قبيل الريسه لى ابراى ود قبايل وفاهم....
والفارس البصد خطر العوادى الداهم....
هسى اتبدل الحال فى زمنا الواهم....
بقت الريسه للمال والمعزه دراهم....
رجالا كانو روس فى القوم وكانو القاده...
وكانو بخرقو فى العركه ام صليل العاده....
هسع ضاعت امجاد البنولها امجاده....
بعد ما اتريس المال المجالس وساده......
الا تراها ريسه زيف على الا تباع....
وتبقى الضبعه ضبعه والاسوده سباع....
بير الهوره يبااااااااس والحجر نباع.....
والعز والشرف لا مشرى لا بتباع......

.

دايرين زى نفوسنا بلدنا تبقى نضيفه...
قدام بيتنا نكنسو ندى رشه خفيفه...
نسولنا كيس نفايات ولا حتى قفيفه...
تبقى بلدنا ترقش و وش ترابها قطيفه...
شباب الحله فرسانها وقيادات جيلا...
فى القرى والمداين كل فريق وقبيله...
نتلم واى خطه نسوى ليها بديلا...
نتافق. ننضف. والبتبقى عديله...
داير ادعوكم اسع امر عاجل وهام..
باكر من دغش نرفع جميعنا تمام...
نرتقى بى فهما وبى سلوكنا العام...
عشان سودانا يطور وامش قدام...

الكايس الدقيق فى الشوك اميرو انحله...
وانفكن عقد قانص الوهيطه وجلا...
علا آمجدى اخوك تقيلتو ابت تنقلا...
الله يقولا قومى تقولو ابيت يا الله....
الناقه الشكيتلا همومى سال دماعا...
والشايله الخلق ضاقتبى رغم وساعه...
على ضهرى ام قدود يا تومى خاته اوجاعه...
بقيت اتمنى يا مصعب قيام الساعه....
البلد القبيل بعرف مرادتى صعيدا....
ابت ما تمد لى وانا فى الهواير ايدا...
الا ترانى فوق عهدى القبيل ياسيدا....
متجزم اخت عقد الشرف فوق جيدا...

بحر النمه والموج البياكل جرفو...
ريح الصرصر البشرط مداخل كرفو...
وسمك فى القصيد اعمى البصيره بعرفو...
دفق يا ابنعوف خلى البقيه يغرفو....
بتعرفنى الخنادق ومدفعا الرجام...
ما بقودونى من رسنى ويسولى لجام...
انا الصقر البخوى من السما وهجام...
سمعت العرب من نضمى والعجام...
رفيق الخيبه يا التابع سواطة الطالح....
فرقا" شتى بين (العير)وناقة صالح....
بعد ماقالو اهل العرفه جرق وفالح....
الماعاجبو يشرب من لجاجة المالح

قصائد. محمد.الحسن.ابن.عوف