مسدارالثورة السلمية
يا بشه و ود عثمان وباقي عقابو
اخير تختونا والتهديد تقفّلو بابو
نحن مرقنا سلميةحفاظاً للبلد وترابو
وإن درتو الدواس مرحب وألف حبابو
اولادنا القبيل نزلوا الشوارع عُزّل
قالوا يحصلو البلد الخراب الفضّل
ماقاصدين حرب سلمية تسقط ترحل
ومادام درتها ارجى البجيك والبحصل
وكل الشعب طالع وناشد السلمية
مافضّل احد شِيبو وشباب وبنية
حالفين باليمين نقطع روؤس الحيّه
والهددنا بندوسو ونخلف الكيّه
ونحن الجبنا غردون بي عتداو وناسو
ونحن والفي المحاصات جربونا وقاسو
ماتهددنا بالكجر الملثمة ناسو
نحن الشعب واعوانك تحت لمداسو
وكل شبابنا لو قُتل واستَشهد
ما بتطفيها ثورتنا وتقيف او تبرُد
إلا نسقطك انت وعلي والاكرد
ونخليك عِظى وكل العوالم تشهد
يا شهدانا في الجنات نومو ارتاحو
وكل الشعب في وراكم نذر ارواحو
حالف يكمل الثورة ويحصدو كفاحو
ينتصر الوطن يشرق يلالي صباحو