قصيدة حب لفاطمة
‏
الشاعر احمد الفرجوني
يلا يا ست السماحة......
يلا نومى واخدى راحة......
شوفى بلدا... غير بلادا عشعشت فيها القباحة
العصافير الحزينة..
الفاقدة حرية صراحا....
من كفوفك...كان شرابا..
وكان..ضميرك.. ليها واحة....
كان بتشكى إليك هموما..
والظلم..والاستباحة.
كلمى الزول البلاقيك..
واحكى ليهو....بصراحة....
كلميهو..عن السحاب
الشاف..خلاف ساحاتنا ساحة..
وكيف شمسنا..بقت تضلم فى الافق..قبل اصطباحا..
كلميهو عن الكرامة..كيف بقت للذل مباحة........
كلميهو..عن الخفافيش..
كيف لقت فى بلادنا راحة..
وكيف تسبح بالطرب..
كلما اتعالت مناحة.
كلميهو..عن الضرورة..
والتحلل..والتمكن..
والازاحة..............
عن دقون..قتل العباد ظلما..
باسم الدين...
نجاحا........
وسفسفة قوت المساكين....
بيهو..يزداد انشراحا...........
كلميهو..عن قلوبنا..
كيف مباليانا الخفافيش فى جراحا......
ترضع الدم..بلحاها............
وتنهز..........الفرص.........
المتاحة........
والمساكين بالغباين..
سابحة فى الدماع..
سباحة...........
غايتو يا فاطمة الجميلة..
عشتى دنياك........
بكفاحا...........
عشتى بى شرف المناضل..
قابضة ايدك..
فى سلاحا.....
الضباع..مهما استشاطت..
والكلاب..
ازداد نباحا.....
سرتى دربك..بشجاعة...
وقلتى قولك..
بسجاحة.....
عشتى لوطنك..
ومتى..
برضو لوطنك..
سماحة.......
يلا..
يا ست السماحة......
يلا نومى واخدى راحة..
شوفى بلدا غير بلادا
عشعشت فيها القباحة.
‏
احمد الفرجونى.
فينكس فى 14 اغسطس 2017