# سجم_الرماد 6

مجاهد يوسف

_ الفضل اخوي ما شديد آ المرضي وظنيتو البندر دا ما نفع معاهو
_ شن خبرك بيهو ما شديد ؟
_ اخوي بعرفو كويس وانا اول امبارح حلمت لب بحلمة كعبة تب
_ ياخ ما تقول كدا يا الفاتح وسجم الرماد نجيض ما بتجيهو عوجة
حلمت بشنو
_ حلمت انا والفضل قاعدين فوق راس البيت وهو قام يتجارى في السكينة زييين وفي طوبات وقعن رمنو من فوق وانا جريت عليهو لقيتو ماسك في الدروة ما وقع ومديت ليو يدي عشان اجرو وامسكو ما يقع لكن الدروة انقلعت ووقعت بيهو في هاوية غريييقة ومضلمة والضلمة بلعتو تاني ما ظهر
_ ياخ دي هلوسة ساكت
_ إن شاء الله تبقى هلوسة انا خايف الفضل دا تاني ما يرجع وللا يرجع زي النعير
_ لا لا ما بتجيهو عوجة ما تخاف ساي الفضل نجيض قلت ليك
_ والله إن شاء الله

مرق الفضل من الفيلا جري ولمن وصل الباب رجع تاني ودخل جوة لقى الباب فاتح زي اول ووقف وراهو والقانوني وسليمان قعدوا يضحكوا قال ليهو والله جرى جري لكن هشام دا بالغ الظاهر ما بعرف الفضل حقو دا كويس امش ألحقو ناديهو والفضل براهو دخل قال ليهم افتكرتوني خواف وللا شنو ؟
القانوني قال ليهو اها جريت مالك ورجعت لشنو ؟
_ جريت عشان انا من الاول مفروض ما ادخل ساي بدون اذن ورجعت قلت امكن الزول الكتلك قاعد يسرق جوة وقلت اقبضو
_ لا لا أكان كدي ضكران ما عندك على عوجة وانا كنت داير ارسل سليمان دا يلحقك يناديك اتفضل اتفضل
_ ليه عملت كدا ؟
_ قبيل لمن جيتوا انت وهشام وراني قال لي الزول دا قلبو حار وما برضى الحقارة وطلمني بدقتك لابراهيم وقال ربطتو كمان
_ ابراهيم حقر بي وعاجباهو روحو وقليل ادب لكن ما علي انا
_ انا بحب الهدار والضحك وبحب اختبر الزول البرتاح ليهو وانا والله عجبتني بدقتك لابراهيم ودايرك تشتغل معاي
_ اشتغل شنو ؟
_ الشغل راقد ما تشيل هم وبترتاح معانا
_ وهشام ؟
_ هشام زاتو شغال معاي ودقيقة انجيبو هنا دق ليهو عليك الله يا سليمان خليهو يجي هسي قول ليهو القانوني دايرك
_ طبيعة شغلكم شنو ؟
_ بتعرف كل شي ما تخاف ولا تستعجل
سليمان اتصل علي هشام وداك نص ساعة بس وجاهم ولمن وصل قال القانوني اها لقيتو كيف ؟
قال ليهو لا لا راجل هو اول حاجة خاف وجرى لكن رجع براهو وعجبتني رجعتو بالحيل ولو زول غيرو ما برجع
يللا اسمعني يا هشام . من الليلة الفضل دا شغال معاي ودايرك تعلمو السواقة سريع سريع وتطلع ليهو الرخصة كلم حسين الفي المرور خليهو يطلع ليهو رخصة
_ تمام يا حاج
_ وانت يا الفضل بعد تتعلم السواقة تعال لي واس حاجة عاوزها كلم هشام دا يديك ليها طوالي

الفضل فات مع هشام وقال ليهو مالك ما وريتني بالمقلب دا ؟
_ انا زاتي ما عارف والزول داير يختبرك ما فيها شي وكويس انك نجحت ما جريت
_ انت بصح شغال معاهو
_ ايوة بس ما تكلم زول عشان مافي زول عارف . وبختك القانوني مبسوط منك والبركة في ابراهيم
اول مرة يوصيني علي زول كدا
_ بس ما عارف داير يشغلني شنو
_ اشتغل بس اي حاجة يقولها ليك
_ ما كعب . يللا داير امشي ام درمان والله في شباب كدا معرفة عاوز امشي اقنب معاهم يوم يومين وارجع انت نزلني في المواصلات بس وانا بمشي ليهم وبعرف الدرب
_ لا لا بوصلك وبرجع
الفضل وصل الثورة ونزل في بقالة حاتم وهشام من العربية ما نزل اول ما الفضل ولا اتكلم معاهو فات سريع لمن الفضل زاتو احتار واستغرب ولا عرفو مالو
مشى علي حاتم وسلم عليهو سلام حار وحاتم بعد مسافة حتى عرفو
_ الفضل ؟ شكلها بسمت ليك بنطلون وقميص وبدلة دا شنو دا وكيف ومتين ووين لا لا الا انادي احمد يشوفك هههههههههههه والله لكن دا الكلام
_ ياخ اديني فرصة احكي ليك هههههههههههه
_ تحكي بس وتشغلني معاك كمان
بس خلي احمد يجي
حاتم جاب ليهو بارد ويعاين فيهو محتار وكان مرق رسل ليهو ولد ينادي احمد وأحمد جاء وسلام حار مع الفضل وبرضو احتار في الزول الكان جاهم عفين ساي واعمى واطرش كيف بالسرعة دي اتغير كدا

الفضل حكى ليهم بالتفصيل الممل من ساعة فات منهم لحدي ما جاهم
وطبعا لسة ما اشتغل حاجة ولا عارف مجال شغلهم شنو لكن انبسطوا شديد ليهو واتمنوا ليهو التوفيق وجروا الونسة معاهو
بس الفضل ما كان مطمن لهشام ما عارف السبب شنو وجات مشيتو سريع دي من غير ما يتكلم معاهو زادت ليهو عدم اطمئنانو
لكن قال احتمال باهتو ساي ويصبر لمن يشوف مافي داعي يظن ساي

يتبع.....

بعتذر عن الخطأ الغير مقصود

ونواصل القصة

ارجو المعذرة

تم الإرسال من خلال التطبيق Topic'it

#سجم_الرماد 7

مجاهد يوسف

أحمد اتعشى واخد ونستو مع الفضل وحاتم وفات منهم بالليل تب وحاتم قال الفضل يعني رطبت يا ولد
_ انا المرة الجاية بجيك برخصتي وسايق لي عربية
_ بس ما عرفت داير يشغلوك شنو
_ ما عرفت لسة بس الناس ديل عندهم قروش تراب
_ والله رزقن تكوس ليهو ورزق يكوس ليك ، الحياة دي فرص آ الفضل اخوي والله اداك بس اعمل حسابك وخليك نجيض وما تضيع الفرصة دي
_ لا لا ما تخاف علي تب في دي
_ عارف آ الفضل انا قبل اشتغل في الدكان دا كنت مرطب شديد بس اتسافهت ياخ وكنت جاي الخرطوم دي جديد وزول شغل واشتغلت في سوق ام درمان لقيت لي عمك كدا طيبان عندو دكان ملابس ودعكت معاهو دعك جد ومعديها البيت والشغل بس وتاني شاركتو النص النص وعملت قروش صاح لكن لميت لي في واحد اقشر كدي ومعولق كان زبوني وصاحبني وفي الاول أكان ظريف وود ناس وبقينا أصحاب شديد وعمل معاي مواقف كدي حقت رجال وانت عارف نحن في الصحوبية دي بنخلص شديد وبقينا ما بنتفارق ويوم كدي مشينا لبيت كدا قال لي حق ناس اصحابي وطلع بيت ما نافع واليوم داك اول مرة في حياتي اسكر وندمت ندم وزعلت منو شديد لكن بقوا علي هو والشيطان الاتنين وبقيت زول كعب ديمة مطين ياخ لدرجة أكان ما شربت ولا بقدر انوم وبسحب في القروش واسلسل فيهن لمن الدكان دق الدلجة واختلفنا انا وسيدو جاء لقاهو كنب وفاضي ومديون وانا بقيت ما عندي اي اهتمام وكنت سكران والله سمعتو كلام كعب خلاس وكان مفروض انسجن لكن هو بقى احسن مني وشال الديون في ضهرو ومرقت منو ابيض مشيت لصاحبي بقى يتزاوغ مني واكتشفت انو ما ود ناس ولا فيهو خير وكان مخطط لي حتى مواقفو معاي كانت تمثيل منو وشرك بيها لي وأكل قروشي كلها وتاني ولا شفتو ولا بعرف بيتهم بس بقت لي بتوبة نصوحة لا سكر لا كلام فاضي
واشتغلت يوميات لمن قلت بس وندمت ندم جد ومسكت في الصلاة والاستغفار بس وربنا فتحها علي تاني والدكان دا كان حق واحد اشتريتو منو بواسطة زول قريبي والحمد لله
_ والله لكن كلام عجيب يعني الخازوق داك عملها فيك
_ عملها فيني وانا هسي حكيت الكلام دا عشان تعمل حسابك
_ ان شاء الله
_ يللا نوم تصبح على خير

حاتم نام والفضل بقى مساهر يفكر ساي وما عارف الايام داسة شنو
الصباح اشتغل مع حاتم في الدكان وبالليل رجع لهشام ومشى ليهو في البيت بعد سلم قال لهشام مالك أمس مشيت سريع كدا بعد وصلتني
_ في زول في الحارة ديك بعرفو وما دايرو يشوفني بقول لي ليه ما زرتني
_ ايواااا انا استغربت والله
_ لا لا مافي عوجة وبكرة بنمشي عشان اعلمك السواقة
_ تمام

بعد اسبوعين الفضل بقى سواق تب
ومشى المرور طلعوا ليهو الرخصة
وفات لحاتم بعربية بس ما بيت معاهو ولاقاهو ولاقى احمد ورجع
هشام اجر ليهو بيت حلو وقعد فيهو الفضل وفات منو
الفضل محتار في الناس ديل دايرين يشغلوهو شنو ما عارف بس اكان مبسوط بيت وعربية وتلفون
بالليل جاهو سليمان وقال ليهو القانوني دايرك
_ في شنو ؟
_ في مشوار عايزك تمشي ليهو
_ مشوار وين وفي الليل دا ؟
_ المشكلة شنو يعني ؟ يللا ورح ليهو
الفضل فات معاهو والقانوني قال ليهو بكرة تمشي بورسودان الصباح بالطيارة عندي عربية عاوزك تجيبها لي
_ عربية شنو ؟
_ عربية اشتريتها من واحد هناك
_ بس انا ...
_ من اولها داير تبسبس امشي بس
_ تمام بمشي
_ ايوة كدا وسليمان دا بوريك اي شي وبمشي معاك كجام وهو برضو عارف اي شي

الفضل مشى البيت وسليمان قال ليهو بجيك كجام بشرح ليك كل شي والفضل نام والصباح جاهو كجام في البيت وفاتوا المطار وركبوا وصلوا بورسودان ولقوا واحد مستنيهم بعربية وركبوا معاهو وخشوا الخلا
وكل مرة يسأل في كجام نحن ماشين وين وفهمني الحاصل شنو
وكجام يقول ليهو ما هسي اصبر بعد نصل
وصلوا فجة مقطعية ولقوا فيها نفرين ومعاهم عربية ناولوهم مفتاحها وفيهم واحد كلم كجام في اضانو وكجام قال للفضل دي العربية بنوديها بيت القانوني
_ انا ما فاهم حاجة
_ اركب سوق امرقنا من الخلاء دا سريع وبعد نصل الشارع بوريك كل شي
_ ياخي انت مالك زول غامض كدا فهمني في شنو ؟
_ اذا كان انا زاتي ما فاهم افهمك شنو ؟
_ كيف ما فاهم وسليمان قال كجام عارف
_ في واحد بلاقينا تاني بنبدل معاهو العربية دي ورح بس وما تسألني من شي

الفضل احتار زيادة وخاصة لمن وصلوا المكان المتفق عليهو واكان بتلفت سااااي وزي الخايف خايف
ودخل يدو تحت الكرسي وتاني مرقها وعرق وجف
مع وقفة العربية الفضل قبقب كجام في شنو يا زول ؟
في اللحظة ديك في تلاتة جوا عليهم وكجام دخل يدو في جيبو مرق ليهو ورقة ومفتاح طبلة اداهن الفضل بطريقة سريعة وقال ليهو
لو انا ما رجعت معاك الورقة دي فيها تلفون اتصل عليهو بس بعد اسبوعين لو ما اتلاقينا في الخرطوم
_ ودا مفتاح شنو ؟
_ خليهو معاك ما يروح منك وبعد تتصل بتفهم اي شي
_ سمح دا رقم منو

كجام قبل يجاوبو التلاتة وصلوهم وركبوا معاهم ونهائي ما اتكلموا معاهم غير امشي من هنا ولف يمين وشمال والفضل سايق ومحتار
لمن وصلوا ليهم خيمة و لقوا كم واحد فيها وكلهم مسلحين
وكجام خايف شديد
وشالوا مفتاح العربية من الفضل وركبوهو في عربية تانية ووصلوهو قريب بورسودان في الطريق وشالوا منو التلفون وخلوهو في الطريق ورجعوا منو
الفضل لا عارف حاجة ولا فاهم شي ولا عرف يرجع الخرطوم وللا يمشي بورسودان ولا عندو تلفون ولا عربية ولا عندو قروش

يتبع....

تم الإرسال من خلال التطبيق Topic'it

سجم الرماد 8

مجاهد يوسف

الفضل وقف مسافة وقعد يأشر للعربات وقف ليهو لوري ماشي بورسودان وركب فيهو
_ حبابك حبابك مالك واقف في الفجة المقطعية دي ؟
_ والله انا زاتي ما فاهم حاجة ولا عارف في شنو لكن الحمد لله مافي عوجة
_ عندكم عربية خسرت وللا جاي من وين ؟
_ انا اول مرة اجي هنا واول يوم اجي فيهو الشرق دا والظاهر دخلت لئ في شغلة مي نافعة وناس حرامية بس
_ كيف الكلام دا ؟
_ موضوع طويل ما في داعي اوجع ليك راسك ساي
_ ها زول ها قول ساي ورانا شنو وبالمرة نتونس بيهو والونسة بتقصر المسافة زاتو وبالمرة نتعرف ببعض وانا بابكر ود جاد السيد من الجزيرة بقولوا لي اب ردف
_ انا الفضل سجم الرماد
_ هههههههههههههه سجم رماد عدييييل آ سجم الرماد ههههههه ليه مالك آ المسجم
_ عليك النبي ان ما سجم رماد بصح بصح هسي دي فجة تلقاني فوقا وانزيدك من الشعر بيت والله كنب اباطي والنجم جنيه ما عندي وتلفوني شالوهو كمان
_ لا لا سجم رماد والله وان ماك سجم رماد سجم رماد . علا ما في عوجة تب ورب صدفة خير من الف ميعاد وامكن لحكمة وقفتك هني دي وجيتي انا ليك وخليها التبقى صحبة في الله
_ يمين حبابك آ ابردف
وحكى ليهو القصة حقتو جت من مرقتو من الحلة لحدي قعدتو معاهو في اللوري دي
ابردف قال ليهو الفضل ان داير كلامي الناس ديل تختاهم بس والناس ديل بتاعين تهريب وبتاعين لف ودوران يا بتاعين مخدرات وخلا الشرق دا كلو تهريب وبلاوي شينة دحين مادام الله حلاك منهم ما ترجع ليهم تاني
_ معقول يكونوا بتاعين مخدرات ؟
_ ما تستبعد . يوم انا مارق من بورسودان دي باللوري دا زاتو والوكت داك كا تم شهرين من ما اشتريتو اكان عندي سفنجة سمحة انشبك فوقها واحد سيد اللوري دا عجبتو وبدلتها بيهو واحد كدي من ناس الشمالية ضكران خلاس والله كمان زادني وانا ساي برا زيادة برضى المهم جيت بورسودان دي وواقف وفي نيتي مارق منها علي الخرتوم وراجي اكان زول عندو شحنة اشيلا ليهو جوني نفرين في وقفتي ديك وانا منبطح هنا في فجتنا دي وقالوا لي عندنا بضاعة بس مي هنا ورح ومشيت معاهم ودخلنا خلاء كعب تب وقدر ما اقول ليهم وين يقولو لسع
بعد ساعتين حتين وصلنا ورفعوا بضاعتهم ومشينا وفي خلاهم داك لاقونا البواليس وواحد منهم طلع ليهو مسدس وقال لي ما تقيف
ما اقيف كيف آ سايب قام قال لي زح لي وانا وقفت وزحيت ليهو والله عمل في اللوري دا عمايل اظن الخواجة الصنعو ما يعملها فوقو وهرب بينا منهم وهم زاتهم ما سكونا والكويس ما شالو نمرة اللوري حقي ومن الزمن داك توبة من الخلاء دا وهسي زاتو ما صاح اقيف ليك لكن لخير
_ يعني لوريك دا اكان بروح ساي
_ الله مرقو ومرقني انا زاتو دحين آ الفضل اخوي الدرب دا اختاهو وابعد منو احسن ليك
_ لا لا بختاهو بس كجام اداني تلفون ومفتاح بشوف قصتو شنو
_ عاين اسمو ساي كجام . كجام دا عليك الله اسم زول ؟
_ تقول شنو ؟

بهناك القانوني زعلان ويدق علي الفضل والتلفون مقفول واتصل علي هشام ناداهو وقال ليهو زولك فشل فشلا كعب تب تب
_ انت زاتك ما كان تديهو عملية كبيرة زي دي وانا كلمتك كم مرة اني ما موافق
_ حتى كجام برضو تلفونو مقفول
لازم تتصرف يا هشام والفضل دا انا امس سألني سؤال غبي
_ كيف ؟ قال ليك شنو ؟
_سألني من المشوار دا لشنو . وحسيت انو زي الما عارفنا شغالين شنو وانا قلت ليك فهمو شغلتنا دي كويس وان ما اشتغل اقتلو يقوم يسألني سؤال زي دا ؟
_ الفضل انا مفهمو كل شي حتى العملية دي عارفها وانا هسي بكلامك دا جاني احتمال واكيد صاح
_ احتمال شنو ؟
_ غايتو يا الفضل دا ذكي وسألك عشان يعمل ليك فيها بري والعملية دي شالها هو وعمل نايم بالمخدرات يا اما يكون فعلا ذكي واتفق مع كجام والجماعة على حاجة
او الزول دا انقتل
_ انت غبي يا هشام وداير يفوت مني وين اذا جاء لو شال البضاعة
_ اذا جاء وعمل فيها غبي وانو ما عارفنا شغالين شنو ولا عارف ماشي للمخدرات يكون ذكي جدا جدا وعمل بيها نايم
_ احتمال انت تكون فعلا ما وريتو طبيعة شغلنا وانت العملت نايم وبتستغفل فيني بكلامك دا . انا ما غبي يا هشام فما تحاول تتقدم مني بخطوة وتديني قصص وهمية عشان اصدقها . لو الفضل جاء وقال ما عارف طبيعة شغلنا فإنت الشلت البضاعة
_ معقول يا القانوني وانت عارفني مستحيل اخونك وعشان تعرف اني ما مفوت شي واني دايما سابق الجميع بخطوات اسمع التسجيل دا

وهشام فتح التلفون وكان مسجل كلام بينو وبين الفضل ومفهم فيهو الفضل الشغل كلو وحتى صوت الفضل ظاهر فيهو واقنع بيهو القانوني لمن ابتسم وقال ليهو كويس انك سجلت الكلام دا لاني والله ما كنت صدقتك
هشام اتكيف وقال ليهو تلميذك يا القانوني وسليمان حاضر الكلام دا كلو وخشمو ما فتحو

اب ردف دخل بورسودان والفضل قال ليهو انا جيعان ياخ وفاتوا المطعم اكلو واب ردف وداهو لاولاد اهلو من الجزيرة شغالين في السوق سلموا عليهم وعرفهم بيهو وفات باللوري علي شغلو وديل ساقوا الفضل ودوهو البيت الساكنين عشان ياخد راحتو
الفضل كان تعبان فعلا ومحتاج ينوم وقبل ينوم طلع ورقة كجام لقى فيها رقم تلفون واسم ندى
دخل الورقة في جيبو ونام

يتبع ....

تم الإرسال من خلال التطبيق Topic'it

سجم الرماد 9

مجاهد يوسف

بعد سجم الرماد نام واخد راحتو تب صحى بعد العصر جاء ابردف ساقو مشوا اتغدوا وقال ليهو اها ناوي تعمل شنو ؟
_ما عارف والله لكن احسن ارجع الخرطوم واشوف الحاصل شنو
_والله لو سمعت كلامي امش علي اهلك والناس ديل ابعد منهم نهائي لانهم يا مهربين يا تجار مخدرات والدرب دا نهايتو ضياع
_ انا لو ما كجام دا اكان ما اشتغلت بيهم لانو اكان خايف يكتلوهو وكمان داير اعرف المفتاح دا داسي فيهو شنو
_ ياخ كجام شنو ما تورط روحك ساي
- الفيها الخير ربنا يسويها والصباح بدري برجع الخرطوم انا
_ يا زول عديلة وشيل تلفوني دا لو احتجت لي في اي شي أخوك وخلينا متواصلين ووريني اخبارك اتبقى صحبة في الله
_ مافي عوجة تب حبابك حبابك

الفضل كمل معاهم باقي اليوم وفات منهم الصباح
القانوني قاعد مع سليمان قال ليهو رايك شنو في الطيرة دا
_الفضل ؟
_ فضل شنو ياخ ؟ هشام العامل لينا فيها ذكي دا ؟
_ ما فاهم
_ انا عارفك فاهم . وخلينا نتغابى ليهو ونستمتع بغباهو
_ اللذيذة داير يرميها في الفضل لكن كجام تفتيحة وراني خطتو كلها وانا طلعت الفضل منها مرقتو بعيد واحتمال يجي اليوم لكن ما عارف بجينا راسو عديل وللا بعمل شنو
_كدي فهمني الحصل كلو
_ هشام عاوز يدقسنا ويشيل البضاعة واغرى كجام بنص المبلغ ففتي ففتي وكجام وراني الحاصل كلو وهشام اكان دايرنا نفتكر الفضل الخاين والمفروض يقتل الفضل في الخلاء داك على حسب ما خطط
اها انا طبعا خليت خطتو ماشة زي ماهي ومرقت الفضل من العملية وقطعت علاقتو بكجام ما يتواصل معاهو على انو كجام انقتل
_ جميل جميل خلينا نشوفو بعمل شنو
_ وفي مفاجأة تانية لهشام ما متوقعها نهائي
_ انو هو فاكر خطتو نجحت والبضاعة ح يستلمها بكرة ويخزنها في مخازنو في ام درمان ومفاتيح مخازنو كلها عندي والناس الحارسنها كلهم شغالين معانا وبسحبوها كلها في اول يوم
_ العاجبني فيك يا سليمان انك بتفكر صاح وعامل لكل شي حساب وماشي بالقانون وبعد ما تنسحب البضاعة انا بشتكي هشام وبدخلو السجن وبالقانون
_ عشان ما اظلم كجام وانا قبيل قلت ليك تفتيحة فهو الجاب الفكرة دي وقال لي نلعب بهشام بنفس اسلوبو
_ والفضل دورو شنو
_ دا زول مسكين ساي ما عندو اي دور وهشام اكان داير يضحي بيهو
_ الزول دا بعد يجي جيبو لي دايرو

هشام شال من ابردف قروش ركب بيها جاء الخرطوم وطوالي فات بيت هشام ما لقاهو موجود مشى البيت الكان قاعد فيهو كجام وعارف كجام مافي وفتح ليهو الباب هجام ودخل لقاهم هو وابراهيم الاتنين
ابراهيم زعلان لسة من الدقة والفضل لمن دخل سلم عليهو ابراهيم ابى يرد وقال لهجام اقفل الباب دا خلينا نأدب الحيوان دا ودي فرصة جاء براهو
الفضل ضحك وقال ليهو والله انت زي الشفع اعقل ها العوير دا
_ انتي قايلني بخليك بيها والله الليلة تندم علي اليوم الشفتني فيهو
_ هجام امسك قريبك دا والله انا فتران وجيعان وجيتي دي من بورسودان ما ناقصو
هجام زاتو اكان زعلان من الفضل لكن اعقل من ابراهيم وحجز ابراهيم قال ليهو ما هسي خليهو اليوم ونعتبرو ضيفنا
هجام لمن وقف مع قريبو المرة الفاتت هشام كلمو وقال ليهو انت وابراهيم لو قربتو من الفضل دا ما تلومو الا نفسكم وخوفو عديييل وهو عارف هشام كعب وغدار
الفضل اتصل علي هشام ووراهو الحاصل كلو وانو ما فاهم اي شي
هشام قال ليهو بجيك ماجد بتعرفو اركب معاهو وامشي اقعد في الفجة البوديك ليها وما تظهر نهائي ولا تتصل علي زول لمن انا اجيك

كجام بعد الجماعة ودوا الفضل على حسب ما خطط مع سليمان مشى بالبضاعة دخل بيها الخرطوم ولا وداها لهشام ولا وداها لسليمان والاتنين ما عارفين ليهو اتجاه
والاتنين منتظرنو على حسب الخطط العملوها معاهو

الفضل قعد يومين وشال من ماجد تلفون واتصل علي الرقم الاداهو ليهو كجام من موبايل ماجد
ظهر ليهو الاسم طوالي ندى
طق قفل الخط وقعد يعاين في ماجد
ماجد ضحك وقال ليهو مالك ما اتصلت ؟
_ لا لا الظاهر غلطان
_ ندى دي اسم وهمي ساي
وشال منو الرقم دقاهو وجرس تلفون تاني رن في جيبو وقال ليهو دا رقمي انا زاتو وكجام اداك ليهو عشان لو حصلت ليهو اي حاجة تكلمني وكتب في الورقة اسم ندى عشان انا اعرف كل شي
وانا وكجام مخططين خطة مختلفة وشلنا المخدرات
_ مخدرات ؟
_ ايوة مخدرات
_ طيب كجام وين ؟
_ بجيك

الفضل عرف ماجد كضاب لانو ما جاب سيرة المفتاح وكمان شاف تاريخ المكالمات لقاها كتيرة وآخر مكالمة كانت امس
قال كيف الرقمين حقاتو وهو متصل علي روحو كم مرة ؟
الموضوع دا مشربك والزول دا كضاب وهشام زاتو كضاب
بس كويس العرفت انهم بتاعين مخدرات
بس كجام وين والحصل عليهو شنو والبضاعة دي حقت منو وسعرها كم ؟
وهشام ليه ما وراني انو شغالين مخدرات من الاول
اسئلة كتيرة في راس سجم الرماد فرضت نفسها ومحيراهو
حتى هو زاتو المرقو من الموضوع بكل سهولة كدا منو ولشنو

يتبع....

تم الإرسال من خلال التطبيق Topic'it

#سجم_الرماد 10

مجاهد يوسف

_ الفاتح قوم آ ولدي أكل
_ما داير
_أمس آ جنى اليوم كلو اللكل فوق سنك ما ختيتو أكل آ عشاي ، مالك ؟
_ انا بدور أفوت اعتر سجم الرماد يمة اجيبو وأجي ولمن كلمت ابوي قال لا
_ يعني حردانك للاكل دا عقابن لابوك ؟
_ما عقاب ولا شي عقاب شنو ؟ بس ما بدورو ساكت انا ولا عندي فوقو نية بس بدور اجيب الفضل
_الفضل نجيض بجي وانا مشتاقالو اكتر زول وانا امو ان ما شديد اكان قلبي دا قبض واكتا عرفتو دحين قوم علي اكلك وعلي شغلتك ساكت وداك الله بجيبو
_ بجيبو بتين نان والله مسخ علي الحلة دي كلها ومرق نيتي من اي حاجة
_ متى ما الله راد بجي ، قوم ما تدلقن ساكت كدي زي العوير

الفضل قال احسن حاجة انا اكرفس ماجد دا اديهو دقة حارة واعرف العولق ديل قصتم كلها شنو وجاب النمرة الاداني ليها كجام دي من وين
وندى دي زاتها شنو
وماجد جاهو يتضاحك
_ عارف يا الفضل والله انا مافي شي مكيفني علا دقتك لابراهيم اليوم داك
_ ابراهيم خلو الليلة تاني بتكيفك دقة واسمح من ديك
_ اها داير تدق منو تاني
الفضل قام قبقب ماجد وقعدو وقال ليهو
_ والله الليلة اكسرك كسرة لمن تقول واي كفاي ان ما وريتني الحاصل كلو والناس ديل جتك عليهم شنو وفي شنو
_ انت جادي يا فضل
وتاااااح الفضل قشطو كف وخنقو وتاني كفتو وقال ليهو بوريك هسع جادي وللا بهاظر ، اتو دايرين تعملوا لي فوقا بتاعين عصابات ومجرمين موش؟ لكن والله كلكم ما بتعرفوني انا سم سم بتعرف السم ؟ اتكلم آ عولاق وابدا كلامك من القانوني العامل فيها رييس العصابة داك

هشام كايس لكجام وسايق معاهو ابراهيم وهجام الاتنين ما خلوا ليهم فجة ما كاسوها وداك ريحتو مافي
ونزل هجام في منطقة طوالي كجام اكان بجيها قال ليهو راقب المنطقة وفتش ليهو كويس وانا وابراهيم ماشين علي ماجد وبنجيك بعدين
ماجد الفضل كفتو تكفت جد ووراهو كل شي من يوم عرفهم ما خلى حاجة وكلما يسكت الفضل ينتحو كف لكن كضب ليهو في ندى
والفضل طوالي ربطو وقال ليهو انت ميت ميت الليلة والله الا بس اكان يومك ما تامي ساكت لو ما وريتني ندى دي شنو وجبت تلفونها من وين
ماجد بكى وصرخ وااااي
والفضل يلطم فيهو ويكافت
وتلفونو ما وقف هشام داقي عليهو كتير بس الفضل ما رد زح التلفون بعيد لمن العوقة دا يقر
_ ندى دي منو وجبت تلفونها كيف والله ما توريني غير التكفت والضرب ما بتشوف شي وقيلا اكتلك في فجتك دي وأفوت
_ سمح فكني بوريك
_ وريني بخشمك البتلعلع وبتحلقم بيهو من قبيلك دا
_ ندى خطيبة كجام وبت خالو
_ عرفتها كيف ؟
_ يوم كدا وصلتو بيت خالو ودخلت معاهو وقابلتها وقابلت خالو وبعرفهم كويس وانا لمن هو سرق المخدرات قلت لهشام احتمال يدق عليها ومشينا شلنا منها الرقم
_ هشام من زمان بعرفها
_ بعرفها انا بس وهشام انا الوريتو بيها
_ وهسي هي وين ؟
_ في بيت ابوها يعني وين
_ يعني ادتك تلفونها ساي كدا وللا قلعتو منها
_ قلعو هشام ما انا
_ ايواااا انا كدا فهمت ودايرين داك يتصل عليها وترد عليهو انت
_ وقلنا نكضب عليهو نقول خطفناها يا تظهر يا بنقتلها هي وخالك واخوانها

هشام لمن شاف ماجد ما برد عليهو جاء جاري جري ودخلوا البيت هو وابراهيم لقو ماجد مجلود ومربوط والفضل مافي
هشام جرى علي ماجد داير يفكو وابراهيم عرف الفضل دقاهو نفس الربطة الكان مربوطها هو ضحك وقال لهشام دقيقة دقيقة والله ما اصورو ما تفكو عشان يشوف حركتو العملها معاي تافهة كيف
الفضل شال القروش العند ماجد وشال تلفون ندى وفات مشى لحاتم اول حاجة او اول زول فكر فيهو وهو اصلا ما بعرف غيرو وقعد معاهو في البقالة اتونس ونهائي ما وراهو الحصل عليهو بس قال ليهو اديني مفتاح الاوضة ماشي اقعد فيها ولو جاء اي زول سأل عني انا ما جيتك
_ في شنو يا الفضل
_ بوريك بعدين بس زي ما قلت ليك
_ والعارفك انت هنا منو ؟
_ ياخي مافي زول وصلني هنا مرة ؟ اها دا زاتو الانا زايغ منو
_ عملت شنو ؟
_ ما عملت اي شي والله لكن بعدين بوريك كل شي لمن تقفل وتجي الاوضة بس هسي لا جيتك ولا انت شفتني
_ لا لا امش ساي ما عليك فهمت فهمت

الفضل فات الاوضة واكان متوقع هشام يدق عليهو او ماجد لكن ما فيهم زول اتصل نهائي لكن الاتنين رسلوا ليهو رسايل
هشام قال ليهو تجيني المساء في بيتي
وماجد رسل ليهو ما بخليك والله لو دخلت واترحم علي روحك من هسي

يتبع...

تم الإرسال من خلال التطبيق Topic'it

#سجم_الرماد 11

مجاهد يوسف

_ انت قبل نجي ما قلت عارف محلو الفات ليهو
_ ايوة عارفو لكن رسلت ليهو رسالة يجيني هنا يا ماجد ياخ اصبر
_ اصبر شنو والله يجي الا داير يموت ساي لاني زاتي رسلت ليهو رسالة
_ قلت ليهو شنو ؟
_ قلت ليهو اترحم علي روحك لاني قاتلك قاتلك
_ ياخي ما كان تقول ليهو كدا
_ ما بقول ؟ عليك الله الفضل المعفن دا يدقني انا ويربطني ويكفتني ودايرني اسكت ؟ انت قايلني ابراهيم دا وللا شنو يا هشام
هشام قعد يضحك
ابراهيم قال لهشام تضحك موش اها رد عليهو قول ليهو انا الاحماني منو اكتلو رد رد
هشام قال ليهم عليكم الله خلاص ياخ هسي هو بجي وبنتفاهم معاهو وزول فيكم يمد يدو عليهو مافي
ماجد قال والله ما اخليهو خليهو يجي بس عشان تاني يعرف هو غلط مع منو
_ انا بتصل عليهو وبجي بس رجاءا يا ماجد وانت يا ابراهيم ما تعملوا لينا مشكلة خلونا في مشكلة كجام بس
_ غايتو انا ما بخليهو والله وابراهيم علي كيفو
_ كدا انا ما بدق عليهو
_ والله دقيت ما دقيت وجاء وللا ما جاء انا حالف غايتو
وهشام اتصل علي الفضل

الفضل كان كلم حاتم وأحمد بالموضوع من طق طق لحدي ماهو قاعد معاهم والاتنين قالوا ليهو اطلع من الناس ديل دي شبكة بتضيعك وبتضيع عمرك ساي واحسن تمشي اهلك بس يا تقطعو معاهم وأحمد قال ليهو اهلك بس لأنك عرفت سرهم فيا تشتغل وتواصل معاهم يا اما بقتلوك لكن ما بخلوك بأخوي واخوك ساي
وهشام اتصل والفضل قال ليهم اها دا هشام . احمد قال ليهو ما ترد عليهو
_ المشكلة هو عارفني انا هنا لانو المرة الفاتت جابني هو هنا ليكم
_ ياخي اسمع كلامي وأبعد من الناس ديل
_ كدي دقيقة اشوفو داير يقول شنو
ألو مرحب
_ شنو يعني انا ما قلت ليك تعال لي
_ داير شنو يا هشام
_ دايرك تجيني في البيت ورسلت ليك رسالة وقريتها
_ طيب ؟
_ طيب شنو يللا تعال انا منتظرك في البيت ما تتأخر
_ بجيك بكرة
_ لا لا اطلع طوالي هسي
_ تمام يللا بجيك
_ منتظرك ما تتأخر

_ يعني ماشي ليهو ؟
_ بمشي انتهي من شغلي معاهم وبجي وانا لا فيهم زول طالبني شي ولا متورط معاهم في شي
_ اها وبتجي راجع يعني ؟
_ كيف ما برجع اكيد برجع
_ شوف انا عندي فكرة سمحة عندي صاحبي اسمو شريف عندو عربية خليني اتصل عليه يجي وانا وهو نوصلك وبالمرة نعرف البيت لو حصل اي شي نكون عارفين محلك
_ ياخ ما يحتاج
_ والله يحتاج ونص اسمع كلامي ما تضيع روحك ساي وانا حكاية اخليك تمشي ليهم براك كدي ما تحتها في راسك يا خلي المشي كلو كلو
_ ياخي ما عاوز ادخلكم في المعمعة دي وانت زول متعلم وفاهم ما تقرب من المجرمين ديل
_ والله ما بخليك وعلي الاقل قلت ليك اعرف بيت الزول دا وين
_ بس ما تقربوا منهم ونزلوني بعيد منو وانا بوصفو ليكم
_ تمام يللا انا بمشي اجيب شريف وبجيك

بعد احمد فات الفضل طوالي طلع ما انتظرو لانو ما داير يورطو مع الناس الكعبين ديل وصل الطريق جاهو واحد سايق اكسنت وقف ليهو والفضل ركب معاهو وقال ليهو العربي
_ بس عندي مشوار قريب في أكل في الضهرية ودواء اوصلو البيت في طريقنا واوصلك محل داير
_ ما مشكلة بس ما داير أتأخر

هشام تاني اتصل
_ اها طلعت
_ ايوة في الطريق انا
وقفل الخط
سيد الاكسنت قال ليهو دا هشام وللا شنو ؟
_ هشام منو ؟ وانت منو وبتعرف هشام من وين
_ هشام وماجد وابراهيم منتظرنك في بيت هشام ودايرين...
_ دقيقة انت منو يازول ؟
_ انا ركس
_ ركس شنو وتطلع منو انت كمان
ركس طلع الموبايل واتصل وناولو الفضل قال ليهو كلم
_ أكلم منو ؟ انت منو يا زول ووقف العربية دي ما ارشك بنية
_ ياخي كلم الخط فاتح
_ أكلم ساي ؟ اول وريني دا منو
_ ياخ امسك هو براهو وبوريك
_ ألو
_ انا كجام يا الفضل تعال لي مع ركس دا ضروري
_ ياخي انت وين والحاصل عليك شنو ؟
_ انت بس تعال مع ركس دا وانا بفهمك كل شي وياريت تقفل موبايلك نهائي يللا مع السلامه

الفضل ناول ركس الموبايل وقفل موبايلو وقال لركس عرفت محلي دا كيف ؟
_ من يوم جيت من بورسودان وانت مراقب
_ مراقب عديييل ؟ اها وماشين وين نحن ؟
_ قربنا ما ماشين بعيد

هشام تاني اتصل ولقى الفضل قفل الموبايل وكلم ماجد داك قال ليهو انا عارفو كلب وما بجي ورح ليهو في محل وديتو بس نجيبو ونجي
_ الا نمشي تعب ساي وللا نقعد نراقب هناك لانو اكيد بتاع الدكان بنكر بقول ما جاء ودا لو ما عندو رقم تاني ويتواصل ليهو معاهو
_ ورح برضو لانو الفضل دا بوصلنا لكجام واحتمال لاعبين علينا ساي وهم متفقين مع بعض
_ والله جائز ما تستبعد لكن سليمان ما بخلي كجام وحقو نحن نصهين ساي لمن نشوف القانوني وسليمان بعملوا شنو وبعدين نتصرف

الفضل وصل كجام ولقاهو في بيت في حي غايس وسلم عليهو سلام حار وقال ليهو وريني الحاصل شنو
كجام قال ليهو الجماعة ديل اي واحد فيهم مخطط للتاني وداير يأكل التاني بس الغريبة الاتنين بهايم وصاح انا وانت ننقتل لكن انا عرفت ألعبها صاح
_ ياخي فهمني واحدة واحدة من الاول
_ بوريك مستعجل مالك انت كدا
_ داير افهم بس
_ بوريك كل شي من قبال نمشي بورسودان بيومين بس بعدين ما هسي
_ طيب انت صحي شلت البضاعة كلها
_ ايوة وهم عارفين كدا
_ طيب الناس ديل بكتلوك لو لقوك
_ يكتلو شنو ياخ ديل ناس وهم ساي وانا اشتغلت معاهم عشان اضربهم وانا تبع ابورجيلة
_ ابورجيلة دا الراس الكبير
_ ياخي انا قلت ليك فهمتي واحدة واحدة
_ طيب بوريك هسي بس خلينا ناكل حاجة اول

القانوني قال لسليمان يعني كجام طلع خاين وكمان ساق معاهو الفضل برضو لابو رجيلة ؟
_ انا كلمني عباس وهسي الاتنين مع بعض
_ قول لعباس دا خدرهم الاتنين وجيبهم لي
_ قلت ليهو كدي قبيل وبوديهم المغارة حقت الموت
_ البعجبني فيك يا سليمان دايما بتفهمها طايرة
_ تلميذك يا حاج

ركس عمل الفضل مخدر هو وكجام وشالهم في الاكسنت ووداهم مغارة الموت واتصل علي سليمان قال ليهو الاتنين مخدرين ومكلبشين وجوة المغارة
سليمان قال ليهو بعد المخدر يفك منهم ويصحوا دق علي واديني كجام اكلمو

مغارة الموت بيت حق القانوني اي زول سليمان والقانوني يجيبوهو ليهو تاني ما بمرق منو حي

يتبع.....

تم الإرسال من خلال التطبيق Topic'it

#سجم_الرماد 12

مجاهد يوسف

_ اي واحد فيكم بلعب علي التاني وما عارف دايرين تصلوا لشنو ولا عارف انا الدخلني معاكم شنو؟
_ لازم يا الفضل قبل ما تخطو اي خطوة تكون عارف انت داير شنو وعملتها عشان شنو . الناس ديل كلهم حرامية امسكها من القانوني وسليمان ولحدي أصغر واحد البشيل ليهو حبة حبتين ويمشي يبيعن فرحان بمكسبو الكسبو . كلهم ديل عايشين بدمار الناس وعارفين سلفا القروش دي حرام وربنا بعدين بحاسبهم لكن الحتة دي ما بفكروا فيها نهائي والشيطان بحلي ليهم القروش وشايفين الحياة قروش بس مع انهم ما ضايقين للحياة طعم وعمرهم كلو جري وراء القروش وعمل أرصدة في البنوك وبيوت وعقارات وعمارات لا ضايقين ليها طعم ولا بضوقوهو زاتو وفي الآخر بموتوا وقروشهم بستمتعوا بيها اولادهم لكن الذنب في رقبتهم
_ يعني انت الكلام دا كلو عارفو يا كجام ؟
_ عارفو كلو وما عارفو بس لاني وعيتو
_ طيب الجابرك شنو تاكل حق الحرام ما تخليهم ؟
_ ما بقدر انا جيت زيك كدا اعمى واطرش واتورط معاهم من غير ما اعرف حقيقتهم ولمن عرفتها لقيت روحي متبلبل والبتبلبل بعوم
_ ما منطق دا انت زول ربنا خلقك حر عيش حر ومالك ومال الوهم ديل يا ابعد منهم وعيش حياتك يا بلغ فيهم وريح البلد منهم بس
_ عارف يا الفضل المفتاح الاديتك ليهو مفتاح شنو ؟
_ مفتاح شنو آي والله انا نسيتو هاك ليهو زاتو ما يقع مني
_ لا لا خليهو معاك انا عندي نسخة منو خليهو معاك دا عندو قصة عجيبة ياخ لكن بحكيها ليك ركس جاء خلي الموضوع دا هسي بنتموا برانا دس المفتاح دس المفتاح
عباس دخل يتكشم
_ كجام فضولي كيفكم يا مخدرين ؟
_ هههههههه انت كبيت مخدر كتير ياخ وانا هسي راسي زاتو تقل يا ركس هههههههه
_ عارف سليمان قال القانوني دايرني ابيدكم قال لسليمان اعمل ليهم إبادة وأنفيهم من الأرض هههههههه
_ داير يودينا التوج ؟
_ هسي هو مبسوط شديد وبجيكم سليمان عشان ينسفكم هههههههه
الفضل قال يا جماعة فهمونا كجام قال ليهو بعد نمرق من هنا والله احكي ليك كل شي
_ دا لو مرقنا وما ودونا التوج ونفونا من وش الأرض

هشام وماجد وابراهيم فاتوا بقالة حاتم وراقبوها من بعيد بعيد
احمد كان جاب شريف ولمن لقى الفضل مافي زعل شديد وقال لحاتم ما كان تخليهو يفوتني ياخ حاتم قال ليهو والله ما شفتو لمن فات وانا قايلو في الاوضة قاعد
هشام قال لابراهيم امش شمشم من العربي الفي الدكان دا احتمال تعرف حاجة عنو
ابراهيم مشى اشترى ليهو سيجار وحاجة باردة وفتحها وقعد يشرب فيها براحة براحة
احمد بعد شريف فات مشى البيت وجاء راجع تاني لحاتم وابراهيم واقف بس عامل فيها بتكلم في الموبايل حقو
احمد قال لحاتم ما اتصل الفضل عليك ابراهيم عمل حركة لفتت نظر حاتم قام قرص لاحمد وقال ليهو
اتصل قبل شوية قال لي عندي صاحبي اسمو هشام ماشي عليهو بعد شوية والموبايل ما فيهو شاحن
احمد قال ليهو هو فات بدري ياخ معقول لسة ما وصل ؟
_ قال غشى واحد صاحبو ما ذكر لي اسمو لكن بجي بعدين قال

ابراهيم ختا قزازة البارد وطوالي فات وحاتم قال ليهو الزول دا من دخل هنا في عيونو كلام كتير وشكلو دا انا ما ارتحت ليهو نهائي ومجرم مجرم وراهو شوفو مشى وين وأحمد راقبو لمن وصل ماجد وهشام وكلمهم وركبوا العربية وفاتوا وحاتم شاف العربية قال ليهو كان تشيل نمرتها ياخ
احمد اتصل علي شريف بس لمن جاء ما قدر يلحق العربية

_ هسي نحن قاعدين هنا لشنو يا كجام
_ قاعدين عشان نشتغل مع سليمان ما تستعجل بعد نفوت والله احكي ليك كل شي
_ والله انا لا داير اشتغل مع ديل ولا مع هشام ولا اي زول وماشي الحلة بس مالي ومال الكلام الفاضي ياخ والله قيم سيجة مع الفاتح والمرضي اخير لي من شغلي في خرطومكم دي وشغلتكم الفاضية دي كلها
كجام ضحك وقبل يرد عليه سليمان جاء داخل سلم عليهم وقال لكجام اصلي يا اصلي وكويس جبت الفضل معاك انا ما بقعد معاكم كتير بس البضاعة ما تمرق نهائي وانتو زاتكم عاوزكم تختفوا نهائي شوفوا ليكم فجة كدا امشوا ليها شهر شهرين ما فيكم زول يظهر باعتبار اني قتلتكم ولو ظهرتوا خطتنا كلها باظت والقانوني بقتلكم وبقتلني معاكم وفي ليلكم دا ركس يمرقكم بالعربية يوديكم الغرب وانا بتواصل معاكم ولو ما دقيت ليكم نهائي ما تدقوا علي
قالوا خير واداهم قروش وركبوا مع ركس
بعد طلعوا من الخرطوم الفضل قال ليهم نغشى حلتنا اول وبعدين نمشي الغرب وعباس رفض لكن الفضل اقنعو وقال ليهو ما تخاف ساي وزول بعرفنا مافي
وفاتوا علي الحلة الفضل قال لكجام يللا احكي وكمل لي القصة
كجام قرص ليهو بعينو وقال ليهو ياخ انا نسيتها زاتو كنا واقفين وين قبل يجينا ركس
_ في الثعلب لمن قال للأسد في أسد متحديك
كجام اتكيف من الفضل وقال آي آي ياخ والاسد طبعا شايف روحو ملك الغابة ومستحيل ينغلب ووو كطع ليهو قصة بايخة من راسو ساي
واتونسوا وقعدوا يحكوا في القصص لمن وصلوا الحله

يتبع....

تم الإرسال من خلال التطبيق Topic'it

#سجم_الرماد 13

مجاهد يوسف

وصلوا الحلة وقبال يخشوها عباس قال ليهم انا راجع يا شباب اقعدوا ليكم كم يوم هنا وانا بمشي الخرطوم وبجيكم راجع عشان عندي شغلة ضرورية مع هشام وماجد ماشي عليها
وقدر سجم الرماد ما حبسو وقال طيب خش اعرف البيت وسلم علي اهلي وامش الى قام كجام نزل وقال ليهو خليهو يمشي وقرص للفضل ما يكترو معاهو وعباس فات وديل فاتوا البيت
_ سجم الرماد
_ المرضي المرض ازيك يا زول
_ اقسم بالله الحلة براك آ الفضل أخير عدمها . ويا الفاتييييييح الفاتح الفضل جاء عووووك آ ناس
_ هازول ها سلم أول الفضل جاء من السعودية ؟
والناس اتلموا فوق الفضل سلام حار وكتار المشتاقين ليهو والعجب الفاتح جاء جاري جري ولمن شاف الفضل لمن بكى وقلدو مسافة طويييلة
ووصلوا البيت جرى الفاتح ضبح والناس كلهم متلمين وكجام يتكشم ساي ويتضاحك في طيبة الناس ديل وفي كلامهم . وشاف الفضل دا ولا صاح يتلم عليهم وحلة زي وناس طيبين كدا ما بطلع منهم مجرم وبتاع مخدرات وعارف الفضل ما راضي ولا في شي متورط فيهو وقرر يخليهو في فجتو دي ويتخارج منهم بس ما الليلة بعد يرجع عباس وحلف اصلو ما بورطو معاهم
الفضل بعد جايب الناس كلهم وقالدهم عرفهم علي كجام صاحبو وقال ليهم اشتغلت لي في شركة ودا زميلي جينا عندنا مشوار وشغل في الغرب وقلنا نقعد يومين تلاتة ونفوت
هشام بهناك قلب الخرطوم قلب للفضل ونهائي ما في واتصل علي عباس سألو وعباس قال ليهو انا ما بعرفو زاتو وماجد حلف والله لو امشي ليهو في حلتهم ما بخليهو
هشام زاتو لمن ما لقى ليهو درب فكر في الحلة لكن قال ما اظن يرجع ليها وشالها من راسو بس شاكي في القانوني وسليمان يكون ليهم ليهو علاقة وقرر يراقبهم
ابراهيم قال ليهو ياخي نحن بنستفيد من الفضل دا شنو لو لقيناهو وقال ليهم مفروض نحن نركز على كجام وبس
هشام قال ليهم كجام لاعب ليهو لعبة أكبر منو ودخل نفسو في ورطة عقابها الموت بس دا لو فعلا نام بالبضاعة وداير يعمل فيها راجل فنحن لاعبين علي سليمان وسليمان لاعب علينا دا الأنا فكرت فيهو وداير الفضل عشان ما دائرة يشتغل مع سليمان الا عن طريقي عشان يكشف لي كل تحركاتو وانا ما صدقت قدرت ادخلو في نصهم

كجام بالليل قعد مع الفضل براهم وداير يحكي ليهو كل شي وقال ليهو دايرني ابدا ليك الحكاية من وين
_ ابداها لي من المفتاح
_ المفتاح دا بالمناسبة مفتاح ساي اداني ليهو درويش اول ما جيت الخرطوم لقيتو لافي ومبشتن وهدومو مرقعة قال لي داير لي أكل وانا اليوم داك عندي قروش بس ما بعملن حاجة مشيت جبت ليهو سندوتش وعصير أكل وانا جيعان اكتر منو قام اداني المفتاح دا وقال لي بنفعك المفتاح دا ما تضيعو وبعد جاء فات رجع واداني تاني واحد وقال لي اديهو لزول صاحبك والمفتاح دا ليهو معاي قريب تلاتة سنة ما ضيعتو ولمن جيت انت اديتك التاني مع انك ما صاحبي شديد لكن في حاجة دفعتني الا اديك ليهو او احساس انك في يوم من الايام تبقى لي صاحب واحتمال عشان حسيت انك احسن واحد في القابلتهم كلهم وما خسران شي خليهو في جيبك امكن ينفع ما معروف
_ والله كلام لكن . وزي ما قلت ما خسرانين شي امكن ينفع .
_ دي قصة المفتاح
_ يللا هشام
_ هشام دا أكبر زول ماسورة ومراوغ وبتاع لف ودوران وما فيهو خير وزول مصلحجي بس وذكي جدا بفكر بعيد وقلبو اسود وأناني وفي نفس الوقت ممثل بارع ومخادع ممكن يخليك تحلف انو احسن زول في العالم.
زول تحس انو ملاك عديل وجنتل وظريف وود ناس ونهائي مافي زول بلحقو
_ اعوذ بالله بالله عليك كعب ؟
_ كعب بس ياخ عادي ممكن يقتل
_ اها والقانوني لا لا ماجد
_ ماجد دا طيرة ساي وأمعة وتابع لهشام ما عندو اي موضوع عامل فيها تفتيحة وراجل ولا عارف كوعو من بوعو وهشام بستغلو
_ ابراهيم ؟
_ اكبر مجرم وزي عباس دا
_ عباس ؟
_ عباس دا زول داير يعيش بس وتابع للكل وهسي مشيتو دي للقانوني بوريهو حركات سليمان كلها وأي واحد عارفو مع التاني لكن مستفيدين منو لانو بجيب ليهم الاخبار من التانيين
_ وسليمان ؟
_ أكبر مجرم وغدار وأصلو ما تصدقو في حاجة وعادي موش هسي قال لينا القانوني داير يقتلنا ؟ لمن يمشي ليهو بقنعو بإنو سفرنا وورانا بالقانوني داير يقتلنا
_ ويستفيد شنو لمن يوريهو
_ لانو عارف عباس بجي يوريهو بينا ولاعب علي القانوني وماكل قروشو
_ سمح الحاصل شنو في بورسودان ؟
_ الحصل يا عزيزي الفاضل أنا قلت ليهم ابو رجيلة عندو بضاعة داير يبيعها
_ اول شي قبل تتم ابو رجيلة دا منو ؟
_ ابو رجيلة دا أكبر تاجر مخدرات وكلهم بخافوا منو ولا فيهم زول شافو هههههههههههه
_ بتضحك مالك ؟
_ لا لا اتذكرت لي حاجة , المهم انا جبت ليهم الصفقة ولأنو مافي زول فيهم بعرفو غيري انا المشيت ليهو ولمن وصلنا هناك انا خفتك تشوف ابو رجيلة وتتعرف عليهو وتاني تتعامل معاه وانا ابقى كرت محروق عشان كدا مثلت عليك اني خايف وخارجتك من الجماعة
_ وانت فعلا ما دايرني اعرفو؟
_ ساعتها ايوة
_ اها وهسي كيف ؟
_ هسي بعد لاقيت اهلك وعرفت ناس حلتكم ديل ما دايرك نهائي تخش مع العصابات دي والحلة دي والناس ديل ما بمرق منهم زول مجرم بضر الناس بالمخدرات واحسن حاجة تقعد قبلك بس والله امس كنت داير اتخارج وازوغ ألحق عباس لكن قلت اوريك بالواضح لانو الدرب دا ما دربك يا الفضل اخوي
_ والله انا لمن جبتكم هنا عشان تاني ما ارجع لكن قبل اقرر قلت اعرف الموضوع كلو اول . اها والبضاعة انت وديتها وين ؟
_ هههههههه مافي بضاعة انا غشيتهم كلهم شلت قروش القانوني وقروش هشام وفكيتهم عكس الهواء
_ طيب كدا بقتلوك
_ والله هي ورطة لكن بمرق منها
_ والقروش وين
_ داسيها كلها في فجة ما بصلوا ليها ولو وصلوا ليها بقنعوا منها
_ داسيها وين ؟
_ شالها ابو رجيلة هههههههه
_ ليه بتضحك لمن تجيب سيرة ابو رجيلة دا
_ لانو مافي ابو رجيلة اصلا وانا وهمتهم ليهو ساي
_ انت جادي ؟
_ والله صاح وكلهم بخافوا منو ؟
_ طيب حصل جبت ليهم منو بضاعة ؟ ووهمتهم ليهو كيف ؟
_ اول ما اشتغلت معاهم سامع القانوني القانوني وما شفتو إلا قريب دا والبضاعة بنجيبها من الخلاء المشينا ليهو انا وانت داك وانا كم مرة مشيت وقلت ليهم في تاجر هنا في الخرطوم اسمو ابورجيلة ومسؤول كبير في الحكومة لا يظهر ولا داير زول يعرفو وانا وصلت ليهو عن طريق زول بعرفو لكن ما شفتو واقنعتهم نتعامل معاهو وكنت بشيل منهم القروش وبدخل البضاعة الخرطوم بطريقتي بجيبها من هناك وبسلمهم في الخرطوم وراقبوني كتير عشان يصلوا ليهو بدون فايدة وانا ما خايفهم يقتلوني لاني محمي من جانب ابو رجيلة وشغال معاهو واديت عباس قروش يقول ليهم كلام كتير عنو وهم صدقوهو وبقى ليهو حماية وانا الجبن عباس لكن ما اديتو سري نهائي
_ طيب ما خايفني اوريهم ؟
_ انت صاحبي ياخ والوحيد الحاليا عارف وما خايف منك لانك زول راجل ما زي الوهم ديلك وغير كدا نحن بنتفارق هنا
_ ما بنتفارق هنا ولا شي ولا تفكر في الكلام دا

يتبع ...

بعتذر عن الغياب والتأخير

تم الإرسال من خلال التطبيق Topic'it

ﺳﺠﻢ _ ﺍﻟﺮﻣﺎﺩ 14
ﻣﺠﺎﻫﺪ ﻳﻮﺳﻒ
ﺭﺟﻌﺔ ﺍﻟﻔﻀﻞ ﺩﻱ ﺍﻟﻔﺎﺗﺢ ﺍﺧﻮﻩ ﻣﻜﻴﻔﺎﻫﻮ ﻛﻴﻒ ﺷﺪﻳﺪ ﻭﺃﻛﺎﻥ ﺩﺍﻳﺮ ﺍﻟﺮﺗﻴﻨﺔ ﺑﺖ ﻋﻮﺽ ﺍﻟﺠﻴﺪ ﻗﺮﻳﺒﺘﻬﻢ ﻭﻣﻦ ﺍﻟﺪﺭﺕ ﺍﻧﺘﻬﻰ ﻟﻤﻠﻢ ﻗﺮﻳﺸﺎﺕ ﺍﻟﺼﺮﻓﺔ ﻭﻣﻨﺘﻈﺮ ﺟﻴﺔ ﺍﻟﻔﻀﻞ ﺑﺲ ﻋﺸﺎﻥ ﺍﻟﺴﻨﺔ ﺩﻱ ﻳﻌﺮﺱ ﻟﻴﻬﻮ ﺑﻴﻬﻦ ﻭﻫﻮ ﻳﺎ ﻋﺮﺱ ﻣﻌﺎﻫﻮ ﺍﻥ ﺟﺎﺀ ﺻﺎﺩ ﺑﻘﺮﻭﺵ ﻳﺎ ﻋﺮﺱ ﺑﻌﺪﻭ ﻟﻤﻦ ﺭﺑﻨﺎ ﻳﺴﻬﻠﻬﺎ
ﺍﺑﻮﻫﻮ ﻗﺎﻝ ﻟﻴﻬﻮ ﺍﺣﺴﻦ ﺗﻌﺮﺳﻮﺍ ﺳﻮﺍ ﻋﺸﺎﻥ ﺍﻟﺨﺴﺎﺭﺓ ﺗﺒﻘﻰ ﻭﺍﺣﺪﺓ ﻣﻊ ﺍﻧﻮ ﺍﻟﻌﺮﺱ ﻣﻮ ﺧﺴﺎﺭﺓ ﻭﺍﻟﻔﻀﻞ ﻣﺎ ﻛﺎﻥ ﺣﺎﺩﻕ ﻟﻴﻬﻮ ﺑﺖ ﺯﻳﻮ ﻟﻜﻦ ﺍﻟﺤﻠﺔ ﻣﻼﻧﺔ ﺑﻨﻮﺕ ﻭﻓﺘﻮ ﺳﻤﻴﺤﺎﺕ ﻣﺎ ﺑﻐﻠﺐ ﺃﻥ ﻗﺎﻝ ﻋﺪﻳﻠﺔ
ﺍﻟﻔﻀﻞ ﺑﻌﺪ ﻛﻤﻞ ﻧﻀﻤﻴﻬﻮ ﻭﻭﻧﺴﺘﻮ ﻣﻊ ﻛﺠﺎﻡ ﺟﺎﺀ ﺍﻟﺒﻴﺖ ﺍﺻﻼ ﺃﻛﺎﻧﻮﺍ ﻓﻲ ﻃﺮﻑ ﺍﻟﺤﻠﺔ ﺑﻌﻴﺪ ﻣﻦ ﺍﻟﻨﺎﺱ ﻋﺸﺎﻥ ﻣﺎﻓﻲ ﺯﻭﻝ ﻳﻌﺮﻑ ﺍﻟﻠﻴﻠﺘﻢ
ﺍﻟﻮﺍﻃﺔ ﻓﻠﻠﺖ ﻭﺍﻟﻠﻴﻞ ﺩﺧﻞ ﺗﺐ ﻭﻓﻴﻬﻮ ﻗﻤﻴﺮﺓ ﺣﻠﻴﻮﺓ ﻣﻀﻮﻳﺔ ﻭﺳﻤﺤﺔ ﻭﺍﻟﺠﻮ ﺯﺍﺗﻮ ﺍﻛﺎﻥ ﺳﻤﺢ ﻭﺍﻭﻝ ﻣﺎ ﺍﻟﻔﻀﻞ ﺩﺧﻞ ﻟﻘﻰ ﺍﻟﻔﺎﺗﺢ ﻭﺍﻟﻤﺮﺿﻲ ﻣﺴﺘﻨﻨﻬﻢ ﻣﻦ ﻗﺒﻴﻞ ﻭﻣﺸﺘﺎﻗﻴﻦ ﻟﻠﻮﻧﺴﺔ ﻣﻌﺎﻫﻮ ﻭﺑﺪﻭﺭﻭﺍ ﻳﻌﺮﻓﻮﺍ ﺍﺧﺒﺎﺭﻭ ﻭﺷﻦ ﺳﻮﻯ ﻓﻲ ﺍﻟﺒﻨﺪﺭ ﻭﻣﺮﻗﻮﻟﻦ ﺳﺮﺍﻳﺮ ﻓﻲ ﺣﻮﺵ ﺍﻟﺪﻳﻮﺍﻥ ﻭﻗﻌﺪﻭﺍ ﻳﺘﻮﻧﺴﻮﺍ ﻓﻮﻗﻬﺎ
ﺍﻟﻔﺎﺗﺢ ﻣﻊ ﺍﻧﻮ ﺍﻟﺰﻣﻦ ﺍﺗﻐﻴﺮ ﻭﻋﻨﺪﻫﻢ ﺗﻼﺟﺔ ﻟﻜﻦ ﻋﺸﺎﻥ ﻳﺬﻛﺮ ﺍﻟﻔﻀﻞ ﺑﺎﻟﻔﻀﻞ ﺟﺪﻭ ﻭﻗﺼﺔ ﺍﻟﻨﻌﻴﺮ ﻣﺸﻰ ﺟﺎﺏ ﻟﻴﻬﻮ ﺻﻴﻨﻴﺔ ﻭﻣﻼﻫﺎ ﻣﻮﻳﺔ ﻭﻛﻠﻬﻢ ﻗﻌﺪﻭﺍ ﻳﻀﺤﻜﻮﺍ ﻭﺍﻟﻔﻀﻞ ﻗﺎﻝ ﻟﻴﻬﻮ ﻭﺍﻟﻠﻪ ﺭﺟﻌﺘﻨﺎ ﻟﺰﻣﻦ ﺑﻌﻴﺪ ﺧﻼﺱ ﺍﻟﻔﺎﺗﺢ ﻗﺎﻝ ﻟﻴﻬﻮ ﺧﺎﻳﻔﻚ ﺑﻌﺪ ﻟﺒﺴﺎﻧﻚ ﻟﻠﺒﻨﻄﻠﻮﻥ ﻭﺍﻟﻘﻤﻴﺺ ﺗﻨﺴﺎﻫﻮ
_ ﻓﻲ ﺯﻭﻝ ﺑﻨﺴﻰ ﺍﺻﻠﻮ ﻭﻓﺼﻠﻮ ؟
_ ﻧﺎﻥ ﻣﺎﻟﻚ ﻣﻦ ﺟﻴﺖ ﻣﺎﻙ ﺍﻟﻔﻀﻞ ؟ ﻭﻻﻙ ﻋﺎﺟﺒﻨﻲ ؟
ﺍﻟﻔﻀﻞ ﻗﺎﻡ ﻭﺳﺎﻕ ﺍﻟﻔﺎﺗﺢ ﻭﺧﻠﻰ ﺍﻟﻤﺮﺿﻲ ﻣﻊ ﻛﺠﺎﻡ ﻭﻣﺸﻮﺍ ﻗﻨﺒﻮﺍ ﺑﺮﺓ ﺍﻟﺒﻴﺖ ﻭﻗﺎﻝ ﻟﻴﻬﻮ ﻫﺴﻲ ﺍﻧﺎ ﻣﺎﻟﻲ ﺁ ﺍﻟﻔﺎﺗﺢ ﻋﺸﺎﻥ ﺗﻘﻮﻝ ﻟﻲ ﻛﻼﻣﻚ ﺩﺍ ﻭﺍﻻﺗﻐﻴﺮ ﻓﻮﻗﻲ ﺷﻨﻮ ؟
_ ﻛﻠﻚ ﻣﻴﻞ ﻭﺍﻧﺎ ﺇﻥ ﻣﺎ ﺟﻴﺖ ﺍﻟﻠﻴﻠﺔ ﺑﺮﺍﻙ ﺍﻛﺘﺎ ﻓﺎﻳﺖ ﻻﺣﻘﻚ ﺍﻋﺘﺮﻙ ﻭﺍﺟﻴﺒﻚ
_ ﻫﺪﺍ ﺟﻴﺘﻚ ﺑﺮﺍﻱ ﻭﺍﻟﺒﺮﻛﺔ ﺍﻟﻤﺎ ﻟﺤﻘﺘﻨﻲ
_ ﺟﻴﺖ ﺑﺲ ﻣﺎﻙ ﺍﻟﻔﻀﻞ ﺃﺧﻮﻱ ﺍﻟﺒﻌﺮﻓﻮ ﻭﺍﻟﻬﺪﺍﻡ ﺩﻳﻞ ﻣﻴﻦ ﻫﻴﻼﺗﻚ ﻭﻻ ﺑﺸﺒﻬﻨﻚ ﻭﻏﻴﺮﻧﻚ ﺗﺐ ﺗﺐ ﻭﻋﻴﺸﺔ ﺍﻟﺒﻨﺪﺭ ﺑﻘﺘﻚ ﻣﺴﺘﻐﻨﻲ ﻣﻨﻨﺎ
_ ﺩﺍ ﻛﻼﻡ ﺷﻨﻮ ﺩﺍ ؟
_ ﻫﺴﻊ ﻋﻠﻴﻚ ﺍﻟﻠﻪ ﻣﻦ ﺟﻴﺖ ﻗﻌﺪﺕ ﻣﻊ ﻭﺍﺣﺪ ﻓﻮﻗﻨﺎ ؟ ﻭﻣﻦ ﻗﺒﻴﻞ ﺍﻧﺎ ﻣﺴﺘﻨﻴﻚ ﺑﺪﻭﺭ ﺍﺗﻮﻧﺲ ﻣﻌﺎﻙ ﻭﺍﻟﻌﺠﺐ ﺍﻟﻤﺮﺿﻲ ﺑﻴﺘﻬﻢ ﻣﻦ ﺟﻴﺖ ﻣﺎ ﺷﺎﻓﻮ ﻭﺑﺪﻝ ﺗﻘﻨﺐ ﺗﺘﻮﻧﺲ ﻣﻌﺎﻧﺎ ﺳﻘﺖ ﺻﺎﺣﺒﻚ ﺍﻟﺠﺎﺀ ﻣﻌﺎﻙ ﺩﺍ ﻭﻣﺸﻴﺘﻮ ﻣﻨﻨﺎ ﻭﻫﻮ ﻗﺎﻋﺪ ﻣﻌﺎﻙ ﺍﻟﺰﻣﻦ ﻛﻠﻮ ﻓﻲ ﺍﻟﺒﻨﺪﺭ ﻭﻻ ﻫﺒﺒﺘﻮ ﻟﻴﻨﺎ ﻧﺤﻦ
_ ﺑﻴﻨﻲ ﻭﺑﻴﻨﻮ ﻣﻮﺿﻮﻉ ﻣﻬﻢ ﻭﺣﺎﺟﺎﺕ ﺑﺪﻭﺭﻭ ﻳﻔﻬﻤﻨﻲ ﻟﻴﻬﺎ
_ ﺃﻫﻢ ﻣﻦ ﺃﻫﻠﻚ ؟ ﺃﻣﻲ ﻭﺃﺑﻮﻱ ﺩﻳﻞ ﻳﻌﺎﻳﻨﻮﻟﻚ ﺯﻱ ﻫﻼﻝ ﺍﻟﻌﻴﺪ ﻭﻣﻦ ﺳﺎﻋﺔ ﺳﻠﻤﺖ ﻋﻠﻴﻬﻢ ﺗﺎﻧﻲ ﻣﺎ ﺳﻌﻠﺖ ﻣﻨﻬﻢ
_ ﻫﺴﻲ ﺷﺎﻳﻔﻨﻲ ﻓﺎﻳﺖ ؟
_ ﺧﺎﻳﻔﻚ ﺗﻔﻮﺕ ﻭﻳﻐﻠﺒﻚ ﺍﻟﻘﻌﺎﺩ ﻓﻲ ﺍﻟﺤﻠﺔ ﻭﺗﺒﻘﻰ ﺯﻱ ﺍﻟﻨﻌﻴﺮ
_ ﻧﻌﻴﺮ ﺷﻨﻮ ﻫﺎ ، ﺍﻧﺖ ﻣﻄﺮﻃﺶ؟ ﺗﺎﻧﻲ ﺍﻟﻘﺼﺔ ﺩﻱ ﻣﺎ ﺗﻘﻮﻟﻬﺎ ﻟﻲ ﻭﺍﻟﻠﻪ ﺗﻜﺘﺮﻭ ﻣﻌﺎﻱ ﻫﺴﻲ ﺩﻱ ﻓﻲ ﻟﻴﻠﻲ ﺩﺍ ﺍﻓﻮﺕ ﻭﺃﺧﻠﻲ ﻟﻴﻚ ﺍﻟﺤﻠﺔ ﺩﻱ ﻛﻠﻬﺎ ﻭﺍﻋﻤﻞ ﺍﻛﻌﺐ ﻣﻦ ﻋﻤﺎﻳﻞ ﺍﻟﻨﻌﻴﺮ
_ ﻭﻧﻔﺴﻚ ﺑﻘﻰ ﺣﺎﺭ ﻭﺑﺎﻟﻚ ﻣﺎ ﻃﻮﻳﻞ
ﺑﻌﺪﻳﻨﻚ ﺍﻟﺰﻭﻝ ﺍﻟﺠﺎﺀ ﻣﻌﺎﻙ ﺩﺍ ﻣﺎ ﻋﺠﺒﻨﻲ ﻭﻗﻠﺒﻲ ﻣﺎ ﺭﺍﺩﻭ ﻛﻠﻮ ﻛﻠﻮ
_ ﻣﺎﻟﻮ ﺷﻔﺘﺎ ﻣﻨﻮ ﺷﻨﻮ ؟ ﻻ ﺳﻌﻠﻚ ﻻ ﻧﻀﻢ ﻣﻌﺎﻙ
_ ﻋﻼ ﻳﺴﻌﻠﻨﻲ ؟ ﺍﻧﺎ ﻣﻦ ﺷﻔﺘﻮ ﺳﺎﻛﺖ ﻣﺎ ﻋﺠﺒﻨﻲ ﻭﺍﻧﺖ ﺧﺎﺑﺮﻧﻲ ﺑﺎﻟﺤﻴﻞ ﺃﻥ ﻗﻠﺖ ﺍﻟﺰﻭﻝ ﺩﺍ ﻣﻮ ﻧﺎﻓﻊ ﻣﻌﻨﺎﺗﻬﺎ ﻣﺎ ﻧﺎﻓﻊ ﻭﻻ ﺗﺮﺟﻰ ﻣﻨﻮ ﺧﻴﺮ
_ ﺍﻧﺖ ﺑﺘﻌﻠﻢ ﺍﻟﻐﻴﺐ ؟
_ ﻣﺎ ﺑﻌﻠﻢ ﺍﻟﻐﻴﺐ ﻋﻼ ﺯﻭﻟﻚ ﺍﻟﺠﺎﺀ ﻣﻌﺎﻙ ﺩﺍ ﻣﻮ ﻧﺎﻓﻊ ﻭﺗﺎﻧﻲ ﺑﻘﻮﻟﻬﺎ ﻟﻴﻚ
_ ﺳﻤﺢ ﺧﻠﻴﻬﻮ ﻫﺴﻲ ﻧﻀﻤﻴﻚ ﺍﻟﻤﺴﻴﺦ ﺩﺍ ﻭﻭﺭﺡ ﻗﻮﻡ ﺩﺧﻼﻛﺎ ﻋﻠﻴﻬﻢ
ﺍﻟﻤﺮﺿﻲ ﺍﺗﻮﻧﺲ ﻣﻊ ﻛﺠﺎﻡ ﻭﻧﻬﺎﺋﻲ ﻣﺎ ﻋﺠﺒﻮ ﻭﻻ ﻋﺎﺭﻑ ﺍﻟﻔﻀﻞ ﺻﺎﺣﺐ ﺍﻟﺰﻭﻝ ﺩﺍ ﻛﻴﻒ ﻭﻻ ﺑﺸﺒﻬﻢ ﻭﺷﺎﻳﻒ ﻛﺠﺎﻡ ﺩﺍ ﺯﻱ ﺍﻟﻤﺠﺮﻡ ﻣﺠﺮﻡ ﻭﺍﻟﻔﺎﺗﺢ ﻣﺸﻰ ﺟﺎﺏ ﺍﻟﻌﺸﺎﺀ ﻭﺑﻌﺪ ﺍﻟﻌﺸﺎﺀ ﺍﻟﻤﺮﺿﻲ ﻓﺎﺕ ﺑﻴﺘﻬﻢ ﺍﻟﻨﻮﻡ ﻣﺎ ﺟﺎﻫﻮ ﺟﺎﺀ ﺭﺍﺟﻊ ﻧﺎﻏﻢ ﻟﻠﻔﺎﺗﺢ ﻭﻗﻌﺪﻭﺍ ﺑﺮﺓ ﻭﻗﺎﻝ ﻟﻴﻬﻮ ﺍﻟﻔﻀﻞ ﺟﺎﺏ ﺍﻟﺰﻭﻝ ﺍﻟﺨﻠﻴﻘﺔ ﺩﺍ ﻣﻦ ﻭﻳﻦ ؟
_ ﻫﻬﻬﻬﻬﻬﻬﻪ ﻣﺎﻟﻮ ﻳﺎﺥ؟
_ ﻳﺎﺥ ﺷﻜﻠﻮ ﻣﺎ ﻣﺮﻳﺢ ﻭﻣﺮﺍﻭﻍ ﺍﻟﺰﻭﻝ ﺩﺍ ﺑﺎﻗﻲ ﻟﻲ ﻣﺠﺮﻡ ﻣﺠﺮﻡ
_ ﺍﻗﺴﻢ ﺑﺎﻟﻠﻪ ﻣﻦ ﺷﻔﺘﻮ ﺳﺎﻱ ﻣﺎ ﺍﺭﺗﺤﺖ ﻟﻴﻬﻮ ﻭﻛﻠﻤﺖ ﺳﺠﻢ ﺍﻟﺮﻣﺎﺩ ﺯﻋﻞ ﻣﻨﻲ ﻭﺍﺗﻀﺎﻳﻖ ﻣﻦ ﻛﻼﻣﻲ ﻓﻮﻗﻮ ﻭﻗﺮﺏ ﻳﺸﺎﻛﻠﻨﻲ
_ ﻻ ﻻ ﻭﺍﻟﻠﻪ ﻣﺎ ﻛﻮﻳﺲ ﺍﻧﺎ ﻣﺎ ﺍﺗﻮﻧﺴﺖ ﻣﻌﺎﻫﻮ ﻛﺘﻴﺮ ﻟﻜﻦ ﻣﺎ ﺭﺩﺗﻮ ﻧﻬﺎﺋﻲ ﻭﺳﻌﻠﺘﻮ ﻋﺮﻑ ﺍﻟﻔﻀﻞ ﺩﺍ ﻛﻴﻒ ﻭﻭﻳﻦ ﻣﺎ ﻭﺭﺍﻧﻲ ﻗﺎﻝ ﻟﻲ ﺍﺳﻌﻞ ﺍﻟﻔﻀﻞ . ﻳﺎﺥ ﺍﻟﻔﻀﻞ ﺍﻧﺎ ﺍﻋﻤﻰ ﻣﻨﻮ ﻭﺍﻧﺎ ﺳﻌﻠﺘﻚ ﺍﻧﺖ ﺗﻘﻮﻝ ﻟﻲ ﺍﺳﻌﻞ ﺍﻟﻔﻀﻞ ؟ ﻭﺃﺑﻰ ﻳﻮﺭﻳﻨﻲ ﺷﻐﺎﻟﻴﻦ ﺷﻨﻮ
_ ﺍﻟﻔﻀﻞ ﻓﺎﻳﺖ ﻣﻌﺎﻫﻮ
_ ﻓﺎﻳﺘﻴﻦ ﻭﻳﻦ ﻗﺎﻝ ؟
_ ﻣﺎ ﻋﺎﺭﻑ ﻟﻜﻦ ﺍﻟﻔﻀﻞ ﺩﺍ ﺯﻱ ﺍﻟﻤﺎ ﻳﺎﻫﻮ ﻣﺎ ﻳﺎﻫﻮ ﻭﺩﺍﺳﻲ ﻣﻨﻨﺎ ﺷﻲ ﻛﻌﺐ
_ ﺩﺍ ﻛﻼﻡ ﺷﻨﻮ ؟ ﻗﺎﻝ ﻟﻴﻚ ﺷﻨﻮ ﻫﻮ ؟
_ ﻫﻮ ﻗﺎﻝ ؟ ﺗﺮﺍ ﻗﻌﺪ ﻳﺘﺰﺍﻭﻍ ﺯﻱ ﺻﺎﺣﺒﻮ ﺍﻟﻜﺮﻳﻪ ﺩﺍ ﻟﻜﻦ ﻣﺎ ﺑﺨﻠﻴﻬﻮ ﺍﻧﺎ ﻭﺑﻜﺮﺓ ﻛﺠﺎﻣﻮ ﺩﺍ ﺑﻜﺠﻤﻮ ﻟﻴﻬﻮ ﻭﺍﻟﻠﻪ ﺍﻧﺖ ﺍﻣﺶ ﻧﻮﻡ ﻭﺑﺎﻛﺮ ﺗﻌﺎﻝ ﺳﻮﻕ ﻟﻲ ﺍﻟﻔﻀﻞ ﺍﻣﺸﻮﺍ ﺍﻟﻔﺮﻳﻖ ﺩﺍﻙ ﻭﺍﻧﺎ ﺑﻨﻈﻢ ﻟﻴﻚ ﺻﺎﺣﺒﻮ ﺩﺍ
_ ﺩﺍﻳﺮ ﺗﻌﻤﻞ ﺷﻨﻮ ؟ ﺍﻭﻋﻰ ﺗﻜﺒﺮﻭ ﺍﻟﺰﻭﻝ ﺿﻴﻔﻚ
_ ﺍﻛﺒﺮﻭ ﺷﻨﻮ ﻳﺎﺥ ﺍﻧﺖ ﺑﺘﺒﺎﻟﻎ ؟ ﻳﻠﻼ ﺍﻣﺶ ﻧﻮﻡ ﺍﻧﺎ ﺯﺍﺗﻲ ﻧﻌﺴﺖ ﺑﺲ ﺑﻜﺮﺓ ﺯﻱ ﻣﺎ ﻗﻠﺖ ﻟﻴﻚ
ﺍﻟﺼﺒﺎﺡ ﺑﻌﺪ ﺍﻟﻔﻄﻮﺭ ﺍﻟﻤﺮﺿﻲ ﺳﺎﻕ ﺍﻟﻔﻀﻞ ﻓﺎﺗﻮﺍ ﻓﺮﻳﻖ ﻭﺭﺍﺀ ﻭﺍﻟﻔﺎﺗﺢ ﺳﺎﻕ ﻛﺠﺎﻡ ﺍﻟﺤﻮﺍﺷﺔ ﻗﺎﻝ ﻟﻴﻬﻮ ﻭﺭﺡ ﺷﻮﻑ ﺍﻟﺰﺭﺍﻋﺔ ﺣﻘﺘﻨﺎ ﻛﻴﻒ ﻭﺳﺎﻗﻮ ﺑﻜﺮﻋﻴﻬﻮ ﺳﺎﻱ ﻭﺍﺗﻈﻮﺭﻑ ﻣﻌﺎﻫﻮ ﺷﺪﻳﺪ ﻟﻤﻦ ﻛﺠﺎﻡ ﺍﺭﺗﺎﺡ ﻟﻴﻬﻮ ﻭﻓﻲ ﺍﻟﺤﻮﺍﺷﺔ ﺳﺄﻟﻮ
_ ﻳﺎﺧﻲ ﻣﺎ ﻭﺭﻳﺘﻨﻲ ﺷﻐﺎﻟﻴﻦ ﺷﻨﻮ ﻓﻲ ﺍﻟﺒﻨﺪﺭ؟
_ ﺍﻟﻔﻀﻞ ﻣﺎ ﻭﺭﺍﻙ ؟
_ ﻋﺎﺩ ﺃﻛﺎﻥ ﻭﺭﺍﻧﻲ ﺳﻌﻠﺘﻚ ؟ ﻭﺍﻧﺎ ﺯﺍﺗﻲ ﻣﺎ ﺳﻌﻠﺘﻮ
_ ﺷﻐﺎﻟﻴﻦ ﻓﻲ ﺷﺮﻛﺔ ﺍﺳﺘﻴﺮﺍﺩ ﻭﺗﺼﺪﻳﺮ
_ ﺑﻴﻊ ﻭﺷﺮﺍﺀ ﻳﻌﻨﻲ ؟ ﺍﻫﺎ ﺑﺘﺒﻴﻌﻮﺍ ﺷﻨﻮ
_ ﺑﻨﺒﻴﻊ ﺍﻱ ﺷﻲ ﻋﺮﺑﺎﺕ ﺑﻀﺎﻋﺔ ﺍﻱ ﺷﻲ
_ ﻣﺎ ﻋﻨﺪﻛﻢ ﺷﻲ ﻛﺪﺍ ﻣﺤﺪﺩ ؟
_ ﻻ ﻻ
_ ﻳﺎﺥ ﺍﻧﺖ ﻛﻀﺎﺏ ﻻﻧﻮ ﺍﻟﻔﻀﻞ ﻣﺎ ﻗﺎﻋﺪ ﻳﺪﺱ ﻣﻨﻲ ﺣﺎﺟﺔ ﻭﻭﺭﺍﻧﻲ ﻛﻞ ﺷﻲ
_ ﻃﻴﺐ ﻟﻮ ﻭﺭﺍﻙ ﺳﺄﻟﺘﻨﻲ ﻟﺸﻨﻮ ؟
_ ﺳﻤﺢ ﺍﻟﻜﻼﻡ ﻓﻲ ﺧﺸﻢ ﺳﻴﺪﻭ ﻋﺸﺎﻥ ﻛﺪﺍ ﻗﻮﻝ ﺳﺎﻱ ﻭﺳﺮﻛﻢ ﻓﻲ ﺑﻴﺮ
_ ﺳﺮ ﺷﻨﻮ ﻭﺑﻴﺮ ﺷﻨﻮ ؟
_ ﺍﻧﺘﻮ ﺷﻐﺎﻟﻴﻦ ﺗﻬﺮﻳﺐ ﺻﺎﺡ ؟ ﻭﻧﺎﺱ ﻣﺠﺮﻣﻴﻦ ﻭﺍﻻﺟﺮﺍﻡ ﻇﺎﻫﺮ ﻓﻲ ﻭﺷﻚ ﻋﺸﺎﻥ ﻛﺪﺍ ﺍﺣﺴﻦ ﻟﻴﻚ ﺗﻌﺘﺮﻑ
_ ﺍﺣﺴﻦ ﻟﻲ ؟ ﺩﺍ ﺗﺤﻘﻴﻖ ﻭﻟﻼ ﺷﻨﻮ ؟ﻫﺴﻲ ﺍﻧﺖ ﺟﺎﻳﺒﻨﻲ ﻣﻦ ﻫﻨﺎﻙ ﻋﺸﺎﻥ ﺩﻱ ؟
_ ﻭﺍﻟﻠﻪ ﻣﻦ ﺷﻔﺘﻚ ﺳﺎﻱ ﻣﺎ ﺭﺩﺗﻚ ﻳﺎﺥ ﻭﻟﻮ ﻣﺎ ﺿﻴﻒ ﻭﺍﻟﻠﻪ ﺃﻛﺎﻥ ﻃﺮﺩﺗﻚ ﻭﺍﻟﻔﻀﻞ ﻣﺎ ﻗﺎﻝ ﻟﻲ ﺃﻱ ﺣﺎﺟﺔ ﺑﺲ ﺷﺎﻛﻲ ﻓﻴﻚ
_ ﻭﺍﻟﻤﻄﻠﻮﺏ ﻣﻨﻲ ﺷﻨﻮ ﻫﺴﻲ ؟
_ ﺗﻌﺘﺮﻑ ﻭﺗﻘﺮ ﻭﺗﻮﺭﻳﻨﻲ ﺍﻱ ﺷﻲ
_ ﺍﻧﺎ ﺭﺍﺟﻊ ﺍﻟﺒﻴﺖ ﻣﺎ ﻋﺎﻭﺯ ﻣﻌﺎﻙ ﻛﻼﻡ
_ ﻣﺎ ﻋﻠﻲ ﻛﻴﻔﻚ
_ ﺩﺍﻳﺮ ﺗﺪﻗﻨﻲ ﻭﻟﻼ ﺷﻨﻮ ﻳﺎ ﺍﻟﻔﺎﺗﺢ ؟
_ ﻭﺍﻟﻠﻪ ﻓﻜﺮﺕ ﻓﻴﻬﺎ ﻭﻣﺎ ﻏﺎﻟﺒﻨﻲ ﺑﺲ ﻣﺎ ﺩﺍﻳﺮ ﺍﻟﻔﻀﻞ ﻳﺰﻋﻞ . ﺍﻟﻤﻬﻢ ﺍﻧﺎ ﻣﺎ ﻋﻨﺪﻱ ﺷﻐﻠﺔ ﺑﻴﻚ ﻭﺷﻐﻠﺘﻲ ﺑﺎﻟﻔﻀﻞ ﺍﺧﻮﻱ ﻭﺍﻟﻠﻪ ﺍﻟﻌﻈﻴﻢ ﺗﻄﻠﻌﻮﺍ ﻧﺎﺱ ﻣﺠﺮﻣﻴﻦ ﻭﺍﻟﻔﻀﻞ ﺩﺍ ﺗﺠﻴﻬﻮ ﺣﺎﺟﺔ ﻋﻼ ﺍﻋﺪﻣﻜﻢ ﺍﻟﻨﻔﺮ ﻭﺍﻟﻨﻔﺲ ﺍﻧﺖ ﻭﺍﻟﻤﻌﺎﻙ
_ ﻳﺎ ﺯﻭﻝ ﻣﺎ ﺗﻬﺪﺩﻧﻲ
_ ﻭﺍﻟﻠﻪ ﺍﻫﺪﺩﻙ ﻭﺍﻫﺪﺩ ﻣﻴﺔ ﺯﻳﻚ . ﻧﺤﻦ ﻧﺎﺱ ﺩﻏﺮﻳﻴﻦ ﻣﺎ ﺑﻨﻠﻒ ﻭﻻ ﺑﻨﺪﻭﺭ ﻭﻻ ﺑﻨﺨﺎﻑ ﻭﺯﻱ ﻣﺎ ﻗﻠﺖ ﻟﻴﻚ ﺑﺲ ﻣﺎ ﺗﻄﻠﻌﻮﺍ ﻣﺠﺮﻣﻴﻦ ﻋﺸﺎﻥ ﺑﺘﺘﻌﺒﻮﺍ ﻣﻌﺎﻱ ﻭﻛﻼﻣﻲ ﺩﺍ ﻣﺎ ﺗﻮﺭﻱ ﺑﻴﻬﻮ ﺍﻟﻔﻀﻞ
_ ﻳﺎ ﺯﻭﻝ ﺍﻧﺖ ﻣﺎ ﻧﺼﻴﺢ ﻭﻟﻼ ﺷﻨﻮ ﻗﻠﺖ ﻟﻴﻚ ﺗﺠﺎﺭ ﻋﺮﺑﺎﺕ ﻧﺤﻦ . ﻭﻟﻮ ﻣﺎ ﻣﺼﺪﻗﻨﻲ ﻭﺧﺎﻳﻒ ﻋﻠﻲ ﺍﺧﻮﻙ ﺃﺗﻜﻠﻢ ﻣﻌﺎﻫﻮ ﻫﻮ ﻣﺎ ﻣﻌﺎﻱ ﺍﻧﺎ
_ ﺍﺧﻮﻱ ﻗﺎﻝ ﻣﺎﺷﻲ ﻣﻌﺎﻙ ﻭﺑﻤﺶ ﻣﻌﺎﻙ ﺍﻧﺎ ﻣﺎ ﺑﻘﺪﺭ ﺍﺣﻤﻴﻬﻮ ﺑﺲ ﻭﺭﻳﺘﻚ ﺍﻟﻌﻨﺪﻱ ﻋﺸﺎﻥ ﺗﻜﻮﻥ ﻋﺎﺭﻑ ﻭﻣﻦ ﻫﺴﻲ ﻟﻮ ﻣﺠﺮﻣﻴﻦ ﻗﻮﻝ
_ ﻳﺎﺥ ﻣﺠﺮﻣﻴﻦ ﻋﺪﻳﻴﻴﻴﻞ ﻭﺍﻟﺪﺍﻳﺮ ﺗﻌﻤﻠﻮ ﺍﻋﻤﻠﻮ ﻭﺍﻧﺎ ﺯﺍﺗﻲ ﻣﺎ ﻗﺎﻋﺪ ﻟﻴﻚ ﻭﺍﻟﻠﻴﻠﺔ ﺩﻱ ﻓﺎﻳﺖ
_ ﻗﻄﺮ ﻭﺩ ﻋﺠﻴﺐ
_ ﺷﻜﺮﺍ ﺑﺲ ﺍﻣﺴﻚ ﺍﻟﻔﻀﻞ ﺃﺧﻮﻙ ﻻﻧﻮ ﻟﻮ ﻣﺸﻰ ﻣﻌﺎﻱ ﺍﻧﺎ ﻣﺎ ﻣﺴﺆﻭﻝ ﻋﻨﻮ ﺃﻛﺎﻥ ﺍﻧﻘﺒﺾ ﻭﻟﻼ ﺍﻧﺴﺠﻦ ﻭﻟﻼ ﺍﻧﻘﺘﻞ ﻭﻧﺤﻦ ﻧﺎﺱ ﻣﺨﺪﺭﺍﺕ ﻋﺸﺎﻥ ﺗﻜﻮﻥ ﻋﺎﺭﻑ ﻣﻦ ﻫﺴﻲ ﻭﻣﺎ ﺗﻘﻮﻝ ﺧﺎﻳﻒ ﻣﻨﻚ ﻭﺟﻌﺎﻛﺎ ﺍﻟﺒﻴﺖ
ﻭﺭﺟﻌﻮﺍ ﺍﻟﺒﻴﺖ

#سجم_الرماد 15

مجاهد يوسف

في الطريق للبيت الفاتح سارح ويفكر في الفضل اخوهو الدخلو شنو مع الناس ومالو ومال العصابات والاجرام وهسي الخرطوم القالوا كبيرة خلاس دي ما لقى شغل فيها غير الشغل الكعب دا ؟ لا لا الفضل ما بعمل كدا انا بعرفو كويس احتمال الخليقة دا كضب علي ، لكن الجابرو شنو علي الكضب ؟ احسن حاجة انا ادق الحيوان دا لمن يقول الحقيقة . بس ادقو كيف وهو ضيف اخوي ولو فعلا مجرم الفضل ما بجيبو البيت ولا بشتغل معاهم ، لكن بس ..
يا كجام انا بدور اسعلك لكن دايرك توريني بالجد وما تكضب علي وتحلف لي قبال تجاوب
_ أسأل
_ احلف قول لي اقسم بالله ما اكضب عليك
_ اشوف السؤال اول . احلف ليك ساي ؟
_ الفضل اخوي قبال يشتغل معاكم عارفكم بتاعين مخدرات ومجرمين ؟
_ لا لا ما عارف حاجة
_ بعد عرفكم قال شنو ؟
_ ما قال شي
_ كيف ما قال شي ؟ الفضل ما بسوي المي ياها ولا بضر زول دا اخوي وانا اكتر زول عارفو
_ القروش بتغير الما بتغير
_ قروش الحرام ؟ وهي وينها القروش دي ما شفت عندو شي وهو جاء اباطو والنجم
_ ياخي زول اشتغل ليهو شهرين دايرو يجي يطلع القروش ؟ الناس ديل بستغربوا وبشكوا فيهو
_ انت كضاب . الفضل ما شغال معاكم ولا بفوت معاك
_ قبيل قلت ليك امسك اخوك ، ياخي تاني ما تتكلم معاي في الموضوع نحن وصلنا البيت خلاس اقفلو واسكت الداير تعرفو وريتك ليهو كلو فما تجيب لينا هواء ساي

المرضي والفضل جوا من الفريق داك يتضاحكوا وقاعدين في الديوان واول ما ديل دخلوا المرضي ساق الفاتح برة وقال ليهو ارح جيب معاي الفطور من بيتنا وهو داير يسألو عمل شنو مع كجام والفاتح وراهو كلام كجام كلو
_ الفضل ما بسوي كدا آ الفاتح والزول دا كضاب
_ الجابرو شنو يكضب علي
_ حلف ؟
_ أنا قلت ليهو احلف لكن ما حلف بس المجرمين ديل الحليفة عادي عندهم ما بخافوا الله
_ والراي ؟
_ الراي سجم الرماد يختاهم بس من هسي قبال يتورط معاهم في شي
غايتو لو كتلني ما بخليهو يفوت معاهو
_ وانا زاتي معاك

كجام قال الفضل وريت الفاتح
_ وريتو بشنو ؟
_ بشغلنا كلو ما دسيت منو شي
_ ليه بس وريتو ياخ
_ احسن ما صغير عشان لو حصل لينا شي يكون عارف ما يتفاجأ
_ اقسم بالله خربت اي شي ولو كلم ابوي ما بخليني افوت تاني والله يضبحني شخخخخخ انت ما بتعرف اهلي ديل
_ خلاس خليك وانا عملت كدا عشان ما تفوت معاي
_ انا بمشي والله ولا بخلي الوهم ديلك
_ الوهم منو ؟
_ كلهم الفي الخرطوم ما بخليهم من القانوني لحدي اصغر زول فيهم
_ انت لسة في البر احسن ليك تقعد مع اهلك ديل وتفارق دربنا لا بتقدر تمشي فيهو ولا ينفع معاك
_ بتشوف

الفضل مرق لقى الفاتح والمرضي برة واقفين يتكلموا قال ليهم في شنو الفاتح قال ليهو في مصايب آ الفضل والله اريتك أكان ما مشيت البندر انا زولك دا وراني كل شي ومن الحلة دي تاني ما بتفوت
_ انت قايلني انا صغير وللا شافع ؟
_ ماك شافع لكن جاهل الدرب دا كلو دمار وآخرتو ندامة وقروشو حرام وذنبو ما بروح ولا بنغفر استغفر الله
_ انا اتبلبلتا والبتبلبل بعوم
_ ما بخليك تعوم لانك غرقان غرقان
_ البغرق دا زول طيرة ساي وانا راجع مع الزول دا وخشمك عندك
_ انا بوري ابوي
_ اووووعك توريهو قسما بالله تكلمو اطش وتاني ما اعود صاد لو شنو داك

المرضي قال ليهو لكن آ سجم الرماد الكلام دا ما صاح ولا نحن بنخليك تفوت علي الدرب اللعوج ونقعد نعاين ليك ، ها زول شن بتدور بي مال الحرام آ زول ؟ هسي عليك الله الناقصك شنو ما تعجبك حياة البنادر ساكت والمكيفات والمرواح والله انبطاحة فوق النيمة هيلتكم دي وبالك رايق وطرقة كسرة بموية مع الحبات ابرك من الدنيا وما فيها
_ انتو هسي بتنضموا وماكم عارفين حاجة ساكت ، ما انا العندي شغلة بالحرام ولا بدور حق الحرام علا بليت لي حوض وبلخو بلخو
_ يمين تتلكك لاضنيك وتبقى في البمرقك وما تلقاهو
_ انا قررت خلاس ومفارق مفارق آ المرضي وامسك الفاتح اخوي دا واختوني خلوني اكمل البديتو
_ إن بقيت كدي الحجل بالرجل والببقى عليك يبقى علينا معاك انا والفاتح اللتنين بنمشي معاك
_ ماك نصيح . والحواشات والبيوت ؟
_ ما بتجيهن عوجة الحواشات ما بتسرق والبيوت محروسة
_ والله كراعكم ما ترفعوها معاي
_ يا نقنب كلنا يا نفوت كلنا

ابوهم جاء لقاهم ينضموا قال ليهم في شنو آ وليدات مالكم متلمين هنا كدا وبتقولوا في شنو وماشين وين ؟
الفضل قعد يتمتم وقال ليهو لا لا م مافي شي ورحكم علي الضيف
_ تعال يا الفضل دايرك
الفضل حمر في الفاتح والمرضي وصرا ليهم وشو وفات مع ابوهو
قعدو في الاوضة جوة مع انو وقال ليهو من يوم مشيت من هنا لحدي ما جيت وريني سويت شنو ودا منو الزول المعلم دا وجايبوا لشنو هنا وشغال شنو
الفضل كضب علي ابوهو وقال ليهو دا صاحبي وشغالين في شركة حقت بترول تبع الحكومة ونقلونا الغرب والشغل يبدأ بعد كم يوم جيت قلت اعديهن معاكم هنا في البيت وقال ليهو كجام دا مهندس وفات منهم
ابوهو قال لانو الفضل كضب علي ما وراني الصاح قالت ليهو انا ما بعرفو لكن الجنى دا من فات جانا ما ياهو

العصر بعد اتغدوا كجام والفضل اتخارجوا من الحلة وحلف علي الفاتح والمرضي ما يباروهو ولا عندهم شغلة بيهو وهددم بانو بطش وما بجي راجع تاني ان ما خلوهو براحتو
وفات
رجعوا الخرطوم خلوها الساعة عشرة بالليل وكجام اتصل علي واحد صاحبو فاتوا عليهو قعدوا ليهم يومين من البيت ما مرقوا لمن جاهم عباس وقال ليهم سليمان عندو بضاعة بتخش بكرة بالليل وهشام ناوي عليها وعمل ليهم كمين بشرطة وهمية
الفضل قال ليهو كيف شرطة وهمية ؟
قال ليهو يقبضوهم عديييل ويدوهم فرصة يهربوا ويشيلوا البضاعة وديل بحمدوا الله انهم مرقوا وبعملوا رايحين خوف من ناس الشرطة والبضاعة بشيلها هشام
قال ليهو والكمين وين ومتين
عباس قال ليهو بكرة بالليل قلت ليك ،
الفضل قال لعباس دايرك توديني الثورة للمحل الركبت معاك منها يومداك وكجام قال ليهو ما تمش عشان هشام كايس ليك واكيد براقب حاتم . الفضل اقنعو انو يومين تلاتة وبجي ومن غرفة حاتم ما بمرق وفات معاهو
في الطريق ظبط امورو مع عباس ووعدو بقروش كتيرة اصلا عارفو زول مصلحجي بس ووراهو كل شي عن البضاعة حتى الكمية الفيها ووراهو بالواضح انو داير يخدم بيها سليمان .
بعد وصلوا غرفة حاتم الفضل اتصل علي سليمان وغير صوتو وقال ليهو هشام ناوي كيت وكيت وكيت وانا البدخل ليك بضاعتك دي
سليمان قال ليهو انت منو؟
الفضل قال ليهو انا ابو رجيلة ووراهو كل شي عن بضاعتو دي حتى العربية الفيها واسم الضابط الداير يدخلها ليهو
سليمان اول مرة يتكلم مع ابورجيلة وعارفو لو داير يشيل البضاعة كلها بشيلها وقال احسن يتعاون معاهو وقال ليهو داير اقابلك وين اجيك
قال ليهو ما بتقابلني لكن برسل ليك زول بعرفك وبتعرفو كويس بكرة وهو بتفاهم معاك وقفل الخط
سليمان احتار في الزول دا كيف عرف العملية دي ومنو الزول البعرفو كويس البرسلو لي دا

الفضل قعد يومو داك مع حاتم وأحمد ونسة وضحك واليوم التاني اتصل علي عباس قال ليهو تعال لي دايرك وعباس جاهو ركب وفات معاهو لسليمان

يتبع ....

تم الإرسال من خلال التطبيق Topic'it