”
______
أسأل مِنو..؟
بلا أقنعة - زاهر بخيت الفكي

أسأل منو..
عن الدمار الشايفو..
عن هذا الخراب..؟
عن الفساد..؟
استشرى دمّر للبلاد..
دمّر مشاريع العباد..
وين وِلادِك يا بلد..؟
وين الشباب..؟
البينا في هذا الوطن
والفاتو كايسين اغتراب
خلوهُا أرضُو بقت يباب..
وروُني كيف الحاوية جات..؟
شايلة الدمار شايلة الخراب
مليانة قالوا مُخدرات
أسأل منو..؟
ما لاقي أبداً من يُجيب..
وصّوني واللهِ الصِحاب..
شافوني بسأل عن فلان الكان فقير..
والمات زمان فيهو الضمير..
باللهِ ما تسأل كتير..
خليك بعيد لا تقترب..
يا سيدي والموضوع خطير..
ساعدنا يا خُوي بالسُكات..
أوعاكا أبداً لا تَجيب..
سيرة فلان الشال وفات..
أو صاحبو داك القالوا مات..
أنسى فارق للطريق..
بير الفساد بالجد عميق..
لا فيهو صاحب لا رفيق..
أنسى والموضوع خطير..
بُكرة من وطنك تطير..
من غيرنا تنتظر الفتات..
أنا منكم ما زول غريب..
عندي حق فيها الأرض
من حقي أسأل يا حبيب
ومين يجيب..؟
الجريدة
______