ﻓﻲ ﺑﻴﺘﻨﺎ ﺩﺍﻙ ...
ﻛﺎﻥ ﺍﻟﺘﻜﻞ ...
ﻗﺪﺍﻣﻮ ﻛﺎﻧﺖ ﻣﺰﻳﺮﺓ
ﻣﺴﻨﻮﺩﺓ ﺑﻲ ﺷﻌﺒﺎً ﻗﺪﺍﺍﺍﺍﻡ
ﻧﻘﺎﻉ ﻣﺮﺑﻮﻁ ﺑﺎﻟﻘﻤﺎﺵ
ﻭﻛﺎﻥ ﺍﻟﻄﻴﻮﺭ ﺗﻨﺰﻝ ﺗﺮﻙ
ﺗﺸﺮﺏ ﺗﻔﻮﺕ ......
ﻭﻛﻤﺎﻥ ﺃﻧﺎ ......
ﻭﺍﻟﻨﺎﺱ ﻋﻤﻮﻡ ....
ﻭﺍﻟﻤﺸﻠﻌﻴﺐ ﺭﺍﺑﻄﻨﻮ ﻓﻮﻕ
ﺿﺎﻓﺮﻧﻮ ﻣﻦ ﺳﻌﻒ ﺍﻟﺟﺮﻳﺪ
ﺧﺎﺗﻴﻦ ﻋﻠﻰ ﺿﻬﺮﻭ ﺍﻟﻠﺒﻦ
ﻭﺑﺎﻗﻲ ﺍﻟﻠﻘﻴﻤﺔ ﺍﻟﻔﻲ ﺍﻟﻔﺠﺮ ...
ﺩﺍﺧﺮﻧﻬﺎ ﻟــﻲ ﺃﻱ ﺯﻭﻝ ...
ﻭﺍﻟﻬﻤﺒﺮﻳﺐ ﺿـﻞ ﺍﻟﻀﺤﻰ
ﻭﺍﻟﻘِﺪ ﻣﻔﺮﺵ ﻟﻠﻀــﻴﻮﻑ ...
ﻭﺍﻟﻨﺎﺱ ﺗﺠﻴﻚ ﻣﺒﺴﻮﻃﺔ ﺗﺐ
ﺗﻘﻌﺪ ﺗﻘﻮﻡ ﺑﺎﻛﺮ ﺗﻔــــﻮﺕ ...
ﻭﺍﻟﺪﻭﻛﺔ ﺣـﻴﻪ ﻭﻣﺎ ﺑﺘـﻤﻮﺕ
ﻭﺍﻟﻔﺮﺻﻪ ﻓﻲ ﺩﺍﻙ ﺍﻟﺴـﻌﻦ
ﻣﻜﺒﻮﺑﺔ ﻓﻲ ﺍﻟﻘﺪﺡ ﺍﻟﻜﺒﻴﺮ ..
ﻳﺎﺣﻠﻴﻠﻮ ﻛﺎﻥ ﺯﻣﻨﺎ ﻗﺒﻴﻞ ...
ﻭﻛﺖ ﺍﻟﻨﻔﻮﺱ ﻣﺘﻄﺎﻳﺒﺔ ...
ﺍﻟﻨﺎﺱ ﺗﺤﺎﻧﻦ ﻟﻲ ﺑﻌﺾ ... ﻛﻞ ﺍﻟﺒﻴﻮﺗﺎﺕ ﺻﻨﻘﻌﺖ
ﺭﺍﺟﻴ ﺍﻟﻬﻼﻝ ﻳﻈﻬﺮ ﻳﺒﻴﻦ
ﻭﺍﻟﺴﺮﺓ ﺷﺮﺕ ﻋﻴﺸﺔ ﻓﻮﻕ
ﺧﻴﺸﺔ ﺍﻟﺨﺰﻳﻦ
ﻭﺍﻟﺤﻠﺔ ﺗﻘﺪﻝ ﻣﻬﺮﺟﺎﻥ ﻭﻋﺪﻳﻞ ﻭﺯﻳﻦ
ﻭﺍﻟﺸﻔﻊ ﺍﺗﻨﺎﺳﻮﺍ ﺍﻟﺘﻌﺐ
ﻟﻤﻮﺍ ﺍﻟﻠﺪﺍﻳﺎﺕ ﻭﺍﻟﺤﻄﺐ
ﻧﺴﻮﺍﻥ ﻋﺰﺍﺯ ﺣﺮﺳﻮﺍ ﺍﻟﻠﻬﺐ
ﻛﻮﺟﻨﻭ ﺯﻳﻴﻴﻴﻴﻦ ﺧﻤﺮﻧﻭ ﻓﻲ ﺣﻮﺵ
ﺍﻻﻣﻴﻦ
ﻭﺍﻟﺘﺎﻳﺔ ﻋﺎﺳﺖ ﺟﺮﺩﻟﻴﻦ
ﻭﻧﻔﻴﺴﺔ ﺣﺎﻟﻔﺔ ﺍﻛﺎﻥ ﺗﻌﻮﺱ
ﻋﻞ ﺍﻟﻤﺮﺽ ﻣﺎﻩ ﺷﻮﻡ ﻭﺷﻴﻦ
ﻳﺎ ﻧﻔﻴﺴﺔ ﺍﻃﺮﻳﻬﻮ ﺍﻟﻨﺒﻲ
ﻗﺎﻟﺖ ﻳﻤﻴﻦ ﻭﺑﻌﻮﺱ ﻳﻤﻴﻦ
ﻳﺎ ﻧﻔﻴﺴﺔ ﻣﺎﻙ ﻗﺪﺭ ﺍﻟﺘﻌﺐ
ﻗﺎﻟﺖ ﻳﻤﻴﻦ ﻭﺑﻌﻮﺱ ﻳﻤﻴﻦ
ﺟﺎﺕ ﻓﺎﻃﻨﺔ ﻣﻦ ﺍﺧﺮ ﺍﻟﻤﻤﺮ
ﻳﺎ ﺍﻟﺴﺮﺓ ﻋﻮﺳﻚ ﻣﺎﺍﺍﺍﺍﺍﻧﺴﺘﺮ
ﺭﻳﺤﺔ ﺍﺑﺎﺭﻳﻚ ﺍﻧﺘﺸﺮ
ﻭﺍﻧﺎ ﺟﻴﺖ ﺍﻗﻬﻮﺝ ﻟﻠﻤﺰﺍﺝ
ﺑﻲ ﻟﻤﺔ ﺍﻟﻨﺎﺱ ﺍﻟﻜﺘﺮ
ﺭﻣﻀﺎﻥ ﻛﺮﻳﻢ ﻋﻠﻰ ﻛﻞ ﺯﻭﻝ
ﻭﺍﻟﻠﻤﺔ ﻓﻲ ﺑﺮﺵ ﺍﻟﻔﻄﻮﺭ
ﻭﺻﺪﻯ ﺍﻟﺘﺮﺍﻭﻳﺢ ﻓﻲ ﺍﻟﻌﻘﻮﻝ
ﻭﺍﻟﺴﻬﺮﺓ ﻟﻲ ﻭﺵ ﺍﻟﺼﺒﺎﺡ
ﻣﺨﺘﻮﻣﺔ ﺑﻲ ﻗﻮﻣﻮﺍ ﺍﻟﺴﺤﻮﺭ