#الرهيوة

مجاهد يوسف

مع نسايم الليل الخريفية السمحة والكهربة الكاطعة مرق السني عنقريبو وجراهو في نص الحوش والمطرة اكانت صابة من قبيييل
الساعة هسع قربت تصل اطناشر والمطرة وقفت قبال المسلسلة تنتهي بي حبة ومع وقفتها كدي الكهربة كطعت
الحلة نايمة والسماء لسة شايل بس في هواء سايق عقاب السحاب كدي علي الصعيد والسني صنقع عاين للقمرة لقاها جارية وجارية وجارية وكاتحة كتح شين وسرح في كتحيها دا واتخيل روحو رهوة اي رهوة وهو زاتو رهوة ساكت لمن الناس شدة مو طيرة ساكت بقولولو الرهيوة
اها في سرحتو ديك وعلى حس انو رهوة اتخيل انو طار فوق وحلف بالتطلع روحو ان ما وصل القمرة دي الليلة ماهو معود صاد عشان يشوف شن فيها ويشوفها زاتها قدر شنو وكمان قرر يكطع ليهو منها حتة يجيبها معاهو ويربطها فوق شدرة اللالوب الفي الحوش وللا في اللبخة الجمب الباب عشان لمن تجي الضلمة والكهربة تكطع تضوي ليهم الفجة وحوشهم زاتو ما كبير وامكن كمان تضوي ليهم الحلة كلها
الفكرة عجبتو وقرر يكطع من القمرة حتة تانية ويجيبن فقشتين واحدي كبيرة وواحدة صغيرة ، الصغيرونة للحوش حقهم والفقشة الكبيرة يأجرها لناس الحلة والحلال الجمبهم وتبقى ليهو شغلة بدل العطال ويلم منها قروش يعرس بيهن التاية بت حكم القادر

بس المشكلة عندو حمد النيل ود عمو خاف بعد ما يجي من القمرة يسرق منو حتة قمراية من الماش يجيبن ديل لانو حمد النيل ما بخليهن ليهو بي اخوي واخوك
والعجب اكان عرفو بدور يعرس التاية بت حكم القادر ما بخليهو لانو حتو بريدها
وقرر يمشي يكلمو اول وجاء راجع صاد وساب القمرة وتترب نزل من عنقريبو في الليل داك فات ناس عمو داير يا يسوق معاو حمد النيل يا داك يحلف ليهو ما يسرق منو الحتة حقت القمرة
والحلة جتك نايمة اكان صوت الكلاب وحس الموية البتنقط من السبلوقات الانسدن ساعة المطرة بدلقان وللا حجر
مرق الشارع وما كان عندهم باب حوش والحلة كلها زقاقات ساكت وبيت ناس عمو الحيطة بالحيطة بس ديلك عندهم باب حق زنكي لقاو مقفول ومشى بهناك علي الديوان تاوق لقى حمد النيل نايم ويشخر ساي فكر يتلب بس الحيطة مبلولة وحقت طين اكان اتكل عليها ساكت بتقع وعمو كعب خلاس عندو سفروق اكان لقطو بيهو بشهيهو العافية وعمنول في كلب يومي بطلع في حيطتهم دي وعمو لمن زهج منو شترو بالسفروق هيلو جزا ليهو كرعينو اللربعة والسني خايف منو
اها العمل شنو ويصحي حمد النيل دا كيف
قام شال ليهو حصحاصات وقعد يجدع بيهن في حمد النيل وكلو كلو ما ناشو ولا حصحاصة ساي ما وقعت في العنقريب
قال يكورك ليهو وقولت يا ... سكت لانو مع المطرة والحلة الصانة دي الصوت بقى ماكن وليهو صدى وحمد النيل عر خلاس ونومو تقيل الكوراك زاتو ما بصحيهو
ورجع الرهيوة وصنقر تاني في العنقريب حقو عاين للسماء لقاهو صافي والقمرة بقت بييييضا عجبتو عجب وقرر تاني يطير ليها بس المرة دي ما يطير ليها فاضي ساي ويشيل معاو حاجة يكطعها بيها امكن يلقاها قوية وما بتنكطع ليهو بيديهو ساي ودخل البيت يفتش للمنجل وقدر ما فتش وكاس ما لقاو واتذكر شالو حمد النيل
لازم يمش يصحي حمد النيل ولازم يطير الليلة يكطع ليهو حتة من القمرة ويجيبها عشان لمن الكهربة تكطع وتجي الضلمة يضوي بيها الفجة
الدنيا خريف والسماء الليلة صافية وبكرة دي بتملي سحاب وبزرقن
وتاني رجع ناس عمو يصحي حمد النيل
لملم ليهو تاني حصحاص وقعد يجادع لمن واحدة من الحصحاصات وقعت لحمد النيل في صنقورو قام مخلوع يكورك واتلفت كدي واكان خواف وقلبو ماكن وشاف رويس السني وقعد يكورك الحرامي الحرامي وهو حلقومو عريض الفريق مع كوراكو والصنة والصدى المن المطرة كلو صحى والسني قام جاري داير يرجع البيت اكان باب الزنكي حق ناس عمو انفتح وعمو مرق بالسفروق والسني رجع في زقاقو داك وكتح وصوت كرعيهو في الاضنين وعمو شترو
اها السني جاري وجاري وجاري والسفروق وراهو وظط خبت ليهو في حجر وعتر ووقع علي خشمو بس مع وقعتو كدي اكان يسمع طاااخ السفروق لبع الحيطة القدامو والسني اتملى طين واتذكر انو رهوة وقدر ما حاول يطير ما طار عشان جناحو اتلكك في الطين ابى يمرق وقام علي حيلو والناس اتلموا فيهو دقوهو ونهروهو زييين ورجع عنقريبو وعاين للسماء والقمرة وزعلتن ساكت من الناس النهروهو ودقوهو ديل ابى كلو كلو يطير للقمرة وكيتن عليهم حلف ما يكطع ليهو منها حتة تضوي ليهم الفجة