ﻣُﻨﺎﻱ ﻓﻲ ﺍﻟﺪﻧﻴﺎ ﺳُﺘﺮﺓ ﻭﺑﻴﺖ ..
ﻭﺃﺻﻞ ﺍﻟﺒﻴﺖ ﺣﻨﺎﻥ ﻭﺃﻣﺎﻥ .. ﻣﻮﺩﺓ ﻭﺭﻳﺪ
ﻣﺤﺎﻝ ﺍﻟﺒﻴﺖ ﻳﻜﻮﻥ ﺑﺲ ﻃﻴﻦ .. ﻭﺯﻧﻜﻲ
...
ﻭﺣﻴﻂ
ﻭﻻ ﻣﻤﻜﻦ ﻳﻜﻮﻥ ﺳﻜﺮ ﻭﺻﻠﺼﺔ ﻭﺯﻳﺖ
ﻛﻼﻡ ﺍﻟﺒﻴﺖ ﻛﻼﻡ ﺗﺎﻧﻲ .. ﻛﻼﻡ ﺇﺣﺴﺎﺱ
ﻣﻘﺪﺱ ﻭﺷﺮﻉ ﺭﺑﺎﻧﻲ
ﻭﺭﻳﺪ ﺇﻧﺴﺎﻥ ﻋﺰﻡ ﻭﺇﺧﺘﺎﺭ
ﻓﺘﺢ ﺑﺎﺏ ﻗﻠﺒﻮ ﻟﻤّﺎﻧﻲ .. ﺑﻨﻲ ﺍﻟﻌﺶ
ﺍﻟﺼﻐﻴﺮ ﻃﻤّﻨﻲ ﺁﻭﺍﻧﻲ
٭ ٭ ٭ ٭
ﺑﻴﻮﺕ ﺍﻟﺪﻧﻴﺎ ﻣﺨﺘﻠﻔﺎﺕ ﻭﻣﺎ ﻛﻞ ﺍﻟﺒﻴﻮﺕ
ﻭﺍﺣﺪ
ﻓﻲ ﺑﻴﺖ ﺩﺍﺍﺍﺍﻓﻲ .. ﻭﺑﻴﺖ ﺑﺎﺍﺍﺍﺭﺩ
ﻭﺑﻴﺖ ﻋﻤﺮﺍﻥ ﻫﻮﻯ ﻭﺗﺤﻨﺎﻥ .. ﻭﺑﻴﺖ
ﺟﺎﻣﺪ
ﺑﻴﻮﺕ ﻣﻠﻴﺎﻧﺔ ﻓﺮﺣﺔ ﻭﺣﺐ
ﻭﺧﻴﺮ ﻭﺃﻣﺎﻥ
ﺑﻴﻮﺕ ﻋﺪﻣﺎﻧﺔ ﻣﻦ ﺍﻟﻮﺩ ..
ﺯﻣﻦ ﻣﺴﻜﻮﻧﺔ ﺑﺎﻷﺣﺰﺍﻥ
ﺑﻴﻮﺕ ﺯﺍﺍﺍﺍﻫﻴﺔ .. ﻭﺑﻴﻮﺕ ﻭﺍﺍﺍﺍﻫﻴﺔ
ﺑﻴﻮﺕ ﺗﺪﻳﻚ ﺳﻼﻡ ﻭﺃﻣﺎﻥ
ﻋﺸﺎﻥ ﻓﻴﻬﺎ ﺍﻟﻨﻔﻮﺱ ﺻﺎﻓﻴﺔ .. ﻭﻓﻴﻬﺎ
ﺍﻟﺘﻘﻮﻯ ﻭﺍﻹﻳﻤﺎﻥ
٭ ٭ ٭ ٭
ﺑﻴﻮﺕ ﻣﺘﺮﻭﺳﺔ ﻣﺎﻝ ﻭﺇﺛﺎﺙ
ﻭﺧﺎﻟﻴﺔ ﻣﻦ ﺍﻷﻣﻞ ﻭﺍﻟﻨﺎﺱ
ﺑﻴﻮﺕ ﻻ ﻟﻤﺒﺔ ﻭﻻ ﺑﻮﺗﺠﺎﺯ
ﻭﻧﺎﺳﺎ ﻟُﻄﺎﺍﺍﺍﺍﻑ ﺣُﻨﺎﻥ ﻭﻟُﺬﺍﺫ
ﻓﻲ ﺑﻴﺖ ﻋﺎﺍﺍﺍﻟﻲ ﻭﺣﻮﺷﻮ ﻛﺒﻴﺮ
ﻭﺳﻴﺪﻭ ﻭﺯﻳﺮ ﺧﻴﺮﻭ ﻭﻓﻴﺮ
ﻭﻟﻴﻬﻮ ﻏﻔﻴﺮ .. ﻭﺑﻴﺖ ﻣﻦ ﻃﻴﻦ
ﻓﻲ ﺭﺍﻛﻮﺑﺘﻮ ﺑﺲ ﻓﺪ ﺯﻳﺮ
ﻭﺭﻏﻢ ﺍﻟﺴﺎﻛﻨﻮ ﺯﻭﻝ ﻣﺴﻜﻴﻦ
ﺑﺲ ﺣﻘﺎﻧﻲ ﻋﻨﺪﻭ ﺿﻤﻴﺮ .. ﺑﻴﻮﺕ ﺍﻟﺒﻬﺠﺔ
ﻋﻨﻮﺍﻧﺎ ..
ﻭﻃﻮﻝ ﺍﻟﻴﻮﻡ ﺿﺤﻚ ﻭﻫﺰﺍﺭ
ﻭﺑﻴﻮﺕ ﻃﻮﺍﻟﻲ ﺣﺮﻗﺎﻧﺔ
ﻣﻮﻟﻌﺔ ﺯﻱ ﺗﻘﻮﻝ ﻣﻦ ﻧﺎﺭ
ﺑﻴﻮﺕ ﺑﺘﺮﺍﻋﻲ ﺣﻖ ﺍﻟﺠﺎﺭ .. ﻭﻓﻴﻪ ﻣﻦ
ﺍﻟﺨﻴﺎﺭ ﺃﺧﻴﺎﺭ
ﺑﻴﻮﺕ ﻻ ﺑﺘﻌﺮﻑ ﺍﻟﺠﻴﺮﺍﻥ ..
ﻭﻻ ﺑﺘﺴﺘﻄﻠﻊ ﺍﻷﺧﺒﺎﺭ
ﺑﻴﻮﺕ ﺗﻤﻠﻴﻚ .. ﺑﻴﻮﺕ ﺇﻳﺠﺎﺭ
ﻭﻣﺎﺍﺍﺍﺑﺘﻠﻘﺎﻫﺎ ﺑﺎﻟﻬﻴﻦ .. ﻭﻻﺯﻡ ﺗﻜﺮﻡ
ﺍﻟﺴﻤﺴﺎﺭ
ﻭﺷﻮﻑ ﻓﻲ ﺳﻜﺘﻚ ﻛﻢ ﺑﻴﺖ .. ﻭﻓﻲ ﻛﻞ
ﺍﻟﺒﻴﻮﺕ ﺃﺳﺮﺍﺭ
٭ ٭ ٭ ٭
ﻭﻓﻲ ﺑﻴﺖ ﻣﺴﻜﻮﻥ .. ﻭﺑﻴﺖ ﻓﺎﺿﻲ ..
ﻭﺑﻴﺖ ﺟﺎﺣﺪ .. ﻭﺑﻴﺖ ﺭﺍﺿﻲ
ﻭﺑﻴﺖ ﻣﺸﻜﻠﺘﻮ ﻣﻌﺮﻭﻓﺔ
ﻭﻭﺻﻠﺖ ﻣﺤﻜﻤﺔ ﻭﻗﺎﺿﻲ .. ﻋﺸﺎﻥ
ﻋُﺸﺮﺓ ﺳﻨﻴﻦ ﻫﺎﻧﺖ
ﻭﻛﻞ ﻭﺍﺣﺪ ﺑﻘﻰ ﻓﻲ ﻭﺍﺩﻱ .. ﻭﻓﻲ ﺑﻴﺖ
ﺣﺪﺍﺩﻱ ﻣﺪﺍﺩﻱ
ﺑﺲ ﻣﺎﻓﻴﻬﻮ ﻏﻴﺮ ﺇﺗﻨﻴﻦ .. ﻭﺑﻴﺖ ﻣﻠﻴﺎﺍﺍﺍﻥ
ﺗﻘﻮﻝ ﻧﺎﺩﻱ
٭ ٭ ٭ ٭
ﻭﻓﻲ ﺑﻴﺖ ﺳﻜﺎﻧﻮ ﻣﺘﺂﻟﻔﻴﻦ .. ﻋﻠﻰ ﺍﻟﺤﻠﻮﺓ
ﻭﻋﻠﻰ ﺍﻟﻤُﺮﺓ
ﻭﺑﻴﺖ ﺳﻜﺎﻧﻮ ﻣﺨﺘﻠﻔﻴﻦ .. ﻣﺎ ﺑﺘﻔﻘﻮﺍ
ﺑﺎﻟﻤﺮّﺓ
ﻭﺑﻴﺖ ﺳﺘﻮ ﻣﺮﺓ ﺿﻴﻔﺎﻥ .. ﻣﺮﺓ ﺳُﺘﺮﺓ
ﻣﺎ ﺑﺘﺴﺘﺎﻫﻞ ﺍﻟﻬﺠﺮﺍﻥ .. ﻭﻻ ﺑﺘﺴﺘﺎﻫﻞ
ﺍﻟﻀﺮﺓ
ﺑﻴﺖ ﺳﺘﻮ ﺩﻭﺍﻡ .. ﺑﺘﺒﺎﺭﻱ ﻓﻲ ﺍﻟﻨﺴﻮﺍﻥ
ﻻ ﺑﺘﻌﺮﻑ ﺗﻜﺮﻡ ﺍﻟﻀﻴﻒ .. ﻭﻻ ﺑﺘﻮﺭِّﻕ
ﺍﻟﺨُﺪﺭﺓ
٭ ٭ ٭ ٭
ﻭﻓﻲ ﺑﻴﺖ ﻣﺤﺮﻭﻡ ﻣﻦ ﺍﻷﻃﻔﺎﻝ
ﻣﻦ ﺿﺤﻜﺔ ﻋﻴﻮﻥ ﺣﻠﻮﻳﻦ
ﻭﻛﻞ ﻳﻮﻡ ﻧﺎﺳﻮ ﻋﻨﺪ ﺩﻛﺘﻮﺭﻛﺒﻴﺮ .. ﺃﺗﻌﺎﺑﻮ
ﺑﺎﻟﻤﻼﻳﻴﻦ
ﻭﺑﻴﺖ ﺃﻃﻔﺎﻟﻮ ﺯﻱ ﻋﺸﺮﻳﻦ .. ﻭﻣﺤﺘﺎﺟﻴﻦ
ﺣﻖ ﻛﺮﺍﺳﺔ ﻣﺎ ﻻﻗﻴﻦ
ﻭﺑﺲ ﻋﺎﻳﺸﻴﻦ ﻋﻠﻰ ﺍﻟﻠﻪ .. ﻣﺎ ﻗﺎﺩﺭﻳﻦ
ﻳﺴﺪﻭﺍ ﺍﻟﺪﻳﻦ
ﻭﻧﺎﺱ ﺗﺎﻧﻴﻴﻦ .. ﻣﺮﺗﺎﺣﻴﻦ .. ﻭﻫَﻢ ﻓﻲ
ﺍﻟﺪﻧﻴﺎ ﻣﺎ ﺷﺎﻳﻠﻴﻦ
٭ ٭ ٭ ٭
ﻭﻳﺎﻣﺎ ﻭﻳﺎﻣﺎ ﺗﻠﻘﻰ ﺑﻴﻮﺕ .. ﺑﻴﻮﺕ ﺻﺎﺧﺒﺔ
ﻭﺑﻴﻮﺕ ﻻ ﻟﻴﻬﺎ ﺣﺲ ﻭﻻ ﺻﻮﺕ .. ﻭﻛﻞ
ﻧﺎﺱ ﺍﻟﺒﻴﻮﺕ ﺑﺘﻤﻮﺕ
ﻭﻳﺒﻘﻰ ﺍﻟﺒﻴﺖ ﺷﺒﺮ ﻭﺍﺣﺪ .. ﻭﺑﻜﺮﺓ ﺗﻜﻮﻥ
ﺑﻴﻮﺗﻨﺎ ﻗﺒﻮﺭ
ﻻ ﻫﻢ ﻣﻮﻳﻪ ﻻ ﻫﻢ ﻧﻮﺭ .. ﻭﻳﺒﻘﻰ ﻣُﻨﺎﻧﺎ
ﻓﻲ ﺍﻟﺠﻨﺔ
ﻭﻧﻨﺴﻰ ﺣﻜﺎﻳﺔ ﺍﻟﺴُﺘﺮﺓ .. ﻭﺣﻜﺎﻳﺔ ﺍﻟﺮﻳﺪ
ﻛﺄﻧﻨﺎ ﻟﺤﻈﺔ ﻣﺎ ﻛﻨﺎ .. ﻭﻻ ﻓﺘﺸﻨﺎ ﻳﻮﻡ ﻋﻦ
ﺑﻴﺖ
ﺣﻠﻴﻞ ﺍﻟﺒﻴﺖ .. ﻭﻫﻢ ﺍﻟﺒﻴﺖ .. ﻭﻧﺎﺱ ﺍﻟﺒﻴﺖ
ﺣﻠﻴﻞ ﺍﻟﺪﻧﻴﺎ ﺑﺎﻟﻔﻴﻬﺎ !! ﻭﻛﻞ ﺍﻟﻔﻴﻬﺎ ﻻ
ﻣﺎﻟﻴﻬﺎ ﻭﻻ ﻣﻜﻔﻴﻬﺎ