ﻣﻨﻮ ﺍﻟﺒﻘﺪﺭ ؟؟
ﻳﻜﻨﺲ ﻓﻮﺿﺘﻚ ﺟﻮﺍﻱ !
ﺑﻮﺍﻗﻲ ﺍﻟﻮﺣﺸﺔ ﻣﺮﻣﻴﺔ ..
ﺳﻘﻒ ﺣﻠﻤﻚ ﻣﻐﺒﺮ ﻫﻢ
ﻭﺗﺤﺖ ﺍﻟﺒﺎﻝ
ﻣﺸﺘﺖ ﺷﻮﻗﻲ ﻛﻤﻴﺔ ..
ﻋﻠﻰ ﻣﺪ ﺍﻟﺒﺼﺮ ﺍﺣﺰﺍﻥ
ﺩﻣﻮﻉ ﻭﺷﻤﻮﻉ
ﻭﻛﻢ ﺍﺷﺠﺎﻥ
ﻭﺭﻕ ﺧﺎﻃﺮ ﻣﺠﺪﻉ ﺳﺎﻱ !
ﻣﻨﻮ ﺍﻟﺒﻘﺪﺭ ؟ !
ﻳﺮﺗﺐ ﻓﻮﺿﺘﻚ ﺟﻮﺍﻱ ..!
ﺑﺘﺘﺬﻛﺮ
ﺑﺘﺘﺬﻛﺮ ﻣﻼﻳﺎﺗﻚ؟ !
ﻣﻮﺭﺩﺓ ﺯﻫﺮﺓ ﺑﻤﺒﻴﺔ ..
ﻣﻄﺮﺯﺓ ﺑﻲ ﻋﺸﻢ ﺟﻴﺘﻚ
ﺗﻬﺒﻬﺐ ﻓﻲ ﺑﺮﻧﺪﺗﻨﺎ
ﻣﻔﺮﺷﺔ ﺭﻳﺪ ﻭﻣﻨﺴﻴﺔ ..
ﺃﻭﺽ ﺣﺴﻚ ﻣﻘﻐﻠﺔ ﺳﺎﻱ !
ﻣﻨﻮ ﺍﻟﺒﻘﺪﺭ
ﻳﺮﺩ - ﻟﻲ - ﻏﺮﺑﺘﻚ ﺟﻮﺍﻱ !
ﻗﺒﻞ ﻣﺎ ﺗﺴﻮﻗﻚ ﺍﻻﻗﺪﺍﺭ
ﺍﻛﻨﺎ ﻧﺒﺎﺭﻱ ﺧﻄﻮﺍﺗﻚ
ﻧﺸﻴﻞ ﺗﺮﺑﺔ ﻭﻧﺼﺮﻫﺎ ﺧﻴﺖ
ﻧﻌﺒﻴﻚ ﺑﻲ ﻣﻼﻣﺢ ﺍﻟﺒﻴﺖ
ﺩﻩ ﺣﻮﺵ ﺟﺪﻙ
ﻭﺩﻩ ﺍﻟﺪﻛﺎﻥ
ﻭﺩﻩ ﺍﻟﻤﺨﺰﻥ
ﻭﺩﺍﻙ ﺍﻟﻨﻴﻢ
ﻭﺩﻩ ﺍﻟﺪﻳﻮﺍﻥ
ﺍﻭﻋﻚ ﺗﻨﺴﻰ ﻏﺮﺓ ﺍﺑﻮﻙ
ﻭﺳﺒﺤﺔ ﺟﺪﺗﻚ ﺟﻨﺒﻚ
ﻭﺃﺫﺍ ﻛﺘﺮﺕ ﻣﻌﺎﻧﺎﺗﻚ
ﺍﻭﻋﻚ ﺗﻨﺴﻰ ﺃﻧﻚ ﺯﻭﻝ
ﻣﺸﺒﻊ ﺑﻲ ﺗﻘﻰ ﻭﺍﻳﻤﺎﻥ
ﺍﺫﺍ ﺳﺎﻗﻚ ﻫﻮﻯ ﻧﻔﺴﻚ
ﺗﺬﻛﺮ ﻟﻮ ﺿﻤﻴﺮﻙ ﻣﺎﺕ
ﺣﻘﻴﻘﺔ ﺟﻮﻫﺮﻙ ﺇﻧﺴﺎﻥ ..
ﻣﻨﻮ ﺍﻟﺒﻘﺪﺭ
ﻳﺰﻳﻞ ﺻﻮﺭﺗﻚ ﻣﻦ ﺍﻟﺠﺪﺭﺍﻥ ! ؟
ﺑﺘﺘﺬﻛﺮ ﺗﻴﺎﺑﻚ ﻟﻲ
ﻫﺪﻳﻚ ﻣﺠﺪﻭﻋﺔ ﻣﻦ ﻓﺘﺎ
ﻫﺪﻳﻚ ﻣﺮﺯﻭﻋﺔ ﻓﻲ ﺍﻟﺪﻭﻻﺏ
ﻭﺷﻴﻦ ﻓﺎﻳﺪﺕ ﻣﺮﻭﻗﻦ ﻫﻦ
ﺑﻼ ﻭﺷﻢ ﺍﻟﻘﻠﺐ ﻋﺎﻫﺎﺕ
ﺣﺮﻳﻢ ﺍﻟﺤﻠﺔ ﺟﺖ ﻋﺎﺭﻓﺎﺕ
ﻳﻨﺎﺩﻥ ﻓﻴﻨﻲ ﺑﻲ ﺍﺳﻤﻚ
ﻳﺸﻤﻦ ﻓﻴﻨﻲ ﻓﻞ ﻋﻄﺮﻙ
ﻳﺪﻣﻦ ﻗﻠﺒﻲ ﺑﺎﻟﺤﺴﺮﺓ
ﻳﺼﺤﻦ ﺣﻮﺟﺘﻚ ﺁﻫﺎﺕ
ﻫﻤﻮﻣﻚ ﻟﺴﻪ ﻣﺸﺮﻭﺭﺍﺕ
ﻋﻠﻰ ﺣﺒﻞ ﺍﻟﺼﺒﺮ ﻳﺒﺴﻦ !
ﻫﺪﻣﻮﻙ ﻟﺴﺔ ﻣﺎ ﻧﺸﻔﻦ !
ﺑﺘﺘﻘﻄﺮ ﺳﻤﺎﺣﺔ ﻭﺣﻦ
ﻭﻓﺮﺣﻚ ﻓﻴﻨﻲ ﻳﺎ ﺍﻟﻤﺤﺒﻮﺏ
ﺑﻴﺂﺧﺪ ﻓﻲ ﺣﻘﻦ ﺳﺎﻋﺎﺕ
ﺁﺭﻳﺘﻚ ﻳﺎﺥ ﺗﺤﺲ ﺍﻟﺒﻲ
ﺁﺭﻳﺘﻚ ﻳﺎﺥ ...
ﺗﺘﺨﻴﻞ؟
ﺑﻌﺪ ﻟﻴﻞ ﺍﻟﺤﺰﻥ ﻣﺎ ﻳﻌﻢ
ﺑﺸﻮﻑ ﻭﺷﻚ ﻭﺭﺍ ﺍﻟﻐﻴﻤﺎﺕ
ﺑﺸﻮﻓﻚ
ﻓﻲ ﺍﻟﻨﺨﻞ ﻃﺎﻟﻊ
ﺑﺸﻢ ﻋﻄﺮﻙ ﺍﺫﺍ ﻃﺎﻟﻊ
ﺑﺤﺲ ﺑﻲ ﻗﻠﺒﻲ ﻣﺘﺴﺎﺭﻉ
ﻭﺣﺲ ﻧﻘﺮﻙ ﻋﻠﻰ ﺍﻻﺑﻮﺍﺏ
ﺑﺸﻮﻓﻚ ﺯﺣﻤﺔ ﻓﻲ ﺍﻟﺸﺎﺭﻉ
ﺑﺸﻮﻑ ﺻﻮﺭﻙ ﻋﻠﻰ ﺍﻟﻼﻓﺘﺎﺕ
ﺑﺤﺲ ﺟﻴﺘﻚ ﺗﻜﻮﻥ ﺭﻣﻀﺎﻥ
ﺗﻜﻮﻥ ﺍﻟﻔﻄﺮ ﺗﻜﻮﻥ ﺍﺿﺤﻰ
ﺑﻨﻮﻡ ﻭﺍﻟﺪﻣﻌﺔ ﻓﻲ ﻋﻴﻨﻲ
ﺑﺤﻮﻡ ﻓﻲ ﺣﻠﻤﻚ ﺍﻻﺧﻀﺮ
ﺑﻨﻮﻣﻚ ﻭﺗﺎﻧﻲ ﻣﺎﺑﺼﺤﻰ
ﻭﺗﺘﺴﺮﺏ ﻋﺮﻭﻗﻲ ﺳﻤﻮﻡ
ﺣﺲ ﺍﻟﺮﺍﺩﻱ ﻓﻲ ﺍﻻﺧﺒﺎﺭ
ﺃﺫﺍ ﺳﺎﻛﺖ ﻧﻄﻖ ﺍﺳﻤﻚ
ﺑﻘﻮﻡ ﻣﻔﺰﻭﻋﺔ ﻣﻦ ﺍﻟﻨﻮﻡ
ﺑﻘﻮﻡ ﻣﻮﺟﻮﻋﺔ ﻓﻴﻨﻲ ﺍﻟﻨﺎﺭ
ﻋﻠﻴﻚ ﺧﺎﻃﺮ ﺍﻻﻳﺎﻡ ﺍﺭﺟﻊ
ﻣﻠﻴﺖ ﺳﻨﻴﻦ ﺍﻻﻧﺘﻈﺎﺭ
ﻋﻠﻰَ ﺟﺴﻤﻲ ﺍﻻﻟﻢ ﺑﻘﻊ
ﺣﻴﻂ ﺩﻫﺸﺘﻨﺎ ﺗﺘﻮﻗﻊ
ﻗﻤﺎﺵ ﺍﻟﺴﺘﺮﺓ ﺑﺘﺮﻗﻊ
ﻣﻨﻮ ﺍﻟﺒﻘﺪﺭ ﻳﺮﺗﺐ ﻓﻮﺿﺘﻚ ﺟﻮﺍﻱ . .! ؟
ﻣﻨﻮ ﺍﻟﺒﻘﺪﺭ ﻳﺘﻜﻞ ﻭﺟﻌﺘﻚ ﺗﺎﻻﻱ
ﻣﻨﻮﺍﻟﺒﻘﺪﺭ ﻳﺴﺪ ﺧﺎﻧﺘﻚ
ﻣﻨﻮ ﺍﻟﺒﻘﺪﺭ ﻳﻜﻮﻧﺎ ﺁﻧﺎﻱ
ﺑﻼﻙ ﺍﻟﺪﻧﻴﺎ ﻣﺎ ﺑﺘﺒﻘﻰ
ﻭﻻ ﺑﻘﺪﺭ ﺍﻋﻴﺸﺔ ﺑﺮﺍﻱ