎﺥ ﻓﻲ ﻧﺎﺱ ﺗﻘﻌﺪ ﻣﻌﺎﻫﻢ ﺗﺤﻠﻒ ﺗﻘﻮﻝ ﺩﻳﻞ ﺑﺨﺸﻮﺍ ﺍﻟﺠﻨﺔ ﺗﻮﻭﻭﻭﺷﻚ ﻭﻫﻢ ﺍﻟﺸﻴﻄﺎﻥ ﻣﺎ ﺑﻠﺤﻘﻬﻢ ﻭﺑﻨﻲ ﺁﺩﻡ ﺩﺍ ﻣﺎ ﺑﻌﺮﻑ ﺣﻘﻴﻘﺘﻮ ﻋﻼ ﺍﻟﻠﻪ ﺑﺲ ، ﻭﺍﻟﺘﺎﺝ ﺩﺍ ﺍﻧﺎ ﻣﺎ ﺷﻔﺖ ﻣﻨﻮ ﺷﻲ ﻋﺸﺎﻥ ﻣﺎ ﺍﺣﺘﻜﻴﺖ ﺑﻴﻬﻮ ﻟﻜﻦ ﺍﻟﻌﻮﺩ ﻟﻮ ﻣﺎ ﻓﻴﻬﻮ ﺷﻖ ﻣﺎ ﺑﻄﻖ ﻭﺍﻧﺖ ﺍﻛﺎﻥ ﺩﺍﻳﺮ ﺗﻀﻴﻊ ﺭﻭﺣﻚ ﺑﺎﺭﻱ ﺍﻟﻌﻮﺍﻟﻴﻖ ﺩﻳﻞ
_ ﻣﺎ ﻣﺸﻜﻠﺔ ﺑﺲ ﺍﻟﻜﻼﻡ ﺩﺍ ﻣﺎ ﻳﻌﺮﻓﻮ ﺯﻭﻝ ﻭﺍﻧﺎ ﺑﺘﺼﺮﻑ ﻭﺑﺘﺨﺎﺭﺝ ﻣﻨﻬﻢ
_ ﺑﺘﺘﺨﺎﺭﺝ ﻣﻨﻬﻢ ﻣﺘﻴﻦ ؟
_ ﺑﺘﺨﺎﺭﺝ ﻃﻮﺍﻟﻲ ﻭﺍﻟﻠﻪ ﺑﺲ ﺍﺩﻳﻨﻲ ﻛﻢ ﻳﻮﻡ ﻛﺪﺍ ﻭﺍﻧﺎ ﺑﺘﺨﺎﺭﺝ ﻻﻧﻲ ﻓﻜﺮﺕ ﻓﻲ ﻛﻼﻣﻚ ﺍﻟﻬﺴﻲ ﺩﺍ ﻟﻘﻴﺘﻮ ﻛﻠﻮ ﺻﺎﺡ ﻭﻛﻮﻳﺲ ﺍﻧﻲ ﻟﺴﺔ ﻓﻲ ﺍﻟﺒﺮ