ﺍﻟﻤﻠﺤﻤﺔ ‏( ﻗﺼﺔ ﺛﻮﺭﺓ ‏)
ﻛﻠﻤﺎﺕ : ﻫﺎﺷﻢ ﺻﺪﻳﻖ
ﻟﻤﺎ ﺍﻟﻠﻴﻞ ﺍﻟﻈﺎﻟﻢ ﻃﻮﻝ ﻭﻓﺠﺮ ﺍﻟﻨﻮﺭ ﻣﻦ ﻋﻴﻨﺎ ﺍﺗﺤﻮﻝ
ﻗﻠﻨﺎ ﻧﻌﻴﺪ ﺍﻟﻤﺎﺿﻲ ﺍﻻﻭﻝ
ﻣﺎﺿﻲ ﺟﺪﻭﺩﻧﺎ ﺍﻟﻬﺰﻣﻮ ﺍﻟﺒﺎﻏﻲ
ﻭﻫﺪﻭ ﻗﻼﻉ ﺍﻟﻈﻠﻢ ﺍﻟﻄﺎﻏﻲ
ﻭﻓﻲ ﻟﻴﻠﻪ ﻭﻛﻨﺎ ﺣﺸﻮﺩ ﺑﺘﺼﺎﺭﻉ
ﻋﻬﺪ ﺍﻟﻈﻠﻢ ﺍﻟﺸﺐ ﺣﻮﺍﺟﺰ .. ﺷﺐ ﻣﻮﺍﻧﻊ
ﺟﺎﻧﺎ ﻫﺘﺎﻑ ﻣﻦ ﻋﻨﺪ ﺍﻟﺸﺎﺭﻉ
ﻗﺴﻤﺎ ﻗﺴﻤﺎ ﻟﻦ ﻧﻨﻬﺎﺭ
ﻃﺮﻳﻖ ﺍﻟﺜﻮﺭﺓ ﻫﺪﻯ ﺍﻻﺣﺮﺍﺭ
ﻭﺍﻟﺸﺎﺭﻉ ﺛﺎﺭ
ﻭﻏﻀﺐ ﺍﻻﻣﻪ ﺍﺗﻤﺪﺩ ﻧﺎﺭ
ﻭﻫﺰﻣﻨﺎ ﺍﻟﻠﻴﻞ
ﻭﺍﻟﻌﺰﺓ ﺍﺧﻀﺮﺕ ﻟﻼﺣﺮﺍﺭ
ﻭﻃﻨﻲ ﺃﻧﺤﻨﺎ ﺳﻴﻮﻑ ﺍﻣﺠﺎﺩﻙ
ﻧﺤﻦ ﻣﻮﺍﻛﺐ ﺗﻔﺪﻱ ﺗﺮﺍﺑﻚ
ﻭﻟﺴﻪ ﺍﻟﺸﺎﺭﻉ ﺑﺸﻬﺪ ﻟﻴﻨﺎ
ﻑ ﻳﻮﻡ ﺍﻟﻐﻀﺒﻪ ﺣﺼﺎﺩ ﻣﺎﺿﻴﻨﺎ
ﻣﺸﻴﻨﺎ ﻧﻌﻄﺮ ﺣﻘﻞ ﺍﻟﺜﻮﺭﻩ
ﺑﺪﻡ ﻧﻔﺪﻳﻬﺎ ﺑﻼﺩﻧﺎ ﺍﻟﺤﺮﻩ
ﻭﻛﺎﻥ ﺍﻛﺘﻮﺑﺮ ﻓﺠﺮ ﺍﻟﻐﻀﺒﻪ
ﻛﺴﺮﻧﺎ ﻗﻴﻮﺩ ﺍﻟﻤﺎﺿﻲ ﺍﻟﺼﻌﺒﻪ
ﻭﻟﻤﺎ ﻣﺸﻴﻨﺎ ﻣﻮﺍﻛﺐ ﺻﺎﻣﺪﻩ
ﺗﻬﺪﺭ ﻭﺗﻐﻠﻲ ﻭﺗﻬﺘﻒ ﺭﺍﻋﺪﻩ
ﺍﻟﺮﺻﺎﺹ ﻟﻦ ﻳﻔﻨﻴﻨﺎ
ﺍﻟﺮﺻﺎﺹ ﻟﻦ ﻳﻔﻨﻴﻨﺎ
ﻭﺳﺎﻝ ﺍﻟﺪﻡ ﻓﻲ ﺍﺭﺽ ﺍﻟﻮﺍﺩﻱ
ﻓﺪﻳﻨﺎ ﺍﻟﻨﻮﺭ ﺑﺎﻟﺮﻭﺡ ﻳﺎﺑﻼﺩﻱ
ﻭﻛﺎﻧﺖ ﺻﻔﺤﻪ ﺣﻜﺎﻫﺎ ﺍﻟﻌﺎﻟﻢ
ﻭﻓﺠﺮ ﺍﻛﺘﻮﺑﺮ ﻃﻞ ﻭﺳﺎﻟﻢ
ﻭﻫﺰﻣﻨﺎ ﺍﻟﻠﻴﻞ ﻫﺰﻣﻨﺎ ﺍﻟﻠﻴﻞ
ﻭﺍﻟﻨﻮﺭ ﻓﻲ ﺍﻻﺧﺮ ﻃﻞ ﺍﻟﺪﺍﺭ
ﻭﻫﺰﻣﻨﺎ ﺍﻟﻠﻴﻞ ﻫﺰﻣﻨﺎ ﺍﻟﻠﻴﻞ
ﻭﺍﻟﻌﺰﻩ ﺍﺧﻀﺮﺕ ﻟﻼﺣﺮﺍﺭ
ﻭﻛﺎﻥ ﻓﻲ ﺍﻟﺠﺎﻣﻌﻪ ﻣﻮﻛﺐ ﻫﺎﺩﺭ
ﺻﻤﻢ ﻳﺠﻠﻮ ﺍﻟﻠﻴﻞ ﺍﻟﺴﺎﺩﺭ
ﻭﻛﺎﻥ ﺍﻟﻠﻴﻞ ﺍﻟﺴﺎﺩﺭ ﻏﺎﺩﺭ
ﻓﺠﺮ ﻏﻀﺒﻮ ﺳﻤﻮﻡ ﺩﺧﺎﻥ
ﺍﻟﺸﻌﺐ ﺍﻟﺜﺎﺋﺮ ﺻﻤﻢ ﻫﺎﺩﺭ
ﻳﺼﺮﻉ ﻟﻴﻠﻨﺎ ﺍﻟﺪﺍﺟﻲ ﺍﻟﻄﻮﻝ
ﻭﻛﺎﻥ ﺍﻟﻘﺮﺷﻲ ﺷﻬﻴﺪﻧﺎ ﺍﻻﻭﻝ
ﻭﻣﺎ ﺍﺗﺮﺍﺟﻌﻨﺎ
ﺣﻠﻔﻨﺎ ﻧﻘﺎﻭﻡ ﻟﻴﻠﻨﺎ ﻭﺳﺮﻧﺎ
ﻭﻣﺎ ﺍﺗﺮﺍﺟﻌﻨﺎ
ﻟﻠﺸﻤﺲ ﺍﻟﻨﺎﻳﺮﻩ ﻗﻄﻌﻨﺎ ﺑﺤﻮﺭ
ﺣﻠﻔﻨﺎ ﻧﻤﻮﺕ ﺃﻭ ﻧﻠﻘﻰ ﺍﻟﻨﻮﺭ
ﻭﻛﺎﻥ ﻓﻲ ﺍﻟﺨﻄﻮﻩ ﺑﻨﻠﻘﻲ ﺷﻬﻴﺪ
ﺑﺪﻣﻮ ﺑﻴﺮﺳﻢ ﻓﺠﺮ ﺍﻟﻌﻴﺪ
ﻳﺎ ﺍﻛﺘﻮﺑﺮ ﺍﻧﺤﻨﺎ ﺍﻟﻌﺸﻨﺎ ﺛﻮﺍﻧﻲ ﺯﻣﺎﻥ
ﻓﻲ ﻗﻴﻮﺩ ﻭﻣﻈﺎﻟﻢ ﻭﻭﻳﻞ ﻭﻫﻮﺍﻥ
ﻛﺎﻥ ﻓﻲ ﺻﺪﻭﺭﻧﺎ ﻏﻀﺐ ﺑﺮﻛﺎﻥ
ﻭﻛﻨﺎ ﺑﻨﺤﻠﻒ ﺑﺎﻻﻭﻃﺎﻥ
ﻧﺴﻄﺮ ﺍﺳﻤﻚ ﻳﺎﺳﻮﺩﺍﻥ
ﺑﺪﻣﺎﻧﺎ ﺍﻟﺴﺎﻟﺖ ﺭﺍﻭﻳﻪ ﺍﻟﺴﺎﺣﻪ
ﺣﻠﻔﻨﺎ ﻧﺴﻴﺮ ﻣﺎﻧﻀﻮﻕ ﺍﻟﺮﺍﺣﻪ
ﺷﻬﺮﻧﺎ ﺳﻴﻮﻑ ﻋﺼﻴﺎﻧﺎ ﺍﻟﻤﺪﻧﻲ
ﻭﻛﺎﻧﺖ ﻭﺣﺪﺓ ﺻﻒ ﻳﺎﻭﻃﻨﻲ
ﻭﺍﻳﺪ ﻓﻲ ﺍﻳﺪ ﺣﻠﻔﻨﺎ ﻧﻘﺎﻭﻡ
ﻭﻣﺎﺑﻨﺘﺮﺍﺟﻊ ﻭﻣﺎﺑﻨﺴﺎﻭﻡ
ﺧﻄﺎﻧﺎ ﺗﺴﻴﺮ ﻓﻲ ﺩﺭﺏ ﺍﻟﻨﺼﺮ
ﻫﺘﺎﻓﻨﺎ ﻳﺪﻭﻱ ﻳﻬﺰ ﺍﻟﻘﺼﺮ
ﻛﺴﺮﻧﺎ ﺣﻮﺍﺟﺰ ﺍﺯﻟﻨﺎ ﻣﻮﺍﻧﻊ
ﺻﻔﻨﺎ ﻭﺍﺣﺪ
ﻋﺎﻣﻞ ﻭﻃﺎﻟﺐ ﻭﺯﺍﺭﻉ ﻭﺻﺎﻧﻊ
ﻳﺎﺳﺎﺣﺔ ﺍﻟﻨﺼﺮ ﻳﺎﺣﻘﻞ ﺍﻟﻨﺎﺭ
ﻳﺎﻭﺍﺣﻪ ﺑﺘﺤﻀﻦ ﺭﻭﺡ ﺍﺻﺮﺍﺭ
ﺭﻭﻳﻨﺎ ﻭﺭﻭﺩﻙ ﺩﻡ ﺛﻮﺍﺭ
ﻭﺷﺘﻠﻨﺎ ﻓﻀﺎﻛﻲ ﻫﺘﺎﻑ ﺍﺣﺮﺍﺭ
ﺧﻄﻴﻨﺎ ﺗﺮﺍﺑﻚ ﺍﺣﺮﻑ ﻧﺎﻳﺮﻩ
ﺑﺘﺤﻜﻲ ﺳﻄﻮﺭ ﺍﻳﺎﻣﻨﺎ ﺍﻟﺜﺎﻳﺮﻩ
ﻭﺷﻠﻨﺎ ﺍﻟﺸﻬﺪﺍ ﻣﺸﻴﻨﺎ ﻭﻧﻬﺘﻒ
ﺍﻟﺮﺻﺎﺹ ﻟﻦ ﻳﻔﻨﻴﻨﺎ
ﻭﺟﺮﺡ ﺍﻟﻨﺎﺭ ﻓﻲ ﻗﻠﻮﺑﻨﺎ ﺑﻴﻨﺰﻑ
ﺍﻟﺮﺻﺎﺹ ﻟﻦ ﻳﻔﻨﻴﻨﺎ
ﺳﺠﻴﻨﺎ ﺍﻟﺸﻬﺪﺍ ﻭﺟﻴﻨﺎ ﻧﻘﺎﻭﻡ
ﺍﻟﺮﺻﺎﺹ ﻟﻦ ﻳﻔﻨﻴﻨﺎ
ﻣﺎﺑﻨﺘﺮﺍﺟﻊ ﻭﻣﺎﻧﺴﺎﻭﻡ
ﺑﻴﻨﺎ ﻭﺑﻴﻨﻚ ﺗﺎﺭ ﻳﺎﻇﺎﻟﻢ
ﻭﻓﺠﺄﻩ ﻭﻧﺤﻦ ﺻﻔﻮﻑ ﺑﺘﺼﻤﻢ
ﺯﻏﺮﺩ ﻓﺠﺮ ﺍﻟﻐﻀﺒﻪ ﺍﻟﺤﺎﻟﻢ
ﻭﻫﺰﻣﻨﺎ ﺍﻟﻠﻴﻞ ﻫﺰﻣﻨﺎ ﺍﻟﻠﻴﻞ
ﻭﺍﻟﻨﻮﺭ ﻓﻲ ﺍﻻﺧﺮ ﻃﻞ ﺍﻟﺪﺍﺭ
ﻭﻫﺰﻣﻨﺎ ﺍﻟﻠﻴﻞ ﻫﺰﻣﻨﺎ ﺍﻟﻠﻴﻞ
ﻭﺍﻟﻌﺰﻩ ﺍﺧﻀﺮﺕ ﻟﻼﺣﺮﺍﺭ
ﻗﺴﻤﺎ ﻗﺴﻤﺎ ﻳﺎ ﺍﻛﺘﻮﺑﺮ
ﻧﺤﻤﻲ ﺷﻌﺎﺭﻙ ﻧﺠﻨﻲ ﺛﻤﺎﺭﻙ
ﻭﻧﺮﻓﻊ ﺭﺍﻳﺔ ﺍﻟﺜﻮﺭﻩ ﺍﻟﻐﺎﻟﻴﻪ
ﻋﺎﻟﻴﻪ ﺗﺮﻓﺮﻑ ﻓﻮﻕ ﺍﻟﺴﺎﺭﻳﻪ
ﻋﻠﻴﻬﺎ ﺷﻌﺎﺭ ﺍﻟﺜﻮﺭﻩ ﺍﻻﻛﺒﺮ
ﻭﺭﺳﻤﻮ ﺍﻟﻨﺎﺩﺭ ﺯﺍﻫﻲ ﻭﺍﺧﻀﺮ
ﻭﻟﺴﻪ ﺑﻨﻘﺴﻢ ﻳﺎ ﺍﻛﺘﻮﺑﺮ
ﻟﻤﺎ ﻳﻄﻞ ﻓﻲ ﻓﺠﺮﻧﺎ ﻇﺎﻟﻢ
ﻧﺤﻤﻲ ﺷﻌﺎﺭ ﺍﺍﻟﺜﻮﺭﻩ ﻧﻘﺎﻭﻡ
ﻭﻧﺒﻘﻰ ﺻﻔﻮﻑ ﺗﻤﺘﺪ ﻭﺗﻬﺘﻒ
ﻟﻤﺎ ﻳﻌﻮﺩ ﺍﻟﻔﺠﺮ ﺍﻟﺤﺎﻟﻢ
ﻳﺎﺍﻛﺘﻮﺑﺮ

ﺩﻭﺯﻧﺎﺕ ‏) ﻋﻴﺪﻳﺔ
‏( ﻃﺒﻌﺔ ﺟﺪﻳﺪﺓ ‏) ﺷﻌﺮ : ﻫﺎﺷﻢ ﺻﺪﻳﻖ
‏( 1 ‏)
ﺑﺪﻳﺘِﻚ
ﺃَﻟِﻒ
ﺑﺎ
ﺗﺎ .
ﻭﺩﻭﺯﻧﺘﻚ
ﺩﻭ
ﺭﻱ
ﻣﻰ
ﻓﺎ .
.....
ﻣﻠﺼﺖ ﺃﺳﺎﻳﺎ
ﻓﻲ ﻋﺘﺒﺔ
ﺳﻼﻡ ﺑﺎﺑِﻚ
ﻣﺸﻴﺖ ﻣﻦ ﻓﻮﻕ
ﺑُﺴﺎﻁ ﻭﺟﺪِﻙ
ﻫﺴﻴﺲ ﻭﺣَﻔَﺎ
ﻭﺇﺗﻤﺪﺩﺕ ﻓﻲ ﻟِﺤﺎﻑ
ﺣِﻨّﻴﺘِﻚ ﺍﻟﻤﻌﻄﻮﻧﺔ
ﻓﻲ ﺍﻟﺼﻨﺪﻝ
‏( ﻭﻧُﻤﺖ ﻗَﻔَﺎ ‏) .
.......
ﻛﻞ ﻣﺎ ﺷﺮﺑﺖ
ﻣﻦ ﻧﺒﻌِﻚ
ﺃﺻﻴﺮ ﻋﻄﺸﺎﻥ
ﻭﻻ ﻗﻠﺘﻲ
ﺣﺒﻴﺒﻲ ﻛﻔﺎﻙ
ﻭﻻ ﻗﻠﺖ
ﺣﺒﻴﺒﺘﻲ ﺭِﻭِﻳﺖ
ﺭﻭﺣﻲ ﻛﻔﺎ .
.......
ﻣﻦ ﺳُﻨﺒﻞ
ﻋﺬﺍﺏ ﺍﻟﻨﺎﺱ
ﻃﺤﻨﺘﻲ
ﻋﺠﻨﺘﻲ
ﺧﺒﺰﺗﻲ
ﻛﻌﻚ ﺃﻓﺮﺍﺡ
ﻟﺤُﺰﻥ ﺍﻟﻌﻴﺪ
ﻣﺎ ﺭﺷّﻴﺘﻲ
ﻣﻦ ﻓﻮﻕ ﺍﻟﺨﺒﻴﺰ
ﺳُﻜّﺮ
ﻭﻻ ﻧﻜﻬﺔ ﻣِﺴِﻚ
ﺃﻭ ﻗِﺮﻓﺔ
ﺃﻭ ﻋﻨﺒﺮ
ﻭﻻ ﺿﺮﺩﺭﺗﻲ
ﻣﻦ ﻓﻮﻗﻮ
ﺍﻟﻤﻠﺢ ﺗﺠﺪﻳﺪ .
ﺧﻠﻴﺘﻲ ﺍﻟﻄﻌﻢ ﺧﺎﻃﺮﺓ
ﻋﻦ ﻳﻮﻣﺎً
ﻋﺴﻞ ﺟﺎﻳﻲ
ﻗﺮﻳﺐ ﻭﺟﺪﻳﺪ .
.......
ﺑﺪﻳﺘﻚ ﻧﻘﺸﺔ
ﻓﻲ ﺻﻔﺤﺔ
ﺿﻤﻴﺮ ﺇﺣﺴﺎﺱ
ﻭﺇﺗﻠﺒّﺸْﺖ
ﺩﻗﻴﺖ ﻟﻴﻚِ
ﻓﻲ ‏( ﺍﻟﺤﻀﺮﺓ ‏)
ﻃﺒﻮﻝ ﻋِﺸِﻘﻚ
ﻭ ‏( ﺭِﻕ ‏) ﻭﻧﺤﺎﺱ .
ﻳﺎ ﻣﺠﻨﻮﻧﺔ ﺯﻱ ﺟِﻨﻲ
ﻟﻘﻴﺘﻚ ﻃﺎﻓﻴﺔ
ﻓﻮﻕ ﺍﻟﻐﻴﻢ
ﻭﻛﻒ ﺑِﻠْﻮﻱ
ﺇﻳﺪﻳﻦ ﺍﻟﻀﻴﻢ
ﻭﻳﻨﺎﻓﺢِ
ﻋﻦ ﺟﺮﻭﺡ ﺍﻟﻨﺎﺱ .
ﻭﺣﺎﻝ ﻣﺮﺟﻴﺤﺔ
ﻣﻦ ﺭﺅﻳﺔ
ﺗﺠﺎﺩﻝ
‏( ﻭﺍﻗﻊ ﺍﻟﺪﻧﻴﺎ ‏)
ﺗﺮﺍﺯﻱ
ﺗﺰﺍﺯﻱ
ﺑﻴﻦ ‏( ﺳﻴﻦ ‏) ‏( ﺟﻴﻢ ‏)
ﺗﺒﺎﺭﺯ
ﺁﻓﺔ ﺍﻟﺘﻜﻤﻴﻢ
ﺗﺴﺎﻣﺮ
ﻓﻲ ﻣﺴﺎﻡ ﺍﻟﺮﺍﺱ .
.....
ﻟِﻘﻴﺘﻚ
ﻓﻲ ﺯﻣﻦ ﺧﺎﻳﻦ
ﻣﻈﻠﺔ ﻫﻤﻴﻤﺔ
ﻣﻦ ﺇﺧﻼﺹ .
......
ﺑﺪﻳﺘﻚ ﻓﻜﺮﺓ
ﻓﻲ ﺗﻄﺮﻳﺰ
ﻃﺮﻑ ﻣﻨﺪﻳﻞ
ﻭﻛَﺒّﻴﺘﻚ
ﺻَﺒُﺮ ﺷﺎﻓﻲ
ﻋﻠﻲ ﺟﺮﻭﺡ
ﺍﻟﺒﻠﺪ ﻭﺍﻟﻨﻴﻞ .
ﻳﺎ ﻣﺠﻨﻮﻧﺔ
ﺯﻱ ﺟِﻨﻲ
ﺭﺳﻤﻨﺎ
ﻋﻠﻲ ‏( ﺷَﻜْﻞ ‏)
ﺍﻟﻮﻃﻦ
ﺗﻌﺪﻳﻞ
ﺭﺟّﻌﻨﺎ ﺍﻟﺠﻨﻮﺏ
ﻟﺸﻤﺎﻝ
ﺑﺼﻤﻨﺎ ﻧَﺸِﺪ
ﺻﺒُﺮ ﻭﺁﻣﺎﻝ
ﻭﻧﻐﻴّﺮ
ﻟﻮﺍﻗﻊ ﺍﻟﺤﺎﻝ
ﻭﻣﺎ ﻧﺒﻨﻲ ﺍﻟﺤِﻠِﻢ
ﻓﻲ ﻣﺠﺮﻱ
ﺩﺭْﺏ ﺍﻟﺴﻴﻞ
ﻭﻳﻌﻮﺩ ﺑﻠﺪﺍً
ﻧﺒﻴﻞ ﻭﺟﻤﻴﻞ
ﻛﺒﻴﺮ ﻭﺃﺻﻴﻞ
ﻣﻠﻴﻮﻥ ﻣﻴﻞ .
.......
‏( ﻭﺃﻗﻮﻝ ﻟﻴﻚ
ﺍﻟﻜﻼﻡ ﺍﻟﺠﺪ
ﻫﻮﺍﻙْ ﺟﻮﺍﻳﺎ
ﻓﺎﺽ ﺑﺎﻟﺠﺪ
ﺃﺧﻴﺮ ﻳﺎ ﺭﻭﺣﻲ
ﻧﻔﺘﺢ ﺳﺪ ‏) .
......
ﻭﺃﻗﻮﻝ ﻟﻴﻚ
ﻛﻼﻡ ﻏُﺒﻨﻲ
ﻭﺣﺮﺍﻕ ﺍﻟﺮﻭﺡ ؟
ﺑﻠﺪ ﺑﺎﺗﺖ
ﺧﺮﻳﻄﻪ ﺟﺮﻭﺡ
ﺧﺎﻳﻒ ﻳﺠﻲ ﺍﻟﻴﻮﻡ
ﺍﻟﺘﻤﻮﺕ ﻭﺍﻗﻔﻪ
ﻭﻣﻦ ﺇﻳﺪﻳﻨﺎ ﺗﻤﺸﻲ
ﺗﺮﻭﺡ .
ﺗﻌﺎﻟﻲ ﻧﻬﺎﺗﻲ
ﻟﻲ ﻣﺼﺒﺎﺡ
ﻭﻧْﺮَﺟّﻊ
ﺯﻣﺎﻥ ﺍﻟﺼﺎﺡ
ﻧَﻨَﺰِﻝ
ﺧﻴﻤﻪ ﺍﻷﺗﺮﺍﺡ
ﻭﻧﺮﻓﻊ
ﺧﻴﻤﻪ ﻟﻸﻓﺮﺍﺡ .
....
ﺑﺪﻳﺘﻚ ﻭﺭﺩﺓ
ﻓﻲ ﻋِﺮﻭﺓ
ﻭﻫﺮﻭﻟﺖ
ﻣﺎ ﺑﻴﻦ ‏( ﺻﻔﺎﻙِ ‏)
ﺣﻨﻴﻦ
ﻭﺑﻴﻦ
ﺗﻌﺮﻳﺸﺔ ‏( ﺍﻟﻤَﺮﻭﻩ ‏)
ﺩﻓﺮﺕ ﺗَﻐَﺎ ﺍﻟﺮﻳﺎﺡ
ﺃﺣﻤﻴﻚ
ﺑﻘﻴﺖ ﺳﺎﺗﺮ
ﺑﻘﻴﺖ ‏( ﺿﺮﻭﻩ ‏) .
......
ﻭﺗْﺨُﺘﻲ ﺭﺣﻠﻚ
ﻓﻲ ﺭﻣﺎﻝ ﻗﻔﺮﻱ
ﺃﺻﻴﺮ ﻭﺍﺣﻪ
ﻭﺳﻼﻡ ﺭﺍﺣﻪ
ﻭﺳﻴﻒ
ﻳﻨﻘﺰ ﻋﻠﻲ ﺍﻟﺴﺎﺣﺔ
ﻭﺃﻓَﺘِّﺢ
ﻓﻲ ﺻﺒﺎﺡ ﺑﺪﺭﻱ
ﻋﻠﻲ ﻭﻃﻨﺎً
ﺑﺪﻳﻊ ﺩﻭﻏﺮﻱ
ﺭﺑﻂ ﺑﻴﻨﺎﺗﻨﺎ
ﺑﻲ ‏( ﺣﺒﻼً ‏)
ﺣﻤﻴﻢ ‏( ﺳِﺮﻱ ‏) .
......
ﺑﺪﻳﺘﻚ ﻫﻤﺴﺔ
ﻓﻲ ﺁﺫﺍﻥ
ﺟﺒﺎﻝ ﺗﻮﺗﻴﻞ
ﻭﻟﻮّﻧﺘِﻚ
ﺻﻔﻖ ﺇﻛﻠﻴﻞ
ﻋﻠﻲ ﺭﺍﺱ ﺍﻟﺒﻠﺪ
ﻭﺍﻟﻨﻴﻞ
ﻧﺴﺠﺘﻚ ﺗﻮﺏ
ﻧﻬﺎﺭ ﺃﺑﻴﺾ
ﺃﺻﻴﻞ ﺍﻟﺘﻴﻞ
ﻭﻧَﺼّﺒﺘِﻚ
ﻓَﺮَﺍﺵ ﺃﺯﺭﻕ
ﻳﺮﻓﺮﻑ
ﻓﻲ ﻧﺨﻞ ﻗﻮﻧﺪﻳﻞ
ﻭﺗﻤﻴﺘﻚ
ﺳﺮِﺝ ﻣﻦ ﻧﻮﺭ
ﻋﻠﻲ ﺻﻬﻮﺓ
ﺃﺻﻴﻞ ﺍﻟﺨﻴﻞ
.....
ﺑﺪﻳﺘﻚ
ﺃَﻟِﻒ
ﺑﺎ
ﺗﺎ .
ﻭﺩﻭﺯﻧﺘﻚ
ﺩﻭ
ﺭﻱ
ﻣﻲ
ﻓﺎ
.......
ﻣﻠﺼﺖ ﺃﺳﺎﻳﺎ
ﻓﻲ ﻋﺘﺒﺔ
ﺳﻼﻡ ﺑﺎﺑِﻚ
ﻣﺸﻴﺖ
ﻣﻦ ﻓﻮﻕ
ﺑﺴﺎﻁ ﻭﺟﺪﻙ
ﻫﺴﻴﺲ ﻭﺣَﻔَﺎ
ﺇﺗﻤﺪﺩﺕ ﻓﻲ ﻟْﺤﺎﻑ
ﺣِﻨِﻴِﺘِﻚ ﺍﻟﻤﻌﻄﻮﻧﺔ
ﻓﻲ ﺍﻟﺼﻨﺪﻝ
‏( ﻭﻧُﻤﺖ ﻗﻔﺎ ‏)

ﻋﻤﻠﻴﺎﺕ ﺍﻟﺒﺤﺚ ﺫﺍﺕ ﺍﻟﺼﻠﺔ
ﻫﺎﺷﻢ ﺻﺪﻳﻖ ﺯﻭﻝ ﺑﺤﺒﻚ <
ﻛﻼﻡ ﻟﻠﺤﻠﻮﺓ ﺷﻌﺮ ﻫﺎﺷﻢ ﺻﺪﻳﻖ <
ﺍﺷﻌﺎﺭ ﻫﺎﺷﻢ ﺻﺪﻳﻖ ﻓﻲ ﺍﻟﻐﺰﻝ <
ﻗﺼﻴﺪﺓ ﺍﻟﻤﻠﺤﻤﺔ ﻫﺎﺷﻢ ﺻﺪﻳﻖ <
ﺍﻟﺸﺎﻋﺮ ﻫﺎﺷﻢ ﺻﺪﻳﻖ ﺻﺎﻟﺢ ﻋﺎﻡ <
ﻫﺎﺷﻢ ﺻﺪﻳﻖ ﺍﻟﻨﻬﺎﻳﺔ <
ﻫﺎﺷﻢ ﺻﺪﻳﻖ ﺳﻴﺮﺓ ﺫﺍﺗﻴﺔ <
ﻗﺼﻴﺪﺓ ﻫﺎﺷﻢ ﺻﺪﻳﻖ ﺭﺋﻴﺲ ﺍﻟﺒﻠﺪ ﻭﻳﻨﻮ <

ﺍﻟﻐﺮﻳﺐ .. ﻭﺍﻟﺒﺤﺮ
ﺷﻌﺮ : ﻫﺎﺷﻢ ﺻﺪﻳﻖ
ﺟِﻴﺖ ﻋﻠﻰ ﻣﻮﺝ ﺍﻟﺒَﺤَﺮ
ﻣَﻌْﺒُﻮﺭ
ﻣَﻐﺒَّﺮ ﺑﻲ ﺭﻣﺎﺩ ﺍﻟﻨﺎﺭ
ﻣَﺠَﺮّﺡ ﻣﻦ ﺣَﺼَﺎ ﺍﻟﻤﺸﻮﺍﺭ
ﻣَﺸَﻘّﻖ ﻣﻦ ﻟﻈﺎ ﺍﻟﻌﺘﻤﻮﺭُ
.....
ﺃﻳﺎ ﻣﻮﺝ ﺍﻟﺒﺤﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒﺤﺮ ﺗﺤﺪﻳﺪ
ﺃﺟﻴﻚ ﻣﺠﺒﻮﺭ
ﺃﺟﻴﻚ ﻗﺮﻓﺎﻥ
ﺃﺟﻴﻚ ﺣﺰﻧﺎﻥ
ﻭﺻﻮﺕ ﻧﺒﺾ ﺍﻟﻀﺤﻚ
ﻣﺤﻈﻮﺭ
ﺃﺟﻴﻚ ﻧَﺸْﻔَﺎﻥ
ﺃﺟﻴﻚْ ﺣﻔﻴﺎﻥ
ﻭﺧﻴﻞ ﺩَﺭْﺏ ﺍﻟﺴﻔﺮ
ﻣﻜﺘﻮﻝ
ﻭﺳﻴﻒ ﻭَﻫَﺞ ﺍﻟﻌُﻤُﺮ
ﻣﻜﺴﻮﺭ .
ﺃﺟﻴﻚْ ﻣﺪﻓﻮﺭ
ﺑﺎﻳِﺪ ﺍﻟﺮﻳﺢ
ﺃﻭﺍﺟﻪ ﻟﻔﺔ ﺍﻟﺘﺎﺭﻳﺦ
ﻭﺃﺣﺲ ﻃَﺮَﻑ ﺍﻟﻠﺴﺎﻥ
ﻣﺸﻠﻮﻝ
ﻃﻌﻢ ﻛﻞ ﺍﻟﻌﺸﻘﺘﻮ
ﻣﺴﻴﺦ .
.....
ﺃﻳﺎ ﻣﻮﺝ ﺍﻟﺒﺤﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒﺤﺮ ﺗﺤﺪﻳﺪ
ﺯﺑَﺪ ﻏُﺒْﻨَﻚ
ﻣﻜﺚ ﻓﻲ ﺍﻟﻨﻮﺭ
ﺯﺑﺪ ﻏُﺒﻨﻲ ﺍْﻧﺴﺠﻦ
ﻓﻲ ﺍﻟﺴﻮﺭ
ﺯﺑﺪ ﻏُﺒْﻨَﻚ ﺳﻄﻊ
ﻟﻠﻨﺎﺱ
ﺯﺑﺪ ﻏُﺒْﻨِﻲ ﺍﺗﺨﻨﻖ
ﻭﺍﻧْﺪَﺍﺱ
ﻃَﻠَﻊ ﻓﻲ ﺣﻠﻤﻲ
ﻗَﻤَﺮ ﺍﻟﺰﻳﻒ
ﺍﺗْﻘَﻄّﻊ
ﺳﻼﻡ ﺍﻟﺮﻭﺡ
ﺑَﻬَﺖ ﺳﺮ ﺍﻟﺸِﻌِﺮ
ﻓﻲ ﺍﻟﺒﻮﺡ
ﻭﺑﺎﺕ ﺳَﻤَﺮ ﺍﻷﻣﺎﺳﻲ
ﻣُﺨﻴﻒ
.....
ﺃﺟﻴﻚْ ﻳﺎ ﻣﻮﺝ
ﻣﻦ ﺍﻷﺻﻘﺎﻉ
ﺃﺩُﻕ ﺑﺎﺏ ﺍﻟﺼَﺪَﻑ
ﻓﻲ ﺍﻟﻘﺎﻉ
ﻳﻬِﺪ ﺣﻴﻞ ﺍﻟﺼﺪﻯ
ﺍﻹﻳﻘﺎﻉ
ﻭﺃﺧﻮﺽ ﻓﻲ ﻟُﺠّﺘَﻚ
ﻣﻬﻮﻭﺱ
ﺗَﻘَﺎﻟْﺪ ﺍﻟﺰُﺭﻗﺔ
ﻓﻲ ﺍﻷﺑﻨﻮﺱ
ﻭﻣﻦ ﻏﺎﺑﺔ ﺍﻟﻤﺮﺟﺎﻥ
ﻳﻬِﻞ ﻓﻲ ﻋﺘﻤﺔ ﺍﻷﺭﻛﺎﻥ
ﻧَﺠِﻢ ﻣﻨﻘﻮﺵ
ﻓﻲ ﺑﺎﻝ ﻓﺎﻧﻮﺱ .
.....
ﻭﻳﺰﻳﺪ ﺷَﺒَﻖ ﺍﻟﻌَﻄَﺶْ
ﻟﻲ ﺯﻭﻝ
ﻳِﻮَﺷﻮِﺵْ ﻧَﺒْﻀَﻚ
ﺍﻟﻤﺸﻠﻮﻝ .
ﺃﻣﻮﺕ ﻟﻲ ﻭﻧَﺴﻪ
ﻧُﺺ ﺍﻟﻠﻴﻞ
ﻟﻲ ﺣُﻀﻨﺎً ﻳﺸﺪ ﺍﻟﺤﻴﻞ
ﻟﻲ ﻧَﻘْﺮْﺓ ﺣﻮﺍﻓْﺮ
ﺍﻟﺨﻴﻞ
ﻟﻲ ﺭﻋﺪﺍً ﻳَﻌﺪْﻝ ﺍﻟﻤﻴﻞ
ﻭﻟﻲ ﺿﺤﻜﻪ
ﻣﻠﻴﻮﻥ ﻣﻴﻞ .
ﺃﻣﻮﺕ ﻓﻲ ﻫﻤﺴﻪ
ﻣﺎ ﺗِﻨْﺬَﺍﻉ
ﻭﻟﻲ ﺭﻓّﺔ ﻧﺴﻴﻢ
ﻓﻲ ﺷْﺮﺍﻉ
ﻣﺴﺎﻓﺮ ﻟﻲ ﻣﺮﺍﻓﻲ
ﻋﺮﻭﺱ .
ﺃﻣﻮﺕ ﻓﻲ ﺻُﺤْﺒَﻪ
ﻣﺎ ﺑِﺘْﺨﻮﻥ
ﺃﻣﻮﺕ ﻓﻲ ﻃﻌﻨﻪ
ﻣﺎ ﺑِﺘْﻜﻮﻥ
ﺃﻣﻮﺕ ﻓﻲ ﺑﻮﺡ
ﻓﺼﺎﺣﺘﻮ ﺳﻜﻮﻥ
ﺃﻣﻮﺕ ﻓﻲ ﺻﻚ ﻏﺮﺍﻡ
ﻣﻀﻤﻮﻥ
ﺃﻣﻮﺕ ﻓﻲ ﺣﻖ
ﺟﺴﺎﺭﺗﻮ ﺟﻨﻮﻥ
ﺃﻣﻮﺕ ....
ﻭﺃﻣﻮﺕ ....
ﻓﻲ ﺷﻴﺘﺎً ﻳﻌﻴﺪ ﺍﻟﻜﻮﻥ .
.....
ﺗﺴﻴﻞ ﻳﺎ ﻣﻮﺝ
- ﺩﻣﻮﻉ ﻓﻲ ﺧﺎﻃﺮﻱ -
ﻣﻦ ﻋَﺒْﺮَﻩ
ﺃﺳَﺎﻣﺮ ‏( ﻛﺎﺳِﺮ ﺍﻷﻣﻮﺍﺝ ‏)
ﻭﺍﺗِﺐ ﻣﻦ ﻓﻜﺮﺓ
ﻟﻲ ﻓﻜﺮﺓ
ﺃﻳﺎ ﻣﻮﺝ ﺍﻟﺒﺤﺮ ﺃﺷﻬﺪ
ﻣِﺴَﺎﺳِﻖ ﻋﻤﺮﻱ
ﻓﻲ ﺍﻟﻤﻐَﺴَﻪ
ﻧَﻔَﺲ ﺗَﻌَﺐ ﺍﻟﻐَﺒُﻦ
ﻗﺎﻳﻢ
ﻣﻦ ﺍﻣﺒﺎﺭﺡ
ﻭﻟﻲ ﺣَﺴّﻪ
ﻭﺍﺣِﺲ ﻓﻲ ﺍﻳْﺪِﻱْ
ﺑﺎﻗِّﻲ ﺣﺮﻳﻖ
ﺃﻻﻗﻲ ﺻﻮﺍﺑْﻌﻲ
ﻓﻲ ﺍﻟﺠَﻤْﺮَﻩ
ﻭﻟﺴّﻊ ﺷﺎﻗِّﻲ
ﻇُﻠْﻢ ﺍﻟﺮﻳﺢ
ﻭﻟﺴﻊ ﺩﺍﺟﻲِّ
ﻓﻲ ﺍﻟﻠُﺠّﻪ
ﻭﻣﺎ ﻭَﺷْﻮَﺵ ﻓﻨﺎﺭ
ﻟﺸْﺮَﺍﻉ
ﻭﻻ ﺍﺗْﻨَﻔِّﺲ
ﺻﺒﺎﺡ ﺑُﻜﺮﻩ .
......
ﺃﻳﺎ ﻣﻮﺝ ﺍﻟﺒﺤﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒﺤﺮ ﺗﺤﺪﻳﺪ
ﺟَﺪَﻏْﺖ ﺷِﺒﺎﻛﻲ
ﺷﺎﻥ ﺃﻗﺒُﺾ
ﻭﻣﻴﺾ ﻣﻦ ﺩُﺭّﻩ
ﻓﻲ ﺍﻟﻤُﺤّﺎﺭ
ﺻَﺒَﺮﺕَ
ﺣَﺒَﺴْﺖَ ﻧَﻔَﺲ ﺍﻟﺸﻮﻕ
ﻋﺸﺎﻥ ﺃﺣﺼِﺪ
ﺷَﻘَﺎ ﺍﻟﻤﺸﻮﺍﺭ
ﻇﻬﺮ ﻓﻲ ﺷَﺒَﻜﻲ
ﻗِﺮْﺵ ﺍﻟﻤﻮﺕ
ﺇﺗْﻤَﺮﻋﻒ ﻋَﻠَﻰ ﺍﻟﺤﻮﺕ .
ﺇﻧْﻔَﺠَﺮ ﺍﻟﺒﺮِﻕ
ﺃﻣﻄﺎﺭ
ﺇﺗْﺠﺎﺳَﺮ ﻋَﻠَﻰ ﺍﻟﺮﻳﺢ
ﻭﺍﺗْﺤﺎﺻَﺮْﺕ ﺑﺎﻷﺧﻄﺎﺭ .
.....
ﻭﻓﻲ ﻋَﺮْﺽ ﺍﻟﺒَﺤَﺮ
ﻭﺍﻟﻤﻮﺕ
ﻋَﺰَﻓْﺖ ﻣﻦ ﺍﻟﻬﻠﻊ
ﻣﺴﺪﺍﺭ
ﺳﺒﺢ ﻓﻲ ﺍﻟﺠﻮ
ﺭﻓﻴﻒ ﺍﻟﺼﻮﺕ
ﻭﺍﺗْﻬَﺪّﺝ ﺻﺪﻯ ﺍﻟﻘﻴﺜﺎﺭ
ﺭﺟﻊ ﺑﺎﻝ ﺍﻟﺒَﺤَﺮ
ﺳﺎﻛﻦ
ﻭﺍﺗْﻤَﻜّﻦ ﻫﻮﻯ ﺍﻟﻤﺤّﺎﺭ
ﺑﻘﻴﺖ ‏( ﺍﻭﺭﻓﻲ ‏)
ﻓﻲ ﻭﺵ ﺍﻟﻤﻮﺕ
ﺑﻜﺎﻳﺎ ﺿِﺤِﻚ
ﻏُﻨﺎﻳﺎ ﻫﺴﻴﺲ
ﺃﺑﺎﺭﺯ ﺑﺎ ﻟﻨَﻐَﻢ ﺃﺷﺒﺎﺡ
ﻭﺍﻛﺎﺗﻞ ﺑﺎﻟﺸِﻌِﺮ
ﺇﺑﻠﻴﺲ .
ﻭﺍﺧُﺶ ﻓﻲ ﻟﻴﻞ
ﻣﺪﺍﻳْﻦ ﺍﻟﻤﻮﺕ
ﺃﺭﺟِّﻊ ﻟﻠﺸﻤِﺲ
‏( ﻳُﻮﺭِﻳﺪِﻳﺲ ‏)
.......
ﺃﻳﺎ ﻣﻮﺝ ﺍﻟﺒَﺤَﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒَﺤَﺮ ﺗﺤﺪﻳﺪ
ﻣﺸﻴﺖ ﺟَﻤْﺮ ﺍﻟﻌُﻤُﺮ
ﻣﺠﺒﻮﺭ
ﻣﺸﻴﺖ ﻧُﺺ ﺍﻟﻌُﻤُﺮ
ﻣﺪﻓﻮﺭ .
ﻣﺸﻴﺖ ﺻﺤﺮﺍ ﺍﻟﻌُﻤُﺮ
ﺑﺎﻹﻳﺪ .
ﻓَﺘَﺮْﺕَ ﻣﻦ ﺍﻟﺴَﺒَﻖ
ﻟﻠﺘﺎﺭ
ﻭﻣﻦ ﻣﺮﺟﺤﻴﺔ ﺍﻷﺷﺮﺍﺭ
ﻭﻣﻦ ﺣِﺴﻜِﻨﺔ ﺍﻷﺳﺮﺍﺭ
ﻭﻣﻦ ﺷَﺒَﻖ ﺍﻟﺨﻴﺎﻝ
ﻟﻠﺘﺎﺭ .
ﻓََﺘَﺮْﺕَ ﻣﻦ ﺍﻟﻄَﻌِﻦ
ﻭﺍﻟﻈﻦ
ﻭﻣﻦ ﻧَﺤﺮ ﺍﻟﺠﻤﻴﻞ
ﺑﺎﻟﻤَﻦ
ﻭﻣﻦ ﺭَﺟْﻴّﺔ ﻏﺮﺍﻡ ﻭﺃﻧﻴﺲ
ﺃﻳﺎ ﻣﻮﺝ ﺍﻟﺒﺤﺮ ﺃﺷْﻬَﺪ
ﻧَﻔَﺲ ﻏُﺒْﻦ ﺍﻟﻌُﻤُﺮ
ﻗﺎﻳﻢ
ﻭﻟﺴّﻊ ﻣﺎ ﻭﺻﻠﺖ
ﺍﻟﻤﻴﺲ .
.....
ﺃﻣﻮﺕ ﻳﺎ ﻣﻮﺝ
ﻋﻠﻰ ﺩَﻗْﺴَﺔ ﻧِﻌَﺎﺱ
ﻓﻲ ﺳﻼﻡ
ﻭﻟﻲ ﻧَﻤّﺔ ﻓَﺮَﺡ ﺟﺎﻳﻲ
ﻭﻟﻲ ﺧﺎﻃْﺮَﺓ
ﻣُﺪُﻥ ﺃﺣﻼﻡ .
ﻭﻟﻲ ﺁﺧﺮ ﻧَﻀِﻢ
ﻳِﺘْﻘَﺎﻝ
ﻭﻟﻲ ﺁﺧﺮ ﺑﻴﺎﻧﺎً ﻫﺎﻡ
ﻭﻟﻲ ﺻُﺒﺤﺎً ﻣَﺰَﺭْﻛَﺶ
ﻧﺎﺭ
ﻭﻟﻲ ﺿُﻼً ﻳِﻤِﺶ
ﻗِﺪّﺍﻡ
ﺃﻣﻮﺕ ﻭﺃﻣﻮﺕ
ﻟﻲ ﻳﻘﻈﺔ ﺟَﺮِﺣْﻨَﺎ
ﺍﻟﻨﺎﻡ
ﻭﻟﻲ ﺧَﺠْﻠَﺔ
ﺧَﺠَﻠﻨﺎ ﺍﻟﻌﺎﻡ .
.....
ﺃﻳﺎ ﻣﻮﺝ ﺍﻟﺒَﺤَﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒَﺤَﺮ ﺗﺤﺪﻳﺪ
ﺑَﺼَﻘْﺖَ ﻋﻠﻰ ﺍﻟﻤﺜَﻞ
ﻣَﺮّﻩ
ﻋﺸﺎﻥ ﻗﺎﻝ -:
‏( ﺍﻷﻣﻞ ﺣُﻔْﺮَﻩ ‏)
ﺭَﺳَﻤﺖ ﻫﻮﺍﻱ
ﺑﺎﻟﺸَﻔْﺮَﺓ
ﻋﺸﺎﻥ ﺁﻣَﻦ
ﻋَﺪَﺍ ﺍﻟﺨُﻔَﺮَﺍ
ﻃﻠﺒﺖ ‏( ﺟﻮﺍﺯ ﺳﻔﺮ ‏)
ﺗﻤﺪﻳﺪ
ﺧَﺘَﻤﻮﺍ ﺟﺮﻭﺣﻲ ﻟﻠﺘﺠﺪﻳﺪ
ﻟﻘﻴﺖ ﺗﺄﺷﻴﺮﻩ ﻟﻠﻤُﺮﻩ
ﻭﺭﻣﺎﺩ
ﺣﺎْﺯﻣِﻨُّﻮ ﻓﻲ ﺻُﺮّﻩ .
...
ﺃﻳﺎ ﻗﺎﺑﺾ ﻫﻮﻯ
ﺍﻟﺴﻜﻴﻦ
ﻭﻳﺎ ﻏﺒﻴﺎﻥ
ﻭﻳﺎ ﺻﺤﻴﺎﻥ
ﻭﻳﺎ ﻓﺎﻟﺢ
ﻭﻳﺎ ﻣﺴﻜﻴﻦ
ﺃﺧﻴﺮ ﺳَﻔَﺮﻙ
ﻳﺨﻴﺐ ﻣَﺮّﻩ
ﺃﻛﺎﻥ ﺗﺒﻘﻰ
ﺍﻟﺠﺮﻭﺡ ﺣُﺮﻩ
ﺃﺧﻴﺮ ﺗﺨﺘﺎﺭ
ﺗﻜﻮﻥ ﻣُﺤﺘﺎﺭ
ﺑﺪﻝ ﺗﻬﺒﻂ
ﺣِﻠِﻢ ﻭﺍﻃﻲ
ﺃﺧﻴﺮ ﺗَﻐْﺮَﻕ
ﻓﻲ ﺷَﺒَﻖ ﺍﻟﻤﻮﺝ
ﺑَﺪَﻝ ﺗَﻠﻤﺲَ
ﻭَﻫَﻢ ﺷﺎ ﻃﻲ
ﺃﺧﻴﺮ ﺗِﻨْﺠَﻢ
ﻓﻲ ﻧﺎﺭ ﺍﻟﻬَﻢ
ﺑَﺪَﻝ ﺗَﺤﻠﻢ
ﺣِﻠِﻢ ﻭﺍﻫﻲ
ﺃﺧﻴﺮ ﺗَﺼﺒِﺢ
ﻋﺪﻳﻞ ﻣﻈﻠﻮﻡ
ﺑَﺪَﻝ ﺗﺼﺒﺢ
ﻋﺪﻳﻞ ﺧﺎﺗﻲ .
ﺃﺧﻴﺮ ﺗﺼﺮﺥ
ﻓﻲ ﻭﺵ ﺍﻟﺠِﻦ
ﺑَﺪَﻝ ﺗِﺘْﻌَﺪَّ
ﻣﺘﻮﺍﻃﻲ .
......
ﺃﻳﺎ ﻣﻮﺝ ﺍﻟﺒﺤﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒﺤﺮ ﺗﺤﺪﻳﺪ
ﻗﺮﻳﺖ ﺳﺮ ﺍﻟﻄﺮﻳﻖ
ﻓﻲ ﻛﺘﺎﺏ
ﻣﻐﺒَّﺮ ﻓﻲ ﺭﻓﻮﻑ ﺩﻛﺎﻥ
ﻧَﻔَﺨْﺖَ ﻏﺒﺎﺭﻭ
ﺑﻲ ﺭﻭﺣﻲ
ﻭﺗَﻠَﻴﺖ ﺗﻌﻮﻳﺬَﺓ
ﺍﻟﻌﻨﻮﺍﻥ .
ﻟﻘﻴﺖ ﻓَﺼْﻞ ﺍﻟﻔُﺠﻮﺭ
ﻭﺍﺳﻊ
ﻭﺿَﻴِّﻖ ﻣﺪﺧﻞ ﺍﻹﻳﻤﺎﻥ .
ﻧَﺒﺸْﺖَ ﺍﻟﻔﻜﺮﻩ
ﺑﻲ ﺿُﻔﺮﻱ
ﻭﺑَﺤَّﺖَّ ﺍﻟﻔﺼﻮﻝ
ﺃﺯﻣﺎﻥ
ﺳَﺮَﻕ ﻣﻦ ﻋُﻤﺮﻱ
ﻟُﻐﺰ ﺍﻟﺨﻴﺮ
ﻭﺍﺗْﻘﺎﺳﻢ ﻫﻮﺍﻳﺎ ﺍﻟﻐﻴﺮ
ﻭﺍﻧْﻜَﺴَﺮ ﺍﻟﻔﻬﻢ
ﺧﺠﻼﻥ .
.....
ﻭﺍﺗْﺤَﻴّﺮﺕَ ﻓﻲ ﺣﻴﺮﺗﻲ
ﻭﻣﻦ ﺗﺨﺮﻳﻔَﺔ ﺍﻟﻤﻴﺰﺍﻥ
ﺃﻳﺎ ﻣﻮﺝ ﺍﻟﺒَﺤَﺮ
ﺃﺿﺤﻚ
ﻟﻘﻴﺖ ﺍﻟﺤﻖ
ﺻَﺪَﺭ ‏( ﻣﺮﺳﻮﻡ ‏)
ﻣﻦ ‏( ﻫﻴﺌﺔ ﺍﻷﺭﻛﺎﻥ ‏)
ﻭﺍﺗْﺮَﻓّﻊ ﺃﻣﻴﺮ ﺍﻟﺠﻦ
ﺻِﺒِﺢ ﻓﻲ ﻏَﻔﻠﺔ
ﺳِﻴِﺪ ﺍﻟﺸﺎﻥ
ﻭﻗﺎﻡ ﻓﻲ ﻋﻴﻦ
ﺷَﻤِﺴْﻨﺎ ﺍﻟﺴﺪ
ﻭﺍﺗْﻘﻄّﻊ ﻏُﻨﺎ ﺍﻟﺸُﻔﻊ
ﻭﺍﺗْﻘَﻠﻊ ﺍﻟﻀُﻔُﺮ
ﻓﻲ ﺍﻟﻴﺪ .
ﻭﻣﻦ ﺷَﺒَﻜﺔ
ﻣﺴﺎﻡ ﺍﻟﻠﻴﻞ
ﻗﺎﻡ ﺷﻮﻙ ﺍﻟﻈُﻠُﻢ
ﻓﺮﻫﺪ
ﻭﻏﺎﺏ ﻗﻤﺮ ﺍﻷﻣﻞ
ﺧﺠﻼﻥ
ﻣﻦ ﻇﻠُﻤﺔ ﺍﻟﻤﺸﻬﺪ .
....
ﺃﻳﺎ ﻣﻮﺝ ﺍﻟﺒَﺤَﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒَﺤَﺮ ﺗﺤﺪﻳﺪ
ﺃﻳﺎ ﻣﻮﺝ ﺍﻟﺒَﺤَﺮ
ﺃﺷﻬﺪ
ﻛِﻤﻞ ﺩَﻣْﻊ ﺍﻟﻮَﺗَﺮ
ﻓﻲ ﺍﻟﺒﻮﺡ
ﻭﺍﺗﺒﺎﻗﺺ ﺷُﻌﺎﻉ
ﺍﻟﺮﻭﺡ
ﻭﻣﻦ ﺑﻴﻦ ﺻﻮﺍﺑْﻊ
ﺍﻷﻳﺪ ﺃﺗْﺴَﺮّﺏ ﺷﻌﺎﻉ
ﺍﻟﺮﻭﺡ
ﻭﻣﺎ ﻣﻌﺮﻭﻑ
ﻣﺘﻴﻦ ﻳﺎ ﻣﻮﺝ
ﺟﺮﻭﺣﻨﺎ ﺗَﺮﻭﺡ
...
ﺃﺳﻒ ﻳﺎ ﻣﻮﺝ
ﻋﻠﻰ ﻃَﻌَﻢ ﺍﻟﻀﺤﺎ
ﺍﻟﺤَﻨْﻀَﻞ
ﻋﻠﻰ ﺍﻟﻤِﺤْﺮَﺍﺕ
ﻭﻛِﺖ ﻋَﺼﻠْﺞ
ﻋﻠﻰ ﻏَﺼّﺔ
ﺃﺳﻰ ﺍﻟﻤِﻨْﺠَﻞ
ﺃﺳﻒ ﻳﺎ ﻣﻮﺝ
ﻋﻠﻰ ‏( ﺍﻟﺤِﻴْﺮﺍﻥ ‏)
ﻋﻠﻰ ﺍﻟﻤﻴﺰﺍﻥ
ﻋﻠﻰ ﺍﻟﻘﺎﺿﻲ
ﻋﻠﻰ ﺍﻟﻄﺎﻏﻲ
ﻋﻠﻰ ﺍﻟﻈُﻠﻢ
ﺍﻟﺮَﻗَﺪ ﻗَﻴََّﻞ
ﺃﺳﻒ ﻳﺎ ﻣﻮﺝ
ﻋﻠﻰ ﺍﻹﻧﺴﺎﻥ
ﻭﻛِﺖ ﻳِﺼﺒِﺢ
ﻣﻦ ﺍﻟﻔﻴﺮﺍﻥ
ﻋﻠﻰ ﻃﺎﻭﻟﺔ
ﻓﻜﻲ ﺍﻟﻤﻌﻤﻞ
ﺃﺳﻒ ﻳﺎ ﻣﻮﺝ
ﻋﻠﻰ ﺍﻟﻤﻮﺻﻮﻝ
ﻭﻣﺎ ﻭﺍﺻِﻞ
ﺃﺳﻒ ﻳﺎ ﻣﻮﺝ
ﻋﻠﻰ ﺍﻟﻘِﺮْﺵ
ﺍﻟﺼِﺒِﺢ ﻓﺎﺻِﻞ .
ﺃﺳﻒ ﻳﺎ ﻣﻮﺝ
ﻋﻠﻰ ﺍﻟﻤُﺪﺍﺡ
ﻋﻠﻰ ﺍﻟﺰﻓّﺔ
ﺃﺳﻒ ﻳﺎ ﻣﻮﺝ
ﻋﻠﻰ ﺗَﺠْﺮِﻳﺤْﻨﺎ ﺑﺎﻟﻠﻔّﺔ
ﺃﺳﻒ ﻳﺎ ﻣﻮﺝ
ﻋﻠﻰ ﻋﺎﺭ ﺍﻟﻐَﺘَﺎ
ﺍﻟﻨﺎﺻِﻞ .
ﺃﺳﻒ ﻳﺎ ﻣﻮﺝ
ﻋﻠﻰ ﺣﺎﻟﻨﺎ
ﻋﻠﻰ ﺍﻟﺤﺎﺻﻞ .
.......
ﺃﻳﺎ ﻣﻮﺝ ﺍﻟﺒَﺤَﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒَﺤَﺮ ﺗﺤﺪﻳﺪ
ﺃﻗﺮﺍﻟﻚ ﺗُﺮﺍﺙ
‏( ﺍﻟﺮﻣﺔ ﻭﺍﻟﺤُﺮﺍﺱ ‏)
‏( ﻭﺗﻐﻨﻴﻠﻮﺍ ﺑﺖ ﻋﺒﺎﺱ
ﻋﻴﻨﻲّ ﺃﻧﺎ
ﻓﻲ ﺍﻟﻘﻬﻮﺓ ﻣﺎ ﺟﻼﺱ
ﻋﻴﻨﻲ ﺃﻧﺎ ‏)
ﻭﺍﺣﻜﻴﻠﻚ
ﺣﻜﺎﻳﺔ ‏( ﺍﻟﻐﻮﻝ ‏)
ﻣﻊ ‏( ﺍﻟﺴَﻤْﺤَﺔ ‏)
ﺳﺒﺎﻕ ﺍﻟﻨﻤﻠﺔ
ﻭﺍﻟﻘﻤﺤﺔ
......
ﻳﺼَﻔِّﻖ
ﻣﻮﺟﻚ ﺍﻟﻤﺪﻫﻮﺵ
ﻭﻳﻀﺤﻚ
ﺻﻮﺗﻚ ﺍﻟﻤﻘﺮﻭﺵ
ﻭﺗَﻄْﻮﻝ ﺿﺤﻜﺘﻚ
‏( ﺻﺎﺭﻱ ‏)
ﺗﺠﺎﺭﻱ ‏( ﺍﻟﻤﻮﻟﺪ ‏) ﺍﻟﺠﺎﺭﻱ .
.....
ﻭﺷﻮﻑ ﻳﺎ ﻣﻮﺝ
ﻧَﺤَﺠِّﻲ ﺍﻟﻘَﻤَﺮﻩ ﺑﺎﻟﻔُﻘَﺮﺍ
ﻭﻛﺖ ‏( ﺍﺗﻘﺎﺳﻤﻮ
ﺍﻟﻨَﺒَﻘَﺔ ‏)
ﺗﻜﺸِّﺮ
ﺑَﺴْﻤَﺘَﻬﺎ ﺍﻟﺼﺎﻓﻴﺔ
ﻭﺗَﺤْﻠِﺐ ﺩﻣﻌﻪ
ﻓﻲ ﻗﺎﻓﻴﻪ
ﺗﻘﻮﻝ ﻳﺎ ﻣﻮﺝ
ﺃﻧﺎ ﺍﻟﺸﺎﻫْﺪﻩ
ﻭﺃﻧﺎ ﺍﻟﺸﺎﻳﻔﻪ
ﺣﻜﺎﻳﺔ ﺍ ﻟﺪﻧﻴﺎ
ﻣﻦ ﻗﺎﻣﺖ
ﻭﻋﺎﺭﻓﺔ ﺍﻟﻨﺎﺱ
ﻣﺘﻴﻦ ﺷِﺒْﻌَﺖ
ﻣﺘﻴﻦ ﺻﺎﻣَﺖ
ﻭﻣﻨﺪﻫﺸﻪ
ﻣﻦ ﺍﻷﻣﺜﺎﻝ
ﻭﻛﺖ ﺗَﺼْﺒِﺢ
ﺧَﺪَﺭ .. ﻏَﺸّﻪ
ﻛﺘﻴﺮ ﺑﻀﺤﻚ
ﻭَﻛِﺖ ﺃﺳﻤﻊ -:
‏( ﻗَﺼَﻢ ﻇﻬﺮ ﺍﻟﺒﻌﻴﺮ
ﻗَﺸّﻪ ‏) .
ﻛﺘﻴﺮ ﺑَﺴْﻤَﻊ
ﺣُﺠﺎ ﺍﻟﺘﺎﺭﻳﺦ
ﺣِﻜَﻢ ﺃﻣﺜﺎﻝ .
ﺃﻻﻗﻲ ﺍﻟﺤِﻜْﻤَﺔ
ﻭﺵ ﺍﻟﻘﻮﻝ
ﻭﺿَﻬﺮ ﺍﻟﺤِﻜْﻤﻪ
ﻓﻲ ﺍﻷﻓﻌﺎﻝ
ﻛﺘﻴﺮ ﺷُﻔﺖ
‏( ﺍ ﻟﺴِﺒَﺢ ‏) ﺗِﻨْﺠَﺮ
ﻭﺟﻮﻩ ﻓﻲ ﺍﻟﺤﻖ
ﺗِﺘِﺐ ﺗِﻨْﺼَﺮ
ﺩﻣﻮﻉ ﻭُﺭﺍﻉ
ﻭﺍﻳﺪﻳﻨﺎ ﺗَﺮُﺩ ﺍﻟﺼﺎﻉ .
ﻛﺘﻴﺮ ﻧَﺴْﻤَﻊ
ﻋﻦ ‏( ﺍﻟﺪﻧﻴﺎ ﺃﻡ ﻧﻌﻴﻤﺎً
ﻏَﺶْ ‏)
ﻭﻋﻦ ‏( ﻓَﻀْﻞ ﺍﻟﻀَﻬَﺮ ‏)
ﻓﻲ ﺍﻟﺤﺮ
ﻭﻋﻦ ﻧﻮﺭَﺓ
ﺻَﻼﺡ ﺍﻟﻮﺵ
ﻭﻋﻦ ﻏَﺾّ ﺍﻟﻨَﻈﺮ
ﺇﻳﻤﺎﻥ
ﻭﻋﻦ ﺑَﺮَﻛﺔ ﺻَﺤَﻨﺎ
ﺩَﻏَﺶ .
......
ﻭﻧﻠﻘﻰ ﺍﻟﺤِﻜْﻤَﺔ
ﻣﻠﻴﻮﻥ ﻟﻮﻥ
ﻭﺍﻟﻔُﺠﺎﺭ
ﻧﺠﻮﻡ ﺍﻟﻜﻮﻥ .
ﻧﻠﻘﻰ ﺍﻟﻜﻠﻤﺔ
ﻣﻠﻴﻮﻥ ﻭﺵ
ﻭﻧﻠﻘﻰ ﺍﻟﻐَﺶ
ﻣﺒﺎﺭِﻱ ﺍﻟﻐﺶ .
ﻣﺘﻴﻦ ﻳﺎ ﻣﻮﺝ
ﺃَﺳَﻔْﻨَﺎ ﻳﻐﻴﺐ
ﺩَﻏَﺸْﻨَﺎ ﻳﺠﻲ
.....
ﻋﺼﻮﺭ ﻳﺎ ﻣﻮﺝ
ﻧَﻀِﻤْﻨﺎ ﺷَﻜِﻲ
ﻏُﻨَﺎﻧﺎ ﺷَﻜِﻲ
ﻓِﻌِﻠْﻨﺎ ﺷَﻜﻲ
ﻭ ‏( ﺗﺤﺖ ﺍﻟﻘُﺒﺔ ‏)
- ﻣﻤﺎ ﻗُﻤْﻨَﺎ -
‏( ﻣﺎ ﻓﻲ ﻓﻜﻲ ‏) .
.....
ﺃﻳﺎ ﻣﻮﺝ ﺍﻟﺒﺤﺮ ﺑﺎﻟﺬﺍﺕ
ﺃﻳﺎ ﻣﻮﺝ ﺍﻟﺒﺤﺮ ﺗﺤﺪﻳﺪ
ﺃﺣﺎﻭﻝ ﺑﻲ ﺻﻮﺍﺑْﻊ
ﺍﻟﺨﻮﻑ
ﺃﺩﻕ ﺑﺎﺏ ﺍﻟﻬﻮﻯ
ﺍﻟﻤﻌﺰﻭﻝ
ﺃﺣﺲ ﺑﻲ ﺭﻫَﺒَﺔ
ﺍﻷﺣﻼﻡ
ﻭﺑﻲ ﺣَﻨْﻀَﻞ
ﺯﻣﺎﻥ ﻭﻓﺼﻮﻝ .
ﻭﺃﺷِﺪ ﺣﻴﻞ ﺍﻟﻌَﺸَﻢ
ﻣﻦ ﻣﻴﻞ .
ﺃﻗﻮِّﻡ ﺟَﻨّﺔ ﺍﻷﺣﻼﻡ
ﺗﺠﻲ ﺍﻷﺣﻼﻡ
ﻓﻲ ﺩﺭﺏ ﺍ ﻟﺴﻴﻞ .
ﺗﻌﺎﻓِﺮ ﻓﻲ ﻣﺴﺎﻟﻚ
ﺍﻟﻤﻮﺕ ﻭﺗِﺘﺠﺮﺡ
ﺣﻮﺍﻓﺮ ﺍﻟﺨﻴﻞ
ﺃﻳﺎ ‏( ﺳﻴﺰﻳﻒ ‏)
ﺯﻣﺎﻥ ﺍﻟﺠِﻦ
ﻣﺘﻴﻦ ﻗَﺪَﺭﻙ
ﻳﺴﺎﻣﺢ ﻳﺤﻦ
ﻣﺘﻴﻦ ﺗَﻮْﺻﻞ
ﺑﺤﺠﺮ ﺍﻟﺸﻴﻞ
ﺃﻳﺎ ﻗﺎﺑﺾ
ﻫﻮﻯ ﺍﻟﺴﻜﻴﻦ
.......
ﻳﺎ ﻏﺒﻴﺎﻥ
ﻭﻳﺎ ﺻَﺤْﻴﺎﻥ
ﻭﻳﺎ ﻣﺴﻜﻴﻦ
ﻭﺣﻴﺪ ﺭﻏﻢ ﺍﻟﻮﺭﻕ
ﻭﺍﻟﺼﻮﺕ .
ﻭﺣﻴﺪ ﺑﻴﻦ ﺍﻟﻨَﻔَﺲ
ﻭﺍﻟﻤﻮﺕ
ﻭﺣﻴﺪ ﺑﻴﻦ ﺍﻟﻘِﺮِﺵ
ﻭﺍﻟﺤﻮﺕ
ﻭﺣﻴﺪ ﺭﻏﻢ ﺍﻟﺸﺪﺭ
ﻭﺍﻟﻄﻴﺮ
ﻭﺣﻴﺪ ﻭﺳﻂ ﺍﻟﺼﺤﺎﺏ
ﻭﺍﻟﻐﻴﺮ
ﻭﺣﻴﺪ ﺯﻱ ﺧﺎﻃْﺮﻩ
ﻓﻲ ﻋﺘﻤﻮﺭ
ﻭﺣﻴﺪ ﺯﻱ ﻋَﺘْﻤﻪ
ﻭﺳﻂ ﺍﻟﻨﻮﺭ .
ﻛﻔﺎﻙْ ﻳﺎ ﺯﻭﻝ
ﻣَﻀَﺎﻳْﻖ ﺍﻟﺴﻮﺭ
ﺗﺠﺎﺑﺪ ﻓﻲ ﺍﻟﺰﻣﻦ
ﻣﻌﺒﻮﺭ
ﺗَﺼَﻔِّﺮ ﻓﻲ ﺳَﻤْﺎﻙ
ﺍﻟﺮﻳﺢ
ﺗَﻠِﻒ ﺑﻴﻜﺎ ﺍﻟﻤُﺪﻥ
ﻭﺗْﺪﻭﺭ
ﻭﺭﺍﻛْﺐ ﺍ ﻟﻌﺎﺻْﻔﺔ
ﺯﻱ ﻋُﺼﻔﻮﺭ
ﻣَﻌَﻠّﻖ ﻓﻲ ﺍﻟﻤﻄﺮ
ﻭﺍﻟﻐﻴﺐ
ﻭﻣِﺮْﻕَ ﺍ ﻟﺪﻧﻴﺎ
ﻓﻮﻕ ﻣﻜﺴﻮﺭ
......
ﺃﺟﻴﻚ ﻳﺎ ﻣﻮﺝ
ﻭﺗﺮ ﻣﻌﺒﻮﺭ
ﺗَﻘَﺒِّﻞ ﺯُﺭْﻗَﺘَﻚ ﻣﻨﻲ
ﺍﺣﻜﻴﻠﻚ ﺷﻘﺎ ﺍﻟﻤﺸﻮﺍﺭ
ﻳﺨﺎﻑ ﻣِﻠﺤَﻚ
ﻣِﻠِﺢ ﻫَﻤِّﻲ .
ﺃﻗﻮﻝ ﻟﻴﻜﺎ
ﺍﻟﻜﻼﻡ ﻣﻜﺸﻮﻑ
ﻭﺃﺭﺍﻓِﻊ ﺷَﺎﻥ
ﺗﺤﺲ ﻭﺗْﺸﻮﻑ
ﻳﻄْﻠَﻊ ﻣﻦ ﺟﺒﻴﻨﻚ
ﻧﻮﺭ
ﻳِﺠُﺒْﺮ ﺍﻟﺨﺎﺗﺮ ﺍﻟﻤﻜﺴﻮﺭ
ﻭﺗَﻨْﺪَﻩ ﻟﻲ ﺑﻨﺎﺕ ﺍﻟﺤﻮﺭ
ﻳِﻔِﺠَّﻦ ﻣﻦ ﻋﻴﻮﻧﻲ
ﺍﻟﺴﻮﺭ .
ﻭﺍﺷﻮﻑ ﺣُﻀْﻦ
ﺍﻟﻮﻃﻦ ﻣﻔﺘﻮﺡ
ﻭﺍﻗﻴﻒ
ﻓﻲ ‏( ﻛﺎﺳِﺮ ﺍﻷﻣﻮﺍﺝ ‏)
ﺃﺷُﻢ ﻃﻴﻨﺎً
ﻗﺮﻳﺐ ﻟﻠﺮﻭﺡ .
ﻭﻳِﻬَﻮِّﻡ ﻓﻲ ﺍﻟﺸَﺮِﻕ
ﻓﺎﻧﻮﺱ
ﻣﺤﻠِّﻖ ﺑﻲ ﺟﻨﺎﺡ
‏( ﻓﻴﻨﻮﺱ ‏)
ﻭﺍﺳﻴﻞ ﺣِﻨِﻴّﻪ
ﻣﻦ ﺩﻣﻌﻪ
ﻭﺍﻗَﻄِّﻊ
ﺩﻓﺘﺮ ﺍﻟﻔﺠﻌﻪ
ﻭﺍﺣﺲ ﻣﻦ ﻓﺮﺣﻪ
ﻣﻦ ﻋَﺒْﺮَﻩ
ﺗﺪُﻕ ﺗﺄﺷﻴﺮﻩ
ﻟﻠﺮﺟﻌﺔ .
.....
ﺃﺟﻴﻚْ ﻳﺎ ﻣﻮﺝ
ﻣﻦ ﺍﻷﺻﻘﺎﻉ
ﺃﺩُﻕ ﺑﺎﺏ ﺍﻟﺼَﺪَﻑ
ﻓﻲ ﺍﻟﻘﺎﻉ
ﻳِﻬِﺪ ﺣﻴﻞ ﺍﻟﺼﺪﻯ
ﺍﻹﻳﻘﺎﻉ
ﻭﺃﺧﻮﺽ ﻓﻲ ﻟﺠُﺘَﻚ
ﻣﻬﻮﻭﺱ
ﺗﻐﻴﺐ ﺍﻟﺰُﺭﻗﻪ
ﻓﻲ ﺍﻷﺑﻨﻮﺱ
ﻭﻣﻦ ﻏﺎﺑﺔ ﺍﻟﻤﺮﺟﺎﻥ
ﻳﻬﻞ ﻓﻲ ﻋَﺘْﻤَﺔ ﺍﻷﺭﻛﺎﻥ
ﻭﻃﻦ ﻣﺮﺳﻮﻡ
ﺑﻨﻮﺭ ﻓﺎﻧﻮﺱ
ﻭﻃﻦ ﻣﻨﻘﻮﺵ
ﻓﻲ ﺑﺎﻝ ﻓﺎﻧﻮﺱ

ﻗﺎﻟﻮﺍ ﻋﻦ ﻫﺎﺷﻢ -:
ﻫﺎﺷﻢ ﺻﺪﻳﻖ ... ﺳﻼﻣﺎﺕ !...
ﻣﺒﺪﻉ ﺑﻘﺎﻣﺔ ﻭﻃﻦ ﻭ ﺇﻧﺴﺎﻥ ﺑﺪﺭﺟﺔ ﺳﻔﻴﺮ ﻟﻜﻞ ﻣﻌﺎﻧﻰ ﺍﻟﻮﻓﺎﺀ ﻭﺷﻴﻢ ﺍﻟﻜﺒﺮﻳﺎﺀ ... ﻳﻘﺎﺑﻞ ﻛﻞ ﺭﻳﺎﺡ ﺍﻹﺧﺘﻼﻑ ﺑﺼﺪﺭ ﻣﻔﺘﻮﺡ ﻭﻻ ﻳﻌﺮﻑ ﺍﻹﻧﻜﺴﺎﺭ ﻋﻠﻰ ﻣﺴﺘﻮﻯ ﺍﻟﻠﻐﺔ ﺃﻭ ﺍﻹﺻﻄﻼﺡ .. ﺇﻧﻪ ﻣﺒﺪﻋﻨﺎ ﺍﻟﻜﺒﻴﺮ ﺍﻷﺳﺘﺎﺫ ﺍﻟﺸﺎﻋﺮ ﻭﺍﻟﻜﺎﺗﺐ ﺍﻟﻤﺴﺮﺣﻰ ﻭﺍﻟﻨﺎﻗﺪ ﺍﻟﺤﺼﻴﻒ ﻭﺍﻟﻜﺎﺗﺐ ﺍﻟﺬﻯ ﺗﻐﺘﺴﻞ ﺣﺮﻭﻓﻪ ﻓﻰ ﻧﻬﺮ ﺍﻟﺸﻤﻮﺥ ﻗﺒﻞ ﺃﻥ ﺗﻌﺎﻧﻖ ﺃﻓﻜﺎﺭﻩ ﺍﻟﺘﻰ ﻣﺜﻞ ﺧﻴﻮﻝ ﺟﺎﻣﺤﺔ ﺗﺮﻛﺾ ﺑﻼ ﺗﻮﻗﻒ ﻓﻰ ﺩﻭﺭﺗﻨﺎ ﺍﻟﺪﻣﻮﻳﺔ .
ﺇﻧﻪ ﻫﺎﺷﻢ ﺻﺪﻳﻖ ﺍﻟﻤﻠﻚ ... ﺫﻟﻚ ﺍﻟﻤﺒﺪﻉ ﺍﻟﺬﻯ ﺇﻣﺘﺰﺟﺖ ﻋﻨﺪﻩ ﺭﻭﺡ ﺍﻟﺜﻮﺭﻳﺔ ﻣﻊ ﺍﻟﺮﻭﻣﺎﻧﺴﻴﺔ ﻭﻫﻮ ﻓﻰ ﺍﻟﻌﻘﺪ ﺍﻟﺜﺎﻧﻰ ﻣﻦ ﻋﻤﺮﻩ .. ﻫﺎﺷﻢ ﺻﺪﻳﻖ ﺍﻟﺬﻱ ﻛﺜﻴﺮﺍً ﻣﺎ ﺃﻧﺎﺭ ﺑﺼﻴﺮﺗﻨﺎ ﻭﺃﺿﺎﺀ ﺍﻟﺰﻭﺍﻳﺎ ﺍﻟﻤﻌﺘﻤﺔ ﻓﻰ ﺭﺅﻳﺘﻨﺎ ﻟﻸﺷﻴﺎﺀ .. ﻟﻘﺪ ﻇﻞ ﻳﺴﺘﻘﺒﻠﻨﺎ ﺑﻤﻨﺰﻟﻪ ﺍﻟﻌﺎﻣﺮ ﺑﺤﻰ ﺑﺎﻧﺖ ﺷﺮﻕ ﺇﺫ ﻛﻨﺎ ﻧﺠﻠﺲ ﺑﺎﻟﻘﺮﺏ ﻣﻦ ‏( ﺷﺠﺮﺓ ﺍﻟﻨﻴﻤﺔ ‏) ﺍﻟﺘﻰ ﻛﻨﺖ ﺃﺷﻌﺮ ﺑﺄﻧﻬﺎ ﺍﻟﺸﺠﺮﺓ ﺍﻟﻮﺣﻴﺪﺓ ﻓﻰ ﺍﻟﺪﻧﻴﺎ ﺗُﺴﻘﻰ ﻣﻦ ﻧﻬﺮ ﻗﺼﺎﺋﺪ ﺷﺎﻋﺮﻧﺎ ﺍﻟﻜﺒﻴﺮ ﻫﺎﺷﻢ ﺻﺪﻳﻖ ﻭﻛﻨﺖ ﻣﺎ ﺃﺯﺍﻝ ﻗﺎﻧﻌﺎً ﺑﺄﻥ ﻫﺎﺷﻢ ﺻﺪﻳﻖ ﻳﻨﻈﺮ ﺇﻟﻰ ﺗﻠﻚ ﺍﻟﺸﺠﺮﺓ ﻋﻠﻰ ﺃﻧﻬﺎ ﺗﻤﺜﻞ ﻗﻤﺔ ﻋﺬﺭﻳﺔ ﺃﺷﺠﺎﺭ ﺍﻟﻜﻮﻥ .
ﻟﻘﺪ ﻇﻞ ﻫﺎﺷﻢ ﺻﺪﻳﻖ ﻳﻤﺜﻞ ﻟﻨﺎ ﺍﻷﺥ ﺍﻷﻛﺒﺮ ﻭﺍﻟﺸﺨﺺ ﺍﻟﺬﻯ ﻳﻤﻨﺤﻚ ﺍﻟﺜﻘﺔ ﻓﻰ ﺃﻓﻜﺎﺭﻙ ﻭﻳﻮﺟﻬﻚ ﺩﻭﻥ ﺃﻥ ﺗﺸﻌﺮ ﺑﺄﻧﻪ ﻳﻘﻠﻞ ﻣﻦ ﻗﻴﻤﺔ ﻃﺮﺣﻚ ﺃﻭ ﻳﻔﻘﺪﻙ ﺍﻟﺘﻔﺎﻋﻞ ﻭﺍﻟﺤﻤﺎﺱ ﻣﻦ ﺃﺟﻞ ﺟﻌﻠِﻪ ﺗﻠﻚ ﺍﻷﻓﻜﺎﺭ ﺗﻌﺎﻧﻖ ﺍﻟﻮﺍﻗﻊ ... ﻫﺎﺷﻢ ﺻﺪﻳﻖ ﺍﻟﺬﻯ ﻳﻌﺘﻘﺪ ﺍﻟﺒﻌﺾ ﺃﻧﻪ ﺷﺨﺺ ﺭﺑﻤﺎ ﻳﻜﻮﻥ ‏( ﺣﺎﺩﺍً ﻓﻰ ﻣﺰﺍﺟﻪ ‏) ﻭﻟﻜﻦ ﺑﺤﻜﻢ ﻋﻼﻗﺘﻰ ﺍﻹﻧﺴﺎﻧﻴﺔ ﺑﻬﺬﺍ ﺍﻟﺮﺟﻞ ﺍﻟﺸﺎﻣﺦ ﺃﺳﺘﻄﻴﻊ ﺃﻥ ﺃﻗﻮﻝ ﺑﺄﻧﻪ ﺇﻧﺴﺎﻥ ﺑﻤﻌﻨﻰ ﺍﻟﻜﻠﻤﺔ ﻭﻳﻤﺘﻠﻚ ﻗﺪﺭﺓ ﻏﻴﺮ ﻋﺎﺩﻳﺔ ﻟﻤﺨﺎﻃﺒﺔ ﻛﻞ ﺍﻷﺷﻴﺎﺀ ﺍﻹﻳﺠﺎﺑﻴﺔ ﻓﻰ ﻧﻔﻮﺱ ﻛﻞ ﺍﻟﺬﻳﻦ ﻫﻢ ﻣﻦ ﺣﻮﻟﻪ ... ﻓﻰ ﻛﻞ ﺗﻠﻚ ﺍﻷﻳﺎﻡ ﻇﻞ ﻳﺠﻠﺲ ﻭﻫﻮ ﻳﻨﻈﺮ ﺇﻟﻰ ﻧﺎﺣﻴﺔ ﺍﻟﺸﺮﻕ ﻭﻛﺄﻧﻪ ﻳﺘﺮﻗﺐ ﺷﺮﻭﻕ ﺷﻤﺲ ﺃﺣﻼﻣﻨﺎ ﺍﻟﻤﺆﺟﻠﺔ .
ﻫﺎﺷﻢ ﺻﺪﻳﻖ ﻳﻌﺸﻖ ﺧﻴﻮﻝ ﺍﻟﺼﺪﻕ ﺍﻟﺘﻰ ﻻ ﺗﻤﺎﺭﺱ ﺍﻟﺼﻬﻴﻞ ﺇﻻ ﻭﻫﻰ ﻓﻰ ﻛﺎﻣﻞ ﺣﺮﻳﺘﻬﺎ .. ﻭﺍﻟﺤُﺰﻥ ﺍﻟﺬﻯ ﻳﺘﺪﻓﻖ ﻣﻦ ﻋﻴﻨﻰ ﻫﺎﺷﻢ ﺻﺪﻳﻖ ﺃﻋﺘﻘﺪ ﺃﻥ ﻣﻨﺒﻌﻪ ﻗﺪﺭﺗﻪ ﺍﻟﻌﺎﻟﻴﺔ ﻋﻠﻰ ﻗﺮﺍﺀﺓ ﻣﺎ ﺑﻴﻦ ﺳﻄﻮﺭ ﻋﺸﻘﻨﺎ ﻟﻬﺬﺍ ﺍﻟﻮﻃﻦ ﻭﺑﺼﻴﺮﺗﻪ ﺍﻟﻨﺎﻓﺬﺓ ﺍﻟﺘﻰ ﺗﺠﻌﻠﻪ ﻻ ﻳﻌﻄﻰ ﻇﻬﺮﻩ ﺇﻻ ﻟﻠﺠﺪﺭﺍﻥ .. ﻫﺎﺷﻢ ﺻﺪﻳﻖ ﺍﻟﺬﻯ ﺗﻌﻠﻤﻨﺎ ﻣﻨﻪ ﺃﻥ ﻣﻦ ﻳﺮﺩ ﻧﻬﺮ ﺍﻟﺪﻓﺎﻉ ﻋﻦ ﻭﻃﻨﻪ ﻭﻳﺘﺒﻨﻰ ﻓﻜﺮﺓ ﺍﻹﻧﺤﻴﺎﺯ ﺍﻟﻤﻄﻠﻖ ﻟﻘﻀﺎﻳﺎ ﺍﻟﺤﻖ ﻭﺍﻟﻔﻀﻴﻠﺔ ﻻ ﻳﺠﺐ ﺃﻥ ﻳﺘﻬﺪﺝ ﺻﻮﺗﻪ ﻋﻨﺪﻣﺎ ﻳﻘﻮﻝ ﻛﻠﻤﺔ ﺍﻟﺤﻖ ﻭﻻ ﻳﺠﺐ ﺃﻥ ﺗﺮﺗﺠﻒ ﻳﺪﻩ ﻃﺎﻟﻤﺎ ﺃﻧﻪ ﻳﻜﺘﺐ ﺑﺤﺮﻑ ﺍﻟﺤﻖ ﻭﻳﻨﺎﻓﺢ ﻋﻨﻪ ﺑﻜﻞ ﺻﺪﻕ ﻭﺗﺠﺮﺩ ﻭﻗﻨﺎﻋﺔ ... ﻋﻨﺪﻣﺎ ﺇﺧﺘﻄﻒ ﺍﻟﻤﻮﺕ ﺣﺒﻴﺒﻨﺎ ﻭﺯﻣﻴﻠﻨﺎ ﺍﻟﻮﺳﻴﻢ ﻣﺤﺠﻮﺏ ﻣﺤﻤﺪ ﺃﺣﻤﺪ ‏( ﻋﻠﻴﻪ ﺭﺣﻤﺔ ﺍﻟﻠﻪ ‏) ﺭﺃﻳﺖ ﻛﻞ ﺳُﺤﺐ ﺍﻟﺤُﺰﻥ ﺗﺘﺠﻤﻊ ﻓﻰ ﺳﻤﺎﺀ ﻗﻠﺐ ﻫﺎﺷﻢ ﺻﺪﻳﻖ ﻟﺘﻬﻄﻞ ﻣﻄﺮﺍً ﺷﺪﻳﺪ ﺍﻟﺴﻮﺍﺩ .. ﻻ ﺷﻚ ﺃﻥ ﻣﺤﺠﻮﺏ ﻣﺤﻤﺪ ﺃﺣﻤﺪ ﻛﺎﻥ ﺃﻗﺮﺑﻨﺎ ﺇﻟﻰ ﻗﻠﺒﻪ ﻭﻟﻜﻦ ﻛﻠﻨﺎ ﻛﻨﺎ ﻧﺴﺘﺮﻳﺢ ﻓﻰ ﺳﻮﻳﺪﺍﺀ ﻓﺆﺍﺩ ﻫﺎﺷﻢ ﺻﺪﻳﻖ ﻭﺃﻧﺎ ﻫﻨﺎ ﺃﻋﻨﻰ ‏( ﺻﻼﺡ ﺷﻌﻴﺐ ﻭﻋﺒﺪﺍﻟﺒﺎﻗﻰ ﺧﺎﻟﺪ ﻭﺍﻟﻔﻘﻴﺪ ﻣﺤﺠﻮﺏ ﻭﺷﺨﺼﻰ ‏) .
ﺃﻧﻬﺎ ﺃﻳﺎﻡ ﻋﺼﻴﺔ ﻋﻠﻰ ﺍﻟﻨﺴﻴﺎﻥ ﺑﺎﻟﺮﻏﻢ ﻣﻦ ﺯﺣﻤﺔ ﺍﻟﺤﻴﺎﺓ ﻭﺗﻔﺎﺻﻴﻠﻬﺎ ﺍﻟﻠﺰﺟﺔ .. ﻭﻷﻥ ﺃﻣﺜﺎﻝ ﺍﻷﺳﺘﺎﺫ ﻫﺎﺷﻢ ﺻﺪﻳﻖ ﻻ ﻳﻘﺒﻠﻮﻥ ﺇﻻ ﺑﺄﻥ ﻳﻜﻮﻧﻮﺍ ﻓﻰ ﺃﻛﺜﺮ ﺍﻷﻣﺎﻛﻦ ﺩﻓﺌﺎً ﻓﻰ ﺍﻟﻘﻠﺐ ﻟﺬﻟﻚ ﻓﺈﻥ ﻣﺤﺒﺘﻨﺎ ﻟﻪ ﻏﻴﺮ ﺧﺎﺿﻌﺔ ﻷﻯ ﺷﻜﻞ ﻣﻦ ﺃﺷﻜﺎﻝ ﺍﻟﺘﻠﻮﺙ ﺃﻭ ﺭﺳﻮﻡ ﺍﻟﻌﺒﻮﺭ ﻟﻠﻤﺤﻄﺎﺕ ﺍﻟﻤﺴﻮﺭﺓ ﺑﻔﻴﺮﻭﺳﺎﺕ ﺍﻟﺘﺮﺩﺩ ﺃﻭ ﻣﻴﻜﺮﻭﺑﺎﺕ ﺍﻟﺸﻚ ﺍﻟﻠﻌﻴﻦ .
ﺇﻗﺮﺃ ﻟﻨﻔﺴﻚ ﻓﻘﻂ -:
ﺃﺳﺘﺎﺫﻯ ﺍﻟﺤﺒﻴﺐ ﻫﺎﺷﻢ ﺻﺪﻳﻖ ﺍﻷﻣﻨﻴﺎﺕ ﻟﻚ ﺑﺎﻟﺸﻔﺎﺀ ﺍﻟﻌﺎﺟﻞ ﻭﺃﻧﺖ ﺗﻌﻠﻢ ﺟﻴﺪﺍً ﺑﺄﻥ ﻗﻨﺎﻋﺘﻨﺎ ﺭﺍﺳﺨﺔ ﺑﺄﻥ ﻋﺎﻓﻴﺔ ﺍﻟﻮﻃﻦ ﻣﻦ ﻋﺎﻓﻴﺔ ﺃﻣﺜﺎﻟﻚ ﻣﻦ ﺍﻟﻨﺒﻼﺀ ﻟﺬﻟﻚ ﻧﺤﻦ ﺟﻤﻴﻌﺎً ﻧﻘﻒ ﻋﻠﻰ ﻋﺼﺐ ﺣﺎﻓﺔ ﺍﻟﺸﻮﻕ ﺣﺘﻰ ﻧﺮﻯ ﻓﻰ ﻣﺮﺁﺓ ﺃﺭﻭﺍﺣﻨﺎ ﺗﻠﻚ ﺍﻹﺑﺘﺴﺎﻣﺔ ﺍﻟﺤﺬﺭﺓ ﺍﻟﺘﻰ ﻳﺮﺳﻤﻬﺎ ﺃﺳﺘﺎﺫﻧﺎ ﻫﺎﺷﻢ ﺻﺪﻳﻖ ﻋﻨﺪﻣﺎ ﻳﻠﺘﻘﻰ ﺷﺨﺼﺎً ﻷﻭﻝ ﻣﺮﺓ ‏( ﻭﺟﻪ ﺟﺪﻳﺪ ... ﻣﺶ ﻛﺪﻩ ‏) .
ﺻﺤﻴﻔﺔ ﺍﻷﺧﺒﺎﺭ – ﺍﻟﻌﺪﺩ 1819
ﻋﻤﻮﺩ ﺍﻟﺰﺑﻴﺮ ﺳﻌﻴﺪ
ﺇﻗﺮﺃ ﻭﺃﺳﻜﺖ
ﺑﺘﺎﺭﻳﺦ 14 ﻓﺒﺮﺍﻳﺮ 2019 ﻡ

‏( ﺭُﻛﺒﺔ ‏) ﺳﻴﺪﻱ *
* ﺷﻌﺮ : ﻫﺎﺷﻢ ﺻﺪﻳﻖ *
ﻳﺎ ﺧﻠﻒ ﺍﻟﻠﻪ
ﻭﺩ ﻋﺒﺪﺍﻟﻠﻪ
ﺑﺺ ‏( ﺍﻟﺜﻮﺭﺓ ‏)
ﻣﺎﺑﻲ ﻳﺪﻭِّﺭ
ﻛﺎﻥ ‏( ﺇﺳﺘﺎﺭﺗﺮ ‏)
ﺃﻭ ﻣﻨﻔﻠّﺔ
ﻛﻮﺭﻛﻨﺎ ﻧﻨﺎﺩﻱ
ﻫﻮﻱ ﻳﺎ ﺷﺒﺎﺏ
ﻫﻮﻱ ﻳﺎ ﺭْﺟﺎﻝ
ﻫﻮﻱ ﻳﺎ ﺣﺮﻳﻢ
ﻫﻮﻱ ﻳﺎ ﺷﻮﺍﺭﻉ
ﻫﻮﻱ ﻳﺎ ﻧﻴﻢ
ﻳﺎ ﻭِﻻﺩ ﺍﻟﺒﺎﺩﻳﺔ
ﻳﺎﻭِﻻﺩ ﺍﻟﻨﻴﻞ
ﻳﺎ ﺷﻌﺐ ﺃﻛﺘﻮﺑﺮ
ﻳﺎ ﺷﻌﺐ ﺃﺑﺮﻳﻞ
ﺗﻌﺎﻟﻮﺍ ‏( ﺍﻟﻨﻔﺮﺓ ‏)
ﻟﺰﻭﺍ ﻣﻌﺎﻧﺎ
ﺑﺺ ﺍﻟﺜﻮﺭﺓ
ﺇﻧﺸﺎﺀﺍﻟﻠﻪ ﻳﻘﻮﻡ
ﻟﻮ ﻭﺻَّﻠﻨﺎ
ﻟﺒﺎﺏ ﺍﻟﻘﺼﺮ
‏( ﺣﺘﻲ ﺍﻟﻨﺼﺮ ‏)
ﻓﻲ ﺍﻟﺨﺮﻃﻮﻡ
ﻭﻫُﺘﺎﻓﻨﺎ ﻓﻄﺮ
ﻣﺎ ﺳﺨﺴﺦ
ﻳﺼﻮﻡ
ﻭﺑﻞّ ﺣﺒﺎﻟﻮ
ﻭﻟﻠﺤﻠﻘﻮﻡ .
......
ﻳﺎ ﺧﻠﻒ ﺍﻟﻠﻪ
ﻳﺎ ﻧﺎﺱ ﺍﻟﺤِﻠﺔ
ﻳﺎ ﺃﻫﻞ ﺍﻟﻠﻪ
ﻟﻤﺘﻴﻦ ﺭﺍﺟﻴﻦ
ﻧﺎﺱ ﺩﻳﻚ
ﺃﻭ ﺩﻳﻞ
ﻓﻲ ‏( ﺷﻠﻴﻞ ‏)
ﻭ ‏( ﺍﻟﺤِﺠْﻠَﺔ ‏)
ﻟﻤﺘﻴﻦ
‏( ﺣﻴﺺ ﺑﻴﺺ ‏)
ﻟﻤﺘﻴﻦ ﺍﻟﺠﻮﻉ
ﻟﻤﺘﻴﻦ ﺍﻟﺬِﻟّﺔ ؟ . !
.......
ﻳﺎ ﺧﻠﻒ ﺍﻟﻠﻪ
ﺍﻟﺒﻠﺪ ﺇﺗﻬﺮﺳﺖ
ﺩﺍﺳﺎ ﺍﻟﺴﻴﻞ
ﺟﺎﻧﺎ ﺍﻟﻮﺍﻟﻲ
ﻋﻴﻮﻧﻮ ﺣُﻤﺮ
‏( ﺣﻠﺐ ﺍﻟﺒﺎﻗﺔ ‏)
‏( ﻓﻲ ﺍﻟﺸُﻨﻘﺎﻗﺔ ‏)
ﺻﻨﻘﻊ ﻭﺩﻧﻘﺮ
ﺩﻭّﺭ ﻭﻟﻒّ
ﺇﺗﻤّﻬﻞ ﻭﻓﻜّﺮ
ﺇﺗﻨﺤﻨﺢ ﻭﺻﺮّﺡ
- ﻣﺎ ﻣﻄﺮﺓ ﺷﺪﻳﺪﺓ
ﺩﻱ ‏( ﺍﻟﻨﻘﻨﺎﻗﺔ ‏)
ﻭﺑﺎﻗﻲ ﺍﻟﻤﻮﻳﺔ
ﻭﺣﺘﻲ ﺍﻟﺴﻴﻞ
ﻣﻦ ‏( ﺃﻭﺑﺎﻣﺎ ‏)
ﻭﺇﺳﺮﺍﺋﻴﻞ .
ﻭﺍﻟﻤﻮﺕ ﻳﺎ ﺟﻤﺎﻋﺔ
- ﻭﻣﻦ ﻣﺎ ﻗﻤﻨﺎ -
ﻳﺎﻫﻮ ﻣﻬﻤﺔ
ﻋﺰﺭﺍﺋﻴﻞ .
......
ﺁﺥ ﺥ ﺥ .. ﻳﺎ ﻣﻬﺎﺯﻝ
ﻻ ﺯﻋﻠﻨﺎ ﻭﺷﻠﻨﺎ
ﺟﻨﺎﺏ ﺍﻟﻮﺍﻟﻲ
ﻋﺪﻳﻞ ﻃﻮﺍﻟﻲ
ﻣﺮﻣﻐﻨﺎ ﺭﻭﻳﺴﻮ
ﺟﻮﻩ ﺍﻟﻄﻴﻦ
ﻻﺛُﺮﻧﺎ ﻫﺘﻔﻨﺎ
ﻳﺴﻘﻂ ﻳﺴﻘﻂ
ﺍﻟﻐﺶ ﺑﺎﻟﺪﻳﻦ .
.......
ﻳﺎ ﺧﻠﻒ ﺍﻟﻠﻪ
ﺑﻌﺪ ﻣﺎ ﺑﺎﻋﻮﺍ
ﺑﻠﺪﻧﺎ ﻭﺧﻴﺮﻫﺎ
ﺑﺎﻋﻮﺍ ‏( ﺍﻟﻌﻮﻥ ‏)
ﺷﺎﻟﻮﺍ ﺍﻟﺨﻴﻤﺔ
ﻭﻟﺒﻦ ﺍﻟﺒﺪﺭﺓ
ﻭﺻﻠﺼﺔ ﺑﺮﺓ
ﻭﺍﻟﻤﻜﺮﻭﻧﺔ
ﻭﺷﻮﺭﺑﺔ ﻣﺎﺟﻲ
ﻭﻋﺠﻮﺓ ﻣﻜﺔ
ﻭﻋِﻠﺐ ﺍﻟﺘﻮﻧﺔ
ﻭﺻﺎﺑﻮﻥ ﻓﻮﻧﺎ
ﻭﺍﻟﻤﻌﺠﻮﻥ .
ﺷﺎﻟﻮ ﺍﻟﻌﻮﻥ
ﺑﺎﻟﺤﺎﻭﻳﺎﺕ
ﻭﺑﺎﻟﻜﺮﺗﻮﻥ .
.......
ﻧﻔﺲ ﺍﻟﺨﻤﺸﺔ
ﺍﻟﺤﻮﻝ ﺍﻟﻔﺎﻳﺖ
ﺑﺎﻟﻜﺮﺑﻮﻥ .
.......
ﺣﺎﺟﻪ ﻧﻔﻴﺴﺔ
ﺑﻴﺘﻬﺎ ﺇﺗﻤﺎﺹ
ﺍﻟﺠﻮﻉ ﺑﻜّﺎﻫﺎ
ﺟﺎﻫﺎ ﺍﻟﻮﺍﻟﻲ
ﻛﺮﻳﻢ ﺃﻫﺪﺍﻫﺎ
ﺑﺲ ﺗﻠﻔﻮﻥ
ﻭﻟﻠﺒﻄﻦ ﺍﻟﻄﺎﻣﺔ
ﻛﻤﺎﻥ ﺃﺩﺍﻫﺎ
ﻓﺺ ‏( ﻟﻴﻤﻮﻥ ‏) .
.......
ﻳﺎ ﺧﻠﻒ ﺍﻟﻠﻪ
ﻭﺩ ﻋﺒﺪﺍﻟﻠﻪ
ﺑﺺ ﺍﻟﺜﻮﺭﺓ
ﻻ ﺩﺍﻳﺮ ﻳﺪَﻭّﺭ
ﻛﺎﻥ ‏( ﺇﺳﺘﺎﺭﺗﺮ ‏)
ﺃﻭ ﻣﻨﻔﻠﺔ .
ﺟﺎﻧﺎ ‏( ﺍﻟﺼﺎﺩﻕ ‏)
ﻗﺎﻝ ﺇﻧﺘﻈﺮﻭﺍ
ﻟﺴﻪ ‏( ﺍﻷﺯﻣﺔ ‏)
ﺑﺘﻐﻠﻲ ﻭﺗﻨﻀﺞ ؟ !
ﺟﻮﻩ ﺍﻟﺼﺎﺝ
ﻭﺟﺎ ‏( ﺃﺑﻮ ﻫﺎﺷﻢ ‏)
ﻭﻗﺎﻝ ﻳﺎ ﺭﻋﻴﺔ
ﺑﻔﺎﺗﺤﺔ ﻗﻮﻳﺔ
‏( ﺍﻹﻧﻘﺎﺫ ‏) ﺩﻱ
ﺑﺘﻤﺮﻕ ﺑﺎﻟﻨﻔﺎﺝ
ﻭﺟﺎ ‏( ﺃﺑﻮﻋﻴﺴﻲ ‏)
ﻗﺎﻝ ‏( ﻟﻴﻨﻴﻦ ‏)
ﺣﻴﺴﺨﺖ ‏( ﺑﺸﺒﺶ ‏)
ﺇﺑﻘﻲ ﻛﺪﻳﺴﺔ
ﻭﺟﺎﻧﺎ ‏( ﺗﺮﺍﺑﻲ ‏)
ﻗﺎﻝ ﻳﺎ ﻧﺎﺱ
ﺑﺤﻮﺍﺭ ‏( ﺍﻟﻮﺛﺒﺔ ‏)
ﺍﻟﺰﻭﻝ ﺩﺍ ﺣﻴﻘﻌﺪ
ﺯﻱ ‏( ﻣﻮﻗﺎﺑﻲ ‏) .
.......
ﻳﺎ ﺧﻠﻒ ﺍﻟﻠﻪ
ﻭﺩ ﻋﺒﺪﺍﻟﻠﻪ
ﺭﺑﻊ ﺍﻟﻘﺮﻥ
ﻭﻧﺤﻨﺎ ﺭﻫﺎﻳﻦ
ﺟﻮﻩ ﺍﻟﻜُﺒّﺔ
ﻭﻣﻦ ﻓﺎﺕ ﺍﻟﻐﺎﺯﻱ
ﻭﺍﻟﻤﺴﺘﻌﻤﺮ
ﻣﺎ ﺷﻔﻨﺎ ﻓﻜﻲ
ﺗﺤﺖ ﺍﻟﻘُﺒﺔ
ﻧﺜﻮﺭ ﻭﻧﻔﻮﺭ
ﻧﺠﻴﺐ ‏( ﺍﻟﺮﻳﺲ ‏)
ﻧﻘﻮﻝ ﻳﺘﺤﺒﺎ .
ﻭﻳﺠﻴﻨﺎ ﺍﻟﺨﻴﺮ
ﻣﺎ ﻳﺎﻛﻠﻮ ﺍﻟﻄﻴﺮ .
ﻟﻜﻦ ﻳﺎ ﺧﺴﺎﺍﺍﺍﺭﻩ
ﺃﺣﻼﻣﻨﺎ ﺗﻤﻮﺕ
ﻳﻨﻀﺮﺏ ﺍﻟﺸﺎﺭﻉ
ﻭﺑﺎﻟﻨﺒﻮﺕ
ﺯﺭﻋﻨﺎ ﻳﻀﻴﻊ
ﻭﻋﺸﻤﻨﺎ ﺭﺿﻴﻊ
ﻭﻣﺎ ﻧﺤﺼﺪ ﺣﺒﺔ .
.......
ﻭﻳﺘﻠِّﺐ ﻃﺎﻏﻴﺔ
ﻳﺤﺮﻣﻨﺎ ﺍﻟﻌﺎﻓﻴﺔ
ﻭﻧﺒﻘﻲ ﺭﻫﺎﻳﻦ
ﻻﻓﺎﻧﺎ ﺍﻟﻜُﺒّﺔ
ﻋﺴﻜﺮ ﻭﻛﺎﻛﻲ
ﻣﻬﺎﺯﻝ ﻭﺭﺗﺒﺔ .
.......
‏( ﺑﺸﺒﺶ ‏) ﻳﻨﻘّﺰ
‏( ﺑﺸﺒﺶ ‏) ﻳﻌﺮﺽ
‏( ﺑﺸﺒﺶ ‏) ﻳﺮﻗﺺ
ﻻﻣﻦ ﺑﺎﻟﻎ
ﻭﺣﻠﺞ ﺍﻟﺮُﻛﺒﺔ .
.......
ﺭﺑﻊ ﺍﻟﻘﺮﻥ
ﻭﺍﻷُﻣﺔ ﻓﻲ ﻛُﺒّﺔ
ﻳﺎﺧﻠﻒ ﺍﻟﻠﻪ
ﻭﺩ ﻋﺒﺪﺍﻟﻠﻪ .
ﻻ ﻓُﺮﻧﺎ ﻭﺛُﺮﻧﺎ
ﺑﻠﻌﻨﺎ ﺃﺳﻔﻨﺎ .
ﻭﺍﻟﻄﺎﻏﻴﺔ ﺧﻨﻘﻨﺎ
ﻗﺎﻋﺪ ﺁﻣﻦ
ﺳﻤﻴﻦ ﻣُﻄﺎﻣِﻦ
ﻻﻣﻦ ﺳﻮّﺱ
ﻭﺑﺪﻝ ﺭُﻛﺒﺔ .
......
ﻳﺎ ﺷﻌﺐ ﺃﻛﺘﻮﺑﺮ
ﺷﻌﺐ ﺃﺑﺮﻳﻞ
ﺃﻭﻻﺩ ﺍﻟﺒﺎﺩﻳﺔ
ﺃﻭﻻﺩ ﺍﻟﻨﻴﻞ
ﺑﺺ ﺍﻟﺜﻮﺭﺓ
ﺩﺍﻳﺮ ﻟﺰّﺓ
ﻋﺮﺵ ﺍﻟﻄﺎﻏﻴﺔ
ﻋﺎﻳﺰ ﻫﺰّﺓ
ﺧﺮﻃﻮﻡ ﺍﻟﻮﺍﻟﻲ
ﺍﻟﺴﻴﻞ ﺩﻛّﺎﻫﺎ
ﻭﺻﺒﺤﺖ ‏( ﻏﺰﺓ ‏)
ﺍﻟﺸﻌﺐ ﺟﻌﺎﻥ
ﻻﺑﻴﺖ ﻻ ﺃﻣﺎﻥ
ﻭﻧﺎﺱ ﺍﻟﺴُﻠﻄﺔ
ﺳﻴﻠﻬﻢ ﻭﻳﺴﻜﻲ
ﻭﻛﺎﻓﻴﺎﺭﻫﻢ ﻣﺰﺓ .
.......
ﻳﺎﺧﻠﻒ ﺍﻟﻠﻪ
ﻭﺩ ﻋﺒﺪﺍﻟﻠﻪ
ﺑﺺ ‏( ﺍﻟﺜﻮﺭﺓ ‏)
ﻣﺎﺑﻲ ﻳﺪﻭّﺭ
ﻛﺎﻥ ‏( ﺇﺳﺘﺎﺭﺗﺮ ‏)
ﺃﻭ ﻣﻨﻔِﻠﺔ
ﻛﻮﺭﻛﻨﺎ ﻧﻨﺎﺩﻱ
ﻫﻮﻱ ﻳﺎ ﺭﺟﺎﻝ
ﻫﻮﻱ ﻳﺎﺣﺮﻳﻢ
ﻫﻮﻱ ﻳﺎ ﺷﻮﺍﺭﻉ
ﻫﻮﻱ ﻳﺎﻧﻴﻢ
ﻳﺎﻭِﻻﺩ ﺍﻟﺒﺎﺩﻳﺔ
ﻳﺎ ﻭِﻻﺩ ﺃﻛﺘﻮﺑﺮ
ﻳﺎ ﺷﻌﺐ ﺃﺑﺮﻳﻞ .
ﺗﻌﺎﻟﻮﺍ ‏( ﺍﻟﻨﻔﺮﺓ ‏)
ﻟِﺰﻭﺍ ﻣﻌﺎﻧﺎ
ﺑﺺ ﺍﻟﺜﻮﺭﺓ

ﻧﺸﻴﺪ ﺍﻟﻤﻌﺘﻘﻠﻴﻦ ﺷﻌﺮ : ﻫﺎﺷﻢ ﺻﺪﻳﻖ
ﺍﻟﺴﻮﺭ ﺩﻩ
ﻣﺎ ﻟﻴﻨﺎ
ﺍﻟﺴﻮﺭ ﺩﻩ ﻟﻠﺴﺮّﺍﻕ
ﺍﻟﺴﻮﺭ ﺩﻩ ﻟﻠﺨﺎﻳﻦ
ﻟﻠﻄﺎﻏﻲ ﻟﻸﻓّﺎﻕ
ﻣﺎ ﺗْﻬِﻤِّﻲ ﻳﺎ ﺑﻨﻴﺔ
ﻣﺎ ﺑﺤﻤﻲ ﻃﻮﻟﻮ
ﺍﻟﺸﻮﻑ
ﻟﻮ ﺣﺘﻰ ﺑﺎﻟﺮﻗﺮﺍﻕ
ﺑُﻜﺮﺓ ﺍﻟﺰﻣﻦ
ﻟﻴﻨﺎ
ﺗﺘﻜﻀّﺐ ﺍﻟﺸﻴﻨﺔ
ﻳﺸﻠﻊ ﺳﻤﺎﻙ
ﺑَﺮّﺍﻕ
..........
ﺍﻟﺴِﺠْﻦ ﻣﺎ ﻟﻴﻨﺎ
ﺇﻻ ﺍﻟﺼﻌﺐ ﺳﻮّﺍﻕ
ﺭﻳﺪﻙ ﻭﻗﻮﺩ
ﺍﻟﺨﻴﻞ
ﻓﻲ ﺍﻟﺮﻣﻠﺔ ﻭﺍﻟﺪﻗﺪﺍﻕ .
..........
ﺍﻟﺴﺠﻦ ﻣﺎ ﻟﻴﻨﺎ
ﺍﻟﺴِﺠْﻦ ﻟﻠﻜﺎﺗﻞ
ﺍﻟﺴِﺠْﻦ ﻟﻠﺠﺎﺳﻮﺱ
ﻟﻠﺒﺎﻋﻮ
ﻋَﺮْﺽ ﺍﻟﻨﻴﻞ
ﺑﻰ ﺣﺎﻟﻨﺎ
ﻟﻌﺒﻮ ‏( ﺷﻠﻴﻞ ‏)
ﻧﻘﺮﻭ ﺍﻟﻤِﺮِﻕ
ﺑﺎﻟﺴﻮﺱ
........
ﻣﺎ ﺗْﻬﻤِّﻲ ﻳﺎ ‏( ﻋﺰّﻩ ‏)
ﻟﻮ ﻃﺎﻝ
ﺯﻣﺎﻥ ﺍﻟﺴﻮﺭ
ﺑُﻜﺮﺓ ﺍﻷﺭِﺽ
ﺑِﺘْﺪﻭﺭ
ﻭﻳﻄﻠﻊ ﻋﻠﻴﻬﻢ
ﺩﻭﺭ
ﻣﺎ ﺗْﻬﻤِّﻲ ﻳﺎ ﺑﻨﻴّﺔ
ﻟﻮ ﺍﻟﺸَﺮَﻑ
ﻧﺎﺭ ﺟﻮﻉ
ﺃﻭ ﺣﺘﻰ
‏( ﻟﺤْﺲ ﺍﻟﻜﻮﻉ ‏)
ﺃﻭ ﻗﻮﺕ
ﺷَﺮﺍﺏ ‏( ﺍﻟﻤﻮﺹ ‏)
ﺃﺳﻤﺮ ﻫﻮﺍﻙ
ﻳﺎ ﺑﺖ
ﺧﺎﺗﻒ ﺳﻤﺎﺭ
ﺟﺎﻟﻮﺹ .
.....
ﺑُﻜﺮﺓ ﺍﻟﺴِﺠِﻦ
ﻳﻨﻬﺪ
ﻳﺴﺨﺎ ﺍﻟﺨﺮﻳﻒ
ﺑﺎﻟﻤﺪ
ﻧﻔﺘﺢ ﻋﻴﻮﻥ
ﺍﻟﺠﺪ
ﺗﻮﺏ ﺍﻟﺴُﺘُﺮ
ﻳﻨْﺸﺪ
ﻧﻐْﺴﻞ ﻏﺒﺎﺭ ﺍﻟﺬﻡ
ﺑﺎﻟﻤﻮﻳﻪ ﺃﻭ ﺑﺎﻟﺪﻡ
ﻳﺒﺪﺍ ﺍﻟﻌُﺼﺎﺭ
ﺩﻭّﺍﺭ
ﻳﻘْﻠﻊ ﺟﺬﻭﺭ ﺍﻟﻌﺎﺭ
ﺻﻒ ﺍﻟﻐُﺒُﺶ
ﻳﻤﺘﺪ
ﻣﻮﺝ ﺍﻟﺼَﻠَﻒ
ﻳﺮﺗﺪ
ﺗﻀﺤﻚ ﺳﻤﺎ
‏( ﺍﻟﺒُﻘﻌﻪ ‏)
ﻳﺒﺪﺍ ﺍﻟﺤﺴﺎﺏ
ﻭﺍﻟﻌَﺪ
ﻣﺎ ﻧﺨﻠِّﻲ
ﻧﻘﺮﺓ ﺳﻮﺱ
ﻣﺎ ﻧﺴﻴﺐ
ﺟﺰﺍ ﺍﻟﻤﻬﻮﻭﺱ
ﻭﺍﺗْﻜِﻞ ﺭﻭﻳﺲ
ﺗﻌﺒﻲ
ﻓﻲ ﺿﻮ ﺑﺴﻴﻤﺘﻚ
ﺟﺪ
......
ﺃﺳﻤﺮ ﻫﻮﺍﻙ
ﺎﻳْ ﺑﺖ
ﺧﺎﺗﻒ ﺳﻤﺎﺭ
ﺟﺎﻟﻮﺹ

ﻣﻄﺮ ﺍﻟﺮﻣﺎﺩ
ﺷﻌﺮ : ﻫﺎﺷﻢ ﺻﺪﻳﻖ
ﺟﺎﻧﻲ ﺍﻟﺤُﺰﻥ
ﻭﻟﻬﺎﻥ
ﻣﻦ ﻗﻮﻣﺘﻲ
ﺗﺐ ﺗﺒﻴﺖ
ﺃﺧﺪﺗﻮ ﺑﺎﻷﺣﻀﺎﻥ
ﻭﺇﺗﺴﺎﻣﺮﻧﺎ
ﺯﻱ ﺣِﺒﺎﻥ .
ﺟﺎﻧﻲ ﺍﻟﻔﺮﺡ ﻧﺸﻮﺍﻥ
ﻧﺎﻏﻤﻨﻲ
ﻣﺎ ﺭﺩﻳﺖ
ﻋﺎْﺭﻑ ﺍﻟﻔﺮﺡ
ﻛﻀﺎﺏ
ﻳﻨﻘﺮ ﺭﻗﻴﻖ
ﻓﻲ ﺍﻟﺒﺎﺏ
ﺗﻔﺘﺢ
ﺗﻼﻗﻲ ﺭﻫﺎﺏ .
..........
ﻳﺎ ﻭﻃﻨﻲ ﺃﻋﺘﻘﻨﻲ
ﺭﺿﺮﺿﺖ
ﻟﻲ ﻋﻀﻤﻲ
ﻓﻜﻴﺖ
ﻋُﺼﺎﺭ ﺟﻨﻲ
ﻓﺘﻔﺖ ﻟﻲ ﺫﻫﻨﻲ
ﺍﻟﻘﺎﻙ ﺭﻣﺎﺩ ﻣﻀﺮﻭﺭ
ﻭﻣﺮﺍﺕ ﺣﺒﻴﺐ
ﻭﺍﻗﻒ
ﻓﻲ ﺍﻟﺮﻣَﻀَﺎ
ﻃﻴﻒ ﻣﺸﺮﻭﺭ
ﺭﺍﺟﻲ ﺍﻟﻔﺮﺝ
ﻓﻲ ﺍﻟﻐﻴﺐ
ﻭﻓﻲ ﺍﻟﻮﻋﺴﺔ
ﻃﻮﻕ ﻣﺰﺭﻭﺭ
ﻣﻤﻨﻮﻉ
ﺗﺨُﺖ ﺭﺣﻠﻚ
ﻓﻲ ﻓﻜﺮﺓ
ﺃﻭ ﺩﺳﺘﻮﺭ .
..........
ﻳﺎ ﻭﻃﻨﻲ ﺃﻋﺘﻘﻨﻲ
ﻗﻮﻟﻴﺎ ﺃﻣﺮﻕ
ﻏُﻮﺭ
ﺃﺭﻛﺐ ﻫﻮﻱ ﺍﻷﺣﺰﺍﻥ
ﻓﺘﺶ ﻣﻼﺫ
ﻭﻣﻜﺎﻥ .
.......
ﺩﻗﻴﺖ ﺃﻣﻞ
ﻓﻲ ﺑﺎﺏ
ﻭﻛﺘﻔﺖ ﺣُﺰﻧﻲ
‏( ﺍﻟﺸﺎﺏ ‏)
ﻓَﺮَﺩ ﺍﻟﻮﻫﻢ ﺇﻳﺪﻳﻦ
ﻋﻮّﻗﻨﻲ ‏( ﺑﺎﻟﻨﺸّﺎﺏ ‏)
ﻣﺎ ﺧﻠﻲ ﺧﺸﻤﻲ
‏( ﻳﻘﻮﻝ ‏) .
ﻣﺎ ﺷﺎﻑ
ﺳﻄﺮ ﻣﻌﻘﻮﻝ
ﻛﺘﻔﺘﻲ
ﻋﺮﺽ ﻭﻃﻮﻝ
ﻭﺑﺎﺷﺮ
‏( ﺷﺮﻳﻌﺔ ﺍﻟﻐﺎﺏ ‏)
..........
ﺟﺎﺑﻮﻧﻲ ﻟﻠﺒﻮﻟﻴﺲ
ﺷﺎﻥ ﻗﻠﺖ
ﻭﻃﻨﻲ ﺗﻌﻴﺲ
ﺳﺎﻗﻮﻧﻲ ﺯﻱ ﻧﺸﺎﻝ
ﺳﺠّﻞ ﻋﻮﻳﺮ
ﺇﺳﻤﻲ
ﻓﻲ ‏( ﺩﻓﺘﺮ ﺍﻷﺣﻮﺍﻝ ‏)
ﺳﻮﻭﺍ ﺍﻟﺸِﻌِﺮ
ﻋﻔﺼﺔ
ﻣﺎ ﺻﻮﺕ ﺑﻠﺪ
ﺃﻭ ﺣﺎﻝ
ﺳﺄﻟﻮﻧﻲ ﻋﻦ ﻛﻠﻤﺔ
ﻭﺯﺭﻭﻧﻲ
ﻓﻲ ﻧﻘﻄﺔ
ﻗﺎﻟﻮﺍ
ﺍﻟﻜﻼﻡ ﺃﻟﻐﺎﺯ
ﻭﺑﺎﻟﻠﻔﺔ ﻗﺼﺪﻱ
ﺃﻗﻮﻝ
ﺍﻟﻤﻮﻳﺔ ﺣﺎﺟﺔ ﻣﺠﺎﺯ
ﻭﺍﻟﺴﻮﻕ ﺭﻛﺐ ‏( ﻗﻄﺮﻳﻦ ‏)
‏( ﻭﺍﻟﻔﺘﺤﺔ ‏)
ﻳﻌﻨﻲ ﺍﻟﻌﻜﺲ
ﻭ ‏( ﺍﻟﻀﻤﺔ ‏)
ﻳﻌﻨﻲ ﺍﻟﻐِﺶ
‏( ﻭﺍﻟﻜَﺴﺮﺓ ‏)
‏( ﻋَﺪَﻡ ﺍﻟﻐﺎﺯ ‏)
...........
ﻭﺳﻮﻭﻧﻲ
ﺯﻭﻝ
ﻛﻀﺎﺏ
‏( ﺷﺎﻥ ﺍﻻﻣﻮﺭ
ﻓﻲ ﻧﺼﺎﺏ ‏)
ﻭﺃﻧﺎ ﺑﺲ
ﻋﻤﻴﻞ ﻣﺪﺳﻮﺱ
ﺯﺭﻋﻮﻧﻲ
ﻧﺎﺳﻲ ‏( ﺍﻟﺮﻭﺱ ‏)
ﺷﺎﻥ ﺃﻫﺪﻡ
ﺍﻹﻧﺠﺎﺯ
..........
ﺭﻣﻀﺎﻥ
ﺩﺧﻞ ﻋﻀﻤﻲ
ﻭﺍﻟﻌﻴﺪ
ﻳﻐﺎﺯﻝ ﺍﻟﺴﻮﻕ
ﻭﺃﻧﺎ ﺯﻱ ﺃَﺭﺽ
ﺻﺎﺑﺮﺓ
ﻭﺃﺻﻠﻮ ﺍﻟﺼﺒﺮ
‏( ﻣﺎﺭﻭﻕ ‏)
ﻧﻔﺴﻲ
ﺍﻟﺼﻨﻢ ﻳﻨﺪﺍﺱ
ﻭﺍﻟﻀﻴﻖ
ﻳﻼﻗﻲ ﻣﺮﻭﻕ
..........
ﻋﺮﺱ ﺍﻟﺒﻠﺪ
ﻳﻨﺘﻢ
ﻭﻳﻐﺴﻞ
ﻧﻌﺎﺳﻨﺎ ﺍﻟﺪﻡ
.........
ﺍﻟﻌﻴﺪ
ﻳﻜﻮﻥ ﻣﻀﻤﻮﻥ
ﻭﺑﺎﻗﻲ ﺍﻟﺸﻤﻞ
ﻳﺘﻠﻢ
...........
ﺟﻮﻧﻲ ﻟﻠﺘﻔﺘﻴﺶ
ﻭﺳﺎﻗﻮﻧﻲ
ﺃﺧﺪﻭﺍ ﺍﻟﻔﻴﺶ
ﺍﻟﺘﻬﻤﺔ ﻗُﺤﺔ
ﻭﺑﺲ
ﻭﻓﻲ ﺍﻟﻨﻮﺭ
ﻭﻣﺎ ﺑﺎﻟﺪﺱ
ﻗﺎﻟﻮ ﺍﻟﻜﻼﻡ
ﻣﻌﻠﻮﻡ
ﻛﻮﻧﻚ ﺗﻘُﺢ
ﻳﺎ ﺯﻭﻝ
ﻭﻓﻲ ﺍﻟﻀﻮ
ﻭﻣﺎ ﻣﻌﺰﻭﻝ
ﻣﻌﻨﺎﻫﺎ
ﺭﻣﺰ ﺻﺮﻳﺢ
ﻭﺇﺷﺎﺭﺓ
ﺃﻭ ﺗﻠﻤﻴﺢ
ﺟﻮﺍﻙ ﻏِﻞ
ﻣﻜﺘﻮﻡ
ﺩﺍﻳﺮ ﺗﻘﻮﻝ
ﻟﻠﻨﺎﺱ
ﻧﻤﺮﻕ
ﻋُﺼﺎﺭ ﺟﺮﺍﺭ
ﻧﺮﻛﺐ
ﺟﻨﺎﺡ ﺍﻟﺮﻳﺢ
ﻭﺗﺒﻘﻲ ﺍﻟﻘﻴﺎﻣﺔ
ﺗﻘﻮﻡ
...........
ﻳﺎ ﻭﻃﻨﻲ
ﺻﺤّﺎ ﺍﻟﻨﻮﻡ
............
ﻟﻴﻚ
ﻻ ﻋﺘﺎﺏ ﻻ ﻟﻮﻡ
ﺑﺲ ﻋﻨﺪﻱ ﻟﻴﻜﺎ
ﺳﺆﺍﻝ
ﻛﻴﻒ ﻳﺨﻨﻘﻚ
ﺑﻌﺸﻮﻡ
ﻭﺍﻧﺖ
ﺍﻟﺒﺘﺄﻛﻞ ﺍﻟﻨﺎﺭ
ﻭﺍﻧﺖ ﺍﻟﻌﺸﻢ
ﻭﺍﻟﺪﺍﺭ
ﻭﺍﻟﺜﻮﺭﺓ ﻭﺍﻟﺜﻮﺍﺭ
ﺻﺤﺼﺢ
ﻛﻔﺎﻙ ﺃﻋﺬﺍﺭ
ﻏﻴﻈﻚ
ﺃﺳﻲ ﺍﻟﺨﺮﻃﻮﻡ
ﻫﻤﻚ
ﺷﻘﺎ ﺃﻣﺪﺭﻣﺎﻥ
ﺃﺩﻓﺮ
ﻭﺩُﻙ ﺃﺳﻮﺍﺭ
ﺭﺟّﻊ ﻋُﺼﺎﺭ
ﺃﺑﺮﻳﻞ
ﻧﺒﺾ ﺍﻟﻨﻀﺎﻝ
ﺍﻟﺤﺎﺭ
............
ﻳﺎ ﻭﻃﻨﻲ
ﻳﺎ ﻣﻜﻠﻮﻡ
ﻳﺎ ﻭﻃﻨﻲ ﻳﺎ ﺣﺰﻧﺎﻥ
ﺳﻬﺮ
ﺍﻟﻤﺪﻥ ﺃﺷﺠﺎﻥ
ﻏُﺒﻦ ﺍﻟﺒﻮﺍﺩﻱ
ﻳﺤﻮﻡ
ﺩُﻕ ﻟﻠﻤﺴﻴﺮﺓ
ﻃﺒﻮﻝ
ﺃﻓﻘﻊ
ﻣﺮﺍﺭﺓ ﺍﻟﻐﻮﻝ
ﻣﺎ ﺗﺮﺟﺎ
ﺳﻴﻒ ﻣﺠﻬﻮﻝ
ﺃﻧﺤﺖ
ﺳﻤﺎ ﺍﻷﻣﻜﺎﻥ
ﺃﻧﻔﺦ
ﺷﻐﺎﻑ ﺍﻟﺮﻭﺡ
ﺃﺯﺭﻉ
ﻳﺒﺎﺑﻚ ﻋﺮﺽ
ﻭﺃﺭﺳﻢ ﺻﺒﺎﺣﻚ
ﻃﻮﻝ
ﻻ ﺗﺮﺿﺎ
ﺑﺎﻹﺫﻋﺎﻥ .
..........
ﻣﺎ ﺗﺒﻘﻲ
ﺩﻳﻤﺔ ﺟﻠﻮﺱ
ﺃﺩﻱ ﺍﻟﺘﻤﺎﻡ
ﻭﻗﻴﺎﻡ
ﻣﺎ ﻳﺒﻘﻲ
ﻏﻴﻈﻚ ﺑﺲ
ﻧﻤﺔ
ﻛﻼﻡ ﻓﻲ ﻛﻼﻡ
.........
ﻳﺎ ﻭﻃﻨﻲ ﺃﺑﻘﻲ ﺷﺮﺍﺭ
ﻣﻄﺮ ﺍﻟﺮﻣﺎﺩ
ﻣﻦ ﻧﺎﺭ
.........
ﺍﻟﺤﻖ ﺣﺒﻴﺐ
ﺍﻟﺘﺎﺭ
ﻭﻟﻬﺐ ﺍﻟﺠﺤﻴﻢ
ﺃﻧﻮﺍﺭ .
ﻳﺎ ﻭﻃﻨﻲ
ﻳﺎ ﻣﻜﻠﻮﻡ
ﻳﺎ ﻭﻃﻨﻲ
ﻳﺎ ﻣﻈﻠﻮﻡ
ﻳﺎ ﻭﻃﻨﻲ
ﻳﺎ ﻣﻘﺴﻮﻡ
ﺻﺤﺼﺢ
ﻛﻔﺎﻙ ﺍﻟﻨﻮﻡ
ﻣﺎ ﺗﺴﻮﻗﻨﻲ
ﻟﻸﺣﻼﻡ
ﺧﻠﻲ ﺍﻟﻔﻌﻞ
ﻣﺪﻓﻮﻕ
ﻟﻮ ﺩﺭﻧﺎ
ﺣﻞ ﻭﻣﺮﻭﻕ
ﺃﺭﻓﻊ ﻛﺮﺍﻣﺘﻚ
ﻓﻮﻕ
ﺃﺩﻓﺮ
ﻓﻲ ﺩﺭﺏ ﺍﻟﺴﻴﻞ
ﺃﺻﺮﺥ
ﻭﺷﺪ ﺍﻟﺤﻴﻞ
ﺷﻮﻑ ﺍﻟﺴﺮﺝ
ﻣﺸﺪﻭﺩ
ﺍﻣﺴﻚ
ﻟﺠﺎﻡ ﺍﻟﺨﻴﻞ
ﺻﻮﺗﻚ
ﻳﺸﻖ ﺍﻟﻠﻴﻞ
ﻻ ﻭﺍﻃﻲ
ﻻ ﻣﺸﺮﻭﻕ
ﻣﺎ ﺑﻨﺸﺘﺮﻱ
ﺍﻷﻭﻫﺎﻡ
ﻣﻦ ﺧﻴﻤﺔ
ﺟﻮﺓ ﺍﻟﺴﻮﻕ
ﻻﺑﺪ ﻧﺸﻴﻞ
ﺍﻟﺘﺎﺭ
ﻋﻨﻮﺓ ﻭﻋﺪﻳﻞ
ﻭﻧﻬﺎﺭ
ﺃﻛﺘﺐ
ﺷﻘﺎﻛﺎ ﺍﻟﻌﺎﻡ
ﻓﻲ ﺩﻓﺘﺮ ﺍﻹﻗﺪﺍﻡ
ﻭﺃﻗﺴﻢ ﻛﻤﺎﻥ
ﺑﺎﻟﺮﻭﺡ
ﺑِﺘْﺮَﺟّﻊ
ﺍﻟﻤﺴﺮﻭﻕ
............
ﻗﻮﻝ ﻛﻤﺎﻥ
ﻭﻛﻤﺎﻥ
ﻳﻤﻜﻦ ﻭﺑﺎﻹﻣﻜﺎﻥ
ﻳﺮﺟﻊ
ﺑﻠﺪ ﻭﺍﺣﺪ
ﺑﻲ ﺣﺎﻟﻮ
ﻣﻠﻴﻮﻥ ﻣﻴﻞ
...........
ﺟﺎﻧﻲ
ﺍﻟﺤُﺰﻥ ﻭﻟﻬﺎﻥ
ﻣﻦ ﻗﻮﻣﺘﻲ
ﺗﺐ ﺗﺒﻴﺖ
ﺃﺧﺪﺗﻮ ﺑﺎﻷﺣﻀﺎﻥ
ﻭﺇﺗﺴﺎﻣﺮﻧﺎ
ﺯﻱ ﺣﺒﺎﻥ .
ﺟﺎﻧﻲ ﺍﻟﻔﺮﺡ
ﻧﺸﻮﺍﻥ
ﻧﺎﻏﻤﻨﻲ
ﻣﺎ ﺭﺩﻳﺖ
ﺃﺻﻠﻮ ﺍﻟﻔﺮﺡ
ﻛﻀﺎﺏ
ﻳﻨﻘﺮ ﺭﻗﻴﻖ
ﻓﻲ ﺍﻟﺒﺎﺏ
ﺗﻔﺘﺢ
ﺗﻼﻗﻲ ﺭﻫﺎﺏ
...........
ﻣﻄﺮ ﺍﻟﺮﻣﺎﺩ
ﺻﺐ
ﻗﺤﻴﺖ
ﻭﻣﺎ ﻣﻠﻴﺖ
ﻋﺎْﺭﻑ ﺍﻟﺮﻣﺎﺩ
ﻣﻦ ﻧﺎﺭ
ﻭﺍﻟﻨﺎﺭ
ﺣﺒﻴﺒﺎ ﺍﻟﺰﻳﺖ
...........
ﺧﻠﻲ ﺍﻟﻘﻴﺎﻣﺔ ﺗﻘﻮﻡ
ﻳﺎ ﻭﻃﻨﻲ
ﻛﺒّﺮ ﻭﻗﻮﻡ
ﺻﺤﺼﺢ
ﻛﻔﺎﻛﺎ ﺍﻟﻨﻮﻡ

ﻓﺪﻳﺘﻚ ﻳﺎ ﻭﻃﻦ
ﺷﻌﺮ : ﻫﺎﺷﻢ ﺻﺪﻳﻖ
ﻛﺄﻧﻚ ﻳﺎ ﻭﻃﻦ ﻣﺠﺒﻮﺭ
ﻋﻠﻰ ﺍﻟﻔﺠﻌﺔ
ﻭﻧﻘﻴﺢ ﺍﻟﻬﻢ
ﻛﺄﻧﻚ ﻣﻦ ﻋﺼﻮﺭ
ﻭﺩﻫﻮﺭ
ﻣَﻘَﺴّﻢ ﺑﻴﻦ ﻭﺟﻮﺩ
ﻭﻋَﺪَﻡ
ﻛﺄﻧﻚ ﺭﺍﺟﻲ
ﺧﻴﻞ ﺍﻟﻐﻴﺐ
ﻭﺣﻠﻤﻚ ﺧَﻂّ
ﺭﺍﺳﻮ ﺍﻟﺸﻴﺐ
ﻭﻟﺴﻊ ﻻ ﻛﻤﻞ ﻋَﺸَﻤﻚ
ﻭﻻ ﺧﺎﻃﺮﻙ
ﻓَﺘَﺮ ﻳﺤﻠﻢ .
...........
ﻛﺄﻧﻚ ﻳﺎ ﻭﻃﻦ
ﻣﻮﻋﻮﺩ
ﺗﻌﺎﻧﺪ ﻛﻞُ ﺑﺎﺏ
ﻣﺴﺪﻭﺩ
ﻭﻳﻬﻞ ﻓﺠﺮﻙ
ﻃﺮﻳﻖ ﻣﻤﺪﻭﺩ
ﻭﻓﻲ ﺍﻵﺧﺮ
ﻳﻌَﻘْﺒﻮ ﻧﺪﻡ
ﻛﺄﻧﻚ ﻟﻠﺠﺮﻭﺡ
ﻣﺮﻫﻮﻥ
ﻭﻣﻦ ﻟﻴﻞ ﺭﺣﻠﺘﻚ
ﻣﻐﺒﻮﻥ
ﻭﻓﻲ ﻏﺎﺭ ﺍﻟﻨﻀﻢ
ﻣﺴﺠﻮﻥ
ﻭﻣﺤﺮﻭﻡ ﺑﺎﻟﻔﻌﺎﻝ
ﺗﻨﻌﻢ .
.........
ﺳﺄﻟﺘﻚ ﻳﺎ ﻭﻃﻦ
ﺇﺭﺗﺎﺡ
ﻓﺪﻳﺘﻚ ﻳﺎ ﻭﻃﻦ
ﺗﺴﻠﻢ
ﻗﺮﻳﺖ ﻓﻲ ﺩﻓﺘﺮﻙ
ﺷَﺠَﻨَﻚ
ﻭﺫﺍﻛﺮﺕَ ﺍﻟﻤﻌﺎﻧﻲ
ﺣِﻜَﻢ
ﻣﺸﻴﺖ ﺑﻲ ﻗﺼﺘﻚ
ﻟﻠﺮﻳﺢ
ﻭﺷَﺪّﻳﺖ
ﻓﻲ ﻣﺴﺎﺭﺏ ﺍﻟﻬﻢ
ﻟﻘﻴﺖ ﺣﺎﻟﻚ
ﺳﺆﺍﻝ ﻣﺤﺘﺎﺭ
ﻭﺟﺮﺣﻚ
ﻣﻦ ﻧﻘﻴﺤﻮ ﻧَﻀَﻢ .
...........
ﺗﺘﻌﻠﻢ
ﺗﻐﻨﻲ ﻏُﻨﺎﻙ
ﻭﻓﻲ ﺣﻠﻘﻚ
ﻏﺒﺎﺭ ﻭﺃﻟﻢ
ﻭﺗﺘﻌﻠﻢ ﺗﺒﺎﺭْﻙ
ﺍﻟﻨﺎﺭ
ﻭﻛﺖ ﺣﻠﻤﻚ
ﺑَﺮَﺩ ﻭﺃﻇﻠﻢ
ﻭﺗﺘﻌﻠﻢ ﺗﻤﻮﺕ
ﻭﺗﻌﻴﺶ
ﻛﺄﻧﻚ ﺣﺎﺟﺔ
ﻣﺎ ﺑﺘﻜﻤﻞ
ﻭﻻ ﺑﺘﺰﻳﺪ
ﻭﻻ ﺑْﺘﻨِﺘﻢ .
.........
ﺃﺷﻮﻓﻚ ﺑﺎﻟﻌﺬﺍﺏ
ﻣﺼﻘﻮﻝ
ﻭﺑﻲ ﻟﻬﺐ ﺍﻟﺠﺮﺡ
ﻣﻐﺴﻮﻝ
ﻭﻟﺴﻊ ﻻ ﺳﻜﺖ
ﻋَﺮَﻗﻚ
ﻭﻻ ﻓَﺘَّﺮ ﺷﻘﺎﻛﺎ
ﻗَﺪﻡ .
ﺳﻮﺍﻋﺪﻙ
ﺿﺎﺭﺑﻪ ﻓﻮﻕ ﺍﻟﺮﻳﺢ
ﻭﺟِﺮْﺳﻚ ﺩﻳﻤﻪ
ﺻﻮﺗﻮ ﻓﺼﻴﺢ
ﻭﻧﺠﻤﻚ
ﻓﻲ ﺍﻷﻣﺎﺳﻲ ﻋﻠﻢ .
..........
ﺳﺄﻟﺘﻚ ﻳﺎ ﻭﻃﻦ
ﺇﺭﺗﺎﺡ
ﻓﺪﻳﺘﻚ ﻳﺎ ﻭﻃﻦ
ﺗﺴﻠﻢ .
.........
ﻣﺘﻴﻦ ﺗﻠﻤﺲ
ﺻﻮﺍﺑْﻌﻚ ﻗﻴﻒ؟ !
ﻣﺘﻴﻦ ﺗﻌﺮﻑ
ﺧﻼﺻﻚ ﻛﻴﻒ؟ !
ﻣﺘﻴﻦ ﺗﻔﺮﺡ
ﻣﺘﻴﻦ ﺗﻨِﺠَﻢ؟

ﺍﻷﺳﻰ ... ﻭﺣﻤﻰ ﺍﻟﻤﺴﺎ
ﺷﻌﺮ : ﻫﺎﺷﻢ ﺻﺪﻳﻖ
ﺁﺧﺮ ﺣَﺮِﻑ
ﻣﻦ ﺯﻣﻨﻲ ﻃﺎﺭ
ﺭﻙّ ﻭﺩﺧﻞ
ﺁﺧﺮ ﻇَﺮِﻑ
ﺧﺘﻴﺖ ﺳﺆﺍﻝ
ﻓﻲ ﺭﻛﻨﻮ
ﻛﺎﻥ ﻃﺎﺑﻌﺔ ﺑﺮﻳﺪ .
........
ﺁﺧﺮ ﺣَﺮِﻑ
ﻣﻦ ﺯﻣﻨﻲ ﻃﺎﺭ
ﻫﺠﺮ ﺍﻟﺒﻠﺪ
ﺩَﻗﺶ ﺍﻟﻤﻄﺎﺭ
ﻓﺘﺸﺖ ﻟﻲ ﻋﻨﻮﺍﻥ
ﻭﺯﻭﻝ
ﺳﺎﻋْﺔ ﺍﻟﺴﻔﺮ
ﻗﺒﻞ ﺍﻟﻮﺻﻮﻝ
ﺍﻫﺪﻳﻬﻮ ﻋﺎﻡ
ﺑﺪﻝ ﺍﻟﺴﻼﻡ .
ﻭﺃﺭﺳﻢ ﺷِﻌِﺮ
ﻣﻦ ﺩﻭﻥ ﺣﺒﺮ
ﻭﺃﺭﻣﻲ ﺍﻟﺠﻮﺍﺏ
ﻓﻲ ﺧﺎﻃﺮﻩ
ﻟﻲ ﻧﺠﻤﺎً ﺑﻌﻴﺪ .
.........
ﻭﺗﺒﺪﺃ ﺍﻟﺴﻨﺔ
ﺧﻠّﻲ ﺍﻟﻌﻘﺎﺭﺏ
ﻟﻠﺰﻣﻦ
ﺗﺘﻼﻗﻰ ﻓﻲ ﻗﻄﺮ ﺍﻟﺠﻠﻴﺪ .
ﺧﻠﻲ ﺍﻷﺳﻰ
ﻳِﺘْﻜِﻞ ﺭﻭﻳﺴﻮ
ﻋﻠﻰ ﺍﻟﻤﺴﺎ .
ﺧﻠﻲ ﺍﻟﻜﻬﺎﺭﺏ
ﺗﻨﻄﻔﻲ
ﻭﻳﺤﻴﺎ ﻋﺎﻣﻚ
ﻭﻳﺒﺘﺪﻱ
ﻋﺎﻣﺎً ﻳﺠﻲ
ﻋﺎﻣﺎً ﻳﻤﺶ .
ﻋﺎﻣﺎً ﻳﻤﺶ
ﻋﺎﻣﺎً ﻳﺠﻲ .
ﻭﺻﻮﻝ .. ﻭﻓﻮﺕ
ﻣﻴﻼﺩ .. ﻭﻣﻮﺕ
ﺯﻣﻨّﺎ ﻓَﻀﺎ
ﻭﺿُﻼ ﻳِﺘْﺮﺗِﺮ
ﻭﺍﻧﻘﻀﺎ .
ﺟﺮﺣﺎً ﻣﻮﺳّﻢ
ﻓﻲ ﺍﻟﺒﻴﻮﺕ .
ﻃﺒﻼ ﻳﺪﻧﺪﻥ
ﻓﻲ ﺍﻟﺴﻜﻮﺕ .
ﺭﻳﺤﺎً ﺗﺼﻔّﺮ
ﻓﻲ ﺍﻟﻘَﻠِﺐ
ﻭﺣﺠﺮﺍً ﻛﺒﻴﺮ
ﺳﺎﺩّﻱ ﺍﻟﺪﺭﺏ
...........
ﺃﻋﺘﺐ ﻋﻠﻰ ﺍﻟﺸﻮﻙ
ﻭﺍﻟﺤﺼﺎ
ﻭﺃﻗﺴﻢ ﻋﻠﻰ ﺣُﻤﻰ
ﺍﻟﻤﺴﺎ
ﺇﻧﻮ ﺍﻟﺸَﺮِﻕ
ﻭﻟّﻊ ﺑﺮِﻕ
ﻭﺇﻧﻮ ﺍﻟﻤﻄﺮ
ﻏﺴﻞ ﺍﻟﺴﻔﺮ
ﻭﺇﻧﻮ ﺍﻟﻬﻤﻮﻡ
ﻳﻤﻜﻦ ﺗﻨﻮﻡ
ﻭﺃﺣﻠﻢ ﻋﺪﻳﻞ
ﺗﺤﺖ ﺍﻟﺼﺤﺎ
ﺇﺑِﻞ ﺍﻟﺮﺣﻴﻞ
ﺣﺴﻊ ﺗﻘﻮﻡ .
.........
ﺁﺧﺮ ﺣﺮﻑ
ﻣﻦ ﺯﻣﻨﻲ ﻃﺎﺭ
ﺩَﻗَﺶ ﺍﻟﻤﻄﺎﺭ .
........
ﺧﻠّﻲ ﺍﻟﺸﻨﻂ
ﺍﻭﺯﻥ ﻋﺬﺍﺑﻚ
ﻭﺍﻟﻘَﺮَﻑ
ﻭﺍﺧﺘﻢ ﺟﻮﺍﺯﻙ
ﺑﻲ ﺭﻣﺎﺩ
ﻧﺎﺭ ﺍﻷﺳﻒ
ﻭﺃﺿﺤﻚ
ﻋﻠﻰ ﺍﻟﻘﻤﺮ ﺍﻟﻨﺰﻑ .
..............
ﻣﺎ ﺗﻘﻮﻝ ﻭﺩﺍﻉ
ﺗﻔْﻀﺎ ﺍﻟﺪﻳﺎﺭ
ﻣﻦ ﻛﻞِ ﻧﺎﺭ .
ﻓﻲ ﺍﻟﻴﻢ ﺩﻭﺍﺭ
ﻓﻲ ﺍﻟﺒﺮ ﺩﻭﺍﺭ
ﻓﻲ ﺍﻟﺠﻮ ﺩﻭﺍﺭ
ﻭﻓﻲ ﺍﻟﺤَﻀْﺮﻩ
ﻛﻢ ﺷﻴﺨﺎً ﻭﻟﻲ
ﺣﻠﻘﻮﻡ ﻭﻃﺎﺭ
‏( ﻳﻜﺸﻒ ‏) ﻭﺳﻂ
ﻧﻘﺰﻱ ﺍﻟﺼﻐﺎﺭ
ﺁﺧﺮ ﺣﺮﻑ
ﻣﻦ ﺯﻣﻨﻲ
ﻃﺎﺭ
ﺁﺧﺮ ﺣﺮﻑ
ﻣﻦ ﺯﻣﻨﻲ ﻃﺎﺭ .